Долганова Маргарита Николаевна

From Воршуд
Revision as of 11:07, 27 October 2023 by Ladamiri (talk | contribs)
(diff) ← Older revision | Latest revision (diff) | Newer revision → (diff)
Jump to navigationJump to search

Кыл – сыӵе ик математика[edit]

Долганова М.Н.

Пичи Пурга ёросысь Кечол школаысь удмурт кылъя но литературая дышетӥсь Маргарита Николаевна Долганова Россиысь устоосыз дышетӥсьёс пӧлын – туэ со вормисе потӥз «Дышетон» нацпроект чотын радъяськись конкурсын. Шаерысьтымы мукет усто дышетӥсьёсын ӵош сое но сӥлы кариз Удмуртилэн Тӧроез Александр Бречалов.

М. Долганова дышетон удыслы 37 арзэ сётӥз ни. Вормонъёсыз вераса быдтонтэм. Россиысь огъя тодон-валан сётон удысын дано ужась луэ, пусъемын Кун Кенешлэн Данъян грамотаеныз. Солэн удмурт кылъя но литературая методической пособиосъя ужало быдэс элькунысьтымы визьнодасьёс. Дышетэм нылпиосыз улосъёс куспын, Россиын ортчылӥсь конкурсъёсын вормисе потыло.

– Маргарита Николаевна, тӥляд туж бадӟым ужан опытты, трос пӧртэм вормонъёсты. Но «Дышетон» нацпроект чотын радъяськись конкурсэ нырысьсэ малы ке пыриськиды?

– Трос пол вераллязы школаямы но, Пичи Пурга ёрос администрациын но, роноын но, та конкурсэ пыриськыны дыры вуэмын ни шуыса. Но мон малпасько: дышетӥсь ассэ медаз возьматы, сое мед дунъялозы дышетскисьёсызъя. Нимме трос поттылыны уг яратӥськы. Та рад малпаськи ик ини: зэмен но, аслэсьтыд кужымзэ малы конкурсын эскеронтэм? Улос премиен пусъемъёс пӧлы сюро шуыса осконэ вал. Но федерал конкурсын устоосыз пӧлын луо шуыса, воксё ӧй малпа. Конкурсын лыдэ басьтӥськиз берло 3 ар ӵоже ужаме. Мае возьматыны шедьтӥ. Тужгес трос балл сётӥське дышетӥсьлэн методической ужен выремезлы. Мыным та ласянь портфолиое узыр: «Вордскем кыл» журналэн, Дышетон удысысь йӧскалык ужпумъёсты эскеронъя институтэн кусып возисько. Методикая разработкаосы кылъя но, литературая но вань ини. Тросэз соос печатласькемын «Вордскем кыл» журналын. Инновационной площадка но Кечол школаямы вал – КИМ-ёсты (контрольно-измерительной материалъёс) дасян но эскерон дорамы ортчиз. 7-тӥ класслы удмурт литературая КИМ-ёслэн авторзы мон луисько. Дышетӥсь-новатор сямен табере быдэс шаерысьтымы дышетӥсьёс азьын усьтэм урокъёс возьматъясько, монэ ӵемысь ӧтьыло пӧртэм конференциосын, семинаръёсын вераськыны, ужан амалъёсыным тодматыны.

– Мон данъяськыса вераны быгатӥсько: тӥ – мыным но удмурт кылъя но литературая дышетӥсе. Урок нуэмды али но син азям: шонер гожъяськонъя правилоосты, доска вылэ схемаос суредаса, валэктӥськоды вал.

– Али но схемаосын, таблицаосын ужаны яратӥсько. Озьы выль тема пиналъёслэн син азязы умой пуксе кадь потэ, йыразы но капчиенгес кыле. Собере улон интыяз уг сылы. Урокъёсын валатонъёсын картаос кылдытӥськом, туала амалъёсты кутыса ужаськом. Пиналэз малпаськыны дышетоно. Нылпиос ӟучомо бере, берло дыре ас азям ужпум пуктӥ пӧртэм эчешон технологиосты – кейсъёсты, панельёсты, дебатъёсты – ужам кутыны. Уката но бадӟым классъёсын дышетскисьёс таӵе дискуссиосы мылысь-кыдысь пырисько. Урок йылпумъяськыку, «звонок-а мар-а ни?» шуыса юало ке, ужаны мылкыд эшшо но ӝутӥське.

– Дышетэм пиналъёстылэн вормонъёсты ӧжыт ӧвӧл!

– Пиналъёсмылэн ёросын, улосъёс куспын но Россиын ортчылӥсь вожвылъяськонъёсы пыриськыны дӥсьтонзы будэ. Кылсярысь, Максим Киселёв кылбурез вольыт лыдӟонъя улоскуспо конкурсын трос пол вормисе потылӥз ни. Со 2-тӥ классысен ини бадӟымъёсын ӵош сценкаос пуктылэ, ужрадъёслы сценарийёс дася, ачиз ик нуись но луэ. Ӟуч нылаш Алёна Сарафанова удмурт кылын пӧртэм жанрен текстъёсты лыдӟонъя вормисе потылэ. Нош Мария Абрамова Москваын «Билингва» конкурсын «Устоез эссе» номинациын 2 пол вормылӥз ни. Кылбурез вольыт лыдӟонъя, сценкаосты возьматонъя вожвылъяськонъёсын но со котьку сямен устоосыз пӧлын луэ. Шумпотоно, школаез йылпумъям пиналъёсын кусыпъёс уг ышо ке. Озьы 2-тӥ арзэ ни Удмурт кун университетысь филологияя факультетысь лингвистикая кафедраысь ассистентэн Владимир Елышевен Удмурт кыллэн но Анай кыллэн нуналъёссылы сӥзем ужрадъёс ортчытъяськом. Аслад дышетэм пиналъёсыд аслыд но юрттыны быгато ни ке, ужам аръёс юнме ортчымтэ кадь потэ. Дышетэм пиналъёсы пӧлысь тросэз улонзэс удмурт кылэн герӟазы ни. Кӧня соос – юри лыдъяме ӧвӧл. Но али но 4-ез дышетско Удмурт кун университетысь филологияя факультетын.

– Нош тодӥськоды на-а ужаны кутскемдэс?

– Кечол школае мон Удмурт кун университет бере 1986-тӥ арын вуи. Школа ӵыжак выль вал, пумитазы туж умой. Нырысетӥ араз урокъёсам ӵем пукылӥз школалэн директорез Алексей Захарович Мурашов. Котьку шедьтылӥз мар понна ушъяны. Педсоветын но вань дышетӥсьёс азьын ӟеч кылъёссэ вералляз – озьы ужаны мылкыдме ӝутылӥз. Удалтӥз на соин но: Кечолын удмурт кылъя но литературая дышетӥсь, организатор луыса со вакытэ ужаз быдэс элькунамы тодмо луэм дышетӥсь Нина Анатольевна Ермокина. Ужаны кутскеме бере ик со мыным визь-кенешен юрттыны ӧдъяз. Шуиз: пиналъёс трос, шаплыесь – классын дисциплинаез возьыны туртты. Но йырам чик ӧз кыльы, нылпиос куке ӧз кылзӥськылэ шуыса. Мон уката синмаськылӥ Нина Анатольевналэн литературая урокъёсызлы: котькуд темазэ улонысь учыръёсын герӟалляз, данъяськымон адямиосты ӧтчалляз. Собере Нина Анатольевнаен ӵош ёросысь, элькунысь дышетӥсьёс азьын усьтэм урокъёс ортчытъяны кутским. 1998-тӥ «9-тӥ классын удмурт кылъя урокъёс. Дышетӥсьёслы юрттэт» пособимы печатласькиз. Со вакытэ методикая юрттэтъёс ӧжыт вал бере, дышетӥсьёслы со туж иназ луиз. Нош мынам методической ужен вырыны мылкыды уката пуромиз. Табере методической пособиосы ӧжыт ӧвӧл ни. Кылсярысь, «Вордскем кыл» журналысь Андрей Александрович Клементьев но Ирина Фёдоровна Тимирзянова кичӧлтэмен, 6-тӥ но 8-тӥ классъёслы «Ӧтиськом удмурт литературая уроке» но 6-тӥ класслы «Ӧтиськом удмурт кылъя уроке» пособиосты дасянэ пыриськи.

– Туэ ар кунамы Дышетӥсьлэн но нодъясьлэн аренызы ялэмын. Табере тӥ бадӟым опытэн визьнодась, егит дышетӥсьёслы асьсэос визь-кенеш сётыны быгатӥськоды ни. Мар верасалды соослы?

– Туала пиналъёс малпанъёссэс шара верало, янгышъёс лэсьтыны уг кышкало – 5-тӥ классэ ик соос туж дӥсьтӥсесь вуо ни. Жаляса верано, ярато телефонын пукыны, соослы тунсыкогес компьютер. Соин ик, урок кутскыку ик, пиналэз маин ке но паймытыны, малпаськонэ уськытыны быгатоно. Кутсконэз умой пӧрме ке, уроклэсь кызьы ортчемзэ валаса вуттоно ӧвӧл. Урокъёс одӥг кадесь медаз луэ – котькудаз маке выльзэ пыртоно. Валамон, уроклы тыро-пыдо йылпумъянъёс лэсьтыны кулэ на. Мон я весь урокъёслы дасяськисько – малпасько, кызьы тазэ я созэ темаез цыре кыльымонгес кароно. Ӝытбыт компьютер сьӧрын пукылэмъёсме адӟыса, картэ куддыр шуэ но: тон сомында школаын ужаськод ини, кемалась со урокъёсыдлы дасяськемын луыны кулэ ни! Нош наставничество сярысь верано ке, школаямы со котьку вал. Но азьвыл мылкыд куремъя гинэ ужамы. Табере нодъян ужез радъян вылысь школаямы 4 наставник быръемын – соос пӧлын мон но. Озьыен, мытэм уже кинлы ке но пайдаё луоз.

– Маргарита Николаевна, жаляса верано, нылпиос ӟучомо...

– Ми удмурт кылэз анай кылэз сямен ик дышетӥськом ай – «Ӟеч-а, бур-а, удмурт кыл!» учебнике потэммы уг поты. Но школаямы трос ини ӟуч нылпиос. Городысь лыктэмъёс ӧжыт ӧвӧл. Копак удмурт анай-атайёслэн нылпиоссы удмурт сямен уг ке но верасько, валало. Нош таосыз уг но валало. Соин ик темаосты нырысь ӟуч кылын валэктоно луэ, собере удмуртэ выжисько. Азьвыл удмурт кылъя дышетӥсьлэсь урокын ӟуч сямен вераськемзэ кылоно ӧй вал. Но котькуд классын вань 5-6 нылпиос, кудъёсыз удмурт кылэз туж умой тодо – соосын ужамъя ужам потэ. Но мукет ласянь, ӟучомем пиналъёсын вырыса, таосызлы дыр уг тырмы ни. Соин ик соос мыным жаль но пото. Но озьы-а тазьы-а но, тыршиськом, нылпиос анай кылзэс пичиысен ик гажаны-дунъяны мед кутскозы шуыса. Покчи классъёсын дышетскисьёсын кусып возисько. Удмурт кылын дасям ужрадъёсмес покчиос азьын но возьматӥськом: бадӟымъёслэсь адӟем мед карозы.

– Дышетӥсь ӧй луысалды ке, кыӵе удысэ мынысалды?

– Та сярысь копак ӧй малпаськылы, мукет интыысь асме уг адӟиськы. Школаын ке ӧй, оло, методической пособиос кылдытон бордын ужасал на. Но удысэ дышетонэн ик герӟаськемын луысал. Мон пичи дырысеным дышетӥсь луон мылкыдын улӥ. Весь школаен шудӥськом вал, мон – дышетӥсь. Кияса ёросысь Юрмалай школаын дышетски. Вань предметъёс огкадь сётӥськизы. Математикаен дышетӥсьмы математиклы дышетскыны туж косэ вал. Та предмет мыным кельшылӥз. Сямыя со матынгес, дыр, – трос уг вераськиськы. Урокъёсам но мон туж кулэзэ гинэ вераны тыршисько – туала пиналъёслы ӵапак со ик кулэ кадь потэ. Ужаны кутскеме бере ик, роноын шуизы: тон – кылъя дышетӥсь. Уг ваты: литературая урокъёс нырысь секытэнгес сётӥсько вал. Но Нина Анатольевна Ермокиналэн 2-3 уроказ пукеме бере ик ваньмыз радъяськиз. Табере усьтэм урок но сётоно ке, бырйисько литератураез: та предмет пиналъёслы тунсыкогес потэ, отын пӧртэм сямен малпаськыны луэ.

– Но математик ӧд луэ. Малы удмурт кылэз но литератураез бырйиды?

– Мон нырысь ик документъёсме Удмурт кун университетысь филологияя факультетысь ӟуч отделение сётӥ. Но подготовительной курсъёсы кӧня ке нунал ветлэме бере, романо-германской факультетэ выжоно кариськи. Документъёсме таяз сётӥ. Поръясько университет кузя. Пумитай школаысьтымы ик арлы мынэсьтым вазьгес дышетскем нылъёсты – удмурт филологияя факультетэ, пе, пырыны малпаськом. Мон пайми: ма, удмурт кылэз 5-тӥ классозь гинэ дышетӥм но, кызьы отчы пыроды? Школамы ӟуч вал, удмурт кылъя но литературая урокъёс покчи классъёсын гинэ нуиськизы. Нылъёс шуо: пыром – туж потэ удмуртовед луэммы. Монэ но лӧпкытъязы! Мон 3-тӥзэ документъёсме выль интые сётӥ. Пинал визь: кытчы эшъёс, мон но отчы ик. Соку школаын профориентацилы ӧжытгес саклык висъяське вал – кин луэммы потэ, ӧм валаллялэ. Экзаменын мыным удалтӥз – Михаил Петровлэн «Вуж Мултан» романэзъя юан сюриз. Нош мон сое ӟуч литературая урокын ӟуч кылын лыдӟи вал. Конешно, университетын дышетскыкум ини, удмурт произведениосты трос лыдӟоно луиз. Удмуртэз бырйи шуыса, ноку жаляме ӧвӧл. Немец, ӟуч кылъёсты филологияя факультетын но дышетӥм. Вузэз йылпумъякум, немец кылъя дышетӥсьмы шуиз вал: Рита, Можга ёросын немец кылъя дышетӥсь кулэ – тынад умой пӧрмоз, мон деканатэ пырыса верало... Мон соглаш ӧй кариськы. Мынэме ӧз поты Пичи Пурга ёросысь ик Уча (Ильинск) школае но – направление отчы сётӥзы вал. Угось университетын дышетскыкум ик, бызи, пиналмы вордскемын вал ини. Картэ – Кечол бордысь ик Бӧдья-Пуро гуртысь. Озьы сопалагес ик улыны интыяськеммы потӥз. Табере 2 пиосмы быдэ вуэмын ни, огез вуз каронын, мукетыз югдурез утён удысын тыршо. 2 нунокъёсмы будо, кыксы но – пиос.

– Асьтэос бадӟым семьяын будэмын шуыса тодӥсько.

– Быдэ вуи Куӵос гуртын. Сыропятовъёс вал ми – фамилие аспӧртэм кылӥське ке но, мыным туж кельшылӥз. Атаймылэн атаез ӟуч вылэм, выжыезъя – Сарапул ёросысь Сыропятово черкогуртысь. Атаймы, Николай Александрович, быдэс улонзэ комбайнёр, механизатор луыса тыршиз. Анаймы, Вера Васильевна, парсь сюдӥз, ӟеч ужамез понна Ужысь Слава орденэн пусъемын. Со бадӟым семьяысь вал, сузэр-вынъёсыз ваньзы дышетскиллям, пӧлазы, кылсярысь, «Кенеш» журналлэн азьвыл редакторез Пётр Куликов. Но анае дышетскытэк кылем: бадӟымез вал ке, пичиоссэ дышетоно, шуиллям. Анай-атаймылэн ми 6 пиналъёссы будӥм: 5 ныл но 1 пи. Мон – 3-тӥез. Ваньмылы сямен вылӥ образование сётыны тыршизы. Пӧламы пӧртэм удысъёсты быръемъёс вань. Но дышетӥсь луи мон гинэ. Тросгес – бухгалтеръёсмы.

Улон ӝог ортче. Но котькуд нунал маке но выльзэ, тунсыкозэ вае кадь. Инмар мар сётэм, тау шуыны кулэ. Ужме яратыса ужасько, яратоно адямиосы бордам, юртъер котырам шулдыр мед луоз кадь потэ – азбарам, бакчаям трос сяськаос будэтӥсько. Ваньмон дыры кылдэ – я «Вордскем кыл» журналэ гожъяськыны пуксисько, я эшшо кытчы ке. Тодэм-валаме кинлы ке кулэ ке, кинлы ке пайда вайыны быгатӥсько ке – шумпотӥсько.

Источник:

Долганова, Маргарита Николаевна / Маргарита Долганова; [вераськиз ] Элина Кумачёва. Кыл – сыӵе ик математика // Удмурт дунне. – 2023. – 5-тӥ коньывуон. – 10-тӥ, 23-тӥ б. – (Тӧр шорын).

За предоставление материала выражаем огромную благодарность редакции газеты "Удмурт дунне"