Бимаков Олег Николаевич

Материал из Воршуда
Перейти к навигацииПерейти к поиску

Шуд ай гурдэ, арганчи![править]

Снимок23.jpg

Калык кырӟанъя но эктонъя «Айкай» кун театрын та нуналъёсы кырӟа-вера 25 артист, соос пӧлысь одӥгез яркытэз но устоез — та театрлэн крезьгуръя кивалтӥсез, Удмуртиысь дано артист Олег Бимаков. Улонзэ «Айкаен» герӟамезлы ӝоген тырмоз ни 15 ар.

- Тӥледыз аргантэк син шоры ик пуктыны секыт. Тодады кылиз-а сое кияды нырысьсэ кутэмды?

— Атае Николай Степанович Бимаков арганэн шудыны ас понназ дышетскиз, крезьгурез шӧдонэз зол вал солэн. Мыным 7-8 арес тырмиз вал кадь соку — атай пичи гармошка басьтӥз, шуиз: дышетскы, пие, арган кысканы, быгатэмед сиён уз куры. Али ке но син шорам пуксе «Ой, уӵые, уӵые» крезьгурез шудыны дауртэме. Собере атай монэ арганэным валче фермае нуиз. Горд сэргысь пукон вылэ пуктӥз но шуиз: нуко, шудыса лэзь ай, пие! Учкисьёсы — скал кыскисьёс. Ну, возьдаськи ук соку! Но шудӥ, ӧй пегӟы.

Собере со возьдаськонэн куен, лэся, арганме кыдёкегес сэрпалтӥ, киям кема ӧй кутылы. Берытски мон со доры 13 арескам. Клубысьтымы самодеятельной композитор Александр Андреев (нялтас вераса, со удмурт кырӟасьлэн Влад Андреевлэн атаез) ас котыраз люказ арганэн шудыны мылкыд карись пиналъёсты. Та кружоке гожтӥськи мон но. Озьы ми, шальтыр-шальтыр пиос, арганэз кысканы рос-прос дышетскимы. Куаш-куаш шудыны кутски ни 14 арескысен. Озьы атаелэсь верам кылзэ быдэстӥ, шуыны луоз. Арганэн шудыны быгатэме табере, сиён курем гинэ ӧвӧл, быдэс улонам валтӥсь луиз…

- Но мон тодэмъя, тон астэ нырысь дышетӥсьын эскерыны малпад?

— Вордски мон Можга ёросысь Карашур гуртын, нош школае ветлӥ бускель Кибъя гуртэ. 9-тӥ классэз йылпумъяса, ПТУ-э мыныны дасяськисько вал. Атай талы пумит луиз: аслым дышетскыны ӧз кылды, тон коть образование басьтыны тыршы. ПТУ-э пырид ке, тонэн вераськемысь дугдо!

Атай быдэс улонзэ колхозын ужаз ке но, улон шоры учконъёсыныз, тодон-валанъёсыныз но быгатонлыкъёсыныз котькинлы адӟем карымон вал. Гурт библиотекаын лыдӟытэк кельтэм книгаез но ӧй вал ни кадь солэн. Нош кыӵе усто суредаськылӥз! Туж умой пӧрмылӥзы карикатураосыз: олокытӥ-мар вуттэ вал адямилэсь туссэ бумага вылэ пуктыны. Жаляса верано, шудтэм учыре шедьыса, улонысь вазь кошкиз. Калык радэ потэмме адӟыса ӧз вутты ни. Но мон солэсь ӵектонъёссэ лыдэ басьтӥ.

Малпай Можга педучилищее пырыны, покчи классъёсын дышетӥсь луыны — анаелэн Людмила Егоровналэн монэ дышетӥсен адӟемез потӥз. Соин но, лэся, пырон экзаменъёс шоры чиньы пыртӥгес учки, рос-прос ӧй дасяськы. Озьы мон Можгаысь педучилищее ӧй шедьы. Документъёсме кутӥ но Уваысь педучилищее шонтӥ, пыри туризмъя ёзэтаз. Отын но крезьгуръя дышетӥсь борды кариськи, арганэн шудонлэсь ӧй куштӥськы.

Крезьгур дунне сяна, мыным пичи дырысен кельшылӥз суредаськыны — таиз атайлэсь пыӵаса кылем, лэся. Та быгатонлыкме азинтыны малпасал ке, оло, маке пӧрмытысал. Ма, кыдёке ветлонэз ӧвӧл: кык сузэръёсы пӧлысь одӥгез «Аксион-холдинг» заводын гравёр луыса тырше, туж чебер суредаське. Но мон пушкын кужмогес вылӥллям, шӧдске, анайлэсь пыӵам быгатонлыкъёс. Со мынам кырӟаны-вераны туж усто. Ас вакытаз дышетскыны пырем вылэм крезьгуръя училищее, тодон-валан люкам тодмо удмурт композитор Геннадий Корепанов-Камский бордын. Но кышномуртлэн адӟонэз сыӵе ини: бызиз, ӝоген монэн секытэн луиз, дышетсконзэ амалтэк куштоно но гуртэ берытсконо луиз. Озьы быгатонлыкъёсыз рос-прос усьтӥськытэк ик кылизы. Гуртын со тыршиз клубын но, фермаын но. Атай улонысь кошкем бере вань секытэз со вылэ усиз: пиналъёсты пыд вылазы султытоно, дышетоно.

Пичи вакытысь тодам кылиз на: анаен атай агитбригадаен бускель гуртъёсы потало вал. Монэ, тэшкылиез, песятай борды кельтылӥзы. Со монэ ал вылаз пуктэ но удмурт книгаосты шара лыдӟе вал. Озьы удмурт литератураез гажан мылкыд пыӵаз. Школаын шузимем кадь лыдӟиськылӥ. Удмурт адями, малпасько, удмурт литератураез одно ик тодыны кулэ.

- Быдэсмиз ик-а анайдылэн малпанэз — йылпумъяды-а педучилищеез?

— Уваын дышетскон вискам одӥг тодмо нылаш вераны шедьтӥз: культпросветын, пе, милям сыӵе умоесь дышетӥсьёсмы, сыӵе, пе, интересно дышетскыны. Лыкты ай, пе, ми доры дышетскыны. Егит муртлы секыт шат ваньзэ чутрак воштыны! Кутӥ но Иже шонтӥ, капчиен пыри культурая училищее. Таиз вал ини мылкыдыя-сюлэмыя. 4-тӥ курсысен ачим ик валаса ӧй вутты «Эктон корка» студие кыстӥськемме. Огпол ветлӥ, кыкетӥзэ, куинетӥзэ — всё, выйи отчы. Концертъёсын, репетициосын йырин дышетскыны ӧйлась ни, занятиосты кельтылыны кутски. Югдурез киязы кутӥзы колледжысь дышетӥсьёс, шуизы: яке дышетскиськод, яке кошкиськод. Ма, дышетсконме куспетӥ кареме ӧз поты ни, сояз но, таяз но вутсконо луиз.

- Уг янгыша, дыр, шуи ке: ӵапак со вакытэ тупаз «Эктон корка» студилэн пушъён вакытыз.

— Мон соку, зэмзэ вераса, виси «Эктон коркаен». Вань сюлэмме-мылкыдме солы сётыны дась вал. Кивалтӥсьмес Андрей Прокопьевез Инмар чот карылӥмы: кытчы ке кунгож сьӧры кошке ке, гурысь пӧсь перепечез кадь возьмаськомы вал ни — кыӵе выль малпанъёсын-проектъёсын вуоз меда?! Ӵапак та студие шедьыса, пушкам вырӟиз удмуртлык. Удмурт выжыосы но калык культура шоры паськытгес учкыны кутски, золгес шӧдыны ӧдъяй.

Культпросветэз быдтэме бере Казаньысь консерваторие пырон пумысен малпанъёсы вал. Но нокызьы но ӧй быгаты «Эктон коркаен» люкиськыны. Ӵапак соку гастрольёсын кунгож сьӧры потыны дасяськимы. Мыным, Москва кемозь огпол но вуылымтэ адямилы, палэнэ потон воксё оломар кадь потӥз — азьланьын вите 4 кун! Озьы консерватория сярысь малпанъёсме пыдлогес ватӥ но сюрес вылэ вырӟи. Соку концертъёс пуктӥмы Венгриын, Финляндиын, Эстониын. Соку, кызьы шуо, монэн культурной шок луиз. Адӟи, кызьы уло кунгожсьӧръёс, кыӵе отын культуразы. Озьы кыӵе ке палёмем мылкыдын Удмуртие берытски. Татчы вуыса, йырез тӥяно луиз ни: училищеын дышетскон йылпумъяськемын, кытчы интыяськоно, кытчы пыроно? Нылпи творчествоя дворецын кулэясько вылэм крезьгуръя дышетӥсьлы. Мон отчы интыяськи. Но ужаны кылдӥз одӥг толэзь…

Мыным жингыртӥз со вакытысь тодмо радиожурналист, артист Валерьян Исламгареев (жаляса верано, улонысь кошкемын ни). Шуэ, кылӥськиз, пе: «Айкайлы» арганчи кулэ. Отчы вазиськыса утча ай! Кытчы карод ни удмурт сямез — кепыранэз! «Айкайын» прослушивание пыр ортчыны дӥсьтонэ мед тырмоз шуыса, нырысь ик вамыштӥ культпросветам. Отын дышетӥсьёсын кенеши. Со вакытэз тодам вайыса, сюлэмы ик шымырске: нош мар луысал, театре ӧй лыктысал ке? Кызьы радъяськысал улонэ? «Айкайтэк» улонме син шорам пуктыны нокызьы но уг быгатӥськы ни. Татын мон будӥ, кыдай, пыд вылам юн султӥ.

Мар ватонэз: кӧня улӥсько ни, шӧдӥсько кыӵе ке кужымлэсь монэ китӥм нуэмзэ, сюрес возьматэмзэ. Кин тодэ, оло, со удмурт выжыосы. Чик уг жаляськы, улонме «Айкаен» герӟай шуыса. Татчы вуэме бере дышетскыны пыри на Удмурт кун университетысь социологияя но философияя факультетэ. Дипломе сӥземын вал удмурт сюанлы. Туж тунсыко потыса, ужай со бордын.

- «Айкайысь» артисткаен Ольга Гершунэн семья кылдытӥды. Миша пиды но, оло, артист луыны дасяське?

— Кузпалэным мон, культурая училищеын дышетскыкум ик, тодмо вал ни. Семьяын кык артистъёс ке, конечно, секытгес уксё ласянь, соин ик дыр шедемъя ватсаса уж борды но басьтӥськоно луэ. Пиелы 11 арес. Артистлэсь ужзэ рос-прос тодэ — кӧня пол милемын гастрольёсы потамын. Меӵак верано ке, пиелы та ужез ӧй ӵектысал. Ма, ачиз но со али мукетгес удысэ кыстӥське — мугорзэ кыдатэ. Мылысь-кыдысь ветлэ бассейнэ, эрико нюръяськонъя секцие. Аслам быдэсмымтэ малпанъёсы пыӵало кадь: ачим но пичи дырысен малпасько вал спортын вормонъёс басьтыны.

- Гастрольёсын вуылӥды ни трос кунъёсы. Маин висъяське кунгож сьӧрысь учкись асьмелэнэзлэсь?

- Асме удмурт адямиен шӧдонэ вырӟиз кунгож сьӧрын. Отчы вуылыса, мон валай: удмурт луэмедлэсь возьдаськоно ӧвӧл, соин данъяськоно! Мон малпамъя, асьмеос, удмуртъёс, ӟуч кылын вераса, комплекс неполноценности шуонэн вордскиськомы ни. Со асьмелы даурысь дауре, вирысь вире пыӵамын ни. Сыӵеен ик адскиськомы огъя дунне суредын. Соин ик удмуртлы ачиз бордын золгес ужано луэ. Нуналлы быдэ утчаськоно, бызьылоно, вормонъёсы кыстӥськоно — нырысь ик аслыд ачид оскондэ кужмоятон, дӥсьтондэ будэтон понна. Кин тодэ, оло, соин но асьмеос, удмуртъёс, ужасесь, чырмытэсь потӥськомы.

Кунгож сьӧрысь учкись висъяське вылӥ культураеныз. Соосты уд пӧя, крезьгурез валанзы туж вылӥын. Соослы кельшид ке, пыр кельшод ни, ӧд ке — уд пыры ни сюлмазы. Со вие ик соос туж быгато усьтӥськыны, мылкыдъёссэс шара вераны. Басьтом тани Европаысь кунъёсты. Отын сомында пӧртэм жанрен кырӟасьёс: отын ик джаз но, металл но шуэм сямен. Но котькудӥз вералоз калык культуразэ, выжыоссэ гажамез сярысь. Гажам гинэ ӧвӧл, тодон-валанъёсыныз но паймытоз. Кунзы но талы бадӟым саклык висъя.

Асьмелэн мукетгес югдур. Мынам сереме ик потэ, куке шуо: азинтоно калык культураез. Асьмеос коть утьыны мед пӧрмытом вал! Мон малпамъя, луыны кулэ удмурт кыллэсь данзэ ӝутӥсь бадӟым ужрадъёс. Удмурт кыл, удмурт кырӟан бордысен кутске ваньмыз — астэ, выжыостэ яратон но, аслыд ачид оскон но, улонысь астэ шедьтыны быгатон но. Нош асьме кунын культура шоры учкон — уг вераськы ни нимаз удмуртэз сярысь — кылем-мылем удыс шоры выллем. «Айкайысь» ӵош ужась эшъёсылы куддыр «бойцы невидимого фронта» шуыса вазиськисько. Бен, ми киын кутылымон пайда ум поттӥське, но милям ужмы адӟиське калыклэн пушдуннеез, культураез вылын. Но со понна та удысын тыршисьёслы кун ласянь саклык висъяськыны кулэ — тазьы мон малпасько. Шумпотӥсько, куке егитъёс концерт бере дорам лыкто но шуо: тӥлесьтыд адӟем карыса ведь, киям арган кутӥ! Озьыен, одӥг адямилэн ке но сюлэмаз культуразэ ӝутыны тылгизьыез кенжиз.

Чутӥськомы кадръёсты дасян ласянь но. Консерваториос палэнын, усточи нылпиос отчы кошко но, профессионалозь будыса, вордскем палъёсазы уг берытско ни. Одӥг ласянь, мон соосты валасько: кунгож сьӧрын, бадӟым городъёсын усьтӥськыны, астэ шедьтыны луонлыкъёс паськытэсьгес. Но мукет ласянь, тазэ биньгозыез но лэзимы ке, кыдёке ум вуэ, дыр, малпасько.

Ӵем кылоно: асьме культурамы сыӵе, кыӵе вань. Мынам та веранэн соглаш кариськеме уг поты. Макем зол ӝутомы сое, сокем зол азинтӥськоз со.

Туж синмаськыса учкисько удмурт ужрадъёсы нылпиосынызы ӵош лыктӥсьёс шоры. Но «Айкайлэн» концертъёсысьтыз шергес адӟисько пиналъёсты. Озьыен, 10-15 ар ортчыса, учкисьёсмы кулэсмозы. Ойдолэ, ӧтиськомы пиналъёсмес, Атыкай музъеммес яратомы! Нош кызьы? Пиналъёслы нырысь ик пыӵатоно вашкалазэ, выжыостэ дунъян мылкыд. Соку ини пинал ӟеч валалоз, малы кулэ патриот луыны.

Концертъёсамы шергес вуыло ни егитъёс. Но таиз, оло, озьы ик луыны кулэ. Угось милям репертуармы тунсыкогес 35-40 аресъемъёслы, нош 20 аресъемъёсты ас бордаз кыске ай дискотека дунне. Арлыд люкамъя сюлэм куриське выжы борды — тазэ ачимъя шӧдӥсько.

- Та вакытэ макем ӵем потаськоды гастрольёсы?

— Удмурт шаеръя гастрольёсы ӵемгес потаськомы. Но палэназ но вуылӥськомы. Кылем арын «Айкай» пыриськиз Россиысь калык артисткалэн Надежда Бабкиналэн кичӧлтэмезъя ортчем «Россиысь кырӟанъёс» проектэ — гастрольёсын ортчимы быдэс Россиетӥ. Паймоно кадь, Европаын кытын гинэ концерт ӧм пуктылэ ни, нош Россиетӥ такем паськыт ортчеммы ӧй вал на. Туж кельшиз Н. Бабкинаен ужаны, калык творчество ласянь солэн сомында тодон-валанэз! Солы но милемын яраз кадь — весь макта-ушъя милемыз. Оскисько, азьланяз та выллем тунсыко проектъёс пыӵалозы на.

- 17-тӥ — 18-тӥ апреле Ижысь «Аксион» культура юртын возьматоды юбилейдылы сӥзем концерттэс. Программа дасямын тӥ сюлмаськемъя. Маин шумпоттыны чакласькоды учкисьтэс?

— Бадӟым концертмы юбилеймылы сӥземын бере, валамон, тужгес но бадӟым саклык висъяме потӥз «Айкайын» кема аръёс ӵоже тыршем артистъёслы. Одӥгез но данъятэк медаз кыльы кадь. Бадӟым люкетэз висъяськоз «Бусы сюан» постановкалы. Со луоз аслаз сюжетэныз — удмурт калыклэсь улонзэ возьматӥсь мур пуштросэн. Артистъёсмы потозы выль костюмъёсын. Таин тырмоз: троссэ шараяны шедьтӥ ке, учкисьлы со кузьым кадь уз луы ни.

Источник:

Бимаков О. Н. Шуд ай гурдэ, арганчи!/ О. Н. Бимаков; записала Елена Никитина // Удмурт дунне. - 2015. - 10 апр. - С. 10,15. - (Тӧр шорын)

За предоставление материала выражаем огромную благодарность редакции газеты "Удмурт дунне"