Редактирование: Возняков Владимир Борисович

== '''Кылъёс куаръёс сямен бергало''' == 

[[Файл:Владимир Возняков.jpg|thumb|left|Владимир Возняков]]
'''Кылбурчи но крезьгурчи, Россиысь Писательёслэн но Журналистъёслэн огазеяськонъёссылэн ёзчизы Владимир Возняков удмурт бардъёс радын нырысетӥосыз пӧлысь луэ. Тунсыко куараеныз со быдэсъя  паймымон чебересь кырӟанъёссэ. Владимир Борисович озьы ик аслэсьтыз кужымзэ эскере удмурт кылмес сэрттон-пертчон бордын. Та нуналъёсы кылбурчи 50 арессэ пусйиз.'''

'''— Нырысь ик вордӥськем палъёсты сярысь вералоды, дыр.'''

— Вордски мон Пичи Пурга ёросысь Тыло (Сырьезшур) гуртын. Пичи дыры туж шулдыр интыын ортчиз. Гуртмы Дада ошмесэн данъяськылӥз. Ньыль классозь асьме гуртысь покчи классъем школае ветлӥ. Витетӥ классэ ини куинь иськеме интыяськем Эдэйгуртысь шор ёзо школае мынӥ.

Пичи дырысеным кырӟаны-вераны, кылбураны яратон мылкыды шараяськиз. Нырысетӥ классын дышетскыкум ик ини, валтӥсь кырӟасе пуктылӥзы. Света Возняковаен ӵошен кырӟаллямы. Бӧрысь Светлана Пермьысь культурая институтэз йылпумъяз. Кырӟаммес кылзыса, куд-ог анай-атайёс синкылияськылӥзы. Уката ик война сярысь гуръёс сюлэмзэс позыртылӥзы. Покчи классъёсын дышетскыкум ик, кылбураны но кутски. Нырысетӥез кылбуре «Дась лу!» газетын потӥз.

'''— Мемейды, Парасковья Александровна, калык писательлэн Семён Самсоновлэн сузэрез луэ. Пичи дырысеныды сыӵе агаеныды данъяськылӥды, луоз. Со кадь визьмо, йӧно но тодмо луыны турттылӥды-а?'''

— Ми пичиесь дыръя Семён Александровичлэн вылӥе ӝутскон вакытъёсыз вал. Со гожъяськон удысэныз кытчы гинэ ӧз вуылы. Быдэс Совето Союзэз котыртӥз, Париже но лобаз… Со сярысь милемлы мадьылӥз. Соку книга гожъясь мурт шоры тросэз синмаськыса но вожъяськыса учкылӥзы. Со сьӧры кыстӥськизы Володя но Андрей вынъёсыз, кылбурчиос луизы. Мон но соос бӧрсьы сюрес лёги. Жаляса верано, Володялы кема улыны ӧз кылды, висеменыз сэрен егитысен улонысь кошкиз.

'''— Нош кытысь сыӵе куарады, кырӟаны но гур пуктыны быгатонлыкты? Тыло гуртын, оло, уӵыосты ик тӥледлы кылымон гинэ мукет куараен чирдылӥзы.'''

— Гурт калык — кырӟась калык. Пичи дырысен со пушкын будэмын: сюанъёс, армие келянъёс, нуны сюанъёс… Концерт дасяны но шудыны-эктыны клубе поталлямы. Асьме калыклэсь вань сям-йылолъёссэ адӟыса но кылыса будӥмы. Милям шуо вал: кыӵе со адями луоз, кырӟаны-вераны уг быгаты ке?! Кырӟаса-вераса гуртоос ог-огзылэсь мылкыдзэс ӝутылӥзы. Мемее но кунооссэ аслаз малпам кырӟанъёсыныз пумиталляз. Кылъёссэ но гурзэ ачиз кыӵе кыла-вера со! Дядяе но кырӟаны-вераны яратэ. Эшъёсыз но ачиз кадь ик мыло-кыдоесь. Война сярысь кырӟанъёсты ӵошен быдэсъяллязы. Одӥг кылын вераса, ми — кырӟась-верась семья.

'''— Владимир Борисович, кылэме вань: тӥляд тятяды, Борис Ильич, огшоры шофёр ӧвӧл, со Гурт удысысь дано ужась, Ужысь ветеран. Солэсь адӟем карыса, шофёре мыныны малпаськоды вал, луоз?'''

— Зэм, дядяе адӟем карымон: уж ласянь но, сямын но. Таӵе учырез вераме потэ. Одӥг пол дядяе нуназеяны бертэм. Ачиз сиськыны доре пыриз, машиназэ капка азе пуктыса кельтӥз. Мон, вить аресъем пияш, эшъёсме чортыса, кабинае пукси. Соос азьын ушъяськеме, герой луэме потэм, вылды: тани учке монэ, кызьы мон быгатӥсько шуыса, рулез бергатыны кутски. Тодӥсько на, кызьы машинамы урам кузя каллен гинэ кошкыны кутскиз. Дядяй машинаезлэсь кошкемзэ адӟыса, ураме бызьыса потэм. Нош ми оломар сямен бускельёсмылэн кеноссы шоры ик дэмӟимы. Машинамы интыяз ик гуньдӥз. Ярам, дядяе лякыт сямо, сокем юн ӧз тышкаськы. Шофёр луыны мылкыд вал, но мемеен дяди, кылбураны но кырӟаны быгатэмме шӧдыса, дыр, ӵектӥзы педучилищее мыныны. Егитъёсмы школа бере отчы дышетскыны кошкылӥзы. Бӧрысь соос тросэз данэ потэм адямиос луизы: туспуктылӥсь Михаил Егоров, кылбурчиос Семён Карпов но Володя Самсонов, писатель Никвлад Самсонов… Озьы ми гуртысь тросэз та училищеын дышетӥсьлэсь дипломзэ басьтӥзы.

'''— Можга педучилищее вуэмды гожъяськись адямилы ӵапак иназ луиз, дыр. Сое угось вазен дырысен ини гожъяськисьёсты дасясь кебитэн лыдъяло.'''

— Педучилищеын литературной кружок ужаз. Отчы мон но ветлӥ. Литкружокмы бен школаямы но вал, но кружокъёслы саклык висъяны дыр ӧзгес тырмы. Гуртмы палэнын шуыса, бертыны тыршылӥм. Гуртын ялан уж, уж, уж ук. Школаез йылпумъякум, анай-атае шуизы: гуртэ улыны кылид ке, татын улон туж секыт, номыре уд адӟы, ми сямен, уж пӧлы выйыса, улод. Нош книга-газет кие кутоно ке, нош лыдӟиськыны та кутскем ини, ужаны кулэ шуыса, асьсэос пыкыло вал. Мемеймы колхоз фермаын скал кыскисьын ужаз. Солы но юрттоно вал. Апайёсы дорысь вазь кошкизы, соин ик мон выж но миськылӥ, скал но кыскылӥ, юрт котырысь вань ужез быдэсъяны быгатылӥ. Гужемзэ пудоез возьманы ветлылӥ. Педучилищеын дышетскыкум, общежитиын улӥмы бере, ваньмон дырмы трос вал. Олокытчы но вутскылӥмы: литкружоке но, баянэн шудыны но. Мон соку эшшо но мыло-кыдогес гожъяськыны ӧдъяй. Со ласянь училище туж бадӟым юрттэт сётӥз. Кружокен кивалтӥз тодмо гожъяськись Григорий Данилов. Ми доры ӵем вуылэ вал кылбурчи но тодосчи Георгий Архипов. Дышетске, пиос, дышетске шуыса, мылкыдмес бурдъяса но ӝуткаса кельтылӥз. Озьы тӥни педучилище улонамы туж троссэ сётӥз, кылбурез но, веросэз но валаны дышетӥз. Милемын ӵош Татьяна Иванова но литкружоке ветлӥз. Татьяна табере ачиз та училищеын ик литкружокен кивалтэ ини.

'''— Отысен ик гитараен но шудыны дышиды, дыр. Нылъёс ярато арганчиосты но гитараен шудӥсь пиосты. Тросэзлэсь-а сюлэмзэс позыръяды? Мугорды ӝужыт, веськрес…'''

— Арганэз пичи дырысеным кысканы кутски. Кык чурен шудыны шуг ӧвӧл ук. Эктон гурез кыскамзэс адӟиськод но — дышиськод. Мынам дасо пала ёзъёсы пичиысен арганлэсь бирдыоссэ зӥбылыны дышизы. Баянэн училищеын шудыны дышетӥзы. Угось дышетскисьлы одно ик маин ке но шудыны быгатоно вал. Ачид бырйиськод: домра, фортепьяно яке баян. Нош гитараен ас поннам шудыны дыши.

Нылъёс пумысен ке, пиос синмаськонэз, соос сярысь, бергес валало. Мынам соку сыӵе малпанэ йырам ик ӧй вал на али. Мугоры сярысь ке… Педучилищеын нырысетӥ курсъёсын дышетскыкум, пичи мугоро вал. Физкультура урокын берпуметӥосыз радын сылылӥ. Ньылетӥ курсэ вуыса ини, каникулъёс бере дышетскыны лыктӥ но, эшъёсы паймизы: тонэ, Володь, тодманы уг луы ни, учкы ай, гужем ӵоже мар кузьда луэмед!

'''— Тӥ университетын мугорын гинэ ӧвӧл, гожъяськон ласянь кыдады. Дышетскыны пыремдылэсь азьло ик тӥледыз тросэз тодо но тодмало ни вал, дыр?'''

— Мон со вакытэ республикаямы потӥсь журнал-газетъёсын печатласькисько ни вал. Удмуртиысь Писательёслэн огазеяськонзы егит гожъяськисьёс понна слётъёс, семинаръёс ортчытъяз. Милемыз отчы ӧтчаллязы. Кинэн но отын ӧм пумиськылэ: Юрий Лобановен, Аэлита Паушеваен, Владимир Соловьёвен, Виктор Шибановен но трос мукетъёсыныз.

Университетын Даниил Яшинлэн литкружоказ ветлӥ. Со милемлы туж трос сётӥз, гожъяськыны дышетӥз. Отын ик тодматски Михаил Федотовен, Владимир Котковен, Владимир Алексеевен. Алексеевен ми ӵошен асьмелэсь гожтэм кырӟанъёсмес быдэсъяны кутскимы. Сиён пӧран дорын но, коридорын но, комнатаямы но кырӟаськом вал. Володя но кылбуръёс но крезьгуръёс гожъялляз. Ми отын творческой улонын пӧзимы. Али Володя вордскем гуртаз ик, Пичи Пурга ёросысь Вуж Мӧнья школаын, дышетэ.

'''— Кудӥз нырысетӥ кырӟанъёсты пӧлысь сюлэмдылы тужгес но матын кылиз?'''

— Ӵошатскыса сямен ми соку удмурт но, ӟуч но кылъёсын гожъяллямы. Ваньзэ ӵош кырӟаллямы. Эшъёсмы вӧзамы пуксьылӥзы. Нош тужгес но тодмоосыз, со вакытысь яратоноосыз — «Ой бен мар-о каром?», «Ой, ёй-ёй, сюлэмы». Нырысетӥзэ ас вакытаз туж чебер кырӟалляз Валериан Исламгареев, музонъёссэ — Иван Григорьевых но Николай Уткин. Нылпи кырӟанъёсме школаосын но нылпи садъёсын мыло-кыдо кырӟало.

'''— Шулдыресь студент вакытъёс туж ӝог ортчо. Университетэз йылпумъяса, кытчы ужаны интыяськиды?'''

— Практикаме асьме школаын ик ортчи бере, ужаны но отчы ик кыльыны малпай вал. Мон отын дышетскон вискам ик одӥг арзэ крезьгурлы дышетӥ, собере берен Иже шонтыны малпай. Та сярысь тодыса, анай-атаелэн мылкыдзы куашказ. Мон угось соослэн осконзы вал, юрт кутӥсьсы луо шуыса, малпазы. Одӥг нуналэ Никвладэн пумиським: мын ай, шуэ, «Дась лу!» газетэ ветлы, отын интызы вань кадь. Гожъяськемме тодо ни вал бере, монэ соку ик ужаны кутӥзы. Туж тунсыко вал отын. Коллектив умой. Мыным удалтӥз: тодмо адямиосын Герман Ходыревен но Леонид Фёдоровен одӥг отделын ужаны кылдӥз. Соос монэ трослы дышетӥзы. Командировкаосысь ик ӧм пыраллялэ: я газетлы гожтӥськон, я нылпиосын пумиськон. Уно саклык висъяллямы школаын дышетскись нылпиослы. Кӧня гожтэтъёс пиналъёслы лэзьяллямы! Со ласянь уката адӟем карымон ужаз Герман Алексеевич. Отысен ик монэ армие басьтӥзы.

'''— Нош кызьы редакторлэн пуконэз дорозь вуиды?'''

— Пумиськылонъёс дыръя концертъёс но радъяськом вал. Анай-атайёс но нылпиос шумпотыса пумиталлязы. Газетлэн 60 ар тырмонэзлы дасяськыкумы, редакторлы секыт йӧтоз шуыса, монэ солы воштӥсе юнматӥзы. Бӧрысь шаерамы выльдӥськон аръёс кутскизы. Редактормы Анастасия Гребина Удмурт радиое ужаны кошкиз. Монэ со интые ӵектӥзы. Редакторлэсь ужзэ тямыс аръёс пала быдэсъяй.

'''— Собере тӥ нош асьтэлы «йырвисён» шедьтӥды — аспирантурае пыриды. Мар муген со «визь шумесэ» вуиды?'''

— Мыным кылъёс пушкын бугыръяськон котьку но тунсыко потылӥз. Соос мыным улыны маза ӧз сётылэ. Озьы фин-угор кафедраысь Валентин Кельмаков профессор дорын дышетски.  Ужъёсы калыке поттэмын ӧвӧл на. Вӧлмытыны быгатысал ке, умой луысал.

'''— Проза удысын асьтэлэсь кужымдэс ноку ӧд эскере-а?'''

— Одӥг-кык верос гожтыны выри ик, но валай: со удыс мынам ӧвӧл. Верос гожтыны пуксисько но, со кылбур луыса вордӥське. Соин ик адями улонын котьмае но аслэсьтыззэ шедьтыны кулэ. Уг ке пӧрмы, малы астэ ачид курадӟытонэз.

'''— Кылэме вань, висеменыды сэрен огвакытэ туж курадӟиды. Кызьы эзельысь потӥды?'''

— Мон пичи дыръям юн кынмаськем вылэм. Со али но туж зол шӧдӥське. Пичи гинэ кынмисько ке, ньылоны кырӟаны люкетэ ини. Собере 1988-тӥ арын туж зол виси. Нуналлы быдэ ульчае бызьылыны потасько вал. Куазь кезьытэн-а, мар-а одӥг нуналэ синмам жаг пырем кадь луиз. Тодмо луиз: лулсӥез чигем. Собере кӧня эмъяськоно луиз! Одӥг врач но юрттыны ӧз быгаты. ӧжыт гинэ кулыса ӧй кошкы, температурае 40-озь ӝутӥське. Шудэ вылэм на, лэся, туно-пеллёос монэ пыд йылам ӝутӥзы. Со ваньмызлы осконтэм вал. Больницаын кылльыкум ай, ас поннам малпасько: улонысь кошкисько ке, пиналъёсы пичиесь кылё. Ярам, соосты будэтыны анай-атай юрттозы. Кылбуръёсы вань, кырӟанъёсы калыке вӧлмемын. Нош кыл пумысь веран-малпанъёсы шараятэк кылё.

'''— Букояды куинь пар валъёс кыткемын: кылбур, крезьгур но кырӟан. Кудӥзлэн валдылэн серметэз золгес валтэ?'''

— Мон, университетын дышетскон вакытысен кутскыса, кылъёсын тунсыкъяськылӥ: малы сое озьы шуо, тазэ — тазьы. Со мылкыд ик, лэся, тӥни, наукае вуттӥз. Нош кырӟанэн но быдэс ӧй люкиськы. Висказ-висказ гожъяллясько. Малпан кылдэ ке, кылбурзэ но, гурзэ но луэ ини лэсьтыны.

'''— Бӧрысь тӥ асьтэды эскериды на телевидениын но, «Удмурт дунне» газетын но. Гожъяськон удысысь кошкыса, асьтэды ышем-йыромем муртэн ӧд шӧдэ-а?'''

— Телевидениын ар ужаса, эскери. Но со мынам вылымтэ: ӧзгес  пӧрмы отын. Гожъяськон удысысь кошки ӧй шуысал: творческой отпуске потӥ. Газетын уж ласянь ке, адямилэсь со ваньмон дырзэ быдтэ. Ялан кинэ ке, я мае ке гожтон сярысь сюлмаськоно, герой утчано. Ас мылкыдыдъя, кыллы сӥзем эскеронъёсъя ужаны шуыса, выль удысэ выжи.

'''— Нош али кыӵе удысын тыршиськоды?'''

— Нефтяникъёс дорын тыршисько. Но кылъёс, усись куаръёс сямен, ялан мон котыртӥ бергало.

'''— Сямды востэм уг поты-а? Сцена вылэ вамыштыкуды, куалекъян-кышканды уг кылдылы-а? Кызьы дӥсьтӥды кузпалэныды тодматскыны?'''

— Сцена вылэ потыкум,  куалекъясько. Куара бордын нимысьтыз ужано. Со медаз пуксьы шуыса, сюлмаськоно. Сцена бадӟым кужымез кулэ каре.

Нош вуоно кузпалэлы — Олялы — мон синмаськи, университетэ дышетскыны пырыкум, со куинетӥ курссэ йылпумъя ни вал. Ог-огмылэсь мӧзмыса, кема ӧм улэ, Эгра ёросысь Удмурт Лоза гуртысь нылэз пурга кен кари.

'''— Вӧзады юрттӥсьёсты, кык пиосты, быдэ вуизы. Соосты но гожъяськон ӧр ас бордаз ӧз кыскы-а?'''

— Городын будыса, бадӟымез Миша пимы кышнояськиз но семьяеныз гуртэ улыны кошкиз. Миша пичи дырысеныз Тылоын улыны яратылӥз. Мемеен тятя табере пересьмо ини. Шумпотӥсько: мон соослэсь малпанзэс ӧй ке но быдэсты, пие пересьёсты утялтэ-чакла ини. Солэн Ярослав но Кирилл пиосыз будо.

Пичиез Алёша пимы милемын ӵош улэ. Солэн но пиез будэ ини. Алёша компьютеръёсын выре. Кузпалы Ольга Николаевна Ижысь усточиослэн школаязы но нылпи садын воспитатель луыса тырше.

'''— Озьыен, тӥ узыр песятай: куинь нуныкайёсты будо. Улонады мар лэсьтымтэез кылиз на кадь потэ?'''

— Лэсьтонэз туж трос на. Сое ваньзэ шара верам уг поты. Малпанъёс мед быдэсмозы, йылаз-пумаз гинэ мед вуозы.

'''Источник:'''

[http://elibrary.unatlib.ru/handle/123456789/9830 Возняков, В. Б. Кылъёс куаръёс сямен бергало : беседа с бардом, чл. Союза писателей РФ и Союза журналистов РФ в связи с его 50-летием] / Владимир Возняков ; записала Л. Тихонова // Удмурт дунне. - 2011. - 5 авг. - С. 6, 11. - (Удмурт кизилиос).]

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]