Вахитов Лев Александрович: различия между версиями

Материал из Воршуда
Перейти к навигацииПерейти к поиску
м (1 версия импортирована)
м (Ladamiri переименовал страницу Вахитов Лев в Вахитов Лев Александрович)
 
(нет различий)

Текущая версия на 14:25, 15 мая 2017

Италмас сӥзьыл но усьтӥське[править]

Вахитов Л. А.

Тодӥськоды на-а, «Москва слезам не верит» фильмысь одӥгезлэсь геройлэсь, Рудольф (Родион) операторлэсь, кылъёссэ: ӝоген, пе, телевидение сяна номыр но уз лу ни. Отын зэмлыкез но вань. Котьма ке но, телевиденилэн кужмыз арысь аре будэ.

Чагыр экранэз яркытгес ворекъятон бордын туннэ тырше уно адями. Пӧлазы усто специалистъёс, удыслы уно тодон-валанзэс, сюлэмзэс сётӥсь муртъёс данак. Нош зэмос кизилиос чиньыен лыдъямон. Сыӵеослэн радазы нимысьтыз инты басьтэ «Мынам Удмуртие» телеканалысь режиссёр Лев ВАХИТОВ.

Сое шаерамы но, Россиын но, кунгож сьӧрын но ӟеч тодо. Узыр пуштросо адямилэсь лул-сюлэмзэ мур усьтӥсь ужъёсызлы уно учкисьёс синмасько.

Нош режиссёр выль малпанъёсын улэ, ялан утчаське. Пумиськыны но со ӧтиз ужан интыяз - телекомпанилэн студияз.

- «Мынам Удмуртие» телеканал нырысетӥ вамышъёссэ лэсьтэ, шуыны луоз. Тэтэ карон секыт-а йӧтэ? Оло нош та вакыт тӥ понна тунсыкогес но пайдаёгес луэ?

- Та вакыт туж пусйымон. Телевидениын кема тыршисько ини. Соин ик кытын, кызьы ужан, оло мон понна бадӟым инты но уг басьты. Нырысь ик вань сыӵе проектъёс, кудъёсыз бордын куаж-куаж ужаны луэ. Тани «Бускельёс» («По соседству мы живём») проектмес ик басьтом. Сое лэсьтэммы бере валаны но уг луы вал ай: кыӵе-мар кисьмаз. Нош али, ар пала ортчем бере ини, учкисько но адзисько: о-о, ужмы зол пӧрмем, аслым но кельше.

Кылем арын ик «Ребятам о зверятах» передача дасям. Али сое удмурт кылын лэсьтӥськом. Нырысетӥез сценарий дась ини. Мукетыз ужмы - «Самое заветное» программа. Дас передача кылдытэмын. Котькудаз ик сюлэмлэн оглюкетэз кылиз кадь. Та дырозь куинь проект улонэ пыӵатэмын ни. Соос понна мыным возьыт ӧвӧл.

- Озьыен, выль телекомпания - со выль уж, выль проектъёс.

- Соиз но вань. Но вератэк кельтыны уг луы мукет тодметэз но. Котькуд коллективлэн улон-вылонэз юн герӟаськемын азьветлӥсеныз. Милемлы туж но туж удалтӥз. Кивалтӥсьмы Татьяна Павловна Боталова - уникальной адями. Солэн ныпъетэз туж бадӟым. Чаклалэ ай, выль телекомпания кылдэ ук. Техникаез инъян ласянь ик макем трос лэсьтоно. Иворез быдэс шаерамы вӧлмытон вылысь, кӧня интые передатчикъёс пуктылоно. Татьяна Павловна ваньзэ соосты тодэ, йыраз возе. Нош со сяна, калыкез люкано, умой ужасьёс утчано, быдэс штатэз возёно.

Мукетсэ но пусйытэк кельтэм уг поты. Татьяна Павловна котькуд передачаез учкыны вуттӥське на. Уж кельшиз ке, мылкыдзэ одно ик вералоз. Нош творчествоен вырись адямилы трос-а кулэ? Ужам понна коньдон дырыз дыръя басьтӥськод ке, кӧня ке ӟеч кыл кылӥськод ке, чылкак бурдъяськиськод.

- Иське, тон лыдъямъя, ужын тросэз кивалтӥсен герӟаськемын?

- Котькытын но озьы луэ.

- Нош передачаосыд пӧлысь кудзэ нимысьтыз пусйысалыд, кудӥз сюлэмад мургес пыӵаз?

- Мон мар шуыны но уг тодӥськы. Тани басьтом «Ребятам о зверятах» проектмес ик. Со огшоры гинэ передача кадь, озьы ке но сюлме мур пыӵаз.

«Гринпис» огазеяськон Россиын инкуазез утёнъя конкурс ортчытӥз. Ми та уженымы отын куинетӥ инты басьтӥм. «Самое заветное» программамы та дырозь нокытчы но лэзьямын ӧвӧл на. Ма, уноез учкисьёс, уката ик Ижевскын улӥсьёс, сое ӧз но адӟе на, дыр.

Одӥгез берлоез передачамы сярысь мадеме потэ. Отын возьматӥське нуны ваён учыр. Тани со кыӵе. Егит кузпалъёслэн семьязы ӝоген йылоз. Кышноез нылпи вордонъя палатае пыриз ни. Пияш коридоре кылиз. Кузпалыз сьӧры мыныны пумит луиз, уг, уг пыры, шуиз. Аслаз нош мылкыдыз бугыръяське, воргорон коридоретӥ озьы но, тазьы но ветлэ.

Вань та югдурез камера туж зол кутэ. Пияш камераез огвакытэ шӧдэ ик, нош собере со сярысь чылкак вунэтэ, кышнозэ кылзӥськыса сылэ. Соин асэныз ӵош ми но сюлмаськыны кутскиськом ни.

Собере шӧдтэк шорысь пиналлэн куараез кылӥське. Соку ик адями воштӥське, воксё воштӥське. Пияш палатае пыре. Со сьӧры ми но вамыштӥськом. Атайлэн но пиналлэн нырысетӥ пумиськонзы ортче. Макем зол суред со.

Нош «Бускельёс» программамес кызьы лэсьтӥм. Кияса ёросысь Салья гуртын кык арня улӥм. Туж зол жадим: арня ортчыса, кытчы пуксиськом, отчы ик изиськом ни вал. Сыӵе проектэз азьвыл ноку но ӧм быдэсъяллялэ. Нокин но уг тоды вал, кызьы-мар карыны. Мон асме ачим киям кутӥ но малпасько: съёмкаосты вазь ӵукнаысен бер ӝытозь нуоно.

Эшъёсме 4 часын ӵукна сайкатъялляны кутски. Мар но ӧй кылы соослэсь. Но ужмы со понна азинскиз. Мар шуод, пӧсь йӧтӥз. Геройёсмы сьӧры лумбыт бызьылӥськом вал. Нош со сяна, плёнкаосты выльысь учкылыны вутскылӥм на, тырмымтэосмес-шекъёсмес тупатъяллям.

- Та уждэс республикамылэн палэназ но пусйылӥзы ни кадь.

- Зэм, Москваын патриотизмъя всероссийской конкурсын нырысетӥ инты басьтӥм. Ӵошатсконэ 79 улос пыриськиз. Журналистика удысысь специалистъёс но ужмес вылӥ дунъязы. Сое учкемез бере дорамы лыктӥз МГУ-ысь журналистикая кафедралэн кивалтӥсез Кузнецов но шуиз: ну, эшъёс, тӥ, пе, зол ужаськоды.

Алигес гинэ Ижевскын егитъёслы сӥзем конференция ортчиз. Отын ми проектмылы презентация ортчытӥм. Москваысь Быдӟым ожъя музейлэн директорез но шаерамы лыктэмын вылэм. Та нуналъёсы жингыртэ: туж кулэ вал передачаосыныды кассета, ыстэлэ вал, дунзэ берыктыны пумит ӧвӧл.

Тӥни озьы, кудзэ ке ужез нимысьтыз пусйыны нокызьы но уг луы.

- Котьма ке но, чылкак паймоно, кызьы тон, гуртын будэм пияш, телевидениысь режиссёр луид?

- Сарсак-Омга школаын дышетскыкум, отчы Краснодарысь пединститутэз йылпумъямзы бере лыктӥзы егит дышетӥсьёс - Татьяна Георгиевна Озерова но Татьяна Михайловна Кондратюк. Соос милемды, пиналъёсты, ӝутыны-лӧпкытыны быгатылӥзы. Олокыӵе но ужрадъёс дасялляськом вал. Эсьма, Владимир Маяковскийлэсь «Клопсэ» гинэ но сцена вылын пуктӥм, ява.

Малы ке но озьы тупалляз: литература урокмес понедельниклы расписание нырысь интые пуктылӥзы. Ми сьӧрлось вал, интернатын улылӥм. Арня кутсконын машинаосын келяллязы. Быдэс классмы ик азьпал кошкисяз пуксьыны тыршылӥз, Татьяна Георгиевналэн литература уроказ вутскон понна.

Школа бере Ижевскысь культпросветучилищее мынӥ. Собере Пермьысь культурая институтэ пырыны малпай. Экзаменъёс дыръя специализациен «куинь» пуктӥзы. Ну, воже потӥз ук. Малпасько, кыӵе ке Пермь мыным «куинь» пуктэ бере, кайта ик Москвае шонто.

Озьы ик кари. Ар куспын умой-умой дасяськи но столицаысь культурая институтэ мынӥ. Интылы быдэ 28 мурт люкаськиз. Таяз учыре ини ваньмыз ӟеч радъяськиз - специализациен «вить» басьтӥ.

Али ини паймисько дӥсьтӥсь луэмелы.

- Кызьы мон тодӥсько, тон со аръёсы ик ГИТИС-ын но дышетскид на.

- Бен, кык ар ортчыса, ГИТИС-э удмурт егитъёсты кутӥзы. Мон соку туж умой тодӥсько ни вал, кыӵе бадӟым пӧртэмлыксы ГИТИС-лэн но культурая институтлэн. Озьы тӥни кык интыын дышетски. Эшшо ужай но на, урам ӵужись, метроын утялтӥськись, машинист луыса. Татысь номыр но сыӵе-таӵезэ уг адӟиськы. Пыд йылын йыг-йыг сылоно вал ук. Со сяна, дорысь ӵыжы-выжыосы, эшъёсы юрттӥськылӥзы на.

- Москваысь вуыса, тон кӧня ке ар Удмурт драмтеатрын ужад, но собере отысь кошкид. Малы?

- Зэм, 3 ар ужай. Нош кошкемелэсь мугзэ али туж умой валасько ини. Мон пичи дырысен ик туж самостоятельной вал. Соин ик театрын кинлэн ке зӥбетэз улын ужаны туж секыт потӥз.

- Мар ласянь?

- Актёрен ялан косъясько ук: татчы султы, отчы мын, тазьы кар. Со мынам мылкыдыя чик но ӧвӧл. Саша Ишматовен ӵош постановка пуктэммы бере, актёрлэн ужезлэсь зэмос кайф басьтӥ ик вал. Нош собере... Ваче вуонъёс, керетонъёс пуромизы. Театрын ужакум ай, журналист Валерий Сидоров телевидение ӧтьылӥз. Отын мыным кельшиз. Соин ик театрысь телевидение кошки. Нырысь-валысь синтэм кучапи кадь вал. Но уж дышетӥз. Куинь толэзь ӵоже Москваын тодон-валан люкай.

Кӧня ке дыр ортчыса, «Ӵошен яке нимаз» уженым Саранскын вормисе потӥ, нырысетӥзэ телевизорме кузьмазы. Отысен ини уже паськытаз но кужмояз.

- Театрен весяклы-а люкиськид? Режиссёр луыса, кыӵе ке постановка пуктыны мылкыдыд ӧвӧл-а?

- Дышетскемея мон театрысь режиссёр. Соин ик мылкыд ялан бичатыса улэ. Но мон туж трос ужасько. Али тани плёнка вылын 45 пала передача люкаськемын. Соосты ваньзэ йылаз-пумаз вуттоно. Ваньмызлы дыр уг тырмы.

- Ныпъет бадӟым, шуиськод, иське.

- Озьы. Со гинэ луысал ке. Эшшо Ханты-Мансийскын ужасько на.

Зэмзэ верано ке, мон али удмуртаз но, ӟучаз но театре уг ветлӥськы, мылкыдме куашкатэме уг поты. Мунё театре нылпиосыным вуылӥсько ик, отчы но туж шер.

Уг ватӥськы, театрын постановка дасян сярысь куд-ог малпанъёсы вань. Тани чаклалэ ай, макем бадӟым актрисаос - Нина Бакишева, Вероника Садаева но Валентина Загуляева. Соосты куиньназэс ик люкаса, соослэн асьсэлэн улон-вылонзы сярысь спектакль лэсьтысал. Но та малпанэ быдэсмонтэм кадь потэ.

- Оло, быгатод ай сое улонэ пыӵатыны?

- Кин тодэ, кин тодэ...

- Адямилэн улон шоры учконэз, быгатонлыкъёсыз пичи дырысь пото, шуо. Кыӵе со тынад вал?

- Огшоры, вань пиналъёслэн кадь ик. Мон туж зол яратӥсько вал лыдӟиськыны. Киям книгаен кытчы ке садэ пегӟисько но эмезьпу пӧлы ватскисько.

Нош гуртын кызьы луэ? Созэ кароно, тазэ кароно. Кытчы пырод, анай-атайлэсь кылзӥськытэк ӧвӧл. Потӥськод, ужаськод.

- Анай-атаед устоесь, кибашлыесь вал, дыр?

- Анае туж чебер кырӟа. Вань вӧсь гуръёсты туж умой тодэ.

Атае нош воксё паймымон адями вал, котьма ласянь висъяськылӥз. Яратылӥз пӧйшураны. 12 калибрен двустволкамы вал. Пушка но тӥни. Ог аре кык-а, куинь-а ӟичы кутӥз. Кузылэсь аслыз, мыным но братэлы изьы вуриз. Ну, шумпотыса нуллӥм ни ми сое.

Шуба, сапег вурыны, радиотехникаез, вуриськон машинаез тупатъяны кулэ ке, гурт калык дораз лыктэ ни. Со гинэ ӧвӧл ай, фотоужен но вырылӥз. Туспуктэмъёссэ мурӝолын лэсьтылӥз. Суредалляз но. Вӧй буёлъёсын лэсьтэм ужъёсыз али ке но вордскем гуртам, Татариысь Агрыз районысь Варклет-Бодьяын, утисько.

- Гуртын быдэ вуэм мурт, тон та вакытэ гуртын улыны быгатысал на-а?

- Быгатысал. Нош мар карод на, городын уж шедьтэмын, со огсыр мынэ, сюлэмъя кельше ке. Гуртэ адӟиськыны, узыяны-борыяны, губияны гинэ бертылӥськод на. Табере нылпиосмы будо ини. Соос сярысь тросгес малпаськиськод.

- Даша нылыдлэсь но Саша пиедлэсь ӵуказе нуналзэс адӟиськод-а ни?

- Уг.

- Соослэн пичи дырзы но асьмелэн пичи дырмы огкадесь-а, пӧртэмесь-а?

- Конечно, пӧртэмесь. Асьмеос туж трос ужамы. Тодам вайисько, 5-6 арескын мон скал кыскыны дыши ни. Анаен атай турнаны яке мукет ужез быдэсъяны кошко, нош ми доре кылиськом: скал кысконо, мунчо эстоно, уриськоно... 4-тӥ-5-тӥ классын тӥр кутыса мынӥськом Оӵ дуре пудо сиён дасяны. Нош туала покчиослэн вӧзазы компьютерзы. Соослэн яратоно уженызы вырыны, быгатонлыкъёссэс волятыны луонлыкъёссы шӧдскымон тросгес.

Тодам ваисько ГИТИС-ысь профессорлэсь верам кылъёссэ. Солы али 70 ареслэсь трос ини. Шуылӥз: мон, пе, ялан малпасько вал, нылпиосты мылпотэмзыя улыны лэзёно шуыса. Со матын но шонер вылымтэ. Пиналъёсты одно ик валтоно, дышетоно, кулэ дыръяз, сюлоен пряникез но уже кутоно.

- Тон командировкаосы туж ӵем потаськод. Соин валче юртъер котырын берганлэн бадӟым люкетэз кузпалыдлэн пельпумыз вылэ усе, дыр.

- Нош мар карод, кытчы пырод. Бен, оло умойгес луысал, мон дорын тросгес ке улысал. Но чакла ай: машина басьтоно, квартираез воштоно, со милям ӟоскыт ни... Нош кытысь коньдон? Диван вылын кылльыса, пайда трос уд потты ук. Тани Москва нимысьтыз гранд висъя Ханты-Манси улосын лэсьтэм ужмылы. Озьы бере, сое ӟеч-ӟеч дасяно. Соку гинэ висъям коньдонэз берыктод, ужам ужедлы шумпотод, солэсь ӟеч мылкыд басьтод.

Мукет ласянь учконо ке, ваньмыз со куддыръя туж секытэн сётӥське. Тани кемалась ик ӧвӧл нош ик ӵыжы-выжыосмы дорын ужай. Группамы, 5 адями, кык арня куспын Урал гурезьёстӥ 80 иськемез ортчиз. Оломае но адӟыны кылдӥз, ява. Куазен ӧз удалты. Ялан зориз, шуръёс ӝутскизы. Соосты выжылӥмы КамАЗ, Урал машинаосын, сюрес лэсьтӥсьёслэсь юрттэт курыса. Уд но оске, оло. Оператормы улон интыямы съёмкаосысь бертэ но ул дӥсьсэ пызьыртэ. Озьы тӥни, зор ултӥ ветлыса, суч-суч котмылӥм.

Но со понна мансиос сярысь кыӵе тунсыко материал люкам. Ханты-Мансийскысь жингыртӥзы ни: давай, пе, уждэ йылса но милемлы келя, грантэз оформить кароно ни.

Нош гурезьёсысь кыӵе шукрес водопадэз адӟим. Ву 30 метре усе. Адями отчы шедиз ке, нокызьы но уз мозмы. Кошкыкумы ини мышмес учкиськом но адӟиськом: кыдёкын-кыдёкын водопад адӟиське...

- Кадр чебер пӧрмысал.

- Озьы. Но сое лэсьтыны дырмы ӧй вал ни.

Телевидениын ужаса, мон кадръёсын малпаськыны кутски ни, ачим съёмкаос уг ке но лэсьтӥськы. Нош мае ке мукетсэ йырам возьыны чик уг быгатӥськы. Ольга пиналъёслэсь вань кылбуръёссэс тодэ, нош мон одӥгзэ но уг вера. Ужъёсы ог 100 люкаськизы ни, 100 час мында кыстӥсько. Отысь котькуд кадрзэ тодӥсько, син азям пуктӥсько. «Бускельёс» передачаямы ӧз тырмы вал одӥг кадр - ӵук гуртлэн тусыз. Ма кароно? Тодам вайи, та выллем кадр ханты-мансиос дорын лэсьтылӥм шуыса. Шедьтӥ сое. Компьютер юрттэм улсын ӟеч кадр пӧрмиз.

- Иське, азьвыл кылдытэм багаж юрттэ?

- Туж зол. Тани мынам инкуазьлы сӥзем архиве туж узыр ни. Россиын сомында нокинлэн но ӧвӧл, дыр. Басьтом орхидея турын-куарез ик. Республикаямы со 28 пӧртэм будэ. Ог кызез плёнка вылэ пуктэмын ни.

Ас вакытаз биологен Николай Ильминскиен ӵош трос но пайдаё ужам. Кайта, малпасько, мукетыныз тодосчиен тылобурдоос борды басьтӥськом. Кызьы Николай Геннадьевич турын-куарез пыр-поч тодэ, озьы ик Александр Григорьевич Меньшиков - тылобурдоосты. Асьмеос тани кӧня тылобурдоез тодӥськом?

- Куака, ӟольгыри...

- Нош соос туж трос. Яке басьтом Николай Геннадьевичлэсь мукетсэ дышетскисьсэ - со аспирант Дмитрий Адаховский. Туж мур тодэ нымы-кибы дуннеез. Кандидат ужез но утемын ӧвӧл на, но адӟиське - со зэмос биолог. Таиныз но тодосчиен валче ужаны мылкыдмы вань.

- Нош режиссёръёс пӧлысь кинлэсь адӟем карыны тыршиськод?

- Мыным туж зол кельше Андрей Тарковский. Со аслаз нырысетӥ кадреныз ик пушке пыре, пыре, пыре... Малпаськытэ. Малпаськиськод кино, улон сярысь, котьма сярысь. Тарковскийлэсь картиназэ учкыны пуксиськод но султыны уд ӵыдӥськы ни.

Адӟем карымон адямиос вань. Тани мон культпросветучилищеын Света Титоваен ӵош дышетски. Бӧрысь со МГУ-ысь журналистикая факультетэз, Госкиноысь Вылӥ режиссёрско-сценарной курсъёсты йылпумъяз. Али тырше кема кыстӥськись чеберлыко фильм дасян бордын.

Ог аре дорамы вакчи фильм пуктӥз. Мыным шуд усиз бордаз тыршыны - актёръёсын ужанъя режиссёр вал. Тӥни соку адӟи но валай, кызьы зэмос суред пуктоно. Сое одӥгзэ лэсьтон понна лампаос гинэ ог 50 пала ӝуато. Нуналаз норма - 8 кадр. Нош пичи фильмын 120 кадр пала лыдъяське.

Та вакытэ суредась Менсадык Гарипов сярысь уж лэсьтыны малпасько. «Удмуртия» ГТРК-ысь журналист Анна Федотова вераз вал: отын но отын, пе, вуэн ужась вуко вань. Юри разведкае потам. Зэмзэ но, Нылга тракт дурысь Турынгуртын сыӵе вуко сылэ. Зол ук, Менсадык Гарипов но вуко. Табере киос ик лыдо ини, ужам потыса.

- Кенешонмес йылпумъяса, вера вал: кытысь басьтӥськод улыны оскон?

- Шуыны уг луы: татысь но отысь. Котькытысь. Дорын ке умой, ужын но умой; ужын ке умой, дорын но умой. Ваньмыз герӟаськемын. Номыре но ог-огезлэсь люкыны уг луы.

Тани мон Ханты-Мансийскысь берлозэ туж жадьыса вуи: кык арня куспын кык бирдылы жуммиськем. Малпаськиськод, малы со тыныд ваньмыз кулэ, пук гань-гань дорад. Нош плёнкаосты берыкъяны кутски но, мылкыд ик пачылмиз, жадем юскиськиз. Макем чебер гурезьёс, паймымон инкуазь. Кытысь-о адӟод на, августлэн шораз италмас мед усьтӥськоз шуыса? Нош татын сӥзьыл куазен италмас но, кечсин но сяськаяське. Лымы каллен шунамъя сьӧраз тулыс вамышъя.

Мон котькуд ар малпасько, ӧжытгес ужало ни шуыса. Нош ялан тросгес но тросгес бергасько-бызьылӥсько. Кайта но озьы ик луоз. Ку дугдо, уг тодӥськы.


Источник:

Вахитов Л. А. Италмас сӥзьыл но усьтӥське / Лев Вахитов ; записала Ю. Александрова // Удмурт дунне. - 2003. - 19 сент. - (Удмурт кизилиос).


За предоставление материала выражаем огромную благодарность редакции газеты "Удмурт дунне"