Ёлкин Пётр Васильевич

Материал из Воршуда
Перейти к навигацииПерейти к поиску

Суредъёссэ дунъя дунне [править]

П. В. Ёлкин


Солэсь суредъёссэ ООН-лэн юртысьтыз, американ посоллэн Джек Метлокклэн улон юртысьтыз но пумиталляны луоз. Солэн суредъёсаз – дунееысь уно кунъёс, инкуазь суредъёс но адямиос. Соослэн авторзы сярысь гажаса верало но тау карыса кизэ кутыло пӧртэм кунъёслэн кузёоссы. Кин бен со? Удмуртиысь калык но Россия Федерациысь дано художник, УАССР-лэн кун премиезлэн но Удмуртиысьтымы комсомоллэн премиезлэн лауреатэз Пётр Васильевич Ёлкин.


- Пётр Васильевич, удмурт шаермылэн кыӵе сэрегаз будэтыло такем синмаськымон но данъяськымон усточиосты?

- Мон вордӥськи Дэри ёросысь Шудья гуртын 1946-тӥ арын. Семьяын дас кыкетӥез нылпи вал. Зэм, витез агай-апайёсы, быдэ вуытэк, пичиысен ик висьыса кулӥзы. Эмъюмъёс, пенициллин гинэ но, соку ӧй вал на, кынмамъёсты йӧнатыны ӧз быгатылэ. Мынэсьтым со кыль палэнтӥ ортчем, Инмар утем. Аресы вуыса, школае мынӥ. Покчи ёзоез со гуртамы ик вал. Дышетскисез но тыраз люкаськылӥз. Али жаль Шудьяамы нылпиос ик ӧвӧл ни, егитъёс но ӧжыт, кошкылыса быризы. Сад-бакча возисьёс, палэнысь лыктэмъёс улӥсьёсызлэсь уногес. Витетӥ классэ Лудорвае мынӥмы ни. Нуналлы быдэ куинь иськеме отчы ветлоно луылӥм.

- Нош суредаськыны мылкыдды школае мынэм берады-а ни, азьпалгес-а улӟиз?

- Котькуд пиналлэн сямен ик, пичиысен та мылкыды вал. Суредалляй ас валамея, мылкыдыя. Нимысьтыз дышетӥсьмы гуртамы ӧй вал. Книгаосысь суредъёсты, Левитанлэсь, Шишкинлэсь ужъёссэс синмаськыса учкылӥ, паймылӥ инкуазез сокем яркыт суреданы быгатэмзылы. Кызьы озьы пӧрмытыло, малпалляй. Со паймеме вамен ик ас кужымме но эскерыны ӧдъяй – оло, маке пӧрмоз-а шуыса. Котыр инкуазез, арбериосты, книгаосысь пужыоссэ учкыса суреданы оскалтылӥ. Соку, конечно, мынам профессиональной художник луон сярысь малпанъёсы-мар ӧй вал на ай. Огшоры выри. Валаме, пӧрмытэме но туж пичи на вал. Югдур кӧнялы ке воштӥськиз Лудорвай школаямы выль дышетӥсь Игорь Алексеевич Богданов вуэм бӧрсьы. Со Гурт удысъёсъя институт бере кузпалэныз ӵошен лыктӥз, машиноведение предметэз нуиз (тракторен, машинаосын ужаны удостоверение мынам но вань). Но киыз котьма ужлы мынэ вал. Тодонъёсыз но котыр ласянь туж паськытэсь, муресь. Литература, дуннеысь культура сярысь туж тунсыко мадьылӥз. Озьы ик туж чебер суредаськылӥз. Та удысъя школаямы нимысьтыз кружок нуыны басьтӥськиз. Мон отчы гожтӥськи. Тӥни озьы суредан ужъя нырысь чыры-пыры тодонъёсме татын басьтӥ, шуыны луэ. Татын пӧртэм суредан амалъёсын, буёлъёсын тодматскылӥмы, соосты ужын кутыны дышетскимы, кимес волятылӥм. Отчы школаысьтымы тросэз ветлылӥзы. Умой суредасьёсмы мон сяна но уно вал. Пӧлазы мон номырин сыӵеен ӧй висъяськылы. Бордгазетъёс лэсьтылыны курылӥзы ке но, мынэсьтым чебергес пӧрмытӥсьёсыз но вал, дыр. Монэ, кызьы верай ни, нимысьтыз ӧз висъяллялэ. Нош мынам туж потэ вал азьпал луэме. Со мылкыды ик, оло, монэ газетэ гожъяны лӧпкытӥз. Кӧня ке ивор гожтэтъёс ёрос газетамы - «Ленинеце» - ыстылӥ ни вал. Собере суредме но ыстоно кариськи. Иворъёсыным ӵош келяй. Отын тол ӝытэз возьматӥ вал. Корка укноысь мальдӥсь тыл пуштырес лымы люкъёс но лымыен изьям кенер, писпу вайёс вылэ усе. Туж синмаськыса, сюлмысь тыршыса быдэстӥ вал та суредме. Со газет ужасьёслы но ярам, шӧдске: кӧня ке дыр ортчыса печатлазы «Ленинецын». Ой, шумпотӥ! Мукетъёс но адӟиллям суредме – э, ушъяло ук. Та бере школаямы монэ нырысетӥ суредась интыын адӟыны ӧдъязы. Озьы нырысь луыны тыршон мылкыды соку мукетъёсты азьпалтыны юрттӥз. Сыӵе вал кутсконэз. Собере суредан удысын эшшо уногес ужано, тыршоно луиз ини. Ас мылкыдыя суредалляме сяна, дышетӥсьёсмылы предметъёсъя наглядной пособиос лэсьтылӥ. Зоологиен, ботаникаен пӧйшуръёсты будос-сяськаосты суредалляны тужгес но яратылӥ. Котьку шумпотыса юрттылӥ: адямилы но, аслым но ӟеч лэсьтылӥ – кин валалляз.

- Озьыен, тӥ пичиысен ик тодӥды ини суредась луондэс. Та пумысь сюлмаськон-шугъяськонъёсын чик ӧд пумиськылэ?

- Кылдылӥз, кызьы сотэк. Малпамъя гинэ улонын ялан уг пӧрмы. Ми семьяямы коньдонлы ёрмысагес улӥмы. Буби Быдӟым ожысь бертэм дырысеныз висьыса улӥз, кынманы шедьтэм. Нырысетӥ группа сётэмын вал солы. Пенсиез – 28 манет. Со номырлы ик ӧз тырмылы. Соин ик бубиным-муминым ужаны кутскемме чидатэк витьыса улӥзы, ӧжыт капчигес луоз шуыса. Озьы, сизьыметӥ классэз йылпумъяса, мон Ижевске ремесленной училищее мынӥ вал, токаре дышетскыны. Но пропискае ӧвӧлысь отчы ӧз кутэ. Соку Пермской областе документъёсме ыстӥ, Красновишерское, электрике. Отысь ӧтьыса соку ик гожтэт ыстӥзы. Лыкты, пе, улон интыосмы вань, интыяломы. Мон сюрес вылэ дасяськыны кутски. Анае бӧрдыны ӧдъяз: кызьы, пе, тон, пичи мурт, отын огнад быгатод. Лэземез уг пот. Агай-апайёсы но паймыса лыктӥзы. Соку, шуисько, гуртэ кылёно ке, мон 8-тӥ классэ мыно, дышетсконме азинто. Соглаш луизы. Озьы шор ёзо школае мынӥ. Отӥяз уж быръён ласянь шонаськонъёсы ӧй вал ни. Суредан быгатонлыкме, та удысъя тодон-валанъёсме, институтэ пырон вылысь, нуналмысь муромытыны, паськытатыны тырши. Суредасьёс, искусство удыс сярысь книгаос уно лыдӟылӥ. Гужем, велосипедэ пуксьыса, Иже ветлӥсько вал, Йӧскалык библиотекае. Велосипедме город пуме тодмоосмы доры пуктыса кельтӥсько, ачим отӥзэ – автобусэн. Библиотекаысь суредаськон сярысь ваньзэ сямен книгаоссэс лыдӟи. Нырысь татысь ужасьёссы, пичи на шуыса, туж оскытэкгес учко вал шорам, бӧрысь тодмало вал ини, фондъёсысьтызы ужъёсын, книгаосын но тодматскыны лэзизы. 11 класс бере художественно-графической факультетэ дышетскыны пырыны лыктӥ. Соку ик гужемаз татысь студентъёсын ӵош инкуазь суреданы пленере потай, киме волятон вылысь (татын уго мукет абитуриентъёс искусствоосъя школаос бӧрсьы лыктылӥзы). Тыршеме пайда вайиз специальностез – суредэз но живописез – «4»-лы сётыса, 1965-тӥ арын Удмурт пединститутэ пырыны быгатӥ.

- Нырысь дышетскон араз ик «Советской Удмуртия» газетэн юн кусып тупатӥды.

- Ёросысь газетэнымы эшъяськеме сярысь поттылӥ ни вал. Со бӧрсьыгес ик суредъёсме но гожтэм ужъёсме элькун изданиосын но печатланы ӧдъязы. Озьы «Шекыче» но бадӟымос гинэ уже потаз. Соосъя синйылтыса, лэся, «Удмурт дуннеос» – В. М. Михайлов, С. Г. Машков – пединститутэ пыреме бӧрсьы нырысь гужемаз ик монэ доразы суредасе ужаны ӧтизы. Сӥзьылпал семьяямы азьвыл ноку адӟылымтэ – 300 манет! – уждун сётӥзы. Вераны луонтэм шумпотӥ. Соку ик ,басьтэм коньдонэлэсь ог люкетсэ кутыса, Москвае ширтӥ. Владимире, Суздале вуылӥ, Третьяковкае пырай. Лавкаостӥ ортчыса, пижон выллем дӥсяськи. Кылемзэ уждунме сберкассае понӥ. Вуоно аръёсаз редакцие сюрес ӟеч-ӟеч лёги ни. Соку газетын компьютеръёс ӧй вал ке, суредъёсты, шрифтъёсты киын лэсьтылоно луылӥз. Тыршыса быдэсъяй вань со ужез. Котькуд сюжетъя кык-куинь, куддыр дасо вариантъёс но лэсьтылӥсько вал, бӧрысь пӧлысьтыз устозэ быръён вылысь. Ужамелы синмаськизы, лэся. Бӧрысь, дышетсконме йылпумъян азям, редакцие монэ ыстыны обком пыр ӧтён дасязы. Озьы, школае дышетыны ветлытэк, соку ик монэ редакцие басьтӥзы. Отысен армие ветлӥ ини.

- Армие мылпотыса-а мынӥды?

- Службае кытчы ке палэнэ, кыдёкысь интыосыз, дуннеез адӟыны шуыса, ветлэме потэ вал. Но монэ Удмурт шаерамы ик кельтӥзы, ракетной войскоосы. Татын но суредаськон ужен тросгес выроно луылӥз: пӧртэм чертёжъёс но лэсьтылӥ. Озьы ик армейской газетэнымы но кусып вози: гожъям ужъёсме но суредъёсме ӵемысь печатлаллязы. Окружной военной газетысь ялэм одӥгаз конкурсын вормись но луылӥ. Со сяна, киномеханике дышетски. Солдатъёслы ӝытъёсы клубын фильмъёс возьматъяллясько вал. Службаме ортчем бере «Советской Удмуртие» ужаны берытски.

- Куд-огез верало, бадӟым газетын, пе, ас ужъёсыныд вырыны дыр уггес шедьылы ни. Тӥляд но озьы вал-а?

- Редакциын куинь-ньыль ар ужаме бере малпаны ӧдъяй зэмос творческой суредан борды басьтӥськон сярысь. Мылкыды вал чибори буёлъёсын но ужаны. Поталляны ӧдъяй инкуазе, ас мылкыдыя суредъёс, нимаз адямиослэсь тусбуйёссэс лэсьтылыны дыр шедьтылыны тырши. Куке аслыд творческой сюрес бырйиськод, дырдэ ӝикытгес кутыны сюлмаськиськод ини. Нош редакциын ужез зэм но котьку тырмыт: ретушь бордын, мылкыдыд вань ке, быдэс нуналэн но пукыны луоно. Озьы ик суредъёс лэсьтон ласянь но: ужаны кутскыкум ай, одӥг веросъя ик укмыс-дас пӧртэм суредъёс лэсьтылӥсько вал – пӧлысьтызы тужгес ярамонзэ быръён вылысь. Озьы дыр трос бырылӥз. Соин ик бӧрысь ӟеч-ӟеч, но одӥг суред лэсьтыны тыршылӥ ни. Ог аре суредасьёслэн творчествоя юртазы Калининской областе мыныны путёвка сётӥзы. Быгатонлыкъёссэс возьматэм егит суредасьёслы сое огазеяськон пыр висъяллязы, дунтэменгес. Отын ӟеч-ӟеч ик ужаны быгатӥ ини. Бертэме бере суредъёсын нырысетӥ адӟытонме радъяй. Со вал 1971-тӥ арын. Пастухов ульчаын журналистъёслэн клубзы вал, отын возьматӥ. Ужъёсме дунъязы. Ӟеч кылзы мылкыдме та удысъя эшшо рос-просгес ужаны кутскыны бурдъяз. Редакциысь кошкыны чаклай. Лэземзы уг поты вал. Редактормы Василий Михайлович кылиськод ке, пе, квартиралы ключ али ик сётӥськом, шуиз вал. Но мон пумит луи, кошки. Кин ке шузи но шуиз, оло, соку. (Ма, зэм но собере улон сэреглы ёрмыса кема гинэ улоно луи. Депутатын ужакум но, ачим понна курыны умой ӧз пот. Но со квартираез басьтымтэысьтым али но шумпотӥсько: мон эрико кыли, ӧй думиськы. Ас сюлэм потэмея ужме, улон сюресме азинтӥ. Редакциысь кошкыкум, интыям Леонид Прозоровез ӵектӥ. Со ужаны ӧдъяз. Нош ачим художественной фондэ интыяськи. Быдэскын творческой уже выйтӥськи... 1975-тӥ арын «Большая Волга» зональной выставкае пыриськи. Отысь ужъёсме, устоосыз пӧлысь бырйыса, Москвае Российской выставкае басьтӥзы. Журналистъёслэн огазеяськоназы монэ редакциын дыръям кутӥзы вал ни. Ӝоген суредасьёслэн огазеяськонзылэн ёзчиез но луи.

- Та аръёсы ик тӥлед Удмуртиысь комсомоллэсь премиез сётэмын вал.

- 1975-тӥ арын комсомоллэн путёвкаезъя мыным БАМ-е вуылыны кылдӥз. Пӧрмиз озьы. Комсомоллэн ЦК-ез отчы творческой бригадаез ыстыны чаклам. Та сярысь Александр Шкляевлэсь тодӥ. Юасько, нош пӧлады суредасьёс вань-а? Ӧвӧл кадь, пе. Мон соку ик - комсомоллэн обкомаз. Нырысетӥ секретарь (соку Владимир Викторович Годин вал) доры пыри но ӵектӥ: БАМ-ысь ужасьёсты суреданы но умой луысал, пӧй. Озьы монэ делегацие пыртӥзы. Али ке но шумпотӥсько соку дӥсьтэмелы: солы луыса, бадӟым лэсьтӥськонэ вуылӥ-адӟи. Отысь паймымон адямиос, чебер интыос, инкуазь сэрегъёс, Тында, Якутиысь Магот шур но со вамен золтэм выж вылтӥ ортчись сюанчиос, озьы ик трос уно мукетыз мынам суредъёсам но сюлэмам пыраклы пыризы. БАМ-е вуылэме ик юрттӥз кадь комсомоллэсь премизэ но басьтыны. Удмурт улосамы лэсьтэм (огшоры ужась калыкез но нимо-дано адямиосмес мон со аръёсы трос суредалляй вал) ужъёсы понна гинэ сое ӧзгес сётысалзы, дыр, кадь потэ. Удмурт шаерамы но БАМ-ын лэсьтэм суредъёсылы огъя дунъет выллем со луиз. БАМ-ысь суредъёсы Москваын но возьматӥськылӥзы, огзэ Третьяковской галереяе кельтӥзы.

- Бӧрысь Москваысь художественной академиын аспирантураын куинь ар дышетскиды на. Вералэ вал со сярысь но.

- Ас быгатонлыкъёсме, луонлыкъёсме шӧдэме бере, суредан удысъя тодон-валанъёсме Москваын паськытатыны мылкыды ӝутскиз. Кузпалылы поттылӥ но, сокем ик лэземез но уг поты кадь. Ма, нылмы но вал ни соку. Озьы ке но малпанэлэсь ӧй куштӥськы. Семьяелэсь лушкемен кадь куинь арлы Москвае дышетскыны пыри СССР-ысь Художествоосъя академие аспирантурае. Татысен уно дано художникъёсын, суредъёсынызы, ужан амалъёсынызы тодматскылыны луонлык кылдӥз. Дышетӥсьёсы но тодмоосы пӧлын вал классикъёс Н. В. Томских, О. К. Комов (Воткинскысь Чайковскийлы пуктэм скульптуралэн авторез), Е. А. Кимбриг (Тарас Бульбаез суредась), А. М. Грицай. Таизлэн пиез Саша монэным ӵош дышетскиз, мастерскоез ик мынаменыз артэ вал. Гужем этюдъёсысь бертэ ке, соос, атаеныз ӵошен пуксьыса, котькуд суредзэ пыр-поч сэрттыса-пертчыса пото вал: артэ пуктэм буёлъёслэсь ваче тупамзэс-тупатэмзэс, озьы ик огъя тональностьёссэ. Атаез туж валась быдӟым суредась вал. Вожъяськыса учкылӥ ужамзэс. Мазэ быгатӥ, пелям поныны тырши. Озьы туж трос выльзэ басьтӥ. Ма, юнме уг шуо, дыр, Москваын (Санкт-Петербургын) огшоры ульча изъёс (асфальт) гинэ но суредасез тодон-валанъёсын узырмытэ. Со зэм но озьы. Татысь узыр музейёс, адӟытон галереяос, библиотекаос, пӧртэм усточиосын пумиськылон-кенешонъёс азьланяз эшшо но пайдаёгес ужаны мылкыд сётӥзы. Татын дышетскон вакытам ик ини мон туж уно выль суредъёс лэсьтӥ, ужъёсыным пыриськылӥ адӟытонъёсы, нимаз аслэсьтымзэ но радъяны быгатӥ. Отчыозь Удмуртиысь огез суредасьмы но Москваын персональной выставказэ ӧз лэсьтылы на вал. Художественной академиын дышетскыкум ик, ысъязы Германие. Соку аспирантъёсын ваче вошъяськыло вал. Милемлы дунзэ но тырылоно ӧз луы. Отын уно суред лэсьтӥ. Вуылӥмы Берлинэ, Дрезденэ, Эрфуртэ, Бергенэ, Веймаре, озьы ик Рюген шормуӵе. Ужъёсы пӧртэм адӟытонъёсын бӧрысь возьматылӥськизы. Ар ортчыса, Чехословакиын Россиысь суредасьёсмылэсь выставказэс радъяны оскизы.

- Европаысь сяна, Азиысь, Африкаысь шаеръёсын калыкъёсын тодматӥсь суредъёсты но уно пумиськыло.

- Москваын улон вакытам мон Азиысь но Африкаысь странаосын эшъяськонъя совето комитетъёслэн ёзчизы но луисько вал, пӧртэм конференциосы ветлоно луылӥз. Нырысетӥез выездной заседание вал Тбилисиын. Соку ай Шеварнадзе татысь коммунистической партизылэн нырысетӥ секретарез вал (милемын пумиськон но ортчытӥз). Отын мон трос суредъёс лэсьтӥ. Ужъёсме печатлазы пӧртэм центральной газетъёсын: «Известиын», «Культураын», мукетъёсаз. Со бӧрсьы монэ синйылтӥзы, вылӥ Правительственной делегациосы но пыртылыны ӧдъязы. СССР-ысь Суредасьёслэн огазеяськонзылэн секретарез монэ Вьетнаме отысь суредасьёсынызы кусыпъёс тупатыны потӥсь делегациен кивалтыны бырйиз. Но мынӥсьёс маке муген ӧз вуэ, огнам ветлоно луи.

Монэ туж дуно вылӥ куноез кадь пумитазы - кунсьӧр ужъёсъя министерствозы, суредасьёслэн огзаеяськонзы. Ужаны-ветлыны нимысьтыз машина, переводчик висъязы. Вуылӥмы пӧртэм каръёсы – Ханое, Сайгонэ (али Хоши Мин нимаське). Пумиськылӥ уно пӧртэм адямиосын, гурт калыкенызы но. Озьы Вьетнамлы сӥзем ог сю пала ужъёс кылдытыны быгатӥ. Соос пӧлын ик дас кык серия - офорт. Суредъёсыным адӟытон ортчиз Ханойын. Бӧрысь, дорам бертыса, пӧртэм интыосын возьматылӥ на: Москваын, Ижын но мукет. Та ёзын ужея ик Африкае но ветлыны кылдӥз: Замбие, Анголае, Танзание. Мукетъят эшшо Сингапуре, Малайзие, Индие но мукет шаеръёсы. Анголае вулыкум, удмурт адямиен пумиськи. Со кык военной академиез – Фрунзе но Ворошилов нимооссэ – йылпумъям генерал-лейтенант Пётр Иванович Гусев, Сьӧлталан вордӥськем, будэм пиосмурт, ож удысъя валтӥсь советник луыса тырше вылэм. Соку ай кунсьӧрын ужасьёсмы сярысь шара уггес верало-гожъяло на вал. «Удмуртской правдаын» Гусев сярысь статьяме поттӥ вал. Но ай соку но главной военной советник луэ шуыса пусъемзэ ӵушыса кельтӥзы на вал, ӧз печатлалэ. Сыӵе бадӟым званиен офицеръёсмы сярысь Удмуртиын ӧм тодылэ. Бертэме бере газетэ гожтэмысьтым паймизы. Тросэз оскытэк аслым но жингыртылӥзы на.

Бӧрысь улонмы шарагес луиз. Анголаын ужамез сярысь Пётр Иванович ачиз книга но поттӥз ини. Али дано улосчимы Львовын улэ. Дор палъёсаз одӥг-ог вуылыкуз, мон дорам но кожаны уг вунэты.

Африкаын лэсьтылэм суредъёсыным одӥгез бадӟым адӟытонэ ортчиз Москваын, Союзъёслэн юртазы, Колонной залын. Африка калыкез огинъянъя огазеяськонлэн кызь вить ар тырмонэзлы сӥземын вал. Вань кунъёссылэн посолъёссы вуылӥзы выставкае. Пусйизы: автор Африкаын будэм мурт кадь, пе, ӟеч, шуныт мылкыдын та лымшор шаерез, солэсь улон-вылонзэ возьматыны быгатэм. Мон поннам со туж вылӥ дунъет вал. Ма, зэмзэ но уго аслэсьтым вань геройёсме мон гажаса суредасько. Полотноосам со шӧдӥське, вылды. Соку суредам муртъёсы пӧлын СВАП-лэн (Африкаез зӥбет улысь мозмытонъя огазеяськонлэн) соку Президентэз Сэм Нуйома (бӧрысь, Намибия эрик басьтэм бере, солэн нырысетӥ Президентэз луиз) но вал. Та портретэ али бырттэмын ООН - огазеяськем нациослэн организацизылэн юртаз, Намибилэн ужъёсызъя комитетэ. Та ужез отчы Советской Союзлэн нимыныз кузьмазы.

Дышетсконме йылпумъяса Иже бертэме бере монэ Суредасьёслэн огазеяськоназы парторганизацилы секретаре бырйизы. (Мыным со, конечно, сокем кулэ но ӧй вал. Но, ма карод, бырйизы. Улон сыӵе вал: устооссэ шуыса кивалтыны дэмлаллязы. Озьы ик правленилы ёзчие, худсоветамы тӧроез но бӧрсьысь уно пол бырйылӥзы.

- Вылӥ Кенешын но огвакыт ужады кадь.

- Бен, 1991-тӥ арын Художникъёсмылэн огазеяськонзы ласянь монэ отчы ӵектӥзы. Ортчеме бере депутат эшъёсы Культурая комитетэн кивалтыны ӵектӥзы вал. Но пумит луи, мынэсьтым устоосызгес но шедёзы на малпаса, лэся. Бӧрысь жаляй. Вуоно араз ик собере Суредасьёслэн огазеяськонзылы тӧрое эшшо бырйизы. 1992-тӥ арын улонамы пумтэм шуг-секытъёс (калык ваньбурез люкылыса тус-тас карон, аренда дунъёсын шудон) кутскизы вал ини. Таӵе вакытэ кивалтӥсьлэсь воззэ кыскыны депутатлы капчигес луоз шуыса, монэ та уже кужмысь сямен ӵектӥзы. Со дырысен татын тыршисько.

Творческой союзъёслэн улон-вылонзы али туж секыт. Выль законъёсын соослы нокыӵе саклык висъямтэ, улон радзы утьымтэ. Таин валче нуналмысь шугъяськонъёс кылдо. Соосты палэнтон ласянь пумтэм бызьылоно луэ. Коньдон но тани уждунлы гинэ висъяське, мукет номырлы ӧвӧл: аренда дунъёслы но, ужрадъёс ортчытъяны но чакламтэ. Алигес, суредасьёсмылэсь мастерскойёссэс утьыса, судъёстӥ но кыстаськоно луиз. Шуныт понна тыронъёсмес уго коммунальщикъёс куать но ӝыны поллэсь будэтӥзы вал, вуз поттӥсьёслы сямен. Кызьы ми сое тырысалмы? Нош амалъёс утчано луиз. Озьы тӥни та вакыт тӧроослы хозяйственник но, юрист но луытэк ӧвӧл.

Кунсьӧрын творческой удысын тыршисьёс, соос радын суредасьёс но, узыр уло. Спонсоръёссы но, басьтӥсьёссы но трос. Асьмелэн югдур мукет. Калыкмы куанер на уго. Но азьланяз, малпасько, югдур воштӥськоз. Оскем потэ, ми но, суредасьёс, калыкмы но ӟечгес уломы. Нош ужъёсынымы тунсыкъяськисьёс, дунъясьёс вань. Гужем тани, витьтон вить арес тырмеменым валче, Пушкинскойысь выставочной заламы адӟытонме ортчытӥ – дас сюрслэсь уно учкись вуылӥз тодматскыны. Озьы бере, ужаны мылкыд но вордӥське.

- Пётр Васильевич, лыдӟисьёслэн ас семьяды, кузпалды, нылпиосты сярысь но тодэмзы потоз, вылды.

- Кузпалы Валентина Семёновна вордскем гуртысьтым ик шур сьӧр урамысь. Со мынам нырысетӥ яратонэ вал. Пичиысен ӵош дышетским. Одӥг классын. Школа бӧрсьы мединститутэз быдтӥз. Али нылпи садын ужа, эмъясьын. Институтэз йылпумъян араз сюанмес ортчытӥмы. Пиналъёсмы куинь: кык ныл но одӥг пи. Бадӟымез – Олямы – Ленинградысь университетын психологе, собере Москваын аспирантураын дышетскиз на. Али феврале кандидатскойзэ утьыны дасяське. Ужа Ижевскын, Россия Федерациысь МВД-лэн школаяз. Юридической факультетазы психологиез нуэ. Удмуртэз нылы вала. Быземын. Пизылы Ванялы вить арес ини. Мукетыз нылмы Аня Будапештын экономикая университетэз йылпумъяз но тодон-валанъёссэ Америкаын йылэтыны мылкыд кариз на. Пимы Лёша Удмурт кун университетамы искусствоосъя факультетын кыкетӥ курсаз.

- Пиналъёсты асьсэос-а бырйизы со сюресъёсты? Дышетскыны пырыны секыт-а йӧтӥз?

- Нылпиосмы пичиысен ик умой дышетскыны, котькытчы вутскыны тыршо. Асьмеос но та ласянь ялан соосты ӝутканы тыршиськомы вал. Анямы школаез зарни медален йылпумъяз. Англи кылэз туж ӟеч тодэ. «Андан» ансамбльын эктылӥз. Коллективенызы Мароккое ветлыкузы, сое огӵош ик берыктӥсь (переводчик) интыын но нуллӥзы. Кунсьӧр кылэз тодэмез юрттӥз Венгрие институтэ пырыны но. Олямы но умой дышетскиз, Москвае Калыкез дышетонъя министерствоысь направлениея мынӥз. Школаын дыръя фигурной нискыланъя, художественной гимнастикая, эстрадной эктонъя секциосы ветлылӥз. Нош Алёшае мынам сюресэя вамыштӥз, лэся. Но суредаськонын ас сямыз али ик шӧдӥське ини.

- Нылпиосыныды тӥ лек луылыны быгатӥськоды-а вал?

- Сямыя мон лек ӧвӧл ке но, кулэ луыкуз, чурыт кылме но вераны кылдылэ вал, е но кутылэме вань.

- Дорады кин ӵемысьгес сиён пӧра? Асьтэос гажаськоды-а та ужен вырыны?

Кузпалы, конечно, пӧраллягес. Но, кулэ ке луэ, быгатӥсько ачим но ӝогак маке-маке дасяны. Азьвыл куноосме но семьяме куддыр пельнянь кутыса но пумиталлясько вал.

- Нош кыӵе сиёнъёсты асьтэос яратӥськодыгес ?

- Вань удмурт сиёнъёсты: пельнянь, табань, эшшо ик перепеч.

- Телевизор учкыса пукон дыръёсты луыло-а?

- Маке выльзэ тодытӥсь, познавательнойёссэ, инкуазьлы сӥземъёссэ передачаосты одӥг-ог учкылӥсько ик. Нош пӧртэм кунсьӧр фильмъёсты уг яратӥськы, дыры но ӧвӧл.

- Вераськонмес йылпумъяса, юаме потэ на вал: шудо-а тӥ?

- Туннэ мон пыд йылам йыг-йыг сылӥсько. Ортчем улон сюресэ талы ӟеч инъет луиз. Со понна анай-атайёсылы но нимысьтыз тау кареме потэ: соос дышетӥзы милемыз сюлмысь тыршыса ужаны. Нош кин ужаны дышемын, солы нокыӵе политической зурканъёс, воштӥськонъёс но кышкыт ӧвӧл. Но нимаз калык понна чакласа ке, со – трагедиялы но пӧрмыны быгатэ. Туала выллем «вуберганъёсын» пичи лыдъем калыкъёсмы бырыны но быгатозы. Уго али улонмы – хаос. Ваньмыз ас кожаз лэземын, азинскыны сюресъёс нимысьтыз чакламтэ. «Ульча» пиналъёс, пӧртэм паласькись висёнъёс, пуштон но мукет шугадӟон учыръёс улонамы кузёясько. Куке котырын калык курадӟе, кайгыре, нимаз одӥг муртлы шудо луыны шуггес. Но огласянь асме шудо шуыны дӥсьтӥсько ик. Ас шуд адӟонме мон котьку но герӟалляй суредась луон сярысь малпанэн, яратоно адямиеным артэ улонэн. Со чакламъёсы быдэсмизы. Озьыен, асме шудоос пӧлы пыртыса, янгыш уг луы, дыр. Мукетъёслы но вань ӟечсэ гинэ сӥземе потэ.

Источник:

Ёлкин П. В. Суредъёссэ дунъя дунне / П. В. Ёлкин ; записал В. Возняков // Удмурт дунне. - 2002. - 18 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"