Зубков Владимир Евгеньевич

Материал из Воршуда
Перейти к навигацииПерейти к поиску
Зубков В. Е.

Владимир Евгеньевич Зубков лыдӟисьёслы тодмо баянэн синмаськымон шудэменыз. Удмуртиысь тодмо артистъёсын но коллективъёсын ӵош со, асьме шаерез быдэсак котыръям сяна, Казань, Москва городъёсын, Эстониын, Венгриын, Чехословакиын ортчем ужрадъёсы пыриськылӥз. Но Владимир Евгеньевичлэн валтӥсь ужез – нылпиосты крезьгурлы дышетон. Солы со вань быгатонлыксэ, лул-сюлэмзэ сётэ.

Бадӟым тодонлыкен мурт доры крезьгур гожъян удысын тэтэ карисьёс но, мӧйыосыз но ӵемысь вазиськыло. Зӥбыт, каньыл мылкыдо, шырыт сюлэмо Владимир Евгеньевич ваньмызлы юрттыны дыр шедьтэ. Солэн ӟечезлы луыса ик калык доры вуэмын крезьгуръёсын трос сборникъёс, дышетскон пособиос. Владимир Зубковлэн крезьгур удысын мылысь-кыдысь тыршемез трос данъян грамотаосын пусъемын, 2000-тӥ арын солы Удмуртиысь культура удысысь дано ужась ним сётэмын.


- Алнаш ёросысь Азамат гуртын 1953-тӥ арын 29-тӥ январе вордӥськемын мон, нош гожтэмын 7-тӥ феврале. Куазь туж кезьыт тупам, гожтыны мыныны сюресэз тӧл-жоб быдтэм. Азаматын куинетӥ классозь дышетски, собере анае Можга городэ улыны выжиз.

Городын мыным секыт вал: нокытчы мыныны уг тодӥськы, ӟуч сямен вераськыны шуг. Анайлэн уж дураз лумбытэн улӥ. Коньдон тырмымтэен, сиён тыро-пыдо ӧз йӧтылы. Пурысь нянь юдэсэн нуназеяськом вал.

Сентябрь толэзьысен питомникын уж ӧжыт кылиз но анай мултэс луиз. Уж утчаса, со быдэс городэз котыртӥз но крезьгуръя школае вуиз. Отчы выж миськись кулэ вылэм. Анай уже интыяськыку адӟисько: школае дышетскыны пыроно нылпиослэсь кырӟамзэс эскеро. Мынам но быгатэмме возьматэме потӥз, «По долинам и по взгорьям» ӟуч кырӟанэз кырӟай. «Ньыль» пуктӥзы но дышетскыны кутӥзы. Баянэн, пе, шудод. Нокыӵе мукет шудон инструментъёсыз адӟылэме ӧй вал бере, озьы ик кулэ шуыса малпай.

Можгалась 3-тӥ школаын удмурт классын дышетски ке но, нырысь-валысь секыт вал, нош крезьгуръя школаын эшшо секытгес. Ӟуч кылэз умой валамтэеным, «куиньёс» октылӥ. Со понна возьыт потылӥз. Азаматын «витьлы» гинэ дышетски угось. Собере пумен ӧраз пыри, кыксэ ик школаоез «витьёсын» йылпумъяй.

- Можгала вуэмды бере удмурт карыса ултӥяны ӧз выре-а?

- Мон сое ӧй шӧды. Но тодӥсько вал, ултӥяны быгатозы шуыса. Соин асме котькытын быгатӥсен, умоен гинэ возьматыны тырши. Муртъёс дорын пу коркан улыкумы, быдэс урамысь пиос шальыен шудӥзы. Мон туж-туж тырши, эшъёсы пӧлысь самой зол шудӥсь мед луо шуыса. Пӧрмиз. Монэ гажаны кутскизы. Со вакытэ гуртъёсын баскетболэн шудэмез уд адӟы вал ай. Милям школаямы со вал. Трос тыршыса, мон тупез кыдёкысен корзинае пыртыны дыши. Кин ке маке шуыны турттӥсьёслы бадӟым классын дышетскись ӟуч пияш Толя мыным дурбасьтыса шуоз вал: «Тон со сямен тупез корзинае лэзьяны дыш ай».

- Можгаысь крезьгуръя школае умой кырӟаменыды кутӥзы бере, кырӟаны пичиысен яратӥськоды, дыр?

- Яратӥсько. Азаматын садамы ӝужыт льӧмпу будӥз. Отчы тубисько, пуксисько но, э-э, кырӟасько ук! Азамат школаын монэ бадӟым классын дышетскись пиос Лёня Гусев (ГТРК-ысь режиссёр – Г. Р.) но Пётр Рязанцев «согылӥзы». Озьы кукей кӧм пушкысь потыса ӧй вутты – гуртысь кошкимы. Собере тӥни баянэн шудыны кариськи. Нош кырӟаны али но кырӟасько – Александр Невский нимо соборын, Архиерей хорын.

Гуртысьтымы библиотекаез тазатыкузы, кулэтэм книгаосты куяллям. Нотаосын сборникъёс но сюриллям. Анай одӥгзэ гуртэ ваем. Ӧйтӧд малы. Кырӟаны, куатланы со туж быгатэ но, нотаез уг вала. Мон со нотаос борды ӝабырски, нокытысь адӟылымтэ пусъёс сыӵе бордазы кыскизы, паймымон потӥзы. Али но со сборник дорамы улэ: «А. Пушкин в музыке». Пушкинлэн кылъёсызъя гожтэм романсъёс.

- Крезьгуръя школаын дышетскыкуды асьтэлэн баянды вал-а?

- Кытын, пе, со ёрмыса улӥсьёслы. Берпум арзэ дышетскыкум гинэ анай Азаматысь коркамес 200 манетэн вузаз но мыным 199 манетэн баян басьтӥз. Нош кылем манетэз процентэ понэмын вал. Ми али но со процентъёслы улӥськом.

- Кызьы малпаськоды, Азаматын ик улысалды ке, Казаньысь консерваторие дышетскыны пырыны быгатысалды-а?

- Ӧй быгатысал. Со понна крезьгуръя школаез но училищеез быдтоно. Баянэн ӟеч шудыны туж трос дышетскем кулэ. Консерваторие но пырыны конкурс кыӵе бадӟым вал: одӥг интые 10 мурт.

- Николай Зубков тодмо кырӟась ӵыжы-выжыды ӧвӧл-а?

- Ижысь крезьгуръя училищее дышетскыны лыктэме бере ваньмыз солэн кинэз ке шуыса малпазы. Но со Можга ёросысь Тутайгуртысь, мон – Алнаш ёросысь. Фамилиосмы гинэ огкадесь. Огкадь фамилиен серемес учыръёс но вал: концертэ ветлӥськод но гонорарзэ Николай Семёновичлы лэзё. Николай Семёновичлы мон баянэн шудылӥ. Ма, кинлы гинэ ӧй шуды - вань тодмо кырӟасьёслы, дыр. Геннадий Корепанов-Камский вӧзын дас ар ӵоже быръем баянчи луи. Милям Геннадий Михайловичен пластинкаосы гожтӥськеммы но вань. Азьло сыӵе ужез Москва гинэ быдэсъяз.

- Со сямен ик крезьгуръёс гожъяны мылкыдды ӧз ӝутскылы-а?

- Адӟисько вал, егитъёс пӧлын крезьгур гожъясьёс тросгес но тросгес луо шуыса. Но мон ас азям сыӵе ужпум ноку ӧй пуктылы. Кин ке гожъя, кин ке шудэ. Котькудӥзлы – аслаз. 50 арес тырмемме Алнашын ортчытыкум, удмурт кылбурчиослэн кылъёссыя 6-7 кырӟан гожтыны дӥсьтонэ тырмиз ик. Соосты кышное сузэреныз кырӟазы. Николай Постников шуиз: кырӟанъёсыд, пе, сюлэмме вырӟытӥзы. Эшъёсылы но кырӟасьёслы шудыку, крезьгуръёсты аслыд ӵемысь малпано луэ. Мамында соос шудэмын, уг тодӥськы. Соосты мон нокытчы ӧй гожъя, шудӥд но вунэтӥд. Баянчилэн ужез сыӵе. Кулэ ке, «Вальсэз» шудӥськод, кулэ ке – «Полькаез», кулэ ке – удмурт эктонэз. Кулэ дыръяз котьмае шудыны быгатон – со мынам творчество ласянь эриклыке.

- Тани, шуом, мылкыдды туж урод, нош шудыны шулдыр гурез кулэ.

- Профессионал ноку но мылкыдзэ учкисьлы возьматыны кулэ ӧвӧл. Котькыӵе ужез кулэезъя, ӟеч быдэстоно. Куд-огез малпало: мон баянэн шудӥсь бере, дорын ваньзэс эктытыса, кырӟатыса возисько, резь поттӥсько. Баянэн сомында ужаса, гуртын шутэтскем потэ ни, киям кутылытэк тыршисько.

- Тӥледлы усточиослэсь школа-интернатсэс кылдытыны оскизы вал.

- Парти ласянь косон вал со, общественной уж. Консерваториын дышетскыкум но мон весяк сыӵе ужен выри: факультетамы курсамы староста, профорг вал. Нош интернат кылдытон кулэлыкезъя общественной уж кадь гинэ ӧй вал. 1987-тӥ арын интернат усьтӥзы. Куинь ар ӵоже мон со партийной поручениез быдэсъяй. Быгатӥсь нылпиосты утчаса, гуртъёстӥ кӧня ветлӥм. Шур дурысь, нюлэскысь, бусыысь но соосты кутылоно луылӥз. Гуртысь нылпиос ужало ук. Гуртэ вуиськод, калыкен вераськиськод но шуо: вань, пе, милям кырӟаны, шудыны усточимы, но со чорыга яке пудо возьма. Мар карод, утчаны кошкиськод. Нырысетӥ араз дышетскыны куамынзэ кутӥм, кыкетӥ араз – нош куамынзэ. Озьы куинетӥ араз укмыстон пиналмы луиз. Школа-интернатлы директор кулэ шуыса, педсоветын вераськон ӝутӥ. Нимысьтыз юрт но утчано, шуисько. Гуртысь нырысьсэ потэм, дӥсьтӥсьтэм нылпиос соку анай-атайтэк кылем пиналъёсын ӵош улӥзы, курадӟыса дышетскизы. Педсоветын ик ӵектӥ: директоре тодмо адямиез пуктоно, со котькытчы пырыны-потыны мед быгатоз, сыӵе мурт – Геннадий Михайлович Корепанов-Камский. Но кин ке мынэсьтым нимме поттӥз. Озьы монэ бырйизы.

- Школа-интернатысь потэм нылпиос пӧлысь асьмеос куке но Герман Корепанов, Геннадий Корепанов-Камский, Николай Шкляев, Николай Зубков кадь яркытъёссэ адӟомы-а?

- Соосты асьмеос мӧйымем беразыгес гинэ тодӥськом ни ук. Интернатэз йылпумъямъёс крезьгурлэн сюрес вылаз али гинэ умой-умой пото ай. Школа-интернат бере соос крезьгуръя училищеын дышетско, тужгес удалтэмъёсыз – консерваториын. Но мынам дышетэм пиналъёсы пӧлын тодмоосыз вань гинэ ини: артист Алексей Ложкин, кырӟанъя но эктонъя «Айкай» театрысь артист Пётр Куликов, нош Василий Степанов али Юрий Никулинлэн цирказ ужа. Шаркан ёросысь удмурт пияш Сергей Лопатин Москваысь Шнитке нимо колледже дышетскыны пырыны быгатӥз. Отчы араз ньыль муртэ гинэ куто бере, туж шумпотӥ. Нош кӧняез, пӧртэм конкурсъёсын вормыса, лауреат нимъёс басьтылэмын. Крезьгуръя училищеын дышетэм пиналъёсы пӧлысь витезлы Удмуртиысь культура удысысь дано ужась ним сётэмын ни.

- Кышноды Любовь Никитьевна но чебер кырӟа.

- Со Челябинскысь культурая институтын дышетскемын, дирижёрско-хоровой отделениез йылпумъяз. Можгалась «Свет» заводысь кырӟась-эктӥсьёсын кӧня ке ужаса вуттӥз но улыны Иже лыктӥз. Собере пиосмы вордӥськизы. Нылпи садын инты ӧвӧлэн, ужзэ воштоно луиз, кема аръёс ӵоже УдНИИ-ын библиотекаен кивалтӥз.

- Крезьгур пӧлын будэм нылпиос та удысэгес кыстӥсько, шуо. Пиосты мае бырйизы?

- Пиме, урамын юнме медаз бызьылы шуыса, крезьгуръя кыкетӥ номеро школае сётӥ. Секыт баянэз нуллоно медаз луы шуыса, балалайкаен шудыны ӵектӥ. Школа бере со крезьгуръя училищеез быдтӥз. «Айкайын» но «Италмасын» шудыны малпа вал но, Башкортостанын ортчем фестивальын луареат луыса, вылӥ образование басьтыны мылкыд кариз. Москваысь Гнесинъёс нимо крезьгуръя академиязы дышетскиз, Пятницкий нимо хорын шудэ. Гастрольёсы трос ветлэ, алигес Кореяысь вуиз.

- Кыӵе малпанъёсын азьланяз улыны малпаськоды?

- Мон шудо адями: трос на шудымтэ гуръёсы, трос на тодмотэм дышетскисьёсы – соос сярысь сюлмаськоно, соосыз будэтоно. Соос будэмъя ачим но будыны малпасько. Вакчияк ке верано, улыны али гинэ кутскисько ай.


Источник:

Зубков В. Е. "Корка вузай - баян басьтӥ" / В. Е. Зубков ; записала Г. Романова // Удмурт дунне. - 2007. - 16 нояб. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"