Михайлова Александра Григорьевна

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Ӝож кырӟасько, шулдыр серекъясько

Mihajlova.jpg

Можга ёросысь Бадӟым Сибы гуртысь Александра Михайлова 30 ӵоже ини культура удысын тырше. Татысь «Марӟан» калык ансамблен кивалтэ. Солы сюлмызъя калык гуръёс. Паймоно кадь: кышномурт яратэ ӝож, мӧзмыт кырӟанъёсты, нош калыкез бӧрдымоназ серекъятэ «Ё-моё» театреныз.

Александра Михайловналэн ужамез пусъемын Удмурт Республикаысь Правительстволэн «Признание» премиеныз но уно данъян грамотаосын.

- Александра Григорьевна, пичи дыръяды тӥ шаян вал, дыр.

- Бен, туж шаплы вал. Можга ёросысь Вуж Юбера гуртысь урамамы нылъёс чик ӧй вал, чисто пиос гинэ, соосын ик мон эшъяськи. Кыӵе ке классысен урамамы улыны васькиз одӥг семья, соослэн Лена нылзы вал, со мынам матысь эше луиз ини. Отчыозь пыр пиосын шудӥ, одӥг тубамтэ писпу но ӧй вал, одӥг дӥськут но кесятэк ӧз кыльы.

Семьяямы ми вить нылпиос: ньыль нылъёс но одӥг агаймы. Анае, Валентина Гавриловна, 40 ар школаын покчи классъёсты дышетӥз. Атае, Григорий Александрович, колхозын механизаторын ужаз. Мыным самой трос кыл сюрылӥз, шаплыеным ик тышкасько вал. Монэ покчи сузэрме учкыны косо, нош пичи муртлэн шудэм потэ ук. Нырысь агаеным керетыса улӥм, собере пичи сузэрелы мынэсьтым йӧтылӥз. Весь сьӧрам улляськемезлэсь акыльтӥсько вал. Анай шуылӥз: тон ачид пиос борды жугиськыны кутскиськод ук. О-о, сыӵе маке вал мон. Кыӵе учыръёс но ӧз луылэ. Парсь вылэ но усьылӥ. Азьло пудо-животэз кырын возьылӥзы. Пичи сузэръёсы кенер вылын сыло, мон соослэсь пегӟемын палэзьпу йылэ. Киям карандаш кадь кузь сюпсён кампет вал. Мон сузэръёсме гочатӥсько. Но сисьмем вай вылэ пуксьыны шедьтыса, пырак парсь вылэ лобӟи. Нурскетӥсь кышкаса тэтчиз ук, мон кыед пушкы уси. Одӥг чылкыт интые но ӧз кыльы ни, кампет но нокинлы ӧз донгиськы. Вот озьы вырид ке, шу.

- Кин выжые мынӥллямды?

- Ӧйтӧд, кин выжые, анай но, атай но шаплыесь ӧвӧл кадь. Выжы шуэмысь, тодам лыктӥз, кемалась ик ӧвӧл городысен мӧйы адямиосты пумитай. Мон соосты уг тодмаськы, соос мон сярысь шуо: о-о, таиз, пе, копак Гави агай. Мон вазисько: татчыозь улӥ, ӧй тодылы, кинлы кельшисько. Гуртамы верало вал, ӵужатае тус шуыса. Анаелэн атаез, Васильев Гаврил Васильевич, туж чырткем вылэм. Со сельсовет пред луыса ужамын, войнаын политрук вылэм, Быдӟым оже чиптэм-чаптэм бырем. Тӥни со кадь, пе, мон.

- Кин луэмды потэ вал?

- Анае шоры учкыса, дышетӥсь луэме потылӥз ик. Мама монэ но дышетӥз, тыш но йӧтылӥз, вожпотэмзэ мон вылэ куштэ вал. Сузэреным школаен шудӥськом ке, мон одно ик дышетӥсь вал. Но педучилищее ӧй мыны. Вакытэз сыӵе тупаз-а, мар-а, милям нылъёс 10-тӥ класс бере чисто Иже кошко но заводын ужаны кутско вал. Мон малы ке сыӵе вожъяськи соослы, тожо городэ лыктӥ, «Буммаш» заводэ интыяськи. Ар но ӝыны станок сьӧрын сылӥ, мылкыды буйгаз. Табере сюлмы гуртэ куриськыны кутскиз. Бертӥ гинэ, бригадирмы шуэ: клубын ужасьмы ӧвӧл. Азьло ведь культура юртэ мынӥсь туж ик ӧй вал, соос шоры сыӵегес учкылӥзы: трали-вали порма. Ӝытъёсы клубез усьяны кутски. Надя апае, культпросветучилищеез быдтыса, Алнашысь РДК-ын ужа вал. Калык хорен кивалтӥз. Мон, 8-тӥ-9-тӥ классъёсын дышетскыкум, дораз ӵем ветлылӥ. Туж синмаськыса учкылӥ, кызьы соос агитбригадаен бусыостӥ кырњаса ветло вал. Соосын ӵош быдэс Алнаш районэз ортчи, дыр. Мае кырӟало-верало, ваньзэ наизусть тодӥсько ни вал. Малпай, табере ми но озьы ветлом. 1983-тӥ арын клубын ужаны кутски, соку ик монэ комсомол организацилэн секретарез каризы. Ар ортчыса, дышетскыны пыри Ижысь культпросветучилищее, режиссёръёсты дасясь люкетаз.

Азьло гуртысь клубын тунсыко вал, али калыкез люканы уг луы. Вуж Юбера Алнаш районэн артэ ик ук. Дорамы шудыны ветло вал Сям-Каксиысь, Кузьыли гуртысь егитъёс. Арганэн ӵукнаозь шудылӥзы. Школа бере клубе потаны кутски ке, ымме усьтыса, учкисько вал Алнаш нылъёс шоры: лыкто кашамер кышетъёсын, гармошкаосын шудо, ӵукнаозь шулдыръясько. Юисьёс но, жугиськисьёс но ӧй вал.

Вуж Юбераын клубмы кезьыт – вуж школаез сётӥзы. Ми одӥг классэз эстылӥм но отын шулдыръяськылӥм. Пиналъёс но со кезьыт клубе мыло-кыдо ветлӥзы. Табере егитъёс клуб азьтӥ гинэ на кошко, Можгае шутэтскон центръёсы мыно.

- Кызьы Бадӟым Сибы гуртэ вуиды?

- Вуж Юбера клубын кык кузя ужасьёс луимы, нош Сибыын культура юртын адямизы вылымтэ. Монэ отчы ӧтизы. 1986-тӥ арын лыктӥ. Соку вуж клуб вал. Арня ӵоже сузям ай сое техничкаен. 1988-тӥ арын лэсьтыны кутскизы выль клуб. Сое ӝутӥзы Можга ПМК-ысь строительёс. Нош пушсэ лэсьтӥськом вал ми, егитъёс. Арнялы быдэ пиналъёсын субботникъёс радъяллямы. Уйбыт фойеысь выжъёсыз волятӥськом вал. Чик дунтэк, колхозын ужамзы бере егитъёс клубе васько но юрттӥсько вал. Табере нокин но дунтэк уз ужа ини. 1989-тӥ арын май толэзе культура юртмы усьтӥськиз.

Азьвыл татын туж бадӟым хор вал, кырӟаны отчы ветлӥзы 60 кузя. Сое кылдытэм кырӟаны-вераны усто кышномурт Елена Павлова. Кузпалыз Геннадий Иванович баянистмы вал. Смотръёсы куинь грузовой машинаен ветлылћллям. Быдэс гурт кырӟаз-вераз. Азьло уго колхоз кивалтӥсьёс асьсэос но кырӟасесь вал – предмы, парторгмы, сельсоветэн кивалтӥсьмы но хоре ветлӥзы, культура понна сюлмаськизы. Туала вакытэ улонъёс мукетэсь ини. Клубын ужаммес верано ке, туннэ нуналлы татын ньыль кузя специалистъёс тыршиськом. Мон культура юртын чеберлыкъя руководитель.

- …но «Марӟан» ансамблен кивалтӥсь.

- «Марӟанэз» кылдытӥз мукет мурт. Кырӟась арлыдоосты нырысьсэ люказ библиотекарьмы Лидия Шишкина, ачиз со хормейстере дышетскемын. Со вал Игнатий Гаврилов драматурглэн юбилеез азьын. Мон но кырӟаны ветлӥ, со дырысен весь пӧлазы. Л. Шишкина бере ансамблез валтӥз Елена Павлова. 1993-тӥ арын дорамы ужаны лыктӥз арганчи Василий Ионов. Елена Васильевна кошкем бере ужаны лыктӥз культпросветучилищеез йылпумъям Ольга Головёнкина. Со туж трос лэсьтӥз, репертуар бордын зол ужаз. Ольга Анатольевна дыръя ик коллективлы калык ним сётӥзы. Но культураын уждун ичи тыро шуыса, егит специалистмы Можгае кошкиз. Собере нош ик культпросвет бере дорамы лыктӥз хормейстер Альбина Абрамова. Куинь ар ужаса, тожо кошкиз. Вот озьы, огез кык-куинь ар ужа но кошке, выль специалист вуытозь, мон «Марӟанэн» кивалтӥсько. Постановкаосты дасясько, репертуарзэ бырйисько. Туннэ нуналлы «Марӟанын» 12 мурт кырӟа-вера, али ансамбле ветлӥсьёслэн арлыдзы егитгес. Мон шуисько, азьлоосыз усточиос сямен ик, тӥ но 75 аресозь кырӟалоды.

- Маин паймытъяськоды но кытчы вуылӥськоды?

- «Марӟанлэн» программаез узыр. Ми тросгес саклык висъяськом калык йылолъёсты возьматонлы. Кылсярысь, улӟытӥм «Дэра гужатон», «Выль кен пылатон», «Кубо сюан», «Рекрут», «Йыр сюдон» но мукет обрядъёсты. Вашкала кырӟанъёсты тодамы вайиськом. Ансамбльмес ёросын гинэ уг, солэн палэназ но тодо. Ми пумитамы, шулдыртӥмы ини Франциысь, Швейцариысь, Англиысь, Эстониысь, Финляндиысь но Венгриысь куноосты. Трос пол пыриськылӥм «Воршуд» фин-угор, «Трокай» фестивальёсы. Берлоез бадӟым вормонмы вал кылем ар пумын. Киров улосысь Вятские Поляныын ортчиз калык культураосъя «Радужное многоцветие России» калыккуспо фестиваль. Куинь нунал ӵоже туж трос ансамбльёс тодматӥзы сям-йылолъёсын, кырӟан-веранъёсын. Ми возьматӥмы «Кен пылатон» йылоллэсь оглюкетсэ. Отысь бертӥмы 2-тӥ степенё лауреат луыса. Али дасяськиськом Брангурт фестивальлы.

- Туэ тӥледыз пусйизы «Сӥлы карон» («Признание») премиен.

- Данэз мыным луиз, о-о, но со быдэс ансамбльмылэн тыршемез. Мон малпасько, со награда огшоры гинэ сётэмын ӧвӧл. Малы ке шуоно сомында ведь лэсьтэмын. Тау карыны кулэ Можга ёросысь культурая отделлы, милемыз та премилы ӵектӥз шуыса. Шумпотӥм, озьыен, ужаммес адӟизы но дунъязы. Мар кари премиен? Куиньлы люки: клубен кивалтӥсьмылы, баянистмылы но аслым. Мон соостэк номыр ӧй пӧрмытысал ук. Кылсярысь, кызьы-о баянисттэк кырӟалод? Нокызьы но. Соин ик, нокинлэн кӧтыз ӝож медаз луы шуыса, премимес люкимы. Нош вань кырӟасьёслы пичияк кузьым басьтӥмы но саунае нуллӥмы, шулдыр шутэтскимы.

- Тӥляд ведь эшшо «Ё-моё» театрды вань, тулыс А. Ушаковлы сӥзем «Маскара» фестивальын вормисе потӥды.

- Вань. Шонерзэ верано ке, мыным театр котьку но матынгес вал. Кемаласьгес ини ёросамы юморлы сӥзем «Ё-моё» праздник ортчиз. Ми отчы сценкаен мынӥмы. Вань коллективъёслэн нимъёссы вань, милям ӧвӧл. Сцена вылэ потон азьын ини асьмеды «Ё-моё» шуим. Театрамы кыкнамы маскаръяськиськом: мон но клубын ужась ик Тамара Ионова, куд-ог дыръя юрттӥсько мукет эшъёсмы. Тамара Серафимовна кӧшкемыт комичной кышномурт. Сцена вылэ ӵошен потӥськом ке, калыкез, кӧтсы шуг луымон, серекъятӥськом ини, куддыръя асьмелэн но горемысь дугдэммы уг луы. Сое кылын уд вера, адӟыны кулэ. Тамара резинка кадь куасалляськись мугоро, кызьы но уг кариськы, нош ымнырыз секунд куспын кыӵе но уг луы! Огполаз «Гипноз» сценка возьматӥськом. Мон солэсь картсэ шудӥсько, Тамара мынам йырам погыльтонэн шукке но, мон усисько. Табере со котыртӥм берга, кышка. Обезян кадь тэтчамзэ адӟыса, серемме кутэме уг луы. Учкисьёс палась ымнырме берыктӥ, мон ведь, быдто ке, кулыса усемын. Огшап улыса, Тамара горыны кутскиз. Бӧрысь вераз ини. Синъёсыд, пе, кынемын, нош кӧтыд лэйка, лушкем серекъяны вырыса. Сценкалэн со интыяз Тамара бӧрдыны кулэ, солэн ке пырсйылэмзэ кутэмез уг луы. Бӧрдэм-серекъям амал ик йыбыртъяз ини. Тӥни сыӵе макеос ми. Сценкаосмы ваньмыз улонысь басьтэмын. Ми, нимысьтыз концерт дасяса, ёростӥ но бускель Алнаш районтӥ ортчимы, калык туж умой пумитаз. Озьы ветлыкумы, ансамбльысь кышноос кулиса сьӧрын горо ук, котькудаз, пе, концертын сценкады мукет луэ. Импровизация. Сомында ар сцена вылын ужаса, кыл ке ӧд шедьты, мар луоз со?

- Берло дыре культура юртъёсты асьсэдыз барыш поттыны косо. Тӥляд кыӵе ужъёсты та ласянь?

- Туннэ нуналлы ми коньдонтэк ум улӥське. Туризм шуонэн пайда поттӥськом. Кытчы-о пырод, ӟеч улэмед потэ ке, берганы быгатоно. Дискотекаос ӧвӧл, соин ик куноосты пумитаськом, экскурсиос ортчытӥськом. Милям дун-чылкыт источникмы вань клуб азьын, нюкын. Сое ас дыраз усьтӥз, сузяз тодмо дышетӥсь Вера Толстая. Собере со сярысь вунэтӥзы, аналтӥзы. В. Толстаялэсь ошмессэ улӟытоно кариськиз клубен кивалтӥсьмы Елена Сергеева. Вот со милям молодец кышномурт, ас интыяз, ужзэ ӟеч тодэ. Елена Серафимовна программа лэсьтӥз, республикаын сое умоен лыдъязы. Табере куинетӥ арзэ ини ошмес дорамы калык ветлэмысь уг дугдылы. Шонерзэ вераса, кӧттырымон луиз ини та маршрутмы. Туристъёс пумтэм ветло. Июнь толэзе гинэ ог 500 адями вуылӥз. Таяз шутэтскон нуналъёсы 130 кузя лыктозы. Августлы трос гожтӥськемын ини. Толалтэ но калыкмы уг бырылы. Нылпиос но, бадӟымъёс но валэн ворттыло. Ошмес дорамы гур сылэ. Ми куноосмес пӧсь табанен утялтӥськом, ӝук пӧзьтӥськом, перепечен сюдӥськом, шудӥськом-кырӟаськом. Городысь нылпиос кыӵе шумпотыса вуо гуртэ, валэн ворттылон понна ик лыкто кадь. Ай ми соослы татын возьматӥськом атас кампет лэсьтонъя мастер-класс, табань пыжыны дышетӥськом, о-о, кыӵе шумпото «петушкиослы».

Одӥг ласянь, куноос вуо шуыса, умой, нош мукет ласянь, милемлы, клубникъёслы, маза ӧвӧл ук. Ӵукна 8 часын ми татын ини, куноосты гурын пыжем табанен пумитаськом. Асьмеос ик пӧрасьёс, асьмеос ик артистъёс. Тӥни озьы туризм шуон сяськая. Азьланяз клубен кивалтћсьмы татчы мунчо пуктыны малпаське ай. Шутэтскыны лыктӥсьёслэн веникен но пыремзы, пе, потэ. Мон серекъясько, татчы мунчо лэсьтӥзы ке, доре чик ум ни берталэ, татын ик мисьтӥськом но, дыр. Шуисько ук, Елена Серафимовнамы милям сыӵе маке. Мыным огпол «уг» шуизы ке, берытскыса кошко, нош кивалтӥсьмы коньдон портыны быгатэ. Соин ик котькудӥз ас интыяз тыршыны кулэ. Ми шулдыртӥськом, куно кариськом, со радъя, бызьылэ, утчаське.

- Семьяды сярысь но тодэм потэ. Весь пиосын эшъяськиськоды ке вал, картлы тупамонзэ но учкылӥды, дыр?

- Ма, юнме уг верало, дыр, пиосын одӥг кыл шедьтыны капчигес шуыса. Ныл эшъёсы одӥг-ог вал. Соос бызизы но, мыным мӧзмыт луиз. Мон чакласьки, вуоно картэ вина медаз ю, тамак медаз кыскы шуыса. Визьмын ужай, мыным 25 арес вал ини ук. Азьло, тыныд 25 арес, нош быземын ӧвӧл ке, пересь шуыса верамзы потэ вал. Тӥни озьы мон ачим вуоно картме бырйи. Николае туж востэм. Гуртын кин-о чебер кылъёс вера, со но уӵы кадь ӧз чирды, но шӧдӥсько вал, кельшисько шуыса. Кузпалэным ноку керетэме ӧвӧл. Ноку но ӧз шуылы, малы клубын ужаськод: ведь ӝыт потанъёс вань. Солэн анаез но ӧз куаретылы. Николаен 25 ар улӥм ини, туж валче, кенешыса, мынам соин куашетэме уг но поты. Вожан сяммы огмылэн но ӧвӧл. Малы ке шуоно ачим сыӵе, черекъясьёсты уг яратӥськы, нош вань ведь дуринчи кадь адямиос, копаськон-ӵашетон гинэ медло. Соин ик кузпалэным ми туж умой улӥськом. Кык пи будэтӥмы, алигес бадӟымезлэн, Мишалэн, сюаназ Москвае вуылӥ. Игорь но, Москвае ветлыса, ужа. Мишамы мон кадь ик шулдыр мылкыдо, гармошкаен но, баянэн но, гитараен но шудэ.

Шуисько ук, бызьытэк кылисько кожаса, ваньзэ чаляк лэсьтӥ. Собере пиятэк кылисько кожаса, лэся, бӧрсьысь бӧрсе кыксэ поттӥ. Собере ныл курись вылымтэ ни, лэся, али со милемлы туж эш луысал ни.

Мон ачим горд бере, весь синмаськисько вал сьӧд йырсиё адямиослы. Тодыса кадь, кен ӵапак сыӵе сюриз. Пие горд, кузпалыз сьӧд йырсиё, грузин-ӟуч виро. Куспазы тупаса гинэ, мед улозы.

- Кырӟаса-вераса, маскаръяськыса но жадёно, дыр, ук. Кызьы шутэтскиськоды?

- Дорын маке ужакум, ас поннам весь кырӟасько, удмурт калык гуръёсты нёръясько. Монэ пинал дыръям ик вань сюанъёсы ӧтчало вал, али сямен вераса, тамада интые. Арлыд будэмъя юбилейёсы, сюанъёсы туж ветлэм уг пот ни. Тодӥсько ук, одно ик косозы шулдыртыны. Нош мынам кӧты тыремын ини соин. А соос кутско: давай, Григорьевна, кырӟа, ужед со тынад. Бон, кырӟалэ, шуисько, тӥ кутске, ми азьланьтом. Куд-ог дыръя ымез но усьям уг поты. Но калык дышемын ини: клубын ужа бере, адямиосты шулдыртыны положено.

Кызьы шутэтскисько? Газетъёслэсь кудыос, вазаос лэсьтӥсько. Малы ваньбурез арам карод? Нырысь лыдӟисько, собере кыӵе ке киуж пӧрмытӥсько солэсь. Керттӥськисько. Берло дыре телевизор адӟыны кельше ни ай. Али Казаньын универсиада ортчиз, номырзэ кельтытэк, учки ук. Спортъя передачаос кельшо, сериалъёсты уг яратӥськы, одно ик учкисько иворъёсты.

Одӥг ласянь, туж шутэтскем потэ. Отпуске потӥськод но малпаськод: кыӵе гань-гань улон ук та. Туннэ ик пенсие потысал кадь. Мукет ласянь, ачид но уд валаськы, нош йырын берга ини: тани выль сезон усьтӥськоз, сое кароно, тае лэсьтоно, пересьёслэн праздниксы матэктоз…. Репертуарез но выльдоно, фестивале дасяськоно. Ачим телевизор учкисько, нош ымы кырӟа, пыдъёсы эктон вамышъёсты дышето. Син азям ик пуктӥсько ини «Марӟанлэсь» сцена вылэ потонзэ. Уго выль программа бордын умой-умой малпаськоно учкисьёслы тунсыко луон понна. Крезьгуръя грамотае уггес тырмы. Мон ведь культпросветучилище бере Пермьысь искусствоосъя но культурая институтэ вамыштӥ вал. Нырысетӥ экзаменме «4»-лы сётӥ, эшъёсы – «2»-лы. Соос кошкизы, мон огнам кыли. Сыӵе мӧзмыт но шимес потӥз Пермьын. Документъёсме кутӥ но доре бертӥ. Тӥни сыӵе маке мон. Али малпасько но, институтын дышетскеме ужаны туж юрттысал ведь.

- Мае возьмаськоды яке марлы гочаськоды?

- Песяй луэме потэ ини.

Источник:

Михайлова А. Г. Ӝож кырӟасько, шулдыр серекъясько / А. Г. Михайлова ; записал Г. Семенова // Удмурт дунне. - 2013. - 2 августа. - С. 6,11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"