Редактирование: Королёва Любовь Николаевна

==«Ашальчи» вайиз данъян==

[[Файл:Lyubov koroleva.jpg|thumb|left|Королева Л. Н.]]
'''«Калык кырӟан» номинациын туэ Удмуртиысь Правительстволэсь «Данъян» («Признание») премизэ басьтӥз Кияса ёрос культурая юртын ужась Любовь Николаевна Королёва. 15 ар ни со кивалтэ «Ашальчи» калык ансамблен. Со дунъямын Удмуртиысь Правительстволэн, Культурая но туризмъя ми-нистерстволэн Данъян грамотаосынызы.'''

'''Сцена кыскиз'''
Кияса ёрос ӟучгес лыдъяське ке но, быдэс шаер тыр асьсэ вашкала кырӟанъёсынызы тодмо луо бадӟым удмурт гуртъёсыз: Вуж Салья, Тӥгырмен но Уддяди. Ӵапак берпуметӥяз вордӥськиз милям героймы. Оло, гуртысь кенакъёслэн кырӟась сямзы пичи дыръяз ик паласькиз Любовь Королёвалы но? Но Ижысь культурая училищее пыреме шуак-дуак вал, кызьы али премия басьтэме но, вера Любовь Королёва.

- Училищее пырытозям, мон уг ик тодӥськы вал, кырӟаны быгатӥсько шуыса. Школаын яратоно предметъёсы ик ӧй вал, шоро-куспо дышетски. Анае, песянае кадь ик, эмъясь. Солэн монэ медучилищее ик ыстэмез потэ вал. Огласянь, та уж мыным кельше. Мама али «скоройын» ужа бере, дорамы весь адямиос ветло, укол пуктэ но, адямиослы соку ик капчигес луэ. Калыклы эмъясь шумпотон вае. Но улонэ мукет сямен радъяськиз.

Уддяди школаямы хореограф Раиса Валентиновна Главатских ужаны вуиз. Ми быдэс школаен бурдъяськем мылкыдын солэн урокъёсаз ветлыны кутскимы. Со туж быгатӥсь но буйгасьтэм сямо вал, весь милемыз ӵошатсконъёсы потталляз, отын ми котьку нырысетӥ интыос басьямы. Милемды со дышетӥз вашкала калык эктонъёслы, эстраднойзэ куриськом ке вал, со талы воксё пумит луылӥз. Огпол милемын пуктӥз балтаси эктон, отчы куэм дэремъёс кулэ луизы. Ми, сомында нылпиос, ваньмы шедьтӥмы ук со вашкала удмурт дэремъёсты. Мыным соку Кечейылысь песянае юрттӥз. Али со куэм дэременым «Ашальчи» ансамбльын кырӟасько. Раиса Валентиновна ик милемлы вераз, Ижын, пе, вань сыӵе училище, сое быдтэмды бере культура удысын ужалоды.

Озьы Любалэн эшез пыре Ижысь культурая училищее, эктонъя отделение, со сьӧры дасяське Люба но. Егит ныллэн туж потэ вылэм эктӥсе ик дышетскемез, но, мугоры ноку ӟызы ӧй вал, уг быгаты, дыр, шуыса, Люба малпаськонэ усе. Мукет ласянь, сценалэсь но куштӥськемез уг поты, эктыны-кырӟаны мылкыдыз бадӟым. Ма, шуэ эшез, татын кырӟасьлы но дышетскыны луэ ук. Озьы Люба Королёва городэ вуэ.

Крезьгурлы дышетскыны шуг, тужгес но гуртысь пиналъёслы – нотаосты, теориез уг тодо. Но Любалы быръем удысэз туж кельше, школаынлэсь но капчигес дышетске, быдэс нунал куспын шокчыны ик маза ӧвӧл ке но: занятиос, репетиция, ансамбле ветлон... Татын Люба фольклорлы эшшо но матынгес луэ – уго калык кырӟанъя отделение пыре. Нырысь ветлэ «Зарни крезь» ансамбле, собере – «Зангарие».

- Училищеын дышетскон туж шулдыр вакыт вал, – вера Любовь Николаевна. - Весь кытчы ке но потаськом, шузияськиськом, дышетскыса но вуттӥськом вал. Огпол группаенымы поръяны потӥм. Училище бордын базар вань, со азьын азьвыл милицаослэн будказы сылӥз. Ойдо, пе, милицаослы кырӟалом. Будка азе султӥм но быдэс репертуармес быдэстӥм. Милиционеръёс пумозяз кылзӥськыса сылӥзы ук. Базарчиос нош таӵеослы дышемын вал ни: я эктӥсьёсмы доразы вуо, я режиссёръёсмы буям ымныръёсын пӧлтӥзы ветло. Огпол арнянуналэ огез нылмы шуэ, братэ, пе, армие кошке, ми соку ик автобусэ пуксим но сое келяны шонтӥм. Вань ӵыжы-выжыосызлэн тодазы кылимы, дыр. Арганчимы но сьӧрамы вал на ук!

'''Одӥг семья кадь'''
2011-тӥ ар. Люба Королёва дышетске берпуметӥ курсын. Татчыозь со Вуж Сальялан практика ортчиз ни но ёросысь культура удысын ужасьёслэн син азязы йӧтӥз.

- Училищеын огпол «Люба Королёва, Люба Королёва!» шуыса кесяськемез кылӥсько, Кияса ёросысь культурая управлениен кивалтӥсь коридор кузя, монэ утчаса, бызьылэ вылэм. Озьы но озьы, пе, лыктод ми доры ужаны, «Ашальчи» калык ансамбльмылэн кивалтӥсез ӧвӧл.

Соку ансамбльын шуг югдур вылэм: кивалтӥсьсы кошкем бере артистъёс но пазьгиськиллям. Егит кивалтӥсьлы выльысен калыкез люкано луиз.
- Егит дыръя шуг-секытъёс сярысь уд малпаськиськы, – тодаз вае Любовь Королёва. – Мылкыд пӧзе, ваньмыз тунсыко потэ, аръёс ортчемъя со лапкомиськод ни.

Соку егит нылаш ӝуась синъёсын кутскиз репетициос ортчытъяны, выль репертуар кылдытыны, озьы ансамбле азьвылъёсыз артистъёс но выльысен кыстӥськизы. Шӧдӥз меда Любовь Николаевна ассэ соку кивалтӥсен?

- Мон али но асме кивалтӥсен уг шӧдӥськы, – вера артистка. - Валамон, мыным куд-ог юанъёсты сэрттоно-пертчоно, доку-ментъёсты нуоно луэ, мон кыл кутӥсько, кызьы сцена вылын адӟиськоз милям коллективмы – нош таиз валтӥсез. Котькыӵе коллективен, огласянь, ужаны шуг, котькуд адямиез кылзоно, кылоно, урод мылкыддэ соос вылэ кисьтоно ӧвӧл. Мукет ласянь, калыкез но ансамбле кыскыны шуг, соос отчы дунтэк ветло ук. Кулэ маин ке гочатыны. Но «ашальчиос» репетицие шумпотыса ветло. Уг вуо 2 мугъя гинэ: яке ужысьтызы ӧз лэзе, яке висьыны усизы. Кемагес ум пумиськылӥське ни ке, асьсэос жингырто. Кызьы шуисько, та коллективез мон ачимъя лэсьтӥ ини. Ми ваньмы оградын сылӥськом, одӥг семья кадь асьмемыз шӧдӥськом: вань праздникъёсты ӵошен ортчытӥськом, ял карыны инкуазе потаны тыршиськом, вань шуг-секытъёсмес чошен сэрттӥськом-пертчиськом, ог-огмылы юрттӥськиськом. Кылсярысь, ансамбле ветлэ ветеринар. Уддядиын парсьмы висьыны усиз. Мон раз! жингыртӥ Любовь Июдовналы, юрттэт кулэ, шуисько. Со парсьмес эмъяз, пыд йылаз султытӥз. Ансамблямы али ветло 14 кузя артистъёс. Ветеринар сяна, пӧламы вань пинь эмъясьёс, библиотекаын, администрациын ужасьёс, пенсионеръёс, клубын ужась аккомпаниаторез лыдэ басьтытэк, одӥг воргоронмы но вань – Кияса ёросысь сюресъёсты лэсьтонъя управлениын ужась, уж дораз, пе, солэн кушем нимыз ик Артист.

«Ашальчи» ансамблез кылдытӥсь удмуртъёс пӧлын азьветлӥсь Надежда Пахомова, 20 аръёс пала коллектив нуллэ ни «калык ансамбль» ним. «Ашальчиын» чузъясько ёросысь гуртъёсысь шедьтэм гуръёс, авторской кырзанъёс, кылсярысь, Уддядиысь Н. Уткинлэн, Вуж Сальялась В. Бочкарёвлэн, Алнашысь Н. Постниковлэн. Репертуарзы ялан выльдӥське. Огзэ кырӟанэз Интернетысь шедьто, мукетсэ – бичетъёсысь.

Коллективлэн, огласянь, улонэз кырӟанэн валче шулдыр ортче, мукет ласянь, солы аслэсьтыз нимзэ возёно. Уго «калык ансамбль» ним мукетъёслы котыр ласянь адӟем карымон луыны косэ.

- 5 арлы быдэ коллективлы выльысен калык нимзэ утьыны кулэ, – вера Любовь Николаевна. - Со понна одно ик кулэ фестивальёсы пыриськылыны, конкурсъёсын вормылыны. Ми ялан потаськом Россиысь конкурсъёсы. Эшъяськиськом Марий Элысь «Ӟардон» коллективен, Чебоксарые «Родники России» фестивале ветлӥськом. Берлозэ потам удмурт культурая арез ворсанлы сӥзем концертэ. Нырысь быдэс ар ӵоже ёросамы удмурт культуралы сӥзем ужрадъёс радъяллям, бадӟым концерт пуктӥм, отысь видео лэсьтыса, Егитъёслэн юртазы келям. «Калык кырӟан» номинациын 2-тӥ степенё лауреат луим.
Со сяна, ашальчиос ялан пиналъёсын пумиськыло. Калык коллективлэн, пе, одно ик луыны кулэ «спутник» коллективез. Озьы Уддядиысь пиналъёсын ӵош ансамбль номер пуктэм, пиналъёс таин Венгрие но поталлям.

- Али нылпи садысь ӟуч пиналъёсын ужаськом. Юрттӥське удмурт воспитатель. Нырысь кылбур дышетӥськом, собере кырӟаськом, нылпиос туж чаляк пыӵато. Собере ини номеръёсынымы пыриськиськом ёрос концертъёсы, нылпиос асьсэ праздникъёсазы но кырӟало дышетэм гуръёссэс.

'''Сям-йылолъёс уг сурасько'''

Любовь Королёвалэн коллективен ужанэз 4 часын ӝыт гинэ кутске ай. Нош солэсь азьвыл со – калык творчествоя методист. Гуртъёстӥ ветлон, калык сям-йылолъёсты, калык кырӟанъёсты улӟытон, гуртысь клубын ужасьёслы визь-кенеш сётон – ваньмыз та солэн ужез. 

- Мыным потэ, милям быдэс ёросмы  зарни! Татын трос удмурт гуртъёс ӧвӧл ке но, ваньзы соос ог-огзылэсь висъясько кырӟан гуръёсын, вераськеменызы, сям-йылолъёсынызы, – вера Любовь Королёва. - Кылсярысь, Уддяди, Салья гуръёсын шӧдӥське бигер манер. Валамон, кырӟанъёс, сямъёс «кышнояськыса-бызьыса» сураськемын ни. Но гуртысь гуртэ уг выжо сям-йылолъёс. Кылсярысь, Чекан сям. Со Калашурын гинэ ортче. Качыян (високосной) аре калык люкаське нимысьтыз интые, но асьсэ кулонэнызы та дуннеысь кошкымтэ (асьсэзыз быдтэм, ожын бырем) адямиос понна куяське. Нош Уддядиын вань асьсэлэн Акашказы: Пасха бере мукет нуналаз калык куяськыны люкаське. Нырысь урам кузя ветло, вӧй, кеньыр бичаса, собере пуртыын ӝук пӧзьто но урам кузя валэн тубо. Котькуд капка азьын соосты пумитало. Туж тунсыко. Ваньмыз со улэп на. Та понна тау шуыны кулэ, дыр, гуртъёсысь фольклорной коллективъёслы. Соос тыршо сям-йылолъёсты утьыны, возьыны. Калыкез праздникъёсы люкало. Ваньмыз организатор бордысь потэ ук. Ӵапак «Калык кырӟан» номинациын «Данъян» премиез нырысетӥ арзэ сётӥзы вал Уддядиысь Ӝакы апайлы.

Ёросъёсысь калык культурая методистъёс тыршо гуртъёсысь люкам кырӟанъёсты, гуръёсты, сям-йылолъёсты Россиысь огъя реестре пыртыны. Озьыен, соос уз ыше ни. Но, шуэ Любовь Николаевна, туж потэ вылэм люкам материалъёсты методичкаен поттыны. Али куд-ог гуръёс гожтэмын ни диске. Юрттӥське егит тодосчи Николай Анисимов, со кырӟанэз нота вылэ гожтон вылысь специалист шедьтэ, алигес дискен поттӥз тӥгырмен гуръёсты.

- Ёросамы ортчиз нылпиослэн фольклор коллективъёссы куспын «Предание старины глубокой» фестиваль. Али но шумпотыса ветлӥсько на, асьмелэн сыче быгатӥсь нылпиосмы вань шуыса. Адӟиськод, кызьы нылпиос конкурсысь конкурсэ будо но будо. Со сярысь ик ми вераськом кружокъёсты нуисьёслы, культураын ужасьёслы – кудбыдӟа уж соос нуо, кыӵе соос адӟем карымонэсь.

'''Африка гочатэ'''

- Мон эшшо ветлӥсько на культураын ужасьёслэн «Непоседы» коллективазы. Туннэ гуртэ концертэн потӥськом. 4 часын «Ашальчиосын» пумиськеммы бере садике пиме басьтыны чаляк мыноно луоз – 6 часын нылпи сад ворсасьске ни. Умой, песянаймы вань, пиме мамае доры кельтӥсько но концерт пуктыны кошкисько, – шуэ Любовь Королёва. - Милям ужан нуналмы часэн лыдъямын ӧвӧл: туннэ ми мынӥськом концерт пуктыны, нош ӵуказеяз ӵукна ик уже потӥськом. Огез гинэ жадьытэ: вамышлы быдэ бумага, отчётъёс лэсьтоно луэ. Но та огсыр ужлэсь, фестивальёсы ветлыку, шутэтскиськод, коллективеныд матэгес луиськод, Россиысь, шаерысьтымы мукет коллективъёсын тодматскиськод. Чебоксарыын фестивальын ми паймыса учким кунгож сьӧрысь вуэм коллектив шоры. Артистъёс дымбыртонэн, мукет куашетӥсь инструментъёсын шудӥзы, сцена вылын шузимыса тэтчазы, оломар но дауртӥзы. Соос озьы мукет дуннеязы выйылӥзы кадь. Калык сыӵе экспериментъёслэсь уг кышка, кыстӥське гинэ, мон шуысал. Сотэк но гуртын улон огкадь, секыт, нош таӵе номеръёсты адӟыса, малпаськыны кутскиськод, озьы но луэ вылэм шуыса.
Озьы ке но Киясалэсь палэнэ, эшшо но огыр-бугыргес улонэ, Любалэн кошкемез ноку но ӧз потылы.
- Удмурт кун университетын вылӥ тодон-валан басьтыкум, Иже ветлоно луылӥз. Отын сомында транспорт, калык олокытчы дыртэ, донгаське. 10 часын ӝыт, куке гурт изе ни, городын улон пӧзьыны гинэ кутске ай. Ӧвӧл, сыӵе улон мон понна ӧвӧл.

Калленэн Любовь Королёвалэн малпанъёсыз быдэсмо ни. Улон озьы куре, шуэ артистка. Кылсярысь, туж, пе, потэ вал машинаен ворттылэме, табере машинаям пуксисько но Уддядие шонтӥсько, собере Киясаын улон инты кулэ луиз – со но кылдӥз, собере нылпи ваем потӥз. Любалэн пиезлы али 3 арес, со али ик анаезлэсь кырӟамзэ кылзыны яратэ ни. Уддядие бертыны потӥськом ке, «мама, кырӟа», шуэ, пе.

- Мынам потэ на кыӵе ке крезьгуро инструментэн шудэме, аккомпаниаторез возьмаса пукытэк, репетиция чаляк ортчытӥд но ваньмид. Но озьы гинэ уг пӧрмы вылэм, – мылкыдзэ шарая Любовь Королёва. - Училищеын тырши ке но фортепьяноез серметаны, ӧй быгаты. Баянэн но тани: тапалзэ зӥб, сопалзэ зӥб, эшшо кыскы на. Шуг! Паймисько крезьгуро инструментэн шудыны быгатӥсьёслы. Со Инмарен сётэм талант. Эшшо потэ на Африкае вуылэме, кытын воксё мукет калыкъёс (кузылэн буёлэз ик мукет!), сям-йылолъёс, кырӟан-эктонъёс. Лобӟысал самолётэн, коллективен...

'''Источник:'''

Королёва, Любовь Николаевна. «Ашальчи» вайиз данъян [Текст] : [беседа] / Любовь Королёва ; записала Мария Векшина // Удмурт дунне. - 2017. - 9 февраля. - С. 10, 15 : фот. - (Тӧр шорын).

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]