Кардапольцев Николай Семёнович: различия между версиями

Материал из Воршуда
Перейти к навигацииПерейти к поиску
 
м (1 версия импортирована)
 
(нет различий)

Текущая версия на 14:42, 6 февраля 2015

Кырӟамысь эн дугды тон, сюлмы![править]

Кардапольцев Н. С.

Трос тодмо кырӟасьёсты вордӥз но будэтӥз удмурт музъем. Туж чебер чирдӥсь уӵыосты веттаз но лэйкатӥз Удмурт шаер. Синмаськоно адямиос пӧлысь одӥгез – Удмурт Элькунысь дано артист Николай Кардапольцев. Ошмес ву кадь чылкыт, сайкыт нунал кадь югыт, ӟеч нянь кадь небыт куараё тенор кылзӥсьёсызлэсь но, учкисьёсызлэсь но сюлэмъёссэс вырӟытъя.

«Удмуртия» кун телерадиокомпанилэн академи хор капеллаяз кырӟась алигес луиз Удмурт Элькунысь калык артист. Николай Кардапольцевлы таӵе вылӥ ним сётӥз Удмурт Республикалэн Президентэз Александр Волков.

- Николай Семёнович, тӥ вордӥськиды дэбес музъем вылын. Та ёросын трос дано адямиос кыдазы…

- Бен, дэбес музъем вылын вордӥськизы быдэс шаермылы но, музон кунъёслы но тодмо адямиос – Кузьма Алексеевич Ложкин, Геннадий Михайлович Корепанов-Камский, Евгений Георгиевич Серебренников, Евгений Вениаминович Андреев…

Геннадий Михайлович Корепанов-Камскийлэсь вордӥськем гуртсэ но мынэсьтым вордӥськем Улӥ Шудӟалудме висъя кык но ӝыны иськемъем сюрес. Дано кырӟасьмес но крезьгурчимес мон быдэ вуэме бере ик тодӥсько вал ини. Но нокыӵе кусыпъёсмы ӧй вал.

- Николай Семёнович, тӥлесьтыд небыт кырӟамдэс кылыса, сюлэм пушкын туж шуныт но ганяк луэ. Нош асьтэос ку нырысьсэ шӧдӥды такем чебер но жингрес куарадэс?

- Ньылетӥ классын дышетскыкум, мыным басьтӥзы арган. Анае, Ангелина Егоровна, туж усто шудэ-кырӟа-эктэ вал. Егит дыръяз туж етӥз вал. Ӝытъёсы но, куное ӧтьыкузы, кияз арганзэ котьку кутылӥз. Буби куноысь вазь бертылӥз, нош мемие шудыны кыльылӥз на. Песянае соку чабкиськылӥз:

- Ма, татчыозь кытын улэ на та кенэ? Ялан-а, мар-а кунояське на? Атае киыныз шонтылӥз гинэ:

- Бен мед шудоз на ай. Мед шулдыртоз на калыкез.

Басьтэм арганэн шудыны нырысь ик дышетыны выриз анае. Куатетӥ классын дышетскыкум, школаямы вуиз Юрий Егорович Шкляев. Глазов пединститутэз йылпумъям мурт баянэн туж усто шудыны быгатылӥз.

Огпол Юрий Егорович дэмлаз:

- Ойдо асьмеос, пиёке, нырысь ик кырӟаны дышетском.

Вазьвыл куиньнамы кырӟаны ӧдъямы: туннэ кадь ик тодӥсько ни жингрес ярославль такмакъёслэсь жингыртэмзэс.

Собере Юрий Егорович нош ик сюлмысьтыз вазиськиз мыным:

- Тон, эке, табере, оло, огнад но пӧрмытод ини? Оскалты бен.

Мон ӧй чигна: кужымме эскерыны малпай. Азьвыл ёросъёсысь школаосын дышетскись пиналъёс куспын кырӟаны быгатэмдэ возьматонъя пӧртэм ӵошатсконъёс ортчыло вал ук. Одӥгаз пыриськыны дӥсьтӥ. Сюлмаськеме юнме ӧз луы: лауреат ним басьтӥ. Нош вазьгес ай таӵе дан усиз вуоно кырӟасьлы Евгений Серебренниковлы.

Отӥяз но, Тыловай черкогуртын дышетскыкум но, монэ азьлань валтӥз Кырӟан. Покчи дыръям ик ай туж яратӥ Муслим Магомаевез. Солы инмарлы музэн вӧсяськылӥ. Вань кырӟанъёссэ тодылӥ.

- Нош зэмос кырӟась луон понна, кытын дышетскиды?

- Дасэтӥ классэз йылпумъяса, Ижысь Гурт удысъя институтэ пырыны малпай вал – ӧз пӧрмы. Кошки Воткала. Интыяськи машина лэсьтон заводэ. Татын ужакум кырӟай-верай «Юбилейный» культура дворецын. Та юртын котьма вал: хор но, вокал но. Мон бырйи кыкетӥзэ – вокалэз. Татысен ик валаны-шӧдыны кутски ни кадь кырӟанлэсь шӧмзэ но, пуштроссэ но, сюлэмзэ но. Вылаз ик, кырӟанлэн паймымон, зэмос дуннеяз лулысь-сюлмысь валтӥз монэ крезьгуръя училищеын дышетскем мурт, Операя театрын кырӟам адями, вокалист Юрий Нецветаев. Бас куараё дышетӥсе туж мылысь-кыдысь чузъяськытылӥз ариосты. Со юрттэмъя ик мон вань сюлмысьтым яратыны ӧдъяй кылзӥсь калыклы тужгес зол кельшись усто крезьгуръёсты.

Юрий Нецветаев Иже но – шаерысьтымы крезьгуръя училищее - вуылӥз. Сьӧраз монэ но басьтылӥз.

Ӵапак та вакытэ ик Воткалан ортчыло ни вал быдӟым ӟуч крезьгурчилы – аспал эшмылы Пётр Ильич Чайковскийлы сӥзем фестивальёс. «Юбилейный» культура двореце огпол лыктӥз шаерысьтымы крезьгуръя училищеысь оркестр. Татын тодон-валан люка ни вал тодмо эше – тенор Валерий Аверьянов. Нош дышетӥз сое шаерысьтымы туж тодмо кырӟась Николай Семёнович Зубков. Ӵапак фестиваль мыныку, Валерий тодматӥз монэ дышетӥсеныз. – Дворецлэн одӥгаз висъетаз пыртыса, Николай Семёнович куараме кылзӥз но ӵектӥз:

- Ойдо бен крезьгуръя училищее пыр: оло, кин ке пӧрмоз тынэсьтыд?..

- Тӥни – озьы луиз: училищее шӧдтэк шорысь шеди. Монэ дышетӥз шаерысьтымы туж тодмо кырӟась но крезьгурчи Геннадий Михайлович Корепанов-Камский.

«Юбилейный» культура дворецын кырӟакум ик ай азьвыл дышетӥсе Юрий Нецветаев ятвылтӥз вал баритон куараме. Училищее вуыса но та амаллэсь ӧй люкиськы. Геннадий Михайлович шӧдӥз паллян кырӟамме. Шорам мыр-мыр учкиз но алӥз:

- Кытчы кожаськод, пиёке? Тон бен тенор ук…

- Вот тыныд тенор! – киосме пасьтана вӧлдыса, чылкак чабкиськи. – А мон ке эшшо йӧно баритон куараеным Мизгирьлэсь ариоссэ кырӟаны ӧдъясько вал… Ньыль ар «ӵошкытатӥз, сэстӥз» монэ Геннадий Михайлович. Ну бен курадӟиз нырысь-валысь!

Училищеын дышетскон оглом секыт ӧй вал. Нотаосты татчы вуэмелэсь азьвыл ик тодӥсько вал ини. Баянэн но шудыны йӧндырылӥ. Фортепианоез нырысьсэ адӟи та юртысен. Училищеын дышетскыкум ик юн яратӥ сольфеджиоез, гармониез.

- Дышетскондэс йылпумъяды но вуиды…

- «Италмас» ансамбле (нялтас верало: сцена вылэ потэме дырысен туэ кызь сизьым ар тырме ини).

Кырӟась-верась эшъёсыным ӵош нырысьсэ потай лымшор палъёсы – Можга, Алнаш, Грах, Кизнер ёросъёсы. Бадӟым городъёсты, Ижез но Воткаез сяна, ӧй ик тодылы азьвыл. Шутэтскеме бере ансамбле вуи но – остэ: нырысь ик вуылӥ Москвае, собере – Чехословакие. Ваньмызлы туж паймылӥ. Копак абдрай: собыдӟа шуд!

Ӵапак та вакытэ ик мон армие мыныны кулэ вал. Чехословакие потамен, ӝыны арлы кылёно луиз.

Ӝыны ар ортчыса, нош ик сьӧрло кошки. Таяз учыре ини кык толэзьлы – Прибалтикае. Отысь бер вуэмен, вылам шинель дӥсяны нош ик ӧз кылды. Ар ортчыса гинэ ини, ноябрь толэзе, пыдам кирза сапег кутчано луиз. Та вакытэ мыным кызь вить арес ини вал.

Армилэсь сомында пол кыльылоно луиз бере, ож удысэн кивалтӥсь азьын ӟеч ӧвӧл кадь. «Италмасэн» ӵош Чехословакие потакум, военкомлы ваи вал чильым. Кузьымме басьтыкуз, шорам учкиз но шуиз:

- Ярам бен, Кардапольцев, лэсьтӥськонъя батальонэ мынод. Отысь эшъёсыд понна сюлмысь кырӟалод, эктод…

Мон сике шеди. Милесьтым служба нуон интымес стройбат ке но шуылӥзы, малы ке толалтэ но, тулыс но, гужем но, сӥзьыл но муэз гудӟылӥмы – пӧртэм пумо ракетаослы чаклам кабель вошъяллямы. Ужмы чик но капчи ӧй вал. Ас поннам малпалляй: татын бен, ой-ой, тазьы чылкак лябӟод ук. Вылаз ик, муэз гудӟонъям, куарае бырыны шӧтаз. Политотделэ мынӥ но куриськи:

- Ваелэ ансамбльын кырӟало!

Нош отын чутрак пумит луизы:

- Татын тон, Кардапольцев, милемлы кулэгес.

Ма бен: уг лэзё бере, уг лэзё.

Ӵапак соку Свердловскысь (туала Екатеринбургысь) лэсьтӥськонъя управлениысь адямиос вуизы. Кытысь ке дӥсьтон шедьтыса, доразы вамыштӥ но «синвуаськи»:

- Мон йылпумъяй крезьгуръя училищеез. Кырӟасько. Нош дышетскемея уж ӧвӧл татын…

Одӥгез полковник валаз кадь мынэсьтым курадӟемме. Чик лекъяськытэк куриз:

- Мыным вазиськыса, рапорт гожты но – эскером.

Кык толэзь но ӝыны ортчыса, монэ выжтӥзы Кунгуре – омырын тушмонлы пезьдэт сётыны быгатӥсь эшъёсы пӧлы. Куинь нунал куспатыса, вуи Свердловске. Татысен ини шеди Урал ож улослэн ансамбляз.

Ар но вить толэзь кырӟай татын. Вераны кулэ: ансамбль туж ӟеч тодон-валан кузьмаз. Вылаз ик, вӧзам вал на туж ӟеч дышетӥсе – итальян амалэн кырӟась Юрий Прокопенко. Та эше кырӟакум но вӧзам сылылӥз, мынэсьтым кызьы кырӟамме эскерылӥз.

- Табере кӧня ке ар ӵоже ни тӥ кырӟаськоды «Удмуртия» кун телерадиокомпанилэн академи хор капеллаяз…

- Армия бере Урал ож улослэн ансамбляз ик кыльыны медӥсько вал. Отын таӵе сям возиськылӥз: кык ар ӟеч кырӟам муртэ вить арлы сьӧрло – Германие, Чехословакие я музон кунэ – келяллязы. Озьы, быдэсъяськиз Варшаваын кутэм огкыллэн куронэз.

Тае лыдэ басьтыса ик, сьӧрлось кунъёс но асьме доры адямиоссэс ыстылӥзы. Армиысь бертыса, аслэсьтым сюлмаськонме быдэстыны чаклай. Иже вуыса, «Италмас» ансамбльысь кошкыны малпай. Нош солэн кивалтӥсез Анатолий Васильевич Мамонтов чутрак алӥз:

- Кытчы бен тазьы шукрес дасяськид ай? Тон удмурт ук! Озьы бере, аслад удмурт калыкедлы, аслад Удмурт шаередлы кулэгес…

Кытчы бен пырод – кивалтӥселэсь кылзӥськытэк ӧйлась. Озьы, Анатолий Васильевич Мамонтов дырыз дыръя алэмен, ансамбле ик кыли. Отӥяз «Италмасын» эшшо сизьым ар кырӟай на.

Улон бен огинтыяз ӧз сылы: мынам семьяе кылдӥз, нылпиосы вордӥськизы. Югыт дуннеез Катя нылы адӟем бере, кузпалэ борды акылес висён тэбиниз. Ӵапак та учыре ини «Италмасэн» амалтэк люкиськоно луиз.

Табере кытчы бен вамыштоно? Кудаз ке театре мынэме ӧз пот. Нош Удмурт радиолэн хорезлэн кивалтӥсез Геннадий Прокопенко дораз далай ӧте ни вал. Мон кема ӧй ни малпаськы – соку ик дораз вамыштӥ.

Хоре вуэме бере ик ачим азе таӵе ужпум пуктӥ: кужмы вань дыръя, быгатонлыке ӧръяськыку, кырӟанъёсме, кырӟам куараме магнит лента вылэ гожтыса кельтоно.

Азьвыл бен Удмурт радиолэн хорез калык азе туж ик ӧз поталля – таӵе луонлыкмы ик ӧй вал. Али ми толэзьлы быдэ сцена вылэ ӝутскылӥськомы.

Азьло кырӟай ке Удмурт радиолэн хораз, собере – хор капеллаяз, 1995-тӥ арысен нуналлы быдэ вамышъясько «Удмуртия» кун телерадиокомпанилэн академи хор капеллаяз. Вань ужаме дас сизьым ар люкаськиз ини.

- Тӥ ваньды ик туж вылӥ быгатонлыко кырӟасьёс. Соин ик таӵе калык пушкын ужаны сокем ик капчи ӧвӧл, дыр? Вылаз ик, капеллалэн кивалтӥсез - Удмурт Элькунысь искусствоосъя дано ужась Анатолий Щербаков – кырӟасьёсыз азе туж вылӥ куронъёс пуктылэ, шуо…

- Анатолий Михайлович Щербаковлэсь азьвыл ай милемын кивалтӥз Лев Георгиевич Казберов. Со весь малпаськылӥз академи амалэн кырӟась хор кылдытон сярысь. Зэм, чебер малпанэз ӧз быдэсмы.

Выль кивалтӥсьмы ужез борды ӝот-ӝот басьтӥськиз. Анатолий Михайлович быгатӥз академи амалэн кырӟась зэмос хор капелла кылдытыны. Вылтусмы но, пуштросмы но копак воштӥськизы бере, табере ужмес но ӟечгес быдэсъяно луэ ини. Соин ик Анатолий Михайлович но ми азе туж вылӥ куронъёс пуктылэ. Азьвыл, ми кырӟамъя, туж ӵем чузъяськылӥзы удмурт гуръёс. Весь жингыртылӥзы кырӟанъёс. Удмурт крезьгурчиослэсь Удмурт радиое ваем вань ужъёссэс магнит лента вылэ гожтылӥмы.

Бен, ваньмыз со туж ӟеч вал. Но табере югдур воштӥськиз. Табере ужаны но тунсыкогес луиз.

- Тӥледлы кыӵе кырӟанъёс яралогес?

- Сямыя мыным тужгес матын лирика. Со сяна, лул гуръёс. Берло вакытэ, Анатолий Михайлович Щербаков юрттэмен ик, сюлмысьтым яратыны кутски туж тодмо луись гуръёсты. Соосын мон крезьгуръя училищеын дышетскыкум ик тодматски вал ини. Зэм, Урал ож улослэн ансамбляз, «Италмас» ансамбльын кырӟаку, соослэсь огдырлы люкиськоно луылӥз. Удмурт радиолэн хораз вуэме бере но ас кожазы ужась удмурт крезьгурчиослэсь кырӟанъёссэс чузъяськытылӥ. Берло гинэ ини, академи хор капелла вордӥськем бере, мыным эшъяськыны кылдӥз калык пушкын ялан возиськись, туж тодмо гуръёсын. Бен, Удмурт радиолэн хораз вуэме бере, нырысь ик кырӟалляй ас кожазы ужась удмурт крезьгурчиослэсь кырӟанъёссэс. Али кадь ик тодӥсько на Геннадий Николаевич Матвеевлэсь коштан ныл сярысь кырӟанзэ. Бӧрысь эшъяськи Пантелей Николаевич Кузнецовен. Пантелей Николаевичлэн вань кырӟанъёсыз ярало. Огпол юри лыдъяй но тодӥ: ог дас витьсэ гожтӥськем. Тазьы ик тодматски Михаил Алексеевич Оськинэн. Со но нырысетӥ ужъёссэ Удмурт радиое вайылӥз. Кырӟасько Михаил Алексеевичлэсь «Вамыштомы артэ», «Юнме вождэ поттӥськод» кырӟанъёссэ.

Пумиськылӥ Николай Трубачёвен – куиньзэ-а, ньыльзэ-а кырӟанзэ магнит лента вылэ гожтӥ.

Туж ӟеч кусыпъёс тупатӥ Николай Шабалинэн – та удыслы юри дышетскем муртэн.

Ма, тодэ ваёно ке, туж уно кырӟанлы лул шокчи. Куд-огзэ куддыръя кылӥськод но малпаськод: ма, тазэ но-а, мар-а кырӟасько?..

- Таӵе чебер но ненег куарадэс кызьы утиськоды?

- Куараме утён – нуналлы быдэ быдэсъяно уже. Зэм, озьы котьку уг пӧрмы. Берло ньыль арзэ гинэ ай со сярысь сюлмаськыны ӧдъяй.

Кызьы чакласькисько бен? Кулэтэм дыръя ичигес кырӟаны турттӥсько. Кынмамлэсь утиськисько.

- Ваньмыз сямен артистъёс учкись азе, сцена вылэ котькуд потэмзылы быдэ куалекъяло. Нош тӥ?

- Котьку сямен. Тужгес но, матысь адямиосыд понна кырӟаськод ке.

- Кызьы бен соку асьтэды кияды кутӥськоды?

- Аслыд ачид шуиськод ини: кулэ бере – кулэ. Кылзӥсь нош тонэ туж шуныт пумита ке, эшшо но эшшо кырӟам потэ. Таин валче тодам лыктэ таӵе учыр. Кылем арын, шуркынмон толэзе, кунмылы юрттонъя Урал академилэн удмурт ёзэз дас аръем юбилейзэ пусйиз (нялтас верало: ачим но татын дышетски – луи кунэн кивалтонъя менеджер). Тӥни та юбилее ӧтизы но, кырӟано луиз. Сюлмысьтым турттӥ.

- Малы бен тӥ, кырӟась мурт, чылкак мурт удыслы но дышетскиды на?

- Та сярысь мон котьку малпаськылӥ. Ньыль ар талэсь азьло дыры но вал. Вылаз ик, одӥг ӝытысен тодматскыны кылдӥз татысь кивалтӥсьлэн дышетон но валэктон ужъя юрттӥсеныз Татьяна Готфридовна Бауэрен. Солы ивортӥ академилэн ёзаз дышетскыны пырон мылкыды сярысь. Татьяна Готфридовна дэмлаз мыным:

- Бен гожты ук куриськон. Удмурт Кивалтэт собере эскероз.

Куриськыны дӥсьтӥ ик. Бӧрысь мыным юрттӥзы на Илья Михайлович Байметов, Антонина Михайловна Лисина – туж бадӟым тау соослы! Та адямиос дырыз дыръя сюлмаськемен но дурбасьтэмен, академилэн удмурт ёзаз дышетскыны но сое йылпумъяны кылдӥз.

- Нош марысь мар ке, кытын ужалоды?

- Кырӟало ик, дыр. Бен дышетскеме юнме уз луы, кожасько: туж трос тодон-валан басьтӥ татын. Вылаз ик, пыд йылам но табере йыгмытгес, оскымонгес возиськисько. Собере, менеджер луи бере, аслэсьтыд удыстэ но усьтыны луоно ук.

- «Удмуртия» кун телерадиокомпанилэн академи хор капеллаез та вакытэ куашкан калэ вуэмын, шуо, со сярысь пӧртэм пумо вераськонъёс вӧлмо. Зэм-а со?

- Бен, вань сыӵе сюлмаськон. Али та ужпумъя одӥг кыл шедьтыны туртто. Одӥгъёсыз шуо: академи хор капелла «Удмуртия» кун телерадиокомпанилэн ик ваньбурзэ луоз. Музонъёсыз милемыз Удмурт Элькунысь Культурая министерстволы сётыны дэмлало... Бен чылкак ум быре, дыр. Таӵе капеллаез кытысь ке шедьтод на шат? Вылаз ик, со аслэсьтыз устолыксэ-ӟечлыксэ котыр ласянь возьматӥз ини. Шаерамы но, Россиын но артистъёслы туж вылӥ дунъет сётылӥзы ни. Со сяна, вынлыко эшъёсмы дорын но – Эстониын но, Венгриын но – милемлы туж кужмо чабылӥзы.

- Учкисько ке, капеллаяды нылмуртъёс, нылкышноос тросгес кадь. Пиосъёс ӧжытгес…

- Воргоронъёсмы али дас кык кузя. Бен, ичи со. Ньылез эшшо мукет интыын но ужало на.

Милемлы кулэ вал коньдонэн юрттӥсь: уждун татын туж ӧжыт ук. Зэм, шонерзэ вераса, пиос али нокытын уг тырмо. Ваньмыз со та шуго-мого вакытэнымы, огыр-бугыр улонэнымы-вылонэнымы герӟаськемын.

- Нош капелла шӧдтэк шорысь быриз ке, мар кароды?

- Аслым уж шедьто. Малпанъёсы трос. Академилэн ёзаз дышетскемме лыдэ басьтыса, аслэсьтым кыӵе ке удысме но усьтыны луоно ук.

Удмурт кун филармоние мыныны, «Италмас» ансамбле но выльысь берытскыны луоз. Операя но балетъя кун театрлэн хораз но мурт уз каре, дыр. Оло, кыӵе ке администратор но луыны удалтоз?..

Ӵок, ӵок: со сярысь ум вераськелэ. Капелла медаз быры! Уз но быры!

- Кырӟатэк, кырӟантэк улыны тӥ уд быгатэлэ ни, иське?..

- Улонам котькыӵе вакыт лыктӥз ке но, кырӟало. Нуналмысь быдэсъяно уже ӧз луы ке но, кырӟало. Кырӟатэк, кырӟантэк улыны уг быгаты ни.

- Тӥледлы огнады-а, кинэн ке ӵош-а, дэмен-а кырӟаны умойгес?

- Огнам котькулэсь усто.Кык кузя но яра.

Хорын кырӟаны секыт. Отын чылкак мукет куронъёс: палэнэ эн кошкы, эн висъяськы, паллян эн кырӟа!

* * *

Кинлы кыӵе адӟон кузьма ини инкуазь. Одӥгезлэн йыр йылаз ялан шуд гинэ лопыръяськылэ, мукетыз кайгулэсь чик уг мозмылы…

Кырӟась Николай Кардапольцев ачиз дуре аслэсьтыз шудбурзэ. Солэн сюлэмыз пушкын шудо кырӟанъёс гинэ вордӥськыло. Кырӟамысь эн дугды тон, сюлэм! Кырӟамысь эн дугды тон, сюлмы! Кырӟамысь эн дугды, сюлэмы!


Источник:

Кардапольцев Н. С. Кырӟамысь эн дугды тон, сюлмы! / Н. С. Кардапольцев ; записала Е. Виноградова // Удмурт дунне. - 2002. - 20 сент. - (Удмурт кизилиос).


За предоставление материала выражаем огромную благодарность редакции газеты "Удмурт дунне"