Куликов Кузьма Иванович

Материал из Воршуда
Версия от 14:41, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Вань сыӵе удыс – удмурт калыклы дурбасьтон[править]

К. И. Куликов

Кин со Кузьма Куликов? Нырысь учкыса, кулэтэм, мултэс юан кадь. Зэмзэ но, Кузьма Иванович Куликовез тодо пыдлось удмурт гуртъёсын но, Европаын но, солэн нимыз тодмо учёнойёслы но политикъёслы, государствоен кивалтӥсьёслы но студентъёслы. Озьы ке но кин со сыӵе?

Ужан интыез тодмо - Россиысь Наукаосъя академилэн Уралысь люкетэзлэн Историяя, кылъя но литературая институтэзлэн директорез. Вылӥ нимъёссэ но тодӥськомы. Со - профессор, история наукаосъя доктор, 13 книгалэн но лыдъянтэм трос статьяослэн авторзы.

Озьыен, Кузьма Куликов - учёной, историк? Веранэз ӧвӧл, Кузьма Ивановичтэк Удмуртиын история наукаез син азе пуктыны ик уг луы. Кызьы ке вашкалазэ, озьы ик туалазэ но. Но сое учёной гинэ шуид ке, огпалзэ гинэ возьматод. Берло 20-25 ар ӵоже республикаямы одӥгез но кӧня ке хоть пусйымонэз общественно-политической ужрад Куликовтэк уг ортчы. Со гинэ ӧвӧл, солэн куараез котькуд ужрадлы нимысьтыз буёл сётэ яке воксё мукет ӧре воштэ. Солэсь дунъетсэ, малпанзэ обществолэн но, властьлэн но пӧртэм тубатъёсаз лыдэ басьтоно луо. Мукетыз ужпум, котьку ик-а соин соглаш карисько.

Озьыен, Кузьма Куликов - политик? Таиз но дунъет янгыш уз луы. Но со но тырмыт, котыр ласянь уг возьматы на Кузьма Ивановичлэсь мур но паськыт лулпуштроссэ, адями тусбуйзэ.

Куликовез дышетӥсь но шуид ке, уд янгыша. Со сярысь вералозы солэн будэтэм научной ужасьёсыз. Куликов - кужмо кивалтӥсь: кӧня ар ӵоже ини кивалтэ институтэныз. Вераны кулэ, синмаськымон кивалтэ. Куликовез удмурт культураез яке литератураез рос-прос тодӥсь шуид ке, малпасько, нокинлэн но ымыз уз пыры пумит вераны.

Кин бен со, Кузьма Куликов? Оло, соин вераськонысь шараяськоз? Кызьы со ассэ ачиз дунъя? Со пумысен кенешиськом ми Кузьма Ивановичен.


- Кин бен тӥ: учёной-а, политик-а яке мукетыз-а?

- Ваньмыз огазьын. Огзэ мукетызлэсь висъяны уг луы. Вылаз ик, туала вакытлэн историез но политика люконтэм герӟаськемын, со одӥг удыс, шуыны луоз. Со сяна, адями уг быгаты одӥг тусо гинэ, палдурес луыны.

- Ярам, соку таӵе юан. Тӥ научной ужъёсады куд-ог ужпумъёсты, нырысь ик политикаын, государство кусыпъёсын лэчыт пуктӥськоды. Кин тӥледын валтэ - учёной-а, политик-а?

- Адями. Ас шаерзэ, ас калыксэ зэмос гажась адями. Ӧвӧл кариськоно соизъя яке таизъя власть возисья, сылоно зэмлык вылын, астэ ачид гажаськод ке.

- Но сыӵе сылон котьку ик вольыт уг ортчы ук сылӥсез понна. Тани тӥляд но куд-огез гожъямъёсты, верамъёсты кивалтӥсьёслы уг, дыр, кельшо. Таин валче тодэ лыктэ "Уровни суверенитета Удмуртии и Татарстана" книгады. Отын тӥ, бускель республикаосысь югдурез ӵошатыса, вылӥегес пуктӥськоды бигеръёсты. Нош одӥгаз люкетаз оскондэс вераськоды, книгадэс асьме кивалтӥсьёс лыдӟозы шуыса. Лыдӟизы-а меда, кызьы малпаськоды?

- Мон соослы вазиськи электронной почта пыр. Лыдӟизы ик, луоз. Малы ке шуоно берло быръёнъёс азьын мыным телевидение сюрес пытсамын вал.

- Тӥ отын маин ке "гудыртыны" быгатысалды-а?

- Нокыче "гудыртон" ӧй луысал. Ваньмыз кемалась тодмо. Мынам ялан сюлэм висёнэ - удмурт калыклэн улонэз. Туала государствоямы солы пичигес но пичигес инты кыле. Кивалтонын котькыӵе ёзэтэз, тубатэз басьты - кӧня отын удмуртъёс? Чиньыен лыдъямон. Ӧвӧл бадӟым предприятиосын кивалтӥсь удмуртъёс. Интеллигенция сярысь верано ке, со асьмелэн гуманитарной удысъёсын гинэ. Со но пушъет уг сёты, удмурт интеллигентъёслэн нылпиоссы удмурт выжыоссэс ышто.

Зэмзэ вераса, Советской государство кылдытыку ик, удмуртъёслы отын азьпал радъёс чакламын ӧй вал. Государстволэн кузёеныз Ленин пролетариатэз ялӥз. Нош удмуртъёслэн ноку но ӧй вал асьсэлэн пролетариатсы. Удмурт калыклы кельтэмын одӥг гинэ удыс но инты - музъем. Жаляса верано луэ, сое музъемтэк но кельтыны быгатозы. Музъемен вузкарон сярысь вераськонъёс угось ялан пуромо. Соку удмурт калык номыртэк кылёз, ачиз нумырлы пӧрмоз.

Удмурт егитъёслы туж секыт вылӥе ӝутскыны. Азьвыл аръёсы но гуртын быдэсмемъёслы шуг вал вузэ пырыны. Али, луонлыкъёс (коньдон ласянь но) туж пӧртэмесь луэмен, уката но секытгес.

- Кузьма Иванович, мар тӥ вераськоды удмуртъёс сярысь, сое ик вераны луэ ук ваньмыз гуртын улӥсьёс сярысь. Ӟучезлэн но, порезлэн но, бигерезлэн но гуртын улӥсьлэн сыӵе ик сюлэмшугъяськонэз, озьы ӧвӧл шат?

- Озьы ке но удмуртлы уката но секытгес. Сое быдтэ на дӥсьтонтэм, востэм сямыз. Экономикаен герӟаськем шуг-секытъёс вӧзы ватсасько на национальной ужпумъёс но.

- Но етӥз, визьмо адямилы национальностез уг люкеты кадь ук?

- Нош мон мае верасько?! Ялан, нуналысь нуналэ будэтоно, дышетоно етӥз, визьмо, юн мылкыдо адямиосты. Мед луоз асьмелэн, ӟуч сямен вераса, национальной элитамы. Валамон, со понна нырысь утчано сыӵе егитъёсты, собере соосын нимаз пыр-поч ужано. Тани мыным шуд усиз синйылтыны туж шаплы, визьмо нылашез Лена Ивановаез. Мон со бордын ужаны кутски, куке солы вал 12 арес. Али Лена УдГУ-ысь IV курсысь студентка. Огдыре кык факультетын дышетске. Тодэ ини англи но немец кылъёсты, компьютерен ужа. Азьланяз солэсь нимзэ тросэз тодозы ай. Тӥни озьы дышетоно егитъёсты.

- Веранэз ӧвӧл, тодон-валан - со туж умой маке. Но адямилы калык пӧлын адскымон луон понна кулэ на, дыр, мар но со мукетыз но?

- Кулэ! Адями мед быгатоз со тодон-валанъёссэ уже кутыны, пайда поттыны. Со сяна, золгес верано ке, мед быгатоз обществоын ас интызэ шедьтыны, отӥяз со интызэ утьыны но мукетъёсызлы ассэ гажан мылкыд пыӵатыны. Нимаз адями гинэ ӧвӧл, быдэс нация сыӵе луыны кулэ. Та вакытэ, огыр-бугыр дыре, уката но. Али асьмеос асьмеды, вакытлэн куремезъя, чутрак ӧм ке воштэ, калыкмы ас туссэ ыштоз яке воксё сылмоз мукет калыкъёс пӧлын.

- Быдэстонтэм ужпум уд-а пуктӥське, Кузьма Иванович? Тӥ вераськиськоды быдэс калыклэсь йырсазьзэ чутрак воштон сярысь, нош асьмеды пыкыло ай ог-огмы понна сылыны быгатымтэмы понна, куспамы тупамтэмы но вожвылъяськеммы понна.

- Соглаш! Уката но соин ик воштоно куд-ог сямъёсты но улон шоры умойтэм учконэз. Кызьы ке уллёын луэ укылтэм пудо, озьы ик котькуд калыкын но вань улонэз сурась-пожасьёс. Но соосты "визьманы" палэнысь дядяез ӧвӧл витёно, асьмелы ик кузгатоно радъёсмес сурась-пожасьёсты, калыкмес вузасьёсты, изъян вайисьёсты. Кызьы шуо ӟучъёс, "бей своих, чтобы чужие боялись".

- Тӥ вераськоды удмуртъёслэн обществоын интызы сярысь. Но кулэ шат со пумысен керӟегъяськыны? Калыкъёслэн огкадь правооссы сярысь верамын ук ини Конституциын но.

- Верамын декларативно! Огъя кылъёсын! Асьме парламент кутыны кулэ удмурт калыкез утён но ӝутон сярысь законъёсын быдэс сузьет. Мон сямен, нырысь ик кутоно удмуртъёслэн ӧтчамзы (съездзы) сярысь закон. Отын меӵак верамын мед луоз: Элькунысь Правительство лыдэ басьтэ но быдэсъя съездлэсь косэмъёссэ. Валамон, вераськон мынэ национальной ужпумъёс сярысь.

- Кузьма Иванович, мон тросэныз тӥляд вераменыды соглаш луисько. Но кытӥяз тӥ национализмлы матэктӥськоды кадь. Яке мон янгышасько-а?

- Янгышаськод. Национализм - со куке одӥг калык ассэ мукетъёсызлэсь вылӥегес пуктыны турттэ. Нош мон вераськисько удмуртъёслэсь ас интызэс утён но юнматон сярысь. Уг ӧтиськы мукетъёсызлэсь мае ке таланы. Дэмласько одӥгезлы гинэ пумит нюръяськыны - удмурт калыклы изъян ваёнлы.

- Удмурт калыкез утён но ӝутон сярысь вераськыкузы, ӵем дыръя кылӥське удмуртлык кыл. Тӥ кызьы валаськоды сое - удмуртлыкез?

- Нырысь ик, со ас калыктэ, ас музъемдэ яратон, сое чебергес, узыргес карыны тыршон. Аслэсьтыд удмурт луэмдэ, калыкеныд люконтэм луэмдэ шӧдон, валан. Тодам лыктэ Красноярск улосын луэм учыр. Мон отчы ветлӥ Москваын дышетскон вакытам. Отысен ыстӥзы монэ одӥгаз колхозэ лекциен. Лекция кутскытозь, дыры вал но гуртэтӥ калгоно кариськи. Вуи фермаязы. Отын нылкышноос куспазы ӟабыль! потто... удмурт сямен. Мон но соослы мар ке удмурт кылын вази. Чалмизы. Собере юало: кытысь тон, кин? Али Москваысь, шуисько, но ялан улон интые Ижевскын, Удмуртиын. Мар кутскиз отын. Лобаса кадь вуизы возам. Монэ ӟыгыръяло, чупало, юаллясько, синвуасько. Доразы нуизы, пӧраськемъёс потто, аракыен утялто. Мон, оло, нокытын но асме сокем витем куноен ӧй шӧдылы. Вот со ик вань удмуртлык.

- Вань ужамдылэсь, творчестводылэсь палдурзэ гинэ басьтоно ке, тӥ историк, бадӟым учёной. Нош улон сюрестылэн кусконэз воксё но уг возьматы вал сыче ӧрез.

- Бен, мон дышетски зоотехнике. Школаез йылпумъяса пыри Асан совхоз-техникуме, пичиысен ик врач луыны малпаськи ке но вал. Но кытчы ке кыдёке дышетскыны мыныны коньдон ӧй вал. Нош Асан - со гуртэным артэ. Армия бере пыри сельхозинститутэ. Кык но ӝыны ар дышетскыса, заочной отделение выжи: семья угось кылдӥз. Ар ортчыса, диплом басьтӥ. Ӵош дышетскыны кутскем эшъёсылэсь вазьгес. Ужай гурт удысын ужасьёслэн профсоюззылэн обкомаз, собере партилэн обкомаз, табере тани институтын. Зэм, висказ вал на ВПШ (Вылӥ партийной школа - Г. К.) но аспирантура.

- Нош ку тӥ валады, учёной, историк луоды шуыса? Ку шӧдӥды, шонер сюрес бырйиды шуыса?

- Нырысь ик мон сое валай, ВПШ-ын дышетскыкум. Дышетсконэ мыным туж кельше вал (зэмзэ вераса, котькыӵе дышетскон мыным котьку сюлэмыя). Ми пумиськылӥмы дипломатъёсын, учёнойёсын, дуннеысь коммунистической движенилэн азьветлӥсьёсыныз, тодмо журналистъёсын, милемлы лекциос лыдӟизы ЦК-ысь но Правительствоысь валтӥсь специалистъёс. Соку ик мон валай: общественной уж, политология, история - ваньмыз со мынам удысэ.

1971-тӥ арын мон пыри аспирантурае. Отчы монэ вуттӥз тани мар. Ну, пырак вуттӥз, шуыны уггес луы, дыр. Шонергес вераса, со сярысь малпан сётӥз. Мон соку партилэн обкомаз ужай вал пропагандая но агитацияя отделлэн кивалтӥсез луыса, со дыре ик вал "Пропагандист и агитатор" журналлэн валтӥсь редакторез. Одӥгез гажано учёной ваиз атеизм сярысь статьязэ. Лыдӟыны ик уг луы, сокем ӝыныё-урдсо, суро-пожо гожтэмын. Кутсконысеныз пумозяз мон сое "гыри", быдэсак волятӥ. Авторез ачиз ик синмаськиз но, паймиз но. Куспетӥ вераса, со наукаосъя кандидат вал, нош мон степеньтэм маке. Со учыр бере учёнойёс-гуманитарийёс дорам черодэн сямен вайылыны ӧдъязы ужъёссэс. Мон малпай: учёнойёс понна научной ужъёсты лэсьтӥсько бере, малы мон ачим, ас поннам уг быгаты наукаен вырыны? Мон чиньыен шат лэсьтэмын? Со сяна, со вакытэ мон гожъясько вал обкомлэн кивалтйсьёсыз понна докладъёс но статьяос. Ваньмыз соосты умой дунъяло вал. Мон нош ик малпай: малы мон Емельянов, Никитин, Марисов но мукет псевдонимъёсын ужаны кулэ, ас нимыным но быгатӥсько ук. Озьы ик вуи аспирантурае.

- Секыт ӧз поты-а дышетскыны, тӥляд дышетскемдылэн инъетэз мукетгес угось вал, зоотехнике?

- Конечно, ӧз! Мон капчиен но ӝутскем мылкыдын, яратыса дышетски. Дыры вал эшъёсылы но юрттыны. Ушъяськытэк верало: мон диссертациос гожтыны юрттӥ монголлы, чехлы, латышкалы но таджиклы.

- Асьтэлы но соку ик-а гожтӥды?

- Бен, соку ик. Защитаеным быдэс история луиз, ява. Научной кивалтӥсеным кылмы ӧз тупа. Со мынэсьтым диссертациме туж кема, ӝыны ар, эскерытэк возиз. Нош мон, ачид тодӥськод, ӟырдыт адями, гызмыльтон сямы ӧвӧл. Кивалтӥселы керӟегъяськемме возьматӥ. Со пунэмзэ берыктӥз: кафедраын предзащита дыръя ужелы урод дунъет сётӥз, мыным пумит вераськиз. Кафедраын луылымтэ учыр, шуизы мӧйы преподавательёс. Соку мон шуисько: Пермь обкомын степеньёсын тачак адямиос ужало, соос ик мед сётозы диссертациелы дунъет. Озьы ик лэсьтӥмы. Пермьысь докторъёс но кандидатъёс ужме вылӥ дунъязы. Защитае но вольыт ортчиз. Со гинэ ӧвӧл ай. Мыным ЦК-ын ӵектӥзы диссертациме "Советская Россия" издательствоын нимаз книгаен поттыны. Поттӥ ведь! Гонорар тыризы 3 сюрс манет. "Жигули" соку 8 сюрс сылэ вал.

- Ну, берганы быгатон амал утчан ласянь тӥледлы вожъяськыны гинэ луоз. Тани "Пропагандист и агитатор" журнал пумысен но мар но со кылӥськиз.

- О, соиз авантюра вал! Обком поттэ вал пичильтык гинэ "Блокнот агитатора". Мон сое "Пропагандист и агитатор" журналлы пӧрмытӥ. Нокинлэсь юатэк-вератэк, ӟуч сямен вераса, явочным порядком. ЦК-ын та журналэз синйылтӥзы, эскеризы но умоен лыдъязы. Собере юало: нош кин, пе, тыныд сое поттыны лэзиз? Нокин ӧз лэзьы, шуисько. Ну, малпасько, али гудыртоз-ӵашъёз. Выль издание поттон понна олокӧня-мар бызьыло-но, согласованиос люкано, международной индекс басьтоно. Мынам со номыри но ӧй вал. Кызьы ке ваньмыз умоен ортчиз.

- Улонады одӥг гинэ сыӵе выллем авантюра ӧй вал, дыр? Тӥляд вирады вань кадь сыӵе сямды.

- Хм, али Куликов кадь шонер адямиез утчаса уд шедьты! Нош серекъятэк верано ке, та юртмес лэсьтон - со быдэсак авантюра, шуыны луоз.

Мон институтэ вуи аспирантура бере. Обкоме туж ик уг кыскы ни вал. Ӵапак соку Гусев, азьвылэз директор, интыяз ӵектӥз. Кӧня ке нунал ужаса, вань ужасьёсты люкай но, шуисько: асьмеос пуктом выль юрт! Ӵуказеяз уже лыктӥсько но борддорысь аслэсьтым серемес суредам тусме адӟисько. Улӥяз гожтэмын - "Герой или авантюрист?" Кема гинэ борддорын улӥз, ӧй лэзьы куштыны, мылкыд карисьёс вал ке но. "А" шуэмын, табере "Б" шуоно. Коньдон ӧвӧл, проект ӧвӧл, инты ӧвӧл - номыр но ӧвӧл. Но мар ке бордысен кутсконо ук. Вал мынам эше обкомын, Кардаполов. Юрттӥз мукетыз но ӟеч тодмое, Госпланысь Анастасия Антоновна Дударь. Ну и, конечно, берпум точка пуктӥз Кудяшев: Минпрос, пе, уксёез уже кутыны уг быгаты, нош тон кут. Озьы коньдон висъязы.

Инты но шедьтӥмы, самой та интымес. Но отын кык пу корка сылэ. Соосты утялтэмлэсь азьло улӥсьёсызлы 19 (!) квартира сётоно. Кытысь? Вот соку ньылетӥез эше юрттэ - Борис Владимирович Шишкин, городлэн кузёез. Лыктӥ мон со доры:

- Кылзы, мыным 19 квартира кулэ!

- Да тон мар?!

- Ну, туж кулэ 19 квартира!

- Ярам, мон сёто. Но тон дыраз со пу коркаосты ӧд ке сэртты...

Тодыса кадь верам эше. Мырдэм-мырдэм мозмытскыны быгатӥмы со вуж коркаослэсь.

Табере кин, кызьы лэсьтоз юртмес? Мынӥсько лэсьтӥськонысь одӥг бадӟым кивалтӥсь доры, ну, шуом, П. Ну, генерал, ява, погонэз ке но ӧвӧл. Огаз планёркаяз мынӥсько, кыкетӥяз, куинетӥяз. Со мыным куинь минут сётэ вераськыны, ачиз пал кыл но уг поттылы. Я, кутскы ини лэсьтыны, шуисько, кут коньдонмес, мар тыныд кулэ? Со пумитам: нош мар тынэсьтыд басьтод?

Ярам, визьмо адями сюриз, индылӥз монэ. Басьтӥ койыкез ыбыны лицензия, вить-а, куать-а бутылка "Пшеничной" но П.-ез эшъёсыныз ӵош пӧйшураны нуи. Ваньмыз мешокъёсын сӥлен бертӥзы. Кӧня ке пол озьы инкуазе потамы. А-а, малпасько, быдтэм коньдонэ одно ик пайдаен берытскоз. Озьы ик луиз: ар куспын юртмы ӝутскиз. Али егитъёслы шуг валаны со шуг-секытъёсты. Нош азьвыл лэсьтӥськон - со зэмос курадӟон вал. Коньдонэд но вань, нош материал но подрядчик уд шедьты. Пичильтык объектэз но аръёсын лэсьтыны выро вал.

Эшшо-а авантюра кулэ на? Ярам, но эн малпа, мон котьку но соосын выри шуыса. Бергано, амалъёс утчано. Тани та юртын 25 пала компьютеръёс. Малпаськод, государство соосты сётӥз-а? Ӧз. Яке тани азбарамы склад сылэ, адӟид-а? Кыӵе гараж? Кин тыныд озьы шуиз? Со гожтэмын склад шуыса, кезьыт склад. Кайта со вылын кыкетӥ этажез ӝутскоз, липом черепицаен. Коттедж кадь адӟиськоз. Вӧзаз аркаен беседка ӝутом, бордаз шашлык пыжыны мангал пуктом.

- Шулдыр адями тӥ, Кузьма Иванович. Воксё уд тупаське учёнойлэн огдышем тусызлы: кӧсыт, наукае выем "бумага нумырлы". Улонын тӥ кыӵегес?

- Мон улэп адями. Мыным соиз ласянь туж кельше Жорес, Алферовез верасько. Ми соин огвыллемесь. Кытӥяз учкисько но - вынъёс. Вылаз ик, со но директор. Конечно, со Нобелевской лауреат, мыным со данозь кыдёкын. Но тросаз ми огкадесь, улонэз яратӥсьёс.

- Мукет сямен вераса, шулдыр компаниез но, чебер апайёсты но дунъяны быгатӥськоды?

- Ӟеч, визьмо адямиосын ӵош пуконлэсь-вераськонлэсь умоез номыр но ӧвӧл. Но мон кыӵе ке компание шедисько ке, шып пукыны уг быгатӥськы. Мон отын кыӵе ке но валтӥсь соку ик луисько. Курытэз сярысь ке верано, ноку но пумит уг луиськы пичияк веръяны. Но аракы монэ нокуд ласянь но ноку но ӧз сюлэмшугъяськыты.

Нош нылкышноос сярысь ке верано, тани Маргарита Григорьевналэсь (М. Г. Иванова, институтысь научной ужась. -Г. К.) юалом: Маргарита Григорьевна, мон быгатӥсько-а чебер нылкышноослы дунъет сётыны?

- Со но быгатэ, нош нылкышноос эшшо но золгес быгато сое ассэ дунъяны.

- Тӥледды, шӧдске, туж трос пӧртэм ужъёс но удысъёс бордазы кыско?

- Кызьы шуод? Мынам котьку но одӥг шор сюресэ. Валамон, мон маин ке но мукетыныз но вырыны быгатӥсько. Но со мукетыз шор сюресысьтым палэнэ кожытэ ке, мон солэсь куштӥсько. Со дыре ик, ас поннам кыӵе ке ужпум пусйи ке, быдэстытэк уг кельты. Яке яркыт, чебер малпан йырам лыктӥз ке, мон, сое гожтытэк, солэсь мозмытскыны, изьыны уг быгаты.

- Нош со ужпум вормонтэм ке, яке сое быдэстыны дыр уг тырмы?

- Сыӵеез туж шер луылэ, воксё но ӧвӧл, шуыны луоз. Нырысь ик, ас азяд сыӵе ужпум эн пукты. Бырйы аслад кужымедъя, визьмыдъя. Но собере уг быгатӥськы эн шуы ни. Вал таӵе учыр. Трокай сярысь книгае потыку, Волков (Э. В. Волков, "Удмуртия" издательстволэн соку валтӥсь редакторез. - Г. К.) жингыртэ: книгаяд, пе, одӥгез люкетэз уг тэры, яке кушты сое, яке выль глава лэсьты. Ярам, шуисько, выльзэ лэсьто. Мон уй куспын гожтӥ сое. Мон малпамъя, книгаям со тужгес но золэз пӧрмиз. Лыдӟы, "Распятие разума" шуыса нимаське. Вот сыӵе дыръя йырвизь гинэ ӧвӧл, вань кужым одӥг ужпумез вормыны ӵош ӝутске. Йыр штаб кадь ужа. Валаны ик уг луы, кытысь мар лыктэ. Кинлэн кызьы, дыр, нош мынам ӵем луылэ озьы: аслам малпанэ кылдэ-а, социальной заказ-а вуэ - мон сое одно ик быдэстыны тыршисько.

Тани тон тодӥськод-а Сарапулысь вокзал дорысь паровозэз-памятникез? А ведь мон сое пуктӥ. Бен, бен! Вот лыктӥз йырам сыӵе малпан - пуктыны 1918-тӥ арын сюмаса бырись Петроградэ нянь нуэм паровозэз памятник карыны. Мон соку обкомын ужасько вал ай. Вазиськи Горьковской чугун сюреслэн кивалтӥсезлы. Шедьтӥзы ук со паровозэз. Тулаын сылэ вылэм. Куинь-ньыль нуналлы ӝегасалмы ке, сое мукет куштӥськем кортэз сямен ӵыжатыны келяло ини вал. Ваим Сарапулэ рельсаос кузя аслаз кужыменыз.

Яке басьтом Ижевскысь Уй пал шайвылысь "Куректӥсь анай" памятникез. Со но пуктэмын мынам сюлмаськеменым. Мон соку Культурая фондэн кивалтӥ, отысь ик коньдон висъямы. Нош Александро-Невской черклэн куполъёсыз син шорад йӧтылӥз-а?

- Кызьы уз йӧты, сыӵе чильк-вальк кисьтаське бере зарнивуам маке.

- Ха! Озьыен, тон малпаськод, со липет йылъёс зарнивуамын шуыса? Одӥг пыры но зарниез ӧвӧл отын, тод сое! Черк липет шобыртэмын титанлэн нитритэныз. Верало, кызьы вал со, кылзы. Лыктӥз мон доры одӥг юлтош. Возьматэ зундэс, зарнилэсь кадь лэсьтэмын. Овӧл, пе, титан нитритэн шобыртэмын. Аха! - мынам йырам шуккиз, - таин мукет арбериосты но шобыртыны луоз ук, бадӟымъёссэгес но. Зэм но, луэ, пе, но сыӵе агрегат, "Дукат" шуыса нимаське со, Казаньын гинэ вань. Ӵектӥсько Николай владыколы черк липетэз цинк кортэн интые титан нитритэн липыны. Озьы ик лэсьтӥзы. Чебер ведь? То-то угось. Уз но сыномы, сю аръёсын улоз.

- Кытчы гинэ уд вутскиське, Кузьма Иванович. Самой паймымонэз - тӥляд котькытын ваньмыз пӧрме. Ӵем дыръя ваньмызлэсь умой. Тӥ, оло, Инмарен пусъемын?

- Одно ик, кызьы сотэк! Мон вералляй вал ини: мар ке борды басьтӥськисько ке, сое котькинлэсь умой лэсьтыны тыршисько. Ушъяськытэк верало: мон котькыӵе удысын, отын мар ке лэсьтӥське ке, ваньмызлэсь умой, ваньмызлэсь азьпалан луыны кулэ. Сотэк мыным улон ӧвӧл. Со сям мынам сюлэмам, вирам. Мон сое вань улонэ пыр нуисько, пичиысен мӧйымытозям.

Армиын мон связья радиомеханик вал. Валамон, малпай самой зол специалист луыны. Шӧдӥсько, физикая тодон-валанъёсы уггес тырмо. Мон казармаын отбой бере шобрет улын, фонарикен югдытыса, физикаез лыдӟыса кыллисько вал. Пусъемзэ быдэстӥ: подразделениямы устоез спец луи. Правительственной линиын дежурить карыкум, связь быриз. Мон кӧня ке дасо секунд куспын мугзэ шедьтӥ но палэнтӥ. Кабинаям бадӟым командир вуиз вал ини, нош мон - солы: "Вань связь!" Мыным дорам бертылыны отпуск сётӥзы. Кин со вакытэ служить кариз, тодэ, мар со сыӵе - 50-тӥ аръёсы Германиысь отпуске бертылыны. Басьтом туннэ нуналэз, институтэз. Азьвыл вакытъёсы татысь коллектив араз 1-2 сборник поттэ вал. Али ми арлы быдэ 16-17 книга поттӥськом. Арлы быдэ кин ке но диссертация гожтэ. Нош кӧня ини степенен учёнойёсмы. Улон-вылон ласянь но коллективмылы сьӧлык ӝожтӥськыны. Огдыре научной ужасьёслы гинэ ӧвӧл, технической ужасьёслы но квартираос сётъямы.

- Коллектив пумысен тӥ быгатӥськоды-а вераны, институтады ужало куспазы эшъяськись, ог-огзэс гажась но дунъясь адямиос шуыса? Одӥг бадӟым уробоез одӥг кыткетын нуо шуыса?

- Зэмос коллектив туж секытэн кылдэ. Мон лыктыку, татын пӧртэм группировкаос вал. Соос люкаськыло, пӧртэм вераськонъёс нуо, огез одӥг пала кыске, мукетыз - мукет пала, огыр-бугыр выро. Котькыӵе уллёын угось ӟызы ыжъёс шедё, ваньзэс сураса-пожаса уло. Куд-огзэ мон улляй. Ну, меӵак ӧй улля, ӧй утьы соосты, шуыны луоз. Ачиз коллектив пачкатыса, пызьыртыса палэнтӥз, мултэс кариз. Соос пумтэм урттылӥськизы мон вылэ. Куамын пала эскеронъёс ортчизы институтын, со пӧлын - прокуратура ласянь но. Академиклы, мынам кивалтӥселы ыстэм гожтэтазы гожтӥллям, ӟуч сямен верало: "Просим проверить репрессивную деятельность Куликова в отношении к удмуртской интеллигенции". Тямыс кузя эскерисьёс вуизы! Ну, конечно, нокыӵе янгышме но, "репрессиосме" но ӧз шараялэ. Ваньмыз со, веранэз ӧвӧл, мылкыдэз керӟегъяськытӥз, но со понна коллективез тазаятӥз но юнматӥз.

- Тӥ кивалтӥсь, калыкез валтӥсь но ӝутӥсь-радъясь. Озьыен, тӥ коллективист луыны кулэ. Но тӥ ик научной, творческой ужась но. Таиз ини нимаз, ас кожаз, югдаз малпаськыса ужась. Кызьы шуиз одӥг визьмо адями, творчество адямиез огназэ кельтэ. Кызьы тӥледлы удалтэ та кык пӧртэм адямиосты пушкады куспазы тэрытытыны?

- Мон нырысь ик коллективист, мон яратӥсько калык пӧлын луыны. Тани, шуом, мынӥськом ми чорыганы. Кытӥяз мыным чорыг но кулэ ӧвӧл. Вот мынам Алашеевен (В. Е. Алашеев, Удмурт телевиденилэн кивалтӥсез. - Г. К.) ӵош пукеме потэ, со шоры учкеме, сое кылзӥськеме. Вань сыӵе адямиос, кудъёссэ мон зэмзэ но яратӥсько. Кызьы ке соос мыным бадӟым мылкыд но, кужым но сёто. Мыным соос кельшо, мыным яра соос вӧзын. Котырам калыктэк мон уг быгатӥськы.

Нимаз ужан сярысь ке верано, тани мар пӧрмыса кошке. Валамон, аслэсьтыз ужзэ адями ас понназ малпа, ас кожаз лэсьтэ. Но тынад сиёнэд пӧрамын ке, кызьы сое мукетъёсызлы уд веръяты? Мон туж шумпотӥсько, мынам пӧраме адямиослы ке кельше. Мыным шуо ке - "уждэ лыдӟи, кельшиз", мон понна солэсь бадӟым дунъет но, кузьым но кулэ ӧвӧл. Тани мон телевидениын 5 ар ӵоже "Государство и мы" передача нуи. Передача бере ӵуказеяз уже мыныкум, монэ 4-5 мурт, чылкак тодмотэм макеос, дугдытыса тау каремзэс верало ке, мон уж дурам чылкак бурдъяськыса вуисько вал. Озьыен, мон пайдалыко, мынам уже кулэ. Монэ со котьку но ӝутэ улонын. Эн малпа, чеберъяськисько шуыса. Калыклэн, коллективлэн ӟеч дунъетэз туж юрттэ ужын но, быдэс улонын но.

- Мынам но тӥледды, Кузьма Иванович, мултэс ушъяме уг поты, кулэез но ӧвӧл. Но котьма шу но, удмуртъёс пӧлын туж ик трос ӧвӧл ай тӥ кадь визьнодо, малпаськыны но, ужаны но быгатӥсь, дӥсьтӥсь, етӥз адямиос. Эн шоналэ киосыныды, ваньмыз со вань. Мон мар вераны турттӥсько? Тӥ кадь адямиосты кивалтӥсьёс, небытак вераса, уггес ярато, уката но со адямиос асьсэлэсь данзэс утьыны быгато ке, власть азьын тыбырзэс тырмыт уг ке губырто. Етӥз адямиез куасалтыны, пачкатыны уг ке пӧрмы, сое вылӥе ӝутыса басьтыны луэ. Тӥледлы вал-а сыӵе ӵектонъёс?

- Одӥг гинэ ӧй вал. Но малы кулэ со мыным - кивалтон? Мон учёной, уже но, институтэ но мыным туж кельше. Кӧня Инмар сётоз, сомында ик ужало татын. Лэсьтоноез ужъёс туж но туж трос ай, быронтэм. Мынам но, институтлэн но.


Тӥни со сыӵе - Кузьма Иванович Куликов. Учёной, кивалтӥсь, дышетӥсь, политик, удмурт калык понна дурбасьтӥсь. Со ӵектэм вылӥ кивалтон ужлы пумит луиз вал, аслаз верамезъя. Нош мар меда шуоз, калык солы шаерамы самой вылӥ ужез ӵектӥз ке? Нош сы ӵе осконэз быдэстыны со быгатоз, соиз сярысь веранэз ӧвӧл.

Источник:

Куликов К. И. Вань сыӵе удыс - удмурт калыклы дурбасьтон / К. И. Куликов ; записал Геннадий Коряков // Удмурт дунне. - 2001. - 5 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"