Иванова Маргарита Григорьевна

Материал из Воршуда
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Вапумлэн ӧвӧл пумыз [править]

М. Г. Иванова

Маргарита Григорьевна Иванова 30 арлэсь кема ини удмуртъёслэсь шор дауръёсы историзэс но культуразэс эскере. Солэн ужъёсызъя («Северные удмурты в начале II тысячелетия н.э.», «Чепецкие древности», «Иднакар», «Истоки удмуртского народа», мукет авторъёсын ӵош гожтэм «Даур куара») асьмеос тодӥськом, кызьы улӥллям вашкала выжыосмы Чупчи котырын.

Маргарита Григорьевналэн нимыз люконтэм герӟаськемын Иднакарен – вашкала карез кыре поттонэн, эскеронэн. Иднакарысь материал табере люкамын Глазовысь «Иднакар» музей-заповеднике. Сое кылдытон понна уно лэсьтӥз Маргарита Григорьевна но.

Вордскиз М. Г. Иванова Можга ёросысь Вылӥ Кватчи гуртын, луиз история наукаосъя доктор, Удмуртиысь наука удысысь дано ужась. Тырше Россиысь Наукаосъя академилэн Урал ёзысьтыз историяя, кылъя, литературая Удмурт институтын учёной секретарь луыса.


- Маргарита Григорьевна, вордӥськем музъемдэ гажан семьяедлэсь историзэ тодэм бордысен кутске, шуо. Тӥ макем вашкала ӵыжы-выжыостэс тодӥськоды?

- Мон сизьым песятай-песянаелэсь нимтулзэс вераны тодӥсько. Со понна тау шуыны кулэ тятяелы – со эскериз, гожъяса кельтӥз семья писпумылэсь вайёссэ.

Мон ачим туж умой тодӥсько песятайме – Иван Семенович Семёновез. Ветлӥз Граждан оже, ужаз колхозын учётчикын. Тодӥсько на ай пересь дыръяз велосипедэн ветлэмзэ, туж яратэ вал мушъёсты. Яратонэз тятяелы, солэн пиосызлы но паласькем.

Тятяе Григорий Иванович Иванов ожмаськиз фашистъёсын. 1944-тӥ арын фронтысь юн сӧсырмыса бертэмез бере кузпалъяськиз Агафья Евсеевнаен. Мамае ужаз колхозын, 50-тӥ аръёсы ини кутскиз ужаны магазинын. Семьямы бадӟым вал – мынам 4 выны. Мон – бадӟымез апайзы. Соин ик соосты будэтыны тятяелы-мамаелы юрттоно луиз. Будэм беразы сюлмаськонэ йылӥз: соослэсь нылпиоссэс син азьын возьытэк ӧйлась. Мон шумпотӥсько соос понна. Огезлэн вынылэн пиез – Иван Семёнович – биология наукаосъя кандидат луиз, Ижысь гурт удысъя академиын дышетэ. Отын ик дышетске на кыкез племяннике. Мукетызлэн вынылэн нылыз йылпумъяз Удмурт кун университетысь историяя факультетэз, пыриз аспирантурае, али ужа институтамы.

- Выжыдылэн тодон-валан борды кыстӥськонэз кытысь потэ?

- Тятя Кватчи школаын удмурт кылъя дышетӥсь вал. Наукалы но мылкыдыз вал. Министерство куремъя удмурт кылэз дышетонъя докладъёс дасялляз.

Пинал дыръяз пудо возьмаз, котыр интыосты туж умой тодӥз, соослэсь нимъёссэс валэктыса кельтӥз. Тятяе Быдӟым ожлэсь самой кышкыт вакытсэ пырпотӥз, Ленинградэз тушмонъёслэсь утиз, блокадаез тӥян ожъёсы пыриськиз. Соку ик трос пол сӧсыртэмын вал. Со куинь орденэн данъямын, огез соос пӧлысь – Горд Кизили орден. Ожмаськон аръёс солэн улоназ пыраклы пытьы кельтӥзы. Солэн со вакытысь кырӟанъёсыз, тодэ ваёнъёсыз милям но сюлэмъёсамы пыризы. Кватчи школаысь музее материал но ӵапак со сярысь гожтӥ.

- Профессия быръемды но тятяеныды герӟаськемын-а?

- Мон солы улытозям паймылӥ. Можгаысь педучилищеез но Ижевскысь пединститутэз со йылпумъяз война бере ини, огдыре ик ужаса. Вань крезьгуро инструментъёсын шудыны быгатэ вал. Огзэ вынме арганэн шудыны дышетӥз. Мукетызлэн киосыз сӧсырмемын вал – юри скрипка басьтӥз. Монэ дышетӥз балалайкаен шудыны, педучилищеын домраен шудыны дыши на. Нокудмы но музыкант ӧм луэ, но та удысын ма но со валаськом.

Тятяе сюлмаськиз котькудӥзлы нылпиезлы солы гинэ тупамон ӧр шедьтыны. Со вакытэ Можга педучилище туж дано вал. Мон пичиысен ик тодӥсько вал ини, отчы пыро шуыса, мамаелэн медучилищее ыстэмез потэ вал ке но.

Педучилищеын монэ дышетӥзы Григорий Данилович Данилов, Римма Ивановна Данилова. Училищеез быдтэм бере кык ар асьме школаямы дышетӥ, мыным туж яра вал нылпиосын ужан. Быдэс улонме школаен герӟало шуыса, пыри пединститутэ историяя факультетэ. Умой дышетскыны дышемын вал бере, пединститутэз 1969-тӥ арын горд дипломен йылпумъяй. Шаерамы соку ӧй вал археологъёс. Удмурт научно-исследовательской институт курем В. Е. Майерез удмурт егитъёс пӧлысь шедьтыны та удысъя азьланяз дышетскыны мылкыд карисьёсты. Василий Евгеньевич туж тодмо, дано учёной, пединститутын дышетӥсь вал, со бырйиз монэ, Москваысь археологияя институтэ аспирантурае пырыны ӵектӥз. Архивъёсын ужаны дышон вылысь одӥг арзэ тырши шаертодонъя музейын. Собере гинэ дӥсьтӥ институтлэн ӧсаз йыгаськыны. Зэмзэ вераса, уг но оскиськы вал, пырыны быгато шуыса. Василий Евгеньевичлы огпол ӝожтӥськи, кышкасько, пӧй. Нош со лад-лад шуиз: археологиез «витьлы» тӥ сётыны уд быгатэ, дыр, но «куиньлы» но уд. Озьы ик луиз: археологиен мыным «ньыль» пуктӥзы, нош кылемъёссэ экзаменъёсме «витьлы» сётӥ. Нырысетӥ аръёссэ аслым ачим оскытэкгес дышетски. Но куинетӥ курслэн пумаз диссертациме гожтӥ ик. Печатлам ужъёсы ӧвӧлэн, соку ик сое утьыны ӧй быгаты. 1975-тӥ арын феврале татын, Ижевскын, УдНИИ-ын ар ужаса, ути ини.

Со вакытэ институтамы научной уж рос-прос азинскемын ӧй вал, Удмуртиысь Министръёслэн Кенешсылэн лыдъяськеменыз-а, мар-а. Соин ик мыным дэмлало вал университетэ выжыны. Но мон туж консервативной адями: одӥг интылы дышисько ке, сюресме вошъяме уг поты ни.

1978-тӥ арын институтлэн директорез луиз К. И. Куликов, со бадӟым уж нуиз институтэз Россиысь Наукаослэн академизылэн бурд улаз пыртон понна. Научной ужез ӟечгес но мургес нуыны, монографиос поттыны луонлыкъёс кылдӥзы. Озьы докторской диссертациозь но будыны капчиенгес йӧтӥз. Кузьма Иванович азьло ачиз доктор луиз, сьӧраз мукетъёссэ но учёнойёсты валтӥз.

1996-тӥ арын Москваын мон но доктор луон понна диссертациме ути. Туж шурдыса мынӥ вал, но Кузьма Иванович, мукет учёнойёслы сямен ик, мыным но оскон пыӵатӥз, мыр-мыр косӥз, шуыны луоз. Табере паймисько, марлэсь кышкаськем – защитае туж ӟеч ортчиз. Собере институтын отделэн кивалтӥсьысь монэ учёной секретаре пуктӥзы. Дыши компьютерен ужаны. Соин ик 1996-тӥ-1999-тӥ аръёс мон понна туж «емышоесь» вал - соку потӥзы мынам бадӟым книгаосы. Берло дыре, зэм, наукалы ичигес дыр кыле – учёной секретарь луисько бере, институтлэсь ужзэ радъянэн тросгес вырисько.

- Тӥледыз Иднакарлэн анаез шуо. Тӥ понна со шуд яке пумтэм сюлмаськон?

- Иднакарез эскеронэ валаса мынӥ шуи ке, янгышало, дыр. Диссертацие Чупчи котырысь удмуртъёслэн улэм-вылэмзылы сӥземын вал бере, та темаез азьланьтэме потӥз. Шаермылэсь кыӵе сэрегзэ, пӧй, меда быръёно?

Иднакарын 50-тӥ аръёсы интыяськемын вал воинской часть – отчы нокинэ пыраны ӧз лэзе. Аспирантураысь вуэме бере со отысь кошкиз. Иднакар усьтӥськиз – со ик мынам быръёнэ луиз. Иднакарлэн огпалаз интыяськемын вал вашкала шай, ожгар часть кошкем бере кулэмъёсты матысь гуртъёсын улӥсьёс нош ик отчы ватыны кутскизы. Вашкала карлэн сӥосыз син азьын ышыны кутскизы! Шаез ӝегатскытэк ворсано вал. Но мынам данэ, мыным оскон соку сыӵе ик ӧй вал ай бере, мынэсьтым кылзӥськись туж ик ӧз луы. Ярам, Кузьма Иванович бордам итӥськиз но, 1985-тӥ арын Иднакаре берпуметӥез шӧй ватэмын вал.

- Шайёсты кызьы-о ворсало, нимысьтыз документ кутыса-а, мар-а?

- Постановление, указ поттыса гинэ соосты уг луы ворсаны. Возьмаськисез но отчы уд пукты. Адямиослэн ӵыжы-выжыоссы отын кыллё бере, кулэмъёсты бордазы ик ватэмзы потэ. Соин ик Солдырьын (удмурт сямен Иднакарын), Глазовын, Адамын бадӟым валэктон уж нуимы.

Иднакарлы сӥзьыса, Глазовын азьло усьтӥськиз Ижевскысь шаертодонъя музейлэн филиалэз. Нош 2000-тӥ арын, мыным 55 арес тырмыку, нимаз музей кылдӥз – «Иднакар» музей-заповедник нимаське со, город солы нимысьтыз юрт висъяз, зэм, со сисьмемын. Музей табере пыртэмын федеральной программае. Туэ солы Россилэн бюджетысьтыз 2 миллион манет висъяськоз – юртэз выльдонлы документъёс дасян понна. Табере оскыны луэ ини, музей-заповедниклэн юртэз одно ик луоз. Глазовын музеез ладъяммы бере кутскомы Идна батырлэн караз инбам улын музей кылдытон борды. Отын шор дауръёсысь омырен «шоканы», вашкала удмуртъёслэсь серекъямзэс но бӧрдэмзэс «кылыны» быгатом. Карын пу юртъёс пуктэмын луозы, соосты сюйлэсь но коръёслэсь борддорен котыртоно луоз – ӵапак озьы выжыосмы Иднакарез крепостьлы пӧрмытӥзы.

Та музейлэн наука ласянь инъетэз дасямын ини. Нош мынам сюлмаськонэ – Иднакарын 30 ар ӵоже, солы матысь Гурьякарын, Весьякарын гудӥськем уже юнме медаз луы, музъемысь шедьтэм вань арбериос описьёсы пыртэмын, дунъямын луыны кулэ.

- Вашкала арбериосты утчаса гудӥськон – со романтика яке пӧсям ву быльыратозь ужан?

- Егитъёслы со – романтика. Соосты кыске лагерьын ӵош улон, тылскем котырын пукон, кырӟанъёс. Но зэмзэ ке верано, со туж секыт уж.

Нырысетӥ аръёсы ми дыртысагес гудӥмы, олокӧня тонна сюез бугыръям – кар сиослэн ышемзылэсь кышкаса. Табере сыӵе кышкытлык ӧвӧл ни. Али ми ужаськомы нимысьтыз планъя, музъемез сантиметрен-сантиметрен чакласа.

- Шайгуосысь лушкаськисьёсын пумиськылэмды вань-а?

- Синмысь синме ӧвӧл. Но пытьыоссэс трос пол адӟеме вань. Шуом, Дэбес ёросысь Тольён, Варни гуртъёсысь шайвылэ машинаен лыкто, музъем вылэз тракторен донго, шайгуосысь дуно арбериосыз быръё… Дондыкарысь ватос утчась кутэмын вал – таиз корт утчан арбериен ветлэ вылэм. «Сьӧд археологъёсын» шедьтэм вашкала арбериос калыккуспо рынокъёсын али туж дуно сыло.

- Азвесь пель угы кӧня сылыны быгатоз?

- Мон шонер вераны уг тодӥськы. Но Иднакар коллекцимес Венгрие нуллыку, котькуд арберилы страховой дун тупатэмын вал: кылсярысь, кортлэсь тӥрлы, саблялы – быдэн 10 сюрс доллар.

- !?

- Россиысь рынокын сыӵе арбериос туж ик дуно уг сыло, дыр, но кунгож сьӧры вузаку, соослэн дунзы уно пол йылэ.

- Лысьӧмез сыӵе «археологъёс» ӵыжаса гинэ кельто-а?

- «Кырсь» суй-пыдъёс соослы тунсыко ӧвӧл. Соос утчало чеберъям лыэз. Тужгес вылӥ дунъяло лылэсь вӧлэм пӧйшуръёсты, тылобурдоосты.

Археолог котькуд шедьтэм арбери понна туж шумпотэ, тужгес но со арбери шер пумиськылэ ке. Сыӵе чеберлыкен мукет учёнойёс азьын мактаськем ик потэ.

- Узырлэсь узырын бугыръяськыса, асьтэлы вашкала арбери кельтӥды, дыр – синпельлы?

- Но котькуд арбериез шедьтэммы бере, солы нимаз шифр сётӥськомы, полевой журналэ пыртӥськомы, суредаськомы, туспуктӥськомы но коллекционной описе пыртӥськомы. Со луэ кунлэн асваньбурез.

- Копам шайгуос, отын кыстаськись йыркобыос… Соосын артэ уйин палаткаын кӧлыны мон кӧшкемаменым ӧй быгатысал, дыр…

- Соин ик тӥ археологын уд ужаське. (Серекъя).

- Куараосты кылэмды, ворекъясь синъёсты адӟемды, зэмзэ но, огпол но ӧвӧл-а?

- Сыӵе учыръёс луыло ик, лэся. Но мынам кӧшкемаме ӧвӧл. Уже огшоры уж кадь гинэ потэ. Ваньмыз шоры мон учёной сямен гинэ учкисько.

Монэ атеистэз сямен будэтӥзы, соин ик сопал дуннеысь кужымъёслы уг оскиськы. Со сяна, вашкалаосты бугыръян понна ми ум гудӥськиське. Историез вуоно поколениослы кельтыны тыршиськом, ортчемзэ асьмеос ӧм ке тодэ, азьлане ум вамыштэ.

- Египетысь пирамидаосты усьясьёс кин кулӥз, кин висьыны усиз, Инмар мед утёз… Ваньмыз со научной луисьтэм гинэ, шуоды-а?

- Вань со веранъёслэн бадӟым люкетэз мынам чакламея малпамын. Со сяна, куалекъясь адямиос ми пӧлын уг ужало. Студентъёс пӧлын гинэ но сыӵеос ӧвӧл.

- Пӧртэм учёнойёслэн одӥг ужпумъя ик малпанъёссы куд-ог учыръёсы ог-огзылы пумит луо. Иднакар шоры учконъёс кыӵеесь?

- Нырысь ик Чупчи котырысь каръёсты булгаръёслэн малпало вал. Университетысь куд-ог специалистъёс али но шуо на: Иднакарын комиос улӥллям. Но вань материалъёс возьмато, та памятник удмуртъёслэн шуыса. Фольклорез ик басьтэ ай. Иднакар – удмуртъёслэн данъяськонзы но азьланезлы осконзы. Шор дауръёсы асьме выжыос сокем азинскемын вал бере, малы асьмеос соослэсь пӧртэм луыны кулэ. Мукет ласянь, удмурт калыклэсь сыӵе узыр культуразэ адӟыса, мукет калыкъёслы сое гажан мылкыд пыӵаны кулэ. Вашкала арбериос табере улӟо туала кибашлыослэн ки улазы – вашкала образъёс пыро пу, туй, куро арбериосы, дӥськутэ. Ваньмыз сямен соос куке но музъемысь шедьтэмын вал.

Мынам али ог 200 уже ини. Соос пӧлын – 12 книга. Со сяна, люкам коллекциосы утисько музейын. Юн кусып возисько шаерысьтымы усточиослэн юртэнызы, со пыр мон быгатӥсько материалъёсме ортчем дауръёсысь туннэ нуналэ берыктыны, азинтыны, вашкала арбериослы выль улон кузьманы. Котькуд археологлы озьы ужаны уг кылды. Мыным удалтӥз со ласянь.

- Тӥляд вань-а сыӵе малпанды, теориды, кудзэ документъёсын юнматоно на, но тӥ тодӥськоды ни, со шонер шуыса. Кӧня ке ар ортчыса, учёнойёс, оло, шуозы: Маргарита Григорьевна со малпанзэ 2004-тӥ арын ик «Удмурт дуннеын» шараяз вал ини…

- Фантазия мынам туж паськыт ӧвӧл. Кузьма Иванович шуэ, тон, пе, музъемлэсь вылэгес уд лобаськы. Со сяна, мон котьку но пыкъяськисько материал вылэ - луоысь шедьтэмысен книга гожтытозь. Соин ик мынам вань идеяосы туж юнэсь шуыса, оскисько.

Мон ортчем но вуоно дауръёс азьын кыл кутонме шӧдӥсько шуод-а, мар-а. Памятникез гудӥсько ке, мон сое быдтӥсько, сое нокин ноку уз адӟы ни. Со сярысь гожтэм материал соин ик котыр ласянь шонер мед луоз. Со материалъёс медаз ыше-быре, соос мед пырозы улонэ. Табере вань ини материалъёсты мукет сямен учкыны тыршисьёс но, асьсэлы но каремзы потэ ини. Но кин тодэ, оло, со материалъёсыз, зэмзэ но, азьланяз выль сямен валэктоно луоз.

- Ас вакытаз тӥ, Маргарита Григорьевна, трос гожъяськиллямды «Удмурт дуннее»…

- Кузьма Иванович ик милемыз мыр-мыр косэ вал калык пӧлы тодон-валанъёс вӧлмытыны - телевидение ыстэ, газетэ гожъятэ. Зэм но, мынам ужъёсы потазы «Советской Удмуртия», «Дась лу!» газетъёсын. Но удмурт кылын гожъяськыны кыӵе шуг йӧтэ вал! «Иднакар», «Даур куара» книгаосты гожтыкумы, сыӵе курадӟимы, кылтӥрлык тырмымтэен. Но ӧраз пыриськод ке, каньылгес ини.

Али мон гожтӥсько 6-тӥ класслы историяя учебник, зэм, ӟуч кылын. ӵукна 7 часысен 9-озь мон со бордын ужасько дорын, собере институтэ лыктӥсько, татын бер ӝытозь бергасько.

Вань мынам малпанэ Иднакар сярысь удмурт кылын эшшо одӥг книга гожтыны. Со чылкак научной уз луы (сыӵеоссэ ӟуч кылын поттыны кулэ), огшоры кылын гожтэмын луоз, калыклы валамонгес карон понна.

- Но улонын, наука сяна, маке мукетыз но луыны кулэ ук.

- Али вань сюлмаськонэ: пересьми ке, кызьы асме сюдыны быгато, маин уло. Пенсия сокем пичи, ужатэк уг луы. Но та йырвисён борды кулэ на сюлэмез шумпоттӥсь маке. Вот мон кӧня ар экспедициосы потай, нош бакча туж олокыӵе кулэ ӧй вал. Музъем уг но кыскы вал. Нош али музъем шумпоттэ: будосэз мерттӥськод, со сяськая, емыш сётэ… Гужемскын син азьын ортче вордскон, будон но кулон…

- Оло, тӥ наукалэсь жадиды?

- Озьы но, дыр. Мон ог кызь ар отпуске ӧй пота. Кылем арын гинэ толэзьлы кошкылӥ, но учебникез дасян вылысь.

- Нош семья кылдытыны?

- Ӧз пӧрмы, ӧз тупа. Егит дыръям вал малпанъёс… Нош табере ортчем сюресме учкисько но малпасько: оло нош озьы ик кулэ вал.

Мон чылкак огнам ноку ӧй вал. Мон дорын улӥзы вынъёсы, соослэн нылпиоссы.

Семьятэк улон монэ ноку ӧз зӥбы, со понна мон асме ултӥ уг шӧдӥськы, улонэ ноку тырттэм ӧй вал. Монэ яратӥзы, гажазы, адӟытэк ӧз кельтэ. Улонам ваньмыз дырыз дыръя ортчиз. Ноку ӧй чота, кӧня час ужасько, кӧня уждун тыро. Кӧня быгатӥ, сомында ужай.

Источник:

Иванова М. Г. Вапумлэн ӧвӧл пумыз / М. Г. Иванова ; записала О. Вахитова // Удмурт дунне. - 2004. - 5 марта. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"