Редактирование: Корепанова Алефтина

== '''Вить дипломе луысал''' ==
[[Файл:Корепанова.jpg|thumb|left|А. Корепанова]]
'''Пыдэстэм инбамын вань аспӧртэм сузэръёс-кизилиос. Уно миллиард ар ӵоже соос трос миллиард иськемез ортчо, кунулскыса музэн, ог-огзэс возьыса. Огез шуак пуштэ ке, мукетыз йыроме, сюрессэ ыштэ но олокытчы луэ.

Музъем вылын но сыӵе люконтэм эшъёс вань. Асьмелэн пельёсмы кемалась дышизы ни таӵе кылъёслы: кырӟало Мефодьевна но Зоринча – Алефтина Корепанова но [[Зорина Ольга|Ольга Зорина]].

Туж пӧртэмесь соос. Зорина ваньзэ лэсьтэ йыг-йыг: басьтэ кык диплом, вае куинь нылпи, театрын шудэ уно рольёсты, луэ республикаысь дано артистка. Корепанова ӝог ӝуалске но кысэ. Театрын со вал актриса – луиз костюм дасясь. Дышетсконзэ уно пол куяз. Семьен улонзэ кема радъяны выриз.
Но соос – ог-огзылэсь люконтэм кизилиос.'''

'''- Дунне вылын вань Аляос Алевтина гожтӥсько. Нош тон кызьы Алефтина луид? Мукетъёсызлэсь пӧртэм кариськемед потӥз шат?'''

- Мон мукетъёсызлэсь пӧртэм ӧй вал. Монэ сыӵе кариллям сельсоветысь мон кадь ик грамотейёс. Нимме Алефтина гожтӥллям бере, мон сое ӧй тупаты ни.

'''- Шонер-а вералляло, тынад дипломед сизьым шуыса? Лекос трос кадь.'''

- Сизьым луысал, котькудзэ мытэм дышетсконме пумозяз вуттысал ке. Ойдолэ лыдъялом. 

Пиналысен дорам концерт пуктылӥ. Вылам оломар но дӥсясько, висъет сьӧрысь шуак мычиськисько но ялӥсько:

- Выступает заслуженная артистка Алефтина Перевощикова!

Собере кырӟан мытӥсько. Пичиысен артистка луэме потылӥз. Математика шоры кырыж синмын учкылӥ, сцена вылын со кулэ уз луы кожалляй. Нош тямысэтӥ класс бере сыӵе малпанлэсь куштӥськытэк ӧйлась. Мемие кужмысь ыстӥз Ижысь Медициная училищее. Математикаен куашкало, пӧй. Мемей буйгатӥз: отысь математикаен дышетӥсь тодмое, пе, мон соин кенеши ни – юрттоз.

Мынӥ. Экзаменэ пыри. Тупаны но кулэ, ява: туж капчи юан сюриз. Малпасько: сое шонер мади ке, дышетскыны кутозы ук. Билетме куштӥ но потӥ. Дорам бертӥ – пырыны ӧй быгаты, пӧй.

Озьы нырысетӥ дипломе киысьтым вольтчиз. Йылпумъяй дас классэз. Кыкетӥ диплом дуре мынӥ Удмурт университетэ. Школаысь удмурт кыллы дышетӥсе Галина Яковлевна Курбатова, Татариын будэм маке, монэ яратэ вал. Сьӧрам [[Тараканов Иван Васильевич|Иван Тараканов]]профессорлы гожтэт келяз но монэ лӧпкытӥз: отын фольклорез дышето, «Чипчирган» ансамбльзы вань, шедьтод ас интыдэ.

Возьдаськон  сямыным гожтэтме Таракановлы сётыны возьдаськи. Экзаменъёс сётӥ – конкурс пыр ӧй поты. Туннэ но гожтэтме утисько аслам архив шуонам.
Куиньметӥ диплом понна йыгаськи Культурая училищее. Мемее но ӧз ӵыжаськы ни: клубе кариськемед потэ ке – мын, улытозяд отын ужа. Учкисько: ялонын хореографияя люкет вань. Озьыен, хорын кырӟаны татын дышето.

Кужымме эскерыны вамыштӥ. Нокин уг кырӟа. Ваньмыз пыдъёссэс озьы-тазьы ӝутъяло: балетын эктӥсь, пе, луом. Мыным татчы кулэ ӧвӧл! Тодӥсьёс валэктӥзы ни: кырӟасьёс понна вань ук хорлы дирижёръёсты дасян люкет. Экзаменме умой сётыса, пыри училищее.

Группаямы сюриллям [[Кузнецов Геннадий Васильевич|Геннадий Кузнецов]] (Россиысь вуоно дано артист), Ольга Логинова (Удмуртиысь вуоно дано артистка Зорина - Зоринча).
Кыкетӥ курсозь вуи но… Гуртын мон дышемын вал котьку калык син азьын берганы. Татысь город калык вераськемме но, выросъёсме но серекъя кадь. Нотаосты уг валаськы, фортепьяноен курадӟисько. Висьылыны ӧдъяй. Академической шуон отпуск басьтӥ.

'''- Куинетӥ диплом но кияд ӧз вуы. Нош кызьы сотэк тонэ кутӥзы Удмурт драмтеатре?'''

- Шарканам бертӥ но, монэ ыстӥзы Зюзяе пионервожатое. Ар ужаме бере мемей жингыртэ:

'''- Весь шуиськод вал: артистка луод. Газетын ялон вань: Удмурт драмтеатре конкурс ялэмын.'''

Султӥ но мынӥ. Калык тачак. Кин мар шыпыртэ: таиз Нина Бакишевалэн ӵыжы-выжыез, сое ик кутозы. Мон шып пукисько, тодам ваи: Культурая училищеын дыръям Россиысь кылбур лыдӟисьёслэн Пушкинлы сӥзем ӵошатсконазы ветлӥ вал. Отчы сюриськиз шӧдтэк шорысь. Удмуртиысь адямиосты быръён ужрадын мон ӧй вал. Соосты келяны кутско но, огзы но уг сюро. Кин ке тодаз ваем: телевизор пыр, пе, Культурая училищеысь кыӵе ке нылашказы маке лыдӟиз. Монэ шедьтӥзы, Александр Пушкинлэсь удмуртэ берыктэм «Сяська»  кылбурзэ сётӥзы но шуизы: мынод Горькие, зоная ӵошатсконэ. Чуръёсме дышетӥ ни поездын.

Конкурсын мыным диплом сётыны дасяськизы. Нош кыӵе ке ӟуч кышномурт жюриын ӵашетыны ӧдъяз:

- Оломар кылын оломае лыдӟиз но, тӥ сое валатэк ик умоен лыдъяськоды.

Жюриос мыным шуо:

- Ӟуч сямен лыдӟыны пӧрмытод-а?

- Вителэ кӧня ке.

Кылбур кузь ӧвӧл, йырсазе зол ай. Син куспын дышетӥ но мади. Мыным ик диплом сётӥзы. Ӝыны ар улыса, ӧтизы Москвае, Пушкинлэн музеяз. Лауреатъёс но дипломантъёс возьматӥзы концерт. «Сяськаез» лыдӟи удмурт но ӟуч сямен. Улытозям нырысьсэ кузьмазы олома быдӟа гладиолусъёс.

'''- Сыӵе муртэ ке ӧвӧл, кинэ кутоно театре?'''

- Ӝӧк сьӧрын пукись комиссия пӧлысь огез ӝужыт мугоро воргорон, культурая министрлэн воштӥсез [[Романов Леонид Григорьевич|Леонид Григорьевич Романов]], паськыт пальпотэ:

- Тӥни со пичи нылашлэн ассэ туж возьматэмез потэ, но кышка.

Потӥ. «Сяська» кылбурме лыдӟи. Шуо: пилем гудыръяса лыктэ, вын-сузэръёсыд шур сьӧрын, ӧть соосты, тӥни пукон вылэ туб но укноетӥ черекъя. Озьы ик кари. Театрысь укно учке пӧртэм министерствоослэн укнооссы пала. Чир! кесяськисько, киыным шонасько. Сопалаз одӥг йӧно йыр мычиське, мукетыз… Музэ тэтчи но уретӥ: уг ни черекъя, калыкъёс учко.

Театре басьтӥзы ньыль муртэ – Ижысь нылашез (удмурт кылэз ляб тодэменыз, берло кошкиз), Александр Баймурзинэз, монэ но Галина Радыгинаез. 

'''- Табере одно ик диплом кулэ.'''

- Озьы. Арлыды пинал, артистъёс ӧжыт, рольёсы трос, нош дышетскеме потэ. Уфаысь Искусствоосъя институтэ студентъёсты быръён сярысь ялӥзы но, ми Александр Баймурзинэн грузин кырӟанэз дасям. Валамон ини, кыкнамы куиньзэ ик турез умой потӥм.

Экзаменэ мыноно Удмурт университетэ. Кызьы мон сётом вунэтэм удмурт кылэз? Урод дунъет басьтӥ ке, макем возьыт луоз! Ӧй пыры экзаменэ, ӧй пыры институтэ. Али но туж жалясько. Малы ке шуоно соку мон кадьёсты экзаменын кызьы но озьы пельтӥзы  ӝутӥллям. Соос дышетскыны кошкизы.
Мон весь театрын ужасько но асме буйгатӥсько: уфаос ай ку бертозы, нош мынам яратоно удысэ вань.

Витетӥ дипломме тазьы ыштӥ. Москваысь Театръя Щукин нимо училищеысь педагог Калиновский дорамы лыктӥз. Гогольлэн «Кышнояськон» пьесаезъя спектакль пуктыны. Мыным роль сётӥзы. Репетициын шорам сак учкиз, дораз ӧтиз но юаз: «Тӥ сыӵе аспӧртэм маке, мае-о йылпумъяды? Номыре но ӧд? Дышетскемды потэ-а? Июне, мукет абитуриентъёс вуэмлэсь азьвыл, лыктэлэ Москвае. Мон тӥледды педагогъёслы возьмато. Экзаментэк ик кутом».
Гужем гуртъёсы гастроле кошким. Одӥг спектакльын куинь ролез шудӥсько, шок-пуль шокаса, дӥськутме мырдэм вошъяны вуисько. Собере пыэд кутӥз. Туннэ валасько ни: кышкаменым медам мыны шуыса, асме ачим озьы утьыны выри, дыр, соин ик висьыны уси.

Уфаос но бертӥзы ни. Режиссёр воштӥськиз. Таиз кырыжгес учкыны ӧдъяз кадь. Аръёс ортчо. Эш но кулэ кадь. Мыным ярасез монэ уг адӟы, монэ яратӥсез мыным уг кельшы. Пинал ваи. Сцена вылысь васьки. Нош театрысь ӧй кошкы. Костюм дасясь луи.

'''- Собере выльысь сцена вылэ тубид.'''

- Озьы. Труппа вакчигес спектаклен гуртъёсы потыны дасяськиз. Пумиськонлэн кыкетӥ люкетаз концерт луэ. Ольга Зорина дэмлаз ӵошен кужыммес эскерыны. Кык кырӟанэз аслаз вылэм ни, огзэ басьтӥм «Насьток но Исьток» спектакльысь. Куарамес тупатыны ӧм курадӟе. Мон училищеын ик альт гурен чирдӥсько вал. Олялэн улӥ куараос но, вылӥ куараос но чебер пӧрмо.

'''- Училищеез ӧд ке но йылпумъя, отын дышетскемед ик кӧня ке юрттӥз, иське?'''

- Шуг вераны. Али отын фольклор люкет вань. Азьвыл милемды, калык куараен йӧндырисьёсты, академической куарае выжтыны вырылӥзы. Аръёс ортчыса гинэ, педагоге шуиз: тонэ тӥяно вылымтэ, калык куараен ик кырӟатоно вал. Али лулскисько: калык манерен но уг пишмытӥськы, академической амаллы но ӧй дышы. Оля бордын ойдо бӧксӥсько улӥяз.

Гастрольын ик выль кырӟанъёсты дышетӥм. [[Бекманов Геннадий Иванович|Геннадий Бекманов]] бордамы баянэн вал. Дасо кырӟан дасямы, быдэс концерт сётылӥм ни. Урмыса ик ужамы. Ӝытазе концерт,  нуназе но куддыръя концерт. Висказ весь репетициос. Автобусын но ыммы ӧз ворсаськылы.

Олялэсь куаразэ азьвыл ик дунъяло но солы юртто вал. Монэ нокин но санэ ӧз басьтылы. Оля но кытӥяз вералляз: тазэ огнам кырӟало ай. Мон ачим но солэсь огназ нёжъямзэ туж яратӥсько. «Капи-кап» но «Шур бызе» бере ми шуак ӝутским. Табере кыкнаместы ушъяло ни кадь. Оля кытчы ке огназ кошкылӥз но, солэсь юало, пе: кытын «Капи-капед»?

'''- Кызьы кылдӥз бен «Капи-кап»?'''

- Уг ваты – Ольгалэсь вожъяськыса. Весь ас поннам кырӟасько, кылбур лыдӟонъя бадӟым ӵошатсконъёсы ветлӥ, нош монэ нокин уг тоды. Оля маке-маке гожъя бере, ойдо мон но эскеро. Ки улам сюриз Алла Кузнецовалэн кылбурез. Мылкыды урод. Дорын нокин ӧвӧл. Картэ Италиын. Кык бакча мон вылын. Пиналы пичи. Чуръёс вадьсын бӧрдыса пукисько.

'''- Ӵапак капи-кап.'''

- Бен. Озьы ик гур пӧрмиз. Кузпалэ бертӥз но, солы нёжъясько. Геннадий улӟиз: гожты-гожты, зэмос хит пӧрмоз. Нош Иван Григорьевых синъёссэ шабала быдӟа усьтӥз но «буйгатӥз»: таӵе макеослы мон фонограмма кылдытыны уг пишмыты.

Соку мон Ольга Зоринаез нерад кари: ойдо огшоры гинэ нёжъялом. Кык куараен кырӟам, магнитофон кассетае гожтӥм но Григорьевыхез кылзытӥм. Соку гинэ фонограмма дасяз.

'''- Нотаосты валаськод-а?'''

- Культурая училищеын йӧндырисько вал. Али куараез нотаен лыдӟыны быгатӥсько, гожтыны уг пӧрмытӥськы. Тӥни малы «Капи-кап» вордскиз бӧрдыса-нукыртыса.

'''- Алла кызьы дунъя кырӟандэ?'''

- Алла соку [[Чернова Татьяна|Таня Чернова]] дорын кунояське вылэм. «Капи-капез» радио пыр кылзӥллям но бӧрдыса пукиллям. Алла пенсия басьтэм, вина кутэм но театре вуэм. Ушъяны кыл уг шедьты. Магнитофонысь вить-куать пол кылзӥз. Та кылбурезъя аслаз но гурез вылэм, лэся, но капчи мылкыдо.
Та кырӟанзэ ачиз ик ӝыны часкын ӟуче берыктӥз. Сыӵе ик ӟеч пӧрмиз. Сыӵе бадӟым талантэз!

'''- Кык кузя но огнын кырӟанлэн маиз пӧртэм?'''

- Туж бадӟым пӧртэмлыкез. Пиньы висемен, огаз концертэ ӧй ветлы. Бертыса Оля лулске: мон огнам кырӟаны уг быгатӥськы ни, ойдо ӵошен. Мынам паллян палам Оля ке ӧвӧл, мон долкасько. Коть ымзэ но медаз усья, но вӧзам мед сылоз. Бур палам кариське ке, гуньдӥсько.

'''- Костюм дасясь тон кыӵе – усто-а, ӧвӧл-а? Ма кароно отын – мертано, вандоно, вуроно?'''

- Суредась сётэ эскиз. Со ик бырйыны кулэ дӥськут: кинлы мар тупа, кыӵе буёл кельше. Мыным куддыръя эскиз но уг вутто. Суредась куре: вуж дӥсьёслэсь таизлы маке бырйы ай. Артистъёс но оскыса лыкто: тодонэд вань, шедьты ай мыным маке тупасьсэ.

Театре мынам удысэя нокыӵе изданиос уг вуо. Мон отысь-татысь оломар но утчасько – модаосъя журнал, театръёсъя журнал. Вань уждунэ солы кошке. Бумагаосам бугыръяське кинлэн мылыз потэ. Ог люкетэз изданиос пыдъясько. Куд-огез берен берытско. Гожъяны эшъёс азьын ӟеч ӧвӧл. Тани частушкаосын книгаме нокызьы уг шедьтӥськы. Арлыдэн валче вунэтӥсько но ни. 

'''- Костюм дасясьёс трос-а театрын?'''

- Кык кузя лыдъяськиськом. Туж оскымон эше вал – уждун пичи шуыса, кошкиз.

'''- Нош рольёслэсь мӧзмон сюлэмын кылемын-а?'''

- Мӧйымисько ке но, кылемын. Кышноосмы театрын трос ке но, алигес кулэм режиссёр Александр Вершинин быдэс коллектив азьын шуылоз вал:  мон одно ужало ай. Леонид Романов но, Валентина Бекманова но куд-ог персонажъёсысь монэ адӟо. Нош артисткаос соку ик пештырско: ми асьмеос но трос кузя, мед кырӟалоз ойдо. Синвуозь но вуттылэмзы вань. Йыркуръяськемзы понна ӧчкарыса эшшо маке золгес дасяме потэ. Со ик, вылды, туннэ улонэлэн пыкетэз.

Вторая часть интервью в разделе "Удмуртские звезды", Ольга Зорина.

'''Источник:'''

Корепанова А. Зоринча но Мефодьевна. Нырысетӥ веран: "Вить дипломе луысал" / А. Корепанова, О. Зорина ; записал А. П. Шкляев // Удмурт дунне. - 2002. - 1 марта. - С. 6, 11. - (Удмурт кизилиос).


'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

 
[[Категория:Удмуртские звезды]]