Лебедева Любовь Аркадьевна: различия между версиями

Материал из Воршуда
Перейти к навигацииПерейти к поиску
 
м (1 версия импортирована)
 
(нет различий)

Текущая версия на 14:42, 6 февраля 2015

Мылкыдэз шыкысэ уд ваты[править]

Вазенгес Алнаш ёросын котькуд тулыс Ашальчи Окилы сӥзем фестиваль ортчылӥз. Быдэс шаерысь крезьгурчиос люкаськылӥзы, асьсэлэсь пӧрам выль кырӟанъёссэс сцена вылын нырысьсэ кырӟаллязы. Ӵапак сыӵе фестивале пыриськылӥз но трос пол лауреат луиз Якшур-Бӧдья ёросысь Ӵошкыт гуртысь крезьгурчи но кырӟась Любовь Лебедева. Нокинлы тодмотэм кышномурт ваньзэс паймытӥз шулдыр кырӟанъёсыныз.

Та вакытэ солэн сюлэсь ятыр кырӟанэз. Бадӟым шыкысэ ватыса уг возьы сое, ас быгатэмезъя калык пӧлы поттыны тырше. Нош юртто солы аслаз коллективъёсыз. Туннэ нуналлы Любовь Аркадьевна куать коллективен кивалтэ. Ваньмыныз бадӟымесь азинсконъёс басьтэ. Со – Удмурт Республикаысь культура удысысь дано ужась. Бакча котыраз-а, уж дураз-а берга, семьяеныз-а шутэтске – Любовь Аркадьевна ялан кырӟа. Крезьгурлэн тулкымъёсыз сое бурдъяло но ӵуказе нуналлы выль кужым сёто.

- Любовь Аркадьевна, тодады вайиськоды на-а ужаны кутскем аръёстэс?

- Сыӵе шулдыр вакытъёсты вунэтод шат. 1974-тӥ арын вал со. Ижысь культурая училищеын дышетскыкум, гуртысьтымы клубын практикаме ортчи, кельшиз. Вордскем гуртам мынэсьтым бертэмме гинэ витиллям, шӧдске. Угось ӵапак со вакытэ Ӵошкытысь культурая юртын тыро-пыдо ужасьёссы ӧй вал. Дышетсконме йылпумъяса, клубен кивалтӥсь но художественной руководитель луыса ужаны кутски. Со дырысен одӥг интыям 22 ар ужай.

Клубын ужаны кутскеме бере ик бадӟым хор кылдытӥ. Гурт калык лякыт сямо, котькуд вазиськемелы юрттыны дась вал. Репетицие шуыса ӧтьыку но, чаклам дырлэсь вазь ик клубе люкаськылӥзы. Серекъяса, тӧл ӵыжаса нокин но ӧз ветлы. Кырӟаны быгатӥсьтэм адямиос но клубе дыртӥзы. Сыӵеосты мон трос калыкен ӵош яке шыпытгес куараен кырӟаны косылӥ. Шаплыоссэгес кылбур лыдӟыны яке серемес сценкаосын шудыны кури. Адямилэн ассэ калык азьын возьматыны мылкыдыз вань бере – мед кырӟалоз.

Одӥг хорен гинэ ӧй буйгатскы. Кылдытӥ на нылкышно но воргорон ансамбльёс, нылпи садэ ветлӥсьёсын – «Весёлые нотки», школаысь нылпиосты но палэнэ ӧй кельты. Витьлэсь ӧжыт ӧй вал коллективе.

- Бадӟым хордылы клубады интыды ӟоскыт ӧз поты-а?

- Ваньмы дэмен люкаськыку, интылы ёрмиськомы вал. Озьы ке но, ӝожтӥськисез ӧй вал. Пичи клубын котьку но трос калык люкаськылӥз. Шулдыръяськон юртмылэн пушкыз куинь висъетлэсь вал. Котькуд нунал репетициос мынӥзы: одӥгаз - кырӟазы, кыкетӥяз – эктӥзы, куиньметӥяз – серемес сценкаос пуктыны дасяськизы. Бадӟым, кузь кыстӥськись спектакльёсты но гуртъёсысь сцена вылын пуктылӥмы. Коридорын но мӧзмыса ӧз улэ. Мылкыдоос бильярдэн шудӥзы.

Ужаны кутскыса, гурт калык клубе кыстӥськыны кутскиз. Сьӧрлось гуртъёсы концерт возьматъяса ветлыкумы, одно ик кык машина висъяны курылӥ. Милесьтым быгатонлыкъёсмес учкыны трос калык люкаськылӥз. Якшур-Бӧдьяысь сяна, мукет ёросъёсысь гуртъёсы но вуылӥмы. Уйшор уин бертылӥмы. Капчи мылкыдо адямиос ужаны но вуизы, пайдаё но шутэтскизы, нылпи но вордӥзы.

- Культура удысысь пӧртэм интыосын ужаны кылдэмын. Кудӥз тужгес но мылкыддыя вал?

- Огинтыям пукыны дышемын ӧвӧл, выльзэ утчасько, кылэм-адӟемме улонэ пыӵатыны тыршисько. Ӵошкытын ужакум ик, мынам коллективъёсы ёросын но шаерын ортчылӥсь конкурсъёсын вормисе потылӥзы. Тыршемелэсь емышъёссэ адӟыса ёросысь кивалтӥсьёс черкогуртэ ужаны ӧтизы. Бӧдьяла ужаны мыныса но, вордскем гуртысьтым коллективъёсме ӧй аналты. Со дырысен ялан кык но солэсь трос интыосын ужасько. Капчи мылкыдо адямиосын пумиськылӥсько, шуг-секытъёс кылдыку, юрттыны кизэс мычо. Бен, пӧлазы вань вожъяськисьёсыз но. Мынам тросэтӥ интыын ужамелэн барышез курег гадёнысь бичам выллем луэ. Туж кельше художественной руководительлэн ужез. Калыклы шулдыр мылкыд кузьманы быгатӥсько ке, мон понна со вераны луонтэм шумпотон луэ. Кунэрес ымнырын сцена вылын трос уд кырӟа, учкисьёсты но уд серекъяты.

- Туннэ нуналлы кӧня коллективды?

- Ваньзэ вераны кутски ке, одӥг киысь чиньыос узгес тырме. Та вакытэ куать коллективе: Якшур-Бӧдья РДК-ын «Ялыке» но воргоронъёслэн ансамбльёссы, «Любавушка» калык ансамбль, Ӵошкыт гуртысь школаын пиналъёслэн хорзы вань. Ужасько нимысьтыз солистъёсын, «Утренняя роса» но «Ожгарчи» ансамбльёс вань. Со сяна, ёрос центрысь нылпи творчествоя юртын кружокъёс нуисько. Ваньмыз чыры-пыры кадь, нош быдэстоно ужез ӝужыт гурезь быдӟа.

Та вакытэ валтӥсь уже Ӵошкыт гуртысь школаын луэ. Гуртысь пиналъёсын кыкетӥ арзэ гинэ кырӟаськомы, нош вормонъёсмы дурыныз пачылало. «Ожгарчиысь» пиосын Ижын ортчем «Мужское братство» фестивале ветлӥмы. Милесьтым одӥгзэ кырӟанмес президентской концертэ басьтӥзы. Пиос понна со вераны луонтэм шумпотон вал.

- Коллективъёстэс калыке поттон вылысь чебер дӥськут но кулэ.

- Таиз сюлмаськонэ тужгес бадӟымез луэ. Сцена вылэ потэм калыкез, нырысь ик, дӥсезъя пумитало. Улонлэсь бере кылёнтэм вылысь дӥсьмес но ялан выльдыны тыршиськом. Шонерзэ верано ке, вань уждунэ мынам выльысь сцена вылэ ик кошке. Со сяна, дорысь но ватсано луэ на. Концертэн потыкумы, бадӟым коллективмылы ёросысь дӥськут утчано луисько, нош покчи пиналъёсын кырӟан-веран понна асьмеос сӧзнаськомы яке гуртысь киужлы усточиосты вурыны косӥськомы. Чебер дӥськутсы дыръя покчи артистъёслэн кырӟаны мылкыдзы ик воштӥське. Со сяна, трос коньдон кошке на транспортлы, фонограммалы, «минусовкаослы». Аслам кырӟанъёсыным кык кассета гожтӥ, вылысь поттыны кулэ вылэм но ваньмыз коньдон борды пыкъяське.

- Нош выль программаос кылдытыны кытысь сомында малпанъёс йырады лыкто?

- Чагыр экран пыр вазенгес «От всей души» передача возьматыны кутскизы. Мон но сое ас ужам кутоно кариськи. Куртчум, Ӵошкыт но Лудошур гуртъёсын ожысь но ужысь ветеранъёс понна, нош соос 102 кузя вал, шулдыр концерт возьматыны дасяськи. Нокинэ но обидёнтэм вылысь кема малпаськоно луи. Вить ар дасяськыса гинэ, огинэ люканы быгатӥ. Сӥлы кареммес али но шуныт кылъёсын тодазы ваисьёс вань. Та пумиськонэ лыктэм пересьёслэн туж адскемзы потэ вал нырысетӥ колхоз председателен. Архивысь пӧртэм документъёсты бугыръяса, шедьтӥмы арлыдо воргоронлэсь адрессэ, куное ӧтьылӥмы. Гуртоосын пумиськонэ озьы ик вуылӥз шаерысьтымы тодмо крезьгурчи Геннадий Корепанов-Камский.

Выль программаос сярысь верано ке, мон клубын яке школаын ужаны вордскемын, дыр. Телевизор учкыны уг ваньмиськы, нош кыӵе ке смотръёсы яке концертъёсы ветлыкумы, мынам йыры нош ик ужа. Концертъёсы ваньмыз шутэтскыны мыно ке, мон ужасько. Тэк пукытозь, кылэм-адӟемме листок вылэ гожтыса кельтӥсько.

- Нырысетӥ крезьгурды ку кылдӥз? Кылбурчиос пӧлысь кинэ тужгес «яратӥськоды»?

- Нуны веттан гур вал со. Пиосме кӧлтыны выдтыкум, котьку кырӟалляй. Озьы выль гуръёс кылдӥзы. Куинь пие будытозь, крезьгуръёсы трос люкаськизы, калык пӧлы поттыны ялан кепырай. Аръёс ортчыса гинэ, аслэсьтым кырӟанме гуртысьтымы нылкышно ансамблен возьматӥмы. Гурт калыклы кельшиз, кичабонъёсын пумитазы. Мукет концертъёс дыръя но мынэсьтым кырӟанме курыны, крезьгурчиеныз тунсыкъяськыны кутскизы. Аслэсьтым фамилиме веракум кепырай, пӧсьвуаськем кадь луи. Со дырысен ансамбльлэсь кивалтӥсьсэ крезьгурчи шуыны ӧдъязы.

Мынам мылкыдылы матын луо: Флор Васильев, Олег Поскрёбышев, Галина Романова, Татьяна Чернова, Людмила Кутянова но Алла Кузнецова, Андрей Самсонов но мукет кылбурчиос.

Якшур-Бӧдьяын кема аръёс ӵоже «Ошмес син» огазеяськон ужа. Ёросысь кылбурчиос, крезьгурчиос, суредасьёс асьсэ ужъёссэс эскеро но гуртъёсын улӥсьёслы тодматыны дырто. Ёросамы ортчем «Гербер» шулдыръяськонлы но милемыз кырӟан кылдытыны косӥзы. Озьы ик ёросамы улӥсь офицеръёсты огазеяны малпамы. Соос понна нимысьтыз ӝыт ортчытӥмы, ачим кырӟан малпай. Ваньмызлы кельшиз. Та огазеяськон пыр ог-огмылы эш шедьтӥськомы но выль ужъёс пӧрмытӥськомы.

- Кыӵе дыръёсыгес выль крезьгурды кылдэ?

- Нимысьтыз ноку но уг пукиськы. Соос асьсэос дорам лыкто яркыт шундыен, шулдыр ӵукнаен, тылобурдо чирдэмен, куазь зорен, лымы пельтэмен… Одӥг пол сайкай - шулдыр ӵукна! Соку ик украин поэтлэн кылбурезъя кырӟан гожтӥськиз. Тросэз соос маке ужан сямен кылдо: бусыын пудо возьмаку, бакчаын уриськыку.

Одӥг пол ожысь ветеранлэн пиез лыктӥз но шуэ: «Что-то отец сдаёт…» син шорам соку ик йӧтӥз Флор Васильевлэн «Отцу с трудом даётся каждый шаг» кылбурез. Пӧрмиз ветеранъёслы кырӟан.

Уд но оске, дыр, выжыкылын сямен, мынам но крезьгур кузьмась интые вань. Со – Ӵошкыт гуртысь вуж креслое. Отчы пукыса, ваньмыз капчиен пӧрме.

- Нош кырӟан мылкыд кин пыӵатӥз?

- Пичи дыръям ик синмаськыса учкылӥ гуртысь кырӟаны быгатӥсь адямиос шоры. Дорамы куноос пыро ке, соослэсь зыл-зыл кырӟамъёссэс гур вылын пукыса кылзылӥ. Муми-бубиелэн, бадӟым апайёсылэн но шулдыр куараоссы, капчи мылкыдзы вал. Ас быгатонлыкъёссэс шыкысэ ӧз ватылэ. Соос выжые ик мон но мынӥськем, шӧдске. Ма, собере мынам анае ӟуч вал, вань ӟуч кырӟанъёсты ӟеч тодылӥз. Мон но со сьӧры нёжъялляй. Удмурт гуртын улыса, ваньмы ми удмуртомимы. Собере милям семьямы нырысетӥосыз пӧлын телевизор басьтӥз. Котырысь пиналъёс ми доры люкаськыло вал. Телевизор интые мон соослы концерт пуктылӥ, Валентина Толкунова яке Людмила Зыкина кариськыса.

Нош бадӟым сцена вылэ 5-тӥ классын дышетскыкум нырысьсэ потай. Со нуналэз туннэ кадь ик тодӥсько на. Сирота кылем ныллэсь кырӟанзэ быдэстоно вал. Со кырӟанысь кылъёс сюлэмме бугыртӥзы, жаль потыса, быдэс кырӟанэз бӧрдыса быдэстӥ, нош сцена вылысь ӧй пегӟы. Тодӥсько ни вал, номерез йылпумъятэк кошкыны уг яра шуыса. Соин но, дыр, али но ялан бӧрдӥсько.

- Малы?

- Кыӵе ке праздниклы сценарий гожтӥсько ке, мон синкыли пӧлы выйисько. Ваньзэ кырӟан-веранъёсыз, ас пушкытӥм поттытэк, сцена вылын возьматыны уг быгатӥськы. Мынам эшъёсы бӧрдэмелы дышизы ни. Серекъяса верамзы но вань: юбилеедлы, пе, тазъёс кузьмалом. Аръёс асьсэлэсь басьто. Залын пукисьёс синвуаськыку, аслам но синкылиосы быльырало. Мукет ласянь шумпотӥсько, мынам кырӟанэ учкисьёслэсь мылкыдзэс бугыртыны быгатэ шуыса.

- Улон воштӥськемъя, сьӧр гуртэ но потаны луонлыкъёсты ӧвӧл ни, дыр.

- Ма веранэз. Та вакытэ ваньмыз коньдон вылэ пыкъяське. Калык но воштӥське. Дунтэк ветлэмез нокинлэн но уг поты. Табере сьӧр гуртъёсы но шер потаськомы. Вылаз ик оптимизация шуонэн сэрен пичи гуртъёсысь троссэ клубъёсты тунгоназы яке мукет учреждениосын огазеязы. Гуртъёсысь дано интыосыз юнме быдто кадь. Милям гуртамы но – вырйылын - бадӟым клуб сылэ вал. Юртэз тарказы. Котькыӵе но дыръёс луо, бер ӝыт, гуртэ бертыку, клубысь тыл быдэс гуртэз югдытылӥз. Клуб бервылын табере шал-шал, пеймыт.

Туж жаль пото пичи гуртъёсын улӥсьёс. Ог-огенызы адскыны луонлыкъёссы ӧвӧлэн, соос лумбытэн доразы пуко. Кемалась ик ӧвӧл, бырон калэ вуэм гуртъёсы потамы, ас быгатонлыкъёсынымы шумпоттӥмы. Возь вылын яке ульча шорын концерт пуктылӥмы. Гуртоос шумпотэменызы бӧрдо.

- Быдэс улонды сцена вылын ортче ни, семьяды нош та шоры кызьы учке?

- Семьяе ке монэ ӧз валасал, кырӟаса но ӧй ветлысал. Шумпотонэ – семьяе. Ваньмы ми кырӟаськомы. Кузпалылэн Михаил Михайловичлэн инмарен сётэм быгатонлыкъёсыз трос. Куараез жингыр вазе, гитараен, домраен но арганэн шудэ, чебер гожъяське.

- Пиосты но тӥляд пытьыдыя вамыштӥллям кадь.

- Пичи дырысенызы ик соос сцена вылын будӥзы, шуыны луоз. Кыкез кырӟазы ке, шоретӥез эктӥз, сценкаосын шудӥз. Ваньзы сямен кыӵе ке инструментэн шудо. Семьяенымы ӵош пыриськимы шаерамы ортчись «25 пӧлысь кин?» конкурсэ, лауреатъёс луимы.

- Кыӵе сямо луыны кулэ клубын ужась?

- Нырысь ик, чидась, верам кылыдлы кузё луоно. Одӥг-кык пол калыкез пӧяд ке, оскемысь дугдозы, нош мыным калыкен ужано. Кӧня ке ар арлыдоосын ужай. Пенсионеръёсын ужасьёслы ваньзылы мон памятник пуктысал. Соосын ужан – адямилэсь чиданлыксэ эскерон выллем. Ваньзэ дыраз лэсьтозы, репетицие но вазь ик лытозы, нош кырӟаны кутскиськомы но кылъёссэс вунэтэмын луо. Котькудӥзлэн аслаз сямыз, куатаськонэ но ӝог усё. Со понна, покчи пиналъёсын ужаса, воксё мукет дуннее вуэм кадь потоно.

- Ӟеч тыршемды кун наградаосын пусъемын.

- Калыкен ужан ваньмызлы капчиен уг сётӥськы. Шумпотӥсько, мынэсьтым тыршемме синйылтӥсьёс вань шуыса. Трос пол депутатэ бырйылӥзы. 1987-тӥ арын ӟеч ужъёсы пусъемын СССР-ысь культурая министерстволэн гадьпусэныз. Умой ужаме понна 1996-тӥ арын мынам туспуктэме Ижысь данъян пул вылын вал. «Удмурт Республикаысь культура удысысь дано ужась» ним, нош 2004-тӥ арын Удмурт Республикаысь Президентлэн киысьтыз Данъян грамота басьтӥ.

- Кырӟась мурт, пе, шудтэм луэ. Тӥ шудо-а?

- Мон асме шудтэм ӧй шуысал. Семья, пиосы вань, внучкае будэ, сюлэмыя уже. Бен, семьяме дуно кузьымъёсын шумпоттыны уг быгатӥськы ке но, туннэ нуналлы ваньмыз вань шуысал. Солэсь но ӟеч улон кытысь шедьтод на. Кимы-пыдмы быдэс, ӧлексы вордскемын ӧвӧл. Озьы бере, та улонлы асьмеос шумпотыны кулэ. Шудмы но дурыныз пачыла, кузь коньдон сьӧры уйиськонъямы, ӵем дыръя сое ум но синйылтӥське.

Источник:

Лебедева Л. А. Мылкыдэз шыкысэ уд ваты / Л. А. Лебедева ; записала В. Емельянова // Удмурт дунне. - 2007. - 20 июля. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"