Лукин Владимир Валерьянович

Материал из Воршуда
Версия от 10:14, 1 ноября 2016; Sveta.Bat (обсуждение | вклад) (Новая страница: «=Огпол ыбыса, медаль уд уты= thumb|left| Бразилиын ортчем Олимпиадае Удмуртиысь 3…»)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Огпол ыбыса, медаль уд уты

Lukin.jpg

Бразилиын ортчем Олимпиадае Удмуртиысь 3 спортсменъёс пыриськизы. Озьы ик дуно куно чот отчы вуылӥз шаерысьтымы Ыбылӥськонъя федерациен но олимпиецъёсты дасянъя школаен кивалтӥсь Владимир Лукин. Владимир Валерьянович туэ февраль толэзе 70 арессэ пусйиз. Арлыдыз шоры учкытэк, шаерысьтымы спортэз азинтон сярысь сюлмаське, со РСФСР-ысь дано тренер но Россия Федерациысь мугорез кыдатон культура но спорт удысысь дано ужась.

Куинетӥез

– Гужем Олимпиадаос сярысь ке верано, мынам та куинетӥез луэ, – веранзэ мытӥз Владимир Лукин. – Бен, одӥгаз но спортсмен чот ӧй пыриськы. Нырысетӥез вал 1980-тӥ арын. Москваын ортчем Олимпиадае вань улосъёсысь делегациос ветлӥзы. Соку мон ньылетӥ арзэ Ижысь механикая заводын инженер луыса ужасько вал. Огдыре ыбылӥськонъя спортэн тунсыкъяськи, выль поттэм пыӵал тӥрлыкез уж вылын эскерылӥ. Заводын ужам сяна, спортъя «Металлист» клубын пиналъёслы ыбылӥськонъя секция нуи. Москваын ортчем Олимпиада дыръя ыбылӥськонъя ваньзэ сямен ӵошатсконъёсты учки. Бадӟым ужрадысь капчи мылкыдын бертӥ: спортысь та амалын но вормонъёс басьтыны луоно.

2000-тӥ арын Австралиысь Сидней городын ортчем Олимпиадае специалист но тренер луыса ветлӥ ни. Ижысь ыбылӥськись Мария Феклистова соку 3-тӥ инты басьтӥз. Удмуртия понна вераны луонтэм шумпотон вал, угось гужем Олимпиадаосысь шаерысьтымы спортсменъёс медальёс ӧз вайылэ на вал.

2008-тӥ арын Пекинэ ветлӥз но азвесь медаль басьтӥз мукетыз ыбылӥськисьмы, Наталья Падерина. Табере шумпотӥсько Давид Белявский гимнаст понна, Рио-де-Жанейроын со кык медаль басьтӥз. Но жаляса верано, тросэз спортсменъёс асьме шаерын вордскемын гинэ, нош медаль дорозь соосты кыдато ни мукет улосъёс. Озьы шумпотонэн артэ сюлэм ӧжытак ӝожоме но, угось спортсменъёс со медальёссэс улон интыязы нуо, асьме шаере возьматыны гинэ вайыло.

Тол но гужем – пӧсь

– Бразилиын мон 6 нунал улӥ, ыбылӥськонъя вань ӵошатсконъёсыз учки, берло 2 нуналзэ вератэк, – вера дано тренер. – Мукетъёсаз стадионъёсы пыраны ӧз кылды, но со понна городэз адӟи. Бразилиын пӧртэм калыкъёс, туж трос туристъёс. Асьмелэн август толэзьмы гужемлэн пумыз ке, соослэн толзы йылпумъяське. Мон отын дыръя омырын 25-27 градус шуныт возиськиз, одӥг пол зориз. Солэсь но пӧсь луысал ке, спортсменъёслы секыт луысал. Шундызы йыр вадьсын ик, туж шаплы берга. Уйзы ог 13 час кыстӥське, югыт нуналзы – ог 11 час.

Олимпиада шуиськомы ке но, солэсь ортчемзэ ӝыны страназы шӧдытэк кылиз, дыр. Городысь ӝужыт чебер юртъёсын узыръёс уло, нош трущобаосын – куанеръёс. Вылысьтыз вылаз пуктэм юртъёс асьме пичи сад-бакчаослы яке артэ пуктылэм муш умортоослы кельшо. 6 нунал куспын город сьӧры потоно луылӥз, угось отчы интыяськемын стрельбище. Соин ик городлэсь пӧртэм интыоссэ адӟи.

Допинг сярысь но вератэк кельтэм уг поты. Бен, Россиысь спортсменъёслэсь тужгес трос проба басьтӥзы, дыр, ог 600, сайтъёсын 300-350 гожтэмын ке но. Ыбылӥськисьёс доры но маршалъёс ӵем кожазы, спортсменъёс солы дась вал.

Сӥс

– 1993-тӥ арысен 2001-тӥ арозь Россилэн сборной командаяз тренер луыса ужай. Соку ик дуннеысь трос тренеръёсын кусып тупатӥ, ыбылӥськонъя дуннелэн чемпионатъёсаз судьялэсь ужзэ быдэсъяй, Россиысь бадӟым ӵошатсконъёсты радъяны юрттӥсько. Валля арын Казаньын ортчем Универсиада дыръя но ыбылӥськон понна кыл кутӥ.

Совето Союз вакытысь но туала Олимпиадаосыз ӵошатоно ке, спортысь куд-ог амалъёс вераны луонтэм зол азинскемын. Но ыбылӥськонын ваньмыз одӥг выллемгес. 1950-тӥ аръёсы но, туэ но Олимпиадае шедён туж секытэн ортче. Вазен меӵак шуылӥзы: медаль уз басьты ке, малы спортсменэз ӵошатсконэ нуонэз. Бен, Олимпиадаос вискын 4 ар ӵоже бадӟым воштӥськонъёс ортчо. Специалистъёс но тренеръёс трос кужымзэс, коньдонзэс быдто спортсменлэсь быгатонлыкъёссэ будэтон понна, соин ик ӵошатскон дыръя но вылӥ инты басьтэмзы потэ. Россилэн сборной командаяз лябъёсыз уг шедё. Медаль басьтон понна спортсменъёс аръёсын ыбылӥсько. Патрон кутэмлэсь азьло часъёсын мертаськоно луо – винтовкаез шӧдыны дышо.

Туэ Олимпиадае шедён понна кема нюръяськизы Удмуртиысь Дарья Вдовина, Наталья Падерина, Юлия Каримова но Андрей Коньков. Ваньзы соос май толэзёзь Россилэн сборнояз вал. Ӝыны ар ӵоже сборъёсы потазы, пӧртэм ӵошатсконъёсы пыриськизы. Россимы бадӟым ке но, страналэсь 2 воргоронлы но 1 нылкышнолы гинэ Олимпиадае мыныны лицензия сётэмын вал. Со туж ӧжыт. Юлия но Андрей ӵошатсконысь пезьдӥзы ке, Россилэн олимпийской сборнояз шедем мурт Наталья Падерина ачиз палэнскиз.

Кылем арын октябрь толэзе капитан Н. Падерина пыриськиз дуннеысь военнойёслэн шудоназы. Со но Олимпиада выллем, 4 арлы одӥг пол ортчытӥське. Лымшор Кореяе ветлэменыз, ыбылӥськонъя нырысетӥ сборзэ кельтӥз. Отысь вуиз гинэ, Россиысь тренеръёс Москвае, отӥяз Эмиратые, пе, мынод, собере гинэ одӥг арнялы дорад бертылод. 10 но 6 арес пиналъёслэн анайзы бадӟым спортэз кельтӥз, семьяез пала кариськиз.

Даша Вдовина сярысь ке верано, 2012-тӥ арын но со Олимпиадае пыриськиз. Соку но, туэ но медаль дорозь ӧзгес сузьтӥськы. Туэ апрель толэзе Бразилиын ортчиз вал дуннеысь ыбылӥськисьёслэн кубок понна нюръяськонзы. Со ӵошатсконын Даша 2-тӥ инты басьтӥз. Олимпиадаын но медаль понна нюръяськыны быгатысал, но... Финалэ 8 кужмоез шеде, Дашамы 4-тӥ результат возьматӥз. Медаль понна нюръяськонын вормисьёслы гинэ 20 пол ыбыны удалтэ. Тямысэтӥзэ ыбем бере ӵошатсконысь палдэ лябез – 8-тӥез, дасэтӥзэ ыбем бере – 7-тӥез. Озьы котькуд кык ыбем бере медаль понна нюръяськонысь лябъёсыз пезьдо. Дасэтӥ ыбем бӧрсьы Дашамы азьветлӥсь вал, ӧжытаклы гинэ саклыксэ ыштылӥз. 14-тӥ патронэз спортсменэз шуг-секытэ вуттӥз. Таблоын 9,2 очко гинэ возьматӥз, нош медаль понна нюръяськисьёс 10 очколэсь ӧжыт ӧз ыбылэ. Ӵошатскон дыръя тужгес бадӟымез очко – 10,9. Даша 5-тӥ интые кылиз. Со сяна, Удмуртиысь спортсменка пичи калибръем винтовкаысь ыбылӥськиз. Кылем Олимпиадаын Даша, 585 очко люкаса, финалэ шедиз, нош туэ 579 гинэ очко люказ.

Пневматикаен ыбылӥськон трослы азьпала вамыштӥз – туала пыӵалъёс ӟечесь. Ӵошатсконъёс дыръя воргоронъёс ӧжытсэ 60 пол, нылкышноос 40 пол ыбыны кулэ. Нош пичи калибръем винтовкаысь ыбылӥськон – тунаськон выллем: люкетыны быгатэ зор-кот, тӧл, пӧсь яке кезьыт куазь. Тренировкаос шоры учкытэк, лыдпусъёс 16 ар ӵоже уг вошъясько.

37 ар витем шуд

– Асме вашкала адямиос пӧлы пыртӥсько ни, – серекъя Владимир Валерьянович. – Удмуртиысь ыбылӥськонъя спортэз азинтон вылысь 37 ар тир пуктыны выри. Малпанъёсме улонын быдэстыны быгатэмысьтым, туж шумпотӥсько. Ыбылӥськонэз басьтоно ке, 1970-тӥ аръёсы ик та амал Ижын азинтӥське ни вал. Заводъёсын поттэм пыӵал тӥрлыкъёсыз эскерон сямен ыбылӥськисьёс но кылдӥзы. Озьы ветлон сямен мон но спортъя мастерлэсь куронзэ быдэстӥ.

1977-тӥ арын Ижысь механикая заводлэн кивалтӥсез Василий Чугуевский «Металлист» стадионэ тир пуктыны ӵектӥз. Мон, со аре ик Свердловскысь типовой проектъёсъя институтэ ветлыса, чертёжъёс вайи. Но тир пуктыны ӧз удалты, Совето Союзысь спортъя сооружениос пуктонлы висъям уксёез ваньзэ Москваын ортчоно Олимпиадалы сётӥзы. Одӥгез коть умой, со проектмы юнме ӧз быры – Глазове тир пуктӥзы.

Но лушкем малпанъёсылэсь ноку ӧй куштӥськы. 10 ар ортчыса, нош ик уж борды басьтӥськи. Тир пуктыны чакламын вал стенд амалэн ыбылӥськисьёс вӧзы. Таяз учыре выльдӥськон люкетӥз, нош тир интыямы вуз каронъя центр усьтӥськиз.

Аръёс ортчо, тир пуктон сярысь малпанъёсме шара поттылыкум, куд-ог кивалтӥсьёс серем но карылӥзы. Нош мон аслэсьтым ӵоги, шаерысьтымы но Россиысь вылӥ кивалтӥсьёслы куронэн гожтэтъёс гожъяй, ваче кенешонъёсы пыриськылӥ. Дӧдьы интыысьтыз вырӟиз Пекинын ортчем Олимпиадаысь азвесь медален бертэммы бере.

2010-тӥ арын Ижевске вуылӥзы Россиысь Ыбылӥськонъя кенешлэн президентэз Владимир Лисин, Россиысь Мугор кыдатон культурая но спортъя министерствоысь специалистъёс. Удмуртиысь кивалтӥсьёсын кенешемзы бере огкылэ вуизы: тир пуктоно. Музъем утчано ӧз луы, Ижысь манеж вӧзы инъет пуксиз.

Туала куронъёслы тупась тирез 37 ар витёно луиз. 25 миллион манет тыр оборудование басьтӥмы. Табере кунгож сьӧрысь пыӵал но уд басьты, одӥг винтовка 700 сюрс манетлэсь ортче. Ижын поттэм винтовка 7 поллы дунтэмгес ке но, берло дыре спортсменъёслы уг потто. Та вие ум ӝожтӥськиське, дорамы лыктӥсьёслы ваньзылы пыӵал шеде. Ижысь школамы Россиысь устоез луэ, ар куспын шаерамы 5 пол федерал ӵошатсконъёс ортчо. Бадӟым вожвылъяськонъёс дыръя 2 тирез но манежез уже кутӥськомы. Огдыре 50 мурт ыбылӥськыны быгатэ, Россиысь таӵезэ уд пумита. Та вакытэ 2017-тӥ арын ортчоно ӵошатсконъёслы план гожтӥськомы.

Ижын тир кылдэмен, милям секциямы гожтӥськись пиналъёслэн лыдзы йылӥз. Дорамы нырысьсэ лыктэм муртлы одно ик ыбылӥськыны луонлык сётӥськомы. Нылпиослы туж кельше, дорысьтымы бурдъяськем мылкыдын кошко. Егитъёс пӧлын вуоно кизилиос одно ик вордскыны кулэ. Азьланезлы бадӟым осконмы Николай Килинлы. Дуннеысь ӵошатсконъёсын но вормонъёс басьтӥз ни.

Ыбылӥськонъя школа вылӥе ӝутскыны кутскемен, мукет улосъёсысь но спортсменъёс дорамы вуыны ӧдъязы. Кылсярысь, та дыре мон дорын мугорзэ кыдатэ Ижысь Мария Феклистова, Красноярскысь вуэм нылаш Юлия Каримова но Глазовысь Андрей Коньков. Шумпотоно, мукет улосъёсысь но пиналъёс дорамы курисько. Одӥгез урод – Удмуртиын ӧвӧл олимпиецъёсты дасянъя училище яке вуз. Туж кулэ вылэм.

Олимпиецъёсты дасянъя школа 3 амалэз герӟа: ыбылӥськон, куасэн но пыдын бызьылон. Куасэн бызьылонъя центръёс ужало Можга, Пичи Пурга, Сарапул, Вавож, Якшур-Бӧдья но Балезино ёросъёсын. Ыбылӥськон азинске Глазовын. Пусйыны кулэ, 2015-тӥ ар понна Удмуртиысь олимпиецъёсты дасянъя школа Россиысь устоез луиз. Бӧрсьысь бӧрсе 3-тӥ арзэ грант утӥськомы. Школаез азинтонлы со бадӟым юрттэт луэ. Алигес гинэ пиналъёс вуизы Казаньысь. Ижысь 14 аресъем Антон Товарнов огназ быдэстӥз спортъя мастерлэсь куронзэ, нош мукетыз, эшез Ильмир Валишев, 5-тӥ инты басьтӥз, командамы вормонэн бертӥз.

Шумпоттэ на, берло дыре ыбылӥськонлы бадӟым саклык висъяло ёрос кивалтӥсьёс но колхоз кузёос. Арлы кык пол соос пырисько Гурт шудонъёсы, ыбылӥськонъя ӵошатсконъёсын паймытъяло но милемыз. Арлы быдэ ӟеч ыбылӥсько Эгра ёросысь нылкышно кивалтӥсьёс. 100 очко пӧлысь 90-95 очко люкало. Дыр вуэмын ни соослы ас быгатонлыкъёссэс вылӥгес дунъяны. Ижын ортчись бадӟым ӵошатсконъёсы пыриськыса, оло, спортъя мастерлэсь куронзэ быдэстыны быгатозы?

Нимысьтыз пусйысал Вавож ёросысь «Колос» хозяйствоен кивалтӥсез Владимир Красильниковез. Гуртысь спортэз азинтонлы бадӟым саклык висъя. Спортзалзы но куасэн бызьылон сюресъёссы вань, нош калыксы, пе, маке выльзэ вите. Туж шумпотӥмы тир пуктыны кутскемез сярысь ивор кылэммы бере.

Уйпалась оло лымшорысь

– Лукин фамилиез кылыса, куд-огез малпа, мон шаермылэн палэнысьтыз вуэмын шуыса, – вера Владимир Валерьянович. – Атае Валерьян Павлович вордскемезъя Глазов ёросысь Качкашур гуртысь, удмурт. 1933-тӥ арын, Глазовысь коллективной земледелиея техникумез йылпумъямез бере, улон сюрес сое Кизнер черкогуртэ вуттӥз. Ёросысь нырысетӥез дышетскем специалист вал. Анае Ефросинья Исаковна вордскемезъя Киров улосысь, ӟуч. Вордски мон Кизнер черкогуртын, семьяын нырысетӥез пинал. 2 ареслы пичи Анатолий выны вань. Та дыре Ижысь «Буммаш» стадионэн кивалтэ. 10 ар Кизнерын улэммы бере атаймес ёросысьтымы ик Ленин нимо колхозэ ужаны ыстӥзы. Озьы ми 4 арзэ Вичурка гуртын улӥмы, удмурт школаын дышетскыса, удмуртомылӥ. Отӥяз нош ик Кизнере улыны выжимы, нош 8-тӥ класс бере атаелэн дышетскем техникумаз тодон-валан люканы вамыштӥ. Глазовысь техникумез йылпумъяса, 3 ар армиын служить кари.

Школаын дышетскыкум ик, ыбылӥськонъя секцие ветлӥ. Тодӥсько на, тренермы Николай Петрович Санников милемды Можгаын ортчем ӵошатсконэ но нуллӥз. Соку пичигес вылӥськем, малы ке спорт сокем бордаз ӧз кыскы. Глазове вуыса, улон шоры учконэ воштӥськиз. Спортъя вань ӵошатсконъёсы пыриськи: бызьылӥ, тэтчай, волейболэн шудӥ, нош копьё лэзьянын Совето Союзлэн чемпионатаз призёре шеди.

Армиын монэ спортротае кутӥзы. Мугорме кыдатон сямен ыбылӥськонлы синмаськи. 3 ар интые, 4 арзэ армиын ортчытӥ. Вордскем шаерам бертыса, кытчы вамыштыны пайми. Кизнерын монэ тодӥсьёс ӧй вал ни, Глазов аслым ӧз кельшы, атаелэн ӵыжы-выжыосыз доразы ӧтё ке но вал. Озьы мон тодмотэм Ижевске вуи. Механикая завод пыд вылам султыны юрттӥз. Отын мон 36 ар тырши, ужан сяменым ик ыбылӥськонъя мастерлэсь куронзэ быдэстӥ, заводлэн дано адямиез луисько.

Семья кылдытӥ 30 аресам. Табере 3 пиналъёсмылэн 5 внукъёссы будо. Шуныт кылъёс вераме потэ Валентина Германовна кузпалэ сярысь. Россилэн сборной командаяз тренерын ужакум, нылпиосты будэтон со вылэ усиз. Быдэс улонэ тирын ортчиз шуи ке, уг янгыша, дыр. Нылпиосмы но ваньзы ыбылӥськонъя секцие ветлӥзы, Россиысь ӵошатсконъёсын вормонъёс басьтылӥзы ке но, улон сюрессэс спортэн ӧз герӟалэ.

Ваньмон дыръям сад-бакчае ветлӥсько. Яратӥсько вашкала туспуктэмъёсты учкылыны, выжымы но колхоз улон сярысь атаелэсь гожтыса кельтэм чуръёссэ лыдӟыны. Уд но оске, Быдӟым ож кутскон азьын, пе, Кизнер ёросын 76 (!) колхоз вылэм, нош 1960-тӥ аръёсы 20 кылем. Туннэ ке но паймисько атаймылэн грамотаез тодэм-валамезлы. Солы луыса ик, вылды, Быдӟым ожлэсь но кылемын. 5 пол военкоматэ котомкаен ветлэм, нырысь берыктӥллям, ляб адӟемысьтыз, нош собере специалист кулэ шуиллям. 1914-тӥ арын вордскем муртлэн почеркез туж чебер вал, гожъямъёсаз одӥг янгышез но ӧвӧл. Ӵапак со гожъямъёсъя асьмелэсь выжы писпумес кылдытӥмы. Оскем потэ, нылпиосмы но выжы писпумес утьыны быгатозы шуыса.

Источник:

Лукин, В. В. Огпол ыбыса, медаль уд уты / Владимир Лукин ; печатланы дасяз Валентина Емельянова // Удмурт дунне. - 2016. - 26 авг. - С. 10, 15 : фот. - (Тӧр шорын).

За предоставление материала выражаем огромную благодарность редакции газеты "Удмурт дунне"