Вежеев Семён Алексеевич

Материал из Воршуда
Версия от 14:42, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Вормисьёсты дурись[править]

С.А. Вежеев

Шаерысьтымы Куасэн бызьылонъя федерациен берло куинь арзэ быгатыса кивалтэ Семён Вежеев. Ас вакытаз ачиз но куасэн бызьылэмын, спортъя мастерлэсь куронзэ быдэстэмын. Отӥяз пӧртэм интыосын тренерлэсь но судьялэсь ужзэ быдэсъяз. Арлы быдэ шаерамы ортчылӥсь «Ижысь винтовка» ӵошатсконын дас пол валтӥсь секретарь вал. Всесоюзной категориен судья янгышъёстэк тыршемез понна ветлӥз дуннелэн биатлонъя чемпионатаз Финляндие. Спортэз азинтыны юрттэмез понна солы сётэмын «Россия Федерациысь мугорез кыдатонъя отличник» но «Удмуртиысь мугорез кыдатон удысысь дано ужась» нимъёс.

Арлыдыз шоры уг учкы, туннэ но сюлмаське шаерысьтымы куасэн бызьылӥсьёс сярысь. Семён Алексеевич ӝоген пусъёз 66 арес тырмонзэ, нош шораз учкыса, 50 сяна уд сёты.

- Вордски Сьӧлта ёросысь Мартын починкаын (Максимовцы). Бӧрысь со быдэсак Югдон посёлоке выжиз. Семьяямы куинь пинал будӥз. Бадӟымез – Григорий Николаевич. Солэсь атайзэ Быдӟым ожлэн нырысетӥ нуналъёсаз ик быдто, гуртамы нырысетӥез похоронка нэнэмылы вуэм. Ожмаськон бырем бере анаймы кыкетӥзэ семья кылдытӥз, мон сяна, Ирина сузэрмы вордскиз.

Гуртамы соку 12 корка лыдъяськиз, ваньмаз сямен Вежеевъёс улӥзы, вал на Ложкинъёс, Берестовъёс но Туйматовъёс. Пиналъёс ог дасо кузя гинэ люкаськылӥмы. Соин, лэся, гуртын улон туж мӧзмыт потылӥз, электричество но радио сярысь соку ӧм ик тодылэ. Ньыль классъем Александровской школае вамыштыса, выль дуннее вуэм кадь потӥмы. Одӥг дышетӥсь кык классэз визьнодаз. Уд но оске, 4-тӥ классын дышетскыкум, быдэс арня эшъёсме дышетӥ. Классэн кивалтӥсьмы эмъяськыны кошкиз, интыяз монэ кельтӥз. Бен, куд-ог дыръя артысь кабинетысь дышетӥсь визь-кенеш сётылӥз ик. Классэн кивалтӥсьмылэсь вань верамзэ быдэстӥ, со понна ческыт конфетъёсын, сушкаосын куноятӥз.

- Иське, пичи дыръяды ик туж визьмо вылӥллямды?

- Со аръёсме тодам вайисько ке – паймисько. Кыкетӥ классын дышетскыкум, нырысетӥ четверте одӥг предметэн гинэ «куинь» потӥз, кылемъёсыныз – «кыкъёс». Нэнэен дядяе куспазы ӧзгес тупаллялэ, куд-ог дыръя керетылӥзы но. 1-тӥ классэз йылпумъяме бере нэнэмы городэ кошкылӥз, сьӧраз монэ но сузэрме кутӥз. Лэсьтӥськисьёслэн бригадаязы ужаз, нош улӥмы пичи мунчоын. Куд-ог нуналъёсы нэнэмес лумбытэн ӧм адӟылэ. Сыӵе улон мыным ӝог акыльтӥз, бадӟым кариськыса, лэся, Сьӧлта палъёсам бертыны потӥ, но кыдёке ӧй вуы. Кык толэзь пала аслым ачим кузё вал, огнам поръяй тэльёстӥ, возьёстӥ. Сием потонме буйгатылӥ мурт бакчаосысь помидоръёсын, мукет емышъёсын. Мынэсьтым ышылэмме нэнэе синйылтылӥз, нош кудпала мыныны, кытысь утчаны ӧз тодылы. Ужзэ октябрь толэзе йылпумъяз. Собере ваньмы Мартын починкаямы бертӥмы. 2-тӥ классын дышетсконме 4-тӥ октябре мытӥ. Ярано коть, дышетӥсьмы ӧз тышкаськы, тодон-валан люканы юрттӥз. Начальной школаме похвальной листэн йылпумъяй.

Отӥяз Сьӧлталась шор ёзо школаын тодон-валан люкай. Талэсь азьвыл ньыль ар ӵоже 2 иськеме солань-талань ветлӥмы ке, Сьӧлтала выжыса – 6 иськеме.

- Ялан пыдын ветлӥды-а?

- Маин на эшшо? Гужемзэ пыдын, толалтэзэ куас нергеен, нырысетӥ велосипедэз 6-тӥ классын дышетскыкум адӟи. Покчи классъёсын дядяе мыным нырысетӥ куас куасалтӥз, со кемалы тырмиз. 6-тӥ классысен «Пионерская правда» газетлэн призэз понна ёрос ӵошатскон дыръя вань эшъёсме кельтӥ, соку физрукмы дораз ӧтиз но школаысь умойгес куас сётӥз. Но мон шаянгес вылӥськем, ӵуказеяз ик сое тӥялтӥ. Малпай вал куаретозы шуыса, юнме сюлмаськиськем. Номыр вератэк, кыкетӥзэ сётӥзы. Сое но толэзьлы сяна ӧй тырмыты. Собере гинэ нэнэе мыным Валамазын лэсьтэм куас басьтӥз. Со дырысен спортсменъёслэн радазы шеди.

- Спортын вормонъёстэс лыдэ басьтыса ик, асьтэлы профессия но бырйиды, дыр?

- Школаез йылпумъяны ӧз кылды. Дядяймы пӧртэм гуртъёстӥ, ёросъёстӥ ужаса ветлэмен, семьямы курадӟысагес улӥз. Нылпиосты сюдон, утялтон нэнэмылэн пельпум вылаз погыльтэмын вал. Агаймы, 8-тӥ классэз йылпумъяса, кошкиз бере, мон но со сямен палэнэ кошконо кариськи. Вылаз ик, со вакытэ дышетон удысын воштӥськонъёс ортчизы, парта сьӧрын, пе, 11 ар пуконо. Кема дышетсконо шуыса, вань пиос куспетӥ кошкылӥзы. Эшъёсыным ӵош мон но Сарапулысь радиотехнической училищее йыгаськи. Нырысетӥ экзаменлы туж сюлмысь дасяськимы, математикаен дышетӥсь доры ветлӥмы, ватсаса тодон-валан люкамы. Вань задачаос пӧлысь 1-2-сэ гинэ лэсьтыса ӧм вуттэ. Ӧчкарем кадь, экзамен дыръя мыным ӵап соос ик сюризы. Шузи кариськыса, мукет вариантлэсь задачаоссэ лэсьтоно вылэм. Тышкаськозы кожаса, пӧяськыны ӧй дӥсьты. Мукет эшъёсылы но студент луыны ӧз кылды. Бен, Ижысь мукет училищеосы йыгаськылӥмы ик, но ваньмыз токма луиз. Документъёсты нокытчы ӧз кутэ ни. Нэнэмылэн агаез Воткаын улӥз, отын, пе, 2 номеро техучилищезы вань. Отчы ветлоно кариськимы. Шудмы вылэм, милемлы кык удыс ӵектӥзы: формовщик яке кузнец. Нырысетӥез сярысь кылэм-адӟеммы ӧй вал бере, дурисьёс доры вамыштӥмы. Со вакытэ ик ӝыт школае документъёсме сётӥ. 10 толэзь дышетскытозям, котькытчы вуттӥськи, бадӟым спортэн но эшъяськи. Пӧртэм ӵошатсконъёсын вормонъёс басьтӥ.

- Дурисьлэсь яке спортсменлэсь удыссэ бырйиды?

- Воткаысь училищеез йылпумъякумы, йырамы кеньыр люкаськем ни вылэм, лэся. Спортэн эшъяськонме уретонтэм вылысь Ижысь трудовой резервъёсъя областной советэ вамыштӥ. Отын пукисьёс мынэсьтым сюлмаськонме кылзӥзы но Воткае гинэ, пе, эн кыльы. Ижевске ветлэме юнме ӧз луы, училищеысьтымы куать спортсменлы Ижысь механикая заводэ ӧтён вуиз. Нырысь нуналъёсаз ик заводлэн сборнояз кутӥзы. Станок сьӧрын трос ик ужаса ӧй вутты, ялан сборъёсы ветлӥмы. Мугормес кыдатӥмы «Металлург» стадионын, куас сюресъёс сяна, отын ӝужыт трамплинъёс но вал. Шаерысьтымы вань кужмо спортсменъёс отчы люкаськылӥзы. Галина Кулакова но пӧламы вал. Озьы ке но, куинь ар ортчыса, улонам бадӟымесь воштӥськонъёс кылдӥзы.

- Армие шат басьтӥзы?

- Ӧз, сурон сапег нуллыны ӧз кылды. Школаын дышетскыкум, нылашлы синмаськемын вал. Кусыпъёсмес ӧм ыштэ школа бере но. Озьы мон 19 арескам кузпалъяськи но берен вордскем палъёсам бертӥ. Бен, соку мон шаерысьтымы егит пиос пӧлысь тужгес шаплыез куасэн бызьылӥсь вал. Спортэз но аналтыны жаль потӥз, яратон но бордаз кыскиз. Варманай но ми понна сюлмаськиз, озьы мон «Урожай» ДСО-лэн Сьӧлталась ёзаз вуи, отӥяз соин кивалтӥсе пуктӥзы. Вордскем палъёсам бертӥ ке но, ижъёс тэк пукыны маза ӧз сётэ, сборъёсы кысказы. 1966-тӥ арын Архангельске потаса, спортъя мастерлэсь куронзэ быдэстӥ. Мурманскын «Праздник Севера» дыръя сое юнматӥ. Озьы быдэс тол Удмуртилэн палэназ улылӥ. Вордскем палъёсамы апрель толэзь пумын бертылӥ. Гуртоос шорам паймыса учкылӥзы, соос пиджакен, туфлиосын ветло ини, мон инмысь усем мурт кадь – зӧк курткаен, куасъёсын, шуныт ботинкаосын. Кык ар озьы ортчем бере варманай куаретыны кускиз. Городэ, пе, улыны мынэ, гуртын номырлы уд яраськы. Милям соку Лена нылмы вордскемын ни вал.

- Бурдъяськыса ик городэ вуиды, дыр?

- «Буммаш» заводэ вамыштӥ, мастер-воспитательлэсь, комсорглэсь ужзэ ӵектӥзы, нош пиналмы сярысь кылэмзы ик ӧз поты. Шуг вераны, кӧня витёно луысал нылпи садэ путёвка. Одӥг ӵошатскон дыръя «Нефтемаш» заводлэн спорт понна кыл кутӥсез дораз ӧтиз, профкомын ужасьёсын, пе, кенешом. Кема малпаськыса ӧй улы, ӵуказеяз ик отчы вамыштӥ. Соос монэ уже кутӥзы, соку ик садике путёвка сётӥзы, патерын ӧжытак улэммы бере пичильтык сэрег висъязы. Нош куинь ар ортчыса, Наташамы вордскиз. Соку ини бадӟымзэгес квартира сётӥзы. «Нефтемашын» кема ужаса ӧй вутты, спортсменъёслэсь быгатонлыкъёссэс будэтонъя элькун школае ӧтизы, 6 ар директорлэн воштӥсез вал. Со вакытэ «Нефтемаш» завод дорысен аэропортозь асфальт сюрес лэсьтӥзы. Солы тужгес шумпотӥзы спортсменъёс. Эсьмаса, куасэн бызьылӥсьёс гужем но мугорзэс кыдатӥзы. Пу куасъёс борды асьмеос ик питранъёс юнматылӥмы. Кунгож сьӧрысь спортсменъёс сямен ми но роликъёсын ворттылӥмы. Бен, шорамы чиньыен возьматӥсьёсыз вал ке но, питрано куасъёсмес ӧм куштэ.

- Иське, вань ужъёсты вӧй вылтӥ кадь мынӥзы?

- Шумпотыны вазь вылэм на. Азьвыл аръёсы сямен, толалтэоссэ сборъёсы потай. Кузпалы монэ пыкылыны, синъёсме усьтыны выриз ке но, спортэз сяна, номыре ӧй адӟылы. Укмыс ар улэммы бере люкиським. Ар ортчыса, мукетсэ яратонме пумитай. Жаляса верано, таиныз но кема улыны ӧз кылды – вить ар гинэ, кыкетӥ кузпалме секыт висён погыртӥз.

Кайгырыса улыны маза ӧз сётэ эшъёсы, ялан ӵошатсконъёсы кысказы, нылкышно тодмооссэс дэмлаллязы. Спорт ик юрттӥз куинетӥ кузпал шедьтыны. 1981-тӥ арысен Валентина Павловнаен улӥськомы. Ас вакытаз шаерысьтымы одӥгез кужмоез пыдын бызьылӥсь вал. Тодматскыкумы ужа ни вал спортсменъёслэсь быгатонлыкъёссэс будэтонъя школаын валтӥсь специалист луыса. Юля нылмылы табере ӝоген куамын арес луоз ни. Быгатэмея нылъёсылы юрттӥсько, вордскем нуналъёсмес ӵош пусйиськомы. Шумпотӥсько, ваньзы соос вылӥ дышетскемын: Ленамы Ижысь огеныз телекомпаниен кивалтэ, Наташамы эмъясь, нош Юлямы юрист.

- Кузпалды спортэн уг вожа-а?

- Ужмы сыӵе, ваньзэ вала. Арнязэ ужаськомы ке, шутэтскон нуналъёсы ӵошатсконъёсыз судьясько. Балконысьтымы дӥсь ошылонмы кыкетӥ арнязэ тӥяськемын – тупатыны ваньмон дыр уг шедьтӥськы.

- Шаерысьтымы кивалтӥсьёс оскыто, тӥ, пе, одӥгез устоез судья.

- Верало бере, оло, осконо. Куасэн бызьылонъя бадӟым ӵошатсконъёс дыръя тужгес оскымон судьяосты люкаськомы. Туала арын судьяослэсь ужзэс электроника капчиятэ ке но, куд-ог дыръя со но тӥяськылэ. Сыӵе вакытэ вань оскиськон хронометръёс вылэ. Тужгес ик спринтъёс дыръя, вормисьёслэн кусыпсы секунд но уг луы.

- Одӥг ӵошатсконэз ортчытон понна кӧня судья кулэ?

- Кылсярысь, кылем шутэтскон нуналъёсы «Удмурт дунне» газетлэн призэз понна ӵошатскон но шаерысьтымы куасэн бызьылӥсьёслэн куинетӥ этапсы ортчизы. Ваньмыз-ӧвӧлэз 35 судья уже поттэмын вал, нош «Россиысь куас сюресъёс» ужрадэ 51 мурт пыриськоз. Куасэн бызьылӥсьёс понна ар ӵоже 18-20 ужрад ортчытӥське, эшшо Россиысь ӵошатсконъёс луо на.

- Куасэн бызьылонъя федерациен кивалтон чиданлыкез эскере, дыр?

- Азьвыл аръёсы Куасэн бызьылонъя федерация ньӧмыз понна гинэ ужаз, валтӥсь спортсменъёслы но нокыӵе юрттэт ӧз висъяськылы, шуыны луоз. Ярано коть, берло дыре уж интыысьтыз вырӟиз. Кун бадӟымгес саклык висъяны кутскиз. Кылем арез басьтоно ке, шаерысьтымы куасэн бызьылӥсьёс ваньзэ-ӧвӧлзэ 5 миллион манетлэсь тросгес уксё быдтӥзы, нош туэ кускерттонъёсмес юнгес золтоно луоз. Шаермылэн бюджетысьтыз миллионлы ӧжытгес коньдон висъямын. Та ласянь капчигес Россиысь сборное шедемъёслы: Шарканысь Максим Вылегжанинлы, Кезысь Константин Главатскихлы, Можгаысь Дмитрий Япаровлы но Александр Уткинлы. Соосты быдэсак дӥся-кутча Россия.

Кылем ар ӵоже Россиысь кужмо спортсменъёсын артэ мугорзэс кыдатӥз шаерысьтымы эшшо кык мурт: Якшур-Бӧдьялась Леонид Виноградов но Шарканысь Николай Хохряков. Кык муртэ ар ӵоже кунгож сьӧры поттан понна бюджетысь 1 миллион манет кулэ луиз. Асьтэос тодӥськоды, одӥг интыын лёгаськыса, кыдёке уд мыны, нош тросэз тренеръёс Сочи шоры учкыло ни.

- Нош гуртысь спортсменлы кызьы ӝутсконо Олимпиадаозь?

- Ялан бызьылыса гинэ. Туала вакытэ шаерысьтымы вань ёросъёсын кыӵе ке сыӵе спортъя школаос ужало. Жаляса верано, тренерын ужаны мылкыд карисьёслэн лыдзы арысь аре кулэсме. Тужгес шугъяськыто пичи ёросъёс: Сьӧлта, Сюмси, Грак, Кияса, Кизнер. Нош куке-соку отысь но кужмо спортсменъёс потӥзы. Вань шуг-секытъёс коньдонлэн тырмымтэез вылэ пыкъясько. Бен, шаерысьтымы кужмоосыз сьӧрло кошко. Ханты-Мансийскын валтӥсь тренерлэсь ужзэ быдэсъя аспал эшмы Сергей Крянин. Отын ик мугорзэс кыдато Валентина Новикова но Екатерина Воронцова. Быгатыкузы коньдон но мед поттозы, вормонъёс гинэ сӥзисько. Мукет улосъёслэн коньдонзы тырме пиналъёссэс но сборъёсы нуллыны. Кылсярысь, та вакытэ Г. Кулаковалэн базаяз мугорзэс кыдато Ханты-Мансийскысь нылпиос.

Азьланезлы осконмес ум ыштӥське. Удмуртиысь егитъёслэн сборноязы 26 мурт юнматэмын: 13 ныл но 13 пи. Уло но мугорзэс кыдато Югдонын. «Россиысь куас сюресъёс» ужрад ортчем бере Сыктывкаре мынозы. Шумпотоно, Россиысь юниоръёслэн сборноязы но асьме пиналъёс юнматэмын. Огъя басьтоно ке, шаерысьтымы куасэн бызьылӥсьёс пӧлысь тужгес кужмоосыз – 11 мурт – Россиысь пӧртэм арлыдъем сборнойёсы кутэмын. Азьвыл аръёсын ӵошатыса, туж бадӟым вормон со.

- Укмыстонэтӥ аръёсы, пе, спортэз аналтыса, заводэ, ужбергатӥсе пегаллямды?

- Вал сыӵе учыр. 1982-тӥ-1991-тӥ аръёсы механикая заводлэн «Металлист» стадионэныз кивалтӥ. Арнялы одӥг пол, 15-20 пала тренеръёсын люкаськыса, стадион котырмес тупатъямы-выльдӥмы. Футбол бусыосмы кык вал, озьы ик мылкыд карисьёс гужемзэ бадӟым теннисэн, толалтэзэ хоккеен шудӥзы. Ми доры быдэс городысь спортсменъёс люкаськылӥзы. Адямиослэн спорт борды кыстӥськемзы шоры шумпотыса учкылӥмы. Укмыстонэтӥ аръёс ваньзэ бугыртӥзы. Стадионлэсь куашкамзэ адӟыса, сюлмы ӧз чида, заводэ пегӟи. «Пӧсь» стаж люкан понна ар но 2 толэзе уг тырмы вал, озьы мон, литейщикын ужаса, 55 арескам пенсие потӥ.

Собере но спортэ берытскыны ӧй дырты, огдырлы ужбергатон удысэ выжылӥ. Нырысь ик ужай Ижысь гын сапег лэсьтон фабрикаын. Куинь ар ортчыса, со куашказ. Нимаз ужбергатӥсь мынэсьтым ӧз пӧрмы. Озьы нош ик спорт удысэ вуи.

- Ваньмон дыръяды но тэк пукыны, пе, уд валаське.

- Толалтэзэ шутэтскон нуналъёсты адӟылытэк ужасько, со понна капчигес шокчисько ни гужем. Ваньмон дыр шедьтӥсько ке, бакчаям дыртӥсько. Емыш будэтэм сяна, мушъёсын вырисько. Бызгетӥсьёсыным вераськисько, кузязы ветлэме понна ческыт чечызэс сёто. Вань тодмоосмылы тырме. Юрт котырам бергасько, пичильтык пуэн вырисько. Сьӧлта школаысен милемыз нимысьтыз профессиослы дышетӥзы. Мон каменщик-печниклэсь удостоверенизэ басьтӥ. Улонын туж юрттэ, корка но ачим пуктӥ, гур но шукки. Мултэс тодэм нянь уг куры вылэм.

Етӥз луэмме синйылтӥллям сад-бакчаысь бускельёс. Трос аръёс ӵоже массивен кивалтӥ. Одӥгзэ жалясько, арлыд аслэсьтыз куасалтэ, нош аслым тыро-пыдо воштӥсьёс уг шедьтӥськы: бакчаын но, спортын но.

Источник:

Вежеев С. А. Вормисьёсты дурись / С. А. Вежеев ; записала В. Емельянова // Удмурт дунне. - 2012. - 10 февр. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"