Катков Александр

Материал из Воршуда
Версия от 14:41, 6 февраля 2015; Admin (обсуждение | вклад) (1 версия импортирована)
(разн.) ← Предыдущая | Текущая версия (разн.) | Следующая → (разн.)
Перейти к навигацииПерейти к поиску

Кык пӧртэм кыктоос[править]

Т. Ишматова, А. Катков

Татчыозь такем пинал кизилиосын ӧм на тодматылэ. Таяз радэ – оскалтом. Укыр синмаськымон уго егит семьялэн – Татьяна Ишматовалэн но Александр Катковлэн - асьсэды возьматэмзы, басьтэм вормонъёссы. Татьяна – Удмурт кун университетысь кунсьӧр кылъёсъя факультетэз йылпумъяса, егитъёслэн «Шунды» дэменлыксылэн тӧроез луэ, со сяна, Кун Думалэн депутатэзлэн Светлана Смирновалэн юрттӥсез луыса тырше. Саша – «Высокое напряжение» группаын кырӟа-вера. Ижысь техникумез йылпумъяса, со культурая училищеын дышетскиз. Сое быдтыса, Удмурт университетысь социальной коммуникациосъя факультетысь студент луиз.

Пусъёно: «Шунды» дэменлыклэн ужаз кузпалъёс кыкназы но мылысь-кыдысь пырисько, ӵошен ик концертъёс радъяло, кырӟан, кылбур, гур гожто, Надюша нылзэс будэто.

- Нырысь ик тодэм потэ вылэм, кызьы но ма пумысен тӥ шедиды «Шунды» огазеяськонэ?

Саша:

- Мон «Спутник» клубысь вокалъя студиын ужасько вал. Ӵапак лэсьтӥськисьёслэн нуналазы - 8-тӥ августэ – кырӟаны тупай. Тӥни соку ик Александр Козырев монэ синйылтэм. Концерт бере лыктӥз но ас дораз ужаны-кырӟаны ӧтиз. Мон соку уг но тодӥськы, уг но малпаськиськы вал удмурт кыл сярысь. Озьы ке но егитъёслэн нырысетӥ «Егит тулкым» дискотекаязы удмурт кырӟанъёсын сцена вылэ потӥ.

Татысен нырысьсэ Татьяна Ишматоваез пумитай, соку ик верантэм зол синмаськи солы. Татьянаез адӟон но тодматскон малпанэн кык ар пала улӥ. Котькуд нунал сямен университет дорысь дугдылонни котыртӥ гожеръялляй, но пумитаны ӧз кылдылы. Собере ини куке-соку тодматскимы. Огпол Таня мыным шуиз: лыкты «Шундые», вераськом, поръялом. Со дырозь удмурт егитъёслэн таӵе огазеяськонзы вань шуыса чик ӧй тодылы. Ӵем но ӵем дораз вуылыса, вераськемзэс кылзыса гинэ валаны кутски, маин соос выро, кыӵе ужпумъёсты сэртто-пертчо. Тунсыко потӥз. Собере шуд усиз «Шундыкарын» шутэтскыны.

Таня:

- Школаын дышетскыкум ай, мон эктонъя кружоке туж мыло-кыдо ветлылӥ. «Шундыкаре» но одӥг малпанэн вуи – эктон быгатонлыкме муромытоно. Но отын та удысъя отрядъёссы ӧй вал, гожтӥськи эстрадая люкетаз. Озьы тодматски Надежда Уткинаен, асме кырӟан удысын эскери. Кельшиз, озьы котькуд ар сямен «Шундыкаре» ветлылӥ. Университетэ пырыса но, та огазеяськонлэсь ӧй палэнскы. Бӧрысь правлениязы но кутӥзы.

- Тонэ нырысь нималлязы «Шунды»-ныл шуыса, нош туннэ тон - «Шунды»-мумы. Ныл но мумы луон вискын малпанъёсыд, улон но калыкмы шоры учконъёсыд воштӥськизы-а?

- Ваньмыз воштӥськиз. Книгаез но котькӧня пол лыдӟы – котьку со шоры пӧртэм синмын учкод. «Шундые» мон нырысьсэ дышетскись сямен сюри, собере вожатой луи, аръёс ортчемъя визьмы йылӥз – дышетӥсьын асме эскери. Нош туннэ мон огазеяськонлэн кивалтӥсез. Котькудӥз та улон люкетэ мыным маке но выльзэ, тунсыкозэ сётӥз. Соин тау карисько «Шундылы»: мон отын «кылдӥ», мон отын асме шедьтӥ. Табере шӧдӥсько ини: ачим но пиналъёсты дышетыны, визьманы быгатӥсько.

- Нош огазеяськонэн кивалтыса, кырӟан удысэд палэнэ уг кыльы-а?

- Мон ньылетӥ арзэ кивалтӥсько ини но валасько: али уже сюлэмыя. Мон ведь кивалтонэн гинэ уг выриськы, озьы ик ужасько проектъёсы, кырӟанъёсы бордын. Ас пушкам мон уг пашмиськы, нуналысь нуналэ выльзэ утчасько, ас бордам ужасько.

Собере куддыр озьы луэ: кырӟаськод, ваньзэ сётӥськод кадь учкисьлэсь сюлэмзэ вырӟытон понна. Но концерт бере малы ке секыт мылкыд кылдэ. Оло, учкись пӧсь мылкыд пальккыны жаля, урод кужымъёс-а вормо... Куддыр мултэссэ сцена вылэ потэм но уг пот.

- Нош ку тӥляд крезьгур дуннеез яратонды пуромиз?

Саша:

- Мынам анае, 4-тӥ ремесленной училищеын дышетскыкуз, «Спутник» клубе ветлылэм. Солэсь адӟем карыса, мон но пичи дырысеным крезьгуръя школае, драмая но эктонъя кружокъёсы ветлӥ. Кыӵе гинэ ужрадъёс уг луыло вал, котькудаз сямен пыриськыны яке кыӵе ке юрттэт курыса вазиськылӥзы. Соин но, оло, дышетскон интыям гинэ ӧвӧл, Ленин ёросам но тросэз тодмаллязы.

- Мон тодэмъя, тон Ижевскысь промышленно-экономической колледжын но дышетскид. Ма пумысен-о отчы шедид?

- Отын мон туж капчиен дышетски, но электриклэн удысэз сюлэмыя ӧй вал. Улонам мон кырӟась адями, крезьгур верантэм сиосын монэ ялан бордаз кыске. Ярам, ньыль арзэ мырдэм но кызьы чидай. Собере культурая училищее вамыштӥ. Отын ик быгатонлыкме волятӥ: табере баянэн, домраен, арганэн, фортепьяноен шудыны пӧрымтӥсько.

Таня:

- Мынам туж зол кырӟа вылэм бабуше. Егит дыръяз хоре но ветлылэм. Серекъяса вера, солист карыкузы, сцена вылысен вань кылъёсме, пе, вунэтӥсько. Дедушелэн сузэрез но ассэ возьматыны, котыр адямиосты серкъятыны быгатӥсь вылэм. Ма, анай-атаелэн но эктыны-кырӟаны бадӟым мылкыдзы вань. Паймисько: анае трос-трос гуръёсты тодэ.

- Тӥ кыкнады но калыкен ужаськоды. Кыкнады но адями сюлэмъёсты ас бордады биниськоды. Тӥледыз гажасьёслэн тэбинемзы уг акыльты-а?

Таня:

- Сомында - акыльтымон - фанатъёсы ӧвӧл кадь. Вань одӥгез гинэ – Сашае.

Саша:

- Мыным тунсыко потэ одӥгез гинэ: огпол концертэ бере кыӵе ке нылаш дорам лыктӥз но шуэ, ваелэ, пе, автографтэс. Бумага сётӥз. Адӟиськоды-а, татын тӥляд азьвыл аръёсы гожтӥськемды но вань ай. Паймисько, малы со кулэ?

- Саша, тон удмурт эстрадае капчи, тэтчаны мылкыдэз ӝутӥсь выль шӧм пыртӥд. Сюлэмыдъя-а со тыныд?

- Шуг вераны. Мон ачим шаплы адями бере, ӝог гуръёс эктыны ярало. Со сяна, мон романтик, соин ик лирика, сюлмысь потэм кырӟанъёс кельшогес.

- Нош малы-о одно удмурт кылын кырӟаськод? Аслад-а со мылкыдыд яке А. А. Козыревлэн куронэз-а?

- Аслам но, солэн но сыӵе малпанмы вал. Котькуд удмурт адямилы возьматэммы потӥз: аслэсьтыд кылдэ дышетоно, яратоно но гажано. Монэ куддыр куарето, кырӟакуд, пе, куд-ог куараосты шонертэм вераськод. Но со самой кулэез шат? Ма, али юрттӥсе вӧзам бере, сыӵе янгышъёсы уз луэ ни, малпасько. Мынам анай-атае но куспазы удмурт кылын верасько, но соосты мон шер адӟылӥ: ӵукна – школаын, ӝытсэ тренировкаосын ышылӥ. Гужемзэ гуртын улыса валаны кутскисько гинэ, городэ вуыса соку ик ваньмыз йырысь тӧлӟе.

Зэм, мыным нырысь секыт вал. Малпаськы ай ачид: сётӥзы кылбур, сое ӵуказе ӝыт тон сцена вылын кырӟаны кулэ ни. Таӵе вакчи дыр куспын уд вуттӥськы кылбурлэсь пуштроссэ шӧдыны, уд валаськы на кызьыгес сое быдэстыны. Нырысь-валысь, мон малпамъя, выль «пӧрам» ужез вить пол-куать пол гуртъёсын кырӟалляно. Уг гажаськы артистъёсты, кырӟакузы вистэм-вожтэм валатэк тэтчало ке, кырӟанзылэн мур пуштросо кылъёсызъя со чик но уг тупа.

- Тӥ учкемъя, удмурт эстрадаын вожмаськон (конкуренция) вань-а?

Таня:

- Ӧвӧл.

Саша:

- Малы-о ӧвӧл? Вань.

Таня:

- Зэм, милям Сашаен та пумысен малпанмы чылкак мукет. Ма, та шоры гинэ ӧвӧл, оглом улон шоры учконмы но пӧртэм, кыкнамы но кыктоос ке но.

Мон малпамъя, туала эстрадаез учконо ке, со бусы али воксё эркын. Нокинлы выль шӧмо гуръёс бордын вырыны. Учкелэ ай, кӧня усточиосмы вал - Надежда Уткина, Анатолий Эркишев, Любовь Быкова… Нош туннэ соос кытын? Радио, телевидение пыр вуж кырӟанъёссы чузъясько. Ма, соосыз но, удмурт передачаос кулэсмем бере, эфире уг ни потало. Концертъёсты но учконо ке, калык ветлэ дышем артистъёсыз доры. Быгатӥсь егитъёсты солэн малы ке тодэмез уг пот.

Саша:

- Тыршиськом кадь лэсьтыны аспӧртэмлыкозэ, учкисьёсты ас бордамы биньыны юрттӥсьсэ, но милесьтым малы ке кышкало. Самой тунсыкоез: милемыз уг валало мӧйы артистъёс. Улон воштӥське, кырӟан дунне шоры учкон но мукетгес луэ. Соин егитъёслэн кырӟан амалъёссы но трослы вылесьгес. Озьы ке но тросаз концертъёсын шӧдӥськом: программаязы егитъёсты куто кылем дырзэс ворсан понна гинэ. Куд-огез уг кышка – азямы ик вера: тӥляд, пе, ужды нокинлы кулэ ӧвӧл.

Жаль соиз но: асьмелэн рос-прос, дӥсьтӥсь продюсеръёсмы ӧвӧл. Та уж борды вань сюлмысьтызы басьтӥськысалзы ке йӧно муртъёс, валасалзы: милемлы гинэ ӟеч уг лэсьто, асьсэлы но шыльыртӥсьсэ потто. Вал сыӵе адямиос, но чиньыен лыдъямон гинэ - Андрей Анкудинов но Александр Козырев. Соос но та ужлэсь палэнскемын ни – укыр секыт йӧтэ.

- Аспӧртэмлыко луондэс, асьтэлэсь образдэс кема-а шедьтыны выриды?

- Ми малпамъя, котькуд кырӟанын тынад пӧртэм образэд луыны кулэ. Татын учконо ини пуштросэзъя, соя ик аспӧртэмлыко луон бордын тыршоно.

- Нош тӥляд выросъёстыя кин ке визь сётъя-а?

Таня:

-Уг. Ваньзэ асьмеос лэсьтыны тыршиськом. Оглом удмурт артистъёсты учкиськод ке, соос ваньзы ас быгатэмзыя ужало. Соин куддыр ымнырмес буяны гинэ но ӟеч-ӟеч ум быгатӥське. Дӥсяськонъя мыным али юрттэ эше - Зоя Печёнкина. Лулпуш дуннеелы, кырӟанэлэн образэзлы тупась стиль шедьтэ ке но, аслэсьтым «виштыме» но отчы пыртыны тыршисько. Сцена вылын асме капчиен, эркын тылобурдо выллем мед шӧдом.

- Малпанды ӧй вал-а ӵошен альбом поттыны?

- Ӵошен ужаны ми алигес гинэ кутским ай. Соку ик шӧдӥмы: ӵошен трослы капчигес. Шокан-а, куара-а уг тырмы – ог-огмылы юрттӥськом. Оглом учконо ке, ми ӵошен ик кылбураськом но, крезьгураськом но, кырӟан но пӧрмытӥськом, сое сцена вылын быдэстӥськом.

- Азьланяз мар бордын ужаны малпаськоды?

Таня:

- Кырӟан удысэз ке учконо, мон али тыршисько репертуарме воштыны. Куд-огез кырӟанъёсме уг но валалля, секытгес шуэ. Нош мыным ярало мур пуштросо, малпаськытӥсь гуръёс. Акыльтӥзы ни весь огпорма: мон тонэ яратӥ, тон монэ куштӥд… Али мылкыды ӝутӥськиз шулдыр кырӟанъёс бордын но ужаны. Мон валай, кырӟанлэн кыӵе ке но мистикаез, лушкем кужымез вань шуыса.

Саша:

- Мынам туж быдӟым мылкыды вань удмурт нылпиослы вокалъя студия кылдытыны. Жаляса верано, сое быдэстон понна трос уксё кулэ. Крезьгур тӥрлыкъёс дуно сыло, собере студиялы инты но шедьтыны-утчаны кулэ. Ӟуч нылпиослы сӥзем кружокъёс, студиос тырмыт. Нош удмурт усточиослы мар? Шумпотымон, та пумысен «Шундыкар» пиналъёслэсь быгатонлыкъёссэс азинтыны, муромытыны юрттэ. Пӧртэм интыосы юрттэт курыса вазиськылӥ ни, учком, мар пӧрмоз.

- Таня, тон одӥгаз интервьюын шуид, быдэстэм кырӟанъёсыдлэн пуштроссы улонад зэмало шуыса.

- О-о. Асьмеос ӟеч тодӥськом: малпан но верам кыл зэманы быгатэ. Нош кырӟанлэн сыӵе кужымез эшшо но юнгес шӧдӥське. Уго кыл но куара вӧзы итӥське на гур но. Азьвыл мынам мӧзмытэсьгес кырӟанъёсы вал, нош али шулдырзэ, мылкыдэз лӧпкытӥсьсэ быдэсъям потэ. Улонэ но сыӵе ик шулдыр мед луоз кадь. Шонерзэ верано ке, мон одӥг но уг яратӥськы ӝожтӥськыны. Уксёе вань-а, ӧвӧл-а, тазалыке, улон-вылонэ котькыӵе медло - уг куаретӥськы.

- Верало, нылдылы Надежда ним понӥды, Надежда Уткиналэсь адӟем карыса. Шонер-а со?

- Ваньзы озьы малпало. Огласянь со шонер. Но соин йырин гинэ ӧвӧл. Нырысь ик, Сашалэн бабушез Надя нимо вылэм. Кыкетӥез: мон учкылӥ черк календарьёсты, отын нылы вордӥськон нуналлы ӵапак Вера, Надежда, Любовь нимъёс тупало вылэм. Книгаосысь лыдӟыса тодӥ: Надежда нимлэн туж мур но ӟеч пуштросэз.

- Нош шутэтскон дырдэс маин узырмытӥськоды?

Саша:

- Яратӥськом семьяеным паркетӥ поръяны, нылынымы шудыны. Шуим ини: кырӟан гожъяны. Тани алигес аслым одӥг крезьгуро инструмент басьтӥ ай. Тунсыко пото мыным Совето Союз дыръя гожтэм кырӟанъёс, рок. Соос вылын мон будӥ. Со сяна, пичиысен сиён пӧраны яратӥсько.

Таня:

- Дыры луыку, семьяме одно ческыт пӧрамен шумпоттӥсько. Кельше на мыным пужъятскыны, озьы ик улонысьтым шулдырез, чеберез, паймымонэз сярысь малпаськыны.

Источник:

Катков А. Кык пӧртэм кыктоос / А. Катков, Т. Ишматова ; записала О. Никитина // Удмурт дунне. - 2004. - 17 сент. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"