Редактирование: Айрапетян Ольга Алексеевна

== Кадр сьӧрын – быдэс дунне ==

[[Файл:Айрапетян.jpg|thumb|left|Айрапетян (Аксареева) О.А.]]
'''Одӥг кино но, одӥг передача но, одӥг спектакль но режиссёртэк уг пуксьы. Со котькуд кадр понна кыл кутэ, быдэс ужез радъя. Но ӵемысь асьмеос ум тодӥське солэсь нимтулзэ но, туссэ но. Кадр сьӧрын улон сярысь вера Ольга АЙРАПЕТЯН (АКСАРЕЕВА), «Удмуртия» кун телерадиокомпаниысь режиссёр. Алнаш ёросысь Ӟатча школаез йылпумъямез бере ик татын со 29 ар ӵоже ужа ни. Эшшо Удмурт кун университетысь Удмурт филологияя, финно-угроведениея но журналистикая институтын дышетэ. Пусъемын Удмурт Элькунлэн Данъян грамотаеныз.'''

'''- Ольга Алексеевна, ялан кадр сьӧры кыльыны ӝож уг йӧты-а?'''

- Кытын ужаськоды шуыса юало ке, телевидениын шуисько но уноез паймо: малы мон тӥледыз отысь ӧй адӟы? Телевидениын журналистъёс гинэ уг ужало, соослы кадре потыны юрттыны кулэ на ай. Газетэз но журналистъёс гинэ уг лэсьто ук. Интые туж сюлэмыя.

Школаын дышетскыкум, туж потэ вал журналист луэме. Кылбурай, заметкаос гожъялляй, «Дась лу!» («Ӟечбур!») газетын печатласькылӥ. Кытын мар ортче — отын котьку нырысь ик луисько вал. 9-тӥ Мае парад-смотр дыръя но командир луылӥ. Семьяямы 5 нылпиос пӧлысь мон самой бадӟымез. Пичиосын пукыны кулэ ук, лучше школаын кыӵе ке ужрад дасяны юртто шуыса, урокъёс бере кылисько вал. Ёросын, Ижын ортчылӥсь конкурсъёсы пыриськылӥ, олимпиадаосын вормылӥ. Мон бере вордӥськем сузэре вылэ ваньмыз усиз: пичиосын утиськон но, корка котырын утялтӥськон но. Весь азьтэмъяськиськод, номыр но уд ужаськы, шуэ вал со монэ.

10-тӥ классын дышетскыкум, удмурт телевидениын «Юан-веран, тодон-валан» конкурс ялӥзы. Ӟатча школаысь нылъёсын-пиосын команда люказы но монэ капитанэ пуктӥзы. Передачаез нуэ вал журналист Валерий Сидоров. Передачае пыриським, конкурсын вормим. Кузьым луиз — Санкт-Петербурге путёвка. Милемын ветлӥзы режиссёр Нина Егоровна Кузнецова но ачиз Валерий Михайлович. Со егит журналист. Кельшем-а, мар-а мыным. Пичиос лагерьын зубной пастаен зырасько ук. Мынам но сыӵе шоккетон сямы сайказ. Гостиницаысь телефонэз кутӥ но номераз жингыртӥ. Куараме воштыса, шуисько: мон Елена Полякова, ачим Удмуртиысь, ужасько татын телевидениын, интервью басьтэме потэ. Отын-отын пумиськом. Ӵуказеяз, пумиськонэ потэмезлэсь азьвыл, юасько: Елена Поляковадэс адӟиды-а? Йӧтӥз ук соку! Котьма ке но, командаенымы люкиськон азьын Валерий Михайлович шуиз: Иже вуиды ке, пыралэ. Соку сюлэмам уката золгес каръяськиз кадь журналист луон мылкыд.

Удмурт кун университетэ ӟуч филологияя факультетэ пырыны одӥг баллэ ӧз тырмы. Кытчы кариськыны, кӧтӝожме вормыны валатэк, эшеным мынӥм телекомпание, В. Сидоровен адӟиськыны шуыса. Чай юим. Буйгай, вуоно арын одно ик дышетскыны пыро, шуи аслым. Валерий Михайлович шӧдтэк шорысь дэмлаз: мар быдэс ар гуртад карод — лыкты ми доры ужаны. Али, пе, реорганизация ортче, бергес ву. Озьы шуэмысьтыз, кӧня ке пол дӥнязы ветлӥ. Весь уг пӧрмы.

Огпол школаысь бызьыса бертэ выны. Шуэ: тонэ срочно Иже ӧтё. Ижозь одӥг гинэ рейсовой автобус ветлэ вал. Мукет нуналаз мырдэм билет шедьтӥ но Иже телекомпание лыктӥ. Валерий Сидоров отпускын. Нина Кузнецова номыре уг тоды. Кин жингыртӥз? Малы ӧтиды? Нокин номыре вераны уг вала. Мынӥ Василий Михайлов директор доры. Кытысь тырмем дӥсьтонэ — юасько: мон ӧй вала ни, тӥ монэ кутӥськоды-а, уд-а? Малы мон, билетлы сомында уксё быдтыса, солань-талань ветлӥсько? Соку валтӥсь директор О. Шибанов кадръёсъя ёзэ ыстӥз. Отын паспортме учкизы но, 17 арес гинэ ай. Ум кутэ, шуо. Вордӥськем нуналозям 1 толэзь кылиз на, шуисько. Валерий Сидоров уже потӥз но воксё паймиз, мон ужасько ни шуыса. Озьы «Удмуртия» телерадиокомпание сюреме дырысен 29 ар ортчиз ни. Али ке но уг тодӥськы, кин кытысь соку жингыртэм. Али валасько ни, инты бушамен, университетысь жингыртӥзы вал, дыр, шуыса.

'''- Пичи ӧз каре-а?'''

- Монэ басьтӥзы режиссёрлы юрттӥсе. Отӥяз ни ачим режиссёр луи. Сыӵе уж вань-а, мар-а, эшшо ке со понна уждун тыро шуыса, паймыса ветлылӥ. Дото кельшиз! Ялан тодам лыктылӥз пичи дыры. Мамаосмы басьтӥзы вал диапроектор. Роднямы бадӟым. Вань пичиосты котырам люкасько, простыня ошисько но диафильм возьматӥсько, пӧртэм куараен вераськисько вал. Нылпиосын концерт, спектакль радъялляй. Аслам кырӟам-эктэм уг пӧрмы, но мукетъёссэ эктытӥсько-кырӟатӥсько вал. Режиссёр луон сямы отын ик вордскиз кадь. Режиссёр — со нырысь ик организатор, дирижёр.

Огпол сузэре ужан интыям вуиз, меӵак эфире сюриз. Бертэмез бере анай-атае юало, пе, бон мар Оля отын ужа? Бадӟымъёсын командовать каре, шуэм. Соку мыным 23 арес вал. Куд-огезлы со, конешно, ӧз кельшылы. Егит мурт трос ареслы бадӟым адямиосын мед ки-валтоз ай. Режиссёрлы куддыр кулэ бусылэн вылӥысен огъя планэз. Сыӵе дыръя со тубытэ мӧйы операторез комбайн вылэ. Куддыр липет йылэ кечырскытэ. Косӥз — лэсьтоно, нокытчы уд пыры. 

Сюжетлы кадръёс ваё, шумпот но буйга кадь. Но мон уг быгатӥськы дышем сямен огсыр улыны. Мыным ялан маке выльзэ шедьтоно, калыклэсь пӧртэм луоно. Одӥг кадь улон акыльтэ. Режиссёр но озьы ик: солы ялан выль формат утчано, передачаез умойгес карон сярысь сюлмаськоно. 

Азьло режиссёръёс журналистъёсын ӵош гуртъёсы потало вал. Ас вакытаз Валерий Тероковен «Тупал удмуртъёс» проект бордын ужамы. Татарстан, Башкортостан, Киров, Марий Эл, Пермь, Томск улосъёсы вуылӥм. Одӥг пол, Перме лыктыкумы, сӥзьыл вал ай. Ӵукна султӥськомы но — котыр лымы ни. Ансамбльысь песянайёс, монэ жаляса, дӥсьсэс сётӥзы. 5 часэ султӥськом, съёмкаос бере уйшор котыр выдӥськом вал. Ужысь бертыса, жадем адямиосты кӧня-кӧня курадӟытӥм: эктӥзы, сям-йылолъёссэс возьматӥзы. Ачид адӟиськод, кыӵе луыны кулэ кадр, утчаськод, лэсьтӥськод, передачаез бичаськод.

Со командировкаос вуёмыто вал. Но мылкыд лобалляз. Выль передача борды кутскон — со шуд. 

Татьяна Денисоваен кема дыр ӵоже лэсьтӥмы «Аслым ачим кузё» передача. Тодмо но тодмотэм ужбергатӥсьёслы сӥземын вал со. Кызьы возьматод? Конь-дон но шыръяно, чебер но лэсьтоно. Кыӵе но амал ӧм шедьтылэ! Режиссёр ялан малпаське. 9-ысен 17 часозь гинэ ужаны уг луы – куддыр уйин но йырез бергатоно.

'''- Меӵак эфире потонэз космосэ лобӟонэн ӵошатылӥськоды…'''

- Котькӧня ар ужа, котьку куалекъяно. Куддыр возьматыны кулэ, кин татын кузё. Одӥг-ог угось творческой коллективын ченгешон поталля. Режиссёр ассэ валтӥсь лыдъя, журналист ассэ вылӥ пуктэ, оператор шуэ: монтэк ноку номыр уз лэсьтӥськы. Кузё луэмдэ ӧд возьматы ке, эфир вольыт уз пӧрмы. Передача понна котьку кыл кутэ режиссёр. Адя-миосыз огазеяны но валче возьыны кулэ, передача мынытозь ке но. Уг яратӥськы уж шоры чиньы пыр учкисьёсты, ужез часэн-минутэн лыдъясьёсты. Эфир чылкыт но чебер мед ортчоз. Аслым секытгес ке но, мон сое умойгес карыны тыршисько. Улонын мон сыӵе ӧвӧл, нош ужын сыӵе — котькуд чыры-пыры понна сюлмаськисько.
[[Файл:Айрапетян2.jpg|thumb|right|М. Солодянкинэн «Вести» передача дасяло.]]
Умой ужасьёслы уг жаляськы ӟеч кылъёсме. Но соку ик керетонозь тышкаськыны но быгатӥсько. Кивалтӥсьёслэн валамзылы, дунъямзылы тау. Троссэ проектъёсты быдэстыны соос мыным оско. Со бадӟым шуд.

'''- Кызьы Удмурт кун университетэ дышетыны вуиды?'''

- Университет сярысь кино лэсьтыны дэмлазы. Коридоръёстӥ ветлыкум, малпан чилектӥз: ужа вал татын но… Соку мон тодмо ни вал Александр Наумович Шейнинэн, журналистикая ка федраысь доцентэн, Россиысь дано радистэн. Мон солы кызьы ке шуи: пичи дыръям дышетӥсь луэме потэ вал. Вазиз: ойдо эскером. Озьы кутски жур-налистъёслы лекциос лыдӟыны. Дышетон удысын трос коньдон уд басьты. Трос ар ӵоже люкам тодон-валандэ кинлы ке но сётэм потон мылкыд бордысь вордскиз со малпан. Егит журналистъёс телерадиокомпание лыкто но номыре уг тодо. Соослы ӧй вера ке, кинлы вералом? Арнялы быдэ маке вылез кылдэ. Син кышка, ки лэсьтэ. Компьютер технологи-осты вормиськод, быгатӥськод. Сое но возьматэм потэ. Егитъёс пӧлын мылкыд но егитоме. Соос выль кужым сёто кадь. Куддыр лекциос бере тышкам кадь бертӥсько. Нош егитъёс юасько ке, пельёссэс усьтыса кылзо ке, лобаны кутскиськод.
 
Студентъёс киноен тунсыкъяськыны кутско. Режиссёр луэме потэ, шуо. Быдэс потокысь одӥг ке но адями озьы вера ке, сюлэмез вӧйын маяллям кадь луэ. Уже я практикае куриськыкузы, ми Ольга Алексеевналэн курсъёсаз вал шуо ке, телерадиокомпаниын эшъёсы пальпото, тазэ дышетонэз ӧвӧл ни, шуо. Сыӵе данъямлы шумпотӥсько. 

Собере студентъёс асьсэос но монэ оломалы но дышето. Пиналъёс монэ валало, мон — соосты. Студентъёслы луыса ик мон сузэрелэсь нылзэ капчиен валасько, кусыпъёсмы туж шунытэсь. Со али Ижысь К. Герд нимо гимназиын дышетске. Ми соин вераськыны кутскиськомы ке, мамае шуэ: тӥ кыӵе кылын зулиськоды? Нош мыным кельше. Уж дурын но куддыр паймо: тон кытысь сыӵе сленг кылъёсты тодӥськод? Студентъёс улонлэсь бере кыльыны маза уг сёто.

'''- Мар тӥледлы уг тырмы та улонын?'''

- Ужаны кутскеме бере ни мон Москвае дышетскыны пыри. Соку ми нуналлы быдэ сямен ветлӥськомы вал театръёстӥ. Со сяме кылиз. Али асьме театръёстӥ ветлӥсько. Но Москваысь театръёс бере куддыр маиз ке уг тырмы кадь йӧтэ. Яратӥсько студентъёслэн театральной постановкаоссыя «Огни большого вуза» конкурсэ ветлыны. Студентъёс профессионалъёс ӧвӧл, но соос тыршо, пушкысьтызы потто котькуд рользэс. Тани мар уг тырмы бадӟым сцена вылын. Тани мае возьмасько режиссёр сямен. Передачаосын улонлэсь мурдалазэ сцена вылын кадь куддыр возьматыны уг луы – котьмалэн аслаз куронъёсыз.

'''- Тӥ асьтэос ваньзэ сюлэм пыртӥды поттӥськоды, соин вылды?'''

- Милемыз гуртын ялан косо вал асьмемыз умой возьыны. Калык мар шуоз, тышкаськылӥзы. Котькӧня куареты, сямез уд ваты, дыр. Уж монэ кӧня ке воштӥз ик. Мамае шуиз: ответственнойгес луид. Котьку котькытчы бере кыльыса вуисько вал. Али — ноку.

Папае пи возьма вылэм. Оло, соин но пи кадь вордӥськи. Со монэ уж дорысьтыз но ӧз кельтылы. Со механизатор вал, монэ бульдозерен, К-700 тракторен, руль сьӧраз пуктыса, ворттылытӥз. Кенеръёсты ваньзэ мертай. Туж яратӥсько вал шляпаосты. Папае модник вал. Со шляпаен ветлылӥз. Папаелэсь чебер шляпазэ арам кари: вискысьтыз гопсэ-складказэ утюген шонертӥ. Пӧрмиз. Урам кузя соин ветлӥсько вал. Шаян, мар шуод. Липет йылэ шудон корка лэсьтӥ. Огпол пичи сузэрме отчы тубытӥ. Ачим васькыкум дэремме кеси, суйме сӧсыртӥ. Вӧсь луэмелы чидатэк, кеносэ кошки. Сузэре липет йылэ кылиз. Бускеле васькытэм.
 
Школаын дышетскыкум, вожъяськыса учкисько вал каблуко туфлиен ветлӥсьёс шоры. Но ӝужыт мугорылэсь кепыраса, губырскыса ветлылӥ. Ижысен каблукен мынӥсь мынэсьтым быдэс йырлы ӝужыт нылкышноез адӟем бере гинэ тыбырме шонертӥ. Али тол сапегме мурӝолысь поттӥсько но малпасько, кызьы мон таӵе ӝужыт беро пыдкутчанэн ветлӥсько вал меда. Сузэре одӥг вамыш но лэсьтыны ӧз быгаты. Али калыклэсь пӧртэм дӥсяськисько. Куд-огез шуэ, дыр: осто, та Оля мае дӥсям ни? Ас понназ озьы пӧрме. Мыным вузчиос сыӵе дӥсь дэмлало — бохо. Мыным кельше, гольык уг ветлӥськы ук. Улэмъя эрикогес луэм потэ, шонертӥськем но гадь тыр шокчем. 

Огез сярысь жалясько: уксёме эсэпезъя кутыны уг валаськы. Сётэмын ӧвӧл бере, ӧвӧл ни. Туннэ берпуметӥ 100 манетэн ческыт маке басьто но, ӵуказе котьма мед луоз.

'''- Мае тӥ возиськоды кадр сьӧрын? Мае ватӥськоды мурт синъёслэсь?'''

- Аслэсьтым улонме. Мама-папаелы но лишнойзэ уг вераськы. Улонын оломар но луэ. Но ӝожтӥськыны уг тыршиськы, быгатӥсько ке но. Соослэн пиналъёссы, мон сяна но, вань. Соослы умойзэгес гинэ вераны тыршисько. Удмурт Элькунлэн Данъян грамотаеныз пусъемзы сярысь нырысь ик соослы верай. Аслым шара уг верало ке но, тодӥсько: мынам вормонъёсылы шумпото. Папаелэсь кинлы ке данъяськыса верамзэ кылэме вань, мынам Оляе телевидениын ужа шуыса.

Куд-огез уж доры пырыса уг вутты на, вера ни: туннэ отчы ветлӥ, ӵуказе отчы мыно, соин-соин пумисько, тазьы каро. Вань улонзэс шара кисьто. Мынэсьтым дэремме но басьтэме бере гинэ адӟо. Кулэ-а муртъёслы сокем усьтӥськыны? Малпанъёстэ вералод но, соос уз быдэсме ни, шуо ук. Солы оскеме потэ кадь. Пушкам сураськемын христианство но язычество. Озьы будэтэмын. Анаймы (бабуше) быдэс уйзэ быгатэ вал службаын сылыны, нош собере йыр-пыд сётыны. Гуртысь черкез куашкатон вакытэ анаймы черкысь бадӟым обросэз доре ваем, сое кеносэ поттэм, кымалтэм, ӝӧккышетэн шобыртэм. Ми сое ваньмы ӝӧк кожаллямы, улӥяз учкыны тодамы ӧз лыктылы. Черкез выльысь усьтэмзы бере анаймы обросэз берыктӥз. Озьы сое ӧй утьысал ке, со бырысал. Кызьы курдан ӧй вал — али но паймисько. Монэ чукындыризы 8-тӥ классын дыръям. Кыӵе оскон луоз? Мон оскисько: Инмар пушкад. Пушкад эсэпез луыны кулэ: аламазэ лэсьтыны уг яра. Озьы ик улӥсько. Ас улонме но мурт синъёслэсь ватыны тыршисько.

Уж дорын кинэ но уд пумитаськы! Ураметӥ мынӥськод но малпаськод: мон та адямиез адӟи ук. Телевизорысь, студиысь. Улон телевизор пыр кадь ортче: тонэ туж тросэз тодо, тон — соосты. Университетын но котырын сомында адямиос. Соин но ватӥськем потэ. Куддыр сыӵе дорын огнам пукеме потэ. Мынэсьтым куддыр юало: тыныд дорад мӧзмыт ӧвӧл-а? Мыным асэным ачим ноку мӧзмыт уг луы, асэным тунсыко. Монэ нокин уг йӧтылы. Оген улэмъяд дышиськод оген улыны. Аслам интые, аслам пространствое мед луоз. Люкиськем бере со озьы луиз кадь.


'''- Семьяын валась ӧз сюры?'''

- Бызьыкум 21 арес вал мыным. Родняосы ӵош луэммылы нырысь пумит вал. Мукет выжыысь луэмез сюлэмзэс шуг карылӥз. Но со йырзэс ас палаз берыктыны капчиен быгатӥз.

Сюан азьын яратӥсько вал вакчи юбкаен, каблукен ветлыны. Солы но со кельшылӥз, кыӵе чебересь пыдъёсыд, шуэ вал. Сюан бере лапег пыдкутчан, кузь дӥсь потӥзы улонам. Сыӵе куронэз вал. Со монэ ӝокатыны, эрикме зӥбыны кутскиз. Отӥяз уж дорын ӝеганъёс понна вожомылӥз. Нош передача лэсьтыку, заводын сямен часэн-минутэн уж уг йылпумъяськы ук. Огпол со, монэ пӧяса, Пермь улосэ нуиз, шутэтском, пе. Толэзь ортчиз, монэ уг лэзьы. Кык толэзь ортчиз: уждэ куштод, куриськон гожты, шуэ. Магазинэ но уг лэзьы вал. Мырдэм пегӟи. Дорысен ни валай: Ӟызыяй. Москвае дышетскыны мынонлэсь но алыны кутскиз — кошкид ке, люкиськом шуиз. Люкиським. Собере 6 ар бордысьтыз ӧз лэзьы на.


'''- Туннэ сюлэмдэс буйгатӥсь адями вань-а? Яке вӧсь луэмлэсь кышкаськоды?'''

- Уг кышкаськы. Секыт дыръя возьдаськытэк но ватӥськытэк вераськыса пукыны адямие вань. Трос аръёс ӵоже ми соин ӵош ни. Но бызьыны малпасько шуэме уг луы. Эрик дуногес.
Самой вӧсез — нылпи Инмар сётымтэ. Семьяед ӧвӧлтэмысь-а сомында ужаськод шуыса юало куддыръя. Оло, соин но. Сузэрелэн 3 пиналыз. Со монэ воксё шудтэм кожа. Нылпиё муртлы бызь ини, шуэ.
Туж кулэ шӧдыны, тонэ валало шуыса. Мар но уд адӟиськы, кыӵе но сюжетъёс уд лэсьтӥськы, малпаськод: тынэсьтыд но секыт улӥсьёс вань, но соос уг ӝожтӥсько. Шуг-секытъёс шоры синъёсме кыньыны тыршисько. Воксё чидантэм луэ ке, тодам лыктэ «Унесённые ветром» киноысь Скарлеттлэн верамез: мон малпасько со сярысь ӵуказе. Сыӵе девизэн улӥсько.


'''Источник:'''

[https://elibrary.unatlib.ru/handle/123456789/48509 Айрапетян (Аксареева), Ольга Алексеевна. Кадр сьӧрын - быдэс дунне / Ольга Айрапетян (Аксареева) ; вераськиз Елена Сараматова. // Удмурт дунне. - 2020. - 27 февр. - С. 10, 23: фот. - (Тӧр шорын)]. 

'''За предоставление материала выражаем огромную благодарность редакции газеты
[http://www.udmdunne.ru/ "Удмурт дунне"]'''

[[Категория:Удмуртские звезды]]