Наговицына Елена Святославовна

Материал из Воршуда
Перейти к навигацииПерейти к поиску

Кыдато кузь иськемъёс[править]

Е. С. Наговицына

Туэ Лондонын ортчем Олимпиадае Удмуртиысь 6 мурт пыриськиз. Медаль басьтыны ӧз удалты ке но, ваньзы сямен финалэ шедизы. Бадӟым ужрадын азинсконъёс басьтэмзы понна та спортсменъёслэсь туспуктэмзэс Удмуртилэн Данъян пул вылаз пыртӥзы. Соос пӧлысь одӥгез – Дэбес черкогуртысь пыдын бызьылӥсь Елена Наговицына. Ньыль арлы огпол ортчись ужрадэ вуылэмез бере эшшо но бурдъяськиз, азьланезлы малпанъёсыз воштӥськизы.

Арганчи луиз шӧртчи

- Вордски Дэбес ёросысь Медлодур гуртын, – вера спортсменка. – Семьяямы ньыль пинал вал, мон кыкетӥез. 4 арес тырмыса, Дэбес черкогуртэ улыны выжимы. Ёрос центрын улонмы шулдыр луиз, пичиысен ик пӧртэм кружокъёсы ветлылӥ. Песянаймылэн туж потэ вал монэ арганчи каремез. Соин ик крезьгуръя школае гожтӥзы. Баян кысканы дыши ке но, крезьгурчи мынэсьтым ӧз пӧрмы. Бен, ваньмон дыръям куд-ог гуръёсты шудыны йӧндырисько ик. 7-тӥ классын дышетскыкум, черкогуртысь спортшколаысь тренеръёс доразы ӧтизы. Бен, со вакытэ отын капчи атлетикая ёзэз ӧй вал, нош куасэн бызьылон сюлэмам сокем ӧз лякиськы. Озьы-а, тазьы-а, но спорт мыным кельшиз. Зэмзэ вераса, пыдын шаплы бызьылэмме шӧдыса, тренеръёс монэ 2-тӥ классысен ик доразы ӧтчалляны кутскизы ини. Но спортшколае сюрес укыр кузь вал, анай-атае котьку келяны-пумитаны ӧз быгатылэ.

Бадӟым классъёсын дышетскыкум, валай: мынам сюресэ – спорт. 7-тӥ-8-тӥ классъёсын нырысетӥ вормонъёсы кылдӥзы. Шаерысьтымы ас ёзо эшъёсы пӧлын вормеме бере монэ кутӥзы ёросысь спортсменъёслэн командаязы, нош 1998-тӥ арын нырысьсэ пыриськи Гурт шудонъёсы. Якшур-Бӧдья черкогуртын вормонъёс басьтыны ӧз удалты ке но, отысь бурдъяськем мылкыдын вуи. 4 нунал ӵоже кыстӥськись ӵошатсконъёс быдэс сюлэмме бугыртӥзы. Вуоно араз Гурт шудонъёслы рос-прос дасяськи ини. Тыршеме токма ӧз луы. 800 метре бызьылыса, кыкетӥ инты басьтӥ. Медаль сётэмзы бере воксё инметӥ лобай, соку ик пыдын бызьылонъя нырысетӥ разрядлэсь куронзэ быдэстӥ. Пьедестал вылэ тубаме, сяська керттэт басьтэме туннэ но син азям. Азьланяз арлы быдэ Гурт шудонъёсы пыриськылӥ, ялан призёръёс пӧлы шедьылӥ.

Вормемъя вормем потэ

Юнме вераллямтэ: сиемъя сием потэ. Удмуртиысь спортсменъёс пӧлын вормонъёс басьтэменым гинэ мылкыды ӧз буйга, эшшо но вылӥегес ӝутскеме потылӥз. Валамон, нылпи спортын басьтэм вормонъёсыным узырмыны ӧз кылды. Быдэ вуыса гинэ, асме ачим сюдыны быгатӥ ни. Шаермылэсь данзэ улосвыл ӵошатсконъёсын трос пол утьылӥ. Соку ини медальёсы вӧзы коньдон кузьым но сётылӥзы. Со туж юрттӥз семьямылы. Анае вуз карись вал, атае тракторист, соин ик куд-ог ӵошатсконэ потон азьын коньдонэн шугъяськонъёс кылдылӥзы.

Анай-атаелы музъемозь йыбырттэме потэ. Спортэн эшъяськонлэсь одӥг пол но алэмзы ӧвӧл. Быгатэмзыя юрттыны тыршизы, мылкыдме бурдъяллязы – ӝытъёсы монэн ӵош куасэн я пыдын бызьылӥзы. Ӵем дыръя песянаймы доры куное ветлылӥмы, нош со Дэбеслэсь 5 иськемын улэ. Бензин сутытозь, дораз пыдын вамышъяллямы. Анае Надежда Сергеевна ас вакытаз куасэн бызьылэмын, атае Станислав Михайлович волейболэн шудэмын. Пичи дыръям котькуд ӝыт быдэс семьяен туп ӵыжаны поталлямы.

Бызьылонъя быгатонлыкъёсы арысь аре юнмазы. Дэбесъёс понна шумпотӥсько: мугорзэс кыдатыны луонлыкъёссы городын выллем – стадион, куас база, бызьылон сюресъёс югдытӥсько. Азьвыл аръёсы таӵезэ телевизор пыр гинэ адӟыны кылдылӥз. Олимпиада сярысь репортажъёсты котьку быдэс семьяен учкылӥмы. Сыӵе ужрадъёсты выжыкыл дуннеен ӵошатылӥ.

Школаме йылпумъяса, Удмурт кун университетысь психологияя но педагогикая факультетын дышетски. Гурт шудонъёсы ветлон сяменым ик вуоно кузпалэным тодматски. Семья кылдытӥмы. Кыкнамы но спортэн эшъяськиськомы вал бере, городэ ик кылёно кариськимы. Но ас улон серегмы ӧвӧлэн отын кема улыны ӧм чидалэ, вылаз ик, уждунмы пичи вал. Ярано коть, милемды Каракулино ёросэ ӧтизы, соку ик улон инты но, уж но ӵектӥзы. Кузпалы Павел Николаевич капчи атлетикая нылпи тренер луыса ужа.

Кам дуре интыяськем черкогуртын 6-тӥ арзэ улӥськомы ини ке но, вордскем палъёс сюлмысь уг вуно. Син азьын ялан Дэбес гурезьёс. Соос мыным спортэз яратон мылкыд пыӵатӥзы, пыд вылам султыны юрттӥзы. Ваньмон дыр шедьтыкум, одно ик отчы вуылыны тыршисько. Спортын вормон басьтыны котьку юрттэ кузпалы но Дэбесысь нырысетӥ тренере Николай Хохряков.

Секундлы шаплыгес, интылы вылэгес

Россиысь сборное шедён туж секытэн сётскиз. Мынам чакламея Удмуртиысь спортсменъёслы тросгес удалтылэ кузь сюресъёс вылын: асьмелэнъёслэн чиданзы бадӟым. Мынам яратоно сюресэ – кузь иськемъёс.

Нырысетӥ бадӟым вормонэ 10-тӥ классын вал. Россиысь пиналъёс пӧлын 3-тӥ инты басьтӥ, аслэсьтым рекордме выльдӥ. Инметӥ лобай кадь. Со вормонэ бере эшшо но тросгес бызьылыны кутски. 2003-тӥ арын егитъёс пӧлын висъяськи. Сочи городын ӵошатскон дыръя шоссе вылтӥ бызьылыса, зарни медаль утӥ. Пьедестал вылын сылон туж кельшиз. Со дырысен валай: эшъёслэсь котьку одӥг секундлы ке но шаплыгес бызёно, одӥг интылы ке но вылэгес тэтчоно, кужмогес луоно.

Со вормонэ бере монэ тренеръёс син азязы возьыны ӧдъязы, Россиысь ӵошатсконъёсы тросгес ветлыны кутскимы. Нош кылем арын удалтӥз Россилэн чемпионатаз вормыны. Со ужрадэ Эфиопиысь спортсменъёс но пыриськизы. 10 иськеме бызьылонын одӥгез кунолы кӧня ке секунд гинэ келяй. Огъя ӵошатсконын кыкетӥ инты басьтӥ ке но, Россиысь эшъёсме соку кыдёке азьпалтыны быгатӥ.

Собере ик сборнойлэн основной составаз кутӥзы. Ялан сборъёсы потаса, Россиысь спортсменъёсын люконтэм эшъёс кадь луимы. Пӧламы вал Олимпиадае пыриськемъёс Юлия Заруднева-Зарипова, Татьяна Архипова-Петрова но мукетъёсыз. Ӵапак соос трос вераллязы Олимпиада сярысь, эшшо но эшшо мынэммы потэ, шуылӥзы. Нылъёслэсь верамзэс кылзыса, мынам но мылкыды лӧптӥз. Соос шоры учкыса, йырам малпан чилектӥз: нош мон маин пӧртэм?! Бен, котькуд спортсменлэн бадӟым малпанэз – Олимпиадае шедён. Солы дасяськыны луонлыке вал на. Но, жаляса верано, маке сярысь туж зол сюлмаськиськод ке, малпанъёс улонын уг быдэсмо вылэм.

Мылкыдэз зыгатӥсь Олимпиада

Олимпиадалы рос-прос дасяськыны ар-кык азьло кутски. Россиын вормеме бере мон шоры валтћсь конкурент шоры сямен учкылӥзы. Олимпиадае шедён понна Чебоксары городын ӵошатсконын олимпийской нормативез быдэстоно вал. Бадӟым старт азьын мылкыды дурыныз пачылаз, сюлмы кык поллы золгес жугиськиз кадь. Но… ӧчкарем кадь – та нуналэ пыдъёсы ӧз кылзӥське. Яратоно 10 иськемам нокытчы ӧй шедьы: Олимпиадае но, Европалэн чемпионатаз но. Тренере монэ буйгатӥз но янгышъёсы бордын ужаны визьнодаз.

Бен, суй-пыдэз юскыны вазь вал. Мылкыдэз зыгатӥз Олимпиада. Отчы шедьыны берпуметӥ луонлыке вал 5 иськеме бызьылонын. Угось берло ар куспын та дистанциын трос пол бызьылӥ, вормонъёсы вал, нош олимпийской куронэз май толэзе быдэстӥ. Июль толэзе мон азе эшшо но бадӟым курон пуктӥзы: 5 иськеме ӵошатсконын кык кужмоез пӧлы шедёно. Аслым ачим паймисько кыкетӥ вуэмелы, шумпотэменым тэтчай соку. Тау карисько тренеръёслы мыным оскемзылы.

Та вакытэ мугорме кыдатӥсько кык тренер дорын – Ижысь Александр Яникеев но Чебоксарыысь Михаил Кузнецов дорын. Россиысь ӵошатсконъёсын кык улос понна очко люкасько. Бызьылӥсько МВД-ысь «Динамо» огазеяськон понна. Оло, куд-огез вожъяськоз – тросэтӥ уждун басьтӥсько кожалоз. Спортсменъёслы одӥг копейка но капчиен уг сётӥськы. Чагыр экран азьын пукыку гинэ, ваньмыз чебер но капчи адске. Тужгес трос пӧсяно луэ сборъёсын. Нуналлы быдэ 30 иськемлэсь ятыр бызьылӥськомы. Сборъёс араз 10 толэзь пала кыстӥсько. Одӥгез коть умой: сиёнлы уг тэргаськиськы, секталаелы уг ӝожтӥськиськы. Озьы но луылэ: куд-ог спортсменъёс дор палазы бертало но, мултэс килограммъёссэс сборъёсын «сутыны» выро.

Люкетӥз пӧзись мылкыд

Лондонысь Олимпиадаез чидатэк витимы. Россиысь кивалтӥсьёс ваньзэ чаклаллям: вазь мынэм спортсменъёс Олимпиадалэсь усьтонзэ учкизы, нош мукетъёсыз – ворсанзэ. Мыным кык полэс удалтӥз, шуыны луоз. 10 иськеме бызьылысал ке, праздниклэсь шулдырзэ адӟыны ӧй кылдысал. Нош 5 иськеме бызьылон берпуметӥ нуналъёсаз ортчиз. Озьы Олимпиадаез ворсан ужрадэз адӟыны кылдӥз.

Вань спортсменъёс сямен ик, мон но олимпиадае бадӟым малпанъёсын мынӥ: дуннеысь 10 кужмо спортсменъёс пӧлы шедёно! Аслэсьтым лыдпусъёсме выльдоно. Ӵошатскон кутскон азьын пыс-пыс изи, вань телефонъёсме кысӥ, малпаcьки старт сярысь гинэ.

Нырысетӥ малпанме быдэстэмысь вань эшъёсы но тренеръёсы шумпотӥзы. Аслам но мылкыды пӧзиз, нош буйгатскыны вазь вал. Ӵуказе нуналаз – финал, эшшо одӥг пол 5 иськемез ортчоно. Валамон: ӟигар но сокем трос ӧй вал ни. Мыным ӝог старт капчиенгес сётӥське. Огшокчемен финише но шаплы вуиськод кадь. Нош Олимпиадаын ваньмыз йырин-чукин берытскиз. Быдэс уллё кинлэсь ке ӝог быземзэ возьмаз, куд-ог дыръя мыным соосты валтоно луиз. Нырысетӥ мынӥсь кык поллы тросгес кужымзэ быдтэ. Финиш азьын пыдъёсы сокем ӝог ӧз нуэ ни. Озьы 13-тӥ интыозь сяна ӝутскыны ӧз кылды… Куд-огезлэн верамез потэ, сьӧд куо спортсменъёсын вожвылъяськон, пе, пайдатэм: котькызьы бызь – соос тонэ кельтозы. Мон озьы ӧй шуысал. Соос но ми кадесь ик. Вожвылъяськыны луоно. Вормон басьтон понна эшшо тросгес бызьылоно, калыккуспо ӵошатсконъёсы ӵемгес пыриськоно, опыт люкано. Финалэ шедён – бадӟым дан. Отчы ӧй ке шедьысал, оло, Олимпиадае вуылэм кадь но ӧй потысал. Угось мынам бертон билетэ Олимпиадаез ворсан нуналэ ӵукнаяз вал. Тау карисько кивалтӥсьёслы, луонлык сётӥзы чебер ужрадэз учкыны. Бадӟым стадионын пӧртэм странаосысь спортсменъёс люкаськизы, ваньзылэн мылкыдзы шулдыр. Ужрадлэсь синпӧртмась луэмзэ соку гинэ валай – выжыкыл дуннее вуылэм кадь потӥ.

Лондонэн тодматскыны кылдӥз финалын бызьылэме бере гинэ. Отчыозь, стадионэз сяна, номыре ӧм адӟылэ, улӥмы стадион вӧзын ик. Вань тодмоосылы, ӵыжы-выжыосылы пичильтык саламъёс басьтӥ. Кузпалылы тэркы вайи. Трос аръёс ӵоже люкаськомы ни пӧртэм городъёслэн, странаослэн пусэнызы арбериосты. Котькуд спортсменлэн куинь турлы костюмез вал ке, отысен милемлы эшшо спорт дӥсьёс сётӥзы на. Палэнысь эшъёсылы Удмуртиын лэсьтэм пулэсь синпельёс кузьмай.

Таксистъёс но тодмазы

Бадӟым ужрадэ монэ туж шуныт келязы но, пумитазы но. Нош Олимпиадае вуылэме бере тросэз тодманы кутскиз. Поездын бертыкум, воксё фотосессия ортчытӥ, шуыны луоз. Эсьмаса, таксистъёс гинэ но тодмазы – дунтэк нуизы. Мылкыды дурыныз лӧптӥз, шумпотэменым сумкаысьтым троссэ кузьымме сюрес вылысен ик люкылӥ.

Тау кареме потэ Удмуртиын улӥсьёслы, тужгес но Каракулино, Дэбес ёросъёсысь кивалтӥсьёслы. Кыказ ик черкогуртын ёрос администрациын но культурая юртын юри бадӟым телевизор пуктылӥллям. Монэ тодӥсьтэм адямиос но отчы люкаськиллям. Дырзэс жалятэк, ӵошатсконэз дэмен учкиллям. Ваньзылы тау карисько. Сыӵе-сыӵе данъямзы бере возьыт каллен бызьылыны!

Олимпиада бере мынам эшшо но эшшо бадӟым ужрадъёсы ветлэме потэ. Кутскон сётэмын. Арлыды тупа. Олимпиада йылпумъяськем бере куаш-куаш шутэтскы вал – дыр ӧвӧл. Лондонысь бертыкум ик, Москваын ӵошатсконэ пыриськи. Озьы Удмуртиын кык арня пала гинэ шутэтскыны кылдӥз. Выльысь сборъёс, стартъёс… Та вакытэ дуннелэн чемпионатэзлы дасяськиськомы, со вуоно арын Москваын ортчыны кулэ.

Дорам – куное гинэ

Спортэн эшъяськыны кутскеме бере дорам куное гинэ вуылӥсько, шуыны луоз. Кузь командировкаосы потаса, котькыӵе киужлы дыши. Азьвыл аръёсы керттӥськон сьӧрам нуллӥ. Носки-пӧзь сяна, кофтаос, нылылы дэремъёс керттылӥ. Сборъёсы кӧня ке потаме бере валатски, малы мынам сумкае котькинлэсь бадӟым луэ вал. Эшъёсы пужъятӥськизы. Россилэн сборнойысьтыз массаж лэсьтӥсь кышномурт пужъятӥськыны дышетӥз. Туэ ар понна кык картина быдэстӥ. Азьланяз бисерез ужам кутыны малпасько. Озьы Россиысь нылъёсын нуназезэ стадионын вожвылъяськиськомы, нош ӝытазезэ киужъёсмес ог-огмылы возьматӥськомы.

Сборъёсы ӵем потаменым, нылылэсь будэмзэ шӧдытэк ик кыли. Бертэмелы быдэ зол-зол ӟыгырске но кематэк уг лэзиськы. Кошконме шӧдыса, нукыртыны кутске: малы часталы гинэ вуылӥськод? Котькуд кошкыкум сюлэм чигиське. Кузпалы монэ вала, дэмланъёсын юртэ. Куд-ог дыръя нылмес но сьӧрамы нуллӥськомы. Тани Олимпиада дыръя соосы мынам Туркмениын вал.

Бадӟым стартъёсы ӵемгес потано, кужым сяна, опыт люкано. Ваньмыз радъяськоз, тазалык гинэ медаз чуты.

* * *

Николай Хохряков, Леналэн нырысетӥ тренерез:

- Лена кадь егитъёс шер пумиськыло. Азяз пуктэм ужзэ со котьку быдэстоз. Зорыку но, лымыяку но тренировкаосы пота. Сыӵе юн сямо нылъёс-пиос гинэ спортын бадӟым вормонъёс басьто. Туж шумпотӥ Леналэн Олимпиадае шедемезлы. Мон понна но, быдэс Дэбес, Удмуртия понна со бадӟым шумпотон но данъяськон.

Валерий Сунцов, Удмуртиысь капчи атлетикая федерациен кивалтӥсь:

- Тол Олимпиадае Удмуртиысь спортсменъёс ӵем шедё ке, капчи атлетикая ӵошатсконэ шер вуыло. Туннэ нуналлы куинь мурт отчы пыриськемын: Марина Азябина (пыкъетъёс вамен бызьылон), Оксана Удмуртова (кузьдалае тэтчан) но Елена Наговицына. Ваньзы вылӥ лыдпусъёс возьматӥзы. Леналэн бызьылон мылкыдызлы тренерез но паймемзэ вералляз. Ас поннам шуисько: егитъёслэн 25 аресозь спортэн эшъяськыны мылкыдзы вань ке, солэсь одно ик ӟеч спортсмен пӧрмоз. Жаляса верано, туала вакытэ егитъёслэн кужымзы дурыныз пачыла, но тросэз сое шонер сюресэтӥ ӧръяны уг быгато.

Источник:

Наговицына Е. Кыдато кузь иськемъёс / Е. Наговицына ; записала В. Емельянова // Удмурт дунне. - 2012. - 2 нояб. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"