Редактирование: Васильева Валентина Владимировна

== Улон монэ воштӥз ==

Глазов ёросысь Шӧмпи (Пусошур) гуртысь школаын удмурт кыллы но литературалы дышетэ Валентина Владимировна Васильева. Дышетэм сяна, нылпиослы литературно-творческой кружок нуэ, ачиз ик кылбуръёс, юморескаос гожъя. 2016-тӥ арын ортчем «Элькуновидениын» солэн кылбурез тужгес устоез луиз. Яратоно кузпал но анай, дышетӥсь но кылбурчи. Кызьы со ваньмыз пӧлэстӥське улоназ?

'''— Валентина Владимировна, кызьы вуиды «Элькуновидение», секыт вал-а вормисе потыны?'''

— Воксё паймымон луиз элькун вожвылъяськонэ вуэме. Ноку ӧй малпалля, куке но табыдӟа ӵошатсконэ пырисько, эшшо ке вормисе пото шуыса. Куке-соку мыным жингыртӥз Глазовысь Эшъяськон юртын ужась Антонида Бёрдова но шуэ: «Ми тынэсьтыд кылбурдэ шедьтӥмы, со милемлы туж-туж яраз. Солы крезьгур гожтыса, кырӟан пӧрмытомы но соин «Элькуновидение» пыриськомы». Нырысь мон ма шуыны ик ёрми, ӝожоми но кадь: кылбуръёсылэн улонзы кытӥ ке ас понназ ортче, малпасько, нош мон школаын тетрадьёсты эскерыса пукисько. Собере, конечно, туж шумпотӥ. Глазкарысь Ольга Перминова «Мон шудо» кылбурме чебер кырӟанлы пӧрмытӥз. Озьы луиз «Элькуновидение» пыриськеме, вормисе потэме. Шумпотӥсько, кылбуре калыклы яраз шуыса.

'''— Вормонды сярысь иворез кызьы пумитады?'''

— Туж-туж шумпотӥ. Та ивор сюлэмам шуныт тулкымен пыриз, котьку тодам возё со мылкыдъёсме. 5 сюрс манет сётэмзэс лыдъяй Инмарлэсь пичильтык кузьымен. Азьланяз гожъяськыны мылкыды бурдъяськиз. Кемалась возьмасько вал ини, тодосчи, кылбурчи Виктор Шибанов куке но кылбуръёсме мед лыдӟоз шуыса. Кылэме потэ вал солэсь визь-кенешсэ, пӧрмытӥсько-а, уг-а. Вожвылъяськонын кылбуръёсыз со эскероз шуыса тодӥ но воксё лӧптӥ. Вот, малпасько, со дыр вуиз, кемалась малпанэ быдэсмиз. Та дырозь мыным верасьёс вал ини: мын Виктор Шибанов доры, одӥг гуртын вордӥськемын ук тћ, возьматы кылбуръёстэ. Ачим ноку ӧй дӥсьты солы вазиськыны. «Элькуновидение» ортчем бере ини дораз вамыштыны дӥсьтӥ ик, Котгуртысь (Котнырево) калыклэсь саламзэ верай. Со паймиз но, шумпотӥз но кадь, одӥг гуртысь шуыса.

'''— Пичи дырысен ик кылбураськоды-а?'''

— Кылбуран сярысь малпанэ ик ӧй вал. Керпотӥсь, котьмалэсь кышкась, дӥсьтӥсьтэм — тӥни кыӵе мон вал пичи дыръям. Но улонам туж ӵем пумиськылӥзы умой муртъёс. Со пумиськонъёс улон сюресам шӧдскымон пытьы кельтӥзы. Ваньзэ тодад но уд вай. Нырысь ик со Валентина Михайловна Чиркова, удмурт кылъя дышетӥсе, литературно-творческой кружоклэн кивалтӥсез.  Со ик мылкыдме ӝутӥз кылбур гожъяны. Нырысь кылбурме малы ке ӟуч кылын гожтӥ. Нырысь чуръёссэ али но тодӥсько на: «Зато есть горка ледяная, катайся сколько тебе надо…» Дышетӥсе лыдӟиз, лыдӟиз но шуэ: оло, пе, удмурт кылын туртскод. Озьы мон школаын дыръям удмурт кылын кӧня ке кылбуръёс гожтӥ ик. «Иднакар» ёрос газетын соосты поттӥзы.

Улонам бадӟым инты басьтӥз Владимир Романов кылбурчи, соин тодматски вал Качкашурын. Отын писательёсын пумиськон ортчиз. Соку мон туж пайми, кыӵе со шулдыр мылкыдо лякыт адями. Пиналъёсын туж мыло-кыдо вераськиз. Вот, малпасько, кыӵе со, зэмос удмурт кылбурчи! Берлогес Трубашурын пумиськи Виктор Шибановен, пичи дыръям мон уг тодӥськы вал ай, кин со. Дыр ортчыса, данъяськыны кутски — ми соин одӥг гуртысь. кылбураны мылкыд сётӥз на Татьяна Волкова. Глазов пединститутын дышетскыкум удмурт кылъя дышетӥсе вал со. 2-тӥ курсысен Татьяна Геннадьевна  удмурт кылбуръя конкурс радъяз. Отчы пыриськыны шуыса, кылбур гожтӥ, 2-тӥ инты басьтӥ. Собере малы ке дугдӥ гожъямысь. Озьы луэ вал: вожвылъяськонлы кулэ ке — гожтӥсько. Кылбурчиосын, тодосчиосын пумиськылэмъёсылэн емышсы быдэ вуэме бере гинэ кисьмаз, лэся. Угось валаса кылбураны ӧдъяй пие вордскем бере. Мон солы нуны веттан гур ныр улам кырӟаса ветлӥ: «зарние тон мынам, мусое тон мынам…» Со вакытысен, шуыны луоз, кутскиз творчествое.

Глазов ёросысь Владимир Гусев самодеятельной крезьгурчиен пумиськылӥ. Та паймоно адями кӧня ке кылбуръёсылы крезьгур малпаз ни, соос кырӟан луизы. Зэм, улонын пумиськонъёс токма шорысь уг луо. Берлогес Глазовысь шор библиотекае литературно-творческой кружоке вуи. Библиотекаын ужасьёслэн юрттэмзыя кылбуръёсы «Улон берга» сборникын потӥзы. Тӥни озьы улонам тунсыко сюрес усьтӥськиз — гожъяськон.

'''— Дышетӥсь луонды школаысен ик тодмо вал ни, дыр?'''

— Школаын ужало шуыса уг малпаськы вал.  Быдэ вуи Трубашурын, нош дышетски Октябрьскойын. Нуналлы быдэ отчы школае 15 иськем ветлӥськом вал. Акыльтӥз-а, мар-а школае ветлыны. Соин ик пединститутэ но воксё но пыреме уг поты вал. Нырысь медицинаен малпасько вал асме герӟаны. Бӧрысьгес журналистикае туж  пыреме потэ вал, но анае шуиз: коньдон ӧвӧл, Ижын кытын улод, кызьы дышетскод. 1995-тӥ аре вал со, секыт вакыт. Соин ик матысь Глазов городэ дышетскыны мынӥ, пединститутэ. Удмурт филологиын дышетски. Воксё уг жаляськы со сярысь.

Дышетсконме йылпумъяй но распределениея шеди Чайковский городэ, ӟуч кылэз но литератураез дышетыны. Вуи мон мурт городэ, классам пырай, но маиз ке таки сюлмам ӧз бинялскы, мылкыды ӧз ӝутскы. Озьы кылдэм вылэм, дыр, Чайковские интые, мон Шӧмпие вуи. 2000-тӥ арысен татын школаын ужасько, нуисько удмурт кыл но литература урокъёсты. Азьло шаертодонъя кружок но нуисько вал. Но сюлэмъям литературно-творческой кружок вал. Малы ке шуоно шаертодонэз нылпиос история урокын но дышето, кӧня ке часъёс нимаз шаертодонъя урок но луэ. Нош творчествоен вырон солэсь но тунсыкогес потэ мыным. Озьы ёросысь нылпи творчествоя юртысь кивалтӥсьёслы вазиськи, кенешим. Соос монэ валазы, ярам, Валентина Владимировна, нуэ, пе, школаяды литературно-творческой кружок. Ох, шумпотӥ ук! Тани 5-тӥ арзэ ужаськом ини, нылпиос мылысь-кыдысь ветло, гожъяськыны дышетско. Асьмелэсь «Школа иворъёс» газетмес поттӥськом. Кытӥяз туж жадёно школаын, туннэ ик кошкысал кадь. Но пиналъёс уг лэзё, сюлэмы бордазы биниськемын.

9-тӥ класс пумын кун экзамен сётӥськом удмурт кылъя, туэ тани 11 пинал пӧлысь 8-эз удмурт кылэз бырйизы. Кылем арын 9 пӧлысь 5-ез удмурт кылъя экзамен сётӥзы вал. Со ведь маке сярысь вера, асьсэос быръё ук предметэз. Жаляса верасько, 11-тӥ класс бере удмурт кылэз шерез быръе. Кыкез выпускникъёсы УдГУ-ын дышетскизы ик. Но улонын удмурт кыл котьку кулэ, тӥни ӵошатсконъёсы но пыриськоно. Одӥгез дышетскисе куке-соку «марлы со удмурт кылды кулэ» шуиз вал. Нош удмурт факультетын 2-тӥ курсын дышетскыкуз, лыктӥз школае но шуэ:

— Валентина Владимировна, бадӟым тау тӥледлы. Тӥ мыным туж трос сётӥды, мон уг валаськы вал, удмурт кыл мыным кулэ луоз шуыса.

Мон понна со туж дуно кылъёс вал. Шуисько:

— Бадӟым тау тыныд, Таня, валад ке тон сое, туж умой, визьмо луэмед ини, иське.

— Школаяды туж тунсыко музейды вань. Тӥляд кичӧлтэмдыя кылдытэмын, шуо.

— Музеймес 2000-тӥ арын усьтӥм. Мон соку гинэ та школаын ужаны кутски, шаертодонъя кружок нуи. Эскерон ужъёс но лэсьтылӥм, нылпиосын ӵош гуртысь гуртэ ветлӥм, вашкала арбериосты люкам, огъям. Озьы малпан кылдӥз ужам ужмес, музей лэсьтыса, возьматыны. Собере школа директорлэн воштӥсез Ирина Главатских «Музею быть» программа гожтӥз, со улсын ини музей комнатамес чеберъям. Технологиен дышетӥсьлэн Виктор Васильевлэн но мынам кивалтэммыя нылпиос пӧртэм арбериос лэсьтӥзы, борддоръёссэ тупатъязы, информация люказы. Озьы пӧрмиз «Вашкала корка» музеймы. Дышетскон ар ӵоже трос гинэ экскурсиос радъяськом. Кутсконэз 1-тӥ куарусёнэ луэ: 1-тӥ классэ лыктӥсьёсты одно ик татчы экскурсие вайиськом.

'''— Кузпалды та школаын ик ужа. Ялан огазьын луон семьялы юрттэ-а, люкетэ-а?'''

— Милям семьямы но та школаын ик кылдӥз, шуыны луоз. Нырысетӥ пумиськонмы таӵе  вал. Егит, чебер пияш Виктор Васильев школае практикае лыктӥз, нош мон ужасько ни вал. Дышетӥсьёслэн нуналазы тодматским. Со дырысен 17 ар ини ӵош. Кузпалы быдэс туго предметъёсты нуэ: ОБЖ, черчение, технология. Одӥг удысын бере, со адӟе, вала, кӧня уж школаын. Урокъёс нуэм сяна, директорлэн визьнодан ужъя воштӥсез луисько на. Огазьын ужаса, ог-огмес умой валаськом. Солэн юрттэмезъя кышкатэк котьма борды кутскисько. Музеймес радъяны но мыным туж юрттӥз.

Милям 2 мусо пиосмы будо. Кыксы ик котьма борды мылысь-кыдысь кутско, пӧрмыто но кадь. Творчество соослы матын. Кылбур но гожъяны туртско. Бадӟымез дуриськонэн но, суредаськонэн но выре, пулэз но вӧлэ. Атаезлэн кадь ик киыз мынэ. Туэ 9-тӥ классэз йылпумъяз, экзамен сётӥз. Сюлэм пирсэкъяса ик витиськом оценкаоссэ. Мукетыз пимы 5-тӥ классэз быдтӥз, ар понна 2 гинэ «4»-ез потӥз, мукетыз ваньмыз «5». Кузпалылэн котьмалы киыз мынэ. Выль корка пуктӥськом, отын но со ваньзэ ачиз лэсьтэ, пиосмы котыраз юрттыны выро ини. Толалтэ мон пуктӥськон доры уггес вуиськы, нош гужемзэ отысь уг ик потаськы ни. Виктор Алексеевиче но пиосы кролик будэтонэн выро на.

'''— Иське, шутэтскыны дыр удгес шедьтӥське?'''

— Жаляса верано, берло дыре дышетон вань дырме басьтэ. Ӝытазе ужысь вуыса, сиён пӧзьтӥсько но нош ик уж борды кутскисько. Дышетӥсьлэн ведь ужез сьӧраз бертэ: тетрадьёсты эскероно, уроклы дасяськоно… Семьялы, аслыд дыр уг ик кыльы ни кадь. Со умойтэм, валасько, озьы улыны уг яра. Соин ик тыршисько пичи ке но вис шедьтыны. Толалтэ, ужысь бертыса, котькуд нунал куас вылэ султӥсько но нюлэскы кошкисько. Шуисько: котьма каре но, одӥг часэ — мынам.  Ярам, бакча берамы гинэ тэль вань. Кезьыт омыр, нюлэс зын жадемез быдто, йырез сазёмыто кадь.

Берло дыръёсы секыт мылкыдме, жадемме гожъяськонэн буйгатӥсько. Со но аспӧртэм шутэтскон луэ. Али тросгес прозаен гожъяськисько, кылбуръёс малы ке уггес вордско. Тани алигес туж секыт мылкыды вал, дорам эн но ветлэ, семьяосылы шуисько. 3 уй пуки но, юмореска вордӥськиз. И всё, мылкыды капчияз, нош ик улэм потыны кутскиз. Тулыс-гужемзэ мылкыды, бакчаын бугыръяськыса, буйга, пӧртэм пумо сяськаос мерттӥсько: улон котырме чебер но яркыт кареме потэ.

'''— Асьтэдыз шудо адями шуыны быгатӥськоды?'''

— Мон туж шудо адями. Пичи дырысен ик со тодмо луиз кадь. Малы ке шуоно монэ Инмар 3 пол утиз сопал дуннее кошкемлэсь. 2 арес тырмон уе милям 2 этажъем коркамы ӝуаз. Анае монэ поттэм тыл пушкысь. Мон сое уг ни тодӥськы, конечно. Кыкетӥез учыр — машинаен берытскимы. 1-тӥ классын дышетскыкум, техпомощь машинаен гуртэ бертӥськомы вал. Укно вылын решёткаез  вал, анае со борды возиськыны косӥз. Озьы машина берытскем бере мон решётка бордын киосы вылын возьки. Анае (машинаын трос калык вал) монэ утча. Адӟиз но бӧрдыны кутскиз. Мон шуисько:

— Мама, малы бӧрдӥськод? Тыныд вӧсь-а?

— Ӧвӧл, нылы. (Нош аслаз пыдыз ванскемын, вир вия).

Со монэ чупа, чупа. Табере валасько ни малы бӧрдэмзэ.

Куинетӥез учыр — тыметэ выйисько вал. Соку кыӵе ке мӧйы геолог поттӥз. Али но уг валаськы, мон солы тау кари оло ӧй. Мон Инмарлэн нылыз-пиез, дыр, шуыса малпасько ни ас поннам, со мыным котьку юрттэ. Котькинлэн сямен ик, улонам трос шуг-секытъёс, но соосты вормоно. Пиосмес пыд йылазы султытоно. Бордам яратоно муртъёсы. Котькыӵе малпанъёсме быдэстыны кузпалы юрттэ. Инмарлы тау, анае Галина Викторовна Перевощикова умой тазалыкен улэ на ай. Со-а шуд ӧвӧл? Школаын ужаны туж яра. Пиналъёсты яратӥсько. Соос но монэ ярато кадь. Улон монэ воштӥз. Мае азьло ӧй дӥсьтысал лэсьтыны, со борды али кышкатэк басьтӥськисько. Выль но выль сюресъёсты утчасько. Мар ке уродэз но кылдэ ке, со но кулэ вал, иське. Уродэз но ӟечлы дышетэ.

'''Источник:'''

Васильева В. В. Улон монэ воштӥз : [беседа] / Валентина Васильева ; записала Наталия Самсонова // Удмурт дунне. - 2017. - 29 июня. - С. 10, 15 : фот. - (Тӧр шорын)

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]