Редактирование: Белкин Евгений Владимирович


== '''Гурт – театр''' ==

[[Файл:Белкин.JPG|thumb|left|Е. Белкин]]

'''Алнаш ёросысь Туймыйыл гуртысь Евгений Белкинэз адямиос ӟечгес тодо «Ӟечбур!» триолэн кивалтӥсез, кырӟасез сямен. Интернет вотэсын пукисьёс кӧтсэс кутыса серекъяло пӧртэм учыръёслы сӥзем вакчиесь видеороликъёссэ. Со ачиз ик режиссёр но, артист но. Нош Туймыйылысь калык понна Евгений Владимирович – культурая юртэн кивалтӥсь, гуртлэсь улон-вылонзэ шулдыртӥсь.'''

'''– Евгений Владимирович, тӥ котырын быдэс дунне берга кожалод. Асьтэдыз та улонын шедьтӥды кадь потӥськоды-а?'''

– Быдэс улонмес асьмеды пичиен-пичиен утчаськомы. Шедьтӥд ке, мар луоз со… Мон утчасько кадь ай. Оло, соин но пӧртэм рольёсты ас вылам мертасько. Ялан маке выльзэ лэсьтэм, асме эскерем, адямиослы возьматэм потэ. Тани 2018-тӥ арын Алнаш ёросын ортчизы 25-тӥ тол Гурт шудонъёс. Йӧэз но тылэз возьматыса, эмблема суредай, сое ужрадэз радъясьёслы возьматоно кариськи. Кельшытӥзы. Бырйизы. Ачим бӧрысь куалектэм порма луи. Собыдӟа кыл кутон ук со. Отын трос уд серекъя ни. Нош серекъятэк мон уг быгатӥськы. Атае юморез яратэ, вала вал. Та ӟеч сямзэ мон солэсь басьтӥськем, нош уродзэ – анаелэсь. Кулэезъя куддыр лек кылзэ ӧз жалялля. Мынам но куддыр уродэ поталля. Кыкназэс но вазь ыштӥм. Атай кулыку, мыным 21 арес вал, Нина сузэрелы – 15. Анаен соос куректыса шузимозы ни кожасько вал. Нош 1 ар талэсь азьвыл анаймес ватӥм. Куддыр корка ик пырем уг поты.

Ниналэн табере аслаз семьяез. Монэ чакланы нылпиосыныз ӵош пыралля. Гуртэ прокурор бертӥз ни, шуисько. Азьвыл мон сое ялан учкисько, нылпи садэ нуисько-вайисько вал ке, табере со монэ эскере, мынэсьтым пичи ке но, со мыным апай кадь. Милям соин огпол но керетэммы ӧвӧл. Мон дышемын ни шыпытын огнам улыны. Соос вӧзын мон ужаны но уг вуиськы. Маке борды кутскон азьын дас пол учко, малпасько ай. Мон ужаны дышетэмын ӧвӧл. Асме куддыр буйгатӥсько: вань творческой адямиос сыӵеесь…

– Творческой адямилы культурая юртэн кивалтыны капчи сётӥське меда?

– Туж ик капчи ӧвӧл. Шуисько ук, мон туж бадӟым хозяйственник ӧвӧл. Клубмы бадӟым. Сое возьыны, учкыны кулэ. Кие весь молот кутоно луэ. Созэтазэ басьтоно. 2019-тӥ арын юртмы быдэсак выльдӥськиз: укноосыз, липетэз, залэз, вылтусыз. Малпасько, умой ужаны быгатэменымы вайимы татчы та воштӥськонъёсыз. Командамы милям ӟеч. 3 кузя гинэ али ужаськомы, но ваньмы огкылысь: ачим, худрук Анастасия Хохлова но композитор, Удмуртиысь культура удысысь дано ужась Вячеслав Адаков. Библиотекарьёсын одӥг липет улын пукиськомы бере, соосты но куддыръя огъя ужрадэ кыскиськомы на. Мыным мукет клубъёсын кивалтӥсьёс паймо: директор творческой ужъёсын вырыны кулэ ӧвӧл. Мон молотэн гинэ ветло, адямиос ужалозы-а? Творчествотэк ачим куасьмо.

Заведующие куриськеме ноку ӧй вал. Гуртын уло шуыса но ӧй малпалля. Ижысь культурая училищеез йылпумъяса, отчы ик уже интыяськи, дышетӥсь луи, огдыре ик искусствоосъя школаын ужай. Ӵужай весь шуылӥз: мын педколледже. Пумитаз шуисько вал: ноку дышетӥсь уг луы. Студентъёсын капчи вал. Ачим но Удмурт кун университетэ дышетскыны пыри на. Астэ ачид сюдоно, эшшо дышетскон понна коньдон тыроно. Кӧт тыриз, городын огыр-бугыр улыса, улон темплэсь йыр поромылӥз. 10 ар талэсь азьло Туймыйылам бертоно кариськи. Клубен азьвыл кивалтӥсь Лев Сараматов бордаз ужаны басьтӥз. Со вӧзын дышетски. Аслам нокыӵе опытэ ӧй вал.

'''– Берло дыре культурая юрттылэн ужез кылӥськымон-адӟиськымон луиз. Солы выль шокчон кузьмады, лэся.'''

– Валтӥсез – коллективъёсмылы бырыны ӧм сётэ. Берыктыны быгатӥмы учкисьёсмес. Чик уг ветло ни вал концертъёсы. Телевизорлэсь, Интернетлэсь но жадем порма луизы кадь. Зэм, али но Туймыйылысь коллективъёсты учкыны пото, нош сьӧрлось кин ке концертэн лыктэ ке, туж секытэн люкасько. Шуом, «Айкай» театре билет басьтозы ай, нош мукетъёсаз уз. Калыкмы, пе, йӧно, бырйиськись. Ёрос культурая юртысь артистъёс дорамы уг ветло ни. Калыклы аслаз коллективез дуногес потэ. Мукетъёсыз, оло, дун но мултэс бадӟымгес пукто. Тынад валтӥсь ужед уксё поттон ке, калыкез люкан сярысь эн ик малпаськы. Нош мон лыдъясько: буш залын кырӟанлэсь номыр уродэз ӧвӧл. Астэ дунъяны быгатыны кулэ. Калык уг люкаськы ке, со самооценкае зол шукке.

Та творческой сезонамы коллективъёсын ветлӥмы сыӵе гуртъёстӥ, кытчы ноку вуылэммы ӧй вал на. Адями тонэ учкыны оло потоз, оло уз. Но коллективъёсты но возьматэм потэ, соос но мукет адямиосты мед адӟозы, выль мылкыдын мед берытскозы кадь. Собере, асьме ёросысь калыкез тон тодӥськод ни, тонэ но тодо, лыкто. Нош мукет интыын мукет калык, мукет сямен верасько, мукет сямен чабо.

'''– Фольклор экспедициосы но ветлыны дыр шедьтӥськоды.'''

– Репертуарез узырмытоно ук. Вашкала калык кырӟанлэн энергетикаез ик кыӵе кужмо. Вашкала гурез кыӵе ке сям-йылолъёс, бадӟым праздникъёс дыръя мытылӥзы, ужан висказы быдэстылӥзы. Пуштросэз ик солэн мукет. Собере, экспедициосын вашкала эктонъёсын тодматскиськод, соосты сцена вылын пуктӥськод. Удмурт калык возьма на соосты. Трос выльзэ тодӥськод. Артысь Вишур гуртэ экспедициен потакумы, песянаен вераськыса, вунэм кыл чузъяськиз: калямпер. Тмин, анис шуэм со. Бертӥмы, аслам ансамблям ветлӥсь арлыдоослы со сярысь верасько. Соос огкылысь луизы: ансамбльмылы «Калямпер» ним сётоно. Милемлы сӥзьыса, гуртысьтымы удмурт кылъя но литературая дышетӥсь Татьяна Пчельникова кырӟан но гожтӥз.

'''– Штатады 3 адями гинэ но, кызьы вуттӥськоды клубын 12 кружок нуыны, эшшо ке концертъёсын потаны?'''

– Самой секытэз адямиосты кружоке кыскыны но отӥяз соосты возьыны. Кырӟаны-вераны, эктыны дышетэм сяна, инструментъёсын шудыны, театральной постановкаос лэсьтыны дышетӥськом. Арлыдоос, валамон ни, ансамбле тросгес ветло. Соослы шуи: кошкиськоды ке, интыяды вайиськоды эш. Ваё. Ансамбль медаз быры. Таослэсь азьвыл коллектив куашказ, собере бичаны секыт вал.
Кыльыны курыса, нокинэ уг тэльмыриськы, нокинлэн кузяз уг ветлӥськы. Кошкемзы потӥз – кошкозы. Адямиез сюлворид ке, соин ужаны секыт луоз.

Тани Вячеслав Матвеевич клублы но, школалы но, нылпи садлы но ужа. Солэн киосыз зарниесь. Жади, кошко шуиз ке, кызьы пумит мыном? Пиналызлэн ужаселэн, Анастасия Семёновналэн, ассэ мукет азьын эскеремез потӥз ке, сюрес вылаз султом шат? Огзэ тодӥсько: соосын мыным туж каньыл: вератэк ваньзэ асьсэос лэсьто.

Ӧжыт кузя ужаса, ог ласянь капчигес. Семья кадь улӥськомы. Милям кадь бадӟым культурая юртъёсын куд-ог азьын 9 адями но ужа, соосын ӵошатӥськыны секыт кадь. Озьыен, милям 3 поллы тросгес кыл кутонмы. Озьы ик нуоно 12 кружок – ичигес уг яра. Тросгес ке, эшшо умойгес. Но коть 12, коть 3 кузя адямиосты котырад возь – уж ичигес уг луы. Тани «Ӟечбур!» триолы 7 ар ни. Таосын, оло, тросгес но нерва кошке ай. Отчы-татчы концертэн ӧтчало – золгес дасяськыны кулэ. Алексей Михайлов ужбергатӥсь луэ, ачиз ик кырӟанъёс гожъя. Клубын уг пукы бере, соя кариськоно луэ. Бордамы вал на Семён Никифоров механизатор. Но туэ коллективысьтымы кошкиз. Со интыын табере Анастасия Хохлова. 2013-тӥ арын, кутскыкумы, воксё но 8 кузя пиосъёс вал ай. Вячеслав Адаков милемыз хоръёс куспын ёрос вожвылъяськонлы огазеяз. Соку 2-тӥ инты басьтӥмы. Колхозын, гуртын уж уг бырылы бере, пумен кылимы 3 кузя. 2014-тӥ арын «Элькуновидение» ӵошатсконэ сюрим. Куалектӥзы. Шуи: милям вакытмы вакчи, пиналэсь ӧвӧл ни, луонлык вань дыръя асьмеды возьматоно. Соку 18 коллектив пӧлын ми 7-тӥ инты басьтӥм. Ми понна со туж бадӟым вормон вал. Собыдӟа сцена вылэ потонэз гурт сценаен уд ӵошаты!

'''– Коллективъёсын хореографъёссы вань, нош тӥ асьтэдыз асьтэос дышетӥськоды.'''

– Асьмемыз асьмеос сяммес вормыны дышетӥськомы. Удмурт адями ваньзэ пушказ возе бере, ыммы но пичигес усьтӥське. Ёрос культурая юртысь специалистъёс лыктыса, тупатъяны кутско. Мон соосъя весь уг кариськиськы. Ваньзэсты огкадь карыны тыршемзы уг кельшы. Шедьтэ изюминкадэс, шуо. Малы сое утчанэз, кужмысь поттонэз? Изюминка – тон ачид.
Вань ужрадъёсмес видеое гожтӥськомы. Учкем уг поты, кӧт уг веська, шуо артистъёсы. Кулэ, шуисько. Шекъёс палэнысен туж умой адӟисько. Коллективъёсмы профессиональной ӧвӧл бере, дышетсконо, умой луыны тыршоно.

'''– Кылдэс ӵемысь верано луиськоды?'''

– Мон кадь нокин но тышкаськыны уг быгаты, дыр. Аслым ик собере урод. Аслад коллективедлы кылэз ӵемысь ик вераськод. В. Адаковлэн но А. Хохловалэн коллективзы ке, соосын кенешисько. Ансамбльёсы ветлӥсьёс азьын верад ке, авторитетсы быроз. Ужазы ноку уг пыриськиськы. Валэктӥсько курыкузы гинэ: Женя учкы, юрттӥськы вал, шуыкузы. Репетициосын пукылӥсько. Репертуарзыя учкыны чакланы турттӥсько.

«Ӟечбур!» коллективысь артистъёслы но верасько: попробуй йырдэс вылэ урдэ, кизилияськыны кутскиды ке, сразу улялло. Сыӵеосын ужаны чидантэм луэ. Йыр вылын ке, тон номыре уд кылӥськыни – ваньзэ быгатӥсько кадь йӧтэ. Огез, 4-5 ар ортчыса, шуиз: мон кырӟаны уг быгатӥськы вылэм ук.

Мынам котьма сярысь аслам малпанэ: маке уг кельшы ке, верасько ёрос кивалтӥсьёслы но. Мон ачим понна уг сюлмаськиськы ук – клуб сярысь. Тани кружокъёс понна дун бичано шуыса вераськон поттыло. Клуб ке но дунтэк мед луоз! Гуртэ медаз вуы на со сям – ваньзэ уксёен гинэ дунъян. Кин татын дунын кружоке ветлоз ни? Тани али гужемлы клубмы бордын нылпиослы сводной отрядъёс усьтӥмы. Тросэз городысь бертэмын, соосты школаысь лагере уг куто. Нош ми дорын соос киужлы но, кырӟаны но, эктыны но дышозы, урам кузя солань-талань уз ветлэ. Тазьы ужаны быгатэммылы шумпотӥсько. 

Концерт понна уксё бичакумы но, куд-огез малпало, со коньдонэз кисыямы понӥськомы шуыса. Клуб ачиз выльдӥське кожало, лэся. Ӵемысь кисыысь поттоно луэ ай. Ужбергатӥсьёслы но вазиськоно луэ. Туж юрттэ Дядя Ваня (Алнашысь ужбергатӥсь Иван Самсонов). Кырӟанъёсмылы фонограммаос, аранжировкаос гожъяны уксёзэ висъялля. Гуртысьтымы Слава Ёлкин, Рома Калаев, Семён Кафтанов ноку пумит уг луо. Соослы вазиськыны капчи. Но мултэс уд ортчы – асьме кужыменгес улыны турттӥськомы. Кылем арын 114 сюрс манет доход поттыны быгатӥмы вал, ваньзэ инструментъёсты но юртэз тупатыны кутӥмы. Туэ планмы 100 сюрс манет вал. Но коронавирусэн сэрен тросэз концертъёс быризы. Сезонэз но ворсаны ӧм быгатэ. Та чер ваньзэ сураз-пожаз.

'''– Учкисьёслэсь мӧзмыса, видеороликъёс кылдытъяны кутскиды-а? Кыӵе-кыӵе тунсыкен учко Интернет вотэсысь Туймыйыл клублэсь роликъёссэ газетамы ужасьёс но… Мукет клубъёслэсь озьы ужамзэс адӟем ӧвӧл.'''

– Буш клубын пукыса, сюлэмыд тэтчоз. Камера азьын каньылгес но: коть 10 пол видеое пукты. Сцена вылэ огпол потӥд ке, маке ӧз пӧрмы ке, извините, эшшо огпол возьмато на уд шуы ук. Сценарий гожтӥсько, рольёс люкылӥсько но, 1-2 час камера азьын бергаськомы. Гуртоосты но кыскисько. Собере ни бакча но хозяйство ужъёс вискын монтажен вырисько. Телефонэ гинэ пуктыса, ӟечлыкез уродгес ик, но Центральной телевидение ӧвӧл шуыса, асме буйгатӥсько. Ачим но куддыр кӧтме кутыса серекъясько. Калыклы но кельше, выльёссэ роликъёсты куро.

Мар ке но выльзэ малпаме потэ. Рос-прос спектакль пуктон сярысь уйбыртӥсько. Валтӥсь малпан луиз ке, со бордын ужалод ни. Туймыйыл клуб азьло тодмо вал кужмо спектакльёсыныз, театральной постановкаосыныз. Со дыръёсыз берыктэме потэ. Артистъёс гуртоос пӧлын ик вань. Театральной студимы но ужа, соин ачим ик кивалтӥсько. Сценкаос ӵемысь лэсьтылӥськомы. Артистъёслэн ужаны мылкыдзы бадӟым, только кышкаськомы, шуо. Но куд-огез импровизировать карыны быгато, кыл но кулэ интыяз лякозы.

'''– Сценарийёслы сюжет кытысь басьтӥськоды?'''

– Крезьгурез кылзӥськыку но, йыре куддыр сюжет шукке. Гуртын улон туж тунсыко ук. Песяйёс куддыр сыӵе серемес верасько – мыным сценарий малпанэз ик ӧвӧл. Пельдэ но синдэ гинэ сак возь – ваньмыз ныр улын. Мукет дыръя кин ке дэмлан сётэ – пуксьы но лэсьты гинэ на.
'''
– Залын пукисьёс уг шуо-а: та милесьтым улонмес гожтэм?'''

– Асьсэды тодмало ик, верало. Но ваньзэ уд возьматы – куатаськозы. Калыкез гажаны кулэ. Клубе ветлэмысь дугдозы. Нош ми адямиостэк кин? Нокин. Калык ваньзэ шонер вера. Кылзӥськыны кулэ.

'''– Ку кышнояськоды ни шуыса уг ёрто-а?'''

– Юаса калзы быре. Акыльтӥсько кышнояськон сярысь юалляськемзылэсь. Чеберъёсыз, шуисько, ваньмыз быземын ни, шушез кулэ ӧвӧл. Лякыт юан уг сёто ке, мон но лякыт уг вазиськы.
Мынам кышное вань. Тани со – уж. Озьыгес пӧрмиз ни улонам. Со туж алама. Тон быгатыны кулэ уждэ люкыны, границаос пуктыны. Туж шумпотӥсько соос понна, кин уж бере семьяезлы дырзэ тырмытэ. Мынам ӝыныез уже дорын быдэсме. Клубын, шуом, монтаж уд лэсьты, сценарий уд гожты. Уже возе монэ, кужым сётэ. Дышиськод ваньмызлы, жаляса верано. Сюлэм усьтоно мурт но ӧвӧл. Яратондэ ыштӥськод но, дыр нокызьы уг бурмыты. Сергей Бурунов актёр шуиз: время не лечит, время только калечит. Яратонэз ыштӥд ке, тон сое ноку уд вунэты, быдэс улондэ кулытозяд соин улод. Мынам мукет сямен уг луы.

'''– Сцена вылын ӵош кырӟаменыды, видеороликъёсы ӵош потаменыды, лэся, калык тӥледыз Анастасия Хохловаен паръяз ни….'''

– Мед малпалозы ойдо…

'''– Самой бадӟым ыштонды?'''

– Вань луонлыкъёсты ӧй куты. Азьтэмъяськи. Трос оломар но карыны луэ вал... Улон – со ачиз театр: кызьы спектакльдэ пуктӥд, озьы ик радъяськоз, учкисез но, курласез но, дунъясез но одно ик сюроз.

'''– Самой бадӟым шумпотонды?'''

– Сыӵе юан сётӥськоды… Кризис среднего возраста вуиз лэся, сыӵе малпаськем уг поты. Аслым ачим доказать карыны быгатӥ: таӵе ужын ужаны быгатӥсько. Училищеын дышетскыкум, дорамы вуылӥзы «Айкай» театрысь артистъёс, егит пияшъёсты утчало вал. Монэ но кема учкизы. Бератаз шуизы: тон кыкетӥ Серебренников уд луы, тон практик ӧвӧл, тон теоретик. Мон понна со бадӟым шуккет луиз. Но гуртам бертыса, мон кырӟаны кутски. Сцена вылын но, сценарий гожтонын но маке пӧрме. Со самой бадӟым шумпотон. Ӟеч кылъёс верало ке, чабо ке, кепыр но ваёно, шум но потоно.

'''Источник:'''

[https://elibrary.unatlib.ru/handle/123456789/49044 Белкин Е. В. Гурт – театр / Евгений Белкин ; вераськиз Елена Сараматова // Удмурт дунне. – 2020. – 16 июля. – С. 10, 23 : фот. – (Тӧр шорын)].

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]