Коренева Светлана Васильевна

Материал из Воршуда
Версия от 16:11, 20 сентября 2017; Ladamiri (обсуждение | вклад) (→‎Туй бордысь шуныт лыктэ…)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Туй бордысь шуныт лыктэ…[править]

Коренева С. В.

Элькунысьтымы кибашлыослэн юртазы тыршо паймымон чебер адямиос: ужъёсынызы но, мылкыдъёсынызы но котырез югдыто. Соос пӧлысь одӥгез — Светлана Васильевна Коренева. 12 аресаз со нырысьсэ кияз кутӥз туй. Озьы 20 арлэсь кема уг люкиськылы ни соин. Киужъёссэ дунъяло быдэс Россиысь кибашлыос. Туйлэсь лэсьтэм сумкаоссэ, котомкаоссэ куро Европаысь кунъёсын, Канадаын, Япониын улӥсьёс.

— Светлана Васильевна, киужен вырыны кытысь сыӵе бадӟым мылкыдды?

— Выжыямы ваньзы кибашлыос. Вордски Якшур-Бӧдья ёросысь Пичи Итча гуртын 1981-тӥ арын. Анае туж тунсыкъяське гуртмылэн историеныз. Озьы со тодӥз: Пичи Итчаез кылдытэм Попов фамилиен бесерман воргорон. Поповъёс али но гуртамы вань. Уло отын ӟуч но, удмурт но семьяос. Мынам атае ӟуч ке, анае удмурт.

Жаляса верано, атае улонысь кошкиз ни. Солэн лэсьтӥськон ужлы киыз мынэ вал. Туж яратӥз музъемез, фермер но кариськылӥз. Колхоз куашкам бере ю-тысь возён кеносъёс буш сылӥзы. Кӧня жаляз соосты. Одӥгзэ басьтыса дорамы пуктӥз. Табере анае отын быдэс музей усьтӥз. Ачиз со библиотекарь луыса ужа. Соин ӵош мон но гурт кузя, вашкала арбериосты люкаса, ветлӥ. Эсьма, куштӥськем коркаосы но пыраллям — оло, мазы ке кылемын шуыса. Мар но ӧз люкаськы — куиськон станокъёс, лянэсъёс, аръян шукконъёс…

Тросэз киужъёсыз кылемын песянаелэн но. Мон сое тодӥсько на: туж чебересь выж лёгетъёс куылӥз. Нош мон кышкасько вал куиськон машинаезлэсь — укыр бадӟым потылӥз со мыным, эшшо ке куараез туж зол. Сӥньысъёсты катушкае биньыны нимысьтыз арбери кулэ, со гуртысьтымы одӥг кышномуртлэн гинэ вал. Со доры ми песянаен ӵош ветлылӥм — катушкаосыз нош, оло, мынэсьтым бадӟымесь вал. Песятае но кибашлы вылэм — гуртамы котькинлэсь умой лэсьтылэм вал тӥрлыкъёс. Но кема улымтэ, войнаысь контузия улэ сюрыса бертэм. Ӵужанае керттћське вал: быдэс семьямылы пӧзьёс, носкиос керттылӥз. Жаляса верано, али лябӟемын ини. Ӵужатае пӧламы ӧвӧл ни, со гын сапег гындылћз, писпу выжыослэсь олома но лэсьтылӥз — пӧйшуръёсын быдэс коллекциез вал.

Пинал дыры туж шудо вал! Семьяямы 3 пинал будӥм, вань агае но сузэре. Атаймы шуылоз вал: мынам пичи дыры шудытэк, ужаса гинэ ортчиз. Тӥляд со мукет мед луоз ни. Но тэк ноку ӧм пукылэ! Гужем пудо сиён дасянэз адӟемпотостэм карисько вал — но ма карод, анай-атайлы юрттӥськоно. Анай вуриське-керттӥське ке, ми со котырын ни. Лушкемен но вуриськыны турттылонъёсы вал — анаелэсь бызем фатазэ вандылэме понна йӧттӥзы но. Будэммыя атай мушъёс котырын берганы дышетӥз.

Ми пичи дыръя нылпиосты ужлэсь уг ало вал. 1-тӥ классэз йылпумъяй гинэ, колхозэ потаны кутски: тол бере ферма котырын утялтӥськылӥм, зернотокын юрттӥськылӥм. Уждунэным анай-атай велик но басьтӥзы.

Озьы пичиысен будӥ, вашкала сям-йылолъёсын тунсыкъяськыса, ужлы дышыса. Соку ик улон питранэ берганы кутскиз, вылды, сое уд дугдыты ни…

— Иське, асьтэды киужлы сӥзёды шуыса, пичиысен тодӥськоды вал?

— Кин луо шуыса малпанэ ик ӧй вал кадь. Бен, нюлэскы туй бичаны огнам но ветлылӥ. Солэсь панно лэсьтыса, школае но нуэме вань. Борддоре ошыса, кӧня ке возизы ик… Валай: ӧз яра, дыр.

Зэмзэ верано ке, школаын мон туж востэм вал. Дышетскыны ветлӥ Чур школае. Ӝыны нунал дышетскеммы бере ӝыны нуналзэ интернатын улылӥм, продлённой группаын. Котькудмылэн нимаз интыосмы вал. Монэ но гуртысьтымы одӥг нылашез малы ке нимаз комнатае интыязы. Собере ик посёлокысь пиналъёс милемыз отӥгес карыны кутскизы — тӥ, пе, гуртысь. Нимаз каремысьтызы пушкам выйи кадь, со пырак дышетскытозямлы кылиз. Бен, урод ӧй дышетскы, котьку ударницаын ветлӥ.

9-тӥ классэз йылпумъяй но, анае монэ Ижысь культурая училищее нуиз. Тодӥсько на: вазь-вазь ӵукна ик сайкатӥз, китӥм кутыса, ог 10 иськемез валтӥз — городэ нуись автобус Чурозь гинэ ветлэ вал. Нырысь араз дышетскыны ӧй пыры, конкурс туж бадӟым вал, 1 интые ог 10-12 мурт. Озьы быдэс арзэ 10-тӥ классэ ветлӥ на. Вуоно араз нош ик — вазь ӵукна султыса, китӥм валтыса…

Соку асме ачим уг валаськы вал, дыр, маин вырыны мыным яра. Нош анае шӧдэм. Огпол но жаляме ӧвӧл, улонме киужен герӟай шуыса. Культурая училищеын дышетски пужъятсконэз валаны. Туж яралляз. Отысь дышетӥсьмы азямы туж чебер удмурт пужыосын айшон понэ но шуэ вал: асьтэос лыдӟе, кыӵе амалэн со пужъятэмын.

Дышетскыкум практикаме ортчи Якшур-Бӧдьялась киужъёсъя центрын. Отын вал туйлэсь пӧртэм арбериос лэсьтӥсь нылкышно. Трос ӧз вераськылы. Солэн ужамез шоры туж синмаськыса учкылӥ. Ачим но пуньыос, лянэс лэсьтӥ. Но практика бере училищее лыктӥ но — ужме ӧз дунъялэ кадь. Шуизы: умой лэсьтэмед, но мар курим, сое гинэ лэсьтысалыд ке, окмысал…

Бӧрысь валай ни: практика дыръя лэсьтэм арбериосам вашкала шӧмыз ӧй вал. Соосты мон пӧръяй, клеен лякылыса — кызьы лэсьто тросэз. Со бӧрсьы ини мургес тодыны тырши песянай-песятайёслэсь ужан амалъёссэс.

Культурая училище бере Якшур-Бӧдьялась кибашлыослэн центразы интыяськылӥ. Отын ог 2 ар ужай. Иже улыны выжеме бере уже куриськыны лыктӥ Кибашлыослэн элькун юртазы. Директорез Рафхат Мухаметович Каримов соку ик юаз: кыӵе вормонъёсыд вань? Мон вашкала шыкысэз туен лякылӥ вал, сое Кибашлыослэн элькун юртазы адӟытонэ но басьтылӥзы. Шуисько: шыкысэ вань. Озьы та арбери мыным юрттӥз уже интыяськыны. Собере тодон-валан люкай Удмурт кун университетысь Искусствоосъя дизайнъя институтын заочно амалэн. Диплом уже сӥземын ни вал туйлэсь арбериос лэсьтонлы.

— Туннэ тӥ кивал-тӥськоды ни инкуазь материалъёслэсь пӧртэм арбериос лэсьтонъя ёзэн…

— Котькудмылэн ас удысмы. Надежда Иванова куролэсь мунёос лэсьтэ, Любовь Бывальцева пуэз вӧлэ, вандылэ, Евгений Бикузин крезьгуро инструментъёс лэсьтэ. Куиньназы ик туж тунсыко, ас ужзэс яратӥсь, творческой адямиос. Дырын-дырын шып пукиськом — котькудмы ас ужамы выемын. Одӥг-ог гожъяно луэ методической пособиос, ортчытъяськом мастер-классъёс. Ёросъёсысь кибашлыослэн центръёсазы ужасьёсын юнэсь кусыпъёс возиськом, ку кызьы луэ: ми соосты малы ке дышетӥськом, яке соос милемыз…

— Кытысь материал кариськоды?

— Элькунамы ӧвӧл туй дасянэн вырись нимысьтыз предприятиос. Куд-ог мукет улосъёсын соос вань, но туйзэс бадӟым машинаосын Европае келяло.

Нош ми асьмеос бичаськом, соин ик арлы огпол ке но одно ик тэле потаськом. Эсьма, асмелы нимысьтыз дӥськут но басьтӥм ни. Туез бичано март пумысен июнёзь. Но туэ куазь ми понна туж умой — июле но бичаны луиз на. Потаськом ӵош ужась эшъёсынымы ик. Куддыр, гуртэ бертӥсько ке, агайме я сузэрме ӧтисько — ноку пумит уг карисько. Агаелэн аслаз тракторез вань. Нош сузэре лесничествоын ужа. Соин ик со умой тодэ, кытын кызьпуосты погыръяло. Монэ котьку алэ: Светлана, токма азьысь туй бичаны, кызьпуосты быдтыны уг яра!

— Ӵем потаськоды элькунамы но палэнын ортчылӥсь пӧртэм адӟытонъёсы. Отын уно кибашлыос ас ужъёссэс возьмато. Маин висъясько тӥлядъёсыз?

— Вашкалаосмылэсь ужан амалъёссэс утеменымы, историез мур тодэменымы. Али сколотеньёслэсь лянэсъёс лэсьтыны кутски — элькунамы соин вырисьёс чиньыен лыдъямон. Со понна туез котырак басьтоно, кесиськыны медаз шедьы шуыса. Капчи ик уж ӧвӧл — тодоно, кызьы кысконо, кужым но кулэ. Соинтэк-а туйлэсь арбериос лэсьтонэз Пермьысь кибашлы Михаил Павлов «воргорон уж» шуэ. Но мыным туж яра! Эсьма, сколотеньлэсь пӧрмытэм лянэсэ ву, чечы но понӥд ке, одӥг шапыкез но уз вия. Лэсьтэмын клейтэк. 2 ар талэсь азьло вал со, Интернет пыр тодматски Архангельск улосысь Александр Шутихинэн. Ӵапак со сыӵе лянэсъёс лэсьтылэ вылэм. Бӧрысьгес мон солэсь кӧня ке лянэсъёссэ басьтӥ, нош со мыным сколотеньёссэ кузьмаз. Озьы мон ачим соосты лэсьтылыны дышетски ни.

Зэмзэ вераса, вазен мон туж пумит вал пӧртэм социальной сетьёслы. Малпалляй, малы юнме ас улон-вылондэ мукетъёсызлы возьматонэз. Собере валай: Интернет пыр, астэ сяна, ужъёстэ возьматыны луэ. Калык мед адӟоз, кыӵе сям-йылолъёссы вылӥллям вашкалаосмылэн, нош ми соосты утьыны выриськом. Интернет монэ тодматӥз трос кибашлыосын. Кытӥ-отӥ соос визьмало, но ӵемгес ушъяло, кыӵе, пе, тӥ яратӥськоды ас калыктэс, культурадэс. Шумпотӥсько, мылкыды уката пуроме! Зэмзэ но, яратонтэк номыр ӧй пӧрмысал. Но мон асме возьматыны уг яратӥськы. Ужасал шыпыт но ӟеч. Соин ик ужъёсме шыпытак вотэс баме пуктылӥсько, шыпытак гожтӥсько, мар со сыӵе, но кызьы сое лэсьтоно.

Паймоно кадь, ужъёсме адӟиллям ни кунгож сьӧрын улӥсьёс но. Озьы кӧнязэ ке куризы Канадае но, Японие но. Жаляса верано, асьмелэн уггес валало на дунъяны инкуазь материаллэсь лэсьтэм арбериосты. Кылсярысь, сакыр возён ик басьтозы пластмассалэсь лэсьтэмзэ. Маин со герӟаськемын: яке начаргес уло, яке ми ужъёсмы сярысь ӧжытгес вераськом?

— Тӥ куиськиды но, пужъятскиды но, нош малы одно туез бырйиды?

— Ачим но ужан вискам малпаськонэ усьылӥсько: малы? Кыӵе ке адӟытон дыръя одӥгез кибашлы шуиз: туй ачиз быръе мастерез. Мон шумпотӥ: иське, монэ со бырйиз, пичиен-пичиен бордаз думиз!

Зэмзэ но, куд-ог тодмоосы, ужаме шоры учкыса, малпало, лэся: капчи. Но кутско но, уг пӧрмыто — ачид ик выр, пе, со туеныд. Туй — туж вог, соин огкыл шедьтыны секыт. Вашкалаосмы, пӧртэм арбериос лэсьтэм сяна, туез юртъер пуктонэ но кутылӥзы: укно янакъёс, коръёс улэ тырылӥзы. Туй, угось, кылльыса-кылльыса пурысялэс гинэ луэ. Но уг сисьмы.

Александр Шутихин кибашлы ик — туйлэсь туж чебересь пыжъёс но лэсьтылэ. Мастер-классъёсаз пыриськылӥ ни, пыжаз но ворттылӥ — туж яраз. Табере малпаськонэ усемын: вань Кам шурмы, кызьпуос будо — шат ӧз лэсьтылэ вашкалаосмы туйлэсь пыжъёс? Кытысь ке тодоно сое.

Эшшо берло дыре ужамы кутыны ӧдъямы пужым выжыосты. Кезын вал соин ужась мастер, но пенсие кошкон дырыз вуиз. Ми шуэрским: неужто та амал вуныны кутскоз. Озьы солэсь ужзэ азинтыны ӧдъям. Монэ куд-огез серекъя но: Коренева, ӵапак тыныд со выжыосты бичано! Луоё интыын будӥсь пужымъёслэсь выжызэс кыскыны туж ик секыт ӧвӧл. Отделэнымы люкам ни ми сое, ужамы но кутӥськом: кудыос чебер пӧрмо, мон соин лянэсъёсме чеберъясько но мукет.

— Светлана Васильевна, семьяды кызьы учке ужды шоры?

— Пие ӵемысь бордам ӟыгырске но шуэ: ой, тон мынам туйлэсь анае! Туж мусо кылӥське. Арсениймы туэ 1-тӥ классэ дасяське ни.

Кузпалы ужме нырысь уг вала вал. Городын будэмын со. Пичи Итчаын песятаез улэ вал — со доры куное ветлылӥз. Нырысьсэ адӟеме бере ик пайми: тӧдьы-тӧдьы ангел кадь потӥз. Чылк-чылк дӥсяськемын, милям гуртысь пиосын уд ӵошаты. Маи понна монэ со синйылтӥз? Ноку юаме ӧвӧл.

Зэмзэ верано ке, Алексей ӵош улон сярысь оло малпаське, оло уг на вал, но анаез ӝот-ӝот шуиз: Света, тыныд ми доры улыны выжоно ни. Со кабен мон городэ вуи.

Кузпалылэн анаеныз мыным туж удалтӥз. Со ик монэ пӧраськыны но, чылкытлы но дышетӥз. Гуртын ведь талы дыр уггес тырмы: пудо сюдоно, убо уроно… Кузпалылэн анаез ик валэктӥз: Света, кузпалыд азьын тон котьку чебер луыны кулэ, нуназе-а, ӝыт-а, уйин-а. Озьы мон буяськытэк ураме но потыны дышемын ӧвӧл, дорын бен косметикатэк ветлылӥсько ик.

Нош уже пумысен ке, кузпалылэн анаез нырысь ик шуиз: Света, тыныд, оло, заводэ ке но ужаны интыяськоно? Пичи уждунэн пукемме адӟыса, вылды. Собере Алексей но вераз: оло, зэмзэ но, заводэ мынод? Анаймы али пенсиын ни, но соку со заводын снабженец луыса ужа вал. Кузпалы но заводын ик — отделэн кивалтэ, менеджер лыдъяське.

Туйлэсь арбериос лэсьтонъя мастер-классъёс вӧл-вӧл интыын ортчытъясал. Али но соосты радъялляськом, но ужан интымы ӟоскытгес. Эшшо бордам мед луысал гожъяськись адями: мон лянэс яке мукет чебер арбери лэсьтысал, нош со ваньзэ сое бумага вылэ лад-лад мед гожтысал. Будӥсь нылпиосмылы со туж кулэ но тунсыко материал луысал. Жаляса верано, ачим гожъяськыны уг яратӥськы.

— Творчествоен вырон — аспӧртэм маке: туннэ мылкыд вань, ӵуказе кытчы ке ыше-пегӟе…

— Мылкыды выльысь ӝутӥське семьяеным ӵош гуртэ бертылӥськом, нюлэс-кытӥ ветлӥськом, великен ворттылӥськом ке. Мынам ваньмон дыръёсы уг луыло, но шутэтскон нунал аслым лэсьтылӥсько. Собере выльысь выль кужымен кутскисько туй борды. Со бордысь, шунды бордысь кадь, шуныт лыктэ…

Источник:

Коренева С. В. Туй бордысь шуныт лыктэ... / С. В. Коренева ; записала Э. Кумачева // Удмурт дунне. - 2017. - 27 июля. - С. 6, 11. - (Тӧр шорын).

За предоставление материала выражаем огромную благодарность редакции газеты "Удмурт дунне"