Редактирование: Конюхова Августа

'''Августа Васильевна Конюхова''' (1911-тӥ арын 24 шуркынмонэ, Дэбес ёрос, Удмурт Лем гурт – 2014-тӥ арын 10-тӥ оштолэзе, Ижкар) - удмурт гожъяськись, дышетӥсь.
[[Файл:Августа_Конюхова,_1989.jpg|thumb|right|]]
=Улон сюресэз=

Даурлэсь ятыр улэм кышномурт, Кузебай Гердэн но Кедра Митреен пумиськылэм, И. Гавриловен но М. Петровен эшъяськем мурт, калыкез дышетон удысысь отличник, Удмуртиысь сӥё-дано дышетӥсь, Кузебай Герд нимо премилэн лауреатэз, удмурт кылъя учебникъёслэн авторзы Конюхова (Будина) Августа Васильевна вордӥськиз Дэбес ёросысь Удмурт Лем гуртын '''1911'''-тӥ арын 24 шуркынмонэ (ноябре), гурт ужез тодыса-валаса быдэсъяны тыршись бадӟым крестьян семьяын. <ref name="хайдаров7"> Хайдаров Р. Августа Конюхова (1911) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 155. </ref>

Будин выжыос туж ужасесь вылӥллям. Нош Гутялэн мумы-бубыосызлы нылзы вордскыку ик туж секыт адӟон кылдэм: гуртазы бадӟым тылпу потыса, вань юртъерзы ӝуам. Соин ик со «мон пень вылын вордскиськем», шуылэ. <ref name="федоров4"> Фёдоров Л. Дауре, дуно дауре… // Удмурт дунне. – 2001. – 16 нояб. – С. 6 ; 11. – (Удмурт кизилиос). </ref>

'''1920'''-тӥ арын Гутя вордскем гуртаз школае мынӥз. Семьязы улыно-вылыно корка пуктыны кутскизы вал. Таяз но юртазы улыны ӧз кылды. Граждан ож юртсэс йылаз-пумаз вуттыны ӧз сёты. Мукет «сутскон» вуиз революциен ваем воштӥськонъёс сэрен. Кутскиз колхоз кылдытон но кулаке поттон. Августа но пыраклы гуртэныз люкиськоно луиз. Акаез сьӧры Иже педтехникуме кошкиз. '''1924'''-тӥ арын педтехникуме со кужмысьгес ик пыриз. Тыро-пыдо дӥсяськымтэ, чиед но ӝужыт нылмуртэ тӧро кышкасагес басьтӥз, дышетскыны уз быгаты шуыса. Бӧрысь, чебер кырӟамзэ но вераськемзэ шӧдыса, мукет дышетскисьёсын ӵош '''1929'''-тӥ арын сое выжтӥзы педтехникумын усьтэм театральной курсэ. Соос пӧлын вал К. Ложкин, Г. Титов, М. Коновалов, Е. Малых… Гутялы, «кулак ныл» шуыса, дышетскыны ӧз сётэ. Соин валче со, ужысьтызы куштэм дышетӥсьёсыныз ӵош, Сибире кошконо луэ. <ref name="гаврилова-решитько1">[http://elibrary.unatlib.org.ru/handle/123456789/114 Гаврилова-Решитько М. Медло котьку шуныт // Эшъяськонлэн шунытэз / М. Гаврилова-Решитько. – Ижевск, 2005. – С. 74-84.] </ref> 

Новосибирскын А. Конюхова дышетыны кутске чугун сюрес лэсьтӥсьёсты – школае но йӧскадь пырамтэосты. Но вордскем шаерезлэсь палэнын кема улыны уг чида: '''1931'''-тӥ арын Алнаш ёросэ вуэ. Отысен мылысь-кыдысь ужаны кутске школаын. Алнашын Августа Васильевна нылпиосты ӟуч кыллы но крезьгурлы дышетӥз. Татын ӵош ужась эшъёсыныз кык хор кылдытӥзы – нылпиослэсь, егитъёслэсь но мӧйыослэсь. Собере партийной уже выже: партилэн райкомаз валэктон ужъёсъя отделэн кивалтӥз, кӧня ке ар ӵоже «Алнаш колхозник» газетлэн валтӥсь редакторез вал. 
'''1935'''-тӥ арын Августа Васильевна Иже лыктӥз Дышетӥсьёсты дасясь институтын дышетскон вылысь. Соку солэн кык пичи пиосыз будо вал ини. Но со ӧз кышка – дышетскиз, ужаз, радиолэн хораз кырӟаны но дыр шедьтылӥз на.  Со гажаса тодаз вайылэ дышетӥсьёссэ: Д. И. Корепановез (Кедра Митреез), С. П. Жуйковез, А. П. Бабинцевез но мукет визьмо удмуртъёсты. <ref name="федоров4" />

'''1938'''-тӥ арын, калыкез дышетонъя министр П. Г. Наговицын А. В. Конюховаез дораз ӧтиз. Вот, пе, Августа Васильевна, тӥледлы бадӟым уж оскиськом: 3-тӥ класслы удмурт кылъя учебник гожтоно. Таиз пыкиськиз: кызьы озьы — газетэ гинэ но гожъяме ӧвӧл, пе... «Учительской институтысь дышетӥсьёсты тӥледыз дэмлазы», — уг мозмытскы ни Прокопий Гаврилович. Уг, уг, уг, шуэ таиз. «Та партилэн куронэз», — министр чурытгес верам бере, а-а-а гинэ шуиз на. Уен-нуналэн пукиз, тыршиз, бугыръяськиз. Нокыӵе гонорар сярысь малпаськытэк. Ар но ӧз ортчы — учебник дась вал. Егит дышетӥсь вылэ озьы ик 6-8-тӥ классъёслы синтаксисъя учебник гожтонэз ныпъязы. Тайзэ но вормиз. <ref name="чернова8">[http://elibrary.unatlib.org.ru/handle/123456789/5295 Чернова Т. Дэлето «Шудтэм шуд» : Августа Конюховалы – 100 // Кенеш. – 2011. – № 11-12. – С.78-86.] </ref>

Августа Васильевна трос удысъёсын ассэ эскериз но ӟеч тодӥсь-валась ӧнерчи луэмзэ возьматӥз. Пӧртэм школаосын дышетӥсь, Удмурт книгапоттонниысь редактор (1949–1952) но валтӥсь редактор (1952–1956), заочно амалэн тодонлык люканъя элькун шоръёзо школаен кивалтӥсь (1957–1962), Дышетӥсьёслэсь быгатонлыксэс будэтонъя институтысь ӧнерчи, со котькуд ужан интыяз адскымон пытьы кельтӥз но калыклы тодмо луиз.

Нош удмурт кыллы но литературалы, йӧскалык покчи школаын дышетӥсьёслэсь тодонлыксэс будэтон удысын A.B. Конюховалэн нимыз нимысьтыз инты басьтэ. Ӵапак со та сӧзнэтлы кужмо инъет кылдытӥз. A. B. Конюхова Дышетӥсьёслэсь тодонлыксэс будэтонъя институтын 19 ар ӵоже ужаз – '''1938'''-'''1940'''-тӥ но '''1962'''-'''1979'''-тӥ аръёсы. Татын со покчи классъёсын ужез радъянъя но удмурт кылъя но литературая кабинетъёсын кивалтӥз. <ref name="клементьев2">[http://elibrary.unatlib.org.ru/handle/123456789/5537 Клементьев А. Тодонлыкез будэтонлэн кӧкыяз : А. В. Конюховалы – 100 // Вордскем кыл. – 2011. – № 11-12. – С. 9.] </ref>

Институтын ужамезлэн тужгес бадӟым емышез – удмурт кылъя школаослы дасям дышетосъёсыз (учебникъёсыз). '''1938'''-тӥ арысен A.B. Конюхова 3-тӥ класслы (15 пол потӥз) но 6-8-тӥ классъёслы синтаксисъя (19 пол потӥз) лэсьтэм учебникъёсызъя кылзӥсьёсты ужаны дышетылӥз. Учебникъёс сяна, со гожтӥз на дышетӥсьёслы ужаны юрттон книгаос. <ref name="клементьев2" /> 
Улон сюресэз но Августа Васильевналэн капчи ӧй вал. Юра пизэ ватыса, тазалыкез лябӟиз. Висе бере, трос эмъюм юиз. Соиз нош сюлэм котыраз пуксем. Кема йӧнатскыса но висён ӧз ортчы. Малпаз: ужано киосын, пыдъёсын но мугорын. Элькунысь заочной шор ёзо школаысь директорысь кошкыса дворнике кариськиз. Нылпи садикын лымы сузяса улӥз. Ассэ ачиз йонатӥз. <ref name="гаврилова-решитько1" />
Али Августа Васильевна Конюхова нуныкаосыныз улэ Ижевскын. Со туннэ но тунсыкъяське родняосызлэн улэм-вылэменызы, шаерысь иворъёсын. Толон но кема-кема аръёс ортчем улонысь учыръёссэ тодаз вае.

А. В. Конюхова улонысь кошкиз 102 аресказ 2014-тӥ арын 10-тӥ оштолэзе. </ref>[http://elibrary.unatlib.org.ru/handle/123456789/15168 Кайгырон // Удмурт дунне. - 2014. - 15 апр. - С. 7.]</ref>

=Гожъямъёсыз сярысь=

Августа Васильевна верамъя, творчество удысэ кыстӥськыны муг сётӥз эшъёсызлэсь адӟем карыса дневник нуон. Но вӧзысьтыз нылъёс-пиос сямен куш-куш гожъяськыса пукыны кынарыз солэн ӧз тырмылы, пумаз-йылаз вуттымтэ дневникъёссэ ялан кесялляз. Отӥяз тӥни, быземез бере, семьяязы тупамтэос кылдыса, лэся, кылбураны ӧдъя, нош «Удмурт коммуна» газет бамын потылэм чуръёссэ люканы тодаз ик уг лыкты. Гожтэ, печатла но, солэн соос ӧвӧл ни. Зэмос нимтулыз интые, 20—30-тӥ аръёсы гожъяськись уноез литераторъёс музэн, кушем нимзэ пуктэ: Авакон. Авакон  - со Августа Конюхова шуэмлэн нырысетӥ слогъёсыз, Ав+а+кон. <ref name="лаптев4">[http://elibrary.unatlib.org.ru/handle/123456789/65 Лаптев А. Алнаш кен // «Тӥ учке ӵемгес ӵукпала…» : кылдунъетъёс, кылужъёс, юан-валэктонъёс / А. М. Лаптев. – Ижевск, 2008. С. 72–73.] </ref>

А. Конюхова тужгес мыло-кыдо гожъяськиз, шуыны луоз, 40-тӥ аръёслэн пумазы но 50-тӥ аръёслэн кутсконазы УдГИЗ-ын редактор, собере валтӥсь редактор луыса ужакуз. Котыраз соку ялан бергазы книга поттон удысысь адямиос, визьмо но лякыт эшъёсыз А. Галичанина, А. Золотарёв, М. Перевощиков, писательёс Михаил Петров, Василий Широбоков, [[Ермаков Фома Кузьмич|Фома Ермаков]] но трос мукетъёсыз, озьы ик тодосчиос, дышетӥсьёс. Мӧйыослы кылбуръёсыз сяна, газетъёсын со вакытэ ятыргес печатласько ини пичи пиналъёслы чакламъёсыз. <ref name="лаптев4" />  
'''1965'''-тӥ арын нылпиослы сӥзем «Тон эн кышка, пие» нырысетӥез кылбур книгаез потэ. Тэшкылиослы вазиськыса, автор улонэз валаны отын дышетэ, ужез гажан но калыкедлы, шаередлы пайда ваён мылкыд пыӵатэ. Отысь тросэз чуръёс пиналъёсты нодъясесь луо: <ref name="чернова8" />

''Тон эн кышка, эн пега, пие, ужъёслэсь,''

''Уж поттоз тонэ котькыӵе шуг-секытысь,''

''Уж сюдоз, возьмалоз, йӧнатоз висёнлэсь.''

''Уж бордын шумпотон, сое тод пичиысь.''

УдГИЗ-ын дыръяз ик Августа Конюхова нылпиослы прозаен гожтэм   произведениос   поттон   сярысь  но сюлмаськылӥз. Кылсярысь, ӟуч кылысь берыктыса, пинал лыдӟисьёс доры вуттӥз Л. Воронковалэсь веросъёсын «Шундыё нунал» (1951), «Зарни усьтонъёс» (1952), повестен «Пичи нылъёс школае мыно» (1953), веросъёсын Н. Ждановлэсь «Нахимовецъёс» (1955), В. Осеевалэсь «Мынам эше» (1951) книгаоссэс. Ма, ачиз А. Конюхова но нылпиослы веросъёс гожъяз. Пенсие потэмез бере но соос кылбуръёсын оград газет-журналъёсын печатласько. Быдэс улонзэ сямен дышетон удыслы сӥзиз бере, веросъёсыз но школа улонэн, покчиослэн дуннеенызы герӟаськемын. «Дышетӥсь» нимояз тани Алнаш ёросысь Байшур гуртысь начальной школаын ужамез возьматэмын. Павлик, Петя Соколов но Раяен Валя пыр чильпырало журналистлэн но писательлэн Семён Шихаревлэн, Удмурт драмтеатрын ужам суредасьлэн Георгий Векшинлэн, татысь ик сцена вылын шудэм, ассэ ачиз ыбыса, улонысь дырызлэсь вазь кошкем актрисалэн Анна Колесниковалэн образъёссы. Ӵапак соосты Августа Васильевна ас дыраз дышетӥз но. <ref name="лаптев4" />

Ваньмыз сямен веросъёсыз улонысь учыръёс вылын гожтэмын. «Гордань но кый» веросысь событиос ортчо Алнаш ёросын ик Куашкам (Юртошур-Какся) гуртын. (Али со ӧвӧл ни, быриз 1980-тӥ арын). А. Конюхова тодаз уськытэм, Быдӟым ож дыръя Алнаш райкомысь пропагандая но агитацияя отделэн кивалтон вакытысьтыз Вознесенск сельсоветэ соку пырись Куашкам гуртэ вуылыса, одӥг тунсыко учырез верамзэс.
А. Конюховалэн берлогес гожтэмъёсыз пӧлысь удалтэмын «Яблокпу», «Эмезь», «Кудымульыос», «Губиос», «Тюрагай». Та кылбуръёсыз '''1987'''-тӥ арын 23-тӥ пӧсьтолэзе «Дась лу!» газетын поттӥллям. Ас вакытаз туж тодмо вал «Анайлы» гожтэмез. Со '''1960'''-тӥ аръёсы «Советской Удмуртиын» печатласькиз, собере Удмурт радио пыр ӵем гинэ чузъяськылӥз. Та кылбурез Афанасий Лужанин тазьы дунъям: «Анайлы сӥзем таӵеез кылбур удмурт поэзиын ӧй вал на». <ref name="чернова8" />

Солэн йыраз котьку но улӥзы Уд. Лем гуртэз, анай-атаез но агай-вынъёсыз. УдГИЗ-ын ужан аръёсаз кылбуръёсын-веросъёсын вырем сяна, Августа Конюхова «Нырысетӥ вамыш» романзэ но мытэ. Будинъёслэн выжызы пыр (аслаз но ныл фамилиез Будина уго) отын эскерыны малпа быдэс гуртсылэсь ортчем сюрессэ. Кутсконзэ вуттӥз ик, «Молот» журналын печатлазы но. Но азьланьтыны пӧртэм мугъёс люкетӥзы. Йыраз гинэ ик кылизы уно кылбуръёс но. <ref name="гаврилова-решитько1" />

Куке-соку мытэм романзэ 90-тӥ аръёсы гинэ, тодэ ваёнъёслэн ӧразы выжтыса, «Кенеш» журналын (3—7-тӥ номеръёс, 1996) печатла, та бӧрсьы ик '''1996'''-тӥ арын «Шудтэм шуд» нимысьтыз книгаен «Удмуртия» издательствоын но потэ. Нош '''2011'''-тӥ арын ӟуч кылын тодэ ваёнъёссэ Дышетон удысысь йӧскалык ужпумъёсты тодон-эскеронъя институт А. Конюховалэн 100 ар тырмон юбилеезлы сӥзем «Живой голос века» книгазэ печатлаз. Та книгаяз автор тодаз вае войналэсь азьло но со бере аръёсы улэм-вылэмзэ, син азе пуктэ соин ӵош пӧртэм шуг-секытъёс пыр потэм-чидам адямиослэсь тусбуйзэс. <ref name="чернова8" />

=Премиосыз=

'''1945''' – УАССР-ысь Вылӥ Кенешлэн данъян грамота, 

'''1945''' – Быдӟым ож вакытэ ужамез понна «За доблестный труд» медаль, 

'''1957''' – Бадӟым азвесь но бронза медаль (награждена Большой серебряной и бронзовой медалью (ВСХВ), как участник сельскохозяйственной выставки по выпуску массовой литературы передового опыта), 

'''1958''' – РСФСР-ысь «Калыкез дышетонысь отличник» пус, 

'''1961''' – «УАССР-ысь школалэн дано дышетӥсез» ним.

Трос юбилейной медальёсыз.

=Библиография=

==Книгаосыз==

[http://elibrary.unatlib.org.ru/handle/123456789/16100 Живой голос века. - Ижевск : Удмуртия, 2011. - 222 с.]

[http://elibrary.unatlib.org.ru/handle/123456789/1422 Шудтэм шуд : тодэ ваёнъёс. – Ижевск : Удмуртия, 1996. – 181 с.]

[http://elibrary.unatlib.org.ru/handle/123456789/4871 Тон эн кышка, пие : кылбуръёс. – Ижевск : Удмуртия, 1966. – 15 с.]

==Статьяосыз==

[http://elibrary.unatlib.org.ru/handle/123456789/5276 Анайлэн кырӟанэз : кылбуръёс // Кенеш. – 2011. – № 11/12. – С. 13–18. – Пуштросэз: Оскон ; Кыӵе умой ; Уйвӧт ; Яратон ; Уг лу вылэм ; Ашальчи Окилы ; Сяська но емыш ; Уг вунэты анай кылме ; Анайлэн кырӟанэз ; Малы меда?..]

[http://elibrary.unatlib.org.ru/handle/123456789/9039 Вумурт выжы : зэмос учыр // Ӟечбур! – 2008. – 22 мая. – С. 8.]

Гордань но кый : верос // Вакыт (Игра). – 2007. – 2, 7 марта.

[http://elibrary.unatlib.org.ru/handle/123456789/9537 Губияны!.. ; Кузя ; Нимъёс : веросъёс // Кенеш. – 2007. – № 8. – С. 40–49.]

Дыдыкъёс : верос // Ӟечбур! – 2006. – 4, 11, 18 мая.

Коштан ӵӧжпиос : верос // Ӟечбур! – 2006. – 23 нояб. – С. 8.

[http://elibrary.unatlib.org.ru/handle/123456789/5095 Опи но Дыды : выжыкыл // Кизили. – 2011. – № 11/12. – С. 4–5.]

[http://elibrary.unatlib.org.ru/handle/123456789/7907 Семи, Вова но пиньгетӥсьёс : верос // Ӟечбур! – 2012. – 3 мая. – С. 7.]

[http://elibrary.unatlib.org.ru/handle/123456789/4706 Сяла курег : верос // Азвесь кышетэн толэзь : веросъёс : семьяын лыдӟон книга / люказ но радъяз В. Ившин. – Ижевск, 2007. – С. 58–59 ; Кенеш. – 2007. – № 5/6. – С. 71–76.]

Тон эн кышка, пие : кылбур // Зарни дэремен шунды : семьяын лыдӟон книга. – Ижевск, 2006. – С. 62–63.

Уӵыпи : улонысь учыр // Удмурт дунне. – 2005. – 16 марта.

[http://elibrary.unatlib.org.ru/handle/123456789/7535 Чечы но курыт луылэ ; Лобась эшъёсмы : веросъёс // Кизили. – 2012. – № 11/12. – С. 6–7.]

==Кырӟанъёсыз==

[http://elibrary.unatlib.org.ru/handle/123456789/8155 Постников Н. Малы меда? : "Малы меда пинал йырвизь..." / кылъёссэ гожтӥз А. Конюхова // Малпасько тонэ : кырӟанъёс = А мне бы увидеть тебя : песни / Н. Постников. – Ижевск, 2010. – С. 97 ; Кенеш. – 2010. – № 1. – С. 105.]

==Берыктэмъёсыз==

Жданов Н. Нахимовецъёс : повесть / берыктӥз А. Конюхова. – Ижевск : Удмуртское книжное издательство, 1955. – 135 с. 

Осеева В. Мынам эше : веросъёс / берыктӥз А. Конюхова. – Ижевск : Удмуртгосиздат, 1951. – 56 с.


'''Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды [http://unatlib.org.ru/index.php?option=com_content&view=article&id=474&Itemid=319 Удмурт Элькунысь йӧскалык библиотекалэн электрон каталогъёсызъя].'''

=Уже кутэм литература=

<references />

[[Категория:Современные удмуртские писатели|Конюхова Августа]]