Редактирование: Никольская Глафира Николаевна


== '''Кылмумы''' ==
[[Файл:Nikolskaya.jpg|200px|thumb|left|Никольская Г.Н.]]

'''Глафира Никольская – Россиысь тодмо дышетӥсь, педагогика наукаосъя доктор, академик, ӟуч но удмурт кылъёсъя учебникъёслэн авторзы, Москваысь удмуртъёслэсь «Герд» огазеяськонзэс кылдытӥсь. Паймымон сабырлы кышномурт. Та нунальёсы Глафира Николаевналы тырмиз 90 арес. Со али но ужа, паймытэ лэчыт визьмыныз, улон шоры паськыт но сайкыт учкеменыз.'''

'''Буйгасьтэм мылкыд'''

Кӧня ке ар талэсь азьвыл Москваысь Гербере вуылыкум Глафира Николаевнаез адӟыса, ас синмылы ӧй оскы. Аресыз шоры учкытэк, кышномурт мыло-кыдо пыриськиз вань адӟытонъёсы, удмурт книгаос басьяз, удмурт кырӟанъёсъя бергаз, шораз гажаса вазисьёслы небытак пальпотӥз… Пичи гинэ мугоро, тӧдьы бабля йырсиё, муспотон тусо, котьку туж лякыт вазиськись – кинэн ке сое суралод шат? Удмурт калыкен герӟаськем вань ужрадъёсы, пе, ветлӥсько, кыӵе шулдыр ук аслад выжы культураеныд пумиськыны, адямиосты адӟыны.
Тодосчилы эшшо юнгес пайми туэ 90 арес тырмон азяз жингыртэме бере. Глафира Николаевна пусйиз, Москваысь квартираям, пе, ачим асме ворсаса возисько ай, угось ӟуч кылэз дышетон методикая книгаме йылпумъяны тыршисько, сое поттон Удмуртиысь Дышетон удысысь национальной ужпумъёсты эскеронъя институтлэн планаз туэлы пыртэмын, собере «Вордскем кыл» журналэ статьяме йылпумъяно на…
Зэм, тазьы ассэ ужатон висказ тодосчи Горд площаде вуылэм ик, отын соку книгалы сӥзем фестиваль но «Удмуртия» издательстволэн юбилеезъя ужрад ортчиз.

Паймемме ватэме ӧз луы:

– Куд-ог егит муртъёс но улонлэсь жадё, номыр каремзы уг ни поты, нош кызьы тӥляд мылкыдды ялан кытчы ке кыстӥське?

– Ма, ачиз улон озьы косэ ук, – вера Глафира Николаевна. – Тани ӟуч кылэз дышетон методикая книгаме гожтӥ но, йырам мукет малпан ни: удмуртсэ дышетонъя но рос-прос книга гожтоно вал. Собере аслэсьтым выжыме архивъёсын пукыса эскерисько, 1766-арозь вуи ни, туж тунсыко. Ужамъя выль малпанъёс лыкто, мылкыд ӝутске.

Глафира Николаевнаез али но ӧтчало Россиысь Дышетонъя академилэн Дышетон амалъёсъя но дышетонлэн пуштросэзъя институтаз, М. Щепкин нимо театральной училищее, визь-кенеш, юрттэт курыса. Со мыло-кыдо пыриське Москваысь удмуртъёслэн «Герд» огазеяськонзылэн ужаз. Та огазеяськонэз 14 ар ӵоже валтӥз.
Уно аръёс ӵоже Глафира Николаевна кивалтӥз РСФСР-ысь национальной школаосъя институтысь Уйпалан но Дальний Востокын улӥсь калыкъёслэн школаоссыя секторен. Россиысь Дышетон удысысь национальной ужпумъёсъя институтын наукая валтӥсь ужась вал. Пусъемын ВДНХ-лэн азвесь медаленыз, «Отличник народного просвещения СССР» пусэн но трос мукет данъетъёсын.
Со 2 полэс академик: Педагогикая но социальной наукаосъя академилэн (АПСН), Адямиез но инкуазез кышкытлыклэсь утёнъя но экологияя калыккуспо академилэн (МАНЭБ) ёзчизы. Озьы ке но паймытэ солэн востэм, зэмос удмурт сямо луэмез.

'''Шляпа гуртын'''

Г. Никольская вордӥськиз 1929-тӥ арын Шаркан ёросысь Шляпа гуртын. Аслаз анай-атаез сярысь со туж шунытэн тадаз вае:

– Атае грамотаез тодэ вал, Шарканысь банкын бухгалтер луыса ужаз, гуртоос пӧлын соку ик висъяськылӥз: ӝужыт, югыт йырсиё, чагыр синмо, адямиосын кусып тупатыны но туж чебер кырӟаны быгатӥсь. Атаелэн Иосиф агаез черкын священник луыса ужаз. Атай, Иосиф агай но солэн пиез кырӟаны пуксё ке вал, быдэс гуртмы но со котырысь инкуазь шып кариськылӥзы кадь. Кырӟамзы сюлэмез вырӟытылӥз. Со дырысен ик мон но крезьгурез туж яратӥсько.

Анае Тыловыл гуртын вордӥськемын. Туж лякыт, ваньмыныз одӥг кыл шедьтыны тыршись, небытак пальышась кышномурт вал. Со но крезьгурез яратӥз, гитараен шудӥз. Тыловыл палась гуртъёсын со кадь чебер нылкышно вылымтэ. Семьяямы вал на мынэсьтым 2 ареслы пичи Гермоген вены…

Анай-атае малпало вылэм Шарканын улыны, отчы корка пуктыны. Но атайме ӧтиллям Воткинск вӧзысь нюлэс участоке ужаны, отын квартира сётӥллям. Атай чеберлыкез туж гажалляз, огпол Воткинскысь венской мебель заказтӥз. Соку со верантэм бадӟым узырлык вал. Ваньмыз азьланяз но огсыр мынысал, вылды. Но Шляпаын соку гинэ кылдэм колхозлэн правлениез но колхозникъёс атайлы вазиськизы, юрттэт курыса. Берытскы, пе, вордӥськем гуртад. Атай нырысь пумитъяськиз. Собере гуртэ кылем пересьмись анай-атаез жаль потӥзы, лэся. Озьы со колхозын бухгалтер луыса ужаны кутскиз.

– Атаймы туж тыршиз колхозысь улонэз ӟечгес карыны, – шуэ Глафира Николаевна, – калыкез дышетскыны бурдъялляз. Атай ик кышномуртъёслэсь улонзэс капчигес карон понна нырысетӥ нылпи сад кылдытӥз. Котькуд ӵукна выныным кыкнамес китӥмы кутоз но уж дураз вамыштоз вал. Мон атайлэсь чиньызэ киыным кырмисько но тэтчаса мынӥсько. Атай милемыз садике уг кельты вал, уж дураз нуэ. Аслаз милемыз дышетэмез потылӥз. Котькудмылы бумага, карандаш, счётъёс сётэ, лыдъяськыны яке, бумагаез куасалляса, шудон лэсьяны дышетэ.

1930-тӥ аръёслэн шоразы гуртын улон капчи ӧй вал. Но Никольскийёслэн егит семьязы шудо вал. Жаль, со шудо вакытсы кема ӧз кыстӥськы. Нылашлы 6 арес дыръя атайзы пневмониен черлаз, 3 нунал висьыса, улонысь кошкиз. Нош ар ортчыса, кулӥз скарлатинаен висьыны кутскем 5 аресъем Гермоген.

– Кайгуэн куасалтэм анае туж курадӟиз, солэн чигиськонэз быдэс улонэлы син азям кылиз, – тадаз вае Глафира Николаевна. – Мон 3 семьялы одӥг пичи пинал кыли, монэ жаляллязы, нуныязы мамае, ӟучмамае (атаелэн апаез, 14 аресказ монастыре кошкемын, отын схимонахиня вал), песянае но песятае.

'''Нуналлы быдэ – 24 иськем'''

Ӝоген, 7 арессэ тырмытыса, пичи Фира мынӥз школае, Шляпа дорысь ог 2 иськеме интыяськем Ляльшур гуртэ. Дышетскиз шудыса кадь, мыло-кыдо. Вань нылпиос кадь яратӥз шаянтыны, гурезь йылысен портфель вылаз нискылалляз. Нош 2-тӥ классэ сое келязы Сосновка гуртэ. Татын со ӟучмамаез дорын улӥз, черк куронъёсты валаны дышиз: калыкен лякыт луоно, тау карыны быгатоно…

Ар ортчыса, нылашез Шарканысь школа-интернатэ келяло, угось анаез татысь нылпи юртын сиён пӧзьтӥсьын ужаны кутске.

1941-тӥ арын кутскиз война. Фира анаеныз бертӥз Шляпае. Анаез колхозын ужаз, бригадир, конюх, фермаен кивалтӥсь вал. Нылаш солы юрттӥськиз, турнаськиз, етӥн сэстӥз – быдэс нунал ужаса, киосыз тӧрналлязы, ярӟылӥзы, но ӵуказеяз выльысь уже потоно.

7-тӥ классэз йылпумъямез бере анаез сое счетоводъёслэн школаязы келяз. Но школалэн директорез нылашез кутыны пумит луиз, счетоводын ужаны аресыз, пе, пичигес ай, собере сыӵе ӟеч дышетскись ныллы кыдёкегес мыноно, училищее пыроно. Озьы 1944-тӥ ярын Г. Никольская дышетскыны пыриз Якшур-Бӧдьяысь педучилищее. Отын коть стипендия тыро, нянь сёто. Но мӧзмеменыз дышетсконзэ куштӥз, дораз бертӥз.

Анаезлэн йырыз кур вал, но мар карод. Нылаш 8-тӥ классэ Шарканэ мынӥз. Шляпаысен Шарканозь – 12 иськем. Нуналлы быдэ отчы-татчы пыдын ветлӥз. Котькыӵе куазь мед луоз, одӥг нуналзэ но ӧз кельты.
Вуоно араз Глафира педучилищеын дышетсконзэ азинтоно кариськиз. Шляпаысен Якшур-Бӧдьяозь – 37 иськем. Субботаосы нылаш пыдын дораз бертылӥз, арнянуналэ, быдэс котомка сиён тырыса, Якшур-Бӧдьяе вамышъяз.
Педучилищеез йылпумъяса, Удмурт пединститутэ пыриз, историяя но филологияя факультетын дышетскиз. Берпуметӥ курсын дышетскыкуз, Ижысь педучилищеын ужаз ни. Дышетӥсьлэн ужез туж яра ке но вал, крезьгурчи луэмез но потылӥз.

– Дышетскон вискам крезьгуръя школае пиналъёслэсь шудэмзэс кылзыны юри ветлӥсько вал, – шуэ тодосчи. – Ӧс сьӧры султӥсько но кылзӥсько. Собере куд-ог урокъёсазы но ветлыны кутски, пианиноен шудыны дышетски. Но дыры тырмытэк, куштоно луиз. Институтын но дышетсконо, педучилищеын но ужано. Висказ я «Советской Удмуртия» газетэ, я «Удмуртия» издательствое ужаны ӧтчазы на, корректор но, редактор но вал. Уйёссэ ӧй ик кӧлылы кадь: нылпиослы литературая урок сётон понна произведениосты лыдӟыса потоно вал ук. Али, со дырез малпаса, ачиз но пойме:

– Мон ик-а вал со? Осконтэм. Кызьы меда чидаськем…

1954-тӥ арын егит дышетӥсез шӧдтэк шорысь ӧтизы Удмуртиысь Просвещениея министерствое. Министр M. Горбушин сое тодматӥз СССР-ысь национальной школаослэн научно-исследовательской институтсылэн директореныз Ефим Кореневскиен. Москваысь бадӟым кивалтӥсь Удмурт шаере юромо лыктэм асьме ужан амалъёсынымы тодматскыны, институтысьтыз аспирантурае дышетскисьёсты бырйыны.

Г. Никольскаялы аспирантурае мыныны дэмлазы. Зэм, 3 инты гинэ, пе, висъямын, нош кужымзэ мерталоз СССР-ысь 12 адями. Удмурт нылаш гижысь-пиньысь дасяськиз но Якутиысь, Кабардино-Балкариысь нылъёсын ӵош 3 шудоос пӧлы шедиз.

'''Учебникъёс – 24 калыклы'''

Аспирантуразэ йылпумъяса, Г. Никольская Удмуртие берытске, Удмурт пединститутын ужа, педагогика наукаосъя кандидат луэ. Но ӝоген сое Москвае, аслаз ик дышетскем институтаз, ужаны öтё. Москваын улон капчиен ут сётиськы – квартираез ӧвӧл, коньдонлы ёрме, ужаз али гинэ тэтэ каре. Та вакытэ солы юрттэ азьвыл тодмоез, Бурятиысь егит тодосчи Пётр Атутов. Пётр Родионович Быдӟым оже ветлэмын, Москва понна ожъёсы пыриськемын вал. Москваын со Россиысь Педагогика наукаосъя академиын ужаз.

Г. Никольская та академиысь Дышетон удысысь национальной ужпумъёсъя институтлэн фин-угор сектораз, себере ӟуч кыллы но литературалы дышетон методикая секторын ужа. Пётр Атутовен соос семья кылдыто, 40 арлэсь кема ӵош уло. Куспазы котьку туж лякыт вераськизы, ог-огзы шары куаразэс будэтъямзы огпол но ӧй вал. Пётр Атутов – бурят калыклэн нырысетӥ академикез, Москваысь Ужлы дышетон педагогикая институтлэн директорез, Бурятиысь институтлэн профессорез. Дорысьтызы ӧз бырылэ П. Атутовлэн быдэс дуннеысь аспирантъёсыз.

Глафира Николаевна, наукаен вырем сяна, пыриськылӥз общественной уже, политикае. Озьы 1963-тӥ арын со Москваысь Ленин ёросысь депутатъёслэн Кенешазы быръемын вал. Депутат сямен туж трос ужез вырӟытоно луиз.

Та вакытъёсы ик печатласько Г. Никольскаялэн мукет авторъёсын ӵош Россиысь национальной школаос понна гожтэм ӟуч кылья учебникъёсыз но программаосыз. Бӧрысь соос 19 пол печатласькизы на. Быдэс Россиысь выжы калыкъёслэн нылпиоссы со книгаосъя дышетскизы. Нош Глафира Николаевналэн  удмурт кылъя учебникъёсыз но программаосыз, 1972-тӥ арысен кутскыса, туннэ нуналозь пото на.

1976-тӥ арын тодосчилы оскизы Национальной школаослэн институтазы Уйпал но Дальний Востокын улӥсь калыкъёслэн сектореныз кивалтыны. Та туж секыт уж вал: 24 калыклы учебникъёс кылдытоно, со пӧлысь 8 калыклэн письменностез но ӧй вал ай. Глафира Николаевна сюлмаськемен, секторе ужаны кутӥзы асьсэ выжы культуразэс, кылзэс ӟеч тодӥсь 14 егит тодосчиосты, дасямын саам, ненец, ханты, манси, нивх, нанай, коряк, эскимос но макет кылъёсъя специалистъёс. Гожтэмын выль учебникъёс, программаос, методпособиос. 14 уйпал калыкъёс понна кылдытэмын словарьёс. Секторлэсь ужзэ ӟечгес радъян понна Глафира Николаевна ӵем потано луылӥз командировкаосы, толэзьёсын ветлӥз уйпал калыкъёс дортӥ, Сахалинысен кутскыса, Кольской шормуӵозь ортчиз пӧртэм посёлокъёстӥ, каръёстӥ, пужей, пуны кыткетъёсын но.

Глафира Николаевналэн кивалтэмез улсын 25 адями кандидат ужзэ утиз, 3 адями педагогика наукаосъя доктор луиз.

'''Удмурт кыл визьмогес каре'''

Ӧжыт лыдъем уйпал калыкъёсын ужаса, мон национальной ужпумъёс шоры мукет сямен учкыны кутски, – шуэ тодосчи. – Ас синмыным адӟи, кызьы куд-ог калыкъёслэн кылзы быре. Ӵемгес малпаськыны кутски удмурт кылы сярысь но, асьмелэн югдурмы трослы ӟечгес ке но. Мукет сяменгес учкыны кутски кылэз дышетон методика шоры. Та ласянь тодон-валанме узырмытӥз на Москваысь М. Щепкин нимо театр училищеын ужаме. Монэ отчы ӧтизы вуоно актёръёсты ӟуч кыллы, сцена вылын вераськон кыллы дышетон панна. Нырысь туж секыт вал. Нош собере та ужме сокем яратӥ! Наукая, методикая ужъёсам вуоно актёръёсты дышетэме туж бадӟым юрттэт луиз. Та выль ужан амальёсты мон кутӥ ини, 5-тӥ–11-тӥ классъёсты дышетонъя методикаез дасякум.

Вуоно артистъёсын, тужгес но Удмуртиысь группаосын ужамзэ веракуз, Глафира Николаевналэн мылкыдыз пачыла:

– Сыӵе яратыса мон соос доры ветлӥсько вал! Шумпотонэ быдэс улонэлы кылиз. Со егит артистъёс али но сюлмам, ог-огмылы жынгыръяськом, вераськиськом.

Артистъёс но дышетӥсьсэс туж шунытэн тодазы ваё, со милям Москваысь анаймы, Шунды-мумымы вал, шуо.
Удмурт шаерезлэсь палэнын улэ ке но, Глафира Николаевна выжыез сярысь ноку ӧз вунэтылы, 1991-тӥ арын, Москваысь удмуртъёсты огазеяса, «Герд» огазеяськон кылдытӥз. Огазеяськон али но вань, солэн ужаз пыриськись удмуртъёс Г. Никольская сярысь туж ненег мылкыдын верало: «Со милям анаймы кадь…».

Тодосчи али но калык пöлын. Яратэ кырӟаны, удмурт, ӟуч кылбурчиослэн чуръёссыя ачиз ик гур малпалля.

– Пие Москваысь француз школаын дышетскиз, – тодаз вае со. – Отын куронъёс бадӟымесь вал. Со сяна, крезьгуръя школаын дышетскиз на, баянэн шудӥз. Но 5-тӥ классын секытгес луиз ни, школаын дорысь уж туж трос сётъяны кутскизы, пие крезьгурен вырыны ӧз вутскы ни. Озьы крезьгуръя школазэ куштоно луиз. Нош баян кылиз. Малпай, ачим шудыны дышетско. Тини озьы гитараен но, баянэн но шудӥсько.

Пиез али Швейцариын улэ, итальян-ӟуч фирмаын визь-кенеш сётӥсь луыса ужа, Москвае ӵем гинэ вуылэ. Пиезлэн пиез 10-тӥ классэз йылпумъяз, англи школаын дышетске. Внучкаезлы 7 арес, со балетъя школаын дьшетске.

– Внукеным ог-огмес туж валаськом, со монэ олокытчы на нуллэ, – шумпотэ тодосчи. – Кунсьӧрын будэ, коня ке кунсьӧр кылъёсты тодэ ке но, сямызъя тяп-тяп удмурт: лякыт, дыртӥсьтэм, рос-прос, небыт сюлэмо. Ма, тусыз но мон кадьгес. Туж тыршисько, внукъёсы удмурт выжызэс мед тодозы шуыса. Внукелы ӵемысь шуисько: ой, тон мынам тяп-тяп. Со азьпалтыса «удмурт» шуэ. Куддыръя азязы юри удмурт сямен вераськисько. Ой, тазэ валам, тазэ öмгес, пе. Малпаське, шуисько, йырдэс тӥялэ. Удмурт кыл туж юрттэ йырвизез будэтыны, визьмогес луыны. Удмурт кыл ик котьку мыным улыны юрттэ.

'''Источник:'''

[https://elibrary.unatlib.ru/handle/123456789/44020 Никольская Г. Н. Кылмумы / Глафира Никольская ; вераськиз Елена Миннигараева // Удмурт дунне. – 2019. – 27 июня. – С. 10, 15 : фот. – (Тӧр шорын).]

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]