Гусев Леонид Федотович

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Куаралы усьтон шедьтӥсь

Гусев Л. Ф.

Котькуд кылзӥсьлэн куараез аслаз. Радио - «паймымон шыкыс». Со шыкыслэн куинь усьтонъёсыз: вераськем куара, крезьгур, асьме котырысь уно сюрс мукет куараос. Та куараослэн, радиоусьтонъёслэн одӥгез кузёзы луэ режиссёр.

Л. Гусев, «Паймымон шыкыс» радиоверанысь.

Леонид Федотович Гусев вордскиз 1951-тӥ арын Алнаш ёросысь Азамат гуртын. Быдтӥз Алнашысь шор ёзо школаез но Москваысь Щукин нимо театръя вылӥ училищеез. 1975-тӥ арысен ужа Удмурт радиоын. Нырысь берыктӥсь но корреспондент вал, 1978-тӥ арысен - режиссёр, куарая режиссёр. Леонид Федотович - Удмурт Элькунысь культурая удысысь дано ужась, Удмурт Элькунысь кун премилэн лауреатэз.

- Леонид Федотович, кӧня мон тодӥсько, Удмурт радиоын ужам режиссёръёс Борис Саушкин, Михаил Покчи-Петров, Геннадий Лебедев, Анатолий Митрофанов, тон но - ваньды театрен герӟаськемын. Маин сое валэктыны луэ?

- Радио но театр кылдэмзы дырысен одӥг сюресэтӥ мыно. Радио - со куара, дикторлэн-а, вераськись муртлэн-а, артистлэн-а. Со артистъёслэсь ужзэс паськытатэ. Спектакль дыръя ог 200-300 мурт адӟе ке, радио пыр артистлэсь лыдӟемзэ, шудэмзэ туж тросэз кылзо. Ассэ адӟытэк но, кин луэмзэ куараезъя тодмало. Сыӵе артистъёсмы азьло но вал, али но вань: Нина Бакишева, Иван Кудрявцев, Василий Перевощиков, Кузьма Ложкин… Радиое гожтӥськон - артист понна сыӵе ик шумпотон.

Радио монэ пичиысен бордаз кыскылӥз. Телевизоръёс соку туж ичи вал ай. Туж тодам на: радио пыр ӵем сётъяллязы «Над полями зорька светлая» кырӟанэз. Мар верамзэс валатэк но туж яратӥсько вал пичи дыръям сое кылзыны. Али но крезьгуръя фонотекае мынӥсько но, со кырӟанэн плёнкаез кылзыны басьтӥсько - выльысь пичи дыръям вуисько кадь. Быдэгес вуэмъям, Алнашын улыкумы ини, радио мынам зэмос эше луиз. Тодманы кутски отысь дикторъёсты но. Мӧйыос шуо вал: тани Борис Саушкин вераське, со Котныр починка пи. Али кадь ик пель сьӧрам Гай Сабитовлэн куараез: «Иворъёсты лыдӟизы Милитина Гаврилова но Пимен Касаткин». Туж кельшо вал «Алые паруса», «Югдон» программаос, бӧрысьгес - «Арня ӵукна». Ноку ӧй малпалля, со дано адямиосын мыным но тодматскыны кылдоз, соосын артэ ужаны шуд усёз шуыса.

- Артистэ дышетскид, нош вуид радиое?

- Москваысь Щукин нимо театръя училищеез йылпумъяса, мыным одӥг ар театрын ужаны луонлык сётӥзы но армие басьтӥзы. Бертэме бере пыды малы ке отчы ӧз ни кыскы. Уждунэз но пичи вал. Оло нош асме театрын шедьтымтэен но со герӟаськемын. Училищеын но асме ӧй усьты, лэся. Кышканэ туж бадӟым вал, сое вормыны ӧй быгаты. Тае шӧдыса ик, дыр, пичиесь рольёс сётылӥзы. «Машенькаын» пияшез шудӥ. «Пӧртмаськись песьтэр» спектакльын гинэ роле сюлэмыя вал, котькинлэсь кышкась Опоч пересез шудӥ. Пуктӥсь режиссёрен Василий Перевощиковен ми одӥг ролез шудӥмы соку. Спектакль мынӥз «Ижмаш» культура дворецын. Шудыны кутскеммылэсь азьло кин ке шуиз: «Милитина Гаврилова лыктэм, пе, со рецензиос гожъя, умой шудэ».

«Дуэнья», «Бедность не порок», «Мынам яратонэ татын» спектакльёсын массовкаосы потай на. «Гондыр куш» спектаклен администратор луыса ветлӥ ни Красногорск, Яр, Балезино, Глазов ёросъёстӥ. Отын шудо вал Нина Бакишева, Иван Кудрявцев, Василий Перевощиков, Ф. Булдакова, В. Галеев но мукетъёсыз. Соку тӥни артистъёслэн улонысьтызы мукет палзэ но адӟи. Ветлоно луиз колхоз кивалтӥсьёс дортӥ, профкомъёстӥ, культурая отделъёстӥ. Аренда, билет вузан, учкисьёсты шедьтон… Ой, трос вал сюлмаськонэз. Культурая министр Аркадий Фёдорович Завойских мыным дэмла вал Дэбес ёрос администрациысь культурая отделэн кивалтыны. Ӧй дӥсьты. Озьы аслым ачим «палдэм шелеп» кадь потыны кутски.

Москваын дышетскыкум, сцена вылын вераськыны дышетӥсь педагогмы шуиз вал: тыныд, пе, ужаны кулэ вераськон удысын - кылэз шӧдонлыкед вань, валаськод, кытчы ударение пуктоно, кудӥз предложение валтӥсь, нош кудӥз солы юрттӥсь. Тынэсьтыд ӟеч дышетӥсь пӧрмысал, пе. Гастрольёсысь бертӥ но пыри Герман Ходырев доры, соку со ужа вал «Дась лу!» газетын. «Уд-а шедьтэ, - шуисько, - мыным кельшымон уж?» Удмурт радиое, пе, берыктӥсь кулэ вал, али ик жингырто Леонид Петрович Емельяновлы. Тӥни со дырысен радиоын ужасько. 30 арлэсь ятырзэ улонме соин герӟаса, асме мукет удысын уг ик адӟиськы ни.

- Театрысь режиссёрлэн но радиоысь режиссёрлэн ужъёссы пӧртэм-а?

- Воксё пӧртэм. Театрысь режиссёр адӟыны кулэ быдэс спектаклез: суредасен ӵош декорациос бордын, костюмъёс бордын ужано, артистъёслэсь выросъёссэс, шудэмзэс чаклано. Нош радиоысь режиссёр - куараен шудӥсь адями. Со пыр кылзӥсь доры вуттоно геройлэсь мылкыдзэ, редакторлэсь малпанъёссэ, сюлмаськонзэ. Шуом, пичи гинэ юмореска одӥг но ӝыны минут ӵоже чузъяське. Отын гинэ но верамлы - интонацилы - усьтон шедьтоно. Сотэк уг луы. Рашит Хайдаров серекъяса шуэ: ма со радиоды - позыртӥд но кысӥз. Озьы медам луы шуыса, трос тыршоно. «Арня ӵукна» радиожурналэз ик басьтом. Сое ас вакытаз кылзӥсьёс туж ярато вал, 45 минут мынылӥз. Редактор передачаез гожтэ, дася но режиссёрлы сётэ. Отын кырӟанэз но мед луоз, веранэз крезьгуръёс но мед чеберматозы. Одӥг суредэз мукетэныз тып-тып герӟано. Зэмзэ но, радиоез кысыны кема ӧвӧл. Милям ужмы - мед кылзозы сое.

- Режиссёре пуктэмзы берегес ик бадӟым уж борды кутсконо луиз. Кышкан сямыд татын ӧз-а вормы?

- Аслым вормоно луиз кышканэз. Собере берыктӥсьын но корреспондентын ужакум, мон весь чакласа улӥ Борис Саушкинлэсь но Анатолий Митрофановлэсь ужамзэс. Мар соос каро, кызьы ужало артистъёсын, кызьы крезьгур быръё. Соос туж быгатыса ужазы, режиссёр азе пуктэм куронъёсты ӟеч тодылӥзы. Нош та ужлы нимысьтыз нокин но уг дышеты, трос тыршоно луэ аслыд.

Монэ Москваысь курсъёсы ысъязы, тодон-валанэз будэтонъя институтэ. Куинь толэзь ӵоже туж трос тодӥ. Визьнодо верамъёсты пеле понэм сяна, ог-огеныд кенешыса но троссэ басьтыны луэ. Одӥгез эшмы Белоруссиысь вал, шуэ: ми стереоспектакльёс, пе, гожъяськом. Нош милям сыӵе аппаратурамы но ӧй вал ай. Туж вожъяськи солы соку.

- 70-тӥ-80-тӥ аръёсы трос гинэ радиоспектакльёс лэсьтӥськом вал, театръёсын мынӥсь спектакльёсты но гожъяллямы. Со вакытысь мар тужгес но сюлэмад кылиз?

- Режиссёре выжон вакытамгес калык писатель Генрих Перевощиков, радиоын азьло ужам мурт, «Тулкымлы пумит» трилогизэ йылпумъяз. Романъёсызлэсь люкетъёссэ радиопьеса карыса, литературая но драмая редакцие вайиз. Куинь бадӟым люкетлэсь вал со. Нырысь ик лыдӟи сценариез, собере - книгаоссэ. Валаны тырши, мар вераны турттэ автор книгаосаз, кыӵе отын шорсюлэмыз, малы тужгес бадӟым саклык висъяно. Малпаськи, Удмурт театрысь кудъёсыз артистъёс тупалозы созэ яке тазэ ролез шудыны. Крезьгуръёс бырйыны уно гинэ дыр быриз. Кышканэ но вал: пӧрмоз-а, уз-а? Кема гинэ выри та уж бордын. Туж сюлмаськи, яралоз-а кивалтӥсьёслы, лэзёз-а эфире сётыны художественной совет. Я, ваньмыз умой ортчиз.

Нош али выльысь кылзӥсько ке со нырысетӥ ужме, валасько: «Уно гинэ янгышаськем, куд-ог диалогъёс лыдӟем кадьгес кошко. Эх, малпасько, али мон сое мукет сяменгес лэсьтысал! Нырысетӥ уж - со нырысетӥ уж.

Генрих Перевощиковлэсь ик «Йӧвалегзэ» гожтыку, шуг-секытъёс кылдӥзы валтӥсь героиняен - Ринаез шудӥсь Фаина Будинаен. Со сыӵе пумитъяськиз шудоно муртэзлэн улон сямъёсызлы: мон, пе, сыӵе адями ӧвӧл. Автореныз кенешемез бере гинэ валаз, мае шудоно: Ринаез туж зол пӧрмиз.

Сюлмам кылизы на «Ӵыжы-выжыослэсь но дуногес» но «Дора» радиоспектакльёс. Нырысетӥез Роман Валишинлэн «Тӧл гурезь» повестезъя дасямын вал, инсценировать тӥ ик кариды. Та материалэн аслам кадь потыса ужай. Артистъёслы но со туж яраз. Алигес мон сое выльысь кылзӥ. Кыӵе зол шудо Валентина Загуляева, Сергей Марков, Геннадий Соловьёв, Галина Владыкина, Василий Перевощиков!

- Пётр Поздеевлэн «Дора» повестезъя но зол гинэ ужано луиз. Автор отын нылкышнолэсь туссэ дышем сямъёслы пумитгес возьматэм. Дора картлы бызьылытэк вить нылпи вае. Артистъёс быгатӥзы со кышномуртэз туж чылкытэн возьматыны.

- Татын Валентина Загуляева усто шудӥз, собере быдэс спектакль пыр ортчиз «Пиё, пиё коркае» кырӟан. Со выллем кырӟан вылын ик лэсьтэмын вал Леонид Емельяновлэн Степан Барышниковлы сӥзем повестезъя спектакль. Отын чузъяськиз «Ой, машина, машина» калык кырӟан, сое Удмурт кун университетысь «Чипчирган» ансамбль кырӟа вал. Сценариез лыдӟыку ик, со кырӟан пель сьӧрам кылӥськиз. Со кырӟан мыным туж мур пуштросъем потӥз. Радиоысь хорен кивалтӥсьмылы Анатолий Щербаковлы нырысь «Чипчирганлэсь» кырӟамзэ кылзытӥ, сэре Удмурт радиоез кылдытӥсьёс пӧлысь одӥгезлэсь А. П. Прохоровалэсь кырӟамзэ. Щербаковлы со яраз но хорен кырӟаны дасяз. Выль сямен чузъяськыса, та кырӟан спектакльлэн ӧраз пыриз, нош бӧрысь - хорлэн репертуараз.

Татын эшшо одӥг сюлмаськонэ вал на. Барышниковез шудыны ӧти кема гинэ ӟучъёс пӧлын ужам но улэм артистэз Александр Блиновез. Киноосын шудэм мурт туж тыршыса, мынэсьтым кылзӥськыса ужаз. Кыкмылэн ик мылкыдмы туж ӟеч вал, ужмес быдэстыку.

- Асьмеос тросгес вераськиськомы радиоспектальёс сярысь. Соиз валамон. Соос бордын трос ужано луиз, соос кылизы фондэ. Соосты туннэ но луэ кылзыны. Вал ук мукет но ужъёс.

- Пичиесьгес радиоверанъёсын но трос ужано луэ. «Дунне кизилиосты» Владимир Михайлов но Виктор Шибанов дасяллязы. Кыӵе гинэ авторъёс сярысь верамтэ вал отын, вашкалаоссэ басьтыса, туннэ нуналозь. Быдэс дуннеысь литература чузъяськиз кадь. Со бордын - диалогъёс, лыдӟонъёс, крезьгур. Мукетыз радиоверан, редакторез Раиса Куликова, удмурт калыклэн историезлы сӥземын вал. Нылпиос понна чузъяське «Чагыр, чагыр дыдыке» передача. Сюосын выжыкылъёс лыдӟемын мунё театрысь артистъёсын Алевтина Степановаен но Александр Перевозчиковен, соос асьсэос ик радиогеройёс луизы. Таосызлы но юрттоно луиз удмурт кыллэсь нюжаоссэ шӧдытон ласянь. Со понна режиссёрлы пуш ласянь туж ӟеч тодыны кулэ удмурт но ӟуч кылъёсты.

- Трос радиоверанъёс сярысь вераны луоз, но соос туннэ тросэз уг чузъясько, мӧзмыса кыллё фондын. Кызьы малпаськод, литературалы, культуралы, искусстволы сӥзем нимысьтыз радиоверанъёс куке но выльысь чузъяськозы на-а? Туэ Удмурт радио нырысьсэ вераськыны кутскем дырысен 75 ар тырмиз. Со понна шумпотоно, соин валче ӝож мылкыдъёс но кылдо.

- Малпасько, адямиос валалозы: огшоры ивортонъёс коже гинэ улыны уг луы. Мынам вань сайкыт малпанэ но осконэ: ваньмыз интыяз пуксёз. Тани али «Удмуртия» кун телерадиокомпаниын аппаратураез выльдонъя ужъёс мыно. Отын спктакльёсты но, оркестрлэсь шудэмзэс но гожтыны луоз. Оскисько, художественной программаос берытскозы эфире. Адямилы кулэ мур пуштросъем, сюлэмез позыртӥсь, улонэз валаны дышетӥсь, дуннелэсь толлозэ но туннэзэ возьматӥсь, вуоноезлы оскон кылдытӥсь радиоверанъёс. Оскытэк улыны уг луы.

- Кылзӥсько тонэ но йырам юан берга: кызьы тон таӵе улон сюрес бырйид? Алнаш школаын дышетскем егит пилэн син азяз ку воректӥз театр?

- Мон историк луыны малпасько вал. Туж зол яратӥ краеведениез. Асьме книгапотоннилэсь, оло, вань ужзэ лыдӟылӥ, книгаос басьясько вал. «Алнаш колхозник» газет ортчытӥз «Тодӥськод-а тон ас ёростэ?» конкурс. Тямыс юан вал отын. Мон ваньмызлы шонер валэктон сётӥ. Со понна фотоаппарат кузьмазы. Историен тунсыкъяськонэ али но бырымтэ. Но мар карод, улон сыӵе картазэ куштӥз. Нош театре сюрес мамае возьматӥз, дыр. Со фольклорез туж ӟеч тодэ вал. Кыл йылаз уно лэчыт веранъёс возиськизы, пӧртэм сямъёсты, йылолъёсты тодылӥз. Шуоз вал: ӧс куспы пуксьыса, пыддэ эн кутча, сюрес уз лу; ошмесысь вуэз юид ке, котьку турын-куар куштыса кельты; ошмес ву юид ке, эн пукы, мын азьлань, ато висьыны усёд. Оломае но тодэ вал, песяез дышетэм, лэся.

Сэре мынам вал на бадӟым мамае - мамаелэн кенакез. Со туж трос выжыкылъёсты тодылӥз. Кӧлыны выдӥськом но, со кутске ини мадьыны. Ачиз бадӟым мамае лыдӟыны но, гожъяны но уг быгаты вал. Ваньмыз со калыклэсь визьбурзэ пыӵатон кадь луиз мыным. Бӧрысьгес, Алнаше улыны выжеммы бере, театрез но адӟи. Гужемлы быдэ вуылӥзы Удмурт театр но «Италмас» ансамбль. Ми, пиналъёс, отын ни. Соку ик мон адӟи «Жингрес сӥзьыл» спектаклез, Валентина Загуляеваез, Егор Загребинэз, Василий Гавриловез. Соос нырысь Алнашын шудо, собере гуртэ мыно. Мон велосипедэ пуксисько но - со гуртэ, 9-10 километр кеме. Озьы «Жингрес сӥзьыл» спектаклез 4-5 пол учки.

- Огнад? Кӧшкемыт но ӧвӧл?

- Огнам. Соос нуназе шудо ук гуртын. Гырон быдтон мар луэ ке, нош соосты ӧтё.

Школаын дышетскыкум, «Васса Железнова», «Пиштэ ке но, уг шунты», «Лымы тӧдьы» спектакльёсты учки. Декорациосты но уг адӟиськы, артистъёс шоры гинэ учкисько. Кыӵе чебересь, мусоесь пото вал Нина Бакишева, Полина Ухова, Геннадий Соловьёв. Огшоры, начаргес улонам со шумпотон но ӟеч мылкыд вайылӥз.

- Секытгес вал-а пинал дырыд?

- Оло, ортчыт секыт но ӧй вал, но котьмаиз тырмылӥз. Мамае монэ туж яратыса будэтӥз. Школаысь техничкалэн уждунэз пичи вал. Киное мынон понна пенициллин ӟенелик люкаськом вал, витьсэ шедьтӥськом ке, аптекае нуиськом. Солы 5 коньы басьтыса, киное пыриськом.

Мамалы ужаны юрттылӥ, Алнаш школаысь котькуд выжзэ-пулзэ тодӥсько кадь. Нош кӧня кын пуэз пильылӥськиз, кӧня гур эстэмын, кӧня пу пыртоно луиз! Пичи дӧдьые тыриськод, керттылӥськод нор гыж гинэ кыкетӥ этаже тубиськод. Ӧй кышкалля ужлэсь. Отын ик дышетскисько, отын ик мамалы юрттӥсько. Нош дышетскыны туж яра вал. Озьы ик яратылӥ Алнаш усточиослэсь концертъёссэс.

- Алнашъёс солы мастёресь али но.

- Художественной самодеятельность Алнашын котьку вылӥын вал. 1964-тӥ арын Всесоюзной конкурсын «Алнашысь сюан» уженызы вормисе потӥзы. Ветлӥзы Свердловске но Москвае. Плёнка вылэ гожтӥллям. Кино азьын, журнал интые, весь сое возьматъязы. Кыӵе бадӟым данъяськон вал со: ӵош улӥсь адямиосты плёнка вылысь адӟиськод!

Писательёс ӵем вуылӥзы. Асьсэ сярысь, книгазы сярысь мадьылӥзы. Али ке но син азям: сцена вылын пуко Геннадий Красильников, Николай Васильев, Пётр Кубашев, Семён Шихарев. Дышетӥсьёс но, соос пӧлын Л. И. Посадова, А. Г. Новикова, Е. В. Ишматова амалтэк пыӵатӥзы ас шаердэ, калыктэ яратон мылкыд. Милемлы весь шуылӥзы: тӥлесьтыд азьло дышетскисьёс Яков Майков но Пётр Чернов школаез зарни медальёсын быдтӥзы, Москваын дышетско. Тӥ соослэсь пӧртэм ӧвӧл, тӥ но дышетскыны пыроды, эн гинэ кышкалэ. Соин но, лэся, школа бере тросэз кышкатэк мынылӥзы Казаньысь авиацияя институтэ, Свердловске политехнической институтэ, Москвае.

Вячеслав Байков Москваысь театръя институтэ пыриз но, ми Владимир Алашеевен малпаськыны кутскимы дышетсконмес азинтон сярысь. Удмурт кылэз умойгес тодон понна мон «Алнаш колхозник» газетэ ужаны пыри корректоре. Одӥг толэзь ужаса, син шорам ялон йӧтӥз: артистэ дышетскыны набор мынэ. Со вакытэ Вячеслав Байков но гужемлы бертэм, мылкыдмес лӧпкытӥз.

Озьы ми Алашеевен мынӥмы Иже Удмурт театре. Отын эскерон ортче. Калыкез туж трос. Быръё Пётр Кубашев, Аркадий Завойских, Геннадий Веретенников. Быръемъёсыз но вань ни: куинь ныл но кык пи. Нырысетӥ кык турез мон ортчи, куинетӥяз - ӵогӟи. Володяен ӵош ик документъёсмес басьтӥмы но Удмурт пединститутэ удмурт люкетаз сётӥмы. Экзаменъёс кутскизы гинэ, Щукинской училищее выль набор ялӥзы.

Москвае милемды куать муртэ келязы: Ольга Чужановаез, С. Шиляеваез, Фаина Будинаез, Валерий Кожевниковез, Виталий Ворончихинэз но монэ. Училищеын одӥг арзэ 2 курс понна дышетскимы. Милемды удмурт студилэн пичи группаез шуизы. Ми понна нимысьтыз урокъёс пуктыло вал, педагогъёс доры асьмеос ветлылӥмы. Секытгес ик вал, но ма карод. Керпотон но зӥбылӥз, дышетсконниямы борддор кузягес ветлӥмы. «Они от чернозёма, от земли пришли», - шуылӥзы ми сярысь. 5-тӥ курсэз быдтыса, Вахтангов нимо театрлэн сцена вылаз «Машенькаез» шудӥмы. Соку милемлы тодамы вайытӥзы: тодӥськоды-а, пе, кыӵеесь тӥ вал, кызьы борддор борды шымырскылӥды.

Педагогъёс яратыса ужазы милемын, бурдъяны быгатӥзы, дӥсьтонлык пыӵатӥзы. Москваын дышетскон туж трос сётэ. Кӧня театръёсы ветлӥмы. «А зори здесь тихие» спектаклез Таганкаысь театрлэн балконаз пал пыд йылам сылыса учки. Сыӵе яраз артистъёслэн шудэмзы! Ми дышетскимы Константин Райкин, Юрий Богатырёв, Наталья Гундарева, Наталья Варлей, Леонид Трушкин дышетскон вакытэ. Соослы мукет сюрес усьтӥськиз. Милям но эшъёсмы Москве кыльысалзы ке, вылӥе ӝутскысалзы кадь потэ. Асьме дорын куд-ог артистъёс быгатонлыкъёссэс усьтыны ӧз быгатэ, драматургия но режиссура лябен.

- Театрен люкиськемед аслыд жаль уг поты-а?

- Мон соин ноку ӧй люкиськылы. Спектакльёсты синхронно берыктыны театре кема гинэ ветлӥ. Ӟуч киноосты дублировать каронын но артистъёсын ӵош вал. Ньыль арзэ Ижысь гурт хозяйствоя институтын драмкружок нуи. Отысь пиналъёсын туж капчи вал ужаны, «Выж вылын», «Сюан» спектакльёсты пуктӥмы.

- Гожъяськон сямыд но вань кадь.

- Ваньмон дыръёсам но курыкузы мар но со пӧралляй. Азьло литературая редакциын трос радиоверанъёс мыно вал. Редактор ваньзэ уг вуы. Мон но юрттӥськылӥ. Газетэ но радиое артистъёслэсь творческой портретъёссэс лэсьтылӥ. Соос пӧлын: Васса Виноградова, Александр Перевозчиков, Пётр Романов, Валентина Загуляева, Раиса Нефёдова, Галина Владыкина. Спектакльёслы рецензиос гожъяй. Россиысь журналистъёслэн союзазы кутэмын.

- Семьяед но пичи ӧвӧл.

- Озьы. Куинь нылпие, куинь нунокъёсы. Песянаймы бордамы улэ на. Наташа нылы Удмурт кун университет бере Национальной библиотекаын ужа, картэныз кык нылпизэс будэто. Роман пие мынам пытьыетӥм мынэ, «Моя Удмуртия» телерадиокомпаниын ужа. Аслаз семьяез луоз ни.

- Туэ Удмурт радиолы 75 ар тырмонлы сӥзем ужрадын троссэ радиожурналистъёсты пусйизы Россиын ортчем конкурсъёсын вормисе потэменызы, пӧртэм дипломъёс сётъязы. Отын режиссёрлэн но ужез адӟиське.

- Озьы. Владимир Михайловен ӵош мон куинь пол ветлӥ Тюмене «Сибирь трактлы» сӥзем конкурсэ, отын ми басьтӥмы 1-тӥ, 2-тӥ интыос, данъян премия. Виктор Макшаковен «Деревенька моя» циклысь радиоверанъёс понна нош ик басьтӥмы 1-тӥ инты. Тӥледын но Виктор Ивашкинэн ӵош озьы ик ветлӥмы Москвае радиоспектакльёслы сӥзем конкурсэ. Нуллӥмы Виктор Ивашкинлэн пьесаезъя «Курисько кельтыны» ужмес. Отысь но дипломен бертӥмы. Шумпотымон: Москваын трос журналистъёс но режиссёръёс азьын бадӟым зал тыр чеберлыко удмурт кыл чузъяськиз. Оскисько, со азьланьын но чузъяськоз. Мон понна радио - со паймымон но пыраклы бордаз кыскись шыкыс.

Источник:

Гусев Л. Ф. Куаралы усьтон шедьтӥсь / Л. Ф. Гусев ; записала М. Гаврилова // Удмурт дунне. - 2007. - 14 дек. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"