Лебедева Валентина Ивановна

Материал из Воршуда
Версия от 14:42, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Адӟон[править]

В. И. Лебедева

Валентина Лебедева – Удмурт Республикаысь дано дышетӥсь, Россиысь дышетон удысысь отличник. 41 ар ӵоже дышетӥз покчиосты. 18 арзэ «Удмуртия» издательствоын нылпи литературая рецензент вал, ужаз покчиослы удмурт кылын букварь поттон бордын. 1966-тӥ арын Валентина Ивановна пусъемын Ужысь Горд Знамя орденэн.

Ужысь ветеран, Шаркан ёрослэн дано адямиез вань улытозяз калык пӧлын валэктон уж нуиз. Али но Валентина Ивановна улонлэсь бере уг кыльы, пӧртэм газет-журналъёс лыдӟе. Пельыз кылымтэен, калык пӧлы уг пота ни, но аслэсьтыз мылкыдъёссэ, тодэ ваёнъёссэ гожъяса кельтэ. Дэмласьком отысь оглюкетэныз тодматскыны.

Шушань

Мынам улонэ пичиысен ик туж шукырес но шимес вал. Али аслым ачим шуисько: кызьы тон ваньзэ сое чидад, вормид, ӧд лекомы?

Вордски 1929-тӥ арын Шаркан ёросысь Бызин гуртын. Вить нылпи пӧлысь мон берпуметӥез. Пичи дыръям чачаен (оспа) висиськем. Огвакытэ гуртысьтымы 23 пиналлы паласькем со, 3 кузя гинэ луло кылиськеммы. Висён мыным синъёсам сётэм.

Пичи дыръям ӧй валалля уродме. 3-4 арескам потӥ ульчае нылпиосын шудыны. Монэ адӟизы но, киязы сюй, луо, векчи кӧльы кутыса, быдэс уллёен дорам лыктӥзы. Кесясько: шушань, косой син… Йырысеным пыдозям сюен пазязы.

Ӧй но бӧрды, ӧй но кесяськы, бызьыса пыри азбарамы. Ӟус вылысь ведраосын ву пуктэмын. Чум бордысь тусез кыскаса вуттӥ но, ву поныса, отын пыласьки, дӥсьме но миськи, куасьтӥ. Со луиз нырысетӥез но берпуметӥез шудыны потаме. Аслым уж шедьтӥ. Мамае ӝытъёсы вуриськыса пукылӥз. Кылем-мылем басма юдэсъёслэсь мунёос лэсьтылӥ, ачим ик дӥськут вандылӥ соослы.

Тит нюнюе мыным удмурт книгаосты лыдӟылӥз, пуштроссэ вераны косылӥз. Собере лыдӟиськыны дышетӥз. 5 арескам шалтыр лыдӟиськи ни. Школае мынытозям, сюозь лыдъяськисько но вал. Тит ик монэ Фима шуиз. Но дышетскемме адӟыны ӧз кылды яратоно нюнюелы: шуак кулӥз.

Нырысетӥ классын ляб адӟисьёс кык кузя луимы: мон но Табань гуртысь Катя. Дышетӥсьмы кыкнамес нырысетӥ парта сьӧры пуктӥз. Катя, оло, мынэсьтым но ляб адӟе вал. Нырысетӥ сентябрь умой ортчиз, гуртэ шумпотыса бертӥ. Мукет нуналаз школае вазь мынӥ, чалмытак пукисько парта сьӧрын. Вуизы Табаньысь пиналъёс. Катя бызьыса дорам лыктӥз но тышка, йырме борддор шоры йыга: малы, пе, таӵе шуш ныл, монэн пукиськод? Мон уг но бӧрдӥськы, уг но пумитъяськиськы.

Дышетӥселы но, мамаелы но ӧй вера та сярысь. Туж потэ вал школае ветлэме. Ӵукналы быдэ, урокъёс кутскытозь, Катя сыӵе «концерт» возьматъяз. Одӥг пол ӵош дышетскись эшмы Валентин ӧз чида. Ну бен йӧттӥз сое пи кужыменыз! Катя класс тыр бӧрдэ. Дышетӥсьмы юамысь, вераз: Валентин, пе, жугиз. Соиз валэктӥз ини малы тышкамзэ. Нош Катя возьыттэк шуэ: малы, пе, сыӵе шуш ныл монэным пуке?

Лидия Дмитриевна Баженова пумитаз вераз: Фима, пе, туж чебер ныл, нош тодӥськоды-а, кыӵе со визьмо? Тӥ слогъёсын лыдӟиськиськоды, дасозь гинэ лыдъяськиськоды, нош Фима библиотекаысь книгаосты лыдӟе, сюозь лыдъяське. Шуак Валентин султӥз но шуэ: мон, пе, Фимаен одӥг парта сьӧры пуксё, нокинлы но сое вӧсь карыны уг сёты. Со нуналысен Валентинэн азь парта сьӧрын 3 ар ӵоже пуким.

Дорен люкиськон

Одӥг нуналэ дорамы вуиз лек тусо воргорон. Мамаелы шуэ: мон но, пе, 5 пиналъёсын пал кыли, ойдо ӵош улом. Мама шуиз, братъёсыным, апаосыным вераськоно. Одӥг нуналэ 2 валэн дорамы вуиз со воргорон. Котырмес поттыло ни. Олокытысь бызьыса вуиз Валентин. Чортӥз пегӟыны. Шуэ, эн, пе, мыны, отын тонэ ултӥялозы, жугозы.

Кыдёке ӧм вуэ пегӟыны, шедьтӥзы. Ур-вар кутӥзы но монэ коробазы пуктӥзы. Валентинэ бӧрдыса кылиз, мон но быдэс сюресме вузӥ. Петунькае вуыса, уйбыт ӧй кӧлы. Мамае буйгатэ, таослэн но урод ӧвӧл, пе, юртъерзы. Пиньыз висемен, одӥгез пизы но ӧз кӧлы со уе.

Корка кузёлэн чебер нылъёсыз монэ лекъяськыса пумитазы, ӧз ик вазьылэ. 3-4 нунал ортчыса, пиньыз висись пи монэн вераськыны ӧдъяз. Тодматским. Пашалы дас арес вылэм, 3-тӥ классэ потэмын. Ыжъёсты но пастухысь пумитаны чортэ, ульчае но ӵош потӥськом. Со ке ӧй луысал, пегӟысал, ӧй чидасал (берло но со мыным котьку дурбасьтылӥз).

1-тӥ сентябре Паша ик келяз школае, 4-тӥ классэ пыртӥз. Нырысетӥ парта сьӧры пукси. Пыриз егит пиосмурт дышетӥсь. Монэ адӟыса, лек куараен вазиз: кытысь, пе, вуид? Кышкаменым вазьыны ӧй быгаты, одӥг ульчаын улӥсь пиналъёс веразы ни. Дышетӥсь шуэ: оло, тон 3-тӥ классэз но пыр потымтэ, пе, ӵуказе ик нырысетӥ дышетӥседлэсь справка вай!

Со нуналэ ӧй ни дышетскы, бӧрдыса гуртэ бертӥ. Мамаелы шуисько, ойдо татысь кошком, аслам дышетӥсеным дышетско. Буйгатӥсь ӧз луы. Ӵукна вазь ик потӥ 7 иськем сюрес вылэ. Жадьытозям бызи. Вуи ведь школаям. Ваньмыз татын тодмо, дуно!

Жингыртӥз урокысь гырлы. Дорам бызьыса вуиз Валентинэ. Укноетӥ, пе, адӟи лыктэмдэ. Шуэ, огнам пукисько, тонэ витисько. Ӵош дышетскем эшъёсы но котыртӥзы, ӟыгыръяло, шумпото, выльысь берытски шуыса. Катя гинэ палэнын сылэ. Дышетӥсе но, монэ адӟыса, ӟыгыръя, веша. Бӧрдыса верай малы лыктэмме. Со буйгатэ: тодысал ке, пе, кошкондэс, справкаез ачим дорады вайысал.

3-тӥ сентябре справкаме сётӥ дышетӥсьлы. Нырысь бамъёсыз, собере пельёсыз гордэктӥзы. Вань предметъёсын отметкаосы «отлично» вал. Дышетӥсьлэн куараез небӟиз, шорам учконэз но воштӥськиз. Нош мон со дырысен малпай: луо пичиосты дышетӥсь, аслам яратоно дышетӥсе кадь – чеберзэ но, шушсэ но, висись-ӧлексызэ но огкадь ярато.

Дышетӥсе дышетскон

Война кутскыса, улон воштӥськиз. 3 ар ӵоже мон классамы староста вал. Кин ке урод отметка басьтэ ке, монэ учительское пырто ни. Огполаз дышетӥсьёс валэктӥзы: ачид, пе, отличница, эшъёсыдлы котькыӵе предметэн валэктыны быгатод.

Учебникъёс уг тырмо. Устной предметъёсъя урокъёс бере дасяськылӥмы: ӵош лыдӟиськомы, тужгес кулэзэ тетраде гожтӥськомы.

Письменнойёссэ, ӵукна 8 часлы лыктыса, доска вылын валэктылӥ. Огпол тятя шуонэ, серем карыса, куаретэ: таиз нылмы, пе, Ленин кадь – школае вазь кошке, гуртэ бер бертэ. Паша пиез пумитаз вераз: со туж умой лэсьтэ, пе, мон но озьы карысал, но уг пӧрмытӥськы.

Сизьым классэз быдтӥ Похвальной грамотаен. Завуч юаз, кытчы, пе, мынод дышетскыны? Дышетӥсе, шуисько. Нош со дэмла медучилищее пырыны: синъёсыд лябесь, пе, дышетӥсьлы туж трос лыдӟоно, гожъяно луэ. Шуисько, асьтэос дышетӥсе дасяды ни, пӧй, монэ. Документъёсме почта пыр ыстӥ Якшур-Бӧдьялась педучилищее. Кутӥзы экзаменъёстэк.

Педучилищеын дэмлало вал институтэ мыныны, конкурстэк, пе, кутозы. Шуи, мыным дӥсяськыны, сиськыны кулэ. 1946-тӥ арын 22-тӥ июне басьтӥ аттестат. Выпускной ӝытэ мурт дӥсен ветлӥ. Семьямы со вакытэ гурт понна самой узырез вал ке но, мон – мултэс пинал. Кыӵе сиеме потыса дышетски, куддыр вазьылыны но кужыме ӧй вал. Мамаелы но шуш нылыз мултэс луиз-а, мар-а.

Ӵуказеяз гуртэ бертӥ но, аттестат басьтэмелы шумпотыса, нырысьсэ шудонэ потӥ. Отысен пумиським Валентинэным. Со шуэ: ойдо, пе, ӵошатом аттестатъёсмес, мон туннэ басьтӥ, выпускной ӝытысь пырак дорад лыктӥ. Китӥмы кутскыса, дорамы мынӥмы. Отметкаосмес ӵошатэмез бере Валентин шуэ: ӵош пукысалмы ке, мынам но таӵеесь ик луысалзы, возьдаськысал тынэсьтыд уродгес дышетскыны. Вераз военной училищее мыныны дасяськемез сярысь. Пыри ке, пе, соку ик иворто: нырысетӥ гожтэтэ луоз мамаелы, кыкетӥез – тыныд.

Педучилище бере ужаны ыстӥзы Ижевской районысь Лудорвай школае. Сётӥзы 39 нылпиен 3-тӥ классэз. Огез дышетскись ӝужыт мугорыныз но арлыдыныз висъяське. Арня ӵоже котыр ласянь эскери сое. Визьмыз вань кадь. Одӥг нуналэ урокъёс бере кыльыны кури. Вераськыса тодӥ: синъёсыз ляб адӟо. 1-тӥ классын 3 ар пукем, 2-тӥ классын – 2 ар.

Валай, нырысетӥ дышетӥсез сое аналтэм. Урокын но, урокъёс бере но ужалом, шуи. Сашалы 16 арес ни вал. Шумпотӥз. Солэн но, мынам сямен ик, чуръёсыз ышо, пе, 3-4 кыл гожтыса. Кызьы нырысетӥ дышетӥсе монэным ужаз ӝыны ар ӵоже, озьы ик та Сашикен ужай. Адӟон нервъёсыз радъяськизы.

Кӧня ке дыр ортчыса, директор дораз ӧте. Кык сменаен ужано луоды, пе, декретэ потэм дышетӥсез воштоно. Мон пумитъяськисько, оло, нырысетӥ сменаез но уг вормы ай, шуисько. Завроно, пе, тӥледлы сётыны косӥз. Уже интыяськыкум, со монэ туж шуныт пумитаз вал, та школаез дэмлаз: отысь директор, пе, туж валась. Ӧй пумитъяськы ни.

Аслам классэ кыкетӥ сменае ветлэ, 1-тӥ класс – ӵукна. Улонэ чутрак воштӥськиз, одӥг минут но буш дыры ӧвӧл. Жадемме но уг валаськы, тыршисько сюлмысь ужаны. Уждун тыризы кык смена понна – 900 манет. Кураськисьысь узыр ныллы пӧрми: пӧртэм пумо дӥськут басьтӥ.

Декабре, кыкетӥ сменаын урок нуыкум, укно пыр адӟисько: школа азбаре кык кошовкаен 7-8 мурт пыриз. Пӧлысьтызы заврономес гинэ тодмай. Звонок бере учительское пыри. Монэ адӟыса, пальышаз: тӥ доры, пе, лыктӥм. Куриз кыказ ик классын дышетскисьёсылэсь тетрадьёссэс, вань ужан планъёсме, конспектъёсме, журналъёсты. Огез занятие куриськиз.

Уроке огсыр ортчиз. Учительское пырисько но, завроно шорам абдраса учке. Ӵыжектӥ. Паймытӥды, пе, милемды: ужан тетрадьёс ваньмыз эскеремын, журналъёс шонер нуисько, планъёсъя-конспектъёсъя но адӟиське, малы дышетӥськоды нылпиосты, марлы соос дышизы. Юа, кытысь дыр шедьтӥсько. Шуисько, кык уждун басьтӥсько ук, мукет сямен ужаны уг быгатӥськы. Дыр ласянь ке, тол уйёс кузесь – уйшор берозь но пукисько. Урокам куриськиз на, ас синмыным адӟеме потэ, пе, ужамдэ.

Комиссия быдэс арня ӵоже эскериз школаысьтымы дышетӥсьёслэсь ужамзэс, монэ ӧз ни исалэ. Субботае ортчиз педсовет. Кыӵе но лек луэ вылэм со лякыт сямо завроно. Ох, йӧттӥз ук аналскемъёссэ, ваньзэс монэным ӵошатэ. Тӥни кинлэсь, пе, адӟем кароно.

Куректытӥсь яратон

Ар ортчыса, Петунькае адӟиськыны бертӥ. Бызинам Саня апае доры ушъяськыны туби. Со туж шумпотӥз, дэмлаз гуртысьтымы школаын дышетыны, Шарканысь завроноен но вераськи ни, пе. Озьы вуи аслам школаям.

Одӥгаз сентябрь нуналэ эшъёсы кино учкыны ӧтизы, Петунькае ӧй берты. Туби клубе. Вераськыса сылон сяменымы ӧс усьтӥськиз, учкисько: Валентинэ пыре военной формаен. Йырме лэзи – медаз адӟы. Монэ мед вунэтоз шуыса, Лудорвайын ужакум, гожтэтъёс но ӧй лэзья ни. Аслым ачим шуи: ӧвӧл тынад правоед, Фимие, чебер, таза пилэсь шудзэ таланы.

Эшъёсыным ӵош ик залэ пыри. Кино кутскиз. Шуак пельпумъёсме киос кырмизы. Берытски – Валентинэ пальышаса сылэ. Вӧзам пуксиз но киме вань кужмыныз кырмиз. Кино йылпумъяськиз, ульчаын ведра дурен зоре. Дугдэмез бере Валентин ки вылаз корказы дорозь нуиз. Пырыны куре, мама, пе, асьмелы маке но дасяз ни, дыр. Мон чутрак пумит кариськи – синъёсы но лябомо, тусы но шуш. Ки вылаз ик Саня апае доры келяз.

Валентинэ монэ яратӥз вань сюлмыныз. Дышетсконзэ йылпумъяса но, адӟиськыны вуылӥз, сьӧраз ӧте вал, квартира но, пе, висъялозы. Пумит луи. Нуналлы быдэ вожъяськод, пӧй, эшъёсыдлэн кышнооссылы. Ачим уйёсы лушкем бӧрдӥсько.

Огпол апаеныз пумиським. Шуэ, ноку но, пе, ӧм малпалэ вал, тон сыӵе вылтӥяськись луод шуыса. Мон солы: инвалид ке луид, вылтӥяськод но, пӧй. Нош ми, пе, мамаен тышкаськиськом вал тонэ, Валентинмы сокем куректэмысь.

Кышнояськиз яратонэ, кык нылпиоссы вордскизы. Но вазь кошкиз со улонысь, витьтонозь но ӧз улы – инфаркт луэм.

Бурмон

Бызинам 2 ар сяна ужаны ӧз кылды. 1949-тӥ арын ыстӥзы Быгие. Шарканысь библиотекае книгалы ветлыкум, син шорам йӧтӥз В. Филатов академиклэн син висёнъёслы сӥзем «На грани жизни и смерти» книгаез. Мынэсьтым но висёнме йӧнатыны луэ, пе. Соку ик мынӥ больницае окулист доры, со направление гожтӥз Иже. Профессор синъёсме учкиз но шуиз, нокин, пе, юрттыны уз быгаты таӵе висёнэн. Филатов доры Одессае мыныны направление ӧз сёты. Мукет гужем нош ик дораз ветлӥ. Кырӟанэз сыӵе ик.

1951-тӥ арын Петунькаын картофка копакум, иськавын пи Вася адӟиськыны пыраз. Дышетске вал Ленинградысь военной училищеын. Ӵош будӥмы, шудӥмы. Быдэс курсмес, пе, Одессае выжто, уг-а поты Филатов доры эмъяськыны мынэмед? Верай направление пумысен курадӟемъёсме. Мынӥ ке, юаллясько, шуиз.

Кӧня ке улыса, Филатовлэн институтысьтыз бумага вуиз, асьме окулистмылэсь висёнэ сярысь юалляськыса. Озьы Васяен гожтэтъёс пыр кусып возьыса, декабре институтэ ӧтизы. Директормылэн лэземез уг поты. Синмыд ӧй ке адӟысал, пе, сыӵе ӟеч ужаны ӧй быгатысал, больничнойдэ уг тыры, шуиз. Озьы ке но кошки Иже.

Нош ик мынӥ тодмо профессор доры. Вызовме возьматыса но, направление ӧз гожты. Мон, беглой мурт, дӥсьтӥ тазалыкез утёнъя министр доры пырыны. Ваньзэ верай солы. Направление сётыны уг быгатӥськы, шуиз, нош больничной усьтозы, пе, билет дундэ но бертэмед бере тырозы. Дышетон удысын ужасьёслэн профсоюззылэн обкомазы но пырай: кин тодэ, оло, судэтӥ но ветлоно луоз. Буйгатӥзы, шонер, пе, лэсьтӥд, коньдонэн но юрттӥзы.

Филатовлэн институтаз ньыль операциез ортчоно луи. Отчыозь кык арня ӵоже эскеризы тазалыкме, собере черодын сылӥ на. Улӥ квартираын. Эшъёсылэсь тодӥ, средае но арня нуналэ академик дораз эскере шуыса, черодэз но, пе, ӧжыт. Озьы лыктэме бере кыкетӥ арняяз ачиз Филатов но эскериз. Ярам, дыраз, пе, лыктӥд.

Операциез витён туж секыт вал, нош бурмон – эшшо но секытгес: йырыд быдэсак бинемын, миндэр излы пӧрмемын. Арняосы Вася увольнение басьтэ, миндэрме небӟытэ, сюдэ-утялтэ, нош капчигес луэ. Ваньзэ чидай, азьпалан умой улонлы оскыса.

Одӥг нуналэ эмъясь враче вань бинетъёсме утялтӥз. Адӟисько туж ӟеч. Шумпотэменым эктӥсько, кырӟасько, соин гинэ ӧз тырмы, укно янак вылэ тубыса, эктӥсько. Врач кышкатскиз, китӥм кутыса, васькытӥз. Шумпотэменым ваньзэс чупай, кин вал палатаын. Вить толэзь пала эмъямзы бере Филатов косэ на вал куинь толэзьзэ институтын ик дунтэк чакласькыны. Но мынам квартираын улыны коньдонэ ӧй вал, гужемлы дӥськутэ но ӧвӧл. Курыны нокинлэсь.

Тусы калык радъя луэмысь, туж потэ вал Валентинэз телеграммаен ӧтеме. Тодӥсько, со лыктысал, юрттысал мыным. Номыр шоры учкытэк, семьязэ но куштысал. Но Инмар утиз со вамышлэсь.

Мон – шудо

Ужаны Быгие ик интыяськи, дышетӥсьёс умой пумитазы. Улӥсько квартираын. Дорам ветлыны кутскиз кузё кышнолэн сузэрезлэн Геня пиез.

Бызён йырам ик ӧвӧл, Валентинэ йырысьтым уг поты. Бубиз но учкыны ветлӥз ни монэ, гужем гинэ кышноез кулэм, ужа роноын. Пумит луи. Одӥг ӝытэ дорам вуиз мӧйы предмы, авторитетэз солэн гуртын бадӟым. Малы, пе, уд бызиськы Генялы. Шуэ, пересьмонлы дасяськоно егит дыръя, пинал будэтоно. Дасо нунал ортчыса, колхозысь партсекретарь кыл поттӥз Геня пумысен. Нош мынам со сярысь кылэме ик уг поты.

Адӟонэ сыӵе вылэм, лэся. Кӧня ке толэзьзэ нош ик Бызинын ужано луи, собере выльысь Быгие берытскыны куризы. Оглань-таллань ветлыса уг улы, пӧй, гуртам ик кылё. Одӥг пол дорам Геня вал уробоен вуиз завронолэн приказэныз. Котырме бичай но сюрес вылэ потӥ. Геня монэ дораз пыртӥз. Адӟонэ сыӵе, дыр, шуыса, ӧй ни пумитъяськы.

Тятязы выльысь кышнояськиз, школаез йылпумъям куинь нылпиосыз гужемъёсы ми бордын улӥзы. Геня ужаз колхозын трудодень вылэ, улӥмы мынам уждунэным. Туж секыт вал нырысь, висьыны усем мумызылэсь люкаськем тыронъёссэ но ми ик берыктӥм. Калленэн пудомы но кылдӥз, корка но пуктӥмы – кор кораны ачим но ветлӥ. Вордӥськизы асьмелэн пиналъёсмы: Нина но Коля.

Адямиосын оградын луон понна уйёсы но ӧжыт кӧласькиз, ужея туж ӵемысь палэнэ поталляй. Ноку но Геняелэн лекъяськемез ӧй вал, валаз ужме. Пиналъёсты но утялтэ, ужаны но вуэ. Котьмар ласянь туж оскымон адями вал, ог-огмес валаса, жаляса улӥмы. Пиналъёсмы понна шумпотыса ул ни вал. Геняме лек висён погыртӥз, 4 ар курадӟимы ӵошен. Уй но нунал утялтӥ, номыр ӧз юртты.

Ортчем сюресме учкыса, шуисько: мон шудо адями, асме шедьтӥ ужын. Нылпиосме улон сюрес вылэ поттӥ, 5 внукъёсме утялтӥ. Табере асме нылпиосы, внукъёсы утялто ни. Улӥсько ни 5 муспотон правнукъёсы понна.

Источник:

Лебедева В. И. Адӟон / В. И. Лебедева // Удмурт дунне. - 2013. - 14 июня. - С. 10, 15. - (Тӧр шорын).

За предоставление материала выражаем огромную благодарность редакции газеты "Удмурт дунне"