Редактирование: Перевощиков Генрих

'''Генрих Ксенофонтович Перевощиков''' ((1937-тӥ ар 14-тӥ куарусён, Игра ёрос, Пирнэзь (Верх-Нязь) гурт – 2016-тӥ ар 23-тӥ коньывуон, Ижкар) – удмурт гожъяськись, Россиысь гожъяськисьёслэн огазеяськонзылэн ёзчиез, Удмурт Элькунысь калык писатель.

[[Файл:Pgk.jpg|170px|right|Генрих Перевощиков]]

=Улон сюресэз=

Генрих  Перевощиков, вордскиз '''1937'''-тӥ арын 14-тӥ куарусёнэ Игра ёросысь Пирнэзь (Верх-Нязь) гуртын. <ref name="писатели"> Ермаков Ф. Генрих Перевощиков (1937) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 90–91. </ref> 

Чутырь черкогуртысь сизьым классъем школаез йылпумъяса, Ижкарысь индустриальной техникуме пырыны малпаз. Пияш ньыль арескын атайтэк кылиз. Ожмаськыны Ленинградэ нуизы вал, '''1941'''-тӥ арын 1-тӥ ноябре сое гуртэ машинаен вайса кельтӥзы, улэп но, ӧвӧлгес но – сыӵеен вуттӥзы. Оже трос пыриськыса вуттымтэ, немецъёс бомба куяку, бадӟын секыт из тыбыраз усем. Кема ӧз ул ни, бертэмез берегес ик кулӥз. <ref name="перевощиков"> Перевощиков Г. Генрих Ксенофонтович Перевощиков / записала Лия Малых // Удмурт кизилиос : очерки, зарисовки, интервью (2001-2007). – Ижевск, 2007. – С. 120–121. </ref> Нош анаез пизэ кыдёке келяны пумит луиз, шуиз: «Уть ай, дӥсед но, пыдкутчанэд но городэ мыноно кадь ӧвӧл. Сиён ласянь но шугомод. [[Файл:Pgk2.jpg|250px|thumb|left|Удмурт радиоын ужакуз, 1968]]Мынод ке, ас гуртмылы матэгес мын, пие. Татын картошкамы, мукет бакча сиёнъёсмы вань. Шуге-леке вуид ке, пыдын но кызьы ке бертылэмед, салазкиен но нуллэмед луоз». Озьы тӥни Геня (гуртоосыз сое озьы шуо вал) Якшур-Бодья педучилищее дышетскыны пыриз. Та дырозь кутэн ветлэм мурт, татчы анаезлэн ӝужыт кунчиё ныл дыр катаеныз мынӥз. Собере Якшур-Бодья педучилищеез ворсазы, дышетскисьёсты Дэбес педучилищее выжтӥзы, сое Генрих Перевощиков '''1954'''-тӥ арын йылпумъяз. Со аре ик Удмурт пединститутлэн история но филология ёзэтаз дышетскыны пыриз, отысь литературной кружоке ветлӥз. Эшъёсыз сямен ик, гожъяськыны кутскиз, куд-ог веросъёссэ «Молот» журналын но печатлазы. Анаез улэп ӧй вал ни бере, дышетскыкуз ик ужаны интыяськиз: Удмурт радиоын солы кылысь кылэ берыкъян удысэз оскизы. 

'''1960'''-тӥ арын пединститутэз йылпумъямез бере Генрих Перевощиков Удмурт радиоын '''1976'''-тӥ арозь ужаз, егитъёслы передачаосты дасянъя ёзэтын тыршиз. Солэн тросэз ужъёсыз Москваысь «Юность» радиостанцилэн тулкымъёсаз но чузъяськылӥзы, нош куд-ог гожтосъёсыз нимаз книгаосын но потылӥзы: «Омырын — Меркушев» (Ю. Кедровен ӵош гожтэм документальной повесть), «Кыдазы егитъёс» но «Куашетӥз сильтӧл» очеркъёсын бичетъёс. Та сузьетъёсыз понна писатель Удмуртиысь комсомоллэн премиеныз пусъемын. <ref name="пантелеева"> Пантелеева В. Генрих Перевощиков (1937) // Удмурт литература : 10–11-тӥ классъёслы учебник / С. Т. Арекеева [и др.]. – Ижевск, 2008. – С. 300-309. </ref>

Та аръёс ӵоже радиожурналистын ужатозяз Генрих Перевощиков вордскем шаерзэ, оло, ас гуртсэ кадь  ик ӟеч тодыны вуиз. Зэмос улонысь сузен-кобыен кадь омыръям материалъёсыз, командировкаын дыръяз адӟылэмъёсыз, кылэмъёсыз сярысь ачиз но зэмос артист сямен мадьылӥз. Ма, армиысь самодеятельностьын со зэмзэ ик артист вал. Воинской частьсы сылэм интыын – Украинаысь Мукачёво городын ортчыкуз одно ик кин ке но, спектакльёсын шудэмъёсызъя тодмаса, пальпотоз я серектоз вал солы. <ref name="поздеев"> Поздеев П. Сюлэмшуго дунне : Генрих Перевощиковлы – 60 // Кенеш. – 1997. – № 9. – С. 22–25. </ref> 
 
'''1976'''–'''1978'''-тӥ аръёсы Удмуртиысь Писательёслэн огазеяськоназы чеберлыко литератураез чаклась-эскерись но вал. <ref name="писатели" />

Генрих Перевощиковез отчы дэмлаз Флор Васильев. Со вакытэ Ф. Васильев вал Удмуртиысь писательёслэн тӧрозы но «Молот» журналлэн валтӥсь редакторез. <ref name="поздеев" />

'''1978'''–'''1981'''-тӥ аръёсы Генрих Перевощиков Удмуртиысь Писательёслэн огазеяськоназы тӧроез вал. 1981-тӥ арын быдэсак гожъяськон уже выжиз. <ref name="писатели" /> 

'''1992'''-тӥ арысен «Кенеш» журналын ужа, проза удысэн кивалтэ.

Удмурт писательёс пӧлысь Генрих Перевощиков нырысьсэ «Йыбыртты музъемлы» тетралогия кылдытӥз, со понна 1987-тӥ арын Удмурт шаерлэн Кун премиеныз пусъемын. 

Удмурт прозаиклэсь творчествозэ кунгож сьӧрын но тодо. 2005-тӥ арын Генрих Перевощиковлы асьме писательёс пӧлысь нырысезлы «Узы сяськаян вакытэ» повестез понна Финляндиысь М. А. Кастрен огазеяськонлэн нырысетӥ премиез сётэмын.

=Гожъямъёсыз сярысь=

Генрих Перевощиков — туала удмурт литератураысь одӥгез валтӥсь прозаик. Ас мытэм удыссэ со ӝыны даур пала ини «гыре». <ref name="пантелеева" />
[[Файл:Pgk3.jpg|300px|thumb|right| Удмурт литературно-творческой кружок,УГПИ,1958]] 
Писательлэсь быдэс творческой сюрессэ чакласа, гожъяськон манерезлэсь куд-ог воштӥськонъёссэ шӧдыса, тодосчи но критик [[Шибанов Виктор|В. Л. Шибанов]] гожтэ: «Син шоры тани ма йӧтэ: быдӟалазыя соос (произведениос) пумен пичиесьгес, вакчиесьгес луо. Со воштӥськонэз тазьы возьматыны луэ: «тетралогиысен — роман пыр — повесте». Со вакытэ ик эскероно ужпумъёс ялан лэчытгес но лэчытгес сэрттӥсько». 
Генрих Перевощиковлэсь чеберлыко дуннезэ нырысьсэ пыр-поч эскериз П. К. Поздеев. Со шуэ: «Генрих Перевощиков вань удмурт прозаикъёс пӧлысь тани маин но висъяське: улытозяз со одӥг кылбур но гожтымтэ; нырысь книгаез ик — «Тӧдьы гырлы» — нылпиослы веросъёсын повесть жанрен дасямын вал ини; «Йыбыртты музъемлы» тетралогиезлэн нырысетӥ книгаез '''1977'''-тӥ арын печатласькем дырысен дугдылытэк ужа ас вакытысьтыз лэчыт ужпумъёсты эскерон, сэрттон-пертчон бордын...» <ref name="поздеев" />

Кыкез ик тодосчиос прозаиклэн лэчыт ужпумъёсты ӝутэмезлы саклык висъяло. Тани «Йыбыртты музъемлы» тетралогизэ («Йыбыртты музъемлы», '''1977''', «Югдонын» ӟардэ», '''1980''', «Тулкымлы пумит», '''1981''', «Нуназе азьын», '''1986''') ас вакытаз тодосчиос-дунъясьёс гуртысь ужпумъёс сярысь произведениос радэ пуктӥзы, литератураысь производственной ӧре пыртӥзы вал. Та ласянь ик ньыль романъёслэсь пуштроссэс но, сюжет гердъёссэс но, валтӥсь геройёслэсь образъёссэс но дунъязы-эскеризы. Нош дыр ортчемъя тетралогилэн ватэм пуштросэз  но адӟиськыны ӧдъяз, конфликтэз но мукет сяменгес усьтӥськиз, кылдытэм характеръёс шоры учконъёс но воштӥськыны кутскизы. 

В. Л. Шибанов со пумысен гожтэ: «Кӧня ке дыр ортчыса, Г. Перевощиковлэсь тетралогизэ ХХ-тӥ даурлэн шорысьтыз удмурт улонлэсь энциклопедизэ сямен эскерыны кутскозы. Мукет сямен вераса, вакытлэсь тодметъёссэ валан понна, оло, история учебникъёс но. Прозаик умой возьматӥз, мар со командно-административной система но тоталитаризм. <ref name="шибанов">[http://elibrary.unatlib.org.ru/handle/123456789/8253 Шибанов В. Капчи-а адямилыкез утьыны? : Генрих Перевощиковлы – 70 // Кенеш. - 2007. – № 8. – С. 77–87.] </ref>

Генрих Перевощиковлэсь гожъяськон манерзэ ӵемысь публицистлэн ужан амалъёсыныз ӵошато. Прозаик историын азьвыл ортчем ужпумъёс сярысь уг гожъя, со али, асьме вакытысь ужпум-югдуръёсты валаны тырше. Писательлэн котькуд гожтосаз мур гражданской позициез адӟиське. Со герӟаськемын туала вакытэ адямилыкез утён сярысь сюлмаськонэн. Солэн произведениосыз лыдӟисез мур малпаськонэ вутто, аслыксэ валаны, адямилыко луыны, улон шоры сайкыт но ӟырдыт учконзэ (позицизэ) кыдатыны юртто. Та валатонъёсты сэрттыны-пертчыны тыршон, соослы дунъет сётон «Йӧвалег» роман-дилогиын но ('''1984''', '''1989''') умой адӟиськиз.<ref name="пантелеева" />

«Йӧвалег» дилогия но, лыдӟись доры вуыса, трос вераськонъёс кылдытӥз. Угось роман-дилогия нимызъя но (нырысетӥ книгаез — «Гужем лымы», яке «Вордскем нунал», кыкетӥез — «Йӧвалег»), ӝутэм ужпумъёсызъя но, геройёсты суредан амалъёсызъя но, кылызъя но со вакытысь гожтосъёслэсь трослы висъяськиз.

«Молот» журналын «Гужем лымыя» нимысьтыз ченгешон-дискуссия но кылдӥз (1984. № 9, 10, 12; 1985. № 2, 3; 1987. № 9; 1988. № 12). 
Ӟуч писательлэн В. И. Емельяновлэн малпамезъя, Генрих Перевощиков дилогияз «... удмурт гожъяськисьёс пӧлысь нырысьсэ ноку быронтэм, весяк улӥсь темаос борды ӟеч-ӟеч басьтӥськиз — ог-огдэ жалян, ог-огедлы юрттон, адямилык». Со дыре ик кылдӥзы выль учконъёс но. Тани В. Л. Шибановлэн чакламезъя, та гожтосын тужгес но пусйымонэз соиз: «... гурт ужпумъёсты возьматонысь автор пумен кар-город ужпумъёсы выже... Валтӥсь геройлэн улонэз огдыре кар но гурт вискы пачкамын... Дилогилэн трагической югдуръёсын пачылмемез (кылсярысь, кутсконысеныз пумозяз суицид ужпум ӝутӥське) возьматэ: югыт но пеймыт ог-огенызы люконтэм герӟаськемын-пӧлэстӥськемын».
[[Файл:Pgk4.jpg|300px|thumb|left|Кизнер ёросын лыдӟиськисьёсын пумиськон]]
Озьыен, вань верамъёсты эскерыса, «Йӧвалег» дилогиез валтӥсь конфликтэзъя нравственно-психологической, нравственно-драматической шуыны луоз. Нош ӝутэм ужпумъёссэ  нимаз чаклано ке, соос трос но пӧртэм: творческой адямилэн (писательлэн) улонысьтыз сюлэмшугъяськонъёсыз, писательёслэн ог-огенызы но кивалтӥсьёсын кусыпъёссы, геройёслэн семья кусыпъёссы (паськытгес — пиосмурт-кышномурт, яратон кусып-гердъёс), гурт но город кусыпъёс (паськытгес - урбанизация ужпум), астэ ачид быдтон  ужпум, котькыӵе учыре адямилыкез утён ужпум. Та паськыт но мур пуштросо произведение '''1980'''-тӥ аръёсысь удмурт прозаын выль вамыш луэ. <ref name="пантелеева" />

Удмурт прозаиклэн мукетыз ужез – «Ыш-ыш-ыш!» повесть – «Горбачёв вакытысь» «Ельцин вакытэ» выжытӥз, улонын бадӟым воштӥськонъёс ортчизы. «Ыш-ыш-ыш!» бере сокугес ик «Ӧб-ӧб-ӧб!» но «Эх-ма-а!» потӥзы, огазьын соос «Сюлэмтэм дунне» трилогия кылдытӥзы. Син шоры йӧтэ: куинезлэн ик повестьёслэн нимзы междометио пыр сётэмын, озьы автор туала дыре кылдэм югдурлы ас дунъетсэ вера. 
Огломак учконо ке, «Сюлэмтэм дуннелэн» тужгес бадӟым аспӧртэмлыкез со бордын: Генрих Перевощиков валэктыны тырше, малы туала город удмуртъёсты мурт каре. Асьмеос туала городэ интыяськыны ӧм быгатэ ке, ӵуказе нуналмы понна нюръяськыны, бадӟым вожвылъяськонын (конкуренциын) вормыны ум быгатэ ук. Но урбанизацилэн мукет кышкытлыкез но вань – со удмуртлыкмес быдтыны быгатоз. <ref name="шибанов" />
     
Генрих Перевощиковлэн азьло произведениосаз сямен ик, «Шелеп» («Кенеш», '''2000''') повестяз но азьпал радэ потэ «чылкыт сюлэмо адями – шимес дунне»  конфликт.

Писатель «Узы сяськаян вакытэ» повестяз но чылкак мукет ӧре ӧз кожы. Книгаысь книгае, одӥг югдурысь мукет югдуре со азьвыл ӝутэм ужпумъёссэ азинтэ. <ref name="шибанов" />
<br clear="both" />
=Наградаосыз но премиосыз=
 
Удмуртиысь комсомоллэн премиезлэн лауреатэз, '''1968''' .

Удмурт шаерлэн Кун премиеныз пусъемын, '''1987'''.
 
М. А. Кастрен нимо огазеяськонлэн (Финляндия) лауреатэз , '''2005'''.

Эшъяськон орден, '''2006'''.

=Библиография=

==Книгаосыз==

[http://catalog.unatlib.org.ru/cgi-bin/1/cgiirbis_64.exe?LNG=&C21COM=F&I21DBN=IKNBU&P21DBN=IKNBU&Z21ID= В пору цветения земляники : повести / пер. А. Демьянов, В. Емельянов. – Ижевск : Удмуртия, 2008. – 286 с.] 

[http://catalog.unatlib.org.ru/cgi-bin/1/cgiirbis_64.exe?LNG=&C21COM=F&I21DBN=IKNBU&P21DBN=IKNBU&Z21ID= Гололед : роман / пер. с удмурт. и авт. послесл. В. Емельянов. – Ижевск : Удмуртия, 1991. – 383 с.]

[http://elibrary.unatlib.org.ru/handle/123456789/4875 Гужем лымы : повесть. – Ижевск : Удмуртия, 1984. – 264 с.]

[http://catalog.unatlib.org.ru/cgi-bin/1/cgiirbis_64.exe?LNG=&C21COM=F&I21DBN=IKNBU&P21DBN=IKNBU&Z21ID= Йӧвалег : роман-дилогия. – Ижевск : Удмуртия, 1988. – 504 с.]

[http://catalog.unatlib.org.ru/cgi-bin/1/cgiirbis_64.exe?LNG=&C21COM=F&I21DBN=IKNBU&P21DBN=IKNBU&Z21ID= Йыбыртты музъемлы : роман. Нырысетӥ книга. – Ижевск : Удмуртия, 1977. – 259 с.]

[http://elibrary.unatlib.org.ru/handle/123456789/4640 Йыбыртты музъемлы : роман-тетралогия. Нырысетӥ томез / азькылэз П. К. Черновлэн. – Ижевск : Удмуртия, 1992. – 496 с.]

[http://elibrary.unatlib.org.ru/handle/123456789/4608 Куашетӥз сильтӧл : очеркъёс. – Ижевск : Удмуртия, 1975. – 128 с.]

[http://elibrary.unatlib.org.ru/handle/123456789/4602 Кыдазы егитъёс : очеркъёс. – Ижевск : Удмуртия, 1970. – 103 с.]

[http://elibrary.unatlib.org.ru/handle/123456789/4610 Нуназе азьын : роман. – Устинов : Удмуртия, 1986. – 247 с.]

[http://catalog.unatlib.org.ru/cgi-bin/1/cgiirbis_64.exe?LNG=&C21COM=F&I21DBN=IKNBU&P21DBN=IKNBU&Z21ID= Поклонись земле : роман / пер. с удмурт. Ю. Галкин. – М. : Современник, 1986. – 445 с.]

[http://catalog.unatlib.org.ru/cgi-bin/1/cgiirbis_64.exe?LNG=&C21COM=F&I21DBN=IKNBU&P21DBN=IKNBU&Z21ID= Поклонись земле : роман-трилогия / авториз. пер. с удмурт. Н. П. Кралиной , вступит. ст. З. А. Богомоловой. – Ижевск : Удмуртия, 1983. – 580 с.]

[http://catalog.unatlib.org.ru/cgi-bin/1/cgiirbis_64.exe?LNG=&C21COM=F&I21DBN=IKNBU&P21DBN=IKNBU&Z21ID= Полдень : роман. 4-я книга тетралогии "Поклонись земле" / пер. с удмурт. Н. П. Кралина. – Устинов : Удмуртия, 1987. – 320 с.]

[http://elibrary.unatlib.org.ru/handle/123456789/3684 Сюлэмтэм дунне : романъёс, повестьёс / беркылзэ гожтӥз П. К. Поздеев. – Ижевск : Удмуртия, 1997. – 776 с.]

[http://elibrary.unatlib.org.ru/handle/123456789/4510 Тӧдьы гырлы / Г. Перевощиков. – Ижевск : Удм. кн. изд-во, 1960. – 56 с. : ил.]

[http://catalog.unatlib.org.ru/cgi-bin/1/cgiirbis_64.exe?LNG=&C21COM=F&I21DBN=IKNBU&P21DBN=IKNBU&Z21ID= Тӧдьы куака : роман. – Ижевск : Удмуртия, 1994. – 328 с.]

[http://unatlib.org.ru:82/cgi-bin/irbis64r_81/cgiirbis_64.exe?C21COM=S&I21DBN=IKNBU&P21DBN=IKNBU&S21ALL=IN=1000031103 Тулкымлы пумит : роман. – Ижевск : Удмуртия, 1981. – 240 с.]

[http://elibrary.unatlib.org.ru/handle/123456789/4599 Тулкымлы пумит : роман-тетралогия. 2–тӥ томез. Куинетӥ но ньылетӥ книга. – Ижевск, 1993. – 432 с.]

[http://elibrary.unatlib.org.ru/handle/123456789/4639 Шелеп : повестьёс, верос ; Жестокосердие : повести. Трилогия / пер. с удмурт. В. Емельянов. – Ижевск : Удмуртия, 2004. – 463 с.]

[http://elibrary.unatlib.org.ru/handle/123456789/4609 "Югдонын" ӟардэ : роман. – Ижевск : Удмуртия, 1980. – 328 с.]

==Статьяосыз== 

Тӧдьы гырлы  // Азвесь кышетэн толэзь : веросъёс : семьяын лыдӟон книга / люказ но радъяз В. Н. Ившин. – Ижевск, 2007. – С. 88–89.

[http://elibrary.unatlib.org.ru/handle/123456789/6093 Щепка : повесть / пер. с удмурт. Анатолия Демьянова // Луч. – 2007. – N 3/4. – С. 10-17 ; № 5/6. – С. 7-29 ; № 7/8. – С. 9-39 ; № 9/10. – С. 7-23.]

Яратӥсь сюлэмъёс : "Йыбыртты музъемлы" тетралогиысь ; Ыш-ыш-ыш... :  повестьысь оглюкетэз // На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 117–119.


'''Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды [http://unatlib.org.ru/index.php?option=com_content&view=article&id=474&Itemid=319 Удмурт Элькунысь йӧскалык библиотекалэн электрон каталогъёсызъя].'''

=Уже кутэм литература=

<references />

[[Категория:Современные удмуртские писатели|Перевощиков Генрих]]