Возняков Владимир

Материал из Воршуда
Версия от 17:14, 30 января 2018; Ladamiri (обсуждение | вклад) (→‎Библиография)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Владимир Борисович Возняков - удмурт кылбурчи, бард, Россииысь писательёслэн огазеяськонзылэн ёзчиез.

Ельцов Алексей

Улон сюресэз[править]

Удмурт кылбурчи, бард Владимир Борисович Возняков вордӥськиз 1961-тӥ арын 31 июле Пичи Пурга ёросысь Тыло (Сырьезшур) гуртын. Анай-атаез вань улонзэс тыршизы колхозын. [1]

Владимир Возняков асьме шаерысьтымы тодмо удмурт писательёслэн Самсоновъёслэн выжыысьтызы. Со Семён Александровичлэн сузэрезлэн пиез луэ. [2]

Анайзы атайзы туж кырӟасесь вал. «Тодӥсько на, анае куд-ог дыре крезьгуръёс но малпалляз. Бӧлякен юмшакузы коркамы пырись дуно кунооссэ ас гурпуктэм кырӟанъёсыныз пумиталляз». Пизы выжыязы мынӥз, луоз. [3]

Вордскем Тыло гуртаз

Анаез Вовазэ пичиысен ик арганэн шудыны, эктыны дышетскыны мылкыдзэ ӝуткаса улӥз. Куинь-ньыль арес дыръяз пичи арганэн резь гинэ шудылэм кариз. Сузэрез эшъёсыныз тапыр гинэ экто вал. Нош куатетӥ классэ мыныкуз, клубысь арганэн удмурт эктон гуръёсты шудыны йӧндыре вал ини. Собере солы аслыз зэмос арган басьтӥзы… «Кырӟан сярысь ке – созэ пичиысен ик яратӥсько. Покчи классъёсысен ялан валтӥсь кырӟась карылӥзы. Огпол, 8 Мартлы сӥзем ӝытын, «Как служил солдат службу царскую» кырӟанэз одӥг нылашен ӵош быдэстӥмы но, кышноос бӧрдыса кылзӥзы. Малы ке со сюлэмам кылиз». [4]

Бобья Учаысь тямыс классъем школаез йылпумъяса, 1976-тӥ арын В. Возняков дышетскыны пыриз Можгаысь педучилищее, татын соку туж умой ужаз литературно-творческой кружок, соин кивалтӥз поэт но прозаик Г. Д. Данилов. Егит гожъясь мылысь-кыдысь пыриськиз кружоклэн занятиосаз. Педучилищеын музыкальной грамотаез валаны, гитараен но баянэн шудыны дышетӥзы. Ваньмыз со туж юрттӥз, кылбуръёс гожъян бордысен кутскыса, кырӟанъёс кылдытон уже кыстӥськыны. [2]

«Али ке но тау карисько педучилищелы. Малы гинэ ӧз дышетэ милемыз отын! Баянэн, гитараен, горнэн шудыны, чебер эктыны, фото поттаны, киноаппаратэн ужаны, суредаськыны, гожъяськыны, киужен вырыны но трос-трос мукетъёссэ, кудъёсызлы ми, гуртын будэм пиналъёс, валамон ни, ноку но ӧм дышысалмы мукет интыын. Уката ик ми палэнысь гуртэ дышетскыны ветлоно луим бере, школаын кема ӝегатскыны уг луы вал, дорамы дыртылӥмы», – тодаз вае Владимир Борисович. [4]

1980-тӥ арын пыриз дышетскыны удмурт университетлэн филологияя факультетэзлэн удмурт отделенияз. [1]

Татын дышетскыкуз но Володя тэк ӧз улы, ветлӥз «Чипчирганэ», литературно-творческой кружоке, кудӥныз трос аръёс ӵоже кивалтӥз Д. А. Яшин.

1985-тӥ арын, дышетсконзэ йылпумъяса, кутске ужаны «Дась лу!» газетын. Кӧня ке гинэ ужаса вуэ, басьто армие. Служить карыны сюре Приморьее. Со вакытэ солдатлэн вордӥське кыкетӥез пиез, но сое демобилизовать каро. Владимир Борисович берен берытске редакцие. Сое куто валтӥсь редакторлэн воштӥсез должносте. Нош 1992-тӥ арын луэ газетлэн валтӥсь редакторез.

Володя Возняковез республикаямы уноез тодо. Тужгес но ярато сое егитъёс: соослы ик сӥземын ук Володялэн ваньмыз сямен кырӟанъёсыз. Ваньмыз сямен школаын дышетскись пиналъёс со вакытэ кырӟало, дыр, солэсь кырӟанъёссэ. Угось «Дась лу!» газетлэн районъёсын ортчылӥсь праздникъёсаз самодеятельной композитор но кылбурчи (тросэзлы кырӟанъёсызлы со ачиз ик кылъёс но гожъя ни) пиналъёсын аслэсьтыз кырӟанъёссэ дышетылэ. Нылъёс но пиос соосты шумпотыса кырӟало: «Вордскем нуналэ», «Мон но сое кузьмало» но мукетъёссэ. [5] (6)

2001-тӥ арын «Удмурт дунне» газетлэн лулчеберет ёзэтлэн редакторез.

19931997-тӥ аръёсы дышетске аспирантураын УдГУ-ысь финн-угор языкознаниея кафедраын. [1]

Гожъямъёсыз сярысь[править]

Гожъяськыны Володя вазь кутске. Ньылетӥ классын дышетскыкуз гожтэ нырысетӥ кылбур. Пичи дырысеныз ик «Дась лу!» газетэн эшъяське. Мукет пиналъёслэсь гожъяськемзэс адӟем карыса, со но маке со редакцие ыстылны кутске. «Куинетӥ-ньылетӥ классын дышетскыкум, мазэ-созэ уггес валаськы на вал ай, гожтэтъёсме но печатной букваосын ысъялляй, малы ке шуоно, малпасько вал, со гожтэтъёс озьы ик газет баме пуксё шуыса…», – вера Владимир Борисович. [4]

Уката но кылбурчи мылкыдыз В. Возняковлэн бурдъяськиз университетын дышетскыкуз. Соку отын дышетскизы тунсыко адямиос – кылбурчиос В. Котков, В. Сергеев, В. Шибанов, М. Федотов. Соос ӵош улӥзы, гожъяськылӥзы но эскерылӥзы произведениоссэс, соосъя кырӟанъёс но кылдытылӥзы, асьсэос ик гитараен шудыса кырӟаллязы. Университетын дышетскыкуз ик Володя Возняков Володя Алексеевен умой кусып тупатӥз (соосты «кык Володьёс» гинэ шуылӥзы), солэн кылбуръёсызъя трос гинэ кырӟанъёс гожтӥз. [2]

Соослэн усто пӧрмылӥз. Та пиосты сцена вылысь но ӵем адӟыны луэ ни вал. Но тани дышетсконзэс йылпумъязы но пиос пӧртэм интыосы кошкизы: одӥгез Володя – Игра районэ дышетыны, мукетыз «Дась лу!» газетэ. Люкиськизы. Нош кырӟан-веранзэс ӧз вунэтэ. Быгатонзэс кыкназы но асьсэ ӧртӥ ӧръязы. [5]

Кырӟанъёсыз Володя Возняковлэн ӧжыт ӧвӧл. Йӧнала ӟеч аранжировка дасяса поттӥз кӧня ке альбом. Соосты дасян бордын ужазы Рушан Гусмановен композиторен ӵош. Альбом дасян борды кутскиз вал 1989-тӥ арын. Но висьыны усеменыз, кема кырӟамез луытэк улӥз. Озьы вить ар ортчыса гинэ быгатӥз азинтыны та ужзэ. Дырзэ тэк быдтонтэм понна, «шутэтскон» аръёсаз, устооссэ кырӟанъёссэ огинэ люкаса, нотаосын ӵош «Лык ми доры, Дон Кихот» (1991) книгазэ поттӥз. [4]

Автор уг вунэты пиналъёсты но егитъёсты, соослы сӥзьыса, кылбуръёс но кырӟанъёс кылдытэ. Озьы пӧрмизы солэн «Вай тодад выльысь», «Мемиелы кузьмало», пиналъёслэсь ӝутскем мылкыдзэс адӟытэ но данъя «Шудо нунал» кылбур-кырӟаназ…

Егит поэтлэн, крезьчилэн, кырӟасьлэн данакез кылбур-кырӟанъёсыз сӥземын егитъёслы, яратонлы. Сыӵеесь луо «Сюлэмын ке йырчукин»,

В. Возняков но Н. Постников

«Вераса, оло, ӧй ву?..» но мукетъёсыз. Ӵапак удмурт калык кырӟанъёсын сямен ик данъя егит автор яратон нылзэ, уката но сюлмаз мед тупалоз шуса, нимысьтыз риторической юанъёсын вазиське гажанэзлы «Сюлэмме шунтэ» кырӟаназ:

Кизили усиз-а,

Арган гур улӟиз-а,

Яратон лыктӥз-а куное?

Югыт толэзен-а,

Небыт уй тӧлын-а

Ӵошатом тонэ мон, дуное?..

Мон дорам лыктӥз-а гажанэ?

Шыпыт кылъёсыд-а,

Пеймыт синъёсыд-а –

Мар-о меда меда сюлэмме шунтэ?

Яратонлы сӥзем произведениосын суредаське гажано ныллэн яке пилэн мальдытӥсь тусбуез: номыриз но мултэсэз ӧвӧл, яратӥсь муртлы ваньмыз ик дуно, со гажанэзлэсь нокыӵе но шексэ уг но адӟы, уг но шӧды.

В. Возняков вордскем палзэ данъясь кырӟанъёс но кылдытӥз. Озьы вордскизы солэн В. Алексеевлэн «Тӥ котьку мынам сюлмам» кылбурезъя кылдытэм Вуж Монья гуртэз данъян кырӟанэз. Таизлы матын луэ А. Титовлэн «Шундыед берга, берга» кылбурезъя Баграш-Бигралы сӥзем кырӟанэз но. Нош тани вордскем шаерезлы, шорсюлмызлы Пичи Пургалы сӥзьыса, Володя «Пичи Пурга» кырӟанэныз зэмзэ гимн кылдытӥз. [2]

Володялэн кырӟанъёсыз эстрадалы матынэсь. Соин со дыре кылдэм выль вокально-инструментальной ансамбльёс чидатэк возьмало егитъёслы сӥзем кырӟанъёссэ. Ас кырӟанъёсаз В. Возняков удмурт шӧм пыӵатыны сюлмаське. Соин ик кырӟанъёсыз калыклы кельшо.[5]

Озьы тӥни Пичи Пурга музъем вылын Тыло гуртын вордӥськем поэт В. Возняков луиз на кырӟась крезьгурчи, данъяз ас палзэ, нош кырӟанъёсыз солэн вӧлмизы вань удмуртъёс пӧлы. Гуръёсыз но солэн пӧртэмесь: вань отын ик патетической, лирической, шумпотӥсь мылкыдоесь гожтэмъёсыз. Сои ник Владимир Возняковлэн творчествоеныз тодматскыку, одно ик крезьгурен герӟаса сётоно. Возьматоно кылбур чуръёслэсь крезьгурен кусыпсэс, кыӵе интонациез соизлэн яке таизлэн кырӟанлэн, кызьы со герӟаськемын кылбурлэн пуштросэныз яке кырӟанлэн аспӧртэмлыко гуреныз. [2]

Библиография[править]

Книгаосыз[править]

Кытысь потэ лысву? : кылбуръёс, выжыкыл-поэмаос. – Ижевск : Удмуртия, 1996. – 60 с.

Лык ми доры, Дон Кихот : пиналъёсы, мӧйыослы кырӟанъёс. – Пичи Пурга : 1991. – 52 с.

Введение в этимологию : монография / В. Б. Возняков. - Ижевск : Удмуртия, 2017. - 286, [1] с.

Статьяосыз[править]

Ас вылам басьтӥсько // На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 223.

Мар со эшъяськон? // Зарни дэремен шунды : семьяын лыдӟон книга. – Ижевск, 2006. – С. 32–33.

Утисьмы ; Выль быж ; Сизь ; Мый ; Космосчи Очи : кылбуръёс // Кизили. – 2012. – № 2. – С. 3-7.

Кырӟанъёсыз[править]

Самсонов А. Анайлэн киосыз : "Туж лякыт но сюлмо..." // Кизили. – 2010. – № 3. – С. 13.

Маскарад : "Воректӥз кизили кыз йылын..." / кылъёсыз В. Возняковлэн, крезьгурез В. Старшихлэн // Кенеш. – 2011. – № 5/6. – С. 41.

Пумита школамы : "Сяськаос пӧлын..." / крезьгурез но кылъёсыз В. Возняковлэн // Кизили. – 2009. – № 7. – С. 4.

Яратӥ : "Гуртамы тулыс уй вуыку..." // Кенеш. - 2011. - № 7. - С. 106.

Сюлмы, вера тон : "Вал соку тулыс ни..." // Кенеш. – 2011. – № 7. – С. 109.

Ми - покчи "кизилиос" : "Ыбыса" инме ракета..." // Кизили. – 2011. – № 7. – С. 9 : цв. ил.

Лык, мусое-гочие : "Кошкиды вӧзтӥ дэмен..." // Кенеш. – 2011. – № 7. – С. 107.

Кыдан – оскон : "Кисыяд чырмыт шула ке тӧл..." // Кенеш. – 2011. – № 7. – С. 104-106.

Вуоз ӵукнаед : "Ыр тӧл лопыртӥз мылкыдме..." // Кенеш. – 2011. – № 7. – С. 108.


Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.

Уже кутэм литература[править]

  1. 1,0 1,1 1,2 1.Ермаков Ф. Владимир Возняков (1961) // Писатели и литературоведы Удмуртии : биобиблиогр. справ. / сост. А. Н. Уваров. – Ижевск, 2006. – С. 33–34.
  2. 2,0 2,1 2,2 2,3 2,4 Ермаков Ф. Возняков Владимир Борисович // Пурга ёросын вордскем писательёслэн творчествозы / Ф. К. Ермаков. – Ижевск, 1999. – С. 110–116.
  3. Байбекова З. «Лык ми доры, Дон Кихот» // Инвожо. – 1999. - № 7–8. – С. 35–38.
  4. 4,0 4,1 4,2 4,3 Костылева М. Куке сюлэмыд шумпотэ // Удмурт дунне. – 1996. – 24 сент. – С. 3.
  5. 5,0 5,1 5,2 Котков В. Гожъя, кырӟа, гитараен шудэ // Лык ми доры, Дон Кихот! / В. Б. Возняков. – Пичи Пурга. – 1991. – С. 1.