Ярбам шудонъёс

Сцена вылын шудон-шулдыръяськон

Пичи пияш сцена вылэ потэ но туж зол шултэ:

«Порпалъёс, чалелэ! Ваннапалъёс, чалелэ!»

Пиналъёс сцена вылэ пото но люкрак султо. Со пияш ик шуэ:

– Ойдолэ «сукыр такаен» шудом?

Ваньзы: «Ойдолэ!».

Пияш вераны кутске:

– Одӥг адями Киясэ мынэ вылэм, солэн уробо питранэз сӧриськем. Кӧня кортӵог кулэ луоз солы? Кӧня? Кин доры дугдэ, со лыдпус вера: Куинь. Одӥг, кык, куинь. Петя потӥз. Кинэ басьтӥськод?

Петя: «Мон басьтӥсько Ленаез». Верась мурт круг сьӧры султэ, Петя азьланьтэ шудонэз:

– Реньӟи, бренӟи, потыс, танчи, тара, уры, пиньыс, виньыс, лӧ. Вова потӥз. Кинэ басьтӥськод?

– Мон басьтӥсько Ритаез.

– Банка пыдэсын чорыг уя, кин сое кутӥз, со потӥз. Люба потӥз. Кинэ басьтӥськод?

– Мон басьтӥсько Мишаез.

Миша пал кизэ выллань ӝутэ. Кылем пиналъёс чиньызэс Мишалэн ки улаз пукто. Миша азьланьтэ:

– Мама, папа, шап!

Кинлэн чиньыез пачка, со ик «сукыр така» луэ. Солэсь синзэ кышетэн яке лентаен керттыло, пиналъёс круге султыса кырӟало:

'Кырӟаса лэзём али но,

Вераса лэзём али.

Ортчем пинал дауре ӧвӧл,

Шудом, серектом али.

«Сукыр така» кинэ ке но кутэ но, сцена шоры султыса, сое тодманы тырше. Со понна кесяське:

– Кукареку-кукареку! Кутэм мурт озьы ик кесяськыны кулэ. «Ав-ав-ав!»

– Та луоз Геня.

Ваньзы: «Шонер!»

Табере Генялэсь синзэ керттыло. Пиналъёс кырӟало:

Тӧдьы носки, сьӧд колоша

Кинлэн пыдаз уз кельшы.

Милям таӵе мылкыдъёсмы

Кинлэн сюлмаз уз кельшы.

Нош ик кин ке но сюре.

– Му-му-му!

Сюрем мурт но озьы ик вера. «Гагак-гагак-га-гак!». Та луоз Андрей.

Ваньзы: «Шонер!»

Сценалэн мукет палтӥз кияз пулэн но шелепъёсын пияш потэ но шуэ:

– Ойдолэ «шелеп пазьгыса» шудом!

Ваньзы: «Ойдолэ!»

– Мон пазьгисько, кутыны дасяське. Собере шелепъёсты пул вылэ тыре но мукет палтӥз пыдыныз лёге. Шелепъёс вылэ пазьгисько. Пиналъёс соосты басьтыны кулэ. Кинлы ӧз тырмы шелеп, солы кыӵе ке но уж сёто.

– Аня кылиз, мадиськон мед вералоз!

Аня ӧжытак малпаське но вера:

– Бадӟым гондыр нянь куша, луд вылмы пумен буша. Мар со?

Ваньзы: «Комбайн».

– Табере мон пазьгисько. Кутыны дасяське.

Пиналъёс кутыны тыршо.

– Ваня кылиз, мед кырӟалоз!

Ваня кырӟа:

Туж пичи на мон,

Ӝог будӥсько мон.

Анайлэсь но атайлэсь но

Бадӟым луо мон.

Туж пичи на мон.

Визьмо луо мон.

Анай кадь ик, атай кадь ик,

Ужась луо мон.

Туж пичи на мон.

Батыр луо мон.

Котьмар ужез эшъёсыным

Чик уг кышка мон.

Ваня бичам шелепъёсты пул вылэ понэ но шуэ:

– Табере мон пазьгисько. Кутэлэ!

– Люда кылиз, мед эктоз!

Арганчи эктон гур шудэ, пиналъёс кырӟало:

Ой, апае, апае,

Маин чебер апае?

Йыраз керттэм сатин кышет,

Соин чебер апае.

Люда эктыны поттэ Гришаез. Пиналъёс кырӟало:

Ой, агае, агае,

Маин чебер агае?

Йырсиоссэ выллань сынам,

Соин чебер агае.

Та кырӟам бере нылъёс но пиос нимаз султо но тазьы кырӟало:

Чыры-пыры пиналъёс,

Сяртчы курыса бӧрдӥсьёс.

Куака кеньыр бичасьёс,

Капка сьӧры лэзьясьёс.

Нылъёс кырӟаса пиос пала лыкто но нош ик интыязы султо, тазьы кырӟало:

Петыр котыр бакча котыр

Сӥньыс чырты мушко йыр.

Петя ретя таракан,

Мунё куко сарафан.

Пиос:

Лена пена парафина

Сисьмем картошка сиись.

Надя падя пыд падя

Ву вылын шунды берга.

Нылъёс:

Ондӥ гондӥ гон вузась

Куала йылын шыр бичась.

Онтон котон нянь котон

Гуре понон, кисьматон.

Пиос:

Таня баня растабаня

Табаньдэ мыным но вай.

Нуны пуйы кут али

Монэ бызьса кут али.

Нылъёс:

Коляган моляган

Писэй куды кунян ӝуш

Коли моли тыкмоли

Капка азяд пот али.

Пиос:

Нуны пуйы вень бурсы

Чугинзэ урдсаз пуктэм.

Лымзэ сием, напсэ кисьтэм

Чугинзэ йыраз понэм.

Нылъёс:

Серга берга бер кунян,

Вуэ усем шаньга нянь.

Сисьмем пуклё, сисьмем йыр

Сумбыр-самбыр быжтэм шыр.

Ваньзы ӵош:

Чеке,чеке, пиналъёс,

Шаньга вылэз сиисьёс

Чыры-пыры пиналъёс

Сяртчы гуэ куянъёс.

Вань пиналъёс круге кутско. Огез ныл круглы пумит мынэ но пиналъёсты бича. Ваньзы кырӟало:

Тӧдьы льӧмпу сяськаосыз

Весь бур киям возьысал.

Тӥ яратон, ой, эшъёсме

Весь син азям возьысал.

Ой, уг поты, ой, уг поты,

Шурысь вуэз юэме.

Ой, уг поты, ой, уг поты,

Тӥледын люкиськеме.

Возь вылэ ке тӥ вуиды,

Сяськатэк эн бертэлэ.

Ми пала ке тӥ вуиды,

Пыратэк эн кошкелэ.

Круг шоры огназ ныл кыле. Со шуэ:

– Эшъёс, ойдолэ «сэреген» шудоме!» Ваньзы: «Ойдолэ!»

Арганчи эктон гур шудэ. Пиналъёс параен карисько, эктыны кутско. Арганчи шудэмысь дугдэ ке, кыӵе ке но пара круг шоры кыле, соосты «небыльток» шуо.

Одӥгез пияш шораз потэ но шуэ:

– Ойдолэ «ӟазеген» шудом!

Ваньзы: «Ойдолэ!»

Одӥгез ӟазег луэ, нош ваньмыз – тютюпиос. Ӟазег «га-га» шуэ, нош тютюпиос «тю-тю». Кык кузя пиос капка луо. Капкатӥ потыкузы капка ворсаське но тютюпиослэсь юало:

– Атас-а? Курег-а?

Атасъёс огпала султо, нош тютюпиос мукет пала. Ӟазег огназ кылем бере ваньзы ю ало:

– Атас-а? Курег-а?

Одӥгез пияш шораз потэ но шуэ:

– Нош али кыстаськом. Тани гож лэзисько.

Ваньзы огзы бӧрсьы султо но кыстаськыны кутско. Солэсь азьло чотасько:

– Одӥг, кык, куинь!

Ваньзы ас палазы кыско. Кин ворме, соос кесько:

– Ура-а-а!

Пиналъёс люкисько порпалъёслы но ваннапалъёслы. Кырӟамъя бинисько туге.

Визыл-визыл шур дурын,

Шур дурысь арамаын.

Вож бадьёс но лулпуос

Тугъёсын герӟаськемын.

Биниське туг, пунӥське,

Гырлыосын сузьйиське.

Ой, мар луэ та сюлмы,

Кытчы меда куриське.

Арама, ой, арама,

Ӧй-а меда йыромы?

Бергаса будӥсь вож туг

Берыктэ оло йырме.

Куинетӥ куплетсэ кырӟаку, сцена вылысь кошкыны кутско. Выльысь пото но тау каро .