Вахитов Семен Сергеевич

Материал из Воршуда
Перейти к навигацииПерейти к поиску

Куды тыр визьбур[править]

С. С. Вахитов

«Семён Сергеевичлы котькыӵе юанэн вазиськыны туж капчи. Дышетскисьёсты со вала, котькудӥзлы кулэ кыл шедьтэ. Мынам пересь анае но шуэ: - Семён Сергеевич мукет дышетӥсьёс кадь ӧвӧл, со урамысен но ваньмызлы вазиське. Ассэ вылӥе уг пукты. Мыным туж кельше на дышетӥсьмылэн кырӟамез».

Кияса ёросысь Вуж Салья шор ёзо школаысь ӟуч кылъя но литературая, краеведениея дышетӥсез сярысь тазьы вера 11-тӥ классын дышетскись Ирина Петрова.

Вылӥ категориен дышетӥсь С. С. Вахитов нылпиосты шаерез тодонлы дышетонъя нимаз программа но гожтӥз. Нош лыдӟисьёсмы доры со кӧня ке арзэ пота ни калык йылолъёслы но сямъёслы сӥзем «Олле» бамын.

- Семён Сергеевич, пичи дыръяды малпаськылӥды-а нимо-дано луон сярысь? Вань калык тӥледды мед тодоз, мед адӟоз.

- Ӧй кадь. Пичи дыръям дышетӥсь луэме потэ вал. Эшъёсыным школаен шудылӥм, мон дышетӥсь кариськылӥ. Яратӥсько вал созэ но, тазэ но валэктыны. Дышетӥсьлэн ужез син азьын бере, соин но, лэся, со бордаз кыскиз.

- Нош калык сямъёсты, йылолъёсты гажан мылкыд кытысь пыӵаз?

- Нэнэе мынам - кырӟась адями. Кырӟась семьяын будэме ик фольклорен вырыны вамыш сётӥз. Ачим но али паймисько: 9-тӥ классын дышетскыкум, нокин косытэк, ручка-тетрадь кутыса, гуртысьтымы песянай доры мынӥ. Озьы ас мылкыдыя калык кырӟанъёсты гожъяны кутски.

- Мон тодӥсько, тӥ гожъяськон удысэ но кыстӥськиськоды вал.

- Школаын дышетскыкум? эшъяськи «Дась лу!» газетэн. Нош гожъяськон мылкыд пыӵатӥз мыным армиысь бертэм бускельмы Аркадий Васильевич Мартынов. Вожъяськыса но синмаськыса учкиськом вал солэн моряк дӥсез шоры. Со гожъялляз ёросысьтымы «Знамя труда», «Советской Удмуртия» газетъёсы. Одӥг пол мыным шуэ:

- Ойдо, Сеня, асьмеос «Дась лу!» газетэ материал лэзём.

Мон 4-тӥ классын дышетскисько вал. Юаз, мар, пе, школаяды ортчиз. Мади тимуровской уж сярысь. Собере верамезъя ик гожтӥ. Кӧня ке улыса, газетын мынам ивортонэ потӥз. Гуртмы понна со сенсация вал, ваньмыз та сярысь верасько. Собере ини ачим гожъяськыны кутски, нокин юрттытэк. Эшъёс но шедьтӥ газет пыр. Кыӵе ке ивортон гожтӥськод но, пиналъёс асьсэос вазисько тыныд. Озьы кӧня ке аръёс ӵоже гожтэт пыр кусып возим Валерий Нуриахметовен, Ульфат Бадретдиновен.

10-тӥ класс бере журналист луэме потэ ик вал, но УдГУ-ын сыӵе факультет вылымтэ, пыри удмурт филология факультетэ. Александр Григорьевич Шкляев доры журналистикая специализацие ветлӥ ик. Нош дышетсконме йылпумъяса, распределениея кошки аслам гуртам.

- Уже куриськыса, редакциосы нырдэс ӧд чуртналлялэ?

- Дӥсьтон ӧзгес тырмы, шаплыгес кариськоно вылэм.

- Жаляськоды-а?

- Туж ик уг. Кызь вить ар ужасько ни школаын, гожъяськонлэсь но ӧй куштӥськы. Дышетон но гожъяськон ог-огзылы юртто, со туж кулэ маке аслэсьтыд уждэ муромытон, паськытатон понна.

- Туж умой тодӥсько на студент дыръяды драмкружоке ветлэмдэс. Тӥледды артист но шуыны луоз.

- Университетысь драмкружокын мон вить ар ӵоже староста вал. Кивалтӥз кружокенымы Анатолий Андреевич Митрофанов. Быдэс республика тодэ ни вал милемды, «Ӧрӟипи» спектакльмес телевидение пыр но возьматӥзы. Шаертӥмы сяна, спектакленымы Башкирие но, Татарие но вуылӥмы. Удмурт драмтеатрлэн сцена вылаз но потаме вань, «Кам вадьсын гудыръя» спектакльын огъя сценаын шудӥ. Нош ик кусыпъёс паськытазы. Театре мынӥсько ке, артистъёс «у-у-у…» шуыса пумитало. Писательёс но тодмало. Вань со кусыпъёс, пумиськонъёс туж пайдаё. Мынам одӥг удмурт ужрадэз но, выль спектаклез но, концертэз но кельтэме уг поты. Ас вакытаз гуртамы драмкружок но нуи, художественной самодеятельносте пыриськылӥ. Али но концертъёс дасялляськом. Алигес школаысь дышетӥсьёсын ёросамы спектакль пуктӥмы. Пӧртэм ужъёсы пыриськыса, адями узыргес луэ.

- Котькыӵе удысэн тодматскон мылкыд пиналысен пыӵа, дыр. Дышетсконлы но со уг люкеты.

- Школаын дышетскыкум, «ньыльёсы» кык-куинь гинэ вал. Умой дышетскеме понна 5-тӥ классысен «Орлёнок» лагерьын шутэтски. Весь пыриськылӥ школа ужъёсы. Вуж Салья школаысь Зоя Космодемьянская нимо пионер дружинаен кивалтӥ. 9-тӥ-10-тӥ классъёсын Ермолаевоын дышетскыкум, отын школаысь комсомол огазеяськонлэн печатья сектореныз кивалтыны оскизы.

Университетын дышетскыкум, калык кырӟанъёслы сӥзем ужъёсыным научной конференциосы пыриськылӥ. Сыктывкарысь, Ужгородысь университетъёсы вуылӥ. Диплом ужме но Салья калыкелэн кырӟанъёсызъя гожтӥ. Со кырӟанъёсты нимаз книгаен но печатланы турттӥсько вал, туж жаль, уже ӧз быдэсмы.

- Семён Сергеевич, асьтэды дӥсьтӥсьтэм шуиды, нош учконо ке, кытчы гинэ уд вутскиське вылэм.

- Возьдаськись ӧй вал ик бен, шаплы но ӧй шуысал. Нош мар ке оско ке, мар ке пӧрме ке мынам, со борды мыло-кыдо басьтӥськисько. Мон адямилэсь умойзэ гинэ адӟыны, кельтыны тыршисько, уродзэ палэнтыса. Нокинэн керетыса улэме уг поты. Адями кесяське, керетэ ке, мон солы уг вазьылы, палэнско дорысьтыз. Мукет дыръя соин ик ӟеч мылкыдын вераськом ини. Кесяськыса трос уд басьты.

- Семён Сергеевич, дышетскисьёсын огъя кыл шедьтыны капчи-а?

- Пиналъёс пӧлын котькыӵеез вань. Кудӥзлы чурыт кыл но верано луэ, нош куд-огзэ маяллятэк уг луы: «2» пуктод но куатаськоз, дышетскон мылкыдыз куашкалоз. Пиналлэсь психологизэ ӟечгес валаны кутскиськод ни, кӧня ке аръёс ужаса гинэ, улон ваньмызлы дышетэ. Тани университетын ми психологиез вылтӥзгес гинэ ортчим, нош та предметлы бадӟымгес саклык висъяно вылэм: вуоно дышетӥсьёсын пӧртэм тренингъёс ортчытъяно. Соку егитъёслы школае вамыштыны капчигес луоз.

- Дышетэм сяна, тӥ нылпиослэсь ваньмон дырзэс но туж пайдаё радъяськоды. Пӧртэм походъёс, пумиськонъёс тӥледлы асьтэлы кулэ яке пиналъёс понна озьы тыршиськоды?

- Малпасько, огшоры адями уз басьтӥськы таӵе уж борды, нош одӥг кутскиськод ке, люкиськем уг улы ни. Пинал муртлы но, арлыдо адямилы но пӧртэм интыосы вуылонъёс, пумиськонъёс пушдуннезэс узырмытыны юртто. Мылкыдзы вань ке, малы уд юртты нылпиослы? Салья выжыослэн пытьыостӥзы ветлыса, мон ачим но бай луи выль тодмоосын но, выль тодон-валанъёсын. Но одӥг та ужен буйгатскем ӧз поты, басьтӥськи туризм борды.

- Дышетскисьёсын огъя кыл тупатыны быгатӥськоды, нош асьтэлэсь нылпиостэс будэтонъя кыӵе ке нимаз амалъёсты вань-а?

- Номыр сыӵе-таӵе ум дауртӥське. Малпасько, пиналъёслы оскыны кулэ, соку ог-огдэ валан но луоз. Ас примеред вылын но возьматоно, кызьыгес улоно, мар лэсьтоно.

Милям ньыль нылпиосмы. Ачим мон атайтэк будӥ, пичи дыръям кошкиз со дорысьтымы. Выны но, сузэре но ӧвӧл, нокинлы ас малпанъёсме, мылкыдъёсме усьтыны. Огнын пиналлы семьяын секыт. Соин ик мон шуи: милям нылпиосмы трос луозы.

- Пичиезлы пидылы йӧспӧртэм ним бырйиллям. Маин со герӟаськемын?

- Берло дыре анай-атайёс нылпиоссылы сьӧр нимъёс тырылыны ӧдъязы, уката ик пӧртэм сериалъёсты учкыса. Нош маин уродэсь вашкала удмурт нимъёс? Юберез ик басьтом. Тазьы нимало Франциысь куд-ог актёръёсты, художникъёсты, кунсьӧр ужпумъёсъя министрзы но Юбер нимо. Нош Сальяямы азьло дыре куинь муртэ тазьы нимало вылэм. Ваньзы адӟем карымонэсь, одӥгез Быдӟым ожын быремын. Нош кӧня чебересь удмурт нимъёс Михаил Атамановлэн нимъёсъя кыллюкамаз. Малпай, нылпиосыз луизы ке, атай нимзы но урод уз кылӥськы.

- Семён Сергеевич, 50 аръем юбилейдэс тӥ туэ бадӟым вормонъёсын пумитаськоды. Удмурт калык понна тыршемды, удмуртлыкез, калык сямъёсты, йылолъёсты утемды синйылтытэк ӧз кыльы: тӥ луиды Кузебай Герд нимо премилэн лауреатэз. Мукетыз шумпотымон ивор: дышетон удысын азинсконъёсты 100 сюрс манетэн пусъемын. Со тӥ понна шӧдтэк шорысь вал-а яке оскиды ик вормондылы?

- Зэмзэ верано ке, пайми. Ас поннам малпасько вал, классэн уг кивалтӥськы бере, уз но синйылтэ ужамме. Ёросмыя Кияса школаысь дышетӥсь но мон потӥськеммы. Эшъёс веразы ини, шаерысьтымы 118 дышетӥсь пӧлысь списокын 70-тӥез вылӥськем.

Мон уг ик малпаськы вал та уже пыриськыны, ӵош ужась эшъёсы, школаысьтымы профсоюз ӵектӥз нимме. Удмуртлэн сям сыӵе: быгатонмы вань дыръя но киынымы шонтӥськом. Оскемзы понна туж бадӟым тау шуисько эшъёсылы, школаысьтымы кивалтӥсьёслы. Мылкыдме уката но бугыртӥз вормисе потэмъёсты Удмуртилэн Президентэз дорын данъян.

- Калык сямъёс, йылолъёс пӧлысь мар ке тунсыкоез, тодмотэмез тӥ понна кылиз на-а?

- Гурт калыклэн улоназ котьмаиз но тунсыко. Кыйгуосты ик басьтом. Котькуд коркан аслаз кыйгуэз вал. Адямиос тодо вал: кызьы солэсь интызэ шедьтоно, кытӥ кошке ву. Жаляса верано, вашкалаосынымы люкам визь тросэз ышемын, вунэмын ни. Кылемзэ ке но гожтыса кельтоно вылэм, со вылын дышетскыны луысал. Улонамы туж трос на тодмотэмез.


Источник:

Вахитов С. С. Куды тыр калык визьбур / С. С. Вахитов ; записала Л. Малых // Удмурт дунне. - 2006. - 3 нояб. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"