Камашева Елизавета Ивановна

Материал из Воршуда
Версия от 14:42, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Улытозям мон атаез возьмай…[править]

30-тӥ октябре Россиын буре ваё репрессиосын йырин юнме шорысь янгыше уськытэмъёсты, курадӟемъёсты. Кылем даурысь 30-тӥ аръёс - кунмылэн историяз тужгес кӧшкемыт вакытэз луэ. Миллионъёсын калык юнме шорысь янгыше уськытэмын вал. Страналэн кузёосыз мозмытскыны выризы визьмо, ужась, быгатӥсь адямиослэсь. Ог-огед вылэ чагиськон, ултӥян, вӧсь карон вӧлмизы быдэс Россие - котькуд улосэ, гуртэ. Куашкась экономикаез кивалтӥсьёс утьыны выризы коллективизация ортчытон чотын. Ялэмын узыр крестьянъёслы пумит нюръяськон, таламын соослэн ваньбурзы, улон юртъёссы, таркамын семьяоссы. Бӧрысьгес ӝутскиз репрессиослэн кыкетӥ тулкымзы - кивалтӥсьёс куалекъязы соослы пумит султӥсьёслэсь, политикаез валасьёслэсь, калыкез ӝутканы быгатисьёслэсь.

Лыдтэм-чоттэм адямиос келямын лагерьёсы, отын соос сисьтэмын, жалятэк быдтэмын. Семьяоссы кельтэмын сютэм кулыны, пиналъёслэсь таламын пичи дырзэс, анай-атайзэс.

Асьсэос репрессия улэ сюремъёс данакез ӧвӧл ни, но туннэ ке но со вакытъёсты тодазы вайыса, бӧрдо соослэн нылпиоссы. Туэ гужем Дэриысь Елизавета Ивановна Камашева пусйиз 80 арес тырмонзэ. Со пӧлысь ӝыны даурзэ со быдтӥз, зэмлык понна нюръяськыса.

Калык тушмонъёс

1929-тӥ арын Кияса ёросысь Уддяди (Карамас-Пельга) гуртысь Кадровъёслэн семьяязы вордӥськиз куатетӥ нылпизы. Атайзы пичи дыдыез киысьтыз ик ӧз куя - сокем шумпотӥз нуныезлы. Ним но солы мудрон сётӥз вал - Алиса, но сельсоветын Лиза гожтӥзы. Будэмез бере ни апайёсыз вераллязы: атай тонэ «учёной» луод шуыса ветталляз.

Уддядиын куинь Кадров агай-вынъёс улӥзы: Иван, Олёш но Семон. Ваньзы соос огкылысь, уез-нуналэз валатэк, тыршизы, арендае музъем басьтыса, ю-нянь будэтӥзы, турын кизизы - тыро-буро улӥзы. Ужез тужгес шаплы бергатыны быгатӥз Иван агайзы - быдэс гуртысь со тужгес ванё-буроез вал. Семьяез улӥз 108 квадрат быдӟа улыно-вылыно кирпич коркан. Кеносъёсыз, кирпич сараез, тӧл вукоез, муш бакчаез, емышо садэз вал. Со вакытэ ик Иван Балтаевичлэн садаз тулыслы быдэ пушйылӥзы улмо но грушапуос, чия, сутэр… Воргорон пудо но вордӥз, но вань ужез ас семьяезлэн кужыменыз быдэсъяз, нокинэ медъяса ӧз возьы. Озьы ке но ӟеч улэмез маза сётымтэ кас адямиослы. Вылаз ик, 1930-тӥ арын пуроме классовой тушмонэн - кулак выжыосын - нюръяськон.

Гуртысь вожъяськисьёс соку ик, кизэс посыса, кожизы Кадровъёслэн азбаразы. Нырысь-валысь семья ӧз ик малпа, тушмон карозы шуыса, угось Иван Балтаевич чик ӧз пумитъяськы колхозлы, ачиз мыло-кыдо пыриськиз сое кылдытонэ, выль кылдэм хозяйстволы аслэсьтыз складъёссэ но вал гидзэ висъяз, улон юртысьтыз кыкетӥ этажаз школа усьтӥз. Но со ӧз юрты, сыӵе кузьымез лыдэ ӧз басьтэ. Воргоронъёсты ури-бери ас коркасьтызы поттӥзы, ёросысь уллязы.

Интыяськиллям агай-вынъёс Сарапул ёросысь Выезд высёлкае, чылкак буш интые. Улӥллям куштӥськем мунчоын. Лумбыт ужаса бертэмзы бере куспазы кенешо вылэм: оло, уртче быгатом ваньзэ выльысь кутскыны? Тэль артэ, кызьы ке но огъя кужымен корка ӝутом… Но кин понна - лыктыса, нош ик уз-а тузэ? Ярам, тазьы но чидалом ни, семьяосмес гинэ медаз исалэ, буйгатъяллям ог-огзэс вынъёс. Но кышнооссылы, нылпиоссылы но Уддядиысь шуныт юртазы кема улыны ӧз сётэ. Ар ортчыса, трос нылпиё семьяе нош ик кожизы сталин гыжкалъёс. Лизалы соку укмыс толэзь гинэ вылэм ай. «Кулакъёсын» нюръяськисьёс дасяськыны но дыр сётӥллямтэ - нылкышноосты коркасьтызы донгаса сямен поттӥллям. Вань котырзэс талаллям колхоз ваньбурлы. Лизалэсь кӧкызэ гинэ но, мумиз киысь ишкалтыса ик, талаллям. Куараен бӧрдӥсь кышномуртэ нокин жалямтэ, ай эшшо горыса кылиллям..

Семья огинэ луэ, улэ куӵкем интыын. Рос-прос улыны дышем воргоронъёслы со кӧтсыя вылымтэ, соин малпаллям кыдёкегес - Челябинск улосэ - кошкыны, со вие отын трактор завод ӝуто вылэм. Ветлом, ужалом, коньдон поттыса, оло, нош улон борды ӝабырскыны быгатом, кенешиллям соос куспазы. Воргоронъёс кошко, кышнооссы но нылпиоссы кылё гольык, сютэм.

Сыӵе адӟонэз чидатэк, анайзы висьыны усе. Врачъёс сое, кулак кышно карыса, эмъяны пумит луо. Егит кышномурт кулэ, куать нылпи сирота кыле. Лизалы соку кык но ӝыны арес гинэ вал ай.

Югдурез тодыса вылысь но атайзэс завод лэсьтонысь уг лэзё. Нылпиос ас кожазы кылё: бадӟымъёсыз кин ке медое кариське, кин ке кураськыса ветлэ. Тямыс аресъем Петя братсэс утьыны басьто ӵыжы-выжыоссы, пичи дыдыез - Пичи Пурга ёросысь Итэш гуртысь семья. Кузпалъёслэн асьсэлэн нылпизы вылымтэ, нош со вакыт пичи нуныен атайёсты армилэсь мозмыто вылэм. Тӥни соин ик кузпалъёс озьы йыринтӥллям, луоз.

- Ярам коть, пичи вылӥськем, кызьы утемзэс уг тодӥськы ни, - синкылизэ ӵушылыса, шуэ Лизапай.

Угось ачиз нуны вордылымтэ кышномуртлы пинал утён ӝоген секыт йӧтыны ӧдъям. Малпам сыӵе курадӟонлэсь мозмытскыны. Одӥг салкым уе, быдэс гурт изьыку, со нылашез векчи дэрем коже сьӧрлось гурт дурысь бусые куро люк дуре кельтэ.

Вакчи шуд

Дыдылэн утисез зол вылэм. Ӵап со бусыын пудо возьмам солэн Петя агаез. Куро люк дуртӥ бызьылӥсь сузэрзэ пияш соку ик тодмам. Но ӵыжы-выжыосыз доры валтыны дӥсьтымтэ - мултэс ым каремзылэсь кышкам. Сузэрезлы куро кабанэ кӧлон инты дасям, нянь юдэс, ву ваем. Малпам ачиз но татчы ик каръяськыны. Ӵыжы-выжыоссы сюлмо адямиос вылӥллям - пияшлэсь ышемзэ ӝог шӧдӥллям. Нылашез соос ӧз палэнтэ - утялтӥзы-миськизы, шыдэн сюдӥзы. Абдраса нош ик атайзылы ивор келязы. Та рад Иван Балтаевичез оло лэзиллям, оло со яратоно нылзэ утён вылысь пегӟем - туж ӝог вуиз. Тӥни соку Лиза нырысьсэ валаз, мар со аслад вордэм атаед вӧзын улон. Сыӵе шудэз нылаш куинь ар гинэ шӧдӥз, но со вакытэз Елизавета Ивановна улонысьтыз тужгес шудо вакытэн лыдъя, атаезлэсь котькуд вешалтэмзэ али ке но тыбырыныз шӧдэ, ваземзэ кылэ кадь. Иван Балтаевич котькуд ӵукна дыдыезлэсь йырсизэ но ачиз пунылӥз, сынан сяменыз нылашлы ялан маке мадьылӥз. Озьы Лиза школае мынытозяз ик тодӥз ни, кин со Трокай Борисов, Кузебай Герд, Москваысь тодосчи-селекционер Вавилов… Нырысетӥ классэ нылзэ Иван Балтаевич ачиз келяз. Школае нуиз аслаз ӝутэм юртаз. Со вакыт отын котырысь гуртъёсысь нылпиос дышетскизы, дышетӥсьёс улӥзы, азьвыл кузёзэ юрт пушкы пыраны но ӧз лэзе. (Нялтас вераса, Кадровлэн юртаз Карамас-Пельгалась пиналъёсты 1964-тӥ арозь дышетӥзы).

Челябинскысь берытскемез бере нылпиосын воргоронлы улыны нокытын луиз, соин со амалтэк пыртосэ пыриз. Кышномурт пиналъёсты ӧз обидьы, ваньмыз огсыр мынӥз. Но воргорон валалляз - солы улыны уз сётэ. Нырысь кулак каризы, табере музон муг шедьтозы.

Дырын-дырын со нылызлы вералляз: сюранаен кылёно луоды, нылы. Лизалэн солы нокызьы оскемез ӧз потылы, солы уго атаеныз артэ сыӵе шуныт, умой… Алама шӧдон зэмаз. Огаз пеймыт сӥзьыл ӝыт укное йыгаськизы. Лиза кӧлыны выдӥз ни вал. Атаез сое лякытак ӝутӥз но нош ик йырсизэ сынаны кутскиз.

- Нылы, монэ нуыны лыктӥзы… Шӧдӥсько, пыраклы люкиськиьком, но кужмо кариськы, визьмо буд. Зэмлык вуоз Сталин кулэм бере… Мон оскисько, тон ваньзэ тодод-валалод.

Укное эшшо юнгес дымбыртыны кутскизы. Иван Балтаевич вазиз: вае коть нылылэсь йырсизэ берпумзэ пуно. Со дырысен нылпиос атайзэс ноку но ӧз адӟе ни. Лиза нош ик кылиз сирота.

Адӟонлэсь уд пегӟы

Еж пинал нылъёс арлыдоосын артэ тыршизы Иж-Балезино чугун сюрес лэсьтонын, тэль коранын. Ваньмыз тодо, кызьы возизы со вакыт ужасьёсты - гужемзэ улӥзы тылысъёсын, толзэ - дранча баракъёсын. Сиизы кин мар сьӧраз вайиз - нуналаз огпол картош коллё ӟузё ке, ярам ни. Трос-а ныпъетад ваед, ма, собере, мар тырод ай, дорын но пӧртэм номыр ӧвӧл ке. Пегӟыны амал ӧвӧл - эскерисьёс туж сак уло. Но огполаз Лизалы удалтиз ик. Соку со Каркалай нюлэскын ужа вал. Шур дуре пыласькыны шуыса васькиз, учке но - ӧр паськыт ик ӧвӧл, тэле пырид ке, нокин уз сакты ни. Уйбыт, ачиз но кытчы мынэмзэ валатэк, вамышъяз тодмотэм интыетӥ нылаш, тылобурдоослэн чар! кесяськемзы но, кионъёслэн вузэмзы но ӧз куалектытэ. Инмар вылэм ик - ӵукна пал нылаш черкез синйылтӥз - вамышъяса-вамышъяса со кызьы ке Иже вуэм. Нош татысен гуртаз сюресэз со ӟеч тодӥз ни.

Дораз кема шутэтскыны ӧз кылды. Толалтэ Пижилэ тэль кораны ыстӥзы. Татын нылаш ӧжыт гинэ кулытэк кылиз. Куинь эшъёс зӧк кызэз вандыны выризы, нош соиз номырысь уг погра - бычкы пачка. Паймыса сылонъязы кытысь ке шуак тӧл потӥз но, кыз зукыр-р вырӟиз. Нылъёс палэнскыса ӧз вуттэ, зӧк кыз вайёс соосты музъем вылэ сабизы. Кӧня соос отын кыллизы, нокудзы но уг тодо ни, но кыкез сазьтӥськизы, нош Лизаез бараке ки вылазы нуоно луизы. Кивалтӥсьёс валазы: нылашлэн сюрлыез сӧсырмемын, но врачез ӧтьыны ӧз ик малпалэ, гольык пулъёс вылэ понӥзы но, ужез быриз. Быдэс толзэ кыллиз нылаш, кулонзэ возьмаса. Ӵукна сайка но пайме: малы мон улэп на? Султылытэк кыллён жуммытӥз. Ярам, эшъёсыз сюдыны но выризы, бервылзэ но утялтӥзы. Тулыс шунды пальпотыны кутскыса гинэ, солэн но мугораз кужым пыриз кадь - Лиза кален-каллен пыд вылаз султиз, гуртаз бертӥз. Секыт тол бере тулыс ӟеч ивор вуттӥз - война йылпумъяськиз! Ваньмыз шумпотыса гужлазы. Вань секытэз соку ик вунӥз кадь. Вылаз ик Лизалы 17 арес - тужгес шудо ныл даур. Ӵок, шоголляськыны ке номырин, сиен ке кос, со понна солэн нырысетӥ яратонэз артэ - соос ӵошен ужазы турын дасянын. Но одӥг пол ужан интыязы вал вылын шок-пуль посыльной вуиз. Калык шораз паймыса учке, нош Лизалэн сюлэмыз, мае ке шодэм кадь, чигиськыса кошке. Озьы ик вань. Лиза Камашеваез, пе, ӝегатскытэк дораз берытскыны косӥзы.

- Малы?

- Со бызе. Ӵыжы-выжыос куспазы вераськемын ни…

Со вакыт пумит кыл верась ӧй вал. Лизаез сётӥзы Камашев Олёшлы.

Нунал бӧрсьы нунал мынӥз, пеймыт уез мӧзмыт ӵук воштылӥз. Ярам, кӧня ке ар улыса, Елизавета ныл вордӥз, собере кык пи. Но зӥбиськись сюлэмзэ мусокайёсыз лӥятыны ӧз вормылэ, мылкыдыз ялан зубектэм выллем ветлӥз. Малэсь нош лопыръяськоз со - картэныз тупаса улӥзы ке но, пӧсь мылкыд куспазы озьы ик ӧз кенжы, егит нылкышно, азьло сямен ик, колхозын секыт ужъёсты быдэсъяз. Дышетскон сярысь малпанэз но ӧвӧл ни. Но арлыдаз вуыса ни, ӧжытак удалтӥз - тазалыкез лябӟемысь, сое выжтӥзы учётчике, собере фермае - йӧл бичасе. Школае кык ар сяна ӧз ветлы бере, йӧскадь лыдӟиськыны но, гожъяськыны но дышыса ӧз вутты вал, нош татын амалтэк сыӵе быгатонлык кулэ луиз. Бӧрысь со вить ар почта нуллӥз на. Соку матысь тодматскиз газетъёсын-журналъёсын, соосты лыдӟытэк изьыны но уг выды вал - сыӵе дыръя син азяз ялан улӥз атаез. Эх, со ке улэп луысал, оло, зэмзэ но тодосчи луысал, лулскылиз со, быдэсмонтэм малпанзэ жаляса.

Улон ӟардон

Елизавета Камашевалэсь улонзэ кыклы люкиз, шуыны луоз, 1953-тӥ ар. Кулӥз Сталин. Быдэс гурт митинге люкаськиз, ваньмыз бӧрдо-чигисько. Лиза но соос пӧлын. Со вала: ньӧмыз понна ке но синкылиез пызьыртоно, син дурез ӵушоно, но уг быгаты, пушкыз кӧтӝожлэсь ӝуа, шумпотонлэсь дырекъя. Со туж умой тодэ: зэмлык шараяськоз Сталин кулэм бере - атаез озьы шуиз ук. Митингысь со осконэн бертӥз. Со бӧрсьы егит кышномурт нуналлы быдэ возьмаз - ку усьтӥськозы архивъёсы ӧсъёс. Утчаськыны со кутскиз 1956-тӥ арын. Архивъёсысь нокыӵе ивор ӧз шедьты, мынӥз прокуратурае, КГБ-е. Огласянь, югдур воштӥськиз ни кадь, ваньмыз валаллязы большевикъёслэсь 30-тӥ аръёсы мыдлань ужамзэс, но КГБ-ын кыдам воргоронъёс азьвыл кадь ик ӝотрес вазьылӥзы, чик керпотытэк кышномуртэ пыкылӥзы: ӧй быгатысал, огшоры крестьян воргорон сомында ваньбур ас кожаз люканы… Елизавета Ивановналэн тымиськем кӧтӝожез кыриськиз - маке луод лу, мар малпаз, ваньзэ вераса куштӥз. Генерал солы ӧс шоры возьматӥз.

1978-тӥ арын гинэ со шедьтӥз атаезлэсь кулэм сярысь свидетельствозэ, мар соин луиз, отын номыр гожтымтэ. Висьыса-а кулӥз, ыбыса-а куштӥзы? Иван Балтаевич Кадров кулэм 1941-тӥ арын Комсомольск-на-Амуре городын январь толэзе.

- Ожын ке бырысал, оло, сокем вӧсь ӧй луысал, атыкай музъеммы понна быриз шуысал, а татын адямиез токма шорысь быдтӥзы, - чигиське Елизавета Ивановна. Семьязэс кулаке поттэм сярысь бумагаос озьы ик ӧз сюре - сыӵе учыр ноку ӧй но вал кадь. Зэмлыкез утчаса, адӟисьёслэсь веранзэс люкаса, Елизавета Ивановна эшшо лачак дыр быдтӥз, кӧня ке гуртэз, ёросэз котыртӥз. 1989-тӥ арын гинэ солы справка сётӥзы, атаез юнме шорысь янгыше уськытэмын вал шуыса. 1992-тӥ арын Иван Кадров быдэсак шонере поттэмын.

Ӧвӧл на бер…

Пенсие потыса, Елизавета Ивановна улонзэ чутрак воштыны малпаз. Пичи дыр котӝожъёсыз, лэся, сюлэмаз сокем пыдлон пукизы, ас вордскем палаз улыны чиданэз ӧй вал, кытчы ке палэнэ, сьӧрло, адӟонлэсь кыдёкегес кошкемез потылӥз. Кузпалыз кылзӥськиз - юртъерзэс вузаса, Дэрие корка басьтӥзы.

Шӧдэм кадь, татын солы гань-гань луиз, ваньмыз кемалась тодмо потӥз. Калыкен тупаны быгатӥсь кышномурт аслыз эшъёс шедьтӥз. Ӝоген сое синйылтӥз ёрос газетын ужась Мария Дмитриевна Ишматова. Бордазы кариськизы арлыдоослэн клубазы ветлӥсьёс. Нош 1991-тӥ арын Ижын нырысьсэ ортчиз репрессиосын йырин курадӟемъёслэн конференцизы. Шаплы кышномуртэ солэн ужаз пыриськыны ӧтизы. Елизавета Ивановна трибуна сьӧры куриськиз. Отын со сокем ӟырдыт вераськиз, дырез но, ассэ но шӧдэмысь дугдӥз кадь - тодэ ваёнъёслэсь, вӧсьлэсь йырыз берганы кутскиз, сцена вылысь мырдэм васькиз. Со понна сое соку ик азьветлӥсь каризы, репрессиос улэ шедемъёслэн ассоциацизылэн правленияз пыртӥзы. Кышномуртлы со аспӧртэм кужым сётӥз. Со мыло-кыдо пыриськылӥз огазеяськонлэн ужаз, реабилитациен герӟаськем юанъёсын вазиськисьёслы визь-кенеш сётъяз. Ньыль ар ортчыса, та выллем ёзъёс ёросъёсын кылдыны кутскизы, соку Дэриысь огазеяськонэн кивалтыны Елизавета Ивановналы ӵектӥзы. Кышномурт нырысь-валысь пумитъяськиз, дышетскеме ӧвӧл шуыса, но ёрос кивалтӥсьёс огымысь шуизы: милемлы ужез валась кулэ. Туннэ нуналлы Дэри ёросын репрессиос йырин чидамъёс 70 мурт пала лыдъясько. Ваньзы соос туж гажало арлыдо кышномуртэ, туж сӥлы карыса, учко ужрадъёсты удмурт дэремен нуись песянай шоры.

Нялтас вераса, Лизапай удмурт дэремзэ уг ик куя кадь - городэ со котьку озьы гинэ мынэ. Мед синмаськозы ойдо, лякытак серектэ со. Зэм, улоназ вал одӥг ӝож учыр. Покчи пиез Вылӥ Кенешын охранаын ужаз. Со вакытэ шаеренымы кивалтӥз Валерий Марисов. Дырын-дырын анай пизэ эскерыны уж дураз пыра вал. Кивалтӥсь, удмурт кышномуртэн ваче кымыс пыкиськыса но, адӟымтэ улсы кариськылӥз. Но огпол Лизапай Выли Кенешлэн юртаз ӟуч дэремен кожиз. Соку, паймод ук, бадӟым адями кышномуртэ ӧжыт ӧз ӟыгырты. Лизапайлы со туж ӧз кельшы.

- Тонэ удмурт кышномуртлэн пиез уте, а тон солэсь анайзэ ултӥ кариськод, -шуиз со.

Удмуртлыктэк Лизапай ассэ уг ик адӟы. Арлыдыз шоры учкытэк, тунсыкъяське вань ужрадъёсын. 80 аресъем песянай арнялы быдэ юромо Иже редакциосы ветлэ, гуртоосызлы газет-журнал нуллэ. Солэн эшъёсыз пӧлын журналистъёс, писательёс, тодосчиос, политикъёс. Туала кивалтӥсьёс кизэ кырмо, егитъёс дораз дышетскыны лыкто. Кинлы ке киуж возьматэ, кызьы пӧрмытыны индылэ, мукетызлы эмъяськон амалъёссэ усьтэ, нош куинетӥез огшоры визь-нод юа: мар каром, Лизапай? Кышномуртлэн валэктонэз котьку одӥг: ул, югыт нуналлы шумпотыса, вӧсь карисьёсты простить карыса, ӟеч адямиослы тазалык сӥзьыса.

- Мон - шудо адями. Нылпиосы ярато, калык гажа, пыдъёсы бызьыло ай. Но тужгес дуноез - учёной ӧй луы ке но, мон быдэстӥ атаелэсь косонзэ. Оскисько, со монэн данъяське.

Источник:

Камашева Е. И. Улытозям мон атаез возьмай… / Е. И. Камашева ; записала З. Рябинина // Удмурт дунне. - 2007. - 5 окт. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"