Нянькина Лидия Степановна

Материал из Воршуда
Перейти к навигацииПерейти к поиску

Синмаськемын кылбурлы[править]

Nankina.jpg

Кылбурчи но прозаик Лидия Нянькина — Россиысь Писательёслэн огазеяськонзылэн ёзчиез, Ашальчи Оки нимо премилэн лауреатэз, веросъёсын «Ваёбыж кар», кылбуръёсын «Синучкон» но нылпиослы «Ческыт кӧмеч», «Косьтэй но кыстыбей», «Почта Пиля» книгаослэн авторзы. Зарни юбилеез азьын Лидия Степановна луиз Удмуртиысь культура удысысь дано ужась.

– Лидия Степановна, кин гожъяськыны мылкыд пыӵатӥз?

— Вордӥськи мон Алнаш ёросысь пичи гинэ Серп гуртын. Покчи классъёсын дышетскыкум ик, литератураез яратӥ. Тетрадез вандылыса книга лэсьтыса, шудылӥ. Ми анай-атайлэн 5 пиналъёссы вал, мон 4-тӥез. Анаймы Надежда Ивановна колхозын скал кыскиз. Ми ваньмы солы юрттыны ветлӥськом вал. Доре бертыса, песяелы ужаны быгатэмме шумпотыса вералляй: туннэ кыксэ кыскыны быгатӥ ини! Нош со пичи муртлэсь мылкыдзэ эшшо ӝутылӥз: быгатӥськод ини, быгатӥськод, апи. Эркияса, лэся, со монэ апи шуылӥз. Эшъёсы но анайёссылы юрттӥськыны ветлылӥзы. Фермае вазьгес мыныса, таман шудӥськом, собере, анайёсмы гидэ вуэм бере, скал кыскыны кутскиськом. Ужан вискам кылбуръёс гожъясько, вуоно веросъёслэсь пуштроссэс йырам бергатӥсько вал.

Нош дядяймы Степан Тихонович рядовойын ветлӥз. Со ми пӧлын 5 арзэ ӧвӧл ни. Кӧня асме тодӥсько — ялан муш вордылӥз.

Покчи классъёсын одӥг иськемысь Выль (Шор) Утчан школаын дышетским. 4-тӥ-6-тӥ классъёсын Вуж Утчанын дышетски ини. Отчы 4 иськеме ветлӥ. Толалтэзэ амалтэк интернатын улоно луылӥмы. Мугоръёсмы пичиесь, дорлэсь мӧзмиськом, вылаз ик, ваньмы тэйӟимы на. Толалтэ, ӟырт кезьыт куазь тупаку, бадӟым кышетъёсын но тулупъёсын шобыръяса, дядяйёсмы милемыз школаысь доре валэн вайылӥзы. 7-тӥ но 8-тӥ классэ выльысь Выль Утчанэ мынӥм. Со вакытэ отчы выль школа усьтӥзы.

8-тӥ классэз йылпумъяса, Можга педучилищее пыри. Мон соку тодӥсько ни вал, Можга педучилищеысь трос писательёс но тодмо адямиос потэмын шуыса. Мынам но сюлэмам гожъяськись луон сярысь лушкем малпанэ вал. Та ӧре мылкыдме ӧръязы но сюрес усьтӥзы Маша апае но солэн Валя Шарыпова (али со Иванова) эшез. Соос со вакытэ «Дась лу!» газетын печатласько ини вал. Тон но маке гожтыса эскеры ай, оло, пӧрмытод, шуылӥзы. Соослэсь адӟем карыса ик, школаын литературно-творческой кружоке ветлӥ. Озьы кылбуръёс но веросъёс гожъяны кутски, заметкаос гожъяны тунсыко ӧз потылы.

Педучилищеын дышетскыкум, Григорий Даниловлэн литературно-творческой кружоказ ветлӥ. Гожтэм ужъёсме нокинлы ӧй возьматъялля. Озьы ке но тау шуэме потэ дышетӥселы, со мынэсьтым гожъяськон удысын быгатонлыкме «лыдӟыны» быгатӥз, егит гожъясьёслэн республиканской семинаразы Иже нуллӥз. Педучилищеез йылпумъяса, кык арзэ школаын покчи классъёсты дышетӥ. Нылпиосын ужаны мыным кельшиз. Ас мылкыд каремея, со понна мыным уксё уг тыро вал, нылпиосын литературно-творческой кружок нуи.

– Гуртысь дышетӥсь кызьы Москвае вуиз?

— Ужан вискам Удмурт кун университетысь удмурт филология факультетэ дышетскыны пыри. Одӥг пол студентъёс пӧлын верась луиз: Москваысь А. Горький нимо Литинститутэ, пе, кылысь кылэ берыкъясьёсты дышетыны куто. Малпасько, ӵапак та ик мыным кулэ. Литератураен улонме герӟаны бадӟым мылкыды вал. Ки улам Перевощиков Генрих Ксенофонтович «Гужем лымы» книгаез шедиз но, отысь оглюкетсэ берыктыса почта пыр Москвае келяй, нош отысь иворзы весь ӧвӧл но ӧвӧл. Сессиын дыръям Литинститутысь гожтэт вуэм. Со гожтэт школаысь библиотекаын кыллем но кыллем. Бӧрысь гинэ гожтэтэз сётӥзы ини. Отын верамын: творческой вожвылъяськонэз ортчиды, сыӵе-сыӵе числое экзаменъёс луозы. Экзамен дырозь кӧня ке нунал гинэ кылемын. Университетысь экзаменъёсме ӝог гинэ сётъяй, малпасько, институтэ пырыны ӧй ке быгаты, берен татчы ик мед кылём. Анай-атае кытчы кошкемме тодыса ик ӧз вуттэ, самолётэ пукси но нырысьсэ кузь сюрес вылэ потӥ. Литинститутын пумитай Вера Пантелееваез. Ми соин Удмуртиысь егит гожъясьёслэн семинаразы ӵош вал ини бере, ог-огмес тодмамы. Шонерзэ вераса, институтэ мон кылысь кылэ берыкъясь луон понна ӧй мыны — литература улонэ пыртӥсь ӧсэ йыгаськи. Но кылбуръёс гожъямысь тыпак дугдӥ, малы ке шуоно ӵош дышетскись эшъёсмы, ми быдэс Совето Союзысь но кунгож сьӧрысь егитъёсын ӵош тодон-валан люкамы, туж устоесь но мур пуштросъемесь кылбуръёс гожъязы, ог-огзылы шара лыдӟылӥзы. Соосын ӵошатыса, мынам кылбуръёсы туж лазегесь потӥзы. Соин, лэся, веросъёсме азинтыны ӧдъяй. Бӧрысь соос ваньзы сямен ик «Ваёбыж кар» книгаям пыризы. Но кылбуръёс борды институтэз йылпумъяме бере выльысь берытски. Кема шып улӥ бере, соос сюлэме тымиськиллям, лэся: нуналаз кык-куинь кылбур гожъялляй.

– Институтын удмурт литератураез но кылэз дышетӥды, дыр, ук?

— Бен. Анай кыллы но литературалы тодон-валан сётӥзы писатель Никвлад Самсонов (соку со ачиз но Москваын тодон-валанзэ будэтӥз) но тодосчи Татьяна Зайцева. Ми соослы анай-атайёсмылы сямен вазиськылӥмы. Владимир Яковлевич литературае сюрес усьтӥсьмы луэ. Веросъёсме солы возьматъясько вал. Со мылкыдэз бурдъяны туж быгатылӥз. Владимир Яковлевичез котьку но ӟеч мылкыдын тодам вайисько. Татьяна Ивановна улонын но милемлы туж трос юрттэт сётылӥз. Валэктылӥз, кызьы астэ бадӟым городын возёно, шуге-леке шедьыку, отысь потыны быгатоно. Озьы ик тау кареме потэ ӟеч кылъёс верамез понна Удмурт кун университетысь тодосчилы Шкляев Александр Григорьевич. Дипломмес утьыкумы, со милям оппонентмы вал. Институтын ми Удмуртиысь 8 кузя нылъёс но пиос дышетским, тып-тып удмуртэз 4 вал. Улонмес гожъяськонэн ми гинэ Вера Пантелееваен герӟамы, мукетъёсыз музон ужен выро.

Москваысь бертыса, милемыз ужаны интыян сярысь сюлмаськиз Удмуртиысь Писательёслэн огазеяськонзы. Соку соин кивалтэ вал писатель Семён Самсонов. «Кизили» журналэ мыныны ӵектӥзы, ӵапак соослэн буш интызы вылэм. Нылпиослы но гожъясько вал бере, соглаш луи. Тэшкылиослы гожъям сяна, соосын пумиськылыны школаосы но нылпи садъёсы ветлылӥмы. Собере выжи егитъёслэн «Инвожо» журналазы. Отын ини егит гожъясьёсын тырши. Та дыре «Кенеш» журналын кылбурет удысэз нуисько. Уже кельше, ӵукналы быдэ шумпотыса отчы вамыштӥсько.

Берыктон ужлэсь ноку ӧй куштӥськылы. Ваньмон дыръям фин-угор дуннеысь но озьы ик мукет писательёслэсь ужъёссэс удмурт кылэ берыкъясько. Соос журнал-газетъёсын печатласькыло. Берыктэмъёсы нимаз книгаен поттымон люкаськемын.

– Тӥ трос аръёс ӵоже кылбурет удысын ужаськоды ни. Туала егит кылбурчиос сярысь мар верасалды?

— Азьвыл аръёсы литературае егитъёс тулкымен-тулкымен лыкто вал, берло дыре оген-кыкен вуисьёс но ӧжыт. Соос кӧня ке гожъясько но удыссэс уг азьланьто ни. Иське, гожъяськон удыс соослэн ӧй вал. Зэмос кылбурчилэн яке прозаиклэн гожъяськытэк улэмез уг луы.

Журнал-газет бамъёсын зэмос чебер гожтосъёс уг тырмо. Егитъёслэн ужъёссы туж ылесь. Бен, малпанъёссы вань, но соос кылбуретлэсь куронъёссэ уг чаклало. Ма, Инмарен сётэм тылгизьыед ӧвӧл ке, кызьы кылбуръёс гожъялод?

Кылбурет удысын 20 арлэсь ятыр ужатозям, валай: будӥсь кылбурчиослэн ужъёсынызы кӧня ке гинэ пумиськылэме вань. Одӥг-кык кылбур ик возьматэ ни: тани таиз зэмос кылбурчи.

Егитъёслэсь гожъяськемзэс синйылтыса улӥсько: пӧлазы одӥг-ог быгатӥсьёсыз вань. Со шумпотымон ни.

– Тӥ асьтэ кужымен поттӥды вордскем гуртты сярысь «Серпмы милям мусо» книга. Со ужез вырӟытыны кин ке косӥсь луиз-а, асьтэлэн мылкыдды ӝутӥськиз-а?

— Ми ке та уж борды ӧм кутске, малпасько, кин сое лэсьтоз. Гуртамы вордскем журналист Алашеев Владимир Евсеевич, «Бланкиздат» огазеяськонлэн генеральной директорез Юрий Медведев, Маша апае но мон та уж борды рос-прос басьтӥським. Нош кутсконэз тазьы вал: Владимир Евсеевич, гуртмылэсь историзэ тодэмез потэмен, кема архивъёсын бугыръяськем, трос материал шедьтэм. Соин мар карыны паймеменыз, мыным вазиськиз. Книгаез дасян борды быдэс гуртэз кыски, шуыны луоз. Соослы задание сётъяй: тон таиз сярысь гожтод, тон тазэ лэсьтод. Нокин но «уг» ӧз шуы. Материалъёс люкаськизы, нош коньдонмы ӧвӧл. Нош ик гурт калыклы вазиським. Кин кӧня быгатӥз, сомында ик сётӥз. Бадӟым тау шуыны кулэ Юрий Ивановичлы, со милемлы книгаез печатлан ласянь туж трос юрттэт сётӥз. Книгамылэсь вордскем нуналзэ быдэс гуртэн Выль Утчан культура юртын пусйимы.

– Озьы ик тӥ быдэс гурттэс ӝутӥды гуртысьтыды Быдӟым оже быремъёслы синпелет пуктыны.

— Ож тема монэ котьку сюлэмшугъяськытӥз. Со пыр ачим но ортчи кадь потӥсько. Маша апаеным оже быремъёслы синпелет пуктоно вал шуыса малпаськылӥм. Та малпанмес книга поттон бордын ужам эшъёсылы верай. Соос монэн соглаш луизы, гуртоос но пумит ӧз кариське. Синпелетэз лэсьтон понна нош ик гурт калыклэсь уксёзэ люкано луимы, проектсэ дасямы. Юрий Медведев синпелетэз пуктыны вуж юртэзлэсь интызэ сётӥз. Тӥни озьы, мылкыд ке вань, котьмар карыны луэ вылэм. Кылем арын гужем нош ик ми быдэс гуртэнымы ӵош люкаськылӥм, синпелетмес усьтӥм. Табере со гуртмес шулдыртэ, отын гуртоослэн люкаськон интызы луиз. Оже бырем ожгарчиос гуртазы бертӥзы но ми пӧлын уло кадь йӧтэ. Милесьтым адӟем карыса, бускель гуртъёсын улӥсьёс но гуртысьтызы бырем солдатъёссылы синпелет пуктылыны кутскизы ини. Азьланяз та интымес эшшо чебергес карыны малпаськом ай, котыраз сяськаос мерттылом, липет улэ гур пуктом…

– Лыдӟись кие вуттӥды Ашальчи Окилы сӥзем «Та буртчин чуръёсыд» книга но.

— Маша сузэре но, Мария Степановна Петрова, творческой адями, Алнаш черкогуртысь Ашальчи Оки нимо музейын тырше. Солэн йыраз малпан лыктэм дано удмурт нылкышно кылбурчимы сярысь книга поттыны. Малпанзэ мыным вераз, Окилэсь веросъёссэ ӟуч кылэ берыктыны куриз. Ашальчи Окилэсь куд-ог веросъёссэ ӟуч кылэ берыкъяй вал ни. Соос диплом ужам но пыртэмын вал. Шумпотыса басьтӥськи та уж борды. Та выллем книга лыдӟисьёслы туж кулэ вал кадь йӧтэ.

– Мария Степановнаен ӵош эшшо одӥг бадӟым ужез быдэстӥды на: Трокай Борисов сярысь «Сюлмы бӧрдэ, сюлмы кырӟа» книга поттӥды.

— Ашальчи Окилэн улэм-вылэмез но творчествоез пумысен трос гожъямын ни вал, соин ик со сярысь книга дасяны туж ик секыт ӧй вал. Нош Трокай Борисов — гырымтэ бусы. Туж секыт йӧтӥз ужаны, трос бугыръяськоно но утчаськоно луиз. Книга потэм бере лыдӟисьёсын пумиськонъёс ортчытъякумы, валамы: удмурт калык Трофим Борисовлэсь ужъёссэ уг тоды. Малпасько, книга тросэзлэсь синзэс усьтоз.

– Уд но малпа, сыӵе ненег нылкышно сомында ужез бергатыны быгатэ шуыса. Тӥ кылбурчи, прозаик, кылысь кылэ берыкъясь, нылпиослы кылбуръёс но веросъёс гожъясь, берло вакытэ шаржъёс борды кутскиды. Лыдӟисез тужгес но паймытӥды вал «Ау, ау! яке инбамысь гожъёс» повестеныды. Кудӥз жанр сюлэмдылы матынгес луэ?

— Мыным вань жанръёс кельшо, нош поэзия но проза уката но матын пото. «Ау, ау! яке инбамысь гожъёс» повесте сярысь ке верано, тазьы шуысал: удмурт литератураын мистика жанр туж шер пумиське. Соин, лэся, лыдӟисьлы со тунсыко йӧтӥз. Гуртлы сӥземъёссэ гожъяны кутски 18-20 арес дыръям. Егит мурт палэнысь улонэз кытысь тодоз ай, гурт улон сярысь ик гожъясько вал. Быдэ вуэмъя улонэз умойгес тодӥськод-валаськод ини, соин ик тема но воштӥське. Веросъёсылэсь сюжетъёссэ, ачим малпаса, гожъясько. Валамон ини: мазэ но созэ улонысь басьтӥськод, кинэ ке син азе пуктыса, гожтӥськод. Кылбуръёс егит дыръягес вордӥсько, синмаськон, яратон кусыпъёс герӟаськон вакытэ. Нылпиослы гожъяны но туж кельше, пиналъёс но соосты шумпотыса кылзо кадь.

Шаржъёсты гожтон понна адямиез, солэсь сямзэ умой тодыны кулэ. Кинэ тодӥсько, ваньмызлы гожъяй ни. Та жанр капчи ӧвӧл: маскара но медло, адямилэн кӧтыз но ӝож медаз луы. Куддыръя гожтӥсько но, ачим кышкасько: кинэ ке вӧсь карыны ӧй шедьты-а? Но татчыозь ӝожтӥськисьёс ӧй вал на. Мӧйы писательёс та пумысен верало: шаржъёсын йырин ог-огенызы вераськемысь дугдылӥсьёс но вал, пе.

– Быгатэ-а кылбурчи одӥг муртэ гинэ сюлэм пушказ нуллыны — яратон сярысь верасько.

— Кылбурчиосты синмаськисесь шуо. Мон туж шер синмаськисько, нош синмаськисько ке, туж мур, кемалы. Сюлэмам одӥг муртэ гинэ возисько, ог-огмес ми соин валаськом.

– Уд-а жаляське, улонады таӵе сюресэз бырйиды шуыса?

— Пичи дырысеным улонме гожъяськон удысэн герӟаме потӥз. Со понна номыр юромо ӧй кары кадь. Со сюресэ ачиз Инмар монэ валтӥз кадь, со удыслэсь ӧсъёссэ ачиз усьтыса сётӥз.


Источник:

Нянькина Л. С. Синмаськемын кылбурлы / Л. С. Нянькина ; записала Любовь Тихонова // Удмурт дунне. - 2015. - 25 сент. - С. 10,15. - (Тӧр шорын)

За предоставление материала выражаем огромную благодарность редакции газеты "Удмурт дунне"