Редактирование: Дэметэр Миклош

== Кубыз гур сюанозь вуттӥз ==

[[Файл:Demeterfamily.jpg|thumb|left|Ката, Миклош, Анастасия, Дьёнди Дэметэръёс]]
'''26-тӥ пӧсьтолэзе Ижкарын бадӟым концертэн йылпумъяське нырысетӥез Кубыз фестиваль. Та ужрадын шудозы-кырӟалозы Румыниысь Трансильваниысь Миклош Дэметэр, кузпалыз Анастасия Петрова, нылъёссы Дьёнди но Ката. Аспӧртэм удмурт-венгер семья мыным эшшо но дуно луэ, угось Настя — апае, Миклош кубызчи — кырсие.'''

'''Аспӧртэм ӵыжы-выжыосы'''

Удмуртие 4 арлы огпол бертылыкузы, вераськыны дыр но уг сюры. Таязэ но котьку сямен ик пӧрмиз: одӥг гуртысь мукетаз, куноысь куное, фестивальысь фестивале ворттылоно. Вакчи дыр куспын ваньзэ вуттэм потэ: ӵыжы-выжыосын адскыны, эфиръёсы ветлыны, ӝытъёсы ӝӧк сьӧрын пукыны, ӵужанаен — мамаенымы Татьяна Черноваен — вераськыны…

Дэметэръёслэн Иже вуэмзы эктонъя «Мост» фестивален мытӥськиз, нош йылпумъяськоз Кызьпу арамаысь Виль праздникен. Висказ — Кубыз фестиваль. Таиз ужрад сузьет — аслам кичӧлтонэ, угось Миклош татын дыръя туж потэ вал удмуртъёсыз солэн шудэменыз тодматэме.

Пичи дырысеным Миклош кырсие мон понна — зэмос воргорон, вашкала сямъёсты утись батыр. 1999-тӥ арын, Удмуртие нырысьсэ вуылыкуз, со Ватка сьӧр удмуртъёс доры этнографической экспедицие ветлоно кариськиз. Настяен ӵош шушмо (шошминской: Балтась, Карлыган, Малмыж) удмуртъёс доры вуылӥзы. Тодматскизы кӧня ке улэп кубызчиосын, гожтыса вуттӥзы куараоссэс, шудэмзэс.

Кубыз сярысь Миклош нырысьсэ тодэм 1997-тӥ арын, Венгриысь Печ карын дышетскыкуз. Соку Удмуртиысь кӧня ке егитъёс, пӧлазы Андрей Прокопьев, Света Григорьева но Настя Петрова, одӥг арнялы Печ университетэ вуылӥзы. Андрей Николаевич — али ини тодмо хореограф но дышетӥсь — мадем, сьӧрлось удмуртъёслэн крезьгуран сямзы туж аспӧртэм шуыса: скрипкаез ал вылазы поныса, шудо, со скрипказэс кубыз шуыса нимало.

Егит венгер студентлы та ивор тунсыко потэм. Апаелы но синмаськем, вылды: ӝытъёсы удмуртъёс шулдыр кырӟамзэс адӟытӥллям. Ар ортчыса, Настя Печ университетэ дышетскыны пыриз. Ӝыны ар куспын эшъяськизы, яратон но кылдӥз.

Кубызчиос доры ветлэмез сярысь материалэныз Миклош Удмуртиез та аръёс ӵоже пыр-поч ӧз на тодматы. Соин ик Кубыз фестивальын фото но видео адӟытон радъяно кариськи: 12-тӥ пӧсьтолэзе Ижкарысь «Арт-резиденциын» «Кубызлэн шаераз» фотовыставкаез усьтӥськиз. Выставка тодматӥз шушмо кубызчиосын: Михаил Туваловен, Кузьма Картамышевен, Кузьма Андреевен, Александр Копаровен, Туктагул Туктаровен — ваньзы соос улэпесь ӧвӧл ини.

Миклош, ӵапак соослэсь шудэмзэс адӟыса, шудыны дышем вылэм. Фотовыставкаез усьтон шуак шулдыр концертлы пӧрмиз. Эсьмаса, тапыр поттыса эктӥз культурая но туризмъя министрлэн воштӥсез, балтась музъем вылын вордскем Пётр Данилов но! Кубызлэн гурез лулэз бугыртэ…

'''Сэръяын куноын — дорын кадь'''

Татарстанысь Балтась ёросэ Дэметэръёс 2000-тӥ, 2005-тӥ аръёсы ветлӥзы на. Соку ик ӟеч эшъяськизы Сэръя (Сырья) гуртысь Сапожниковъёсын. Леонид Дмитриевич — «Сырья зоутъёс» ансамбльлэн кивалтӥсез. Туэ балтасьёс бигерысь удмуртъёслэсь Гыронбыдтон праздниксэс ортчытӥзы.

Отчы ми 1-тӥ пӧсьтолэзе вуылӥм. Миклош но дыдыос сцена вылын венгер гуръёсты быдэстӥзы, ачиз кубызэн шудӥз на. Ӝытсэ пумиськимы егитъёслы «БиГерд» форумысь азьветлӥсьёсын: отысен мадьяр кубызчи пумиськиз «аутентичной» удмурт кубызчиен Михаил Романовен.

Михаил Ефимович туннэ нуналлы зэмос кубызчиос пӧлысь огназ кылемын. Пичи дыръяз кубызэз гуртоос пӧлын, сюанъёсын кылылэмез вань, учкыса ик шудыны дышиз. М. Романов трос аръёс ӵоже Казаньын улэ. Озьы пӧрмыса кошке ни: Балтась музъем вылын одӥг но кубызчи кылемын ӧвӧл!

Эк-эк-эк! Кубызлэн шаераз «Кубыз центр» кылдытоно вылэм. Нош кубызэз улӟытон понна сое «модной» кароно ук. Ури-бери малпан вордӥськиз: сырьяосты но Михаил Романовез Ижкаре Кубыз фестивале ӧтёно — концертын кубыз гуръёсты мед улӟытозы, калыклы вашкала шудон сямез мед шараялозы.

Миклош гажаса вера: «Леонид Дмитриевич дорын куноын — дорын кадь ик». Зэм, шушмо удмуртъёс — куаш-куаш удмуртъёс: сюлмысь пумитало, сюдо-сектало. Сямъёссы борды возисько. Кубызэн шудон сямез но 2000-тӥ аръёсозь возьыны быгатӥллям ай. Берпуметӥзэ кубыз зоутъёс сюанъёсын 1970-тӥ аръёсы чузъяськиллям уго. Солэсь азьло сюанъёсты арганэн уг шулдырто вылэм: кубызтэк сюан — со пуны сюан, шуылӥллям шушмоос.

'''Кужым сётэ турын-куар'''

Удмурт сям уг воштӥськы, шуэ Настя апае. Воштӥське улон сям. Ньыль ар куспын Ижкарын улон мукетгес луиз: удмуртъёс городъёсын кыре-буре потаны кутскизы. Ӵемгес но ӵемгес «шара» удмуртъёсты пумиталод урамъёсын, магазинъёсын (куд-ог лавкаосын удмурт кылын гожтэмъёслы кызьы уд паймы?).

Эзотерикъёс чакламъя, водолей вакыт вуэ, лэся: матысь аръёсы адямиос дунне вылын чылкытгес, нодлыкогес улозы, оске апае. Ортчемаз кылёзы вир кисьтон, войнаос: выль адямиос асьсэды будэтонэн — ӟуч сямен вераса, саморазвитиен — выро (иське, кубызэз утьыны но инъет вань!). Настя ӝыны ар ини сӥль уг сиы, мар куспын сыроед луэм? Сое бакчаысьтыз турынъёс эмъяло, «соосты йырйисько, витамин тырме» шуыса, буйгатэ милемыз.

Апае семьяеныз сизьыметӥ арзэ ини улэ Трансильваниысь Биквалфа венгер гуртын, со интыяськемын Шепшисентдьёрдь — Св. Георгийлэн карез — вӧзын. Та городын ик уло Миклошлэн анаез, атаез, апаез. Венгриын 6 ар, Удмуртиын 4 ар улэмзы бере вордскем палъёсаз бертоно кариськизы. Пичи корка, бакча возё. Улонзы огсыр но гань-гань ортче: пӧраськон, пулэсь лэсьтӥськон, киужен вырон.

Уксё потто, ярмаркаосы ветлыса. Миклош но Настя — Румыниысь венгер кибашлыослэн огазеяськонзылэн ёзчиоссы. «Киуж терапия» йырез сайкыт каре: тазалык сярысь амалтэк трос малпаськоно. Веган луэмдэ но уд шӧды. Бен, Миклош но нылъёс сӥль сиё ик — сэкей (трансильван) сям ворме.

Вашкала дырысен сопалан улэмын венгер кунгожез утисьёс, мотор гурезь калык. Удмуртие бертыса, Настя но одӥг-ог сӥль сиёно луэ: кытчы пырод, перепечлы гочано. Нош мугорызлэсь шӧдонъёссэ санэ басьтытэк уг кыльы: йӧл юисько ке, соку ик ныры тыре, картошка сиисько ке, мылкыды урод луэ, шуэ Настя.

Туала удмуртъёс байгес улыны быгато ини: городъёс паськытало, коттеджъёсын посёлокъёс будо. Лымшор Удмуртиын узыргес уло, чакла Настя: уйпалась гуртъёсын уд ӵошаты. Асьме кунын калык вӧл-вӧл улыны дышемын, Румыниын сыӵе сям ӧвӧл. Миклош итӥське (киыныз ик шонтыса, вера): «Татын, Россиын, вань сыӵе сям: ух! — и всё. Ми палан со «ух» ӧвӧл».

'''Вал кадь ик эктӥсь'''

Апаелэн кык нылъёсыз: али соослэн самой чебер вакытсы. Дьёндиен рос-прос, бадӟым адямиен кадь вераськиськыны луэ ини. Тыныд 16 арес, шуисько. Мар сярысь малпаське 16 аресъем нылаш? Туган сярысь, серекъя Дьёнди. Собере нод-нод вера: «Ӧвӧл, конечно. Эктонъёс сярысь малпаськисько.

Эктон — со мынам улонэ». Дыды Кузебай Герд нимо гимназиын «Чебеляй» студие ветлэмын, калык сямъёсты гажан пичи дырысеныз йыраз пыӵам. Туэ 7-тӥ арзэ Сентдьёрдьысь «Саазлабу» ансамбльын мадьяр калык эктонъёсты эктэ. Удмурт эктонъёсты но уг вунэты. Венгрие улыны кошкыкузы, «Чебеляйлэн» кивалтӥсезлэн Наталья Чирковалэн Дьёндиез лэземез уг поты вал. тӥ, пе, кошкиськоды ке кошке, но Дьёндиез мыным кельтэ, шуэм педагог.

Дьёнди малпанъёссэ шарая: «Удмуртие ӧй кыльысал, конечно. Анай-атайтэк кызьы улод? Мон понна семья — со тужгес дуноез. Кинэн ке но кулэ ук керетыны…(серекъя) Эшъёсын уд кереты ведь! Катаен но куддыр керетӥськом, оломар муген но луылэ. Шуом, сиськон пуртме басьтӥз но интыяз ӧз поны, яке кин ке посуда ӧз миськы… Милям семьяямы ваньмылэн вань нимаз дускомы но пуртмы. Ми сэкейёс ук. Куддыр Катаен споръяськиськом, кин ӵужиське, нош кин пылесосэн утялске. Обычно мон ик ӵужиськисько… Катюш «пичи» ук.

Катюшен ӵошатыса, мон чалякгес будӥ кадь, 14 аресам рос-просгес вал, мыным весь сое учконо, чаклано вал, соин, дыр. Али вакытэ туж кельше. Университетэ Коложваре пырыны малпасько, со Трансильваниысь тужгес бадӟымез мадьяр кар.

Венгер этнографиез, эктонъёсты эскереме потэ. Но номыре азьло тодыны уг луы. Кык ар ортчыса, та интервьюез лыдӟо но — оло, мон мукет интые мынэмын луо. 2 ар талэсь азьло ай мынам воксё мукет удысэ мынэме потэ вал. Вал терапиен выро кожай: валъёсты туж яратко.

'''Мон — выж'''

Июнь пумын Ижкарын эктонъя «Мост» проект радъяськиз. Дьёнди удмурт но венгер эктӥсьёсты огазеясь луиз.

— Мон ачим аспӧртэм «выж» вал — кылысь кылэ берыкъяй ук, — шуэ со. — Удмуртиез венгеръёсын герӟай. Эстониысь эктӥсьёсын но! Эстонъёс мае ке англи кылын верало, соосты берыкто венгер кылэ, берло мон удмуртэн верасько. «Саазлабу» ансамблямы монэ азьло но ӟеч тодо вал, нош Удмуртие вуылэммы бере золгес валазы кадь: мон — удмурт, соос кадь венгер гинэ ӧвӧл.

Табере мукет синмын учкозы, малпасько. Дорын анае удмурт шуыса валэкъяны жадисько, тросэз уг тоды, кытын со, мар со Удмуртия. Табере тодозы! Удмуртия венгеръёслы туж кельшиз. Кошкемзы ик уг поты вал, синмаськизы асьме палъёслы. Огез эктӥсь эше алигес «фэйсбукын» озьы ик гожтӥз: «Кыӵе ни, мар улон тужгес но усто странаын?»

Румыниын улыса но, Дьёнди удмуртлыкен герӟаськемзэ зол шӧдэ. Анай-атаез сярысь тазьы шуэ: соос ӟечокъёс, удмурт кыл но культура понна нюръясько. Кубызэз утемзы но — бадӟым уж.

— Паймисько, малпасько ке: кызьы кык адямилы озьы пумиськыны луэ меда? — чабкиське дыды. — Анай-атайлэн историзы кыӵе ке туж романтичной. Нырысьсэ пумиськыкузы, атае анаелэсь электрон адрессэ умойтэм гожтэм. Москва пыр, отысь кыӵе ке дышетӥсен герӟаськыса, кызьы ке но шедьтэм ик. Удмурт кылын кылбур гожтыса, ӵужанайлы вазиськиз, анаелэсь кизэ куриз. Атае юри дышетӥз удмурт кылэз!

'''Удмуртъёс сярысь роман'''

Аспӧртэм семьяын аспӧртэм пиналъёс вордско. Пичиез Ката но туж творческой. Вераськыны сокем ик уг яраты, оло, удмурт кылын зулён шугенгес сётӥське: Катюш тросгес пуш улонэн улэ. Трос лыдӟиське, кылъёсты дышетэ, англи кылын киноос учке. Татысен фин кылъя учебникме шедьтӥз но, ас понназ дышетыны кутскиз! Ар талэсь азьло роман гожъяны кутскем, «Лили» нимаське, пе: одӥг нылаш сярысь. Юасько:

— Удмуртъёс сярысь роман гожтысалыд-а?

— Роман уг пӧрмыты, дыр, но верос гожто, — капчиен вазе Кати.

Удмурт луэмзэ валэктэ тазьы: «Асме удмурт но, мадьяр но шӧдӥсько. Мон кыкез ик. Малпаськисько венгер кылын. Нош татын ке улысал, удмурт кылын малпаськысал, дыр. Мӧзмисько ик удмурт кыллэсь, но семьяын весь вераськиськом.

Озьыен, Катюш кыл сётӥз Удмуртие ветлэмзы сярысь верос (оло роман но?) гожтыны. Мон табере туж витё — дась луиз ке, соку ик удмурт кылэ берыкто. «Удмурт дуннеез» лыдӟисьёс дорозь но мед со вуоз, вылэм. Ӝоген ини апайёсы берен Трансильвание бертозы, нош милям кусыпъёсмы эшшо но кужмоязы кадь.

Нылъёс будэмъя, соосын рос-прос вераськыны, улон сярысь кенешыны луэ. Азьланяз Кубыз фестивалез ӵош лэсьтом, оскисько. Табере мынам командае вань. Удмурт сямъёсты утён — семьяямы нырысетӥ интыын.

'''Источник:'''

[Дарали Лели. Кубыз гур сюанозь вуттӥз / Дарали Лели // Удмурт дунне. - 2018. - 26 июля. - С. 10, 15 : фот. - (Тӧр шорын).].

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]