Котков Владимир Васильевич

Материал из Воршуда
Перейти к навигацииПерейти к поиску

Нуналлы быдэ – кылбур, арнялы – кык пьеса

Котков В. В.

Вольыт рифмаос, инме лобись чебер крезьгур, жингрес куараё гитара со понна одӥг вӧл-вӧл ӧрен визылало. Сюлэмаз пачыласа пӧзись мӧзмыталэс, куддыр задорлэсь но задор гуръёсыз уӵы куараен выллем чузъяськыса пӧламы кисьтӥсько.

«Льӧмпу сяська», «Золото листьев» но мукет кырӟанъёсыз Удмуртимылэн палэназ но паськыт вӧлмемын. «Маскара Параска», «Пинал мылкыд - юмал йӧлпыд» пьесаосыз сцена вылын быдэн 200 поллэсь уноен мынӥзы ини. Туж ӟеч пумитало лыдӟисьёс повестьёссэ но, веросъёссэ но. Таин ӵош ик со тырше та удысъёсъя кивоштӥсьёс будэтон удысын: Шаркан ёросысь пиналъёсын литературно-драматической кружок нуэ. Ужъёсынызы книга поттыны дасясько.

Льӧмпу сяська лобе, лобе,

Мусояське кырын юг май.

Мон тон понна озьы чебер

Тулыс куазез ачим югмай...

Та чебер небыт тулыс тӧл кадь ненег гуро кырӟан 80-тӥ аръёсы быдэс шаерамы чузъяськылӥз. Зэмос хит вал. Тужгес ик сое гажаллязы Удмурт университетысь студентъёс. Кырӟанлэн авторез Володя Котков татын дышетскиз уго, «Чипчирганэ» ветлӥз. Татын, эшъёсыз пӧлын ик, кылдӥзы но улонэ вӧлмизы солэн нырысетӥ кырӟанъёсыз ӟуч но удмурт кылъёсын. Соосты Володялы кузьмазы егит сайкыт мылкыдо студент аръёс, нош кылбур, верос гожъяны школаысен ик кутскиз. Адӟем карымон адямиос, мылкыдзэ ӝутӥсьлӧпкытӥсьёс котыраз уно гинэ вал уго. Анаез усто кырӟалляз. Атаез арганэн но туж шӧртчи шудылӥз. Клубен кивалтыкуз, арганчи утчаса ветлоно ӧз луылы. Озьы ик маскаръяськыны туж мыло-кыдо вал, юморескаос гожъялляз, сцена вылэ но ӵемысь поталляз. Байтерек школаын дышетскыкуз, литературно-творческой кружок ужаз. Кивалтӥсьсы Елизавета Герасимовна Багратионова уно аръёс ӵоже туж мыло-кыдо тыршиз, уно пиналъёсты котыраз люканы быгатӥз. Володялэн апаез отчы ветлӥз, кылбуръёссэ ушъялляло вал. Бӧрсяз ик кыстӥськиз выныз.

Нырысь-валысь Володя ёрос газетэн эшъяськиз, пичи ужъёссэ, иворъёссэ ысъялляз. Бӧрысьгес Ижысь газет-журналъёсы но сюрес шедьтӥз. (Тямысэтӥ классын дышетскыкуз, сое мукет юнкоръёсын ӵош «Алнаш колхознике» семинаре ӧтчазы.)

- Со аръёсы ёрос газетамы Семён Тарасович Шихарев ужа на вал. Милемын, гожъяськыны кутскисьёсын, кусып возьыны тыршылӥз. Мон понна но со писательёс пӧлысь нырысетӥез зэмос дышетӥсе вал, шуыны луэ, - тодаз вае Владимир Васильевич. - Огпол юмореска гожтыса, редакцие ыстй. «Эй, колхозник!» нимаське вал со. Пуштросэз: гуртысь егит пи городэ лыктэ но, отын сое интыысь укылтэм пиос куто, уксёзэ поро... Асэным та выллем учыр луылӥз но верос пӧрай. Семен Тарасович тупатъям-волятэм сое, пумаз кӧня ке аслэсьтыз йылтэм на. Мынам нимтулы вӧзы пумаз аслэсьтыззэ ватсаса, уже потӥз вал. Бӧрысь Семён Тарасовичен ӟечгес тодматскимы. Со бадӟым саклык висъялляз ужъёсылы. Шекъёссэ волятылыны артэ пуксьыса ик дышетылӥз: тазьы карысал ке, учкы ай, кыӵе луоз, тазьы лэсьтысал ке, кыӵе чузъяськоз шуыса, тупен-тупен сэрттӥз-пертчылӥз. Со юрттэмъя ик нырысьсэ печатласьки «Молот» журналын. «Шудо сюрес тыныд, Володя» азькыл гожтыса, кылбур сузьетме сётӥз.

9-тӥ классын дышетскыкум, Иже егитъёслэн семинаразы ыстылӥзы. Мон пичи на вал, бордам Иосиф Бобровез юнматӥзы. Документъёсме кутӥськымтэ, гостиницае инты ӧз сётэ. Ярам, одӥг койка вылын кӧласа улӥмы ини. Со сьӧры кал сямен ветлӥ: Алнашысен пырамы Анатолий Ушаков доры. Соку ёросамы со туж тодмо вал ни, пумиськылэммы вунонтэм кылиз. Ижысен Иосиф озьы ик В. Алашеевен, Ф. Васильевен тодматӥз на. Собере шуэ: тодӥськод-а, мынам туж зол кылбурчи эше вань - Володя Романов. Ойдо соин адском. Пыримы доразы. Машинкаен печатласа пуке. Тодматскимы Владимир Васильевичен асэныз, кузпалыныз Галяен. Соку кылбурчи мыным векчигес книга кузьмаса келяз.

Озьы ик та семинаре вуылыкумы, матэгес тодматски уно мукет писательёсын: Алла Кузнецоваен, Герман Ходыревен, Бронислав Ивановен, Геннадий Камашевен, Николай Васильевен, Иван Законовен (берыктӥсь вал таиз). Уно визь-нод, тодон-валан басьтӥ соосын пумиськонъёсын, вераськон-кенешонъёсын. Законов тани рифмаос бордын тросгес ужан пумысь индылӥз: вамышъякуд но, пе, рифмаосын шуд, кылбураны соку капчигес луоз.

Та семинарысен ик эшъяськимы егит кылбурчиен Толя Петровен. Со университетын дышетске вал ни. Ужъёсме эскерылыны басьтӥськиз. Берло но кусыпъёсмес ӧм ыштэ. Пырак университетэ лыктытозь, ужъёсме сэрттылӥз-пертчылӥз, гожтэтэн ысъялляз. Озьы мыным пинал дырысеным кутскыса дышетӥсьёсын удалтылӥз. Университетын но литературной кружок ужаз. Кивалтӥсьмы Даниил Александрович Яшин вал, туж лякыт, визьмо адями. Ваньзы ик соос мылкыдме бурдъяса возизы, будыны юрттизы.

- Озьыен, тӥ азьланяз писатель луондэс пичиысен тодыса будӥды, со пичи дыр малпанды?

- Пырак озьы вераны уз лу. Пичи дыръям малпалляй киномеханик луыны, фотоен но туж мылысь-кыдысь вырылӥ. «Броненосец Потемкин» но мукет фильмъёсты туж синмаськыса учкылӥ. Малпасько, сыӵе ик киноос лэсьтыло (пичи дыръя малпано ук вал ай киномеханик соосты снимать каре дася шуыса). Та мылкыдъёсы сярысь бӧрысь сочинениям но гожтӥ. Ужме Елизавета Герасимовна Багратионова лыдӟиз но шуэ, тон, пе, киномеханик уд лу, дыр, ай, гожъяськемед ӟеч пӧрме, та удыстӥ вамыштод. Зэмен но (солэсь кылэм кари, оло) 8-тӥ класс бере Можга педучилищее мынӥ. Но... алгебраез ӧй ортчы, берытсконо луиз. Дорысьёсме алдай, отын ӧз кельшы шуи. Собере гуртысь эшеным ӵошен Иже кошкимы: киномеханике дышетскыны уг-а луы кытын ке? Утчам-утчам, ӧм шедьтэ. Подшипник заводэ кожимы, уже интыяськыны шуыса. Татын но ӧз удалты. Ӧз кутэ, интымы, пе, ӧвӧл. Озьы дасэтӥ классэ мыноно луиз. Со пумысь, ма, чик ӧй жаля. Школаез йылпумъяса, университетэ лыктӥ. Татын В. Алашеев комиссиен тодматӥз, тани, пе, Котков. Экзаменъёсме умой ортчи - таяз алгебраез сётоно ӧй вал уго.

Экзамен сётыкумы, тунсыко учыре шедьылӥ. Общежитие интыос ӧз тырме, ог уйзэ чугун сюрес вокзалын но кӧлоно луи. Отысен монэ милиционер, егитгес маке, пумитаз, малы, пе, татын уйдэ ортчытӥськод, малы дорад уд бертӥськы. Валэктӥ солы югдурез. Ладно, шуэ, юаськом, тодом ӵуказе, нош али ойдо сьӧрам, маин быгато, юртто. Озьы дораз, милиционеръёслэн общежитиязы, нуиз, ас валесаз интыяса кӧлтӥз. Ӵуказеяз деканатэ ыстӥз: тон пумысь, пе, кенешемын, интыялозы. Соку Виталий Михайлович Марков вал декан. Лыктӥ со доры, юасько. «Мест нет», - шуэ. Паймыса кошкисько ни вал. Но ӧс доры ӧй ву, дугдытӥз, маке тодаз лыктӥз, лэся. «Кызьы нимыд?» - юа. «Котков», - шуисько. Дугды ай, пе, эн кошкы, шедёз инты. Озьы улыны инты-сэрег мыным но шедьтӥзы.

Тӥни сыӵе вакытъёс, ӟеч адямиос но вал ай соку. Жаль, со милиционерлэсь нимзэ юаны соку тодэ ӧз лыкты. Университетын дышетскыкуз Володя «Чипчирганэ» мылысь-кыдысь ветлӥз.

- Колхозэ картошка вылэ ветлыкумы кырӟамме кылӥзы но ӧтизы. Та аре ик нырысетӥ удмурт кырӟанме но кылдытӥ. «Инвисэ бызё чугун сюресъёс» кылбурелы гитараен шудыны крезьгур пӧрмытӥ. Эшъёсы, пиос, нырысь кылыса паймизы: иськай, иськай, шуо, гитараен удмурт сямен кырӟа. Озьы паймемысьтызы бурдъяськи, эшшо крезьгур гожтӥ на. Со ик луиз кырӟан гожъяны кутскеме.

Университетэ тодмо радиожурналистэн Володя Михайловен ог аре пыримы, кык арзэ ӵош дышетскеммы бере, мон армие кошки. Но кусыпмес ӧм ыштэ, гожтэт ог-огмылы кылбурен ысъяськом вал. Володялы огзэ гожтэтме мон, шудыса, быдэскын кылбурен ыстӥ. Пумитам со но мадёнзэ та амалэн ик радъям. Озьы ик азинтӥмы. Табере радиоын ужась эшелэсь «Ладилэн азбараз» передачазэ (со быдэсыз кылбурен дасямын луэ) кылӥсько ке, соку ик егит аръёсы тодам лыкто.

Нош кырӟанъёсылы калыке паськыт вӧлмыны нырысь вакытаз туж юрттӥз В. Кельмаков. Армиысь бертэме бере «Чипчирганэн» Коми шаере потӥмы но, милемыз отын «Льӧмпу сяська» кырӟанэным пумитало. Туж пайми. Нош валэктонэз солэн таӵе вылэм. Валентин Кельмакович кырӟанъёсты туж яратэ, армие кошкыкум, выль кырӟанъёсме магнитофонэ гожтыса кельтӥз вал. Соосты «Чипчирганэн» дышетӥллям. Куд-огзэ коми студентъёслы дорамы куное вуылыкузы кузьмаллям. Озьы тӥни кырӟанэ Удмуртилэн палэназ но вуэм. Кельмаковлы луыса ик сюрес лёги эфире. Со доры куное вуыло вал П. Ёлкинэн В. Владыкин, куспазы эшъяськылӥзы... Соос кылзӥзы кырӟанъёсме но шуо, ойдо, пе, телевидение гожтӥськы: туж усто пӧрме. Асьсэос ик кенешиллям-вераськиллям отысь ужасьёсын. Соку «Выжыкылме» кырӟай вал. Собере радиое но ӧтьылыны ӧдъязы. Озьы дыши, ӧй курдалля ни, эфире азьланяз ӵемысь поталляй.

Университетэз йылпумъямез бере Владимир Котков Якшур-Бодьялан куинь арзэ тыршиз: огдыре ик корреспондент но, радиоорганизатор но, фотокорреспондент но. Ужасьёссы уг тырмо вал. Отысь Иже литконсультантэ ӧтизы.

- Семён Александрович Самсонов вӧзаз ужаны кутӥз, улон сэрег но висъязы. Курдасагес мынӥ выль уже: Володя Романов, Флор Васильев азьвыл ужаллязы отын, туж визьмо, быгатӥсь адямиос. Мынам маке пишмоз меда? Но пӧрмиз кадь, дышоно вылэм. (Татын дыръям огвакытсэ шоркарысьтымы «Октябрь» культура дворецын но кӧня ке ужай - Виталий Шоркинэн, Владислав Кирилловен ӵош удмурт центрын тырши, музыкантъёсын, аранжировка дасясьёсын тодматски. Солы лу-ыса кырӟанъёсын магнит альбомме поттыны быгатӥ.)

Бӧрысьгес кылдӥз «Инвожо» выль журнал - кырӟась, кылбурчи отчы ужаны выжиз. Но, шуэ, таязын ужакум, семьяе, пиналъёсы вал ни, пияше диатезэн туж курадӟиз, эмчиос гуртэ улыны выжыны дэмлаллязы. Мукет ласянь, улон интымы но ӟоскытгес ни вал ньыльнамылы. Озьы гуртэ бертоно кариськимы - кузпалылэн дор палъёсаз, Шаркан районысь Петуньки гуртэ. Нырысь одӥг арлы шуыса гинэ чакламы вал, но шӧдытэк-валатэк дыр ортчиз, тани дас ар луэ ни. Корка пуктӥмы. Табере тани пиналъёсмы но школаез ӝоген йылпумъялозы ни.

- Гуртэ улыны выжеменым, гожъяськон удысын эшшо азинлыкогес ужаны кутски, оло. Нуналлы быдэ гожъяны тыршисько. Пиналъёсын та удысъя ужаме но солы юрттэ. Пумиськеммылы быдэ выль чуръёсыным доразы мыныны тыршисько. Нуназеозь гожъяськисько, бӧрысь кружоке вамыштӥсько. Ньылетӥ арзэ ини татысь пиналъёсынымы литературно-драматической кружок нуисько. Нылпиос кылбуръёс, веросъёс, сценкаос гожъяло, бӧрысь асьсэос ик шудо, возьматыло соосты. Нырысь-валысь Петунькиям гинэ та ужмес азинтӥмы, бӧрысь ёросамы но куризы. Табере Шарканамы Нылпи творчествоя юртын ставка усьтӥзы. Нылпиосылэн ужъёсынызы книга но дасямы ини. Отчы Петунькиысь тямыс автор пыриз. Ужъёссы - вань жанръёсъя. Коньдонэн юрттӥз Шаркан ёросъя депутат Подсевалов Владимир Анатольевич (со Богомольныйлэн воштӥсез, нефтяник). Азьланезлы «Удмуртия» издательствоен книга поттон сярысь кенешимы. Таязын быдэс ёросысьтымы пиналъёслэн ужъёссы луозы ини. Анай-атайёссы коньдонэн юрттозы. Аслам но поттоно ужъёсы лачак люкаськемын ни. Кызь кык книгалы дасямын, радъямын. Но та аръёссэ «Удмуртия» издательство книгаосмес туж ичи печатла. Ку поттозы, ӧйтӧд. Куке-соку кулэ карозы, дыр, ай.

Берло дыре кылбуръёсын артэ пьесаос но гожъясько. Школаын соос кулэ, нош шедьтыны шуг. Арлы быдэ одӥген-кыкен пӧрмытӥсько. Али дас дасез вань ини. Куд-огзэ Удмурт театрын но басьто: «Пинал мылкыд - юмал йӧлпыд» пьесаме мылысь-кыдысь возьматыло. Алнаш театр сое 200 пол сцена вылын шудӥз ини.

- Пьесаосад но повестьёсад уно тумошо учыръёсыз...

- Соос ваньмыз сямен ик котыр улонысьтымы: асэным, эшъёсыным луылэм учыръёс. Али тани повесть гожтыны малпасько. Кылем арын тазалыкмес эскерыны нуллӥзы. Врач монэ учкиз но шуэ, сюлэмад воштӥськонъёсыз, пе, вань. Азьланяз, 40 арес бере, атеросклероз луыны быгатоз. Тӥни со учыр вылын шудыса гожтыны малпасько. Герой малпаськыса шугъяськыны, кайгырыны кутске: неужто сое но, тае но (улонысьтыз тужгес дуно вакытъёссэ, адямиоссэ...) вунэто. Нуналлы быдэ чакла, тодаз вайылэ но... верантэм шумпотэ. Тӥни со амалъягес, со выллемгес пӧрмо ужъёсы.

Гуртын, вера писатель, соиз умой: гожъяськыса жадиськод ке, шутэтскон сямен азбаре, кыре потӥськод, пичи-пичи маке ужаськод (гужем вакытэ, зэм, уж лачак люкаське, шокчыны маза уг луы ни, но толалтэ эркынгес ик) - нош гожъяськем потыны кутске. Городын озьы уг пӧрмы. Уродэз нош сыӵе: литература, искусство удысъя мур-мур вераськыны, кенешыны эш ӧвӧл, ёрмоно. Ярам, компьютер сьӧры пуксиськод ини.

Владимир Васильевич мылкыдын егит, задор. Техникалэсь туала азинсконъёсызлэсь луонлыкъёссэс котыр ласянь улоназ но ужаз кутыны тырше. Гуртэ улыны выжемез бере ик компьютер басьтӥз. Соин печатланы но трослы ӝоггес, озьы ик пӧртэм удысъя тодон-валанъёс, пӧртэм иворъёс тодыны-басьтыны но лякытгес. Одӥг компьютер диске быдэс библиотека тэре, инты трос кулэ ӧвӧл. Дуннеысь литературалы, музыкалы но мукет удысъёслы сӥзем бичетъёсты пиналъёссы но мылысь-кыдысь учкыло.

Котков кузпалъёс кык нылпи будэто. Бадӟымез, Наташа, крезьгуръя школае ветлӥз, баянэн шудэ. Туэ 10-тӥ классэ мынӥз ини, Ижысь гуманитарной лицейын дышетсконзэ азинтоз. Пияшсы Алёша 7-тӥе выжиз. Атаезлэн кадь ик гожъяськон мылкыдыз пичиысен шӧдӥське, кылбуръёсыз «Ӟечбурын!», «Кизилиын», озьы ик «Кенешын» но поталлязы ини.

- Вӧзаз бен пичиен юрттӥсько ачим но, - валэктэ Владимир Васильевич. - Кружокысьтым мукет нылпиослы выллем ик. Ми отын одӥг кылбурез эскерыны басьтӥськом ке, печатланы ярамон ик волятыны тыршиськом ни. Кылбур-веросъёссы бордын кутсконысеныз пумозяз ужаны мед дышозы. Нош огшоры теория вылын талы уд дышеты.

Володя Выль ар азьын 29-тӥ толсуре вордӥськемын. Но паспортаз пусъем нуналэз му-кет - 2тӥ толшор. Азьвыл тае туж ик уг чаклало вал уго. Сельсоветэ мумиз-бубиз ку ивортӥзы - со нунал ик вордскем нуналэн но лыдъяськылӥз. Озьы-а, тазьы-а но, Выль арез пусйыкузы, дорысьёсыз одно ик сюмык ӝуто со понна но: шудо-буро мед луод, выль азинсконъёс тыныд, Володя. Та кылъёсты сюлмысь ик вераме потэ мынам но.


Источник:

Котков В. В. Нуналлы быдэ - кылбур, арлы быдэ - кык пьеса / В. В. Котков ; записал Владимир Возняков // Удмурт дунне. - 2001. - 14 сент. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"