Редактирование: Огнев Владимир Николаевич

== '''Ужаны дышетӥз музъем''' ==

[[Файл:Ognev.jpg|thumb|left|Огнев В. Н.]]
'''Владимир Николаевич Огнев быдэс улонзэ гурт удыслы, ӟеч специалистъёсты дасянлы сӥзиз. Гурт удыс наукаосъя кандидат, трос книгаослэн, научной статьяослэн авторзы. Солэн гожтэм учебникъёсызъя тодон-валан люкало туала студентъёс. Владимир Николаевич пусъемын Удмурт Элькунлэн Данъян грамотаеныз, Удмурт Элькунысь гурт удысысь дано ужась луэ. Али Дэри ёросысь Первомайской каргуртын ужа — Ижысь гурт удысъя академилэн гурт удысын ужасьёслэсь тодон-валанзэс будэтонъя учебно-методической ёзэтэныз кивалтэ.'''

'''Колхозын но спортын'''

— Сьӧлта ёросысь Уметьгуртын чебер инкуазь котырын вордӥськи, — вера Владимир Николаевич. — Анай-атае кыкназы но гурт удысын тыршизы: мамае скал кыскиз, парсь сюдӥз, папае тракторист вал. Озьы пичиысен музъем ужез тодыса-валаса будӥ. 4 нылпиос пӧлысь бадӟымез вал, бӧрсям 2 сузэръёсы но выны вордӥськизы на. Тунсыко: мамаелэн ныл фамилиез Черных вал, но ачиз со пиж-пиж горд, атае — Огнев, нош йырсиез чиль-чиль сьӧд.

Гужемъёсы гуртысь пиналъёсын атайёсмы вӧзын ужаллямы. Соин пинал дырысен комбайн руль сьӧрын пукыны, косилкаен ужаны, тракторен ворттылыны дышимы. Син азямы ортчылӥз ю-нянь кизён, кутсан вакыт. Корка котырын ужъёс лачак вал ке но, шудыны, чорыганы но дыр сюрылӥз. Уметьгурт пиналъёсты бордаз люкалляз гуртысьтымы адӟем карымон дышетӥсь Анатолий Дмитриевич Уваров. Мар гинэ со ми понна ӧз малпалля! Мон школа хорын кырӟасько вал. Эшъёсынымы артысь гуртъёстӥ концертъёс пуктылыса ветлӥмы, ӝытъёсы тылскем котыре люкаськылӥмы, кырӟамы, шудӥмы. Ӵапак дышетӥсьмылы луыса тросэз пияшъёс но нылашъёс спортэн эшъяськылӥзы. Гужем Парсьгуртысь, Сьӧлталась егитъёсын футболэн шудылӥмы, пыдын бызьылӥмы, толалтэ куас вылэ султылӥмы, куспамы вожвылъяськонъёс ортчытъямы. А. Уваров, олокытысь грамотаос шедьтыса, вормисьёсты пусйылӥз.

Тодон-валан люканы ветлӥ Сьӧлта школае. Отын спортын азинсконъёсы тросгес луизы. Бадӟым классъёсын пыдын бызьылонъя 1-тӥ разряд басьтӥ, уг кельтӥськы вал одӥгзэ но ёрос ӵошатсконъёсты, элькун вожвылъяськонъёсы но вуылӥ. Тазалыке зол шуыса, школа бере дышетӥсьёсы спорт удысэ яке военное мыныны ӵекто вал. Омскысь дышетӥсьёсты дасянъя институтысь спортфаке направление но сётӥзы. Но гуртын будэм пияш, нокытчы потаме ӧй вал бере, кыдёке мыныны кышкай, дӥсьтӥсьтэм удмурт сямы но люкетӥз, лэся. Эше, Владимир Артемьев, Пермьысь лётчикъёсты дасянъя училищее пырыны ӧдъя вал, монэ но сьӧраз ӧтьылӥз. Ӧй мыны. Армие басьтӥзы, Челябинск улосысь Чебаркуль городын учебкаын вал. Берло ыстӥзы Германие ракетной войскоосы. Вал луонлыке та удысъя ик улонме азинтыны. Но вордӥськем шаере дораз кыскиз. Туннэ нуналозь одӥг пол но ӧй жаля на, военной ӧй луы шуыса.
Спортэз гажалляз

'''Наукае нырысетӥ вамышъёс'''

— Гуртын будэмын бере, гурт удыс ик сюлэмылы матын луиз. Дышетскыны пыри Ижысь гурт удысъя институтэ, тодон-валан люкай агрономияя факультетын. Курсмы — 75 мурт — туж зол вал. Тросэз ӵош дышетскем эшъёсы пӧртэм ёросъёсын хозяйствоослэн кивалтӥсьёссы луизы. Кылсярысь, быдэс улонзэ одӥг колхозлы сӥзиз, сое шаерысьтымы одӥгез кужмоез кариз Вавож ёросысь «Колос» хозяйстволэн кивалтӥсез Владимир Красильников. Пӧламы будӥзы 2 вуоно министръёс но — нациосын ужан политикая азьвыл министр Владимир Завалин но гурт удысъя но сиён-юонъя азьвыл министр Николай Собин.

Гурт удысъя институтын спортэн выронме азинтӥ. Отын соку велосипедэн ворттылонъя секция зол ужаз, та выль амал тунсыко потӥз. Уката ик гуртысь пияшъёсын велосипедэн ворттылыны яратӥськомы вал. Вузмылэсь данзэ утьыса, пӧртэм вожвылъяськонъёсы пыриськылӥ, та амалъя мастере кандидат луи. Быгатонлыкме шӧдыса, ӧтизы Удмуртилэн сборнояз. Шаермылэсь данзэ трос пол утьылӥ Россиысь вожвылъяськонъёсын. Вуылӥмы Сочие, Узбекистанысь Фергана городэ, котькуд ар пыриськылӥ «Удмуртская правда» газетлэн ӵошатсконъёсаз.

Спортэн вырон вискын дышетскон но вунэтэмын ӧй вал. Факультетысьтымы студентъёс Первомайской каргуртысь опытной станциын практика ортчылӥзы. Ю-нянь будэтонъя научной ужен вырыны кутски. Наукая кивалтӥсе вал Анатолий Михайлович Иванов. Ёросъёсысь хозяйствоосы поталлямы, отын ӟеч кидыс уськытонъя, удобрениос кутонъя эскеронъёс ортчытъямы. Та вакытэ кандидатской уж гожтон сярысь мылкыды вордӥськиз, но сое берлолыгес кельтӥ. Институтэз йылпумъяме бере опытной станцие ик ужаны ӵекто вал. Мон со вакытэ кышнояськемын вал ини. Нырысетӥ курсын ик синмаськи группаямы дышетскись одӥг нылашлы. 5-тӥ курсын соин семья кылдытӥмы ни. Надежда Васильевна городын улыны пумит луиз, гуртэ, пе, бертысал. Ачиз со Балезино ёросын вордӥськемын. Со палъёсы ик распределениея сюримы.

'''25 арескысен — кивалтӥсь'''

— Быдыпи гуртысь Ленин нимо колхоз ёросын одӥгез золэз вал. Отын монэ валтӥсь агрономе пуктӥзы, кузпалы юрттӥсе луиз. Институтын басьтэм тодон-валанъёсме гурт ужын адӟытоно шуыса, уж борды мыло-кыдо басьтӥськи. Хозяйствое вуэме бере нырысетӥ араз ёросын кизьыны вазь потӥзы. Гуртын кысык вакыт — бусыосын тракторъёс гурето. Нош ми кивалтӥсенымы кенешим: 8-тӥ-9-тӥ мае ужасьёслы шутэтскон нунал сётоно — Вормон нунал ук! Кизьыса вуттом ай. Нош ёросысь гурт удысъя управление котькуд хозяйстволэсь нуналмысь мар ужамзэ эскерыса потылӥз. Мукет хозяйствоос резь-куаж ужало, нош быдыпиослэн лудъёсазы трактор гуретэм куара уг кылӥськы.

Кыкнамес, колхоз тӧроез но монэ, ёросэ ӧтизы. Кылмес юазы, выговор гожтӥзы. Ну малпасько, толэзь но уг ужаськы ай, тыш сиёно луисько ни. Та бӧрсьы эшшо одӥг пол ёросэ ӧтчазы. Со аре вазь кизимы вал, зоръёс бере кидысмы чебер бычыяз. Но та бӧрсьы куазь кема кӧс возиськиз, няньмы му вылэ ик куасьмыны ӧдъяз. Бусыос кузя усыен ворттылыны кури. Нош хозяйствоын азьвыл тазьы уг карыло вылэм. Со вакытэ ӵапак калык контроль бусыосты эскерыса потӥз. Гуртысь кин ке соослы урттылӥськем, выль агрономмы изъянтӥсь шуыса. Кивалтӥсенымы Николай Волковен куд-ог юанъёсъя кылмы уг тупа вал, угось со дышем сямъя ужано кожалляз, выль амалъёслы трос ик ӧз оскылы. Но тулыс лэсьтэм ужелэн емышез адӟиськиз: усыям бервылын ю-нянь удалтӥз, усыямтэ лудъёсын сярысь. Та бӧрсьы кивалтӥсьмы но, мукет ужасьёс но мыным оскизы ни. Егитъёслы сюрес сётоно шуыса, председательмы визь-кенешлы ачиз мыным вазиськылӥз ни.

Колхозын ужъёс эшшо но зол азинскизы, скалъёсмы тросгес йӧл сётъязы. Одӥг но ӝыны ар ортчыса, монэ нош ик ёросэ ӧтизы. Но таяз радэ ӵектӥзы Карсовайысь хозяйстволы кивалтӥсе пуксьыны — азьвылзэ ёрос администрацие ужаны басьтӥллям. Мыным соку 25 арес гинэ вал ай. Со быдӟа ныпъетэз ас вылам басьтыны пумит луи. ВЛКСМ-лэн райкомезлэн секретарез шуиз: кызьы партия куре, озьы лэсьтоно. Мон уго соку партие кандидат вал ини. Я, оско бере, мыноно, малпай. Собере, юрттомы, ум куштэ, шуизы ёросысь кивалтӥсьёс но.

Карсовайысь Ильич нимо колхозын гуртоос кыклы люкиськемын вал. Одӥгъёсыз азьвыл председатель понна дурбасьтылӥзы, мукетъёсыз солы пумит вал. Мон соос вискын, ваньмыныз ик огкыл шедьтоно, кусып тупатоно. Одӥг кыл шедьтыны юрттӥз калыкен вераськыны быгатэме. Соку хозяйство пыд йылаз рос-прос уг сылы вал. Трос сюлмаськоно луиз егит специалистъёсты гуртэ кыскон пумысен. Колхозын кема аръёс ӵоже зоотехник луыса ужам одӥг пиосмурт. Дышетскемез вылӥ, но берло дыре, зол юыны кутскыса, одӥг сазь нуналыз ик ӧй вал, шуыны луоз. Ваньзы со шоры киынызы шонтӥзы вал ини, талэсь адями, ужась уз ни пӧрмы, пе. Нош мон малпай, ӟеч кадръёсын сэрпалляськыны уг яра. Озьы пумиськимы соин, сюлмысь вераським.

Ӵектӥ сое валтӥсь зоотехнике пуктыны. Гурт калык но, ёросысь кивалтӥсьёс но дэмланэлы дур ӧз басьтэ. Озьы ке но мон солы оски. Со ваньместы паймытӥз: 3 ар ӵош ужатозямы, юэмзэ одӥг пол но ӧй адӟы. Берло со воргоронэз, ӟеч ужамзэ адӟыса, ёросысь гурт удысъя управление ужаны басьтӥзы.

Со вакытэ хозяйствоын бадӟым лэсьтӥськон мытэмын вал. Кин гинэ пуктӥськон бригадаосын ӧз ужалля — палэнысь вуэмъёс, пытсэт сьӧрын пукемъёс, йыртэмасьёс. Малпай, малы та ужез гурт калыклы осконтэм. Озьы 8 муртлэсь бригада кылдытӥмы. Соос сыӵе зол ужазы: гужем куспын 2 корка ӝутыны вормылӥзы, асьсэос ик тэль дасязы, поттӥзы, бугро ӵупылӥзы. Со бригадае сюрон понна черод кылдылӥз. Угось уждунзы 700-900 манетозь вуылӥз. Со вакытэ, 1980-тӥ аръёсы, хозяйстволэн кивалтӥсез ог 280 манет басьтэ вал.

Калыклэсь дисциплиназэ ӝутон понна балльной системая уждун тырыны малпай. Ӟеч ужамез понна адями баллъёс басьтылӥз, янгышамез понна соосты ыштылӥз. Таӵе амалъя шаерамы соку ужасьёс ӧй на вал. Та бӧрсьы хозяйствоын ужъёсмы зол азинскизы. Ёросын одӥгез адӟем карымонэз хозяйство луимы, гидъёс, ю тысь возён кеносъёс ӝутӥськизы, соос доры сюресъёс асфальтэн шобырскизы. Ар ӵоже одӥг скаллэсь ог 3 сюрс килограмм йӧл кыскыны кутскимы, 1980-тӥ аръёс понна со туж трос вал ай. Озьы ми доры шаерысьтымы кивалтӥсьёсты но ӵемысь вуттылыны кутскизы ужмес возьматон понна. 7 ар хозяйствоен кивалтӥ. Котькыӵе учыръёс вал: ужасьёс мон доры пӧртэм куронъёсын вуылӥзы, асьсэлэсь сюлмаськонъёссэс, шуг-секытсэс вераллязы. Котькыӵе учыре кивалтӥсьлы нырысь ик адями луон сярысь малпаськоно, кылзыны, юрттыны, шуныт, буйгатон кыл шедьтыны кулэ.

Одӥг вакытэ КПСС-лэн обкомаз ӧтизы. Ӵектӥзы гурт удысъя но сиён-юон поттон промышленностья отделын инструктор луыны. Кун Кенешлэн юртэтӥз вамышъякум, выж вылысь ковёръёс, котыр синучконъёс син азям йӧтӥзы. Малпасько, бусыын ужаме бере таӵе интыын, кабинетын пукыса, ӝокало. Уг, шуисько, гурт улон, бусыос ик мыным матынгес. Но пумитам вазизы: малпаськы, кыкетӥзэ ум ӵектэ ни. Дорам бертӥ но кузпалылы та сярысь верай. Со шуиз: мыном. Со хозяйствоын экономист луыса ужа вал. Ваньмызлы умой луыны уг луы, тушмонъёс, вожъяськисьёс но сюро. Синмам уг верало вал ке но, кин ке кышноме вӧсь кылын шиятэм. Со мыным сомында ар ӵоже одӥг пол но та пумысен ӧз поттылы, мылкыдме ӧз куашкатылы, урод мылкыдъёслэсь утьылӥз. Озьы Балезино ёросысь Ижкаре кошконо кариським. Но гуртоослэн лэземзы уг поты вал. 3 пол голосование лэсьтӥзы кивалтон биньгозыез мукет муртлы оскон понна.

2 ар КПСС-лэн обкомаз ужакум, ёросъёсысь гурт удысъёсты азинтон сярысь сюлмаськыса, музъемлэсь ӟечлыксэ будэтон бордын тыршим.

'''Студентъёс пӧлын'''

— Председатель луыса ужакум, хозяйствоысь ужез валаса радъяны экономикаен тодон-валанэ уг тырмы шуыса шӧдылӥ. Соин нялтас заочной амалэн дышетскыны пыри Ижысь гурт удысъя институтлэн ик экономикая факультетаз. Соку выльысь бугыртӥськиз наукаен вырон мылкыды. Эшшо, 2 ар ортчыса, Пермьысь гурт удысъя академилэн растениеводствоя факультетэзлэн аспирантураяз тодон-валан люкай на. Семьяе, соку 2 нылъёсмы вордӥськемын вал ини, Ижкаре кылиз. Кандидатскойме гожтӥ Урал гурезьёс котырысь музъемъёс вылын «Торос» сорт йыды кизён но кутсан амалъёсъя. Та культураез асьме дорын будэтыны ярато, солэсь пӧртэм сиён поттыны луэ шуыса.

Берытски яратоно институтам. Растениеводствоя факультетын ассистентысь профессорозь будӥ. Колхозын ужан сярысь студентъёсты дышетон — мон понна воксё выль вал. Но таиз но уже сюлэмыя луиз. Калыкен ужаны быгатэме егитъёсын кусып тупатыны юрттӥз. Гуртын агроном, председатель вал бере, та удыслэн сюлмаськонъёсыз, ужпумъёсыз син азям. Тодон-валанме егитъёслы тунсыко амалъёсын, улонысь учыръёсты кутыса, вераны тыршылӥ. Студентъёслэсь ӟеч специалистъёсты дасян понна соосты теориен гинэ «уд сюды» ук. Лекциосам котьку трос калык ветлылӥз, трос юанъёс чузъяськылӥзы. Огвакытэ йыдылэсь сур, емышъёслэсь кудӟытӥсь юонъёс лэсьтонъя лекциос лыдӟи. Та удысын мургес тодон-валан басьтон понна Ижысь сур пӧзьтонъя предприятиосы ветлӥмы.

Ижысь гурт удысъя академиын 1992-тӥ арысен ужай. Со дырысен студентъёслы уно книгаос поттӥ, будосъёсты, емышъёсты будэтон, гырон-кизён амалъёсъя ог 70 научной статьяос гожтӥ. Куд-огез учебникъёсы но методичкаосы вылын туала студентъёс тодон-валан люкало.

Но 2 ар пала ини студентъёслы лекциос уг лыдӟиськы. Егитъёслы сюрес усьтоно. Угось гурт удысъя академиын ик кандидат луэм егит тодосчиос, часъёс тырмымтэен, ас удысазы тодон-валанзэс будэтыны амалъёс уг шедьто. Озьы ке но лекциослэсь чылкак палэнскемын ӧвӧл. 2000-тӥ арын Ижысь гурт удысъя академия бордын кылдытӥ но 17 ар ӵоже кивалтӥ гурт удысын ужасьёслэсь тодон-валанзэс будэтонъя учебно-методической ёзэтэн.Кылем арын академилэн ректорез Александр Любимов ӵектӥз Первомайской черкогуртын та выллем ик ёзэт усьтыны. Ёзэт ёросъёсысь специалистъёсын кусып возе, соослэсь тодон-валанзэс будэтонъя курсъёс ортчытъя. Али отын ог 60 пӧртэм удысъёсъя — бухгалтеръёс, экономистъёс, зоотехникъёс, агрономъёс, нюлэскасьёс, ландшафтной дизайнеръёс — тодон-валанзэс будэтыны быгато, озьы ик луонлык вань выль удысъя вакчи дыр куспын дышетскыны (переподготовка).

'''Семья'''

— Ваньмон дыръям гуртын пукыны уг ӵыдӥськы. Толалтэ кузпалыным куас вылэ султӥськомы, тэлетӥ поръяськомы. Гурт удысъя институтэз йылпумъям курсэнымы арлы быдэ инкуазьын пумиськылӥськомы. Ӵош дышетскем эшъёсмы пӧртэм ёросъёсы кошкылэмын бере, соос дорын кунояськиськомы, быдэс Удмуртиез котыръямы ни, шуыны луоз. Куспамы серекъяса вераськомы, рекордъёсъя Гиннеслэн книгаяз сюрыны быгатомы ни, арлы быдэ люкаськылӥсь группа шуыса. Вузъёс куспын ортчылӥсь спартакиадае пыриськытэк но уг кылиськы: я куасэн, я пыдын бызьылоно, академилэсь данзэ утёно.

Ужелы но семьяелы луыса мон шудо. Вань яратоно уже, котькуд нунал мар ке радъяно, дышетӥсьёсын кусып возёно, сюлмаськонъёсты сэрттоно-пертчоно. Мӧзмыны дыр чик ӧвӧл. Вӧзам яратоно кузпалы. Кемалась ик ӧвӧл со пенсие потӥз. Ижысь Устинов ёрос администрациысь дышетонъя управлениын экономист луыса ужаз. Будэтӥмы 2 нылъёсмес. Кыкназы ик Ижысь гурт удысъя академиез йылпумъязы, бадӟымез горд диплом басьтӥз, кыкназы но экономистъёс. Кемалась ик ӧвӧл одӥгез семьяеныз Тольяттиысь Иже улыны берытскиз. Мукетыз нылмы Санкт-Петербургысь банкын ужа. Кыкназы ик милемыз нунокъёсын шумпотто ни, соос милям 4 кузя.

[http://elibrary.unatlib.ru/handle/123456789/42256 Огнев, В. Н. Ужаны дышетӥз музъем / Владимир Огнев ; вераськиз Ангелина Снигирёва // Удмурт дунне. - 2019. - 24 янв. - С. 10, 15.]
@@ Строка 57: / Строка 57: @@
 Ужелы но семьяелы луыса мон шудо. Вань яратоно уже, котькуд нунал мар ке радъяно, дышетӥсьёсын кусып возёно, сюлмаськонъёсты сэрттоно-пертчоно. Мӧзмыны дыр чик ӧвӧл. Вӧзам яратоно кузпалы. Кемалась ик ӧвӧл со пенсие потӥз. Ижысь Устинов ёрос администрациысь дышетонъя управлениын экономист луыса ужаз. Будэтӥмы 2 нылъёсмес. Кыкназы ик Ижысь гурт удысъя академиез йылпумъязы, бадӟымез горд диплом басьтӥз, кыкназы но экономистъёс. Кемалась ик ӧвӧл одӥгез семьяеныз Тольяттиысь Иже улыны берытскиз. Мукетыз нылмы Санкт-Петербургысь банкын ужа. Кыкназы ик милемыз нунокъёсын шумпотто ни, соос милям 4 кузя.
-'''Источник:'''
+[http://elibrary.unatlib.ru/handle/123456789/42256 Огнев, В. Н. Ужаны дышетӥз музъем / Владимир Огнев ; вераськиз Ангелина Снигирёва // Удмурт дунне. - 2019. - 24 янв. - С. 10, 15.]
-[http://elibrary.unatlib.ru/handle/123456789/42256 Огнев, В. Н. Ужаны дышетӥз музъем / Владимир Огнев ; вераськиз Ангелина Снигирёва // Удмурт дунне. - 2019. - 24 янв. - С. 10, 15. - (Тӧр шорын)].
-'''За предоставление материала выражаем огромную благодарность редакции газеты
-[http://www.udmdunne.ru/ "Удмурт дунне"]'''
-[[Категория:Удмуртские звезды]]