Анфиногенов Богдан
Богдан Витальевич Анфиногенов - егит удмурт кылбурчи, кырӟась.
Улон сюресэз
Анфиногенов Богдан Витальевич вордӥськиз Пичи Пурга черкогуртын 1990-тӥ арын 8-тӥ гудырикошконэ. Анаез ужа парикмахер луыса, нош атаез – телевизоръёсты тупатъясь. [1]
Пургалан будэмын ке но, Богданэз пичи дыръяз удмурт кыллы ӧз дышетэ. Анай-атаез, чылк удмуртъёс, асьсэ кылын ӧз вераське, нош песянаез дорын, анай кыл сяна, мукетыз ӧз чузъяськы. Озьы тӥни Богдан удмурт кылын верамез вала, нош аслаз эркын ваземез уг луы вал. [2]
1997-тӥ арын Богдан Пургалась 1-тӥ номеро школае мынӥз. Пияш туж шумприч будӥз: умой дышетскиз, мӧзмыса но ӧз пукы. Туж яратӥз историез. Соин ик историяя, обществознаниея, правоя олимпиадаосы пыриськылӥз. Котьку сямен ик призовой интыос басьтылӥз. Озьы элькун олимпиадаосы но сюрылӥз. Вормонъёсыз, данъян грамотаосыз люкаськизы гинэ.
Богдан творческой адями: школаын дышетскыкуз ик рок-группаязы солист луиз. Пыриськылӥз пӧртэм ужрадъёсы – школаын ортчылӥсь шулдыръяськон ӝытъёсты, выпускной ӝытъёсты, школазылы 140 ар тырмонэз пусъён ӝытэз нуылӥз. [1]
2007-тӥ арын Богдан Удмурт кун университетысь историяя ёзэтаз дышетскыны пыриз. Егит адямилы кияз шедиз Маргарита Гришкиналэн «Удмурты» книгаез. «Лыдӟемъям, мыным возьыт луиз: кызьы мон – 19 ареске вуэм удмурт адями, удмурт кылэз умой-умой уг но валаськы», – вера Богдан. Озьы, студент луыса, удмурт эшъёсыз пӧлын улыса, со умой валаз но шӧдӥз удмурт луэмзэ. [3]
Пумен Богдан анай кылзэ дышетон борды рос-прос басьтӥськиз ини. Удмурт-ӟуч кыллюкамын бугыръяськиз, удмурт ужрадъёсы пыриськыны тыршиз. Дӥсьтонлыкез пияшлэн будэ: «В контакте» сайт пыр эшъёсыныз удмурт кылын кенеше, татын со ассэ Богдан Udmurt Анфиногенов шуыса пусъе. [2]
Богдан университетын специализация басьтӥз этнология но регионоведение кафедраын. Андрей Николаевич Прокопьевлэн кивалтэмез улсын чаклаз удмурт этнофутуризмлэсь азинскемзэ. 2012-тӥ арын Богдан Анфиногенов вылӥ дунъетэн утиз выпускной квалификационной ужзэ «Этнофутуризм и удмуртская культура в ХХI в.» темая. Богдан мыло-кыдо пыриськылӥз факультетазы ортчылӥсь научно-практической конференциосы. Ужез пыртэмын «Вестник Удмуртского университета» журналэ. [1]
Студент Анфиногенов ӵемгес пыриськыны кутскиз дышетсконниын ортчись ужрадъёсы но, отын лыдӟылӥз аслэсьтыз кылбуръёссэ. Соос учкисьёслэсь сюлэмзэс вырӟытытэк ӧз кельтылэ. 2012-тӥ ар Богдан Афиногеновлы выль тубатэ вамыш лэсьтыны луонлыкъёс усьтӥз. Со пыриз дышетскыны историяя, кылъя но литературая институтэ аспирантурае. Озьы дышетсконзэ азьланьтэменыз ӵош Богдан Анфиногеновлы сцена вылын но быгатонлыкъёссэ усьтыны удалтӥз. Богдан Анфиногенов кылбурчи кемалась ваньмызлы тодмо ни Ullapala Boy кырӟась нимын. Огдыре егит пияш мылысь-кыдысь пыриськиз «Amiso Wott» рок-группае, отын со солист вал. Со озьы ик аслэсьтыз проектъёссэ улонэ пыӵатэ. Дуннеысь крезьгур хитъёсты удмурт шӧмъем карыса ачиз ик калыке вуттэ, кырӟа. Та проектэныз элькунысь «Зарни перепеч» крезьгуръя ӵошатсконын (республиканской музыкальной конкурсын) ньылетӥ интые потӥз. Богдан озьы ик пыриське удмурт шаерамы но Ижкарын ортчись пӧртэм крезьгуръя фестивальёсы, концертъёсын пота удмурт гуртъёсы, котькуд ар пыриське «Гербер» элькун празднике. Вуэ Ижкарысь клубъёсы удмурт позыръяськонъёсын егитъёсты шулдыртыны. Солэсь кырӟанъёссэ туж ярато егитъёс но, мӧйыос но. Богданлэсь куаразэ ӵем кылыны луэ «Моя Удмуртия» ТРК-лэн эфирысьтыз. [1]
Егит пияш кӧня ке дыр ужаны вуиз ини «Инвожо» журналын, «Шундыкар» лагерьын вожатой луыса пиналъёсын ужаз, «Шунды» огазеяськонлэн ёзчиез луэ. 2011-тӥ арын 24-27 тулыспалэ Богдан «Школа молодых финно-угорских лидеров» Всероссийской дышетӥсь (обучающий) семинарлэн ужаз пыриськиз.
Али аспирантураын дышетскем сяна, Богдан Анфиногенов Калык творчествоя элькун коркан («Республиканский Дом Народного Творчества – Дом молодежи») методист луыса ужа. [1]
Гожъямъёсыз сярысь
Пичи дыръяз ик Богдан синмаськиз А. Пушкинлэн но А. Блоклэн кылбуръёсызлы. Будэмъяз сое ас бордаз кыскиз В. Маяковскийлэн творчествоез. Удмурт кылбурчиос пӧлысь Богдан пусъе Эрик Батуевез но Алексей Арзамазовез. [2]
Богданлэн гожъяськон мылкыдыз 14 аресысен пуромиз. Кылбуръёс Богданлы уйин но кӧлыны маза уг сёто. Дышетскыкуз ай огъяулонниын одӥг висъетын улӥсь эшъёсыз солы паймыса вераллязы: «Шайвылын» кылбурдэ, пе, ум йылтӥд кык пол лыдӟид. [2]
Богдан удмурт кылэз дышетон вакытаз ик туж синмаськиз солы, кылбуръёссэ но аспӧртэмлыко гожъяны кутскиз. Ӟуч кылын гожтэм кылбуръёсаз удмурт кылъёс яке чуръёс пыртылыны кутскиз. Егит гожъяськись ачиз но паймиз – кыӵе чебер но тунсыко вылэм удмурт кыл. Эскерон сямен одӥг кылбурзэ «Удмуртлык» социальной вотэслэн бамаз пуктӥз. Тросэзлы эшъёсызлы, лыдӟиськисьёслы сыӵе творчествоез туж яраз. Богдан Анфиногеновлэн кылбуръёсыз печатласькыны кутскизы «Инвожо» журналын, «Удмурт дунне», «Известия Удмуртской Республики» газетъёсын. [1]
Мон вӧтай туннэ: fashion арня,
Вспышки камер, pret-a-ported.
Ты идёшь и не видишь меня,
Нош тонэ адӟисько. Ми артэ,
Кык метр ӝужда каблукъёс,
Но тон кадь ик ветло ветылъёс…
Только ты не дала мне руки,
Туж кезьыт ӝуало та тылъёс…
«Кстати, в тренде туннэ – пужей!»
– «Чё там в тренде? Мар?» – «Тӥни!»
Арганчи интыын – dj.
Пӧсятэм интыын – martini.
Enchante de vous voir, enchante…
Марианна! Мишель! Чичолина!
Со сылэ но киын шонтэ,
Со одно ик милям – Чеберина.
Гожъяськемезлэн емышъёсыз адӟисько ини. Богдан басьтӥз «Рифма» фестивальын приз зрительских симпатий (УдГУ, 2009), пыриськиз но вормисе потӥз Эрик Батуевлы сӥзем «Арт-Э» фестивальын (2009), озьы ик «Известия Удмуртской Республики» газетэн ортчытэм «Приговские чтения» конкурсын вормисе потӥз (2010), «Грифон» галереяын ортчем «Кузебай Гердъя лыдӟонъёсын» кыкетӥ интые потӥз (2011). [1]
Кылбура Богдан Маяковскийлэсь адӟем карыса. Кылбуръёсыз солэн кытчы ке ӧтисесь, яркытэсь, зол чузъяськисесь. [4] 2012-тӥ арын 5-тӥ коньывуонэ Коммунаров ульчаын Трокай Борисовлы бадӟым памятник усьтӥськиз. Со ужрадын егит кылбурчилэсь Богдан Анфиногеновлэсь кылбурзэ ки чабонъёсын пумитазы:
«И давайте мы будем ходить сюда чаще,
Даже чем в супермаркет «Айкай».
За то, что Удмуртия есть в настоящем,
Спасибо, Трокай! Бадӟым тау, Трокай!» [5]
Премиосыз
«Рифма» фестивальын приз зрительских симпатий, 2009
Эрик Батуевлы сӥзем «Арт-Э» фестивальын вормись, 2009
«Приговские чтения» конкурсын вормисе потӥз, 2010
«Грифон» галереяын ортчем «Кузебай Гердъя лыдӟонъёсын» кыкетӥ инты, 2011
Библиография
Статьяосыз
Вуи городэ ; Лобӟы ; Идеальной ; Glamour : кылбуръёс // Инвожо. – 2013. – № 3. – С. 36-37 : фот.
Ӟечыран ; Мой народ : кылбуръёс // Инвожо. - 2014. - № 1. - С. 8.
Мунё но Туно : кылбур / туспуктӥз Денис Корнилов // Удмурт дунне. - 2014. - 24 июня. - С. 1.
"Со мынэ "от бедра"..." : кылбур // Удмурт дунне. - 2014. - 16 сент. - С. 4. - (инГОЖ)
Только у нас // Gorod. – 2012. – № 4. – С. 72–73 : фот. цв.
"У нас тут не Венесуэла..." : стихи вперемежку на русском и удмуртском языках // Удмурт дунне. - 2013. - 19 марта. - С. 5. - (инГОЖ)
Я мало что пробовал // Первые строки : поэтическое творчество студентов Удмуртского государственного университета. – Ижевск, 2009. – С. 33.
Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.
Уже кутэм литература
- ↑ 1,0 1,1 1,2 1,3 1,4 1,5 1,6 Рукопись.
- ↑ 2,0 2,1 2,2 2,3 Фролова Е. Udmurt пияш // Удмурт дунне. – 2009. – 22 дек. – С. 5.
- ↑ Анфиногенов Б. Только у нас // Gorod. – 2012. – № 4. – С. 72-73.
- ↑ Шихова Л. Кылбуръёсы пыӵа вакыт // Удмурт дунне. – 2013. – 22 янв. – С. 1.
- ↑ http://www.minnac.ru/minnac/promo/2762.html
