Нуриахметов Валерий Михайлович

Материал из Воршуда
Перейти к навигацииПерейти к поиску

ВаМеНэс[править]

В. М. Нуриахметов


Тодмотэм мурт сярысь гожтыны капчигес кадь. Нош адямизэ пичи дырысеныз тодӥськод ке, ма бордысен кутскыны гинэ но йӧнзэ уд шедьтӥськы… Берытскомы ортчем даурысь 60-тӥ—70-тӥ аръёсы. Мон соку колхоз кунянъёсты возьмасько вал. Гужем пумын кутычилы-пастухлы эшшо но секыт йӧтэ: вож турын ишкемын-сиемын – пильысэз уг ни бычыра, котыр – такыр. Пинал пудоосты луд вылэ уллян шӧлкын гинэ поттаськод на. Бызьылӥськод – кылдэ ошиськод…'


Тани огаз ӝытазе какалмыса бертӥ. Пырисько. Корка сигысь васькись вань…

- Мон та, Валера… Тонэ витёнъя удмурт вуж газетъёсыд пӧлын бугыръяськи тани…

Озьы тодматскимы татчыозь гожтэт пыр кусып возисьёс.

Табере Башкир музъем вылысь Янаул ёросысь Нуркан гуртын вордӥськем но быдэ вуэм Валерий Михайлович Нуриахметовез удмуртлыкмес гажасьёс, культураенымы тунсыкъяськисьёс, гожъясьёс но журнал-газет поттон удысын ужасьёс пӧлын тодӥсьтэмез ик ӧвӧл ни. Со – Удмурт Республикаысь дано журналист, Дэбесын потӥсь «Байгурезь» газетэз кылдытӥсь но солэн редакторез.


- Валерий Михайлович, мырдэм но кызьы тани тӥ доры но сюрес вуттӥз ай. Кызьы кылӥськиз, тӥ татчыозь пегаса выллем ветлӥды.

- Мон кизили ӧвӧл, мон сьӧры Елена Виноградова, Зинаида Рябинина, Алексей Шкляев уйиськылӥзы. Озьы ик «Мылысь-кыдысь» передачае кылдэмез дырысен ӧтё вал. Ма, радиое но ужаны ӧтьылӥзы, куинь арскын квартира сётом шуизы вал. Улонын инты, липет сярысь малпано луэ. Янаулысь но кошки квартира ӧвӧлэн. Оло, соин но сюлмы бӧрдэ: пал пыды мынам Башкириын, пал пыды – татын. 28 ар улӥ отын, кызь кыксэ ини – Дэбесын. Нош пичи дырылэн одӥг арез кык арлы ӵоша. Котькытчы мед мыном, пушкам вордскем гуртэ, мон соин улӥсько.

- Тани шуом, «Байгурезь» газеттэ пытсазы, сюрс пала лыдӟись мае ке но ӟечсэ ыштӥз…

- Калык пӧртэм: Башкириын мукет, Алнашын мукет… Газет нокызьы но уз быры. Сое кин ке но бурд улаз басьтоз, шуом землячество ик. Министерствомылэн пытсамез ке но потӥз, мон ачим потто со газетэз, аслам коньдонэным, эшъёсыным. Россиысь каталоге шедён понна тыршо. Байгурезь – со ӝуждала, озьы ик - бай, байлык. Адями ӝутскыны кулэ гурезь йылэ. Ачим но мон адямиез ӝутыны тыршисько вылӥе.

- «Байгурезе» лыктон сюресэд туж кузь вал. Оло, тодэ уськытод куд-ог вамышъёстэ?

- Эшелэн, Валентин Менигатовлэн «Пинал куараосын» «Ӵукна» кылбурез потӥз. Со ик гожъяськыны кутскон ӧр сётӥз. Но ваньмыз кутскиз фотоаппарат бордысен. Пичи дыръям, мыным 5-6 арес вал, дыр, гуртамы лыктӥз «Смена» фотоаппаратэн туспуктылӥсь. Пиосты атайёсынызы люказ но туспуктылыны кутскиз, нош монэ палэнтӥз (мынам атае ӧй вал). Мон бертӥ, кӧня бӧрдӥ гуртын. Анкайме возьмасько, со сизьым иськемысь гуртын нянь пыжисьын ужа вал. Витисько сое чидатэк. «Анкай, басьты мыным фотоаппарат, - шуисько, - мон вань калыкез фотое пукто…» Но мынам малпанэ вал шофёр луыны. Вася ӵужмуртэ машинаен ужаз, весь сьӧраз ветлылӥ... Нош куке Толя Бакаевлы «Пинал куараосы» печатлам кылбурез понна фотоаппарат сётӥзы, йырам малпан чилектӥз: вот кызьы басьтоно туспуктылон!

- Озьы тон, Валера, улондэ чутрак воштӥд! «Дась лу!» газетлэн «Гужем нуналъёс» конкурсэ пыриськыса, «Мон пичи мушкась» верос гожтӥд но нырысетӥ инты басьтӥд – тыныд редакция со понна, зэм ик но, фотоаппарат кузьмаз, нош ар ортчыса, «Пичи мушкасед» «Удмуртия» издательствоын поттэм «Асьме киын» книгае пыриз. Нош кылем гужем тон доры Дэбесэ вуылыкум ас синъёсылы ӧй оскы: азбар тыр муш умортоос, нош йыр вадьсын солань-талань лобало мушъёс. Озьыен, тон табере веросад гинэ ӧвӧл, улонын но мушкась луид ни? Озьы ке, мушъёс тыныд мар сёто?

- Мушъёс мыным улыны кужым сёто. Гужем мон котькуд нунал, ӵукна уже мыныкум но, ӝыт ужысь бертыкум но, нырысь ик муш умортоос доры кожисько. Часэн-часэн но дась соослэн ужамзы шоры учкыса пукыны. Соослэсь но адямиослэсь улонзэс ӵошатӥськод ке, йыре сыӵе бадӟымесь малпанъёс лыкто. Кин тодэ, куке но со малпанъёсты, оло, бумага вылэ но ӧръяло ай. Нош соос мынам табере верослы гинэ ӧвӧл – повестьлы тырмымон ни. Зэмзэ вераса, семьяямы мушкась мон ачим ӧвӧл, милям бадӟым мушкасьмы туэ вармуми, нош ми Руслан пиеным солэн юрттӥсьёсыз гинэ. Нош со веросме гожтыкум азьпал улонэ тазьы радъяськоз шуыса, валамон ни, уг но малпаськы вал. Но луиз озьы кызьы луиз. Аслэсьтым вуономе пичиысен ик шӧдыны быгатӥ бере, озьыен, мон шудо адями. Собере мушъёсын вырисьёс пӧлысь мон ӧй но адӟы кадь ассэ шудтэмен лыдъясь адямиез.

- Ныр улын витьтон аресэд. Со зэмос быдэ вуон. Кызьы но маин пумитаськод тон кын корт куртчон вакыттэ?

- «Ой, машина, машина» спектакль пуктонэн. Малы машина?! Солэн мугъёсыз трос. Нырысь ик, пичи дырысеным мынам Раиф эше весь машинаен шудэ вал, нош мынам ӧй вал, кирпичен шудӥ. Ӧй вал мынам шудонъёсы, вожъяськыса ик ортчиз пичи дыры. Соин ик 50 аресам сцена вылэ потыны малпасько пичи гинэ шудон машинаен, сое валтыса нулло, улон сярысь шара малпасько-верасько.

Но машина улонам мукет сямен но герӟаськемын на. Дэбесын улыкум, оломалы огпол нуназе доре сиськыны бертӥ. Анкай дорын зар-зар бӧрдыса пуке. «Мар луиз? – юасько. – Кин мар кариз?» Радио пыр кырӟан, пе, кырӟазы:

Ой, машина, машина,

Кытчы нуиськод, машина?

Нуонъёстэ нуиськод но,

Берен ваёд на меда?


Ой, дуннеос, дуннеос,

Кылё лёгем пытьыос…


«Кылдоз на меда бертыны дор палъёсам?» - шуэ. Ӧз кылды, висьыны усиз... Табере со кырӟанэз кылэме уг луы ни. Соку ик тодам лыктэ анкай, кызьы со бӧрдыса пукиз Дэбесын, Башкирилэсь мӧзмыса. Та улон машина кадь дыртэ – лулпуш дунне ыше-быре. Ваньзэ машина лэсьтэ, глобализация ӝокатэ. Нош мон вуженыз улӥсь адями. Улӥсько ортчеменыз. Туж кема но улэме уг поты. Кышкасько мон туала улонлэсь, огчаслы ке но сояз, азьло ортчем улонэ берытскысал на. Туала пиналъёс тани весь компьютер сьӧрын пуко. Нош монэ отчы уг кыскы.

- Нош тынад пиналъёсыд асьмеос сярысь мукетэсгес-а?

- Мынам кык нылпиосы – Руслан пие но Арина нылы. Пие дышетске УдГУ-ын, журналистика факультетын. Пиелэн дас классозь олокытчы но мыныны малпанэз вал. Нош куке пинал уг тоды ни кин луыны, анай-атай, пе, ачиз ӵектыны кулэ. Мон ачим дэмлай солы журналистикае сюрес. Солы юрттыны но быгатӥсько, литература но трос. Нылы 8-тӥ классэ ветлэ. Котькытчы вуэ – пӧртэм кружокъёсы, кырӟа, эктэ, пианиноен шудэ. Туала пиналъёс тросгес тодо, улон мукетгес ни...

Мыным дуногес лулпуш дунне. Уксё туннэ улыны вань ке – ярам. Соин ик мон уг малпаськы олокыӵе трос книга гожъяны, гожто пьеса, ачим ик сое шудо. Но витьтон аресэлы поттыны малпасько пичи гинэ брошюра – «Мон ваменэс вал…»

Нош тон тодӥськод-а, мынам пичи дыръям одӥг гинэ исан нимы вал?.. Ваменэс. Монэ ӵужае ялан пыкылоз вал: «Эк, пие, малы меда тон сыӵе ваменэс?»

Школаын но ваменэс шуылӥзы. Нош мон шуисько вал: «Мон ваменэс ӧвӧл, мон Валерий Михайлович Нуриахметов». Тетрадям тазьы гожтӥсько вал: ВаМеНэс.

Мон али ке но ваменэс, быдэс улонме ваменэс. Уг быгатӥськы калык кадь уллёен мыныны, котьку вандэм кадь пумит мынӥсько. Мон ноку ӧй тыршы властен вась-вась улыны, монэ ӧтё вал Шарканэ редакторе ужаны, Играла. Татын 22 ар ужатозям, кытчы гинэ ӧз ӧтьылэ – ноку но редактор луэме ӧз поты. Малызэ валэктыны но уг быгатӥськы. Ваменэс мон. Ваменэс ке но, мынам туж трос эшъёсы – Дэбесын но, быдэс Удмуртиын но.

- Ма тани, вераськон куспамы ик кин гинэ ӧз пыра ни дорад. Одӥгезлы туспуктэм кулэ, мукетызлы книга, куинетӥезлы – кыӵе ке адрес…

- Ма, мон татын энциклопедия выллем. Ӵукна ик жингырто но юало кинлэсь ке адрессэ, я эшшо мукетсэ…

- Байгурезь тонэ сыӵе кариз, дыр.

- Туж кузь веран со.. Гена Парфёновен эшъяськиськом вал. Со мыным Георгий Архиповлэсь адрессэ сётӥз. Мон солы кылбуръёсме ысъяй. Нош Георгий Архипович мыным Ярын потӥсь газетъёссэ келялляны кутскиз. «Сельской правда» газетын уго Архиповлэн тыршеменыз ӵем потылӥзы «Жильыртӥсь ошмес» но «Пыдэстэм ошмес» бамъёс. Одӥгаз номерын куинетӥ но ньылетӥ бамъёсаз потӥзы мынам но башкир шаерысь удмуртъёс сярысь гожъямъёсы.

Со газет пыр ик тодматски Миша Федотовен. Ми соин семинаре ветлӥм. Но жаль, татчыозь Архипов сярысь но, Федотов сярысь но тодэ ваёнъёсме ӧй гожты на. Нош дыр ортче. Но мынам улонам кызьы луиз: 8-тӥ классэз быдтэме бере ӧз сётэ свидетельство. Шуизы: мынод 9-тӥ классэ. Мон ӧй мыны, ваменски. Саник кутыса, юри мынӥ фермае. Дышетӥсьёс мон доры лыкто, ӧтё. Мон ӧй мыны. Ӵапак соку монэ ас дораз ужаны ӧтиз Георгий Архипов. Кошки Яре, «Сельской правдаын» одӥг ар ужай. Мынам паспортэ ӧй вал. Со дорын ик улӥ. Атайлэн ӧвӧлэз быдэс улонам шӧдӥськиз. Но «Сельской правдаын» ужаме-а, мар-а сюлэмам пытьы кельтӥз… Янаулын ӧз пӧрмы удмурт газет поттыны. Соку тӥни олокытысь, инмысь усем кадь, Рашит Хайдаров ӵектэм монэ Дэбесэ. Янаулын, пе, вань сыӵе адями. Тон ведь монэ ӵектӥд? Тонэ астэ но ӧтё, ӵекто вал, дыр?

- Ӵекто вал… но «Шӧкыч» борды бурмемын ни вал…

- Нош мынам туж потэ вал Ижевске лыктэме, «Дась лу!»-ын яке «Советской Удмуртиын» ужаме. Малы ке вырӟыса ӧй вутты. Малпамтэ шорысь татчы, Дэбесэ вуи. А-ха, малпасько, вжик! татчы лыкто но ар ужаса кошко – со улонам трамплин выллем луоз. Но малпамъя ӧз луы. Кышнояськи, выжы лэзи. Табере Дэбес мыным туж дуно ни. Но улонын номыр сярысь но ӧпкельыны уг яра. Янаулын ке улысал, кин мон отын луысал? Мон асме олокинэн но шӧдӥсько. Мон бигер кадь но куддыр потӥсько.

- Тон пичиысен ик гожъяськид. Но ваньмызлы кутскон сётӥз выльысь потыны кутскем «Дась лу!» газет.

- Бен. Мон ведь «Советской Удмуртия» газетысь лыдӟи выльысь, пе, потыны кутскем «Дась лу!». Почтальон доры мынӥсько, возьматӥсько. «Ӧвӧл сыӵе газет, - шуо». Сандугаче ветлӥ. Бигеръёс монэ ӧз валалэ. Кыӵе мынам сюлэм висьыса улӥз соку. Ӵужмуртэ почтальон вал. Со доры ветлылӥ газет лыдӟыны. Озьы тӥни мон Нурканысь «Дась лу!» лыдӟыны ветлӥ дас вить иськеме. Со шат висён ӧвӧл…

- Но «Смена» фотоаппарат ик тынэсьтыд улон ӧрдэ мукет пала берыктӥз, луоз. Табере, ӝыны даур ортчыса, мар шуод со пумысен?

- Берыктӥз но, дыр. Школае мынытозь мон ваньмызлы ик «Вася ӵужмурт кадь ик шофёр луо!» шуисько вал. Нырысетӥ классэ мынэме бере яраны ӧдъяз дышетӥсьлэн ужез – нырысетӥ дышетӥсе Григорий Николаевич Нуриахметов (пичи дырысь Алик эшелэн атаез) уго мон понна - ма, мукет пиналъёслы сямен ик! – Инмар интыын вал. Куинетӥ классысен кутскыса ни «Кин луод?» шуыса ёртыкузы, валэктӥсько вал тазьы: «Дышетӥсь но, писатель но, артист но потэ луэме!» Гожъяськыны пуромем мылкыдме шӧдыса но гурт клубмылэн сценаез вылысен маскаръяськылэмме адӟыса, мыным сыӵе оскон пыӵатыны быгатӥз мукетыз ӵужмуртэ – со вакытэ Можга педучилищеын дышетскись Валинур Муллануров. Туж потэ вал мынам но тодмо удмурт писательёслэн ӝужам-кыдам кӧкыязы-кебитазы дышетскеме.

Нош фотокор сярысь ке бен, солэсь ужзэ мыным школаын дышетскыкум ик быдэсъяны кылдылӥз: куинь ар бӧрсьысь бӧрсе гужем каникулъёс дыръя Янаул ёрос газетмылэн редакциысьтыз бадӟым эшъёсы та ужез мыным оскыло вал. Армиын дыръям но дивизимылэн газетэзлэн фотокорезлэсь ужзэ быдэсъяны оскылӥзы мыным. Собере УдГУ-ын дышетсконме йылпумъякум но, диплом ужме фотожурналистикалы ик сӥзи, нош кивалтӥсе вал – кин-о малпаськод? – Алексей Петрович Шкляев!

Озьы тӥни, дышетӥсь но, писатель но, артист но мон ӧй луы – вань улонме герӟай газет поттон ужен. Нош фотоаппартэн ноку но ӧй люкиськылы. Оскисько, вуоз ай сыӵе дыр но: куке но нимысьтыз фотовыставкаме радъяло.

- Валай мон, Дэбес музъем тонэ «ньылӥз». Но солы, мынам чакламея, кутскон сётӥз… кузпалъяськон. Кызьы но кытысен серметаны быгатӥд яратоно кышнодэ?

- Дэбесэ лыктыкум мыным 28 арес ке но вал ни, эрико улонэн чик но кӧты тыр ӧй вал на. Ма, собере Дэбесын кемалы ӝегатскон сярысь ӧй ик малпалля, аслэсьтым вань азьпал улонме адӟисько вал Ижысь гинэ, кытын театр, радио, телевидение! Но… УдГУ-ын дышетсконзэ йылпумъяса, дораз Дэбесэ берытскиз но татысь школае ужаны интыяськиз Эльза Аверкиева. Соин ӵош ик Дэбесэ вуизы но редакциын ужаны кутскизы солэн эшъёсыз – егит кузпалъёс Ирина но Алексей Тимирзяновъёс. Кыӵе ке праздник-а, кинлэн ке вордскем нуналыз-а – ми котьку ӵош. Нош куноысь дорам бертон сюресэ мынам котьку сямен кык пол кузьгес луыны ӧдъяз. «Сюресчиме» одӥг полаз келякум, корказылэн ӟезьы дораз вуэммы бере ни – уй кизилиё вал соку! – егит нылашез чупаны дӥсьтӥ. Сое инбамысь тыр толэзь сяна, мукет нокин адӟись ӧй вал ке но, куинь толэзь ортчыса, нурканъёс но шарканъёс Дэбесын шулдыр сюан шудӥзы. Мын но вала на табере кин кинэ кортназ: мон-а сое, со-а монэ. Одӥгез тодмо: туэ кызь ар тырмоз ни уробомес-дӧдьымес улонлэн шукрес сюрестӥз одӥг кыткетын нуэммы дырысен. Жадьыны ӧм на вуэ кадь.

- Кышно - ӝыны юрт… Но тон вань дырдэ уж дурын но пӧртэм пумиськонъёсын ортчытъяськод кадь. Соин ик кышноед быдэс юрт ӧвӧл меда?

- Зэмлыкез веранад вань. Мыным ӵем гинэ кылоно луэ озьы верамзэс. Шуисько, Дэбеслэн но аслаз театрез яке филармониез луысал ке, столицаысь монэ югыт куазен тылын утчаса но ӧй шедьтысалды. Озьы ке но… Озьы ке но азьвыл аръёсы Удмурт театрлэсь одӥг премьеразэ но учкытэк уг кельтӥськы ке вал, берло дыре таин ушъяськыны уг быгатӥськы. Шаерамы ортчылӥсь сэбедъёсы но ваньмаз ик пыриськыны уг кылды ни, мон сярысь али но «Фигаро там! Фигаро тут!» шуисьёсыз вань ке но… Собере веранад зэмлыкез вань шуисько на соин но: одӥг гинэ ӧвӧл, кык кышномурт вылын уго возиське юртмы. Кыкетӥез кышномурт – со мынам вармуми, ӟеч сямо но бадӟым сюлэмо адями Полина Семёновна Аверкиева.

- Мар ваёз меда ӵуказе нунал?


- Котьмалэн кутсконэз вань бере, одно луыны кулэ солэн пумыз. Бен, «Байгурезь» газетэз но куке но мон нырысь малпай йырыным, кылдытӥ сюлмыным. Соку, 15 ар талэсь азьвыл, солэн кулэлыкез удмурт лыдӟись понна вераны луонтэм бадӟым вал – пӧсь куазен юэм потыку сюэз ошмес вуэн юзматэм кадь. Тиражез кӧня ке аръёс ӵоже 1000-1500 лыдпус котырын возиськиз. Али бен сомында ӧвӧл ни ке но, мылкыды юскиськемын уд шуы. «Байгурезьлэн» ӧжыт ӧвӧл на зэмос лыдӟисьёсыз – оскымон эшъёсыз! Соос, малпасько, «Байгурезьлы» куашканы уз сётэ…

Источник:

Нуриахметов В. М. ВаМеНэс / В. М. Нуриахметов ; записал Рашид Хайдар // Удмурт дунне. - 2006. - 3 марта. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"