Григорьев Павел

Материал из Воршуда
Версия от 14:42, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Яратонтэк улон ӧвӧл[править]

П. Григорьев

Павел Григорьев шаерамы тодмо журналист вал. Мыло-кыдо пыриськылӥз егитъёслэн «Шунды» огазеяськоназы, «Удмурт кенешлэн» ужаз. Нош собере шӧдтэк шорысь кошкиз черке. Туннэ нуналлы отец Павел Ижысь Свято-Михайловской черкысь священник, иерей. Ачиз сярысь востэмак шуэ: мон – огшоры удмурт воргорон – киросэ сыӵе.

- Котькудӥзлэн аслаз Инмарез, сое шӧдонэз. Инмар доры сюресэз но котькинлэн аслаз. Огъёсызлы со – уно курадӟон пыр потон, мукетъёсызлы – доре бертон сюрес. Тӥляд со кыӵе?

- Туж пичи дырме тодэ вайыкузы, пересьёс шуо: пыдесъяськыса ик, пе, весь вӧсяськиськод вал. Песянай, пе, куаретэ: дугды ни, ойдо отчы но отчы, бере кылиськом. Нош мон, пе, вӧсяськон вискам шуисько: эшшо возьмалэ на… Зэм, ачим сыӵезэ уг ни тодӥськы.

Совето вакытъёсы вордӥськи ке но, семьяямы Евангелимы вал. Сое ватыса возимы. Вашкала черк кылын гожтэмын вал бере, мон сое ваньзэ ӧй валалля.

Огпол, ужакум ини, вуылӥ Тула областе. Отын пӧртэм тунсыко интыосты возьматӥзы, Поленов суредасьлэн музеяз пыртазы. Али но син азям на солэн «Иисус Христос и грешница» суредэз. Со Евангелиысь одӥг учырез возьматэ. Иисус доры вайизы егит кышномуртэ но юало: та нылкышно сьӧлыкаса кутэмын, тон мар-о сое карыны косысалыд? Иудейёслэн законъёссыя сьӧлыкам кышномуртэ, изъёсын лэзьяса, виёно вал. Но Иисус шуиз: мед лэзёз изэн со, кин ачиз сьӧлыктэм…

Мыным та учыр туж тунсыко потӥз. Кема малпаськи: нош мон мар верасал, кызьы кыл кутытоно шуысал? Воксё сьӧлыктэм муртъёс вань шат? Йырме тӥяй, тӥяй но одӥг малпанэ вуи: Библиын кадь ӟеч гожтыны уг луы ни. Соку мынам эшшо золгес тодэме потӥз Евангелиез. Выль сӥзёнэз лыдӟыса, мон вань юанъёсылы валэктон шедьтӥ. Со ик монэ Инмар доры вуттӥз. Библилэсь визьмо номыр но ӧвӧл. Котькыӵе чеберлыко литератураез мед лыдӟом, та малпанэ юнма гинэ. Бадӟым писательёс, творчество удысысь тужгес яркыт адямиос – ваньзы оскисесь вал.

- Черкын ужаны кутскемдылэсь азьло тӥ асьтэды пӧртэм удысъёсын эскериды. Дышетскемдыя гинэ но чаклано ке: крезьгурчи, филолог, экономист…

- Нырысь потэ вал суредась луэме. УдГУ-ысь худграфе пырыны выри. Но черчениен «кык» басьтӥ. Малы ке школаямы та предметэз тыро-пыдо ӧз нуэ. Йыры курен чертёжнике дышетскыны пыри «Ижмаш» предприятие бордысь 8 номеро училищее. Ар ӵоже дышетски но, армие басьтӥзы.

Пичи дыръям ик потэ вал ожгарчи но луэме. Туж синмаськылӥ морякъёслы. Улонме зарезен герӟаны малпалляй. Но зарезь вылтӥ уяны кылдӥз но – тазалыке ляб вылэм, зарезь висёнэн черлай. Армие ветлыса ни, валай: ожгарчилэн сюресэз – мынам ӧвӧл. Суредаськон мылкыды но пумен кошкиз, сое воштӥз крезьгур.

Ижын мон 10 арескысен улӥсько. Выжые Алнашен Пичи Пургаен суралтэм маке. Атае Пурга ёросысь Поӵыш гуртысь, анае – Алнашысь. Ижын Машиностроитель посёлокысь 51 номеро школаын дышетски. Директормы но англи кылъя дышетӥсьмы Лисина Антонида Михайловна вал. Бӧрысь со республикаысьтымы Правительстволэн Тӧроезлэн воштӥсез луиз.

Школаын дышетскыкум, ансамбльын шудӥсько вал. Соин армия бере крезьгуръя училищее пыремелы паймонэз ӧвӧл, дыр. Сое йылпумъяй но ар пала ужаса вуттӥ радиолэн но телевиденилэн хоразы. Собере радиолэн крезьгуръя редакцияз ӧтизы. Отын ужакум, заочно йылпумъяй ни УдГУ-ысь удмурт филология факультетэз. 10-тӥ класс бере кин ке верасал ке, филолог луод шуыса, мон туж зол серекъясал, дыр. Угось со удысэ сюлэм ноку ӧз кыскылы. Но озьы кылдэмын ни: улон ачиз адямиез серекъя.

Творчествотэк улыны ӧй быгатылы. «Удмуртия» ГТРК-ын крезьгуръя редактор луыса тырши.

- Кылзӥсьёс дышизы ни вал тӥляд зыл-зыл куарадылы, крезьгурлы сӥзем аспӧртэм передачаостылы. Но витёнтэм шорысь тӥ радиоысь кошкиды. Малы?

- Адями ялан одӥг интыын уяны уг быгаты. 10 ар ӵоже крезьгуръя редактор луыса ужай но маке выльзэ утчаме потӥз. Радиоын ужакум ик, УдГУ-ысь экономикая факультетэ дышетскыны пыри на. Таиз герӟаськемын вал бугырес 1990-тӥ аръёсын, астэ утчанэн, бизнесэн вырыны тыршонэн.

Озьы пӧрмиз, трос аръёс ӵоже, пӧртэм интыосын дышетскытозям, ужатозям, черк котырын бергай. Со монэ ялан золгес кыскиз. Отысь хорын 1989-тӥ арысен, крезьгуръя училищеысь куинетӥ курсысен ик, кырӟалляй ни. Ветлылӥм вуоно кузпалыным, Иринаен, ӵош.

- Мынам тодэмея, со но крезьгурчи.

- Озьы, тодматским училищеын дышетскыкумы. Нырысетӥ курсысен ик сое синйылтӥ, мукет группаын дышетскиз ке но. Соку ик синмаськи. Куинь ар ӵоже кусып возим. Нош черке кырӟаны ветлыны кутскеммы бере огазеяськыны малпам. Нырысь венчаться кариським, собере загсын гожтӥським. Зэм, куронъёсты тӥян выллем пӧрмиз. Угось загсын, черод бадӟымен, кык толэзь возьмано луиз.

Иринаен 22 ар ӵоже ӵош улӥськом ни. Со – ӟуч, Ижысь. Но кызьы ке озьы тупалляз, пичи дырысеныз эшъёсыз удмуртъёс вал. Кузпалы али но черкын кырӟа.

Саша пимы крезьгуръя колледжез йылпумъяз, муниципальной камерной хорын но, анаез сямен, черкын но кырӟа. Спортэн эшъяське. Кикбоксингъя мастере кандидат. Творчестволэсь уг палэнскы – кылбуръёс, веросъёс, кырӟанъёс гожъя.

Асме малпано ке, азьвыл басьтэм вань тодон-валанэ черкын кулэ луэ. Крезьгурчи – куараосты валаны, кырӟаны; филолог – секыт текстъёсты чебер лыдӟыны, кылэз шӧдыны; экономист – черклэн экономикаеныз вырыны, вытъёс тырыны но трос мукет.

- Калыкмы пӧлын язычество али но вань на. Со ноку нокинлы урод ӧз карылы. Нош черк кырыж учке язычество шоры. Уг-а нюръясько пушкады христианство но вашкала удмурт оскон?

- Песянай-песятайёслэсь осконъёссэс саптано ӧвӧл. Соос туж вылӥ дунъязы инкуазез, тау карылӥзы солы. Удмурт язычество вылэ итӥськиз югдытӥсьёсын ваем выль тодон – Иисус Христослы оскон. Мар солы матынгес – адями ачиз быръе ни. Христослы осконлэн пӧртэм кунъёсын, калыкъёс пӧлын аспӧртэмлыкез вань. Угось со инъяськемын интыосысь осконъёс вылэ. Малпасько, со урод ӧвӧл.

Оскон адямиез умойгес каре. Дунне религия ке вань, дунне культура но вань. Сое одно тодоно.

- Нош атеизм пумысен ма шуоды?

- Атеист но оскыны кулэ. Кинлы? Визьлы (разумлы). Но котькуд визьмо адями будыны тырше, тодон-валанзэ, лулпуштроссэ узырмытэ. Та ласянь кин солы адӟем карымон луэ? Малпасько, Христослэсь умойзэ уд шедьты. Ма, атеизм – со но религия. Но макем ӟечлыко луэ со? Наука пӧртэм удысъёсты эскере, но туж троссэ валэктыны уг быгаты на.

Визьмо адями уг шуы: мон озьы быгатӥ! Шуэ: Инмар мыным визь сётӥз…

- Библиысь кыӵе интыез Тӥледлы тужгес матын?

- Тужгес тунсыко Выль сӥзён. Отысь заповедьёс: нырысь ик, Инмарез вань сюлмысь яратоно, кыкетӥез – адямиосты яратоно. Павел апостоллэн сӥзёназ вань сыӵе интыез: адями дуннеысь олокыӵе но тодон-валан басьтыны быгатоз, аслэсьтыз мугорзэ но сутыса сётыны быгатоз, вань узырлыксэ кураськисьёслы люкылоз, но яратонэз ӧвӧл ке, ужезлэн пайдаез уз лу. Яратонтэк дунне вылын номыр ӧвӧл. Яратон уг алдаськы, уг вожъяськы.

- Нош адями яратыны уг быгаты ке? Вожъяськемысь дугдэмез потэ, но уг пӧрмыты ке?

- Иисус Христос шуиз: кызьы тӥ Инмарез яратоды, матысь адямидэс ке уд яратӥське? Кызьы валалоды инмысь ужъёсты, музъем ужъёсты ке уд валаське? Яратон, гажан пыӵа пичи дырысен, анай-атай пыр. Пиналэз дышетоно инкуазез, нымы-кибыез, улосэз валаны, дунъяны. Яратон пӧлын будэм, сое шӧдэм мурт гинэ Инмарез яратыны быгатоз. Пичи дырысен лекомон пӧлын быдэсмем адямилы зэмос яратонэз валаны туж секыт.

Берло дыре адямиос пӧлын лекъяськон кужмояз. Тушмонъёс юромо озьы каро. Басьтом туала телешоуосты. Отын ог-огдэ лёгаса, сиыса, вормисе потыны кулэ. Нырысь сыӵе передачаос паймыто, собере дышиськом. Озьы кулэ кадь потэ ни. Адями малпа: мыным умой мед луоз шуыса, мон мукетыз вамен потыны, сое сиыны кулэ. Передачаос, калыкез огазеян интые, ог-огенызы вожвылъяськись каро. Азьланяз но озьы луиз ке, асьмеды туж капчиен вормозы пӧртэм сьӧд кужымъёс.

Вожъяськон сярысь ке… Удмуртъёс кытӥяз асьсэос асьсэлы та сямез ляко. Нош вашкала выжыосмы вожъяськонэз воксё тодытэк улӥзы. Кӧня ужад, сомында ик басьтӥд. Вожъяськон вуиз, куке дорамы мукет калыкъёс лыктӥзы, музъемез люкылыны кутскизы. Соизлы тамында сётӥзы, мукетызлы – сомында.

Эшшо: вожъяськон потэ астэ ачид гажамтэ бордысь. Со ачид азьын сьӧлыкан. Угось адями ассэ гажа ке, мукетъёсызлы вожъяськыса уз ветлы.

- Дунне вылын одӥг ар но жугиськонъёстэк уг ортчы. Калыкъёс ожмасько музъем узырлык понна. Но куд-ог эскерисьёс шуо: азьланяз, пе, кышкыт ваче вуонъёс луозы пӧртэм осконъёс (религиос) вискын.

- Пӧртэм осконъёс – со муг гинэ. Котькыӵе ож – со ож тӥрлык басьтыса узырмон. Ваньбурез, музъемез киултон. Зэмос оскись адямилы малы мурт ваньбур? Малы ожмаськон?

Жаляса верано, куд-ог кужымъёс осконъёсты асьсэ пала берыкто, мыдланьто, пӧртэм ӧръёс, сектаос кылдыто. Озьы религиозной фанат шуонъёсты будэто. Собере соосты асьсэ сьӧд ужъёсазы куто. Шуом, сектантъёс Библиысь одӥг люкетсэ басьто. Отын гожтэмын: тӥляд, пе, тушмонъёсты – матысь адямиосты, анай-атайды. Тодӥсьтэм адями озьы ик малпалоз. Нош малы озьы гожтэмын – уз эскеры. Адямилы аслыз Библиез лыдӟоно, ас йырыныз малпаськоно.

- Священник луыны капчи ӧвӧл, дыр. Мар бордысен ӵукнады кутске?

- Вӧсяськонысен. Котькуд адями ӵукна молитва лыдӟыны кулэ. Собере черке мынӥсько. Куддыръя служба бере сокем жадисько. Номыр сыӵезэ ӧй кары кадь, но кужым быре. Со герӟаськемын ялан астэ чакланы тыршемен. Мугор но, мылкыд но чылкыт луыны кулэ, служба нуналъёсы кузпалын ӵош кӧлыны уг яра, трос мукет но куронъёс. Собере, йӧназ адями ноку аслаз священник луэменыз уз данъяськы. Валаськод: священник луон – со тонэ данъян ӧвӧл, со – тынад киросэд. Нош котькуд адями – ляб.

…Эшшо курдасько: визьмы медаз сураськы вал ваньзэ чакласа улыны, трос малпаськыны тыршонъям.

- Оло, астэ сыӵе курадӟытонэз ӧвӧл, улон шоры капчигес учконо?

- Малпаськись адями огшоры гинэ улыны уг быгаты. Со аслыз инты уз шедьты, ялан маке утчалоз. Черке трос калык ветлэ, али уногес луизы ни егитъёс. Ваньзылы юрттыны, Инмар доры сюрес возьматыны кулэ.

Пичи дыръям бадӟымъёс шоры учкисько вал: кыӵе трос соос улэмын ни. Малы ке ялан шуылӥ: Инмар сётӥз ке, 40 аресозь ке но уло. 40 арес тырмиз но, выжи черке. Оло, озьы тупаз гинэ. Но али малпасько: отчыозь мон мирской улонэн улӥ, собере мукет улонэ кутскиз – Инмарлы юрттӥсь луи. Службаосты ӟуч сямен но, удмурт сямен но нуисько.

Ижын удмурт службаос вить ар пала мыно ни. Но тросэз со сярысь татчыозь уг тодо на. Куддыръя психолог кариськоно луэ, визь-кенеш сётоно. Мыным 46 арес, улонэз пичи-пичи адӟемын ни ке но, кытӥяз кепырасько: кызьы адямилы валэктон сётод? Но сыӵе дыръёсы секыт юанлы валэктон кытысь ке ваське, Инмар юрттэ, лэся.

Тросэз лыкто, семьяязы маке урод ке, нылпиоссы шуге-леке вуо ке. Куддыръя адӟиське: адями Инмар доры кыстӥське, но солы пӧртэм шугъяськонъёс люкето. Асьмеос ум но валалэ, кызьы урод кужымъёс милемын шудозы.

Ӵемысь вӧсяны ӧтё бадӟым коттеджъёсы. Соослэн кузёоссы – узыр адямиос. Но нылпиоссы малы ке висё яке воксё ӧвӧл. Узырлык капчиен уг сётӥськы. Асьмеос ум тодӥське, кыӵе сюлэм висёнъёссы узыръёслэн. Ваньбур – со шуд ӧвӧл на.

Эшшо: ог-огдэ курлано ӧвӧл. Малы тон малпаськод таиз урод, соиз ӟеч? Адями, оло, калык азьын гинэ чеберъяське. Таин валче вераме потэ Фарисей но Мытарь сярысь притчаез. Мытарь – Рим правительство понна выт бичась адями. Нош Фарисей – Инмар Законэз пыр-поч быдэсъясь адями. Пыриллям ини таос черке вӧсяськыны. Фарисей шораз ик султэм но ваньмызлы кылӥськымон вӧсяське: мон асэным данъяськисько, вань куронъёсты быдэсъясько, вӧсяськисько, визясько, Мытарен уд ӵошаты… Нош Мытарь черке пырон пала гинэ, пичи сэргы, султэм, адямиослэсь палэнскыса. Инмар шоры синъёссэ ик ӝутыны уг дӥсьты, гадяз мыжгаса, понназ вазиське: «Боже, будь милостив ко мне, грешнику». Та учыре Христос дурбасьтэ Мытарь понна.

- Черкын удмурт службаос нуэм сяна, тӥ мыло-кыдо басьтӥськиды Удмурт нылкышно кенешен ӵош ужрадъёс ортчытъян борды.

- Свято-Михайловской соборын мон дун-чылкыт Вера, Надежда, Любовьлэн но соослэн Софья анайзылэн приделаз (1-тӥ этажын) службаос нуисько. 2010-тӥ арын Удмурт нылкышно кенешлэн кичӧлтэмезъя отын удмурт нылкышноосын, Вера, Надежда, Любовь нимъёсты нуллӥсьёсын, пумиськон ортчытӥм. Нош ар улыса, ужрад эшшо паськытгес ортчиз. Сое радъянэ пыриськизы «Удмурт кенеш», Удмурт нылкышно кенеш, УдГУ, черк. Адямиос пушказы тымиськем мылкыдзэс кисьтӥзы, ваньзылы удмурт иконаос сётъямын вал.

Удмурт нылкышно кенешлэн, «Удмурт дунне» газетлэн «Чибориё кышет» конкурссылы йылпумъян Пукро нуналэ (14-тӥ октябре) ортчытӥм. Азьланяз но удмурт огазеяськонъёсын кусып возьыны малпаськом. Удмурт кылэз черк пыр но утьыны тыршон, анай кылын молитваос лыдӟон – со туж умой.

- Паска азьын кыӵе кылъёс верасалды калыкмылы?

- Инмарлы оскись адямиос понна Паска – со тужгес бадӟым праздник. Адями ассэ солы дася, визян пыр потэ, сьӧлыкъёсызлэсь куштӥськыны, Инмар доры матэгес кариськыны тырше. Куд-огезлы ӧжытгес сиськон гинэ но капчиен уг сётӥськы. Адями Паскаез тыршытэк возьмаз ке, солы со шумпотымон уз луы. Нош ассэ ачиз вормыса, чылкытатскыса ке – туж сайкыт но чебер потоз.

Котькудӥзлы сӥзьысал: Инмар доры матэгес кариськыны мед быгатоды, улонады шумпотонэз тросгес мед луоз.


Источник:

Григорьев П. Яратонтэк улон ӧвӧл / П. Григорьев ; записала Е. Миннигараева // Удмурт дунне. - 2012. - 13 апр. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"