Галасеева Маргарита Ивановна

Материал из Воршуда
Перейти к навигацииПерейти к поиску
The printable version is no longer supported and may have rendering errors. Please update your browser bookmarks and please use the default browser print function instead.

Ворекъясь куара

Galaseeva.jpg

Удмуртиысь калык артистка Маргарита Галасеева. Со сярысь гожъязы: «Ижысь сценалэн гранд-дамаез». «Евгений Онегин» операез учкемзы бере нимазы: Совето Союзысь устоез Няня. «Пиковая дама» бӧрсьы шуисез луиз: Бадӟым театрысь Елена Образцовалэсь но ӟечгес, пе, син азе пуктӥды Графиняез. Нош «Марица» операысь княгиня Божена луиз странаетӥмы ветлон визитка выллем. Огкадь зол, яркыт пӧрмизы солэн операосысь трагедия мурдалаё, психологизмо образъёсыз но, опереттаосысь лэчыт характеро, серемес шӧмо-буё героиняосыз но.

Крезьгуръя но драмая Удмурт театрын, собере Операя но балетъя кун театрын 49 ар ӵоже ужатозяз, сюлэсь уно пичиесь но бадӟымесь рольёсын шудӥз, ӵемысь валтӥсь партиосты быдэсъяз. Малы ке шуоно М. Галасеевалэн кадь кужмо, чебер но мур меццо-сопрано куара удмурт сцена вылын нокинлэн ӧй вал на.

Инкуазен сётэм быгатонлык, Москваысь консерваториын дышетскемез, искусствое мур пыриськемез ӝутӥзы удмурт ныллэсь нимзэ, данзэ. Маргарита Галасеева «йӧтскылӥз» быдӟым музыкантъёс - Генрих Нейгауз, Святослав Рихтер, Дмитрий Шостакович - борды, дышетскиз вуоно СССР-ысь калык артисткаен Тамара Милашкинаен ӵош.

М. Галасеевалэн операын кырӟаны быгатонлыкез удмурт композиторъёслэн классика произведениосазы но яркыт усьтӥськиз. «Наталь», «Чипчирган» но мукет спектакльёсын яркытэсь образъёс кылдытэм сяна, Удмуртиын кырӟан искусствоез муромытыны но вӧлмытыны юрттӥз. Со сяна, Маргарита Ивановна уно егит кырӟасьёслэсь куаразэс волятӥз: Удмурт пединститутын но культпросветучилищеын огъя 20 арлэсь кема ужаз. Искусство удысын тыршемез пусъемын «За трудовое отличие» медален, ӵошатсконын вормисьлэн пусэныз, дипломъёсын. Бадӟым адямилэн ужъёсыз зарезь мурда. Вылӥяз тулкымъёсыз гинэ адӟисько.

Буби мынам, Иван Михайлович Галасеев, чебер кырӟаз, котькыӵе инструментэн шудыны быгатӥз, аккордъёсты капчиен, ӝогак шедьтэ вал. Выжыез Шаркан ёросысь, ачиз нылпи юртын будоно луэм, соин мылкыдызъя дышетскыны ӧз кылды. Рабфакын тодон-валан люказ, отысен ик тодматскем муминым Мария Алексеевнаен. Дышетскемзы бере бертӥллям гуртэ.

Пичи дыры Глаз ёросысь Савапи гуртын ортчиз. Укмыс корка гинэ. Макем отын шулдыр вал! Укно уламы ик тымет, отӥяз пеймыт ӵаӵӵа, нюк, кызъёс. Пыдлось гуртын не радио, не электротыл. Гуртмес Туктыме (Омутницае) выжтӥзы. Ӵужмуми но ӵужбуби улэпесь ӧй вал ни. Пересез бабуше болгар выжыысь вылэм. Турча зӥбет улысь пегӟыса, тапала вуэм. Дарья Михайловна, Мишиха, пелляськись, эмъясь вал. Кышноослы нылпи вайыны юрттылэм. Монэ но кияз кутыса вуттэм на.

Семьяямы чылкыт вераськизы ӟуч сямен. Удмурт луэмзэс но ӧз вунэтэ. Буби комсомол ужын тыршиз, собере газет борды кариськиз: «Красное знамя» райгазетын ужакуз, «Советской Удмуртие» но весь гожъялляз, туспуктэмъёссэ ыстылӥз.

Фронтысь со бертӥз капитан, гвардеец луыса. Анае сярысь ке верано, со рабфак бере дышетӥсьын ужаз, собере курсъёсын дышетскиз на, адвокат луыса трос муртлы юрттӥз, гажазы сое.

  • * *

Муми-буби, дышетскем адямиос, война азьын пичи гуртмылэсь палэнэ ужаны кошконо луизы. Мон, бадӟымез ныл, бабушъёсы доры кыли. Быдӟым ожлэн кыкетӥ араз Туктымысь школае мынӥ - 5 иськемын вал со. Собере ини Глазове кариським но, 2-тӥ школае - азьвыл нылкышно гимназие - ветлыны ӧдъяй. Глазове ссылкае азьмынӥсь адямиосты келяллязы - со городлы юрттӥз, вылды, лул чылкытлыкезъя, культураезъя вылӥын луыны. Та шӧдӥськиз «гимназиямы» но. Опереттая кружокмы но милям вал. Хоренымы кивалтӥз Алексей Иосифович Иванов, фронтысь бертэм маке, со классикаез милемлы матэ карыны выриз. «Средь шумного бала», «Я помню чудное мгновенье» романсъёсты соку ик кырӟалляй ни. Виталий Николаевен дуэт но кылдытӥмы, та эше Удмурт телевиденилэн нырысетӥ дикторез луиз.

Огпол школаямы Ижысь крезьгуро училищеысь Николай Греховодов вуылӥз, кылзӥз монэ но дэмлаз яке асьсэ доры лыктыны, яке Москваысь консерваторие мыныны. Мон бырйи кыкетӥзэ.

  • * *

Удмуртиысь Культурая министерствоын мыным шуизы: Москваысь кун консерваториын дышетскыса бертӥд ке, асьмелэн операя театрмы луоз ни, отын ужалод. Кыӵе ке бумага-направление сётӥзы, со ньӧмыз понна гинэ вылэм.

Война бере но ай сиён тырмыт ӧз шедьылы, мон туж восьтэт но тус-тус, мултэссэ пальпотӥсьтэм вал. Соин, лэся, монэ нырысь-валысь Чижик но нимазы, «удмурт амазонка» но шуисез луиз. Экзаменын, ӟуч романсъёсты сяна, кырӟай М. Коробовлэсь «Яратон» («Возь кузя но васькыса мон…») кырӟанзэ. Комиссилы кельшиз, шӧдске, пальпотыса шорам учко. Шуизы: ми тӥледды кутысалмы, крезьгуръя грамотады ӧвӧл. Ӵектӥзы кык арзэ подготовительной курсын дышетскыны, собере, пе, экзаментэк кутом. Шуэрски: семьяямы мон 5 нылпи пӧлысь бадӟымез, юрттоно, пӧй, соин ик мыным, консерваториез ӝоггес йылпумъяса, доре бертоно. Профессоръёс паймизы: ух, кыӵе сюлмо нылаш. Нырысетӥ курсэ кутӥзы.

Озьы ке но, шуг-секытъёс кылдэмен, дышетсконэ кык арлы кемагес кыстӥськиз. Педагогеным, вокалъя факультетлэн деканэныз, кылмы нокызьы ӧз тупа. Мон шӧдӥсько вал, куарае улӥ, зӧкгес шуыса, нош со монэ вылӥ куараё каре, сопраноез кадь нуэ.

Озьы витетӥ курслы мон куараме копак изъянтӥ. Кырӟаны гинэ ӧвӧл, вераськыны но, концертъёсты кылзыны но уг яра ни вал. Кызьы шуиз милям врачмы, кырӟасьлэн, пе, кылзыкуз гинэ но чырты выжыысьтыз куара поттӥсь сӥосыз выро, ужало. Дора Борисовна Белявская, пырыны экзамен сётыкум монэ эскерись профессор, бордаз кыскиз - со доры куриськи. Туж визьмо кышномурт, солэн 19-эз дышетскисез СССР-ысь калык артист луизы, соос пӧлын - Татьяна Шмыга, Тамара Синявская, Вячеслав Войноровский.

Тӥни озьы яратоно дышетӥсе ар куспын монэ йӧнатӥз. Мукетъёс но шорам мукет синмын учкыны ӧдъязы. Диплом экзаменме умой сётӥ, С. Танеевлэн «Орестея» операысьтыз ариез кырӟай. Факультетысьтымы «гудыри» но, Фаина Петрова профессормы, небӟиз. Ректормылы Александр Свешниковлы, пе, верам: «Туж жаль, диплом экзаменын тӥ ӧй вал: чудоез отысь адӟысалды».

Дора Борисовна туж шӧдэ вал адямиез. Мыным огпол гинэ ӧз вералля: «Вот, Риточка, жаль, пропискады луысал ке, Москваын тӥ ужтэк ӧй кыльысалды». Со ГИТИС-ын но дышетӥз, вӧзаз ассистент луыса ужаны ӧте вал.

Мон бертӥ Иже. Азьпалтыса верало ни: берло Новосибирске но, Северодвинске но ужаны ӧтчазы - Удмуртиме кельтэме ӧз поты.

  • * *

Атаелэсь кылзӥськи. Со шуиз: асьме удмурт искусствоез ӝутоно.

Иже бертэмелэсь одӥг арлы вазьгес, 1959-тӥ арын, Удмурт театрмы крезьгуръя но драмая нимаськыны кутскиз. Отын опереттаосты пуктыны ӧдъязы. «Свадьба в Малиновке», «Поцелуй Чаниты», «Любушка» (таиз Г. Корепанов-Камскийлэн) спектакльёсын нылкышно образъёсты - Софьяез, Анжелаез но Матильдаез - ӝог пӧрмытоно вал.

Собере мон «Чайкаысь» Маша луи. А. Чеховлэсь сю аръем юбилейзэ пусйимы соку, нош вуоно аре 150 ар тырме вордскемезлы. «Чайка» мыным сыӵе ик дуно, котьку учкисько, котькыӵе постановкаез.

1950-тӥ аръёслэн пумазы опералэн данэз усьыны ӧдъяз. Учкисьёс капчи жанр борды кариськизы. Асьме дорын но шулдырзэ, мактаськоно кадьзэ адӟемзы потӥз. Артистъёсмы лӧптэм мылкыдо шудылӥзы - адӟем карымонэсь. Но мынам зӧкгес куараелы опереттаын инты трос ик ӧз шедьылы, соин серемес рольёс борды кырмиськи. Учкисьёслы кельши шуыса валай, со монэ бурдъяз.

Аръёс ортчыса, эшшо юнгес валай: комической рольёс котькудӥзлы уг сётско, со понна Инмарен пусъемын луыны кулэ.

  • * *

Герман Корепановлэн «Наталез» борды кутским 1960-тӥ арын. Нырысетӥез удмурт опера. Удмурт но, ӟуч но кылын. Ваньмыз лопырскизы, ӝутскем мылкыдын тыршизы: концертмейстермы Василий Кашкаров, дирижёрмы Глеб Бехтерев, режиссёръёсмы Александр Осанин но со бӧрсьы лыктэм Владимир Ожерельев репетициосын маза ӧз сётылэ. Артистъёс но вань мылкыдзэс сётыса кырӟазы. Евгения Пахомова - Наталь, мон - солэн эшез Оки, Максим - Пётр Романов, Сандыр - Геннадий Корепанов-Камский…

«Наталь» операез пуктэммы туж юн бадӟым шумпотон луиз. Вылӥ дунъет сётыса, со сярысь гожъязы. Дорамы вуылӥзы композиторъёс Тихон Хренников но Арам Хачатурян, гримёркае пырыса, милемлы ушъян кылъёс веразы.

Собере вал Геннадий Корепанов-Камскийлэн «Чипчирган» опера-балетэз. «Россиянка» операез. Таосаз но мыным рольёсын удалтӥз. Удмурт композиторъёслэсь та ужъёссэс выльысь пуктоно ке… «Чипчирган», туала тусо-буё карыса, тунсыко потоз ик, дыр, татын уго балетэз но вань. Нош «Натальлэн» сюжетэз, малпасько, та дыре учкись понна мӧзмыт луоз ни. Сое возьматӥз операез 1980-тӥ аръёсы кыкетӥзэ (ӟуч кылын) пуктэммы. Жаль, но репертуарысь со туж ӝог чальтчиз. Вераны кулэ, таяз постановкаын ми Евгения Пахомоваен, Россиысь дано артисткаен, анайёсты шудӥмы ни. Асьме учкись операез уг яраты, шуэмзы потэ куд-огезлэн. Со аналскон гинэ, дыр. Чаклалэ ай, удмуртъёс куноятыкузы кыӵе кырӟало. Опера пуктэм кадь адске. Соин мыным пичиысен матын потэ та жанр. Бабуше кумышкаен бекчезэ кутоз но куноосыз котыртӥ кылалоз-буралоз вал, шумпотонзэ но, бӧрдонзэ но мадьылӥз. Тӥни соин но удмурт анайёсты шудыны туж лякыт потӥз мыным.

Нош сюлэм ӟырдытлыкея чиганлы тупась рольёсы уно вал. «Цыганский баронын» Чипраез шудӥ, солэсь азьло «Россиянкаын» чиган сямен кырӟай: «Кайонэ, кайонэ…» Но одӥг малпанэ быдэсмытэк кылиз: Карменлэсь партизэ кырӟаме туж потэ вал (зэм, концертъёсам «Кармен» операысь номеръёс пыризы). Та малпанме улонэ пыӵатӥз нылы, Удмуртиысь дано артистка Александра Шулятьева. Удмурт сцена вылын «Кармен» операез пуктыку, валтӥсь партиез солы оскизы.

  • * *

Саша, пичи дыръяз кужмысь косэмысьтым, крезьгуро школае ветлэмысь дугдӥз. Берло «визьмаськиз» - культурая (азьвыл культпросвет) училищеын дышетскиз, Казаньысь консерваториез быдтӥз. Нош со дыре ик ялан ветлӥз, али но ветлэ Москвае, татын визь-нод люка Щепкин нимо училищеысь профессор Марина Петровна Никольская дорын - со Дора Белявская дышетӥселэн нылыз. 80 арес котыре вуэмын ни, но сэзь ай. Туала удмурт студентъёсмес но син азяз возе.

Нылылэн азинсконъёсыз шумпотто. Москваысь «Новая опера» театрын огез солистка луэ. Вашкала романсъёсъя конкурсын гран-при утӥз. Изабелла Юрьевалы сӥзем конкурсын - кыкетӥ инты. Калыккуспо конкурсъёслэн лауреатсы. Украинае но, Шор Азие но вуылэмын, Исландиын, Норвегиын вал.

  • * *

Улытозям мон лыдъянтэм уно концертъёсы пыриськылӥ. Ӟуч, удмурт, итальян кылын кырӟалляй операысь, опереттаысь ариосты, водевильёсысь куплетъёсты, романсъёсты, кырӟанъёсты. Дуэтэн но, огнам но кырӟамъёсы радиолэн фондаз кылемын. Пластинкаен потэмъёсыз но вань. Григорий Титовен нырысьсэ ӵош кырӟамы «Наталь» операын, со отын Шестериков дышетӥсь вал. Та артист мынам атаелэн вордскем палысьтыз. Сюлэмам пыӵазы Исай Галкинлэн, Николай Греховодовлэн, Михаил Коробовлэн, Николай Шкляевлэн крезьгуръёссы. Соос спектакльёсты ас гожтэменызы яке калык гуръёсын чебермаллязы. «Уй пеймыт вал соку…», «Укно но дуръёсад…», «Кыдёке шаере тулыс уй лэзиськиз…», «Зарни меда, азвесь меда…» - кырӟанъёслэн кутсконъёссы ик монэ кыдёке кылем чебер вакытам берыкто кадь.

Герман Корепановлэсь ог 7 кырӟанзэ, романсъёссэ быдэсъяй. А. Пушкинлэн кылъёсызъя «На холмах Грузии» гожтэмзэ Гай Сабитов удмурт кылэ берыктӥз. Та романсэз мон бӧрысь нылылы но кузьмай.

Правительствоен дасям концертъёсы но кӧня пыриськоно луиз, шуом, Москваын культуралы сӥзем декадаос дыръя. Веранэз ӧвӧл ини гужем гастрольёсы потаммы сярысь. Россиез шундыпуксён палтӥз быдэсак котыръямын, пӧртэм-пӧртэм городъёсы вуылэмын. Ӧм вунэтылэ удмурт гуртъёсмес но. «Таӵе яркыт кырӟамез кылэммы-адӟеммы ӧй вал на», - гуртысь нылкышнолэн тазьы дунъямез пель сьӧрам шуккиськыса улэ.

  • * *

Опереттаын мон трос ужай. «Проделки Ханумы» спектакльын Ханума, «Сорочинской ярмаркаын» Хивря, «Бабий бунтын» Марфа, озьы ик трос мукет: тётя Дина, Лолита, Биби-Ханум, миссис Пирс, мадам Флоренс, Дора Соловейчик... Выжыкылын но шумпотыса шудылӥ. «Кошкин домез» пуктэммы бере, паймод, тазьы ушъязы: тӥ, пе, зэмос Парсь. Со сяна, «Василий Тёркинын» Кулонэз но шудӥ.

Озьы «шулдыръяськисько» ке но, асме мур вуын кадь шӧдӥсько операосын. Соин ик П. Чайковскийлэн «Пиковая дама» операяз пересь Графинялэсь партизэ сётэмзы мыным витьымтэ шорысь ӧз луы. Быдэс улонэным, адӟеменым, шудэменым мон солы дась вал ни. Яратоно героиняосы но вал: «Евгений Онегинысь» Няня, «Иолантаысь» Марта, «Севильский цирюльникысь» Берта. Но соос ортчем дыре кылизы, капчиенгес но быдэсъяськизы кадь. Таиз роле борды асме эскерыса, кужымелы оскыса кутски. Быгато! Быдӟым кырӟасьёсмы но уго, нылкышно кырӟасьёсмы, одно ик та кышкыталэс кышномуртлэсь тусбуйзэ пуктон сярысь вӧтало. Консерваториын дыръямы но ай Фаина Петрова профессормес шуылӥзы: самой устоез Графиня.

«Пиковая дама» - со зэмзэ но творчестволэн вылӥ ӝутскемез, йылыз. Солэсь ӵошатыны луонтэм бадӟым кужымзэ, пушез сутӥсь ӟырдытлыксэ кылдытӥзы кык генийёс - А. Пушкин но П. Чайковский.

Соин ик мон туж шудо, дас ар талэсь азьвыл, 65 аресэ тырмон котырын, мыным со «дамаез» оскизы шуыса. Улонам нырысетӥ бенефисэ соин валче ортчиз. Бен, критика но дунъяз, соберегес ик дано артистка нимме калык артистка нимын воштӥзы.

  • * *

Мар со, ортчемез… Бусӥр буёлэн бусаськыса кылемын. Алиез тани шырпу кадь мертчиз ни сюлэме. Операя но балетъя театрмы бӧрдымон югдурын. Валтӥсь режиссёртэк, валтӥсь дирижёртэк. Удмурт классикаез ӝутэм артистъёсмы бадӟым кӧтӝожен уло (куд-огез улэпесь но ӧвӧл ни) - соос уго сюрес урдсы сэрпалтэмын. Мон директормылы вералляй: кадръёсты утьыны кулэ, операын кырӟасьёсты будэтыны капчи ӧвӧл. Тани серемес роле ик пуктоно ке, кинэ басьтод? Ваньмызлы сыӵе быгатонлык сётымтэ. Малпано ке, Фаина Раневская, Татьяна Пельтцер, Ольга Аросева - соосты ӧз уллялэ, уг улляло ук. Сыӵеоссэ улляд - буш инты кылёз. Асьмелэн, Удмуртиын, сое уг валало. Тани Москваын али драмая актёръёсмес дышето, кырӟасьёс ке - нош ик ӧвӧл. Театрамы удмурт артистъёс ӧвӧл шуи ке, уг янгыша.

Театрлы умой импресарио кулэ, талантэз мед луоз. Артистъёсты яратытэк, соосты убоысь сяськаосты сямен утялтытэк, пашмозы, куасьмозы.


Источник:

Галасеева М. И. Ворекъясь куара / М. И. Галасеева ; записала Т. Чернова // Удмурт дунне. - 2009. - 31 дек. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"