Касаткин Сергей Анатольевич

Материал из Воршуда
Версия от 14:42, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Вераське «Мынам Удмуртие»![править]

С. А. Касаткин

Дас ар талэсь азьло, Элькунмылэн нуналыз азьын шаерамы нырысьсэ чузъяськиз «Мынам Удмуртие» радио. Та дыр ӵоже со котькуд корка пыриз – анай кылын иворъёс но кырӟанъёс, сюлэмшугъяськытӥсь югдуръёсты сэрттӥсь программаос, меӵак эфирын тунсыко адямиосын кенешонъёс удмурт кылзӥсьёс понна воштонтэм луо. «Мынам Удмуртие» радио кылдэм дырысен татын ужа Сергей Касаткин.

Сергей Анатольевич – телерадиокомпанилэн валтӥсь редакторезлэн воштӥсез луэ, Удмуртиысь культура удысысь дано ужась. Со кыл кутэ анай кылын вань программаос понна.

- Выль радио сюрессэ курадӟысагес мытӥз вал кадь. Шӧдылӥды-а дырлэсь ортчемзэ?

- Тунсыко уж вань дыръя дырез шӧдылыны уг луы. Зэм, али тодэ вайиськод ке, кызьы кутским, дӥсьтонмылы паймисько. Ужасьёсмы 5 мурт гинэ, нош 1 но ӝыны час эфирез тырмытоно, соку нокыӵе архив ӧй вал ук ай, ГТРК фонотеказэ ӧз сёты, одӥг гожтэм кырӟанмы но ӧй вал, нош кылзӥсьёс керетыса ик куро, котьма кар. Озьы уй-нунал выль материалъёс люкам-гожъям. Ай нырысь-валысь ми ваньмы 14 квадрат метръем сэрегын пуким! Ваньмылы вылысь 2 репортёр, 2 компьютер вал: черодэн пуксьыса, тачыр гожъяськылӥм, кема малпаськыны дыр ӧй вал, тыбыр сьӧрад эшъёсыд сыло ни. Интымы али но вӧлмыт ӧвӧл, но компьютерез ваньмызлэн быдэн, студимы выль. Озьы тӥни кызьы ке ваньмыз пумен радъяськиз, табере удмурт радио нуналаз 5 час ӵоже чузъяське. Со гинэ мар! Интернет-радиомес кылзыны луэ 24 час ӵоже – сьӧрлон улӥсь удмуртъёс со пумысен трос шуныт кылъёссэс верало, мылкыдзы валамон – палэнын улыса, соос мӧзмо дор палъёссылэсь, калыксылэсь, озьы радио пыр анай кылзэс кылыса, удмурт кырӟанъёсты кылзыса, мылкыдзэс веськато.

- Кызьы пусйиды юбилейдэс?

- Ужаса! Иворчи понна, ачид тодӥськод ук, праздник – со кык полэс уж. Ми лумбыт эфирын вал. Но чик ӧм жаде, малы ке шуоно туж трос шуныт кылъёс кылӥм, кивалтӥсьёс сяна, ӟечкылазы огшоры кылзӥсьёс но. Но тужгес яркытэз но тунсыкоез – со «Элькуновидение» проект. Туэ со кыкетӥзэ ортчиз ни. Кин кызьы дунъя, дыр, сое, вань ай отын тырмымтэосыз, но оглом мон ушъяськысал та проектэнымы. Сое, удмурт популярной культураен герӟаськем трос мукет проектъёсты сямен ик, малпаз Паша Поздеев (нялтас вераса, та адями асьме культурае туж бадӟым пытьы кельтоз, сое али гинэ кулэезъя дунъяны валасез ӧжыт). «Элькуновидение» огдыре кӧня ке кечез кутыны юрттэ, со телерадиокомпанилэн гинэ ужрадэз ӧвӧл, со – туала удмурт культураез, эстрадаез азинтӥсь одӥгез бадӟымез проект. Учке ай тани, та ужез мытэммы бӧрсьы ар гинэ ортчиз, нош кӧня выль кырӟанъёс вордӥськизы ни, кӧня выль авторъёс кылдӥзы! Азьвыл ми доры толэзяз 3-4 кырӟан вутто вал, табере – 30-40! Валамон ини, ваньмыз соос ӟечлыко ӧвӧл, тросэз калыке уз но вӧлме, дыр, но творчество берга! Собере, ми вормисьёсты гинэ син азямы ум возиське, эфирын бергатӥськом мукетъёссэ исполнительёсты. Мон азьло туж вожъяськылӥ Марий Эл радиолы – соос уй-нунал бергатыны быгатӥзы туала пор эстрадазэс, нош милям со ӧй вал! Табере тани асьмелэн но ваньмыз ӧръяське-радъяське. Та аръёс ӵоже люкамын узыр фонотека – та бордын туж сюлмо ужа звукорежиссёрмы Леонид Федотович Гусев.

- Радиоын ужасьёслэн тусбуйзы ышыгын улэ. Соосты тодмало лэймыт куараоссыя. Но ваньмыз соос улэп адямиос, мылкыдзы вошъяське, тазалыксы чутылэ, дыр, кызьы сыӵе вакытъёсы асьсэды возьыны быгато?

- Дышоно, лэся. Кытчы пырод, уждэ дунъяд ке, мылкыддэ уд юа. Тужгес секытэз, конечно, ӵукнаосы вазь султон. Эфире потоно ни 6 часын, озьыен, адямиослы уже вуттӥськон понна 4 часын ӵукна султоно луэ. Зэм, котькуд нунал озьы ӧвӧл – черодэн, но тросэзлэн, кӧлэме кылёнлэсь кышкаса, тазэ но уйзэс иземзы уг луы ни, собере жадемысьтызы эшшо одӥг нунал жӧлмаса ветло. Олокыӵе но учыр луылэ. Тани Юргис Алексеевмы огпол серекъяса вера: телефонам, пе, будильник пуктӥ но дас часын ик изьыны выдӥ. Изи-а, ӧй-а, жингыр! каре ни. Султӥ, чай юыса, кроликъёсме сюдӥ, лымы сузяй но остановкае потӥ. Но маке дежурной машина уг вуы. Ортчисьёслэсь юасько: кӧня час? Уйшор, пе. Берытскытэк ӧйлась, но изем ӧз луы ни, ӝоген нош султоно. Егит нылкышноосмы бӧрдо, пиналъёссэс тыраз уг адӟыло шуыса. Озьы со ӵукна 5 час 30 минутэ татын ни, нош ӝыт 8 часлэсь вазь доразы уг вуо. Ярам, кузпалъёссы вогесь ӧвӧл, нылпи садэ мыно. Но мар карод, котькуд ужын аслаз секытэз. Микрофон азе пуксиськод ке, вунэ ваньмыз. Куара лэймыт, оскымон луыны кулэ, адямилэн тонэ кылзэмъя кылзэмез мед потоз.

Тусбуй сярысь ке верано, троссэ ужасьёсмес тодмало, малпасько, малы ке шуоно данакез тыршо радиоын но, телевидениын но. Нырысь-валысь та пумысен сюлмаськисько вал, нош али кельше – адямилы луонлык усьтӥське ассэ котыр ласянь эскерыны-усьтыны.

- Соин но уг буйгало! Учконо ке, ужасьёсты радиое но, телевизоре но уг тэро – соос пото калыке! Тани берло дыре тодмо луиз ни «Куинь Светӥос» проект, нылкышноосты табере ёросъёстӥ но концертэн ветло. Мар со – эфире тэрисьтэм мылкыд, уртчись творчество, ватсаса уксё поттон, компанилэсь данзэ вӧлмытон…

- Ваньмыз ӵош, дыр. Мон ачим но вожъяськисько сыӵе мылкыдын улӥсьёслы. Шумпотӥсько соос понна, угось творчество зэмен котьку но радиоформатлы уггес тупа, татын йырын ужано, малы ке шуоно вань куронъёс, рамкаос, нош сцена вылын, калык пӧлын соос сюлэмзэс усьто, мылкыдзэс кисьто.

Ёросъёстӥ туж мыло-кыдо ветло «Эктоника» проектэнызы егитъёсмы Вероника Ваулина но Пётр Пушкин. «Эктоника» али но эфирын чузъяське пятницаосы, но табере со эфире уг тэры ни. Калык возьма бере, озьыен, тунсыко проект, мед ветлозы.

- Тӥ киулын удмурт телепрограммаос но. Вуттӥськоды-а ваньзэ син азяды возьыны?

- Мон уг тыршиськы ваньзэ чакланы, оскисько ужасьёсылы, ваньмыз сюлмысь тыршо кадь потэ. Нош соосты индылыны кутски ке, пумтэм-йылтэм споръяськонъёс потозы, котькудӥз – журналист, редактор, режиссёр – ас сяменыз шонер луоз. Вылаз ик, мон «радио адями». Мыным кельше, компаниысьтымы кивалтӥсьёсмы но удмурт передачаос лэсьтонамы уг пырисько, эрик сёто шуыса.

- Телевидениын меӵак эфирын ужасьёс шахтёръёсын огмында кужымзэс быдто, пе.

- Оскисько. Со секыт уж. Учкисьлы со потэ: пуксид но маке верад. Ай янгышад ке, пыкылоз на. Нош ассэ камера азе пуктӥськод ке, пегӟыны ӧдъя…

- Удмурт телевидениын-радиоын ужасьёслэн со одӥгез бадӟым «кайгузы» кадь потэ – эфирын нуналмысь одӥг адямиос, соосыз но тросэз «надойёсмес на 800 килограмм увеличить карим», «ветеранъёсмес но тружеников тыла с Днём Победы поздравитьтӥм» шуыса верасько…

- Ой, таиз, зэм, кайгу. Шонер со: рос-прос учконо ке, удмуртъёс трос ик ӧвӧл, ай эшшо данакез анай кылыныз уг вераськы, вераськисез – кепыра, микрофонэз адӟыса, пегӟе… Алигес тани Правительствоын ортчиз йӧл кысконъя элькун кенеш. Отчы ӧтемын вал та удысысь тужгес усто кивалтӥсьёс. Нош кин асьмелэн гурт удысэз ӝутэ? Списокъя – ог 30 мында шальк-шальк удмурт воргоронъёс. Мон журналистмылы шуисько: огкутскемен ӝыны арлы материал гожтод! Корреспондентэ бӧрдыса кадь берытскиз: 30 пӧлысь одӥгез гинэ интервью сётӥз, вераськыны керпото. Мар веранэз ни татчы меӵак эфире ӧтён сярысь. Ужан нуналысьтымы ӝыныез дырмы быре, герой утчаса, собере солы, мед гинэ лыктоз шуыса, йыбыртъяса. Ми валаськом, ялан одӥггес адямиос луо шуыса, но мар карод, кытысь ми «пиялом»? Куддыр газетты юрттэ – тӥлесьтыд геройёстэс кайпалтӥськом. Берло дыре тау гуртоослы, ӧтиськом ке, нялтас городэ лыктон сяменызы студиямы лыкто.

- Кызьы газетлы дуно лыдӟись, озьы радиолы – кылзӥсь. Соослэн жингыръямъёссытэк эфир мӧзмыт пӧрмысал, дыр…

- Бен, соос туж улӟыто вераськонэз асьсэлэн юанъёсынызы, куддыр мӧзмыт вераськонэз но ас мылкыдэнызы улӟыто. Милям вань дасо пала сыӵе мыло-кыдо «кылтэчыосмы», соос радио дорысь уг ик кошкыло кадь, меӵак эфире но жингыръяло, арнянуналэ «Тон понна» программамы пыр ӵыжы-выжыоссэс, тодмооссэс ӟечкылало. Тау соослы.

- Эфирын дыръяды возьмамтэ учыръёстэк но уг луы, дыр.

- Луылэ. Кӧня вераськомы ӧтем куноосмылы, телефондэс кысэ шуыса, нош соос кысэм гинэ ӧвӧл, интервью сётон висказы телефон пыр шара вераськыны кутско. Кудӥз ке нош кытчы вуэмзэ но уг вала кадь. Одӥг пол туж тодмо-дано адямиез гожтӥм. Кык арня-мар ортчыса, пумиським но юа: маке «Удмурт дуннеез» весь учкылӥсько но интервьюме уг адӟиськы…

- Нош тӥ пинал дыръяды кызьы радиое шедемдэс валады-а?

- Валай, ноку со сярысь ӧй малпалля ке но. Глаз ёросысь Куреггурт школа бере Удмурт университетысь удмурт кылосбуръя факультетэ мынӥ. В. Шибановлы диплом гожъяй, наукае мынон сярысь малпаськи. Уже литератураен герӟаськемын вал бере, практикае Виктор Леонидович дэмлаз «Кенеш» журналэ мыныны. Ну, мон отын кӧня ке нунал шлыньяськи но, редактор Пётр Васильевич Куликов Удмурт радиое келяз, отын солэн кузпалыз Раиса Семёновна кивалтэ вылэм. Доразы уж сярысь вераськонъязы, вылды, Пётр Васильевич мон сярысь кылпум поттылэм, нош радиое ӵап ужась кулэ вылэм. Со ик луиз интыяськеме. Ивор люкан, сое радио пыр чузъяськытон мыным туж яраз. Соку ик кык кылын ужаны кутски. Маке чик кышканэ но ӧй вал. Трос ик дыр ӧз ортчы, мыным оскизы «Между Волгой и Уралом» программае сюжетъёс дасяны. Ӧжытак сюлмаськи ик – быдэс Поволжьелы верано ук Удмурт шаерысь тужгес тунсыко иворъёсты! Но таиз но уже кызьы ке каньыл ӧръяськиз.

- Радиолы тӥляд эшшо одӥг бадӟым долгды вань…

- Таиз но зэм. Практикаын дыръям вордӥськем нуналы укшаз. Дорам кожиз Борис Петров, асьмеос, пе, одӥг нуналэ вордскиськеммы, ойдо ӵош пусъём. Мон шумпотӥ гинэ: студентлэн утялтӥськыны уксёез ӧвӧл ук. Ӝӧк пуктыны ӧдъям но, эшшо одӥг именинница итӥськиз – Светлана Белыхлэн но, пе, 15-тӥ мартэ ик вордӥськем нуналыз. Амалтэк тодматским. Ӝытмы шулдыр ортчиз, Светлана отын гитараен кырӟаз. Бертӥ но валай – синмаськи. Табере куректонэ уси: отӥяз мар кароно, уг тодӥськы. Чидай-чидай но, розаос басьтыса, дораз мыныны малпай. Ачим зугыр куалекъясько, кызьы сётыны уг валаськы, сокем кисырасько. Малпасько, коть дораз гинэ медаз луы вал! Общежитияз вуи, йыгаськисько но… уг усьты. Бускелез шуэ, со туннэ ӧвӧл. Улытозям сыӵе шумпотылэме ӧвӧл, дыр! Сяськаосме эшсэ сётыны курыса, дабыр кошкисько. Уж-то лэсьтэмын – сяськаез Света басьтоз ук, озьыен, мылкыдме валалоз, нош мыным, маке вераны турттыса, курадӟонэз уз луы. Ну, со бӧрсьы лякытгес ни вал. Аслам общагаысьтым табаме кутыса (со сяна, студентлэн номыриз ӧй вал), дораз улыны выжи. Табере нылмы школазэ йылпумъя ни, пимы кыкетӥ классэ ветлэ.

- Тамында ар ӵоже тӥ одӥг интыын ужаськоды. Шуо, озьы, пе, адямиос ог-огзылы акыльто.

- Ма, мон сое уж дурысь уг но адӟылӥськы кадь… Отын мыным коть Светлана Белых, коть Светлана Пикулева, коть Светлана Кибардина – ваньзы огкадь. Со ваньмыныз оградын, уж дурын эркияса уг возиськы. Кин уг тоды, со уз но вала, ми кузпалъёс шуыса. Куддыр уг но тодылӥськы, мар со нунал ӵоже ужа. Бертыса ини ӝытазе юасько, кытчы ветлӥд, мар карид… Дорын ик йӧттӥсько но, янгышез ке луылэ. Огкылын вераса, мыным ӵош ужан уг люкеты, Светланалы секытгес, дыр, та ласянь, со нылкышно ук, йырыныз вала ке но, уж дурын кусыпъёс ваньмыныз огкадь луыны кулэ шуыса, возьма, дыр, небытгес луэмме, соя кариськемме. Ми одӥг нуналэ вордӥськемын ке но, сямъёсмы пӧртэмесь. Пиналъёсмы но тани – шори. Ксюша мумиз кадь. Со туж творческой нылаш, кылем арын крезьгуро школазэ йылпумъяз, скрипкаен шудэ, туэ школаез быдтэ, кылчи луыны дасяське кадь. Мыным туж кельше, соос анаеныз эшъёс кадь шуыса. Пимы маке укыр шаплы, ачим ик жадисько. Куинь пӧртэм секцие ветлэ, озьы но пуксетэз ӧвӧл. Таиныз мыным выроно луэ. Малпасько, со шонер.

- Анай-атайды пизэс-кензэс радио пыр кылзо-а?

- Соос нуналлы быдэ приёмникен, туж ярато удмурт кырӟанъёсты, радиоверанъёсты. Семьяе огшоры: анай-атай, одӥг агае, куинь сузэръёсы. Анае Людмила Григорьевна кунян сюдэмын, атаймы Анатолий Кириллович Глаз ёросын котьку азьветлӥсь комбайнёр вал, али ке но туж данъяське ужаменыз. Кыкназылы 77 арес ни.

- Тӥ мыло-кыдо пыриськиськоды «Удмурт Кенешлэн» ужаз но – быръемын фин-угор калыкъёслэн ассоциацизылэн президиумаз, отын кыл кутӥськоды асьме калыкъёслэн ивор политиказы понна. Азьланяз, оло, малпаськиськоды политикае мургес пыриськон сярысь?

- Уг. Мыным со чик кулэ ӧвӧл, аслам уже тырмыт но, тунсыко но. Нош «Удмурт Кенешын» но АФУН-ын уже пӧлэстӥське таиныз, нимысьтыз солы мултэс дыр но, трос кужым но уг быдтӥськы, со понна трос выльзэ, тунсыкозэ тодӥсько, куд ке дыръя мукетъёслы но юрттыны быгатӥсько. Мынам мукет льӧль малпанэ вань – 24 час ужась удмурт радиостанция кылдытыны!

Источник:

Касаткин С. А. Вераське «Мынам Удмуртие» / С. А. Касаткин ; записал З. Рябинина // Удмурт дунне. - 2013. - 08 ноября. - С. 6,11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"