Лебедев Николай Иванович

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Шудо гуртэз кузьмаз шудо сюрес

Н. И. Лебедев

Алигес дорамы ревизор вуылӥз. Николай Иванович Лебедев - Россия Федерациысь 3-тӥ классэн кун советник, 1996-тӥ арысен кивалтэ Россиысь Коньдон ужпумъёсья министерстволэн республикаысьтымы Эскеронъя но ревизиосъя управлениеныз (вакчияк - КРУ). Ӧз, дорамы ревизия ӧз ортчыты, газетын ужасьёсын сюлмысь кенешиз. Уно юанъёслы тунсыко валэктонъёс сётӥз.

- Николай Иванович, вералэ вал, кыӵе ужъёсты быдэсъя та вакытэ управлениды?

- Кызьы тӥ тодӥськоды, Россия Федерацилэн бюджетысьтыз улосьёсы коньдон вуэ. Ӵапак солэсь кытчы кутӥськемзэ ик ми эскериськом. Тани миым шаерысьтымы 500-лэсь ятыр объектэ вуылӥм. Россиысь Коньдон ужпумъёсъя министерство но Удмурт Республикаысь Правительство куспын юнматэм тупанкылья (соглашениея) ми чакласьком на республикамылэн бюджетысьтыз коньдон кутӥськемез но. Та удысын огнамы ум ужаське. Мукет ёзьёсын кусыпъёсмес кужмоятӥськом. Шаерамы нимысьтыз коллегия кылдытэмын. Со огазея Эскеронъя кун комитетысь, выт бичанъя инспекциысь, выт бичанъя полициысь, милям управлениысьтымы ужасьёсты. Вераны кулэ, Удмурт Республикая валтӥсь федеральной инспектор Сергей Чикуров вазиськиз вал, коллегиысь потыны курыса. Нош ми нокыӵе законэз но ум тӥяське ук. Дэмен ужаса, уно ужпумъёсты ӝог но пайдаё быдэстыны быгатӥськом. Асэныз валтӥсь инспекторен но огкылысь ужаны тыршиськом.

- Озьыен, тӥ федерацилэн ёзъёсаз пыриськоды. Нош республикалэн кивалтӥсьёсыз ласянь зӥбон учыръёс уг луыло-а?

- Таӵе учыръёсты уг тодӥськы. Федеральной ёз луиськом бере, республикалэн кивалтӥсьёсыз милемын косъяськыны уг быгато. Собере вань на ук ведомствоос пушкын эскерон но. Шуом, соиз яке таиз министерство ачиз ик аслэсьтыз коньдонэн герӟаськем югдурзэ но ужпумъёссэ чакла.

- Предприятиез яке учреждениез эскеремды бере люкам материалъёстэс кытчы ыстӥськоды?

- Материалъёсмес келяськом вылӥязгес ёзэ. Шуом, эскерим республикаысьтымы Тазалыкез утёнъя министерствоез, документъёсмы кошко Россиысь Тазалыкез утёнъя министерствое. Куддыръя ужпумез Правительствоын но ӝутӥськом. Тани Культурая министерствоын кылдэм югдурез Правительствоын но учкылӥм. Татын уксё туж эрико берга вылэм. Нош мугез солэн туж огшоры: азьвыл министр вань финансовой законъёсты тодылымтэ, валтӥсь бухгалтер таӵе югдурез ас палаз куасалтэм, министерство чотын кунгож сьӧртӥ юмшам. Уксёез отчы-татчы пазям. Ззмзэ верано ке, коллективлэн ужамез туж юн герӟаськемын валтӥсь бухгалтерен, солэн тодон-валанъёсыныз. Пӧртэм интыосы вуиськод но одӥг кадь тырмымтэосты адӟиськод: бухгалтер трос пукыны, вань ужзэ йылаз-пумаз вуттыны уг быгаты яке уг тыршы. Озьы суп-сап лэсьтэм документация секыт югдуре вуттэ. Нош со понна кыл куто кивалтӥсь но валтӥсь бухгалтер.

- Бухгалтер азе сыӵе бадӟымесь куронъёс пуктӥсько бере, иське, бухгалтер луыса вордӥськоно?

- Озьы, дыр. Бухгалтерын котькудӥз ужаны уз быгаты. Со трос тодыны, тодон-валанзэ будэтон бордын ялан ужаны кулэ.

- Николай Иванович, мае секытгес эскерыны, городэз-а, гуртэз-а?

- Городэз. Отын адямиос шаплыесьгес. Олокыӵе но амальёс шедьто, кыл кутонлэсь пегӟон понна.

- Вераны быгатӥськоды-а ни, кӧня коньдон берыктӥды туэ?

- Коньдонээ берыктон - туж секыт уж. Кун казнае, шорлыдын вераса, выльысь вуэ на ог 33 процентэз ышем коньдон. Тани туэ палар куспын шараям 66 миллион манет тус-тас карем уксёез. Нош берыктыны быгатӥм 20 миллион манетэз. 170 мурт кыл кутон улэ кыскемын.

- Кӧня ке ар талэсь азьло шаермылы бадӟым ыштон ваиз вал Сиён- юонъя корпорация, соку республикалэн уно коньдонэз чиптэм-чаптэм быриз. Солэн пытьыосыз шедьтэмын-а?

- Чылкак паймоно, коньдон кытчы гинэ кошкымтэ: Москвае, Приморьее... Уксё басьтэм данакез фирмаос быремын. Ма, адямиоссэ но шедьтыны уг луы ни. Озьы коньдонэз берыктыны луонлык ӧвӧл. 90-тӥ аръёсы югдур туж секыт вал. Уно коньдон тус-тас луиз. Туала вакытэ югдур умояз, коньдонэз кун ласянь эскерон тырмыт мынэ.

- Николай Иванович, тӥляд ужды бадӟым коньдонэн герӟаськемын. Ревизорьёстэс кышкатъян учырьёс уг луыло-а?

- Луыло. Олокызьы но кышкатьяло, телефон пыр но. Югдур сыӵе бере, ужасьёсмес объектъёсы огназэс ум ыстылӥське. Собере, ӵем дыръя ми правоез утись ёзъёсын ваче ужаськом.

- «Ревизор» кылэз кылыса, соку ик Николай Гогольлэн таӵе нимын ик тодмо произведениез тодэ лыктэ. Отысь геройёс ревизорлэсь курдало, солэсь вуэмзэ куалекъяса возьмало. Зэмзэ ик-а, эскерись мурт сыӵе кышкыт, сямызъя лек луэ?

- Мон озьы ӧй шуысал. Ревизор но огшоры адями ук. Кинэ ке эскерыны лыктэ ке, со секыт югдур кылдытыны кулэ ӧвӧл, валэктыны-юрттыны тыршоно. Йыртэмамез шедьтӥськом ке, соку ини югдур мукет сяменгес азинске. Зэм, таӵе дырья но чакласьком на ай, адями янгышаз тодымтэеныз-а, яке юри-а. Туала вакытэ законодательство туж ӵем вошъяськылэ. Куд-ог документъёсты интыосын тодыса но уг вутто. Соин ик мон юнме уг шуиськы: бухгалтер тодон-валанзэ будэтон бордын ялан ужаны кулэ. Тани подоходной выт басьтонын кыӵе гинэ аспӧртэмлыкъёсыз ӧвӧл, соосты возьматон понна алфавитын буква гинэ но уг тырмы. Котькудзэ рос-прос тодытэк но валатэк, кызьы ӟеч ужалод.

- Шаермылэн ёросъёсаз удыстэс кызьы радъяськоды?

- Сюмсиын, Ярын но Гракын сяна, ваньмаз ёросъёсын быдэн одӥген ревизоръёсмы вань. Ёрос администрациос соослы нимаз инты висъяло. Объектъёс трос ӧвӧл ке но, котькуд ревизорлы сюлмаськон тырме. Солы син шораз пӧртэм удысъёсты возёно бере, трос тыршоно, тодон-валан люкано луэ. Мар шуод, огназы ужало бере, куддыръя дисциплина тӥян учыръёс но луо. Тани таӵе учыр тодам лыктэ. Одӥгаз ёросын мӧйызэ ужасьмес мозмытӥм, угось со аттестациез ӧз ортчы вал, вылӥ дышетскемез но ӧй вал. Интыяз егит муртэ пуктӥм. Малпам: йӧназ адями, университетэз йылпумъямын. Нош югдур чылкак мукет пала берытскиз. Огвакытэ выль ужасьмес воксё ыштӥм. Ужан интыяз уг ик вуылы, сое нокызьы шедьтыны ум быгатӥське. Берлогес тодӥм ини: уже ветлытэк, дораз пуке вылэм. Ма карод, люкиськоно луиз сыӵе муртэн. Нялтас вераны кулэ, ваньмыз ужасьёсмы экономикая дышетскон заведениосты йылпумъямын.

- Нош асьтэлэн дышетскемды кыӵе?

- Пичи дыръям военной финансист луэме потэ вал. Тятяелэн матысь эшез сыӵе службаын вал. Но малпанэ, кызьы адӟиськоды, огласянь гинэ быдэсмиз. Школаез йылпумъяса, Чувашиысь коньдон ужпумъёсъя техникуме дышетскыны пыри. Отчы газетын печатлам ялонъя мынӥ. Кыӵе газет вал меда со? «Советская Удмуртия», дыр, сое семьяямы ялан басьтылӥм.

Техникумез йылпумъяме бере одӥг нунал но шутэтскыны ӧй быгаты. Выпускной балысь ик, оло, армие басьтӥзы. Службаме Байконурын 1966-тӥ-1968-тӥ аръёсы ортчытӥ, одӥг космонавтэз но адӟыны ӧз кылды.

Армиын но мон казначей вал. Со сяна, олокыӵе но ужъёсты быдэсъяно луылӥз. Суредаськыны ӧжытак быгатӥсько бере, суреданы йӧндыри. Полкмы милям сокугес гинэ кылдытэмын вал. Дӥськут но ӵыж выль висъязы. Данаксэ сое тупатъяно вал. Озьы тӥни вуриськиськиз но, ява. Та ужлы пичиысен ик дыши, дорамы уго вуриськон машинамы вал. Армиысь бертыса, ӵош дышетскем эшеным пумиськыны кылдӥз. Нылаш Ижын КРУ-ын ужа ни вал. Ойдо, пе, татчы лыкты. Мон кема малпаськыса ӧй улы, куриськонэн вазиськи. Кутӥзы. Ужанъям выльысь дышетскыны малпай. Заочной амалэн дышетскыны пыри Казаньысь кондон ужпумъёсъя институтэ. Сое йылпумъяме берегес ик таӵе учыр луиз. Районэ Балезиноысь тылпу кысӥсьёсты эскерыны ыстӥзы. Отын уно тырмымтэосты шараяй. Кивалтӥсьсэс ужысьтыз сэрпалтӥзы. Нош монэ республикаысьтымы тылпу кысонъя управление ужаны ӧтизы, коньдон ужпумъёсъя ёзэн кивалтыны оскизы.

Отын кема ик ужаны ӧз кылды. Монэ выльысь КРУ-э лӧпкытъяны кутскизы. Тылпу кысӥсьёслэн кивалтӥсьсы Борис Павлович Власов туж шумпотэ вал, мон дорысьтыз кошкыны уг быгаты ни шуыса. Со вакытэ угось тылпу кысонъя управлениысь, армиысь кадь ик, огшоры, куриськон гожтыса гинэ кошкыны уг луы вал: яке адямиез улляло, яке переводэн мукет интые выжто. Борис Павлович туж паймиз: коньдон ужпумъёсъя министр Пушин но югдурез утёнъя министр Челнов одӥг кылэ вуиллям, монэ переводэн КРУ-э поттӥзы. Татын отделэн кивалтыны кутски.

Нош 1982-тӥ-1992-тӥ аръёсы Профсоюзъёслэн кенешазы ужаны кылдӥз. Партилэн ыстэмезъя отчы мыноно луи. Огнуналэ КПСС-лэн обкомаз ӧтизы: коньдон ужпумьёсъя ёзлы кивалтӥсь, пе, кулэ. Ма карод, соглаш кариськоно луи, ужаны кутски. Соберегес ик документъёсме Москвае ВЦСПС-э келяллям. Облсовпрофлэн со вакытысь кивалтӥсезлы Виктор Михайлович Свиридовлы зол йӧттӥллям отын, кызьы, пе, таӵе интые партие пырымтэ адямиез кутӥды. Виктор Михайлович пӧяно луэм, со, пе, милям та вакытэ кандидат ни. Озьы мон партие пыри. 1991-тӥ арын йылпумъяй Москваысь Ужья но улон- вылон кусыпъёсъя академиез. Та дышетон заведенилэн нырысетӥ выпусказ пырисько. Отчы шедён понна республикаямы бадӟым конкурсэз ортчи. Тодон-валанзэс будэтыны мылкыд карисьёс трос вал. 1996-тӥ арысен КРУ-ен кивалтӥсько.

- Асьтэос экономист бере, семьяяды но данак, дыр, экономистъёс?

- Нылы - экономист, пие али дышетске ай. Кузпалы Елена Васильевна выт бичанъя инспекциын ужа. Сое 7-тӥ классысен тодӥсько. Арлыдын мон бадӟымгес ке но, ӵош дышетским. Уд но оске, оло, пичи дырьям туж урод дышетски. Одӥг классын кык ар но пукеме вань. 5-тӥ классын дыръям гинэ визь пыриз. Школаын дырьям математикаез туж гажалляй. Секыт йӧтӥз англи кыл.

- Вордӥськем палъёсады ӵем-а вуылӥськоды?

- Вордскем гуртэ ӧвӧл ни. Солэн нимыз туж чебер вал - Шудо, Кизнер ёросын. Озьы кылдӥз: мон родной мамаен будэмын ӧвӧл. Арес но кӧня ке дыръям ай мамаелэн сузэрезлы вордосэ сётэмын. Чик но уг жаляськы, озьы луиз шуыса. Кыкетӥ анай-атае Александра Григорьевна но Павел Дмитриевич туж мыло-кыдо адямиос вал. Жаль, улонысь вазь кошкизы. Анайлэсь (озьы шуисько вал Александра Григорьевнаез) одӥг секыт кылэз но кылэме ӧвӧл. Семьязы соослэн узыр улэ вылэм. Вуж Бодьяын магазин возиллям. Коллективизация дыръя ваньзэ талаллям. Анае туж визьмо вал. Нош родной мамае та вакытэ улэ сузэре дорын Кизнер ёросысь Копкиын. Солы 82 арес ни. Нокыче но йыркуре ӧвӧл, со монэ будэтыны палэнэ сётӥз шуыса. Мукет сузэр-вынъёсыным кусыпъёсме ӧй ышты. Ми трос кузя: 3 сузэре, 3 братэ.

- Николай Иванович, Шудо гуртын вордскем мурт, тӥ асьтэлы шудо потӥськоды-а?

- Шудо потӥсько.

- Удмурт калык - сюлмо, ужез яратӥсь. Нош бускельёсынымы ӵошатӥськод ке, мылкыд ик куашка: трос тодметъёсъя, шуом, улонмылэн ӟечлыкезъя но, соос асьмелэсь трослы азьпалан вамышъяло?

- Зэмзэ верано ке, бускель улосьёс, кылсярысь, Татарстан ик, ӟечгес улӥзы данаксэ вытъёссэс асьсэлы кельтыны быгатэменызы чотын. Асьмелэн озьы ӧз пӧрмы. Му вӧй поттэм понна коньдон но Москвае кошкылӥз. Улосъёс куспын кылдэм пӧртэмлыкез Москва та вакытэ быдтыны выре. Тӥ тодӥськоды, луоз, берло дыре кутэм решениосья улосъёсысь данакез вытъёс Центре кошкозы. Отын чаклалозы ини, кудӥзлы субъектлы кӧня коньдон висяно. Ӟеч но тыро улон понна шаермы ачиз коньдон поттыны, инвестициос утчаны кулэ. Али асьмеос секыт югдурысь каллен-каллен потӥськом ни кадь. Республикамылэн Президентэз но трос тырше, Москваын сое дуньяло, верамзэ лыдэ басьто. Мукетсэ но пусйытэк кельтэме уг поты: тупатоно ужбергатон удысын югдурез. Ӵапак татын ук лыдэ басьтымтэ трос коньдон берга, вытъёс уг тырисько. Озьы кун казна уно ыштонъёс адӟе.

- Берло дыре экономистъёс верало: Россилэн экономикаез ӝутскыны кутскиз, пе. Озьы-а?

- Озьы. Азьланезлы осконъёс умоесь. Россилэн но улосъёслэн бюджетъёссылэн кусыпъёссы радъяськизы ни. Табере трос ужано луоз доходьёс люкан бордын. Нош улосъёсысь но интыосысь бюджетъёслэсь кусыпъёссэс азьланьын тупатоно ай. Тросэз ужпумъёсмы герӟаськемын депутатъёсмылэн ужаменызы. Котькудӥзлэн бырйисьёсыз азьын умой адӟиськемез потэ. Документ куто, нош уксё ӧвӧл. Табере сыӵе законъёс уг кутӥсько ни.

Источник:

Лебедев Н. И. Шудо гуртэз кузьмаз шудо сюрес / Н. И. Лебедев ; записала Юлия Александрова // Удмурт дунне. - 2001. - 2 нояб. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"