Касаткин Владимир Вениаминович

Материал из Воршуда
Версия от 10:43, 16 апреля 2014; Admin (обсуждение | вклад)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Бергась муртлэн йырыз уг берга

В.В. Касаткин

Ижысь гурт удысъя кун академиысь техника наукаосъя доктор, профессор Владимир Вениаминович Касаткин 1995-тӥ арысен кивалтэ сиён-юон поттонлэн технологиезъя но тӥрлыкезъя кафедраен. Пусъемын Удмурт Республикаысь Правительстволэн, Гурт удысъя но сиён-юонъя министерстволэн Данъян грамотаосынызы. Озьы ик Владимир Вениаминович быръемын Удмуртиысь Инженер академилэн пленумаз, Ижысь гурт удысъя академиын диссертациосты утёнъя кенешлэн тӧроезлэн воштӥсез луэ. Со сяна, нимтулыз пыртэмын Россиысь азьмынӥсь адямиослэн энциклопедиязы.

Владимир Вениаминович наукая 150 уж, 2 монография гожтӥз, изобретениослы 9 патент басьтӥз. Профессорлэн тыршемезъя кафедраын кылдытэмын тылэз шыръясь, чылкыт сиён-юон поттӥсь производствоосъя наукая школа. Татын ортчыло студентъёслэн наукая конференциоссы, ӵошатсконъёс. Кафедраын быдэсъяло Россиысь Гурт удысъя министерстволэн, Удмуртиысь Гурт удысъя но сиён-юонъя, Вуз каронъя но калыклы юрттэт сётонъя министерствоослэн куронъёссыя эскеронъёсты.

Кузьым

Владимир Касаткин вордскемын но будэмын Балезино ёросысь Вуж Пӧбъя (Подборново) гуртын ныло-пиё семьяын. Мумиз Мария Петровна дышетӥз покчи классъёсты. Бубиз Вениамин Васильевич колхозын тыршиз: нырысь комбайнёрын ужаз, собере кивалтӥз «Балезинский» совхозлэн Вуж Пӧбъя люкетэныз. Касаткинъёс нылпиоссылы пичиысен ик пыӵато ужез гажан мылкыд. Куать аресъем Вовик но колхозэ потаз ни. Бадӟым эшъёсыз пиёкез вал вылэ пукто - тазьы со мажсаське но, турын но нуллэ. Огпол вал вылысь усьыса, быдэс ар чут ветлӥз. Озьы ке но тэк пукыны ӧз чида, ялан маке но малпалляз. Пуклёез вандылыса-пасяса, питранъёс пӧрмытъяз. Собере нылпиос ворттылӥзы пу погылянъёсын уробоосын.

Гуртысь покчи классъёслы чаклам школаын - кык дышетӥсь. Анаез кие дышетскыны медаз кемды шуыса, Вовикез куать аресысен школае нуизы. - Дышетскыны мылы уг поты вал. Со понна мыло-кыдо пыриськи ӵошатсконъёсы. Нырысь вормонэ - колхозын велосипедэн ворттылӥсьёс пӧлын. Соку нырысетӥ интые потӥ. Монэ, пичи пияшез, сцена вылэ ӧтизы: Владимир Вениаминович, басьтэлэ приз! Ваземзылы оскытэк, куалекъяса потӥ сцена вылэ. Ыж гонлэсь штан кузьмазы. Ну, шумпотӥ ук. Азьланяз велосипедлэсь педальёссэ уката чырткем бергатыны тырши, - тодаз вае Владимир Вениаминович. Витетӥ классэ Касаткин вамыштӥз Балезиноысь 4 номеро школае. Улӥз интернатын. Володяез но огзэ нылашез, ӟеч дышетскисьёс шуыса, черкогурт школае басьто, кылемъёссэ пиналъёсты гуртоослы висъям школае куто. Володя табере дышетске ӟуч программая.

- Татын тодон-валан люкан аръёсы - тужгес шаян вакытэ. Куатетӥ классын интернатын эше пала миндэр сэрпалтӥ но укноез пили. Тямысэтӥ классын партаез шуак берыктӥ но сэрегыз укное мырӟиськиз. Дасэтӥ классын но шузи дыръёсы пуштылӥзы на. Доска ӵушылон мучолоез, юн-юн биняса, борддор шоры сачак лэзьялляськомы вал. Огполаз озьы шоналски но - мучоло, пуля сямен, укноез пасяса, ульчае лобӟиз. Ма кароно? Гуртоослэсь пиялазэс курыса, ачим ик ӝыт укное пук тӥ.

Ӟеч отметкаосызлы оскыса, 1972-тӥ арын Володя мынӥз Ижысь механикая институтлэн прибор лэсьтонъя факультетаз. Но конкурсэз ӧз ортчы. Ужаны пыриз Ижысь радиозаводэ фрезеровщике. Кыкетӥ араз Владимир нош ик институтэ йыгаськиз - таяз радэ но ӧз пӧрмыты.

Данъян

Заводын Володя вань сюлмысьтыз тыршиз. Ӟеч ужаса, коньдон но бадӟым потэ. Ар куспын егит воргоронлэн нимыз заводысь Данъян пул вылэ сюриз. 170-200 манет уждунэн куаныса улӥз. Со дыре ик армие мынон аресыз но вуиз. Шедиз Чита улосэ, кунгожез утёнэ. Егит солдатъёсты ужен согизы: таиз - кочегар, мукетыз - пуныосты учкись, куинетӥез - пудо утись.

- Ми, кык удмурт пиос, ужтэк кылимы, - тодаз вае Владимир Вениаминович. - Кивалтӥсьмы юа: кин луоз сиён пӧзьтӥсь? Мон, песяе но анае-атае вӧзын будэм адями, чай быректыны но уг пӧрмытӥськы вал. Пӧранэз нылкышно ужен лыдъялляй. Кивалтӥсьлы шуисько: уг быгатӥськы. «Дышетом!» - ӝот-ӝот вераз пумитам.

Удалтон

Армиысен Володя уката ӵем малпаськыны ӧдъяз дышетскон сярысь. Дораз гожтэт ысъяз, дышетскон заведениос пумысен ялон курыса. Анаез кулэ ивор шедьтӥз газетысь. Рабфаке куриськыса, Володя армиысен ик гожтэт келяз. Анаез документъёссэ Ижысь механикая институтысь рабфаке сётӥз. Толло солдатлы соку ик висъязы улон инты. Рабфаке ваньзы сямен армия бере пыриллям. Тодон-валанлэсь мӧзмем пиос мылысь-кыдысь басьтӥськизы дышетскон борды. Володя луиз прибор лэсьтонъя факультетысь студент, бырйиз лыдъян-чотан машинаосъя удысэз.

Инженер-конструктор

1981-тӥ арын, институтэз йылпумъяса, егит специалист ужаны вуиз «Ижточмаш» бюрое. Татын инженер-конструкторлы оскизы вакуумной установкаослы валтӥсь блокъёс лэсьтыны.

1987-тӥ арын огазеяськонэз пӧрмытӥзы Вакуумно-электронной машиностроениея институтлы («ВЭМ» НИИ). Табере егит инженер валтӥсь конструктор луиз. Со микросхемаос поттон вылысь визьмо оборудование лэсьтэ. Тужгес устоез - «ЛНД-Плазма» дугдылытэк ужась линия. Та уж вӧлмиз быдэс Союзэ. Тазьы кылдӥз кизер кристаллэн ужась (жидко-кристаллической) индикатор. Таиз со вакытэ ӵем кутӥськылӥз сьӧд-тӧдьы телевизоръёсын, термометръёсын но мукет электрон арбериосын. Собере линия капчиен пыӵаз огшоры улонэ но. Кылсярысь, Санкт-Петербургысь фирма выльдӥськон вакытэ та амалэн дасяны кутскиз голография пломбаос но акциз маркаос. Соосты, тодӥськом, куто курыт юонэн ӟенеликъёсты утёнэ.

Но, конструкторлэн уждунэз ушъяськымон ӧвӧл. Владимир Вениаминович вера:

- НИИ но «ВЭМ» люкиськизы, ас кожазы ужаны кутскизы. Мон выжи «ВЭМ» заводэ. Одӥг но ӝыны ар регулировщикын ужай. Чакламъя выль тӥрлыкез июне йылпумъяно ке, мон быдэстылӥ ни мартэ. Таӵе тыршемме кивалтӥсе дунъяз - уждунме будэтӥз. Но пумен шӧдӥсько: мылкыды та интыын ӧвӧл ни. Чаклам ужез мон огнам лэсьтыны дась - милемыз куинь муртэ ужато. Иське, кивалтӥсь ужлэсь кудпала бергамзэ уг вала. Ӝожомыса пукисько: кошконо луоз. Соку выль отделэ выжон сярысь ӵектон вуиз. Но азям курон пуктӥзы: коммунистъёслэн партиязы пыроно. Огшоры ужасез отчы уг басьто. Озьы партие пыроно луиз.

Выль интыын Касаткин ӝоген будыны кутскиз. Солы оскизы обороная производствоысь тужгес выль разработкаосты. Таӵе ужез быдэстэмез бере Касаткин кыкетӥ категориен инженер, собере валтӥсь инженер луиз, будӥз отделэн кивалтӥсь дорозь.

Владимир Касаткин, гуртын будэм адями, малпаз гурт хозяйстволы саклык висъяны. Со кутске емышез пыргытыса куасьтӥсь установкаослы, вакуумной упаковкаослы, сиёнэз векчиятыса кынтонлы проектъёс лэсьтыны. Но 1990-тӥ аръёсы институтлы бюджетысь коньдон висъямысь дугдӥзы. Нош ужез кытын ке эскероно. Владимир Касаткин дэмла со машинаосты чакланы Ижысь гурт удысъя академилэн агрономияя факультетаз. Бызьылыса-курыса ортчиз кык ар. - Мар ке лу, лу малпаса, йыгаськи Валентин Фокин ректор доры, - тодаз вае конструктор. - Ректорлы валэктӥ ма бордын ужамме. Кема малпаськытэк, монэ ӧтизы академие. Оскизы «Сиён-юонэз лэсьтонын механизация» кафедраен кивалтыны. Озьы 1995-тӥ арын Касаткин выжиз студентъёсты дышетон уже.

Тодосчи

Гурт удысъя академиын Владимир Вениаминович азьланьтӥз наукаен выронзэ. Пыргытыса куасьтон технологиоссэ выльдӥз, етӥн куролэсь куж лэсьтон амал кылдытӥз, гурт хозяйствоысь кылем-мылемъёсты быдтыны технология но трос мукетсэ малпаз. Таӵе узыр тодон-валанэн тырмем йырез дунъятэк нокызьы - 2000-тӥ арын Владимир Касаткин луиз техника наукаосъя кандидат. Ньыль ар ортчыса, утиз ини доктор ужзэ.

- Сиён-юон поттон удысын выль амалъёс тырмыт ини, - валэктэ тодосчи, - но ӵемысь, бадӟым барыш сьӧры уйиськыса, продукция поттӥсьёс куто дунтэм химия ватсэтъёсты, буёлъёсты, консервантъёсты. Соос тазалыклы ӟечсэ уг ваё. Туж потэ утеме инкуазен сётэм емышъёсты, витаминъёсты. Но таӵе тӥрлык дуно усе. Озьы ке но со азьланяз одно ик кулэ луоз.

Профессор ялан сюлмаське-берга дышетонэ выль амалъёс пыӵатон понна. Кылсярысь, азьланяз кык специализацияя дышетӥсьёс лекция мед лыдӟысалзы англи кылын. Озьы студентъёс калыккуспо конференциосы пыриськыны, тодон-валан басьтыны быгатозы.

Владимир Вениаминович дышетскисьёссэ дунъя:

- Урод студентъёс ӧвӧл, вань азьтэм дышетӥсьёс. Мон котьку ик зэмлык понна. Пӧяськись адямиослэсь одно ик кылзэс юасько. Дышетӥсько студентъёсты улонэз яратыны, котыр ласянь тодон-валанзэс будэтыны. Котьку таӵе малпанэн улӥ: толалтэ городын, нош гужем - гуртын ужаны. Озьы ик пӧрмиз. Толбыт академиын, гужем, стройотряд кылдытыса студентъёсын Удмуртиысь гуртъёсын тыршиськом.

Дас куать ар ужан куспаз Владимир Касаткин дасяз ини дас витьлэсь ятыр техника наукаосъя кандидатъёсты. Кызьлэсь уно егитъёсыз али дышетско аспирантураын. Кыкез дышетскисез наукая доктор ним утьыны дасяське. Профессор шумпотэ: дораз тодон-валан люкамъёс табере пыд йылазы йыг-йыг сыло ни. Кылсярысь, «Нечкинский» совхозлэн тӧроез Марат Исламов, «Аспек-Игерман» сӥль комбинатлэн кивалтӥсез Дмитрий Соцких, Якшур-Бӧдьяысь нянь пыжон заводлэн директорез Наталья Васильева но трос мукетъёсыз.

Семья кузё

Ужезлы сяна, Касаткин быгатэ саклык висъяны семьяезлы но. Уж но, семья но - люконтэм. Владимир Вениаминович но кузпалыз Надежда Юрьевна одӥг кафедраын тыршо. Надежда Юрьевна Литвинюк - профессор, дышетӥсь.

Профессоръёслэн семьяязы ньыль нылпи будэ. Бадӟымез - Валентина - Ижысь техникая кун университетысь прибор лэсьтонъя факультетэз йылпумъяз. Марина - та университетысь ик дизайнъя но рекламая факультетын дышетскиз. Настя - укмысэтӥ классын. Вовиклы куать арес гинэ ай.


Источник:

Касаткин В. В. Бергась муртлэн йырыз уг берга / В. В. Касаткин ; записала Ю. Кузьмина // Удмурт дунне. - 2010. - 15 окт. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"