Загребин Алексей Егорович

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Историлэн тулкымъёсаз

Загребин А. Е

Студентъёслы лекция лыдӟе-а, тодосчиослэн конференциязы доклад лэсьтэ-а, солэсь верамзэ кылзысал но кылзысал кадь. Шер озьы луэ. Нош Историяя, кылъя но литературая институтлэн директорезлэн, история наукаосъя кандидатлэн Алексей Загребинлэн паймымон кужымез вань: вольыт, зыл-зыл кылыныз со адямиез туж лякытак гинэ валтэ историлэн пӧртэм вакытъёсаз. Син азяд сыӵе яркыт пуксе дуннелэн, Россилэн, Удмурт шаерлэн ортчем сюресэз. Огдырлы вунэтӥськод кытын но кыӵе вакытэ улэмдэ.

Йӧспӧртэм юрт

- Ижысь Красноармейской ульчаысь туж йӧспӧртэм юртын вордӥськи. Трос этажо коркалэн укноосыз Сенной базар шоры учко. Ижлэн историяз та юрт висъяськиз. Сое 1950-тӥ аръёслэн кутсконазы пуктӥзы но отчы улыны интыяллязы Культурая министерствоын ужасьёсты, вузъёсысь дышетӥсьёсты, творчествоен вырись огазеяськонъёслэсь кивалтӥсьёссэс. Со дыре ик йӧспӧртэм юртын сэрег шедьтылӥзы заводын ужасьёс, начар улӥсь семьяос.

Коммуналкаын ӝыт трос калык люкаськылӥз. Кыӵеез но ӧй вал пӧлаз! Тужгес но тунсыко улӥмы ми - пиналъёс. Кинлэн ке атаез артист, кинлэн ке писатель, кинлэн ке - курытсэ яратӥсь… Но ми ог-огмес ӧм люкылэ, паймоно кадь: ваньмы яратӥмы лыдӟиськыны.

- Адӟиськод-а, тӥни лыктэ Тимофей Шмаков писательлэн кузпалыз, - нодъялляз монэ атае - тодмо драматург Егор Егорыч Загребин. - Нош соиз - Василий Садовников драматурглэн кышноез. Таиз ке - Лазарь Перевощиков режиссёр, соиз - сыӵе-сыӵе суредась... Со нимъёс йырам пыраклы кылизы.

Эшшо тодэ ваёнъёсам яркыт пыӵаз базар. Йӧспӧртэм коркан укно дуръёс паськытэсь вал. Песянае отчы миндэр понэ, мон выдӥсько но укно сьӧры учкыса кыллисько. Мае но уд адӟы базарысь! Котькуд арня нуналэ вузаны вуттылӥзы ыжъёсты, кунянъёсты, кроликъёсты. Ӵемысь кылӥськиз удмурт сямен вераськем. Бадӟымгес будэме бере эшъёсын шудыны базаре ик потам.

Эшшо туж яратӥ университетэ ветлыны. Анае отын немец кыллы дышетӥз.

Куинь арескам монэ мырдэм но кызьы келязы нылпи садэ. Огпол кин ке вайиз «Огонёк» журнал. Вылаз трос пӧртэм орденъёс суредамын. Нылпиос со гадьпусъёсты вандылӥзы но ог-огзылы бырттылыны ӧдъязы. «Ожын подвиге» понна Ленин орден лякизы мынам пальтое борды но. Анае тае адӟемез бере чабкиськиз. Серемез но потэ, синъёсаз кышкан но шӧдӥське. Совето вакытъёсы кин тодэ ай… Но мон орденме номырысь но ӧй кушты, со гинэ ӧвӧл, гын сапеге вылэ колоша дӥсяны тыпак пумит луи - офицеръёс озьы уг ветло! Тулыс лымы сулеп, сучыр-сачыр вал ке но, колошаме киям нуи. Мон - офицер!

Мынам атае тунсыко!

- Вылтусыя мон атае кадьгес. Собере, мыным пыӵаз на солэн трос ужаны быгатэмез. Кӧня асме тодӥсько, со ялан тырше. Кӧлыны выдӥсько, атай гожъяськыса пуке. Уйин сайкаськод - висъетаз тыл ӝуа на. Котькуд ӵукна мон шедьтылӥ быдэс гурезь гожъям бумагаосты, кудӥз ке кечат-вамат ӵушылэмын, кудӥз ке комъямын. Атай шуоз вал: от, пие, мон туннэ ӝыны бам гожтӥ… Нош мон малпалляй: шедьтэм ук маин ушъяськыны, мон сомындаез вить минут ӵоже гожто. Соку ӧй валалля на: куддыръя одӥг чур пӧран понна гинэ часъёс кулэ.

Атай котьку гожъяськиз киын. Печатлан машина огпол басьяз ик, маке выриз-выриз но сэрпалтӥз.

Пичи дыръям ик валаны кутски ни: мынам атае мукет адямиослэсь пӧртэмгес. Пьеса гожтыкуз нокыӵе кадь ик ӧвӧл. Нош Удмурт театрын спектакльзэ возьмато ни ке, залын пукисько, сюлмы шымырскыса: учкисьёс кызьы пумиталозы? Вань та юанъёс-сюлмаськонъёс пумысен семьяямы кенешылӥм.

Куддыръя озьы пӧрме: ужазы выем адямиослэн пиналъёссы аналтэмын луо. Нош мыным анай-атаелэн шунытсы, визь-кенешсы котьку тырмылӥз. Валалляй: атай огшоры ужен уг выры, заводысь станок сьӧрын выллем огкадь ёзъёс уг лэсьты. Ульчае ӵош потӥськод но, сомында адямиос милемын ӟечбуръясько, верасько. Соослы мынам атае тунсыко!

Семьяенымы пӧртэм сямен шутэтскылӥм. Я огшоры потӥськом шур дуре, визнаськом, тылскем дурын пукиськом. Нош куддыръя шонтӥськом Ленинград вӧзы Комаровое интыяськем творчествоя юртэ. Татын ик шутэтско Россиысь дано артистъёс. Ваньмыз со дунневаланме паськытатӥз.

Адӟемпотостэм лыдпусъёс

- Мае ке шӧдэм кадь, туж уг пот вал школае мынэме. Но дыр вуиз. Интыязы англи кылъя 25 номеро нимысьтыз школае. Дисциплина туж юн. Уноез дышетӥсьёс - орденъёсын пусъем дано адямиос. Котькудӥз аслэсьтыз предметсэ тужгес кулэен лыдъяз. Математикая дышетӥсь но та ласянь пӧртэм ӧй вал. Нош мыным та предмет ӧзгес яралля. Малпай: асме кужмысь уг кары, «куинь» вань ке, ярам. Анайме трос ӧтчазы школае, директорлэн кабинетаз пыжизы. Но математикаез яратон мылкыды ӧз кылды.

Со понна туж зол тодӥ англи кылэз. Мон понна дурбасьтылӥзы гуманитарий предметъёсъя дышетӥсьёс но. Школаез йылпумъяй аспӧртэм аттестатэн. Бадӟым люкетэз - «витьёс», алгебра кадьёсын - «куиньёс».

Кин тодэ, оло, атае сямен, мон но творчествое кошкысал. Угось куинетӥ классысен куаш-куаш выри суредаськонэн, витетӥысен анае гожтӥз на искусствоосъя школае. Укмысэтӥ классозь отчы ветлэме бере ачим ик валай: суредаськисько умой, но кыӵе ке бадӟым талантэ ӧвӧл.

Школаез йылпумъяме бере азям паськыт инвисъёс усьтӥськизы.

Семьяеным ӵош кенешыны пуксим. Атай соку ик шуиз: юристэ мынӥд ке, вань улондэ муртлэн кырсь дӥськутаз бугыръяськыса ортчытод. Анай итӥськиз: мынам факультетам пырид ке, дышетскон укыр капчиен сётӥськоз.

Тӥни озьы пумен-пумен малпанэ вуи - истфаке мыно. Туж потӥз историез мургес дышетэме. Зэм, студентэ пыртыкузы ик, валай ни: та факультет азьын мукетгес ужпумъёс сыло. Римма Голдина деканмы, студент билет сётыкуз, пусйиз:

- Эн вунэтэ, тӥ пыриды идеологиен герӟаськем факультетэ.

Зэм но, кинэ дасялляз истфак? Партиын ужасьёсты, КГБ-лы но МВД-лы специалистъёсты... Нош мон комсомолэ гинэ но туж шуген пыри. Школаын эшеным ӵош куддыръя асмеды эрикогес возьылӥм, соин вылды. Ма, 1980-тӥ аръёсы выль тулкымъёсты шӧдылӥм ни. Нош дышетӥсьёслы куд-ог малпанъёсмы ӧз кельшылэ. Комсомолэ пырон азьын кенешонэ мон джинс штанен но кроссовкаосын лыктыны шедьтӥ. Комсомол палэнтӥ лобиз. Зэм, бӧрысь пыртӥзы ик, но шумпотон ӧй вал.

Кизили доры кыстӥськон

- Университетын дышетсконмы секыт вакытъёсы тупаз. 1989-тӥ-1994-тӥ аръёс. Ваньмыз куашка, быре. Калыклэн уксёез но ӧвӧл, зэмос дунлыкъёс но саптамын. Идеологияя факультетэ комсомолецъёс луыса пыримы, нош луимы диссидентъёс выллем. Угось тросэз ӵош дышетскем эшъёсмы кыстӥськизы демократъёс пӧлы. Соослэн но либералъёслэн митингъёсазы ветлӥсьёсмы тырмыт вал. Нош мыным тунсыкогес потылӥз пӧртэм адямиосын вераськон, наука.

Огпол, ноябре, потӥмы митинге. Эшмы ас вылаз плакат золтӥз. Азяз гожтэмын: «Долой октябрь!», бераз - «Да здравствует февраль!». Эшмес вискамы пуктӥм, жугоно кариськизы ке, утьыны мед быгатом. Пушкин ульчаысен пумиськимы ИжГТУ-ын дышетскисьёслэн колоннаенызы. Соос милесьтым плакатмес кыскизы, сэрпалтӥзы. Тӥни соку валай: макем висъясько технарьёс но гуманитарийёс. Ми эрикогес малпаськылӥм.

Студент дыръёсы улонам нимысьтыз инты басьтӥз Владимир Владыкин тодосчи. Котькуд бадӟым но тунсыко адямиен пумиськон капчи уг луы, дыр. Озьыгес ик луиз Владыкинэн матысь тодматсконэ. Первобытной обществолэн историезъя экзамен сётоно, пе, гожъяса. Нош мон котьку но тросгес яратылӥ мадиськыны. Ма карод, ваньзэ ӟеч тодӥсько, трос гожъяй.

Но темаез учкем сяна, Владыкин туж сак эскере вылэм шонер гожъяськыны быгатэмез, кытӥяз запятойёсты гинэ но. Учкисько - «ньыль» пуктэм. Эшшо вож фломастерен запятойёс лякылэм на. Мон валай: янгышъёсы быдэс ужея умойтэм мылкыд кельтӥзы. Текстэлэн пумаз Владыкин гожтэм: фактъёс улэ пачкад. Зэм но, мон историысь трос учыръёсты мади, нош анализ лэсьтыны вунэтӥ.

Талэсь азьвыл экзаменъёсме ваньзэ витьлы сётӥ вал бере, ӝожоми. Владыкинлэсь курссэ витьлы тодӥсько ук! Кема малпаськытэк, мынӥ деканатэ: яралоз-а экзаменме выльысь сётыны? Отын шорам долказы: «ньылез» нокин ноку уг тупатъя ни, эшшо ик Владыкинлэсь. Соку мон тодосчи доры вамыштӥ. Егит, туж дӥсьтӥсь вылӥськем, лэся. Профессор монэ кылзӥз, экзаменме кыкетӥзэ кутӥз. Озьы мон вить басьтӥ но бадӟым адямиен матэгес тодматски.

Наукаен вырон мылкыды УдГУ-ын эшшо пуромиз. Но университетэз йылпумъян вакытам аспирантураын очной интызы ӧй вал. Ӧтён вуиз Санкт-Петербургысь университетысь, но эскероно, пе, ӟучъёслэсь историзэс. Малпай: тыршоно аслад калыкед понна, нош отын асьметэк но тодосчиос шедёзы. Зэмзэ вераса, анайлэсь палэнэ кошкон мылкыды но ӧй вал.

Аспирантурае заочно пыри но университетын ик ужаны кутски, Шундыӝужан палъёслэн историзылы сӥзем курс лыдӟыны сётӥзы. Пумен оскизы деканлэн воштӥсезлэсь ужзэ, история наукаосъя кандидат луи. Огпол эше шуэ: удмурт кылэз тодӥсьёслы вань, пе, луонлык кыкетӥ вылӥ тодон-валан басьтыны, юристэ дышетскыны. Милям соку деканмылэн кыкетӥ вылӥ дышетскемез экономикая вал. Умой тупасал, воштӥсез юрист ке луысал. Озьы 2003-тӥ арын мон йылпумъяй эшшо одӥг факультетэз.

Куликов чакласа возем

- Историяя, кылъя но литературая институтэ сюресэ кемагес ик кыстӥськиз. 2000-тӥ арын Финляндиысь Тампере городын ортчиз историкъёслэн бадӟым конгрессы. Отысен ми матэгес тодматским институтлэн кивалтӥсеныз Кузьма Куликовен. Мон сое азьвыл тодӥсько вал, но пайми: со но монэ син азяз возем.

Финляндиын дэмлаз дораз ужаны. Мон соку история факультетын деканлэн воштӥсез вал. Ваньзэ куштыса, шуак уд кошкы. Но улонам кыӵе ке воштӥськонъёс ортчытэм потэ. Эше ӧтемъя, кошки Удмурт Республикаысь Наукая, вылӥ но шор дышетонъя кун комитетэ Чиновник луи. Та вамышме Владимир Владыкин ӧз вала. Янгышме ачим но шӧдӥ. Чиновниклэн ужез уг адӟиськы, наука палэнэ кыле, тон думемын уж интыяд. Ӝыны ар ӵоже озьы курадӟи но кошки Историяя, кылъя но литературая институтэ. Отын этнологияя но этнографияя отделэн кивалтӥ.

Институтлэн директореныз малпанъёсы уг ке тупало, мон меӵак вералляй. Валасько ук: Кузьма Иванович но ӟеч малпаса лэсьтэ. Дэмласько вал ужпумез мукет сяменгес, ӧжытгес «вир поттыса» радъяны. Директор быгатылӥз кылзыны. Малпасько: кивалтӥсьлэсь кышкано ӧвӧл, аслэсьтыд зэмлыктэ валэктыны быгатоно.

Историяя, кылъя но литературая институтлэн директорез луыса ар пала гинэ ужасько ай. Туж бадӟым тау кареме потэ тодосчиослы Маргарита Ивановалы но Галина Никитиналы. Соос юрттэмен, мон директорлэсь ужзэ ӝоггес валай. Анай мылкыдын, лэся, куд-ог сюлмаськонъёсты ас вылазы басьто. Паймисько но йыбырттӥсько та нылкышноослы.

Али бадӟым саклык висъяны чакласьком институтлэсь ваньбур инъетсэ узырмытонлы. Ми федерал структура ке но, оскиськом республикалэн юрттонэзлы но. Выльдоно библиотекаез, компьютеръёсты. Институтын ужа 27 тодосчи, со пӧлысь тямысэз - наукаосъя доктор.

Валтӥсь ужпуммы - фундаментальной наукаен вырон. Ӝыныез ужасьёсмы - филологъёс, мукет ӝыныез - историкъёс. 1994-тӥ арысен таӵе удысъёсъя аспирантурамы вань: этнография, этнология, антропология, археология, история, фольклористика но литературоведение. Библиотекаысьтымы шедьтыны луоз улосмылэн историез но культураез сярысь 60 сюрслэсь трос пӧртэм книга-журнал.

Но туж шугъяськиськом ужасьёсмы ӧжытэн. Зэм, мукет институтъёсын ӵошатоно ке, ужазинлыкмы трослы бадӟымгес. Тани та толэзе гинэ егит тодосчиослэсь симпозиумзэс ортчытӥськом. Со нимаськоз «Воштӥськись дуннеын калык культура». Та ужрад ортчоз «Воршуд» фестивальлэн бурд улаз. Нош туэ ар пумын радъяськоз на «Финн-угоръёс - славянъёс - тюркъёс: кусып возён опыт (сям-йылолъёс но выль амалъёс)» конференция, отчы лыктозы быдэс Россиысь тодосчиос.

Ортчем арын поттӥм кӧня ке книгаос, Удмуртилэсь куинь томен историзэ. Туэ - бадӟым удмурт-ӟуч кыллюкам. Чакласьком ӟуч-удмурт кыллюкам но печатланы.

Ачим сярысь ке верано, та нуналъёсы ути доктор ужме. Со сӥземын кунысьтымы финн-угор калыкъёслэн 18-тӥ - 20-тӥ дауръёсы улэмзылы. Та выллем уж Россиын нырысетӥез. Угось татчыозь котькуд калык аслэсьтыз историзэ нимаз эскериз. Пусйысал на: тросгес пыкиськи кунгож сьӧрысь эскерисьёслэн ужъёссы вылэ. Таӵеез но азьвыл ӧй вал на.


Источник:

Загребин А. Е. Историлэн тулкымъёсаз / А. Е. Загребин ; записала Е. Миннигараева // Удмурт дунне. - 2009. - 5 июня. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"