Митрофанов Валерий Яковлевич

Материал из Воршуда
Перейти к навигацииПерейти к поиску

Кияз крезез, сюлмаз кырӟанэз[править]

Митрофанов В. Я.

Нимтулыз: Митрофанов Валерий Яковлевич.

Вордскемын: 31-тӥ мартэ 1946-тӥ арын.

Ужан интыез: Удмурт кун филармониысь чеберлыкъя кивалтӥсь.

Яратоно праздникъёсыз: Выль ар, 8-тӥ Март.

Яратоно сиёнэз: пельнянь.

Яратоно передачаосыз: “Иворъёс”, “Мылысь-кыдысь”, “Ялыке”.

Ваньмон дыръяз яратэ: спортэн вырыны (марафон).

Кыӵе сямо адямиос кельшо: усьтэм сюлэмо, малпанзэс меӵак вераны дӥсьтӥсь.

Вордски мон Шаркан ёросысь Быги починка гуртын. Быги гуртэз тросэз тодо, починкаез тодӥсез ӧжытгес. Со туж чебер интые пуксемын. Тодӥсько на: пичи дыръям отысь урамъёсын вож-вож ожо будэ вал. Вал уробоен гинэ но со вылтӥ ворттылыны ӧз лэзьылэ. Сик кыдёкын ик ӧвӧл, губиез, эмезез - ведраен омыръямон. Милесьтым выжыосмес Митро Микоос шуылӥзы (тазьы нимало вылэм ӵужтятямес). Бакча мышкамы ик Митро Мико шуон ошмес но бызе вал. Отын туж ческыт, туж чылкыт вуэз бызиз. Эсьмаса, мисьтаськон тусез но зӧк-зӧк корлэсь туж быгатыса лэсьтэмын вал.

Быги починкаын Митрофановъёс трос. Малпасько, ми выжыос ик ас дыраз утялтӥзы-сузязы та ошмесэз. Соин ик Шаркан палъёсы вуылӥсько ке, одно та гуртэ кожаны, отысь ошмес дуре васькыса, юзмыт вузэ шӧмъяны тыршисько.

Та гуртын мон ньыль аресозь улэмын. Собере семьямы Сосновкае кошкиз. Татысен ик мон нырысетӥ классэ дышетскыны мынӥ. Зэмзэ вераса, пичи дыръям улон интыме ӵем вошъяно луи. Кыкетӥ-куинетӥ классъёсысен Як.-Бодья ёросысь школаосын ортчытӥ. Та бӧрсьы ог арлы гинэ Сосновкае берытскылӥ на. Витетӥ-дасэтӥ классъёсты йылпумъяй ни Можгалан. Отын улэ вал анаелэн сузэрез Рита апае. Со Можгалась крезьгуръя школаен кивалтӥз. Ас дораз ик интыяз монэ но. Озьы, огшоры школаен ӵош йылпумъяй крезьгуръя школаез.

- Иське, крезьгур борды пичиысен ик кыстӥськиды?

- Та сюресэз мыным анае бырйиз, шуыны луоз. Со ачиз но крезьгуръя училищеез йылпумъямын вал. Но война кутскемен, мытэм удыссэ уретоно луиз. Ожлэн нырысетӥ нуналъёсаз ик сое фронтэ басьтӥзы, артиллерийской полкын разведчик вал. Война бере крезьгур борды малы ке ӧз кыстӥськы ни. Сосновкаысь ик нылпи юртэ ужаны интыяськиз. Соин ик, аслыз зэмос крезьгурчи луыны ӧз кылды бере, мытэм удыссэ мон ке но мед азинтом потӥз, вылды. Озьы, Можгалась крезьгуръя школаез йылпумъяме бере, анае но Рита апае монэ крезьгуръя училищее интыязы.

- Ӧд пумитъяське-а таӵе сюрес быръемзылы?

- Пумитъяськыны ӧй пумитъяськы. Но ачим тракторист луон сярысь малпалляй. Уката со вакытэ туж тузӥ лыдъяськиз паськыт профилен механизатор луон. Гужемзэ ми, пичиос, нунал лумбытэн мӧйыос сьӧры ветлӥськом вал. Пудо сиён дасяны, ю-нянь калтыны юрттылӥм. Самой соку ну бергасько ни вал тракторъёс котыртӥ! Кытӥ-отӥ руль сьӧры но пуксьылыны кемдылӥз - таӵе дыръя лӧптылӥ ук.

- Озьы ке но, улондэс тӥ крезьгурен герӟады.

- Училищеын дышетскон вискын монэ армие басьтӥзы. Озьы куинь арзэ Жигулевск дорысь зенитно-ракетной войскоын ортчытӥ на. Армия бере ини пыр-почгес басьтӥськи крезьгурчилы дышетскон борды. Училищеез йылпумъяме бере, Культурая министерство монэ Казаньысь консерваторие ыстӥз.

-Татысен ини зэмос крезьгурчилэн улонэз кутскиз.

- Училищеын дышетскыкум ик Ижысь куиняз нылпи садъёсын крезьгуръя часъёс нуи. Озьы пичияк ке но коньдон луылӥз, садикын ик сюдылӥзы но. Студент понна со туж умой вал. Казаньысь консерваторие пырем берам но малпасько вал, кызьы меда дышетском шуыса, Культурая министерство нокыӵе стипендия ӧз ысъялля. Озьы татын но уже интыяськоно луиз. Нырысь ик школаысь нылпи хорен кивалтӥ, собере Казаньысь телефон станциын ужась нылъёслэсь ансамбль кылдытӥм. Озьы дышетскон аръёсы ортчизы. Консерваториез йылпумъяме бере, выльысь Ижевске берытски. Культурая министерство монэ “Италмасэ” хормейстере ыстӥз. Со вакытэ “Италмас” туж трос гастрольёсы потаз вал. Ансамбльын вить ар ужатозям, кӧня городъёсы вуылӥм! Тани синъёсме кынисько но озьы ик адӟисько Москва, Калуга, Рязань, Ярославль... Калининградысен Владивостокозь вуылымтэ городъёсмы ик ӧй вал кадь. Али но ӟеч тодӥсько, Владивостокысен кутскыса, кык толэзь ӵоже Сибирь пыр ортчеммес.

Озьы “Италмасын” Анатолий Мамонтовен ӵош ужан аръёс мон понна бадӟым школа луизы. Но крезьгурчилэн ужез сыӵе: со быдэс улонзэ тодон-валан люкано луэ. Тани али но мон дышетскисько: табере ини “Ингурысь” пиосылэсь.

- Валерий Яковлевич, калленэн “Ингур” капеллаысь пиос борды выжиськом кадь.

- Пиосын 1993-тӥ арысен ужаны кутски. Татчыозь та капеллаен Анатолий Михайлович Щербаков кивалтӥз. Но ас мугъёсызъя со интызэ кельтӥз. Со вакытэ мон филармониын чеберлыкъя кивалтӥсь луыса ужасько ни вал. Озьы капеллаез утён мон вылэгес усиз. Соку пиосты оскытӥ: хормейстер шедьтом. Нуналзэ но пусйи. Но дыр вуиз - верам кылы уг быдэсмы. Мар кароно? Трамвае пукси, школа-интернатэ вуи но шуисько: “Ӟечбуресь, мон тӥляд выль хормейстерды”. Басьтӥськи та удыс борды арлы гинэ шуыса. Ас кужымелы но ӧй оскы, вылды: угось “Италмасын” ужаме бӧрсьы дас куинь ар ортчемын ни вал. Та вискын культурая министрлэн воштӥсез луыса но, обкомын ужаса но вуттӥ. Но ар туж ӝог ортчиз. Ӵапак та вакытэ ик милемыз концертэн Москвае ӧтизы. Эшшо ке Чайковскийлэн залаз! Кызьы таӵе дыръя коллективез куштод? Мынӥм Москвае. Но самой та нунал ик мынэсьтым вань малпанъёсме воштӥз. Концерт дыръя ачим но пайми: кыӵе быгатӥсесь вылӥллям мынам пиосы! Макем зол чабизы соку москвичъёс удмурт капеллалы. Москва бӧрсьы мынэсьтым но, пиослэсь но шудоез ӧй вал кадь : ӝужыт гурезьлэн йылаз тубем кадь потӥз.

- Озьыен, тӥляд та кизили нуналды луиз?

- Озьы шуом ини. Та бӧрсьы капеллаысь кошкон мылкыды сайяськиз. Пӧрме бере - ужало, малпай. Кӧня ке ортчыса, милемды Эстоние ӧтизы. Отын вить арлы огпол кырӟанлы но эктонлы сӥзем нуналъёс ортчыло. Татын но милемыз туж шуныт пумитазы. Та бӧрсьы мылкыдмы эшшо бурдъяськиз. Малпаськыны кутским, оло, кыӵе ке конкурсъёсы но пыриськоно шуыса. Озьы 1998-тӥ арын Венгрие куриськон гожтӥм. Ӧтизы. Мынӥм. Татын но вань калыкез паймытӥм - конкурсысь зарни дипломен берытским.

1999-тӥ арын вуылӥм Финляндие. Татын со аре дуннеысь самой бадӟым конкурс радъямын вал. Ужрадэ дас куинь странаысь куатьтон куать хор пыриськиз. Со пӧлын вал США-ысь, Япониысь, Китайысь кырӟасьёс. Малпай: таяз учыре вормисьёс пӧлы нокызьы ум шеде ни. Янгышаськем, нош ик устоосыз пӧлын луим. Та бӧрсьы милемлы вераны кутскизы, ма, пе, кунгож сьӧртӥ гинэ ворттылӥськоды, сокем устоесь ке, Россиысь коллективъёсын нюръяськыса эскере.

- Шат Россиын ортчись ӵошатсконъёын шуггес вормыны?

- Юнме уг верало, дыр, самой устоосыз хоръёс Россиын шуыса. Собере, оло вералод, оло уд, но татын жюриын пукисьёс тодмооссы, ас выжы калыкъёссы шорыгес учкыны туртто. Тани кылем арын Калугае ветлӥм. Отчы кык арлы одӥг пол пиослэн хоръёссы люкаськыло. Отын но коллективъёслэн кивалтӥсьёссы жюри котырын бергало ни: О, Лев Константинович, Лев Констинтинович!

Мон озьы уг быгатӥськы, ваньмыз ас интыяз мед луоз кадь потэ. Соин ик жюрилэн син шораз адскылытэк турттӥсько. Тазьы “пегаса” ветлэмме шӧдыса ик, луоз, Москваысь тодмо профессор соку шуиз мыным: “Малпаськод, тӥледлы соку ик нырысетӥ степенё диплом сётозы? Адӟиськод-а, кызьы адямиос жюри котыртӥ бергало. Нош тон ас поннад ветлӥськод, нокинлы уд йыбыртъяськы, уд кырмышъяськы. Шонерзэ вераса, тӥ мыным ваньмызлэсь зол кельшиды, но шӧдӥсько: вормисе уд потэ”. Зэмзэ но, соку милемлы кыкетӥ степенё диплом гинэ сётӥзы. Та конкурсын ми выль коллектив вал, репертуармы но мукетъёсызлэсь висъяськиз. Оло, соин но жюри соку ик вылӥе ӝутыны ӧз дӥсьты.

- Маин бен репертуарды висъяськиз?

- Мукет коллективъёс ӟуч кылын программа дасяллям. Ми вить кылын кырӟамы: удмурт, венгер, финн, эстон но ӟуч.

- Валерий Яковлевич, нош кызьы, кытысь тӥ мукет кылъёсын кырӟанъёс бырйиськоды?

- Туннэ ми дас кык кылын кырӟаськом ни. Азьланяз репертуармес эшшо паськытатыны чакласьком. Туж ӟеч луысал, вань финн-угор выжы калыкъёслэсь кырӟанъёссэс дышетыны быгатысалме ке.

- “Ингурысь” пиос тӥляд улонады самой бадӟымез данды шуыны луэ-а?

- Капеллалэн вормонъёсыз - со мынам гинэ ӧвӧл, со пиослэн но данзы. Адӟе вал, кызьы вань сюлэмзэс сётыса соос ветло репетициосы, потало концертъёсы. Нош республикалэн палэназ вуыло ке, макем бурдъяське мылкыдзы. Соин ик арлы быдэ кытчы ке но поталом шуыса оскытӥсько соосты. Нош кыл сётӥд - быдэсты, пиосы азьын медад саптаськы. Пиналъёс дышетӥсьёссылы оско ке, со туж бадӟым кужым: гурезьёсты берыктыны луымон. Мон пиосылы котьку верасько, ойдолэ зэмос профессионалъёс кадь ужалом шуыса. Ноку но мон тӥледын уг даллашы, ноку уг тышкаськы - тӥ огшоры дышетскисьёс ӧвӧл, тӥ крезьгурчиос.

- Кызьы пиосты бырйиськоды, кытысь соосты шедьтӥськоды?

Тани май пумын анай-атайёс асьсэос пиналъёссэс дорамы вайыны кутскозы ни. Ми соосты кылзӥськом, устооссэс бырйиськом. Кудъёссэ пиосты смотръёсысь синйылтӥськом. Тани кылем арын “Зарни италмас” смотр дыръя туж синмаськи Кезысь пияшлы. Сое дорамы ӧти, табере Кирилл солист луиз ни. Мон котьку шуисько, мынам пиосы - дуннеысь самой усто пиос.

- Валерий Яковлевич, табере калленэн филармония борды выжом, малпасько. Татын чеберлыкъя (художественной) кивалтӥсь луыса ужаны кутскемды дырысен ӝоген дас ар тырмоз ни.

- Бен, филармоние мон 1991-тӥ арын лыктӥ, обкомын ужаме бере. Но дас ар одӥг нунал кадь ортчиз. Мыным туж яра артистъёсын ужаны. Шумпотӥсько, асьмелэн сыӵе быгатӥсь удмурт коллективъёсмы - “Шулдыр ӝыт”, “Катанчи” - вань шуыса. Быгатэммыя, дорамы ӧтчаськом Москваысь, Санкт-Петербургысь тодмо адямиосты. Трос дыр но, кужым но быре фестивальёсы дасяськонлы. <...>

- Кызьыгес адӟиське удмурт культуралэн азинсконъёссэ огъя Россиысь удысэн ӵошатыса?

- Уралысь улосвылъёсын ӵошатыса ик, асьме артистъёслэн самой пичи уждунзы, туж ляб материально-технической базазы. Озьы ке но асьмелэн ик вань симфонической оркестрмы. Быдэс Россиын чиньые тырымон духовой оркестръёс, асьмелэн со но вань. Берло аръёсы синмаськымон ужа Операя но балетъя театр. Асьмелэн вань “Италмасмы”, “Айкаймы”, мукет калыкъёслэн соос туж лябесь на. Филармониын али эшшо вылез коллектив кылдэ на, “Лулгур” шуыса нимаське со. Жаляса верано, ӧжытгес на асьмелэн удмурт кадръёсмы. Ӧвӧл хормейстеръёс, хореографъёс, уг тырмо режиссёръёс. Операя но балетъя театрын но тросгес удмурт артистъёс мед луозы вылэм. Бен, мыным ваньмыныз ужано луэ: удмурт-а со, ӟуч-а, бигер-а. Котькытын сямен ик, асьме крезьгурчиос пӧлын но данакез инмар выжыысь потэмъёс луо. Но ужакум котьку лыдэ басьтӥсько: дунне вылын одӥг гинэ Удмурт кун филармония. Татын удмурт аристъёс ӧз луэ ке, кытын соос луозы на?

Источник:

Митрофанов В. Я. Кияз крезез, сюлмаз кырӟанэз / В. Я. Митрофанов ; записала Э. Кумачева // Удмурт дунне. - 2001. - 30 март. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"