Редактирование: Матвеев Анатолий Ермилович

=Песятайлэн сӥзёнэз=
[[Файл:Matveev_anatolij_ermilovich.jpg|thumb|left|]]

'''Котьма мед шуозы, но улонын туж тросэз потэ выжы бордысь, оскытэ шаерысьтымы тодмо адями, экономика наукаосъя кандидат, элькунысьтымы калыкез утён удысысь дано ужась Анатолий Ермилович Матвеев. Та нуналъёсы со пусъе 75 арес тырмонзэ. Ужатозяз Анатолий Ермилович трос пол вылэ ӝутскылӥз. Но туннэ ке но малпаськылэ на: шонер-а мон улӥ-ужай, данъяськысалзы-а монэн песятае, атае? Азинтоз-а мынэсьтым сюресме пие, дунъялозы-а внукъёсы?'''

- Мон туж шудо адями, малы ке шуоно вордӥськи ӟеч семьяын, будӥ туж визьмо но гажамон адями бордын. Песятае Алексей Матвеевич (1884–1956) вордӥськем Алнаш ёросысь Вылӥ Асан гуртын. Со бордысен кутскиз семьямылэн данэз. Кык арес дыръяз со атайтэк кылем – дядязы, Туркестанын басмачъёсын ожмаськыкуз, бырем. Соин пичи дыръяз батракын ветлоно луэм, но кык класс дышетскыны удалтэм ик. Собере эксэй армиын службазэ нуэм. Песятаймы котыр улосын туж гажано адями вылэм – 1916-тӥ арын сое Голюшурмаысь черклы старостае бырйиллям. Нош 1918-тӥ арын со кылдытэм кредит эштос – калык солы аслэсьтыз коньдонзэ оскылэм.

Граждан ожысь вуэмез бере рос-прос басьтӥськем гуртэз ӝутон борды. Гуртоосыз сое вить пол бырйылӥллям Муважи сельсоветлы депутатэ. Кивалтэм ёросысь коммунальной хозяйствоя отделэн, МТС-эн, ужам Алнаш ёрос Кенешлэн исполкомезлэн тӧроезлэн воштӥсез луыса, Удмурт областьысь Тазалыкез утёнъя управленилэн кивалтӥсезлэн воштӥсез но вылэм.

1925-тӥ арын Алексей Матвеевичез СССР-ысь ВЦИК-е пыртыны дэмлало. Со аре ик со ЦИК-лэн кивалтӥсезлэн М. И. Калининлэн приёмнояз ужа. Пенсие потыса но, песятай Алнаш ёросысь Киров нимо колхозэн кивалтӥз. Тэк улонэз ӧз валалля – 62 аресказ усьтӥз ку посонъя но сапег гындонъя мастерской, котырысь пичизэ но, бадӟымзэ но дӥсялляз-кутчалляз. Алексей Матвеевич сярысь аслаз ≪Уроки жизни≫ книгаяз туж ӟеч гожтӥз история наукаосья доктор, профессор К. И. Шибанов (куамынэтӥ аръёсы со ВКП(б)-лэн Алнаш райкомаз секретарь вал).

'''- Зэмзэ но данъяськымон, но ваньзэ сое тӥ тодӥды берлогес. Нош пичи дыръяды валалляды-а мукетъёслэсь висъяськись семьяын будэмдэс?'''

- Ма, ӧй, дыр. Пичи дыръям ми анаен-атаен но выныным ӵош Алнашын улӥмы атайлэн сузэрезлэн семьяеныз ӵош. Атай но кырси школаын дышетӥзы. Одӥг липет улын 9 мурт улӥм, но одӥг пол но ваче вуонъёсты, тэкшеронъёсты адӟылэме ӧвӧл. Кык семья коньдонзэс но, пе, уг люко вал, кин кӧня вае, ваньзэ – одӥг пуртые. Тодӥсько на, кин ке дорын ӧвӧл ке, нокин но ӝӧк сьӧры сиськыны ӧз пуксьылы, анай шуылӥз: уртче кулэ. Ужаны но озьы ик – котьку ваньмыз ӵош. 

[[Файл:Ekaterina matveeva.jpg|thumb|right|Мон - анай киын.]]
Ньыль арес дыръям мон возьмамтэ шорысь городской луи. Атайме Ермил Алексеевич Матвеевез КПСС-лэн Удмурт обкомаз дышетонъя отделэ ужаны басьтӥзы. Со милемыз Иже сьӧраз вайиз. Соцгородын кык висъетэн квартира сётӥзы. Мыным город туж ӧз кельшы. Анай шуэ: мынэ азбаре поталэ, шудэ. Потӥськом но – ум валаське, кытын со азбар, Алнашын кадьзэ утчаськом. Пиналъёсын вераськыны кутскиськом но – милемыз нокин уг вала. Но ар ортчыса, ми выныным ӟуч сямен шатыр поттӥськом ни вал – удмуртэз кытӥ-отӥ вуныны но ӧдъяз. Атай доре йӧскадь ӧз вуылы, анай шуылӥз: ужез трос. Кӧня ке улыса, сое выжтӥллям ≪Удмурт коммуна≫ газетлэн редакторезлы воштӥсе. Нош 1941-тӥ арын Туапсее тыоссэ эмъяны келязы. 

Огпол гужем вылтӥ анай туж бӧрдыны кутскиз. Мар луиз, юаськом. Война, пе, нош мон атаеныды йӧназ ӧй но люкиськы. Сое санаторийысен ик фронтэ келяллям. Бӧрысь тодмо луиз: ӵап со нуналэ ик ≪Удмурт 
коммунаысь≫ эшшо ньыль муртэ оже басьтӥллям. Атай сяна, огез но ӧз берытскы. Милямез но, оло, улэп ӧй 
кыльысал, туберкулёзэз утиз. Ар пала ожмаськыса, со висёнэныз госпитале сюрем, собере пырак 1946-тӥ арозь санитарной поездэ ужаны кельтӥллям.

Война дыръя песятай милемыз выльысь Чумолёе нуиз. Соку мон вӧжо (бадӟым) вал ни, валалляй солэсь ӝот-ӝот луэмзэ. Гуртын одӥг песятайлэн гинэ садэз вал: яблокпуос, сутэрпуос. Секыт аръёсы но трос пудо вордӥз. Мукетъёсын ӵошатыса, туж ӧм ёрмылэ, но нянь ӧй вал, песятай воля ӧз сётъя, весь ужатэ вал. Гужемъёсы, дорын сяна, колхозын ужаллям, турын дасянын тыршим. Нош толалтэ со монэ Голюшурмаысь почта нуллытӥз. Со понна мыным трудодень гожъязы. Озьы мон аслым 12 арескам зэмос воргорон кадь потӥсько ни вал – как жо, семьяез сюдӥсько ук! Зэм, одӥг пол янгышен семьялэсь быдэс арнялы нянь карточказэ ыштӥськем. Туж куректӥ, но анай огпол гинэ берпалам чабкиз, собере бӧрдыны кутскиз: али но уг валаськы, оло кизэ лэземлэсь, оло няньтэк кылемлэсь чигиськыса. Со бӧрсьы огпол но йӧттылэмзы ӧвӧл ни.

'''- Улон сюрес бырйыны озьы ик песятайды яке атайды индылӥзы, озьы-а?'''

- Ӧз, таиз ласянь огпол но пал кыл но ӧз поттылэ. Атаез мон туж шер адӟылӥ, война бере со куинь ар дышетскиз Москваысь вылӥ партшколаын. Сизьым классэз быдтыса, мон выльысь городэ вуи, ӝыт школае пыри. Нош карьераме мытӥ... грузчикысен. ≪Ижсталь≫ заводын ужай. Песятай солы чик ӧз паймылы кадь – визьмыз ке вань, азьлань мыноз, шуиз, дыр. Мон валалляй, одно вылӥ тодон-валан басьтоно шуыса, сотэк кызьы: песятай – дано адями, атайлэн семьяяз куать пӧлысь витез вылӥ тодонлыкен. Кызьы выжыез возьытэ уськытод? Зэм, нырысь мынам мылкыды вал военной луыны, заводын ужакум, лётной школае ветлӥ. Война бере ваньмызлэн герой луэмзы потылӥз. Дыр вуиз но, малпанэ воштӥськиз: сьӧрло кошкисько ке, яратонэ татчы кыле. Собере лобаса-лобаса суйтэм-пыдтэм кыли ке, мар ужало на мон, кинлы кулэ луо? Огкылын вераса, романтик вылымтэ мон. Кошки механикая институтэ. Нимысьтыз дасяськытэк, капчиен пыри. Вить ар улыса, конструктор луыса потӥ. Ыстӥзы ≪Ижмаше≫. Лулысь-сюлмысь ужаны кутски, но общественной ужен вырон мылкыды пачылалляз, лэся. Монтэк одӥг ужрад но ӧз ортчылы, ачим но ялан маке малпасько вал. Огкылын вераса, быдӟым конструктор луыны мынам амалы ӧз луы ни – ӵектӥзы комсомоллэн Ижысь горкомаз секретаре, одӥг ар ортчыса – комсомоллэн Удмурт обкомаз секретаре.

'''- Тани татысен тӥ кошкиды ни выжыостылэн пытьытӥзы...'''

- Пытьые аслам, дыр, но мон ас поннам зэмзэ но лушкем данъяськылӥ ни, атайме-песятайме возьытэ уг уськытӥськы шуыса. Пиед аслэсьтыд лябгес ке луиз, мар со? 

[[Файл:Mihail kalinin.jpg|thumb|left|Песятае А. Матвеев Быдэс Союзысь староста М. Калинин (шорысез) дорын ужан дыръяз (бур паласен кыкетӥез), 1925-тӥ ар.]]
Та ужам соку ик ӵектӥзы партие пырыны. Собере, куинь ар улыса, ыстӥзы Москвае, атайлэн дышетскем вылӥ партшколаяз визь-нод люканы. Туж тунсыко потӥз дышетскыны, 200 пӧлысь ВПШ-ез мон огнам чылк-чылк 
≪витьёсын≫ йылпумъяй. 

Отысь берытски но, монэ бырйизы КПСС-лэн Глазов горкомаз кыкетӥ секретаре. Семьяелы отын, паймоно кадь, туж кельшиз. Город пичи, чыпкыт, соку ик куинь комнатаен квартира сётӥзы. Уже пӧрмылӥз. Но соку вакыт сыӵе вал, тон туннэ – командир, ӵуказе – партбилеттэм, ултӥям мурт. Оломар понна но сюрылӥз. Озьы йырам одӥг малпан лыктӥз: а луо ай мон тодосчи! Соку, партийной ужме но ыштӥ ке, кышкыт уз луы. Кема малпаськи кыӵе удысэз бырйыны. Вал капчиосызгес, но мон малпай: котькуд кивалтӥсь ӟеч тодыны кулэ экономикаез. Аспирантурае пыремме тодыса, нырысетӥ секретаре куалекъясь луиз – солы азьло но ӧз кельшылы пыд бераз лёгиськылэме, а татын ӧз чида ни, меӵак юаз: интыме басьтон понна-а, пе, кандидат луэмед потэ? Мон абдрай. Нырысь ик, пырак Глазове кылён сярысь мынам малпанэ ик ӧй вал. Мырдэм буйгатӥ. Ачиз ялан пӧсекъяса улӥз ке но, ужзэ умоятон, дышетскон сярысь ӧз сюлмаськылы.

'''- Вожзэс медаз вае мыным, валасьтэм муртлы, тодосчиос, но куддыр мыным потэ, куд-огез кандидат диссертациос тэк, нокыӵе пайдатэк кыллё, ним басьтон понна тыршемлы укшало. Кыӵе ужды понна тӥ наукая кандидат луиды? Кыӵе пайда вайиз со экономикалы?'''

- Диссертацие нимаськиз ≪СССР-ын огъя машинаос лэсьтон удысын ваньбур поттонын специализация ортчытон≫. Мон эскери одӥг станокъёсы ик трос пӧртэм продукция поттонэз – со зол юрттылӥз шыръяны, ӟечлыкез но вылынгес луылӥз. Ӵап со вие ортче вал КПСС-лэн 24-тӥ съездэз. Кивалтӥсе мыным шуиз: гожты съездлы, мед пыртозы ӵектонъёстэ резолюцие. Пыртӥзы ведь – быдэс абзац! 

Аспирантура бере улонэ чутрак воштӥськыны быгатэ вал... удмурт ке ӧй луысал. Оломаиным кельшиськем, монэ Москваын кык уже кураны ӧдъязы: вылӥ партшколаысь экономикая кафедрае дышетӥсе но Печатья кун комитетэ наука литературая редакторе. Кыкетӥез мыным кельшизгес. Вань кабинетъёстӥ ортчи ни, кенешон пыр потӥ. Куинь толэзь ужаса, квартира, дача, бадӟым уждун сӥзизы, но... Кытысь ке со сярысь кылэм компартилэн Удмурт обкомысьтыз нырысетӥ секретарь Валерий Марисов. Шедьтӥз ведь монэ Москваысен, ӧтиз дораз гостиницае вераськыны. Визь тырыса, вуттэм москваослы но: милям, пе, сотэк но удмурт кадръёс ӧжыт, мед берытскоз, тӥ асьтэлы ӟучъёсты шедьтэ. Кӧня куриськи Валерий Константиновичлэсь, доктор диссертация дасятозь гинэ, Москваын коня ке ар ужало но берытско шуыса, чутрак пумит кариськиз. Иже вуи но, Эграла нырысетӥ секретаре дэмла. Ма, шуисько, Москваын сыӵе дунъяды но, табере ёросэ ыстӥськоды-а? Пуктӥз партилэн Ижысь Октябрь райкоменыз кивалтыны. 11 ар отын ужай. Туж мылкыдыя вал – ёрос тунсыко, татын ик предприятиос но, дышетсконниос но, кун учреждениос но.


'''- Анатолий Ермилович, со вакытэ партия кузёяськиз, шуыны луоз, котькуд адямилэн улонэныз. Сомында ар ӵоже кивалтытозяды, вал, дыр, туж ӟеч ужъёс но, янгышан учыръёс но. Кема-а малпаськылӥды кыӵе ке решение кутон азьын, вал-а асьтэлэн шӧдондылы-малпандылы пумит мынон учыръёс?'''

- Котъмар вал. Али ке но жаль потэ механикая институтысь ректор Липанов – юнме шорысь выговор сюриз, ужысьтыз кошконо луиз. Отын югдур общежитиосын герӟаськемын вал, но бӧрысь выговорзэ куштӥм.
Но оглом учконо ке, партия ведь сюлмаськиз общество сярысь. Учке ай солэсь куронъёссэ (мукет сямен со коммунизм лэсьтӥсьёслэн моралья кодексэз нимаське вал) – тросэз соос басьтэмын Библиысь – воштыса.

'''- Маке укыргес куасалтӥды кадь...'''

- Озьы со. Кылсярысь, партия сюлмаськиз, адями ужатэк медаз улы, медаз юы-калгы шуыса. Со ласянь коммунистъёслэсь кылзэс зол юаллямы. Тодӥсько на, ужысьтыз куштӥм нюлэс хозяйствоя министрлэсь воштӥсьсэ – мурт кышноен шутэтскыны ветлэм...

'''- Адямиез яратон понна тышканы луз шат?'''

- Кыӵе яратон – бызид-кышнояськид ке – ул. Сьӧлыкамед ке потэ, нокин медаз тоды. Милям песятай шуэ вал: выжыямы люкиськемъёс ӧй вал, медаз но луэ.

'''- Партия дунъяз тӥлесьтыд оскымон луэмдэс, 1981-тӥ арын тӥ вылэгес ӝутскиды - Правительстволэн членэз луиды, нырысь кивалтӥды элькунысьтымы Дунъёсъя кун комитетэн, бӧрысьгес – Калыкез 
улон-вылонын утёнъя министерствоен. Мар со - удалтон?'''

[[Файл:Trofim borisov.jpg|thumb|right|Россиысь Советъёслэн XII съездзы, 1925-тӥ ар. Удмурт автономной областьысь делегатъёс. Кыкетӥ радын: А. Матвеев, тодмотэм делегат, Т. Борисов, И. Наговицын.]]- Мон азьло интыям, выговоръёс сётъяса гинэ, ӧй пукы ук – кӧня уж ужамын. Малпасько, юнме ӧз дунъялэ Ужысь Горд Знамя но Эшъяськон орденъёсын, медальёсын. Бадӟымгес кивалтӥсьёс ужме адӟизы, луоз, оскизы бере. Министрын капчи ӧй вал – выльдӥськон вакыт, ёрмон... Но ми быгатӥм арлыдоослы, инвалидъёслы тросгес саклык висъяны, юрттэт сётыны. Озьы шаерамы кылдӥз калыклы юрттонъя 24 центр. Усьтӥськизы интернатъёслэн выль корпусъёссы, паськытаз ортопедияя предприятие, юрттэт сётонэз радъямы дорысьтызы потаны быгатӥсьтэм пересьёс понна – соос борды нимысьтыз ужасьёсты юнматъям. Та амал али но вань. Министерствоын ужакум, коллективе туж зол вал. Данъяськисько воштӥсьёсме будэтыны быгатэменым – одӥгез, Суворов Сергей Васильевич, отын ик министрлэн воштӥсез, Анна Ивановна Радыгина ужа вытъёсъя комитетын, Наталья Кузнецова – Пенсиосъя фондын, Кун Кенешын депутат, партийной ужен но выре. 

'''- Арлыдоослы юрттон - туж ӟеч, но тӥ уд малпаське-а, калыкен мукет амалъёсынгес ужано шуыса? Сокема министрын ужатозяды, котькуд интернатэз усьтыку, малпаськылӥды, дыр, ук, малы асьме пересьёс сыӵе калэ вуо?'''

- Одно. Мынам быдэс пушкы пумитъяськылӥз солы, но чиновник бере, валалляй: государство котькуд адямиез понна сюлмаськыны кулэ. Улонын туж тросэз потэ со бордысь – выльысь берытскисько ни вераськонмылэн кутсконаз – кыӵеесь кусыпъёссы ӵыжы-выжыослэн. Бен, пересь жаль. Но жаляз-а со ас дыраз пиналъёссэ, яратӥз-а соосты тырмыт, визнодаз-а? Соку малы сое отӥ каризы? Вань бен пӧртэм учыръёс: куд-огезлэн чик пиналыз ӧвӧл яке туж кыдёке кошкемын, но данаказ учыръёсы нылпиоссы гань-гань кыллё пересь анайзылэн корказ, солэн пенсиеныз сиё-юо. Та ласянь мон синмаськисько кавказ калыклы. Удмуртъёс но азьвыл туж сӥлы карылӥзы анай-атайзэс, малпасько, али но лулпушмы воксё сӧриськымтэ на.

'''- Тӥ - ваньзэ лыдъяны-чотаны, азьлапалэз чакланы быгатӥсь адями. Кузпал бырйыкуды, мар вал нырысь интыын?''' 

- Сямзэ кема чаклай. Оскымон потӥз, ноку ӧз пӧяськылы. Риммаен ми тодматским, ӝыт школаын дышетскыкумы. Кузпалъяськытозямы сизьым ар пумиськылӥм. Со йылпумъяз Ижысь пединститутэз. Улытозямы огпол но уженым пыкылэмез ӧвӧл, кытчы мынӥсько – сьӧрам. Ог-огмылы оскыса улӥмы.

'''- Пинал дырысь яратон кусыпъёсысьтыды маиз тодады кылиз?'''

- Кема курадӟытэмез, тодматскеммы бӧрсьы ньыль ар улыса гинэ, чупай кадь ай. Соку но шуиз: яке тамак кыскондэ кушты, яке ноку но ымдурам эн йӧтскылы ни. Куштӥ ук. Соин али егитьёслы шуисько: туганъёстэс чупаськыны кутскемлэсь азьло куасалэ, собере уз кылзӥське ни.

'''- Анатолий Ермилович, тӥляд семьяяды вань, шуо, эшшо одӥг паймымон учыр - удмурт литератураез лыдӟисьёслы со туж тунсыко потоз, дыр.'''

- Озьы. Со герӟаськемын анаеным – Екатерина Семёновна Матвееваен. Пинал дыръяз туж чебер, чылкыт вылэм. Солы синмаськем кулак пи. Нош Катялы со кельшылымтэ. Озьы ке но бай муртьёс асьсэлэсь кариллям – нылмуртэз шудон дорысь лушкаллям. Собере но туж пумитъяськем бызьыны. Соглаш луэмзэ возьмаса, нылмуртэ олокӧня нунал чуланын ӵогаса возиллям. Малпазы, дыр, сирота ныл понна нокин дур уз басьты.
Со вакытэ Алнашын Катяен одӥг ульчаын ик улэм дышетӥсь Филипп Кедров. 

Та сярысь тодыса, туж вожез потэм – Филипп Григорьевич юрттэм куанер нылмуртлы мозмытскыны. Та учырез со пумиськылыкузы мадем мукетызлы дышетӥсьлы – Ермил Алексеевич Матвеевлы. Воргоронлэн тодматскемез потэм Катяен. Ог-огзэс огпол адӟыса ик, егитьёс люкиськонтэм синмаськиллям, кузпалъяськиллям. Нош кӧня ке улыса, Филипп Кедров гожтэ ≪Катя≫ повестьсэ, тодмо писатель луэ. Бӧрысьгес Игнатий Гаврилов та повестья пьеса малпа, нош 1961-тӥ арын крезьгуръя но драмая Удмурт театр пуктэ Герман Корепановлэсь ≪Катя≫ повестья гожтэм ≪Наталь≫ операзэ. Тӥни озьы анае кӧня ке чеберлыко произведенилэн прототипез луэ. Конешно, повесте пыремын Катялэн улонысьтыз оглюкетэз гинэ, но ӵап со лӧпкытйз ук писателез произведение борды басьтӥськыны. 

Атай туж яратылӥз анаймес, соин ялан лякыт вераське вал. Соос милемыз кык пи но ныл будэтӥзы. Герман Ермилович выны дышетскиз Удмурт пединститутын, собере йылпумъяз Ленинградысь аспирантураез, со философ, доцент. 30 арлэсь кема дышетӥз ИжГТУ-ын, декабристъёс но Плеханов сярысь кык книга поттӥз.
Римма сузэрмы 30 арлэсь кема Ижын дышетӥсь луыса ужаз.

'''- Нош нылпиосты будэто-а ӟеч выжыдылэсь данзэ?''' 

- Ум ӝожтӥськиське. Ми кузпалыным Римма Сергеевнаен одӥг пи будэтӥм. Игорь нырысь дышетскемезъя инженер. 90-тӥ аръёсы обороная предприятиос куашканы ӧдъямен, кыкетӥ тодон-валан басьтыса, банке ужаны выжиз. Али аслаз бизнесэз.

[[Файл:Alexey matveev.jpg|thumb|right|Дано удмурт выжыез азинтӥсь - Америкаын ужась егит профессор Алексей Матвеев.]]
Мукетъёсызлэн но нылпиоссы ваньмыз вылӥ тодон-валан басьтӥзы, Ӟеч уж шедьтӥзы, тросэз кивалтӥсьын ужало. Тунсыко радъяське улонэз Германлэн пиезлэн. Со отличиен йылпумъяз УдГУ-ысь филологияя факультетэз. Огаз гужем Америкае ветлӥз шуг пиналъёсын ужаны. Сое синйылтӥллям, выльысь ӧтизы. Отын, университетэ экзамен сётыса, магистр луиз, бӧрысь докторантурае пыриз. 2007-тӥ арын со, 28 аресказ доктор диссертацизэ утьыса, профессор луиз ни, табере ачиз аспирантъёсты дышетэ, Норфолк
университетысь (Вирджиния штат) огеныз управлениен кивалтэ.

'''- Уд малпаське-а выжыды сярысь книга гожтыны? Гожтӥды ке, кин отын валтӥсь героез луоз?'''

- Мон улытозям тямыс книга гожтӥ. Зэм, соос сӥземын партийной ужлы, диссертациеным герӟаськем темаослы. Но табере мон гожтыны кулэ тужгес яркытсэ ужме – валамон, со луыны кулэ Матвеев выжыос сярысь. Кин валтӥсь героез? Песятай. Со – зэмос воргорон, зэмос удмурт, зэмос кизили.

'''Источник:'''

Матвеев, Анатолий Ермилович. Песятайлэн сӥзёнэз: [беседа с бывшим министром соц. защиты УР о жизн. пути] / А. Е. Матвеев ; записала З. Рябинина // [http://elibrary.unatlib.org.ru/handle/123456789/9412 Удмурт дунне. - 2009. - 27 февр.] - С. 6, 11 : фот. - (Удмурт кизилиос).

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]

=Библиография=

==Отдельные издания==

Партийное собрание. Каким ему быть? : заметки партработника / А. Е. Матвеев. - Ижевск : Удмуртия, 1967. - 45 с. 

Специалист, творчество, экономика / А. Е. Матвеев . - Ижевск : Удмуртия, 1972. - 60, [2] с.

Специализация производства и экономия труда / Матвеев А. Е., Исмагилов Р. И. - Ижевск : Удмуртия, 1977. - 172 с. 

Дорога к счастью: сказание о роде Матвея сына Ивана / А. Е. Матвеев. - Ижевск : Малотиражка, 2013. – 213 с.

Выжы ке юн, писпу но йӧн: [веросъёслэсь роман] / А. Е. Матвеев. - Ижевск : Шелест, 2016. - 201 с.

Баня - чудо: любовь, добро... : если хочешь быть здоров, взяв веник, на полок забирайся и холодною водой обливайся! / А. Е. Матвеев. - Ижевск : Шелест, 2016. 

==Публикации в периодических изданиях и сборниках==

Выжы ке юн, писпу но йӧн / Анатолий Матвеев // Кенеш. - 2014. - № 2. - С. 56-70; - № 3. - С. 44-60; 2014. - № 4. - С. 36-59. 

Паймымон мунчо / Анатолий Матвеев // Кенеш. - 2015. - № 9. - С. 62-67 ; № 10. - С. 69-82.

==Литература о жизни и деятельности==

Матвей выжы // Удмурт дунне. - 2014. - 21 февр. - С. 22.

[http://elibrary.unatlib.org.ru/handle/123456789/16714 Анатолий Матвеевлы - 80] // Кенеш. - 2014. - № 2. - С. 58-59.

Дано выжы : [о родословной и истории семьи Матвеевых] / Анатолий Матвеев // Кенеш. - 2009. - N 4. - С. 49-55.

Родина-мать зовет!: урок проведен Т. В. Кочановой в 1942 году в Чумолинской малокомплектной школе Алнашского района / Анатолий Ермилович Матвеев // Вордскем кыл = Родное слово. - 2015. - № 4. - С. 36-37. - (К 70-летию Победы в Великой Отечественной войне).

[http://elibrary.unatlib.org.ru/handle/123456789/6080 Пеймыт дуннеысь удмурт тылси] / А. Е. Матвеев ; записал Ильтимир Байметов // Вордскем кыл = Родное слово. - 2012. - № 1. - С. 38-42.

Дали деньги на шапку, на шаль..., а в глазах стариков почему-то печаль: [беседа с министром соц. защиты] / А. Е. Матвеев ; записала Н. Загуляева // Изв. Удмурт. Респ. - 1993. - 10 апр.

Помощь придет вовремя: [соц. обеспечению России - 75 лет. Соц. помощь в Удмуртии] / А. Е. Матвеев // Удмурт. правда. - 1993. - 12 мая.
Не только о хлебе насущном: [беседа с министром соц. защиты населения Удмуртии] / А. Е. Матвеев ; записала Л. Дудник // Удмурт. правда. - 1993. - 27 окт.

Социальная защита населения: итоги и перспективы : [беседа с министром соц. защиты Удмурт. Респ.] / А. Е. Матвеев ; записала О. Малкова // Неделя Удмуртии. - 1994. - 22 апр. - С. 6.

Христолюбова, Людмила Степановна. 
Матвеев Анатолий Ермилович : [канд. экон. наук] / Л. С. Христолюбова // Ученые-удмурты : биобиблиогр. справ. / Л. С. Христолюбова. - Ижевск, 1997. - С. 151-152.

Поляков, А. 
Край благодатный на таланты: [знат. люди Алнаш. р-на] / А. Поляков // Алнаш. колхозник. - 2000. - 29 июня, 1,6 июля.