Шутова Надежда Ивановна

Вукогуртысь Коньы Надя

Н. И. Шутова

Надежда Ивановна Шутова – история наукаосъя доктор, археолог, Удмурт Республикаысь наука удысысь дано ужась. Вордӥськемын Игра ёросысь Мазьги гуртын. Анаез дышетӥсь вал, атаез колхозын бухгалтерын ужаз.

1977-тӥ арын Надежда Ивановна Удмурт кун университетэз йылпумъяз но отын ик археологияя лабораториын ужаны кутскиз. 1979-тӥ арын Удмурт научно-исследовательской институтэ лаборант луыса ужаны лыктэ, собере наукае выже. Нырысь-валысь эскере ар удмуртъёслэсь улэм-вылэмзэс, нош 1985-тӥ арысен вань кужымзэ но быгатонлыксэ сётэ удмурт калыклэн VIII-ХIII, ХVI-ХХ дауръёсы улонысьтыз культуразэ, сямъёссэ-йылолъёссэ, осконъёссэ эскеронлы.

Надежда Ивановналэн та вакытэ сюлэсь трос ужъёсыз, кык монографиез потэмын ини. Со 1990-тӥ, 1995-тӥ, 2000-тӥ аръёсы финн-угор калыкъёслэн калыккуспо конгрессъёсазы пыриськылӥз. Надежда Ивановна али Россиысь наукаосъя академилэн Урал люкетысьтыз историяя, кылъя но литературая Удмурт институтлэн наукая валтӥсь ужасез луэ.

Котьмае тодӥсь но йыртэмась

- Пичи дыр. Надежда Ивановна, адямилэн со тужгес яркыт, шудо вакытэз, дыр?

- Бен. Тодам соку ик лыктэ пичи гинэ Вукогуртэ. Татын мон будӥ, дышетски. Нош Мазьгиын мон вордски гинэ - мамаме дышетыны Вукогуртэ лэзизы. Син азям али ке но гуртмы котырысь ӵуж, лыз, бусӥр сяськаосын возьёс, нюкъёс-вырйылъёс, нюръёс, Нязь шур. Гужем со шурысь ӧм ик поталлялэ кадь. Уяны но олоку, олокызьы дыши, оло, вуэ пырем берам ик уяса кошки. Нязь шур дурын вукомы вал, соин ик вуэз мур луылӥз. Гурт шорамы ик - ӝужыт гурезь. Отын нискыламы.

Мон али гуртъёстӥ трос ветлӥсько, но Вукогуртам кадь чебер интыосты туж шер адӟылӥсько. Инкуазь пудоен, нефтяникъёсын саптамын-быдтэмын. Адямиос чебер инкуазез дунъямысь дугдӥзы. Вукогуртэ но быриз. Пичи дыръям бызьылэм интыос лёгамын-паньсамын, сикез корамын, нюрез куасьтэмын, вуко быдтэмын, шурез лазегомемын. Табере сяськаос но отын уг ни будо.

Гуртамы тросгес ӟучъёс улӥзы. Эшъёсы удмуртъёс но, ӟучъёс но вал бере, мон пичиысен кык кылын вераськыса будӥ. Ӟучъёс но удмуртъёс тэргаськытэк, одӥг семья кадь улӥзы. Соин мон туж ӟеч тодӥсько-валасько ӟучъёсты, соослэсь лулпуш дуннезэс. Али ке но ӟеч, матысь эшъёсы -ӟучъёсгес.

Ми вить пиналъёс будӥмы. Атаелэн дышетскемез 4 класс гинэ ке но вал, туж визьмо бухгалтерен лыдъяськиз. Вылӥ образованиен бухгалтеръёс но солы юрттэт курыса вазиськылӥзы. Атаелэн мон яратоно нылыз вал. Со монэ пичиысен ик лыдӟиськыны, гожъяськыны дышетӥз. Вить арескысен мон ӟеч лыдӟиськи ни. Мамамы милям туж чебер вал, кырӟаны-эктыны усто, гитараен, домраен, скрипкаен, арганэн шудӥз, кык ужын ужаз, школаын трос час нуиз. Милемын вырыны дырыз ӧз кыльылы. Мамае улэп на, солы 83 арес ни.

Мон туж етӥз будӥ. Нэнӥмы (песянай) йыртэмамелэсь жаде вал но мамаме монэ сьӧраз школае басьтыны косылӥз. Отын но дышетскисьёс пӧлын тэк ӧй пукылы. Вить арескысен лыдӟиськыны кутски бере, дышетскись нылпиослы юрттыны-вераны вырисько, бергасько вал. Озьы мон сизьым арескозь нырысетӥ класслэсь дышетскон программазэ тодӥ ни. Берло дышетскыны мӧзмыт луиз. Начальной классысен ик школа библиотекаысь вань книгаосты лыдӟыса быдтӥ. Валаса-а, валатэк-а лыдӟыса потӥ Л. Толстойлэсь «Война и мир» романзэ, А. Пушкинлэсь «Евгений Онегинзэ». Яратон сярысь интыоссэ туж яратылӥ.

Паймымонэз - музъемын

- Тодосчи луон сярысь малпанъёсты со вакытэ вал ини-а?

- Йырам но ӧй вал. Журналист луэме потӥз. Кылбуръёс но гожъяны выри. Ӟуч кылъя дышетӥсьмы туж чебер, йӧно, литератураез ӟеч тодӥсь-яратӥсь кышномурт вал. Дорамы Калинин областьысь ыстӥллям. Соин ми эшъяським.

Монэ пичиысен котыраз кыскиз кыӵе ке валантэмез, вылез, паймымонэз. Соосты пумозяз эскереме, валаме потылӥз. Мон таӵе веранлы оскисько: кылдэмлэсь уд ортчы. Малы ке но мон, кин ке косэмъя сямен, пуш куара косэмъя-а шуод, Удмурт кун университетысь исторической факультетэз бырйи. Кытысь ке но мыным, гуртын будэм муртлы, археология кыл шедиз. Археология факультетэз утчай вал но тодӥ: сое историческойын, пе, дышето. Институтэ пыри но, со арын ик нырысьсэ археологияя кружок усьтӥськиз, Голдина Римма Дмитриевна нуиз.

- Малы нош одно ик археологиез бырйиды? Со ведь туж секыт удыс: одӥг кыӵе ке тунсыко вашкала арбериез шедьтон понна кӧня музъемез гудоно, ӝуткано, нуллоно.

- Верай ини: археология кыл мыным малпамтэ шорысь кыӵе ке книгаысь шедиз. Солэсь пуштроссэ соку мур валаса ӧй вутты на вал ке но, со монэ бордаз кыскиз. Нош экспедициосы потаса, та удыс мыным яраз. Выль интыосы вуылӥськод, паймымон, тунсыко калыкен пумиськылӥськод. Кыӵе ке пичи шедьтэм арбери бордысь адӟыны-валаны луэ калыклэсь вашкала улонзэ, малпанзэ. Гуртын ужаса будэм муртлы музъемын гудӥськыны секыт уг йӧты.

- Тӥ эскериды ар удмуртъёслэсь улэм-вылэмзэс. Арча музъем сяськаяськон вакытэ удмуртъёс син азяды кыӵеен пуксё?

- Соос туж зол, кужмо, азинлыко, пайдаё улӥллям. Булгар кунэн зол герӟаськемын вылӥллям: ог-огенызы вуз кариллям, эшъяськиллям, ожмаськиллям но. Булгар кунын трос выжы пичи калыкъёс улӥллям но ог-огенызы сураськиллям, культураязы уно вылез пырем.

Инкуазь - кӧкымы

- Нош малы тӥ басьтӥськиды вашкала удмурт вӧсьёсты эскерон борды?

- Вукогурт дорамы ик вал Лек ошмес шуон инты. Отын вашкалаослэн вӧсьсы вылэм. Мон отысь адӟи на Корт шуккон кызэз, бордаз трос кортъёс шуккемын вал. Мыным со тунсыко потӥз. Собере гуртамы котьмалэн аслаз интыез вал: гур шуккыны горд сюй поттон, пудо возьман, паска дыръя шудонъёс, турнан, узы-боры-губи бичан, пудо возьман, шулдыръяськон, мисьтаськон но мукет. Соос ог-огзылэсь кулэлыксыя висъясько. Ваньмыз со, ачим но валатэк, мынам весяк син азям, йырвизьмам улэм. Дыр вуиз но, со сярысь гожтэме потӥз: малы со кыз отын сылэ, малы со интыос озьы висъясько? Пересьёслэсь юалляськыны кутски. Соослэсь вашкала вӧсяськонъёс сярысь тодӥ но отчы мургес но мургес пыреме потӥз. Мукет выжы калыкъёслэн вӧсьёссы сярысь но тодэме потӥз на.

- Тӥ удмуртъёслэн вӧсяськон интыосазы трос вуылӥды: арамаосы, вырйылъёсы, гурезьёсы, кыръёсы. Соос сярысь «Дохристианские культовые памятники в удмуртской религиозной традиции» бадӟым книга поттӥды. Вӧсяськон интыослэн кыӵе ке кужымзы, кыскисьсы али шӧдӥське на-а?

- Со вӧсь интыослэн котькудӥзлэн аслаз кужымез вал, дыр. Отчы ведь трос оскись калык люкаськылӥз. Со интыос висъясько аспӧртэмлыкенызы. Кылсярысь, отын бадӟым, зӧк, паськыт ваё, гырко яке кык йыро писпу будэ. Яке со ӝужыт гурезь йылын – котырак дунне кыдёке адӟиське. Ошмесъёсыз зол пӧзьыса пото. Сыӵе интыос калыкез адскисьтэм кужыменызы бордазы кыскылӥзы. Со интыосын али но мылкыд ӝутӥське, инкуазьлэн чеберезлы, йӧнлыкезлы паймиськод. Но куд-ог интыосын, тужгес но воргорон вӧсьёсын (Луд, Булда кадьёсын), кӧшкемыт но кадь потэ.

- Иж городамы нош кытынгес вал меда удмурт вӧсьёс?

- Калык верамъя, Карлуд шур дурын. Али кытынзэ вераны шуг ни. Иж интыын трос гуртъёс сылӥзы бере, вӧсяськон интыос но одӥг гинэ ӧй вал, дыр. Азьвыл ведь котькуд гуртлэн даслэсь ятыр вӧсь интыоссыз вылэм.

- Инкуазьлэсь, вашкала вӧсьёслэсь палэнскеммы бордысь но уг поты медам туала курадӟонъёсмы?

- Адями инкуазен зол герӟаськемын. Вашкала калык сое туж валаз, инкуазез дунъяз. Нош туала калык тазьы дышемын: адями – инкуазьлэсь бадӟым, со – инкуазьлэн эксэез. Отысь ик пото, дыр, куд-ог курадӟонъёсмы но. Али валаны кутскиськом кадь ини: инкуазь – со адямилэн кӧкыез, отысь потӥмы, отчы ик берытском.

- Христиан оскон асьме пала ӧй вуысал ке, удмуртлэн лулпушкыз узыргес-а, куанергес-а кыльысал кадь?

- Христианство – оскон тубатлэн вылӥ лёгетэз. Малы ке шуоно ислам, буддизм, христианство – дунне осконъёс. Тросэз калыкъёс та осконъёс доры вуизы. Конечно, языческой религиысь инкуазез дунъян, гажан мылкыд сям ышиз. Но со понна христианство пыр удмуртъёс мукет калыкъёсын герӟаськизы, соослэсь культуразэс, сям-йылолъёссэс тодӥзы но дунне цивилизацие пыриськизы. Нокыӵе калык но мукетъёсызтэк улыны уз быгаты. Мукет калыкъёсын эшъяськыса, ӵошатскыса гинэ - ожмаськыса но - улон азьпала мынэ. Кин ке ляб, кин ке кужмо. Солэсь нокытчы уд пегӟы. Нокин но уг тоды, кыӵе оскон вормоз азьланяз. Адями али инкуазь сярысь малпаськыны кутске бере ни, оло, язычестволэсь инъетъёссэ басьтыса, выль оскон кылдытоз.

Тэляськом ай

- Тӥ калыккуспо конгрессъёсы ветлӥды. Дуннеысь мукет культураос пӧлын асьмеос, удмуртъёс, кыӵеен адӟиськиськом?

- Финляндие, Эстоние, Венгрие, Великобритание ветлӥ. Отысь трос тунсыко адямиосын тодматски, эшъёс шедьтӥ. Котькытын вань лякыт, ӟеч адямиос. Мукет калыкъёс пӧлын сямен ик, удмуртъёс пӧлын но вань тужгес визьмоосыз, быгатӥсьёсыз. Но ӵемысь асьмемыз возьматыны ум быгатӥське коньдон тырмымтэен. Мукет калыкъёс пӧлы потаса дӥсьтӥсьгес луиськод, дунне шоры учкон паськытагес, аслэсьтыд быгатонлыктэ умойгес валаны кутскиськод. Малы ке но асьмеос ог-огмес дунъяны, ог-огмылы ӟеч кыл вераны умгес тыршиське кадь потэ.

- Асьме вашкалаосмы Камбоджаысь кхмеръёслэн, Америкаысь инкъёслэн кадесь син шоры йӧтымон памятникъёс, чебер, йӧно, бадӟым из юртъёс пуктыса кельтӥллямтэ. Малы меда?

- Мон но та сярысь малпаськылӥсько. Мугез со вал, дыр: вашкалаосмы огазеяськыса ӧз вуттэ, бадӟым государство кылдыса ӧз ву. Соин но, дыр, удмурт вӧсьёс висъясько осконзылэн мур пуштросэнызы, нош вӧсяськон интыоссы огшоры - син шоры йӧтӥсьтэм: пичигес куала, кенерен котыртэм арама, писпу но мукет. Вӧсяськылӥзы но соос семьяен-семьяен, гуртэн-гуртэн гинэ люкаськылыса. Пичи инмаръёссы но удмуртъёслэн лекесь, кышкытэсь ӧвӧл, адями вӧзынгес уло: нюлэскын, шурын, ошмесын, гидын… Одӥгез, тужгес бадӟымез гинэ кыдёкын – инмын. Со отысь уг васька, ваньзэ чакласа-эскерыса гинэ улэ. Кыӵе солэн тусыз но тодмо ӧвӧл. Бадӟым храмъёс, дворецъёс ведь тросэз пуктылэмын, кыӵе ке но нимысьтыз Инмарез сӥлы карыса, данъяса. Нош удмуртъёслэн храмзы – инкуазь.

- Одӥг калыклэн но дунне вылын улонэз пумтэм ӧвӧл. Сыӵе бадӟым цивилизациос но чиптэм-чаптэм бырылэмын. Тӥ чакламъя, удмурт калыклэн тужгес сяськаяськон вакытэз кугес-о вал?

- VIII- XIII дауръёсы, дыр. Соку калыкмы ас понназ, нокин зӥбытэк, узыр улӥз. Собере монголо-татаръёс вуизы, улонзэс суразы-пожазы. ХIV-тӥ даурысен инкуазь но воштӥськем - кезьытгес луэм, ӟучъёс, бигеръёс музъем понна ожмаськыны кутскиллям. Со нюръяськонэ вашкала финн-угор калыкъёс но пыриськиллям, трос быриллям. Улон бугыръяськемен, удмурт калык аслэсьтыз кунзэ кылдытыса ӧз вутты.

- Али асьмеос, удмуртъёс, дунне тубат кузя ӝутскиськомы-а, васькиськомы-а?

- Историез учкиськод-чакласькод ке, пӧртэм малпанъёс кылдо. Одӥг кадь вольыт улыны нокызьы но уз пӧрмы. Нимысьтыз адямилэн сямен ик, улоназ сьӧдэз но, тӧдьыез но гожез луылэ. Огласянь, наукаын, культураын, искусствоын выллань тубиськом кадь. Мукет ласянь, социально-экономической югдурын трос шуг-секытъёс кылдэмын. Асьмеос, мыным потэ, эгыр сямен тэляськом-тэляськом, но ум кысӥське. Асьмеос трос али, ум быре. Со понна асьмемыз ӟечгес возьматыны, утьыны сюлмаськоно.

Коньы пась но эшъяськон

- Семьяды кызьы учке музъемын гудӥськемды шоры?

- Кузпалы школаын ужа, дышетӥсь. Солы азьвыл ӧз яралля гуртысь ӵемысь кошкылэме. Али дышиз ини, дунъяны но вала, кулэ дыръяз юрттэ но. Пие пичи дырысеныз шуылӥз: «Мед мама мыноз экспедицие».

- Нылпиосты но археологлэн ужезлы уг синмасько-а?

- Пие одӥг. Со ужме дунъя, соин тунсыкъяське. Пичи дырысеныз сьӧрам экспедициосы ветлэ. Пие Удмурт кун университетысь история факультетэз быдтӥз, но солы историысьтымы тунсыко потӥз, яраз Быдӟым тылож вакыт. Со сярысь трос тодэ, диплом уж но гожтӥз. Но ассэ пумозяз ӧз шедьты на.

- Асьтэос кыӵе воршуд выжыысь?

- Мамае вортча воршудысь, буби – пурга.

- Малы, кинлы оскиськоды?

- Инмарлы. Инмар мон понна – одӥг. Котькуд калыклэсь осконзэ гажасько.

- Амалды ке луысал, квартираяды кыӵе пудо-животэз яке пӧйшурез возьысалды?

- Коньыез туж яратӥсько. Пие монэ яратыса коньы шуэ, мон солы выросъёсыным, сямыным, тусыным коньы кадь, пе, потӥсько. Но коньыез квартираын возьыны жаль потэ. Курадӟоз ук со.

- Мае тужгес сӥлы кариськоды?

- Зэмос яратонэз, эшъяськонэз, семьяын но, коллективын но, кунын но, быдэс дуннеын ог-огеныд тупаса улонэз. Дунне вылысь котькуд адями аслыз ярамон инты мед шедьтысал. Али но яратӥсько маке выльзэ тодыны, адӟымтэзэ адӟыны, чеберез, умоез, зэмосэз шедьтыны.

- Дунне вылысь кыӵе калыклы тужгес но синмаськиськоды?

- Котькуд калыклэн маке но аспӧртэмлыко чеберез, кыскисез, кужымез вань. Соин мынам котькуд калык сярысь трос тодэме потэ. Вакыт кылдэ ке, соосын эшъяськыны, лулпуш дуннезэ валаны-тодыны турттӥсько.

Ӝыны даур – трос малпанъёс

- Туннэ тӥляд юбилейды – 50 арес. Тодосчи понна со туж ӧжыт на. Азьпалан быдэстоно ужъёсты пумтэм на, дыр?

- Трос. Но вань малпанъёсме усьтыны уг яратӥськы. Али асьме кунын улӥсь котькуд калыклэсь вӧсяськон интыоссэс, сям-йылолъёссэс эскерисько. Феврале потыны кулэ трос тодосчиосын ӵош гожтэм выль книгамы – «Культовые памятники Камско-Вятского региона: материалы и исследования». Отын - финн-угор, булгар, славян калыкъёслэн вӧсяськонъёссы, вӧсь интыоссы сярысь малпаськонъёс.

- Надежда Ивановна, вань малпанъёсты мед быдэсмозы. Ортчем улон-вылонмес макем тросгес тодомы, сокем асьмеос узыргес, визьмогес, сабыргес луыны тыршомы шуыса малпасько.

Источник:

Шутова Н. И. Вукогуртысь Коньы Надя / Н. И. Шутова ; записала Галина Романова // Удмурт дунне. - 2005. - 28 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"