Кондратьева Наталья Владимировна

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Вань улонэ - паймон

Н.В. Кондратьева

Удмурт кун университетысь удмурт филология факультетысь финн кылъя но солэн историезъя, огъя но фин-угор кылтодонъя егит дышетӥсь, доцент, удмурт грамматикалы сӥзем куинь монографиослэн но дышетонъя, методикая вить пособиослэн авторзы. Финн-угор обществолэн (Финляндия) ёзчиез.

Наталья Владимировна та нуналъёсы утиз доктор диссертацизэ. 35 аресъем тодосчиез сыӵе вормонэн ӟечкыласа, ӧтиськом ачиз сярысь кенешыны.

- Россиысь финн-угор тодосчиос пӧлын наукаосъя тужгес егитэз доктор луиды. Та пумысен асьтэос ма малпаськоды? Кытысь потэ тодон борды сокем кыстӥськемды?

- Вормонъёсы пото, дыр, Пичи Пурга черкогуртысь школае бордысь. Туж умоесь, золэсь дышетӥсьёсмы вал. Огез ӧтьылӥз физикаен мургес вырыны, мукетыз – географиен, куинетӥез – информатикаен… Озьы школаын ик азям паськыт инвисъёс усьтӥськизы. Ёросамы географияя олимпиадаын арлы быдэ вормылӥ, кунсьӧр кылъёсъя олимпиадаын но ялан валтӥсь интыос басьтылӥ. Эшшо вылӥ математикаен тунсыкъяськи на. Нош ёросамы физикаен но ваньзэсты азьпалтэме бере аслым ачим воксё пайми.

9-тӥ классозь ӟеч тодӥсько вал: луо географ. Но школаямы вуиз егит дышетӥсь Людмила Михайловна Маркова. Со удмурт кыллы, фольклорлы, литературалы синмаськытӥз. «Вуюись» коллективен кивалтӥз, милемыз пӧртэм мероприятиосы поттаз. Со вакытэ ик ӟуч кыллы дышетӥз Волкова Мария Владимировна – озьы ик туж тунсыко адями. Тӥни озьы улонэ шуак воштӥськиз, мон вань сюлмыным кыстӥськи кыл но литература котыре.


- Пыриды УдГУ-ысь удмурт филология факультетэ. Та сярысь ноку ӧд жалялэ-а?

- Анай-атае малпазы, дыр, мон мыно экономика удысэ, йыры математиклэн кадь ужа бере. Но витёнтэм быръёнэлы пумит ӧз луэ, шуизы: со тынад мылкыдыд…

Зэм, дышетскыны кутскеме бере жалян дыръёсы вал. Угось 1990-тӥ аръёс – кризис вакыт, ӝыныез предметъёс пӧртэм муген уг нуисько, аудиториос уг тырмо. Озьы нырысетӥ курсъёсын тӧлэз ӵыжаса ветлоно луиз. Но 4-тӥ – 5-тӥ курсъёсын мыным быръем удысэ туж зол кельшиз ни. Нырысь ик, дышетскон вискам мон ужаны кутски Ижысь 56 номеро школаын. Озьы дунъяны ӧдъяй дырез, сое токма быдтэме ӧз поты ни. Кыкетӥез, валай: котькуд адями ачиз ассэ визьнода. Та малпан муромиз финн кылэз дышетыны кутскеме бере. Угось ӵапак 4-тӥ курсысен дорамы лыктӥз Финляндиысь Сара Хянникянен – зэмос профессионал. Ваньзэ валаськом-а, ум-а, но занятиосы, урокмес йылаз-пумаз лэсьтытэк, ветлыны возьыт вал.

Берло ини, Финляндие вуыса, пайми: отын котькудӥз кунсьӧр кылэз нимаз-нимаз дышетэ на, лингафонной кабинетъёсын пукыса, кунгожсьӧр газетъёсты лыдӟыса. Озьы кунсьӧр кылъя уроксы арняяз одӥг пол ке но луиз, адями со кылэн вераськыны дышоз. Тае ӟеч адӟоно шаерамы вуэм лекторъёсъя но: нырысь удмурт сямен пал кыл но уг тодо, ар ортчыса, гань-гань верасько ни. Луонлыкъёсмы огкадь, но соос асьсэды асьсэос дышето. Милям малы ке малпало: тани ӵукна султо но англи сямен шалтыр вераськыны кутско. Уг ке пӧрмы, дышетӥсез янгыш каро. Нош тон маке карид-а астэ визьман понна?


- Тодам лыкто студент вакытъёс. УдГУ-лэн огъяулоннияз тӥ дорын ялан калык луэ вал: студентъёс визь-кенеш юало, зачётъя юрттэт куро… Кызьы котькудӥныз пукыны чиданды тырмылӥз?

- Ма, кытӥяз акыльтэ вал. Аслым шуисько: тани таизлы ваньзэ умой-умой валэкто но шутэтско ни. Но нош ик мукетыз вазиське – «уг» шуыны уг быгатӥськы. Оло, соин, дыр, дышетӥсьлэн ужез мыным туж-туж кельше. Али мон доктор диссертациме утемелы сокем уг но шумпотӥськы, дыр, кӧня куанӥсько, студентъёслы тросгес дыр висъяны быгато ни шуыса. Нош студентъёсын мыным татчыозь удалтэ. Соосты курсовой, дипломной уж гожтыны курыкум, чакласько мылкыдзэс, сямзэс, дунневаланзэс. Малпасько, студент дышетскыкуз ик пӧртэм улосъёсы, кунъёсы потаны кулэ. Соин 2-тӥ курсысен кутскыса ик, куд-огзэ тыршисько конференциосы келялляны. Кытӥяз преподавательёс ало: нош ӧз ке быгаты? Шуисько: азьланезлы урок луоз.

Адӟиськод ке пиналлэсь быгатэмзэ, юрттӥськод ке солы эшшо вылӥегес тубыны, мылкыд шумпотонэн пачыла. Шуо: удмурт адями вылӥе ӝутске ке, мукетъёссэ лёганы выре. Сыӵе веран шонер ӧвӧл кадь потэ. Мынам туж-туж яратоно финн-угор кафедрае ке ӧй луысал, мон наукаен сыӵе мыло-кыдо вырысал меда? Туж зол инъет сётӥз, ужатӥз наукая кивалтӥсе – филология наукаосъя доктор Валентин Кельмаков.

Доктор диссертацие бордын ужакум вал вакыт: киосы юскиськизы. Малпалляй: я, малы со мыным кулэ? Сомында мылкыд, дыр, тазалык, уксё кошке! Но вӧзысьтым ӟеч адямиосты адӟыса, мынам но ӟечсэ лэсьтэме потэ. Кинлы? Студентъёслы. Али ми тужгес быгатӥсьёссэ келяны быгатӥськом Москваысь кылтодонъя институтлэн аспирантураяз. Туж-туж оскисько: будэтэм студентъёсы со аспирантураез вормозы.


- Студент дыръяды рос-прос выриды удмурт литератураез. Соин чылкак паймымон вал кылтодонэ шуак выжемды. Йырдэс нош ик кин ке сураз?

- Финляндиын стажировкаме ортчыкум, кивалтӥсе, филология наукаосъя кандидат Виктор Шибанов, гожтэт келяз: мон, пе, тонэ Валентин Кельмаков тодосчилы сётӥ…

Кызьы озьы? Мынам сыӵе йыры кур луиз! Туж ӝожоми: мон – сыӵе-сыӵе литературовед, сыӵе яртӥсько литератураез, сыӵе тунсыкъяськисько соин, нош табере выро кылэн?!

Бӧрысь валай: Виктор Леонидович кыдёке азьпала учкиз. Пумен дыши выль кивалтӥселы, ог-огмес валаны кутским. Кылтодонъя лекциосын ялан шуо вал: кыл – со система. Но ачид ваньзэ шурупен-шурупен ӧд эскеры ке, уд вала.

Грамматикаен вырыны кытӥяз мӧзмыт луэ. Соку малпаськод, вань ук туж тунсыко ӧръёс – когнитивной лингвистика (кыллэсь но сознанилэсь кусыпъёссэс эскерон), этнолингвистика (кыллэсь но калык культуралэсь, психологилэсь кусыпъёссэс эскерон). Таос борды басьтӥськоно. Но, мукет ласянь, удмурт кыллэн структураез воксё но эскеремын ӧвӧл. Кылэз коркаез кадь чакласа потоно ке, дӥнь (фундамент) бордысен кутсконо ук! Собере ини укно янакъёс, муръё котыре тубоно, лингвистикаысь пӧртэм ӧръёссэ чаклано. Нош коркалэн инъетэз асьмелэн 1960-тӥ аръёсы эскерем манерен ик кылле. Соин ик басьтӥськи традиционной грамматика борды. Шумпотӥсько, пумен-пумен тубыны луэ ни кыл коркалэн вылӥяз но.

- Но тодосчиос кыллэсь корказэ эскеронэз йылаз-пумаз вуттытозь, калык пӧлын удмурт кылэз ӟеч тодӥсьёс кылёзы на меда?

- Тӥ гинэ, журналистъёс, та пумысен уд сюлмаськиське. Дырлэн воштӥськемез туж зол шӧдӥське. Дас ар талэсь азьло ай университетысь удмурт филология факультетын анай кылынызы вольыт вераськизы. Али 10 процентэз – ӟучомемын. Соин ик лекциос лыдӟыку, куд-ог лыдпусъёсты нырысь ӟуч, собере удмурт сямен верано луэ, медаз янгышалэ.

Малпасько, та шугъяськон потэ школаосысь национально-региональной компонентэз басьтэм бордысь. Анай кылэз дышетоно-а, ӧвӧл-а – чакла ачиз школа. Социолингвистикаез тодэ ваёно ке, сыӵе вакыт вал ӵапак 1960-тӥ аръёсы. Соку удмурт кыл азинскемысь дугдӥз. Угось кутэмын вал закон, кудӥзъя директор, учреждение асьсэос бырйыны кутскизы, кыӵе кылын урокъёсты нуоно. Тӥни озьы, история берытске. Али тужгес ӝожомытэ куд-ог школаослэн ЕГЭ вылэ чӧлскыса удмурт кылэз ворсамзы. Созэ но, тазэ но пыӵатыны уг луы-а мар-а?

Улон возьматэ: кылыдлэсь куштӥськон ӟече уг вутты. Туж умой адӟим тае, Дэбес ёросэ экспедицие потакумы. Дорамы ньыль аресъем пияш лыктӥз, ӟуч кылын туж шӧтэм вераське. Удмурт сямен вазиськом но, воксё ӟудэ. Песянаез валэктӥз: монэ, пе, внукеным ӟуч сямен гинэ вераськыны косо. Валамон ини: мӧйы мурт ӟуч сямен суро-пожо вераське, акцентэн, кыл тӥрлыкез начар. Нунокез сыӵе кыллы ик дыше.

Удмурт пиналэз азьланяз луоз чебер ӟуч кыллы дышетыны, нош сыӵе пиджин (ылё-кырсё вераськись) выллем будэмзэ воштыны туж секыт. Со удмуртсэ но уг тоды, ӟуч сямен но умой уг вераськы. Соин куд-ог анай-атайёслы паймисько: малы пиналлэсь карьеразэ пичиысен ик быдтонэз? Жаль, сыӵе югдур быдэс кунамы.

- Но кызьы отысь потоно?

- Асваланэз ӝутыса гинэ. Тани ортчем даурысь 20-тӥ аръёсты басьтоно ке – макем зол соку ӝутӥськиз удмуртлык! Сыӵе ик ӝутскон пыр потӥз Финляндия 19-тӥ даурлэн кыкетӥ ӝыныяз. Солэсь азьвыл финн кыл гур котырын гинэ кылӥське вал ни ук. Но кылдӥзы сыӵе адямиос – финноманъёс – соос анай кылэз вӧлмытон борды басьтӥськизы, кутскизы анай кылын календарьёс, дэмланъёс бордысен. Ог ӝыны даур ортчыса, удмуртъёс но со борды ӝабырскизы вал ук.

Одӥг адями гинэ номыр карыны уз быгаты. Воштӥськыны кулэ быдэс поколение. Шумпотӥсько, кунгожсьӧръёслэн верамзыя, Россиысь финн-угоръёс пӧлын удмурт егитъёс туала вакытэ тужгес азинлыкоесь. Нош 1990-тӥ аръёсы азьпалан вал поръёс.

Али удмурт егитъёс, полякъёсын ӵош ке но, кылдытӥзы удмурт кино, удмурт нылаш Светлана Ручкина ӧтемын выжы калыкъёслэн «Евровидение» вожвылъяськоназы, удмурт егитъёс «Удмурт дуннеен» ӵош потто «Дарт» газетсэс… Оскисько, та егитъёс шоры учкыса, будоз выль поколение. Но… туж тросэз потэ на дышетӥсьёслэсь. Бигер эскерисьёс юнме уг пусъё: аслад калыкедлэн культураез шоры учкон нырысь ик пыӵа анай-атай бордысь, собере – анай кылъя дышетӥсьлэсь.

- Озьыен, удмурт кылъя дышетӥсьёс кужмоесь луыны кулэ. Нош соосты дася удмурт факультет…

- Зол студентъёсмы трос. Но жаль, уноез соос школае уг мыно, яке кивалтӥсь луо, эсьма, банкын но ужало. Школае мынэм 10 мурт пӧлысь одӥг золэз вань ке шат. Но со одӥг адями дассэ воштэ! Тани Ижысь 56-тӥ школаысь егит дышетӥсь Татьяна Юмина сьӧраз ӝутэ ни быдэс коллективез, Пичи Пурга черкогурт гимназиысь пусйысал Александра Герасимоваез. Сыӵе дышетӥсьёсмы ӧжыт ӧвӧл. Соос быдэсак выемын нылпиосын ужан ӧре. Малпасько, дышетӥсьёслы тросгес уждун тырысалзы ке, школае кужмо кадръёс кыстӥськысалзы.

- Огвакытэ кылӥськиз: тӥледлы кунсьӧры кыльыны дэмлало вал. Малы пумит луиды?

- Малпай эшъёсы, сузэре, выны сярысь. Собере – кытысь мон сыӵе ӟеч кафедра шедьто на? Финн-угор кылъёсъя кафедраме мон туж-туж яратӥсько! Ӟеч эшъёсты мукет кунэн но коньдонэн воштыны луэ меда?

Финляндие дышетскыны мынон азям милемлы шуизы вал: та кунын, пе, удмурт студентъёс асьсэ данзэс туж вылӥын возё, зол дышетско. Ми, кык Наташаос (Наталья Ильина али УдГУ-ысь романо-германской факультетын ужа), трос предметъёс борды басьтӥським. Нуналаз вить-куать занятимы вал, ваньмыз финн кылын мынӥз. Нырысь туж секытэн сётӥськиз, но дышетсконмес туж умой йылпумъямы.

Тодам лыктэ на Финляндиысь Турку университетын тодон-валан будэтэме но. Удмурт эшеным Евгения Сундуковаен ӵош фин-угор кафедралэн библиотекаяз уйбыт пукиськомы вал. Озьы быдэс ар ӵоже. Сыӵе луонлык милемлы сётылӥз кафедралэн кивалтӥсез Сиркка Саринен. Малпаськом вал: кытысь ми сыӵе книгаос берло шедьтом на? Финн-угоръёс пӧлын озьы уйбыт пукыны, удмуртъёс сяна, чидаллязы коми-пермякъёс гинэ.

Али студентъёсты Финляндие келякум, шуисько: удмуртъёслэсь ӟеч данзэс возёно! Асьсэос финнъёс верало: Россиысь фин-угоръёс пӧлысь финн кылэз тужгес ӟеч тодо удмуртъёс.

Вуылӥ на Венгрие, Швецие. Пыриськи 40 пала конференцие. Но, малпасько, татын, Удмурт шаерын, ужаса, мон егитъёс понна тросгес лэсьтыны быгато.

- Огвакытэ тыршиды удмурт филология факультетысь деканлэн кунсьӧр кусыпъёсъя воштӥсез луыса. Мар сётӥз та уж но малы кошкиды?

- Кунсьӧры дышетскыны 2 арлы кошконо луи. Нош деканлэн воштӥсез дыръям трос саклык висъяй студентъёсмес кунгож сьӧры тодон-валан люканы келянлы.

Пусйысал, удмурт факультет пӧртэм калыкъёсын ӟеч кусып воземеныз котьку висъяськылӥз. Та ласянь умой ужаз Галина Чиркова. Мон солэсь пыӵатэм йылолъёссэ азинтӥ гинэ. Нош мургес ке учконо, кунсьӧры сюрес усьтӥзы ай Иван Тараканов но Валентин Кельмаков тодосчиосмы. Со сюресэз паськытгес каризы Финляндиысь Сара Хянникянен но Венгриысь Иштван Козмач дышетӥсьёс.

- Кылем арын Интернетын егитъёс выризы удмурт филология факультетысь дышетӥсьёслэсь рейтингзэс лэсьтыны. Куара сётон эркын мынӥз, даслэсь трос тодосчиос пӧлысь тужгес трос куара тӥ люкады. Кызьы малпаськоды, ма понна тӥледыз студентъёс сыӵе дунъяло?

- Рейтингъёс борды бурмисько шуыны уг быгатӥськы, но одӥг-ог учкылӥсько. Тыршисько студентэз гажаны. Котькудӥзлэн маке ӟечез вань ук. Огзэ ке уг быгаты, мукетсэ пӧрмытэ. Оскисько, егитъёс та сямме ик дунъяло, но та юанэз асьсэлы сётоно.

- Али син азяды пичи дырдэс пуктыны тырше ай, кыӵе суред пуксе?

- Нырысетӥ класс. Мон ӵукна синме усьтӥсько: укно сьӧрын сачыр-сачыр дэри. Йырам чилектэ: а вай-ко мон туннэ школае уг мыны! Та малпанме анай-атаелы верасько. Соос, куаретэм интые, шуо: я, эн мыны-а, мар-а…

Малы озьы? Кык ареслы бадӟымгес сузэре монэ лыдӟиськыны, гожъяськыны вазь дышетӥз. Соин ӵош вить арескам мон шатыр поттыса лыдӟиськисько ни вал, урокъёссэ лэсьясько. Соин нырысетӥ классэ ветлыны сыӵе мӧзмыт потылӥз. Урокъёсме но ӧй лэсья, соин дневнике быдэс тырмемын вал «Где д.з.?» гожъямъёсын. Но контрольнойёсын – «витьёс». Али паймисько: анай-атае туж оскылӥзы мыным, куаретэмзэс ик уг тодӥськы.

Оскылӥзы дышетӥсьёс но. 9-тӥ-10-тӥ классъёсын биологмы куриз школамы вӧзысь кролик фермаез шутэтскон нуналъёсы сюдыса-утялтыса возьыны. Та ужен куинь кузя выриськомы вал. Нош 10-тӥ класс бере быдэс школа садэз но теплицаез утялтыны, мукет классъёслэсь отработка шуонзэс радъяны мон вылэ кельтӥз, ачиз висьыны усиз уга. Паймисько, кызьы дышетӥсь дӥсьтӥз? Кызьы нылпиос кылзӥськизы?

Пичиысен оскеменызы ик, оло, али студентъёслы ачим но эрик сётӥсько. Мазы ке дась ӧвӧл, но одно ик вуттом шуо ке, оскисько. Со дыре ик кыл тодэмзэс эскерись диктантъёсын «кык» яке «вить» пуктӥсько. Малы? «Куинь» пуктӥ ке, адями киыныз шонтоз, буйгалоз. Нош «кыксэ» тупатыны лыктоз.

- Кылбуръёс но гожъяськоды вылэм…

- Куд-ог дыръя… Туж-туж секыт луэ ке яке укыр шумпотыку.

Котырам котьку трос калык луэ. Но кытӥяз нимаз кыльыса, ачид асэныд вераськем потэ. Нунал ӵоже ма но уг луы: огезлэн ӟеч ужезлы синмаськиськод, мукетызлы паймиськод, кинэ ке ултӥямзэ адӟыса. Зэм, ачим мон адями шоры лекъяськыны воксё уг быгатӥськы. Со, дыр, мынам туж бадӟым шугадӟонэ…

Кин ке кесяськоз-кесяськоз но буйгалоз, мукетыз черке мыноз, куинетӥез – дискотекае, нош мон – ас пушкам. Тӥни озьы кылдо чуръёсы.

Мон пукисько сӥзьыл паркын,

Гитараен шудо зор шапыкъёс.

Мажор, минор – одӥг крезь бугорын

Ваньмыз биниськемын та зор гурын.


Гужем ортчиз, пӧртэм ярдуръёсы

Вуттӥз улон. Люкиз со пыраклы…

Кынтӥз, васькиз вазь пужмерен,

Нош мон…

…ялан на пукисько сӥзьыл паркын.

Ваське ӝомыт, кын зор ни дугдэмын.

Ваньмыз тугаськемын улон гурын.

Гитараен шудо на… синвуос.

- Кыӵе инвисъёсты азьланяз усьтоды?

- Али тросгес дыры луиз туала литератураез лыдӟыны. Малпасько аслам методикае бордын ужаны. 10 ар талэсь азьло студентъёс иворез мукет сямен басьто вал. Туала егитъёслэн дунневаланзы паськытгес, луонлыкъёссы тросгес, но йырсазьзы уродгес. Кызьы сыӵе югдуре кунсьӧр кылъёсты капчиенгес дышетыны? Та сярысь малпаськисько.

Источник:

Кондратьева Н. В. Вань улонэ – паймон!/ Н. В. Кондратьева ; записала Е. Миннигараева // Удмурт дунне. - 2011. - 21 нояб. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"