Иванова Мира Васильевна

Материал из Воршуда
Версия от 14:43, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Кызлэн ӵыжинэз выжыяз усе

112-6.jpg

Мира Иванова «Удмуртия» издательствоын 30 арлэсь кема редактор луыса ужаз. Та удысын ӟеч тыршемез «Отличник печати» пусэн, «Удмурт Республикаысь культура удысысь дано ужась» нимен, уно грамотаосын данъямын. Ас вакытаз Мира Васильевна Ижысь Первомай ёрослэн кык созывезлэн депутатэз но вал. Ужысь ветеран. Писательлэн Михаил Коноваловлэн матысь ӵыжы-выжыез. Та нуналъёсы Мира Васильевна пусъе 80 арессэ.

Кыкналасянь данъяськымон

— Мира Васильевна, тӥ туж йӧно выжыысь. Мамады Екатерина Алексеевна писательлэн Михаил Коноваловлэн апаез луэ. Можга педучилищеын удмурт кыллы но литературалы дышетӥз, литературно-творческой кружокен кивалтӥз, УАССР-ысь дано дышетӥсь.

— Выжымы кыкналасянь ик данъяськымон. Мамае вордскемын 1902-тӥ арын Можга ёросысь Акаршур гуртысь куанер семьяын. Атайзылы удалтымтэ — эксэй армиын кема служить каронъяз 40 аресозь умой-умой кышно вылэ вуылымтэ. Одӥг пол ульчаетӥзы кураськись егит, чебер ныл, пе, ортче. Ӟуч вылэм со. Кутэм но Педор Олёш Вараез дораз пыртэм. Кыль ай мон доры, тани кыӵе мынам юртъере, шуэм. Озьы соос кузпалъяськиллям, тямыс нылпи вордӥллям. Укмысэтӥез пиналзы азьло кышноезлэсь вылэм.

Песятае грамоталы дышем, песянаймы но нылпиосызлы книга лыдӟылэм. Кыкез пиоссы Граждан ожын быриллям. Витез улэп кылиллям на. Мамамы бадӟымез вылэм. Вить сузэръёслэн одӥг гинэ Миша вынзы — Михаил Коновалов — 1905-тӥ арын вордӥськем. Улон секытэн курадӟиллям ини песянайёсмы. Гуртоос тифен висьыса кулэм пиналъёссэс ульчаетӥ шай вылэ нуыкузы, песянае, Инмарлы пӧсяськыса, вазиськылэм: э, Инмаре, малы мынэсьтым нылпиосме уд адӟиськы? Сьӧлыктэм дыръязы басьты вал. Со, нылпиосыз ачиз кадь ик шудтэмесь луозы шуыса, малпалляз. Но пиналъёс ӧч карем кадь ваньзы сяртчы выллем быг-быгесь будӥллям, бӧрысь дышетскиллям, калыке потӥллям. Мамае Миша выныныз 1918-тӥ арын Елабугаын соку гинэ усьтӥськем дышетӥсьёсты дасянъя семинарие тодон-валан басьтыны мынэм. Но соослы отын кема дышетскыны кылдымтэ — Граждан ож кутскем. Со вискын, 1920-тӥ арын, тифен висьыса, тятязы улонысь кошкем, мамазы висьыны усем. Пичи сузэръёссэс детдоме сётыса, мамае Миша выныныз Можга педучилищее дышетскыны пыриллям. Отӥяз Миша агае писатель луэ. Мамае но Галя, Оля сузэръёсыз — дышетӥсьёс, Анна — врач, Фаина — медсестра.

- Миша агаеныды котьку данъяськылӥды, луоз?

— Кызьы соин уд данъяськы?! 33 аресозь гинэ улэмын со та югыт дунне вылын. Нош сомында лэсьтыса вуттэмын! «Вурысо бам», «Гаян» романъёс, кык пьеса гожтӥз. «Удмурт коммуна» («Удмурт дунне») газетын тыршемын. Сое Россиысь Писательёслэн союзазы кутӥзы. Матысь тодмо вылӥллям Максим Горькиен. Удмуртъёс пӧлысь — Григорий Медведевен. 1936-тӥ-1937-тӥ аръёсы сое «калыклэн тушмонэз» каризы но пытсэт сьӧры келязы. Ми быдэ вуэм бере но со сярысь кылпум ик поттылыны ӧз лэзьылэ. Обком, партия ваньзэ эскерыса возизы. Выныныз сэрен одӥг арзэ мамае но ужтэк пуконо луиз. Со вылэ, «калык тушмонлэн» апаез нылпиосты удмурт кыллы дышетэ шуыса, чагиськон гожъяллям. Куинь пиналъёсты кызьы ке сюдоно-дӥсяно вал. Мамамы ӧз сётскы, юн сямо вал. Ми солэсь ноку но бӧрдэмзэ ӧм адӟылэ. Секыт вакытъёсы милемлы тятямылэн анай-атаез юрттылӥзы.

Мамае пыр, училищеын куамын ар дышетытозяз, кинэз гинэ ӧз поты: писательёс, журналистъёс, тодосчиос. Литературной кружоказ мыло-кыдо ветлӥллям Михаил Покчи-Петров, Георгий Архипов, Константин Михайлов, Герман Ходырев, Алексей Ермолаев, Василий Ванюшев. Михаил Коноваловлэсь произведениоссэ ортчыкузы, солэн со выныз шуыса, уг вера вылэм.

- Тятяеныды кытысь соос ог-огзэс шедьтӥллям?

— Тятямы Василий Иванович Филиппов Алнаш ёросын Юртошур-Какси гуртын вордскемын. Ӝужыт, чебер, визьмо вал со. Мамаенымы тодматскиллям Ленинградысь Герцен нимо пединститутын. Тятя со вакытэ аспирантураын дышетске ни вылэм. Мамаелы отын ӵош дышетскыны шуд усем дано адямиосын: А. Поздееваен, В. Алатыревен, М. Ляминэн, А. Бутолинэн. Егитъёс ог-огзылы синмаськиллям, семья кылдытӥллям. Берен дор палъёсазы берытскиллям. Мон Можга городын вордскиськем ини. Бӧрсям Клара сузэре но Володя выны вордскизы на.

7-тӥ классэз йылпумъяса, вамыштӥ Можга педучилищее. Мамае милемлы шуиз: Мира педучилищее мыноз, Клара — библиотекае. Сузэре туж трос лыдӟиське вал, нош мон литература бордыгес кыстӥськылӥ. Аръёс секытэсь тупазы: дӥсь но, сиён но ӧвӧл, озьы ке но дышетскон йырысь уг кошкылы. 1952-тӥ арын педучилищеысь пионервожатой луыса потӥ.

Тятямы историен нырысь ик педучилищеын, собере медучилищеын дышетӥз. Но солы кема улыны ӧз кылды — 43 аресказ улонысь кошкиз. Солэн бадӟым библиотекаез кылиз. Кыӵе яратӥз лыдӟиськыны, мушъёсын вырыны. Тятямылэн атаез Иван Филиппович Филиппов дышетӥсь вылэм. Фин тодосчиен Ю. Вихманнэн соос матысь тодмоос вылӥллям. Со доры тодосчи огпол гинэ вуылымтэ. Иван Филипповичлэн трос пиналъёсыз вылӥллям: 6 ныл но 2 пи. Дышетскем мурт соку шуэм: пиосме дышето, нош нылъёсме — уг. Нылъёслы семья кылдытоно. Ми соос доры ӵемысь вуылӥмы. Отын ик пичиысен араны дыши, гужемзэ тылобурдо вордон фермаын ужай. Ой, кыӵе жадьылӥ. Пыдъёсы висьыса, куддыръя бӧрдон калэ вуылӥ. Но мыным чида! шуо вал. Соку ваньмыз трудодень понна ужазы.

Можгаын улыкумы, ми доры кинэз гинэ ӧз пыралля: студентъёс, дышетӥсьёс, гуртоос, ӵыжы-выжыос. Таӵе ик син азям пуксё Удмурт театрысь артистка В. Виноградова, драматург В. Садовников но мукетъёс. Вова вынмы трос калыклы паймыса, юа: соос ваньмыз ӵыжы-выжыос-а?

Удмурт кыллы дышетӥз Мурнюк…

- Городын улыса, удмурт кылдэс вунэтӥллямтэды…

— Пичи дыръямы тятямы туберкулёзэн висьыны кутскиз. Можгаын ми пу коркан улӥмы. Дорамы врач лыктӥз но пиналъёстэс али ик татысь кытчы ке келяно, шуиз. Милемыз соку ик песянаймы доры Мурнюке (Борисовкае) нуизы. Озьы одӥг арзэ гуртысь нылпиосын удмурт кылын вераськоно луиз.

- Собере пединститутэ вамыштӥды. Отын но анай кыл юрттӥз, луоз.

— Училищелэн директореныз кенешыса, мама монэ Сарапулысь педучилищее келяны малпаз. Киям направление сётӥзы. Нырысь ик автобусэн Иже вуи. Пумитам кылбурчи Михаил Покчи-Петров шедиз. Кытчы-мар потэмме тодыса, монэ сьӧраз нуиз. Пединститутэ вуттэм. Декан доры пыртӥз. Кивалтӥсез Апполинария Поздеева вылэм. Тӥ Можга педучилищеысь Коноваловаез тодӥськоды-а, юа Покчи-Петров. Бен, ми соин Ленинградын ӵош дышетским, шуэ соиз. Вот, пе, тани та солэн нылыз. Котькызьы каре, но нылаш институтэ кутэмын мед луоз.

Пединститутын дышетскон аръёсмы туж шулдыр ортчизы. Группаямы ваньзы визьмоесь вал: А. Евсеева, К. Дзюина, Р. Кувшинова, Н. Перевощикова, Г. Ходырев. Пединститут бере Удмурт радиоысь Валентина Юшкова монэ дораз ужаны ӧтиз. Уг, шуисько, мон удмурт кылын вераськыны умой уг быгатӥськы.

Озьы Вавож ёросысь Тыловыл-Пельга школае шеди. Автобусъёс соку отчы ӧз ветлэ. Кыӵе ке бензовозэз шедьтӥ. Сюресэ кузен одӥг уйзэ Учаын кӧлоно луи. Мамае сьӧрам маке быдӟа тушак келяз. Сыӵе секыт — ӝутыны уг вормиськы. Шофёре шуэ: ойдо куштыса кельтом. Мыным жаль потӥз валесэ, ӧй кушты. Тыловыл-Пельгае улыны пересь кышномурт доры интыязы. Бӧрысь мыным валесэ юрттӥз — кезьыт дыръя шуныт вал со вылын кӧланы. Кузё кышно монэ узыр но ӟуч семьяысь кожаз, лэся, ялан ӟуч сямен вераськыны курадӟе. Мон удмурт, шуисько. Нылпиос но ӟуч ныл кожаллям. Одӥг пол урокын одӥгез пияш шуэ: учке ай, пыдъёсыз кыӵе пичиесь. Мон шуисько: пичиесь ке, со умой-а, умойтэм-а? Пиналъёсы интыязы бакомизы.

Котькулэсь шудо нуналъёсы школаын дышетон вакытъёсы вал. Педучилищеын пианиноен шудыны дыши. Урокъёс бере пиналъёсын репетициос ортчытъяськом, собере концертэн сьӧрлось гуртъёсы потаськом. Ёросын ортчись пӧртэм ӵошатсконъёсы но пыриськылӥмы. Котькытысь вормыса бертылӥмы.

- Вавож палась ик-а удмурт кузпал шедьтӥды?

— 4-тӥ курсын дышетскыкум, Дэри ёросысь Юськи школае практикае шеди. Со гужеме ик вуоно кузпалэным — Геннадиен — тодматским. Геннадий соку гинэ армиысь бертэмын вал. Бӧрысь Москваысь энергетикъёсты дасянъя техникумын заочно дышетскиз. Тыловыл-Пельгаын ужакум ини, монэ утчаса, Можгала мамае доры вуэм. Шедьтӥз ведь монэ, Можгаысен Тыловыл-Пельгаозь 40 иськемез пырак пыдын вамышъям.

Озьы Геннадий монэ берен Иж пала вуттӥз. Одӥгаз школае мынӥсько, мукетаз — нокытын уж инты ӧвӧл. Со вакытэ Маринае вордскиз. 9 толэзёзь нылме Клара сузэре утьыса возиз. Одӥг нуналэ, йырме ошыса, мар кароно ни шуыса, ульчаетӥ поръясько. Пединститутын ӵош дышетскем эше Клавдия Дзюина доры «Удмуртия» издательствое пыри. Сыӵе шумпотӥз: ойдо, пе, дорамы ужаны лыкты. Озьы мон «Удмуртия» издательствое вуи. Корректоре кутӥзы. Бӧрысь учебно-краеведческой литератураез поттон отделэ редакторе пуктӥзы.

Кизилитэм уйёс ӧвӧл

- Тӥледлы шуд усиз агайдылэсь «Михаил Коновалов. Кизилитэм уйёс ӧвӧл» книгазэ дасяны.

— Корректорын ужакум, Алексей Ермолаевлэсь «Удмуртская историческая проза» рукописьсэ Лидия Юшкова лыдӟе. Туж визьмо корректор вал со. Мон кие шедиз «Гаян» роман сярысь люкетэз. Кема выри лыдӟыны, янгышъёсты утчаны. Куинь пол сое лыдӟи. Малы, малпасько, мамае Миша вынызлэн ужъёсыз сярысь номыр уг тоды, милемлы номыр уг вера. Ермолаевлэсь гожъямъёссэ солы возьматӥ. Паймиз, мон со сямен произведениосты эскерыны ӧй быгатысал, зэмос критик со, шуиз.

Михаил Коноваловлэн Жанна нылыныз ми рос-прос со уж борды басьтӥським. Озьы книга кие кутымон, мур пуштросо пӧрмиз. Бӧрысь издательствоын «Адями. Писатель. Вакыт» сериен книгаос поттылыны кутскизы.

Редакторын ужакум, уно книгаос но альбомъёс поттӥмы! Трос авторъёсын ужамы. Котькудӥз книга сюлэм пыртӥ поттыса лыдӟемын. Вазен облитъёс но цензура вал, куд-огзэ рецензиосты Москвае лыдӟыны келялляно луылӥз. Мыным шуд усиз визьмо редакторен Эдуард Волковен ӵош ужаны.

- Нош кузпалды кытын ужаз?

— Уж понна бырем адями вал со. Тэк пуконэз ӧз тодылы. Пудоосты яратылӥз. Мон городын улӥсько, со — гуртын. Юськие корка басьтӥмы. Геннадий заводын, пӧсь цехын ужаз, пенсие вазь потӥз, колхозысь 7-8 ошъёсты куайытыны басьтӥз.

- Пиналъёсты дышетон удысэ ик кыстӥськизы, луоз?

— Бадӟымез Марина нылмы Удмурт кун университетысь кунгож кылъёсъя факультетэз йылпумъяз. Со доцент. Кунгож кылъёсъя кафедраын ик ужа. Алексей пимы дышетскемезъя инженер. Гурт удысъя институт бере Нижний Новгород пала ужаны келязы. «Путь к счастью» колхозэ шедиз. Улон секытэн мон солы детальёс нуллылӥ. Уйшор уйин тодмотэм станцие васькисько. Нош пие доры тодмотэм интыетӥ, нюлэс пыртӥ, мыноно. Одӥг воргорон сяна, нокин котырам ӧвӧл. Тӥ монэ уд вие-а, шуыса юасько. Юрттӥз ведь, сумкаме пие дорозь ик нуиз. Та вакытэ Алёша ужбергатӥсь луыса тырше, Ижын улэ.

- Нылпиосыныды кусыпъёсты ӟечесь, дыр?

— Монэ соос арнялы быдэ чакланы вуыло. Нуналлы быдэ жингыръяло. Уката ик пие. Мариналэн Миша пиез шутэтскон нуналъёсы дорам бертылэ. Алёшалэн но пиосыз вуыло. Мон сыӵе дыши ни та интыослы — нокытчы кошкеме уг поты. Выжыкыл дуннеын кадь улӥсько, бакча бертӥ Лудӟи шур бызе, котыр вож-вож. Вӧзам Глафира пуные вань. Мыным сое пие кузьмаз. Бакча тыр сяська будэтӥсько. Мамае берло аръёссэ Юськиын улӥз. Сое эскерыны дышетэм нылпиосыз, писательёс, журналистъёс вуылӥзы. Дорамы ӵемысь Пётр Кубашев пыралляз. Уд оске: куинь ар талэсь азьло Клара сузэреным, ужасьёсты медъяса, азбарамы мунчо ӝутӥмы. Ум вормиське, коръёс туж секытэсь. Пие со вакытэ командировкае тупаз. Берло ини Алёшамы мунчо лэсьтэммес адӟиз но воксё паймиз. Со понна асьме киын лэсьтэм мунчоямы кыӵе шумпотыса пырылӥмы.

Клараез утьыны ӧм быгатэ, секыт висён сое зӥбиз. Кык ар талэсь азьло улонысь кошкиз. Клара Дэри черкогуртын улӥз. Дышетскемезъя библиотекарь вал. Кема аръёс ӵоже Дэри ёрос радиоын ужаз. Со огназ улӥз, ӧз бызьылы. Мынэсьтым пиналъёсме утьыса-чакласа возиз. Мон солы котьку тау шуисько. Вова вынмы кемалась ӧвӧл ни.

Синпель — «Удмурт дунне» но италмас

- Адӟиське, али но мыло-кыдо лыдӟиськиськоды.

— Пичиысен лыдӟиськыны дышемын бере, кытчы карод на со сямез. Мамае удмурт журнал-газетъёсты ваньзэ почта пыр басьтылӥз. Солы луыса «Удмурт дунне» газетлы али ке но гожтӥськисько. Мамаелы синпель кадь со потэ. Мамае туж чебер кырӟаны но быгатэ вал. Тятямы но лыдӟиськылӥз, италмас сяськаосты яратылӥз. Бакчаям юри соосты трос-трос мерттылӥмы. Тулыс ӵуж сяськаос мылкыдэз ӝуто, синмез мальдыто, пичи дырез, тятяез тодэ вайыто. Борддорме италмас суред шулдыртэ. Тятяелэн яратоно суредэз вал со.

- Мира Васильевна, кин тӥледлы сыӵе аспӧртэмлыко ним сётэм?

— Ленинградын дышетскыкуз, мамаелэн пекляосыз висьыны кутскиллям. Ӝегатскытэк койкае понӥллям. Эмъям сое паймымон Мира Елисеевна нимо еврей эмчи. Тӥни кытысь мынам паймымон нимы кылдэмын. Бӧрысь со врачез мамае кема утчаз на, но ӧз шедьты ни.

- Кызьы пумитаськоды вордӥськем нуналдэс?

— Вордскем нуналам нылпиосы монэ арлы быдэ тятяелэн вордскем гуртаз, Алнаш ёросэ, нулло. Ӵыжы-выжыосы пуртыын ӝук пӧзьто. Отысь кошкыкумы, Акаршур гуртэ кожылӥськом, Миша агаймылэн синпелетэз доры дугдылӥськом, солы йыбырттӥськом, улонысь кошкем вань выжы-кумымес буре вайиськом.


Источник:

Иванова, М. В. Кызлэн ӵыжинэз выжыяз усе / М. В. Иванова ; записала Л. Тихонова // Удмурт дунне. - 2012. - 3 авг. - С. 6, 7 : фот. - (Удмурт кизилиос)

За предоставление материала выражаем огромную благодарность редакции газеты "Удмурт дунне"