Редактирование: Ильиных Евгений Петрович

=Ужась муртлы сюло кулэ ӧвӧл=
[[Файл:Снимок24.jpg|thumb|left|]]

'''Удмуртиысь культура удысысь дано ужась, культурая азьвыл министр 85 аресъем Евгений Ильиных чидатэк вите ини П. Чайковскийлы сӥзем фестивалез. Евгений Петрович трос лэсьтӥз шаерысьтымы культураез ӝутон понна.'''

'''Ваньмыз потэ пичи дырысь'''

— Ачим сярысь верано ке, кутсконо, дыр, пичи дырысен, — шуэ евгений Ильиных. — Вордӥськи мон Сюмси ёросысь Вылынгуртын. Чебер гуртмы Калмез шур но Сибирь тракт вискын, вырйылын, интыяськемын. Берпуметӥ ӵыжы-выжые отысь кошкиз ини. Пырон интые ӧвӧл ке но, вордскем палъёсам вуылӥсько, тодмоосы, эшъёсы вань ай. Революция бере гуртамы 60 хозяйство пӧлысь кулаке поттӥзы 2 семьяез гинэ. Соослэсь коркаоссэс басьтӥзы но школа но сельсовет каризы отчы. Гуртамы семьяос золэсь вал, кылсярысь, 60 юрт пӧлысь 18-эз 5 борддорен (притыкен) вал, 4-ез — 8 борддорен. Начар улӥм ӧй шуысал. Тодӥсько на, колхозэ пырыкумы, азбарысьтымы валмес басьтӥзы. Муми Ирина Прокопьевна 3 пинал вордэм: Серафим агайме, Юлия апайме но монэ.
Мумилэн нырысетӥ картэз Илья Петрович эксэй армиын младшой офицер вал. Граждан ож дыръя Малмыжын но Глазовын пинал пиосты войналы дасяз. Муми шуэ вал: «Вот ведь кыӵе вал мынам картэ, вуиз наганэн но шашкаен». Кыксы но грамотноесь вал бере, трос гожтэтъёс ог-огзылы гожъязы. Муми кулэм бере мон Илья Петровичлэсь гожтэтъёссэ анаелэн коросаз понӥ. Нош кызьы со быриз, тодмо ӧвӧл. Кылэме вань, 1921-тӥ-1922-тӥ аръёсы, Волгаетӥ пароходэн мыныкузы, тӧдьыос соосты выйтӥллям шуыса.

Ми улӥмы 4 кузя: муми, агае, апае но мон. Сима ужаз кебитын, Юля, агрошколаез йылпумъяса, тыршиз бригадирын. Мон но колхозын ужаны кутски вазь. Арес будэмъя уж но будӥз. Пичиос пастуке кутско вал. 6-7 арес дыръям колхоз кунянъёсты возьмай. Ӧжытак будэме бере гурт парсьёсты возьманы косӥзы. Кельше вал та уж. Пӧсь куазен парсьёс дэрие пыро но часъёсын отын ӵыдэтско. Одӥг ӵукна эшъёсыным парсьёсты поттӥськом, нош Сибирь тракт палась буш вал вылын адями лыктэ но кесяське: «Война! Война!» 22-тӥ июне тросэз нылпиос бадӟым луизы. Ар ортчыса, монэ валэн усыяны косӥзы ни. Вуоно гужемаз гырыны оскизы. Война вылтӥ валэн ужай, гыри, жнейкаен арай. Одӥг кесэг музъем но буш ӧз кыльы. Вуттӥ тодон-валан люкаса но, 1944-тӥ арын быдтӥ гуртысьтымы семилеткаез. Муми но, апае но шуизы: Женя, дышетсконо.

'''Бушам кисыос'''

— Азьло вакытэ, дышетӥсен пумиськыкузы, адямиос, изьызэс кыльыса ик, ӟечбуръясько вал. Соин ик пичи дыръям одӥг малпанэ вал: луо дышетӥсь. Озьы мынӥ Ува педучилищее. Татчы выжтэмын вал Выль Мултанысь педучилище. Нянь сёто вал 300 грамм, ярам, педучилищелэн столовоез вал, отын кӧжы шыд пӧзьтылӥзы. Студент ялан сютэм ук. Шыд тырыкузы, шуиськомы вал: кӧжызэ тросгес понэ.

1947-тӥ арын педучилищеез йылпумъяй. Умой дышетскисьёсты лэзё вал тодон-валанзэс будэтыны. Юа-зы мынэсьтым но мылкыдме. Шуӥ мыно Удмурт пединститутысь история факультетэ. Пыри ведь, гуртысь огнам, мугорын но группаямы самой пичи вал. Дышетски ноябрь толэзёзь. Институтэ мынӥсько вал Сенной базар пыр. Огпол син шорам йӧтӥз паймымон суред. Кӧня ке воргоронъёс мае ке туж сак учко. Тунсыко ук, мон но доразы вамыштӥ. Базар шорын пуке пал суй воргорон, Быдӟым ожысь герой, пе. Кияз пичи шар, азяз куинь чаша. Со шарез огез улэ ватэ, бергатэ, бергатэ но вераны косэ, кудӥз чаша улын шар. Вить адями шудэ, витез ик коньдон понэ. Шедьтӥд ке — уксёед тынад, ӧд ке тоды — коньдонэд ышиз. Огшап учкеме бере вамыштӥ азьлань. Кисыям пыри но, номыри ӧвӧл ни. Коньдонме но поттӥллям, няньлы, вӧйлы карточкаосме но басьтӥллям. Патерын улӥсько вал мумилэн эшез дорын. Югдурез верай но, со шуэ: ачид адӟиськод, Женя, кӧня кузя улӥськом, маин мон тонэ сюдом?

Маи вал котомкаям тыри но ӝытаз ик бертыны потӥ. Институтэ ӧй ик ветлы, та вие но аттестатэ киям ӧвӧл. Вокзалэ бызи, поездэ вуи. Билеттэк пыри но пуконъёс улэ выдӥ. Гуртам ӧз тышкаське. Маиз ӝож, со сӥзьыл ик карточкаосты быдтӥзы, стипендиен воштӥзы. Уг ке бертӥськы, озьы ик дышетскисько вал.

Толэзь ортчыса, дорамы пыриз Сюмсиысь «Голос колхозника» газетлэн редакторез Волков, шуиӟ
— Лыкты ӵуказе редакцие, газет поттом.

Мон мынӥ. Ӝыны арлы та газетын луи секретарь, ӟуч газетэз удмурт кылэ берыктӥсь. Со сяна, странаысьтымы ТАСС агентство 5 часын ӵукна радиоприёмник пыр иворъёс вера вал. Соосты гожъяса газетэ печатлалляй. Бӧрысь Сюмси ёросысь роноен кивалтӥсь выль уж дэмлаз. Озьы мон ёросысьтымы ик Выль Гайнаысь 7 классъем школае ужаны мынӥ. Коркае дорысен 25 иськем вал, велосипедэн ветлӥ. Пиналъёсты дышетӥ физкультуралы, ӟуч но удмурт кылъёсты нуи.

Выль Гайнаын ужакум ик, пӧрась шедьтӥ. Кышное Зоя Максимовна Удмурт пединститутын заочно дышетске но, ужа но вал. ӝоген Вылынгуртэ бертӥмы. Кыкнамы ик школаын дышетӥмы. Татын ужакум, шӧдӥ, мыным дышетсконо, тазьы улыса, пайдаез уз луы. Малпай, хозяйство бадӟым, нылпиосмы вань, муми арлыдо, пыро заочно. Визьмо пӧрасе шуиӟ
— Женя, пиосмурт рос-прос дышетскыны кулэ, соин ик пырод очно.

Ӵапак со вакытэ усьтӥсь-киз вал Глазовысь пединститут. Мон отчы пыри, татысен ик партилэн ёзчиез луи. Институтэ пырыкум, одӥг гинэ «4» вал, нош дышетски «5»-лы гинэ. Стипендия тырме вал улыны. Диплом басьтэме бере монэ ӧтизы ужаны Сюмси ёросысь ик Гура черкогуртысь шор ёзо школае. 4 ар ужаса вуттӥ, басьтӥзы райкоме секретаре. 2 ар кивалтӥ Сюмси роноен.

Собере монэ Иже ӧтизы. Министръёслэн Советсылэн тӧроез Степан Ефремов шуиз:
— Евгений Петрович, просвещениея министрлэн вош-тӥсез луод.
2 ар ӵоже ужатозям, городысь но вань ёросъёсысь школаосы вуылӥ, кабинетын пукыны ӧй яратылы. Бӧрысь С. Ефремовез Москвае ужаны басьтӥзы, интыяз пуктӥзы Аркадий Марковез. Табере ини Аркадий Терентьевич монэ дораз ӧтиз но шуиз:
— Тырмоз дышетон удысын тыршыны. Пенсие кошке Министръёслэн Советсылэн ужъёсыныз кивалтӥсь. Ӵуказе лыктод но управляющий делами луод.

Озьы шеди УАССР-ысь Министръёслэн Советазы. Туала сямен вераса, аппаратэн кивалтӥ. Бадӟым но ответственной уж. Татын мыным секыт потӥз. Но уж ачиз дышетэ. 8 ар тырши. Ноку но ӧй малпалля культура сярысь, нош улон сюрес монэ вуттӥз та министерствое.

'''Ваньзэ лэсьто кадръёс'''

— Культурая министр Аркадий Завойских пенсие потэм бере монэ Москвае ыстӥзы — Культурая министерствое «на смотрины». Отын куд-огез паймизы, культура удысын чик ужамтэ адямиез министре пукто шуыса. Но Москва кандидатураме умоен лыдъяз. Россиысь министерство ик егит но выль министръёслы дышетон курсъёс ортчытӥз.

Оскизы бере, ужано. Мар бордысен кутски? Ӝытозь ветлӥсько вал театръёстӥ, коллективъёсын но кивал-тӥсьёсын пумиськылыса-тодматскыса, ӝыт пал документъёсын пукылӥ но ӵуказе нуналлы планъёс дасялляй. Воштӥсьёс умоесь сюризы — Анетта Сидорова но Валерий Митрофанов.

Малпай 2 валтӥсь ужпумез ӝутыны. Нырысетӥеӟ клубъёс, театръёс чебересь, туала куронъёслы тупасесь мед луозы. Кыкетӥеӟ ужасьёсты будэтоно, удыс мед азинскоз шуыса, усто специалистъёс кулэ. 1935-тӥ арын И. Сталинлэн «кадры решают всё» шуэмез туннэ нуналлы но тупа.

Министр тодыны кулэ ваньзэ. Театре лыктӥд ке, одӥг кыл шедьтыны кулэ режиссёрен но артистъёсын, музее мынӥд ке, отысь югдурез мед валалод, кыӵе адӟытонъёс вал но дасясько, мед тодод. Котькуд пьесаез репертуаре пыртон азьын прогонын министр но солэн воштӥсез луо вал. Озьы культурая министрын ужан вакытэ тужгес тунсыко но вунонтэм луиз. Котькуд нунал маке лэсьтоно-ортчытоно вал.
Кызьы верай ини, бадӟым саклык висъяй лэсьтӥськон удыслы. Нырысетӥ объектэ вал Короленко нимо ӟуч театр. Отчы мынӥм но, гулбечаз ошмес пӧзе. Театрез тупатъян понна кыл кутӥз воштӥсе владимир Безносов. Соку лэсьтэм выжъёс али но та театрын быдэсэсь на. 1980-тӥ арын усьтӥмы Суредан искусствоосъя музей, куд-ог ужасьёс татын тыршо ини музей усьтӥськем дырысен. Культурая но крезьгуръя училищеослы общежитиос ӝутӥмы. Выльдӥмы «Арсенал» комплексэз, али сое К. Герд нимо Национальной музей шуиськом. Ижын но Сарапулын пуктӥмы искусствоосъя 2 школа, соосты вань куронъёсъя но концерт залъёсын лэсьтӥмы. Нырысьсэ типовой библиотека пуктӥмы ёросэ — Увае. Сыӵе библиотека Ижын гинэ вал, кудӥз ке али Национальной нимаське. 8 ар ӵоже министрын ужатозям, 7 ёросэ (Яр, Сюмси, Кез, Красногорск, Каракулино, Юкаменск, Пичи Пурга) 400 учкисьлы чаклам культура юртъёс пуктӥмы. 1981-тӥ арын Москваын ортчытӥмы Удмурт искусстволы но литературалы сӥзем нуналъёс. Отчы мынӥмы 400 адямилэсь трос кузя. Та дырозь сомында калык ӧз ветлы вал. Сьӧрамы вал «Италмас» ансамбль, П. Чайковский нимо залын бадӟым концерт сётӥз. Валтӥсь концертмы вал «Россия» кунокуалэн залаз. Москвае ветлӥзы вань художникъёс, 30-лэсь трос. Шонерзэ вераса, мон отысен адӟи вань суредасьёслэсь картинаоссэс. Шаерамы со быдӟа залъёс ӧвӧл уга. Писательёс пумиськылӥзы Литераторъёслэн Фадеев нимо юртазы. Удмуртъёс сярысь удмуртъёс сомында ӧз вералэ, дыр, кызьы отын асьме писательёсты ушъяз литературовед Зоя Богомолова.

'''Оркестр шудӥз заводын'''

— П. Чайковскийлы сӥзем фестиваль сярысь нокызьы но вератэк кельтыны уг луы. Мон министр луытозь, шаерамы 19 таӵе фестиваль ортчиз ни вал. Мынам малпамея, та фестиваль — Удмуртиысь культура

понна зэмос революция. Калыкмылы таӵе кузьым лэсьтэмезлы тау кароно азьвыл министрлы Аркадий Завойскихлы. Нырысь фестивальёс сокем бадӟымесь ӧй вал. 1977-тӥ арын асьме доры вуиз Совето Союзысь культурая министр Пётр Демичев. Ми куримы, Москва та фестивалез син шораз мед возёз но луонлык мед сётоз странаысьтымы тужгес тодмо коллективъёслы, уката ик симфонической оркестръёслы дорамы лыктыны. Таӵе мылкыдмес Москваысь кивалтӥсь умой пумитаз. Озьы вуонояз фестивале ӧтьыны быгатӥмы ни Совето Союзлэсь калык артистсэ, дирижёрез, СССР-ысь академической симфонической кун оркестрлэсь кивалтӥсьсэ Евгений Светлановез. Мон ужатозь, Евгений Фёдорович дорамы ветлӥз 3 пол (1978-тӥ, 1980-тӥ, 1984-тӥ аръёсы). Та адями серьёзной, талантэз бадӟым, туж гань-гань.

Озьы ик дорамы вуылӥз Всесоюзной радиоысь но телевидениысь бадӟым симфонической оркестр. Соин кивалтӥз Совето Союзысь калык артист Владимир Федосеев. Та адями, Е. Светлановен ӵошатыса, уката но огшоры.

Ӧтьыны быгатӥмы Бадӟым театрысь солистъёсты — кузпалъёсты Владимир Атлантовез но Тамара Милашкинаез. Ветлӥзы опера кырӟасьёс Юрий Мазурок, Ирина Архипова, Артур Эйзен, Александр Ведерников, Юрий Гуляев, Маквала Касрашвили, Алексей Масленников, эктӥсь Андрис Лиепа. Ленинградысь операя но балетъя С. Киров нимо театрысь артист Борис Штоколов Иже 3 пол ветлӥз. Воткинскын солэн ӵыжы-выжыез черкын баӵкоын ужам. Со ӵем тодаз вайылӥз бӧлякезлэсь корказэ. Огпол ӝыны нунал ветлӥмы, со коркаез утчаса, ӧм шедьтэ. Озьы ик вуылӥз тодмо скрипач Владимир Спиваков, туж умой пи. Паймытӥзы пианист Николай Петров, музыкант Михаил Плетнёв. Ма, кинъёс ветлӥзы, ваньзэс вераса уд быдты. П. Чайковскийлы сӥзем крезьгуро фестивале огзэ гинэ Совето Союзысь калык артисткаез вайыны ӧм быгатэ — Елена Образцоваез. Соку Е. Образцовалэн гастрольёсыз 3 арлы азьлапал гожъямын ни вылэм. Та фестивальёс шулдыресь но тунсыкоесь пӧрмылӥзы. Фестивальёсты дасян бордын зол ужазы Удмурт кун филармонилэн кивалтӥсьёсыз Людмила Кузнецова, Нина Таланова, Николай Зубков но воштӥсе Валерий Митрофанов.

Мар тужгес паймымон вал но ма али уг ни лэсьто фестивальёсты радъясьёс? Юандылы тазьы вералӧ Евгений Светланов симфонической оркестреныз концерт пуктӥз Ижысь андан ӵыжатӥсьёс азьын, «Ижсталь» заводысь 18-тӥ цехын. Удмуртие кык пол вуылӥз странаысьтымы тужгес арлыдоез коллектив, калык инструментъёсъя Н. Осипов нимо оркестр. Татысь усточиос концерт сётӥзы «Ижмаш» заводысь 252-тӥ цехын. Калык кыӵе соосты пумитаз! Али но со концертъёс мынам син азям.

'''Пенсиын ӧй черла'''

— Макем кельше вал мыным министрын ужаны, крезьгур но искусство пӧлын улыны! Но республикаысьтымы кивалтӥсьёс нош ик шуизы: тырмоз, ужъёстэ сёт Анетта Сидоровалы, нош тон ӵуказеысен УАССР-ысь Верховной Советлэн Президиумезлэн секретарез луод. Иван Никифоров отын дас ар ужаз, пенсие потэмез бере пуктӥзы монэ. Пусйыны кулэ, отын удмуртъёс гинэ тыршизы. Та удысысь ик пенсие кошки.
Но шутэтскыны потыса но, тэк ӧй улы. Тросэз шуо, адями пенсие потэ ке, черла, ужтэк пашме. Мон та висёнэз ӧй вала. Малы ке шуоно гуртын ӧй пукы. Пенсие потон азям машина басьтӥ, эшъёслэсь мӧзмисько ке, адӟиськыны вуисько вал. Луэмезъя цирке, театръёсы ветлӥсько. П. Чайковскийлы сӥзем котькуд фестивале вуылӥсько. Собере, мон ведь ужтэк ӧй пукы, куинь общественной удысэ вал. Ачим ик кылдытӥ Верховной Советысь ветеранъёслэсь советсэс (татын 8 ар ужай). Кытчы гинэ соосын ӧм ветлэ. Паймоно кадь, президиумын ужам адямиос Ижысь музейёсы ветлэмын вылӥллямтэ. Нош мон соосты Сарапулысь, Воткинскысь музейёсы поттылӥ. Кыкетӥ уже — автомобильной кооперативамы ревизионной комиссие председателе бырйизы (татын 6 ар тырши). Куинетӥез — сад-бакча кооперативлэн правленияз ӧтизы.

Котькытын мед ужалом, мон понна валтӥсез вал удыстэ лулысь-сюлмысь быдэсъян. Адями, уката ик кивалтӥсь, анализ лэсьтыны быгатыны кулэ аслаз но мукетъёсызлэн ужамзылы. Вашкалаосмы шуиллям: умой валлы сюло кулэ ӧвӧл. Туж шонер верамын. Адямилэн мылкыдыз вань ке, со котькыӵе удысэз вормоз но рос-прос тыршоз. Сэзь муртлы шуд юрттэ, шуо калыкын. Мынам но озьы ик луиз.

Ужен но, семьяен но, эшъёсын но удалтӥз.

'''Источник:'''

Ильиных Е.П. Ужась муртлы сюло кулэ ӧвӧл/ Е.П. Ильиных; записала Галина Семёнова // Удмурт дунне. - 2015. - 31 марта. - С. 10,15. - (Тор Шорын).

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]