Салья выжыослэн пытьыостӥзы

Сюресъёс, сюресъёс. Соос пумтэм нюжаосын азьлань но азьлань кыстӥсько. Туннэ мынам син азям пуксе 1984-тӥ ар, инвожо (июнь) толэзь. Тодам вайисько, кызьы ми пиналъёсын ӝутскем мылкыдын потӥмы кыдёкысь Киров улосысь Кильмезь ёросысь Салья гуртэ. Татын улӥз Совето Союзлэн Героез Иван Алексеевич Скобелев. Туэ 1-тӥ мае солэн вордскемез дырысен 105 ар тырмиз.

Иже вуыса, рос-прос юалляськимы, кызьы мыноно та гуртэ вакчи дыр куспын. Ижевск–Кильмезь поезд вуттӥз Сюрек станцие. Татысен пуксёно Киров улосысь Кильмезе нуись автобусэ. Отчы вуимы уйшор бере. Мӧйы кышномурт милемлы гостиницалэсь юртсэ возьматӥз. Со вылэм огшоры корка.

Нылпиос жадиллям, шӧдске, ӵукназэ кема изизы. Но автостанцие вуыса, валамы: ӝытпал гинэ сюрес вылэ потыны быгатом. Ноку но ум вунэтэ Кильмезь шур вамен мотор лодкаен потэммес. Нылпиослы со ӟечгес но вунонтэм кылиз, дыр, малпасько. Азьланьын Максимовское, Чернушка, Салья. Сюрес вылысен тодматскимы Салья гуртын улэм воргоронэн Яков Петрович Комаровен. Али, пе, мукет гуртын улӥсько ни.

Туж шумпотӥмы, Салья гуртэ со нуналэ ик вуимы шуыса. Укыр ӝужытэсь пужымъёс будо та котырын, гондыръёс но вань, пе. Но кышканэз ӧвӧл, шуизы, соос адями вылэ уг урдӥсько. Оло, ваче вуысалыд ке, кышкасалыд, дыр, но милемлы нюлэс кузёен пумиськыны ӧз кылды.

Салья гуртэ вуыса тодматскимы бригадирен. Милемыз Совето Союзлэн Героезлэн Иван Алексеевич Скобелевлэн ӵыжы-выжыосыз кожаллям. Интыязы хозяйствоысь бухгатерлэн коркаяз, ачиз со одӥг арнялы кошкем вылэм.

Изён азьын тодматскимы гуртэн. Одӥгаз коркась адӟимы горд буям кизилиез, вӧзтӥмы ортчись пиосмурт ивортӥз: та юртын, пе, улӥз Иван Алексеевич Скобелев, нош Саринка гуртын улэ солэн нылыз Роза Ивановна Медведева. Ӵуказеяз ми дыртӥмы та пумиськонэ.

Роза Ивановна школаын вылэм. Тодматским, лыктэммылэсь мугзэ верамы, со милемыз дораз нуиз, чаен куно кариз. Пукон сямен вераз атаез сярысь:

– Милям гуртамы атаез «ядяй» шуо. Вордскиз со 1901-тӥ арын 1-тӥ мае огшоры крестьян семьяын. Кӧня тодӥсько аслэсьтым атайме, котьку но паймисько вал солэн чидамезлы но адямилы оскыса улэмезлы. Ноку уз пӧсекты, лад-лад валэктоз, мынектоз. Семьяямы ми куать нылпи вал. Рая апае куинь арескын кулэмын, нош Аркашамы но Лидамы – берлогес. Соберем мон вордӥськи, ужасько Саринкаысь школаын воспитательын. Надямы врач- хирург, ужа Санкт-Петербургын, Алёшамы улэ Сарапулын, со – инженер. Атае ортчемын Граждан ожез но, Быдӟым ожез но. Бугырес аръёсы Вятка губерниысь егитъёсын ӵош Колчаклы пумит ожмаськыны кошке, Ишима дорысен Забайкальеозь вуэ. Колчакез уллямзы бере Врангельлы пумит ожмаське на.

Горд Армиын кыдам комсомолец Выль Мултанысь педагогической училище дышетскыны пыре, пыӵал интые, кияз книга кутэ. Ачиз сярысь но, дышетэм пиналъёсыз сярысь но со трос мадьысал. Тӥ ӧжыт гинэ бере кылиды: атае улонысь кошкиз 1982-тӥ арын 1-тӥ сентябре. Мон ӟеч тодӥсько на дядяелэсь 1941-тӥ арын фронтэ кошкемзэ. Быдэс гуртэн келямы оже мынӥсьёсты – ваньмыз бӧрдо. Тае адӟыса, атае шуиз: «Асьмеос одно ик вормом! Оскелэ, эшъёс».

Кошкыкуз атае пичи пужымлэсь йылзэ чигтӥз, собере маке ым пушказ сипыртӥз. Со чигтэм пужым йылзэ кисыяз понӥз. Мон али ке но малпасько, ма меда вал со, оло кыӵе ке утиськон сям, оло Инмарлы вазиськон?

Атае Москва дорын ожмаськиз. Нырысь бронебойщик вылэм, кузь гумыё противотанковой пыӵалэн ыбылыны дышетӥллям.

Контрнаступление кутскон азьын соослэсь стрелковой полксэс Ржев доры вошто. Кышкатэк но сэзь ожмаськемез понна сёто «За отвагу» медаль. Собере госпиталь. Йӧнамез бере атайме выль часте интыяло, отын пулемётчике дышетске. Ожмаське Курской дугаын, Смоленск дорын. 1943-тӥ арын гужем атайме партие куто, нош ар ортчыса, старшиназы бырем бере, сое юнмато роталы парторге.

Собере вал Белоруссия, Польша, Германия. Ожъёс вискын гожтэт чуръёс пыр но валано: макем секыт вал асьме солдатъёслы. Атае туж ик ӧз яраты ке но вераськыны война сярысь, Лёнькамы ёртылӥз. Мадиськыкуз куд-ог дыръя солэн синъёсыз нюромо вал, куараез воштӥське, собере нош ик, кытысь ке кужым шедьтыса, капчияк шокче но «улом ай, пие», шуэ. Со вераськемъёс пӧлысь мыным тужгес но сюлмам кылизы таосыз: «Ми передовойын ветлӥм бере, вал олокыӵе но дыръёс. Одӥг полаз сиськытэк куинь нунал курадӟим. Наступление мынӥмы, нош кухня милемыз ыштэм.

Кыӵе секыт сием потонэз чиданы! Соин ик нырысь кӧтэз тыроно, собере ини уж борды кутсконо. Одӥг полаз быдэс нунал йӧ вылын кыллиськиз. Куазь туж кезьыт, пелляське, инмысь зор-кот усе. Йырдэ ӝутӥд ке, снайперъёс соку ик мекалтозы. Тӥни сыӵе дыръя пинал пиосмы ӧз чидалэ, куинез улонысь кошкиз. Война дышетӥз милемыз, одӥг радэ султыса, агай-вынъёс кадь юн возиськыны. Кинъёс но ӧй вал пӧламы, ноку но серем карон, адямиез ултӥян ӧй вал.

1945-тӥ арын стрелковой полк Одер шур дуре вуэ. Шурлэн сопалаз адӟиське ни Цидлиц немец гурт. Татын тушмонлэн бадӟым кужымез люкамын. Капитан Кошкин разведка ортчытыны ӵектӥз парторглы Иван Скобелевлы. Боецъёс, тӧдьы масхалат дӥсяса, азьлань вамыштӥзы. Шурез потыса, бусы вамен нюжтӥськизы. Гуртын шыпыт, ветлӥсь ӧвӧл. Но тани тушмон асьме разведчикъёсты адӟиз, туж юн ожмаськон пуромиз соку. Ыбылӥськон дыръя бырыны шедиз роталэн командирез. Скобелев ӝутскиз но вань боецъёслы кылымон кеськиз: «Азьлань, эшъёс!» Разведчикъёс парторг сьӧры вамыштӥзы. Ожмаськон котькуд корка понна пуромиз. ӵукна Цидлиц гурт немецъёслэсь мозмытэмын вал. Геройлыко ожмаськемез понна 1945-тӥ арын 10-тӥ апреле рядовой Иван Алексеевич Скобелев пусъемын Совето Союзлэн Героез дано нимын.

– Война бере, госпитальын эмъяськыса, атаймы гуртэ бертӥз, – мадёнзэ азьланьтӥз Роза Ивановна. – Кыӵе шумпотон вал со милемлы. Тодӥсько на, монэ ивор сётыны косӥзы песятаймылы. Бызисько, канжаськыса куинь пол уси. Песятаелэн корка дораз вуи но кесяськисько: «Песятай, атай бертӥз!» Уг тодӥськы ни, оло кылӥзы соос, оло ӧз, нош мон тӧлпери кадь нош ик дорам бертӥ. Туж данъяськисько: милям пичи гинэ Салья удмурт гуртамы улӥз но тыршиз сабырлы, улонэз валась но дунъясь дышетӥсь, мынам атае Иван Алексеевич Скобелев.

Киров улосэ вуылэммы милемлы сюрес усьтӥз Салья выжыослэн пытьыостӥзы экспедициосы ветлыны. Потамы Татарстанысь Балтач ёросысь Вуж Кушкет гуртэ. Отын Салья урамзы вань, нырысь ик отчы пуксем Салья Петырлэн коркаез. Нылпиосын та гуртысь пӧртэм кырӟанъёс, мадёсъёс гожъямы магнитофонэ, диалект кылъёсын тодматскимы. Туж кельшиз милемлы «мызган» кыл, татысь удмуртъёс арганэз озьы шуо.

Пичи Пурга ёросысь Шорын Юриын Салья гурезьзы вань, отчы но вуылӥмы. Потамы Можга ёросысь Вылын Юрие, Игра ёросысь Саляе, Красногорск ёросысь Турае, Вуж Кычинэ, Малягуртэ, Глазов ёросысь Отогуртэ, Яр ёросысь Уканэ, Нижняя Чура, Добрино гуртъёсы. Экспедициосы потамы Михаил Атамановлэн книгаысьтыз Салья выжыос сярысь гожъямъёсызъя. Но уйпалан трос уг ни тодо ас выжыоссы сярысь. Нош Яр ёросысь Салья шаез шедьтӥм ик.

Нылпиос сюрес вылэ котьку но ӝутскем мылкыдын потазы. Кыӵе гинэ тунсыко учыръёсын ӧм пумиськылэ. Вань та ветлэмъёсмыя трос гинэ альбомъёсмы люкаськизы, соос узырмыто школамылэсь историзэ. Потамы асьме уксёен, ёросысьтымы Пионеръёслэн юртсы но юрттӥськиз. Табере со вакытъёс ортчизы, нылпиослэн походъёсы, экспедициосы ветлыны мылкыдзы вань ке но, ваньмыз пыкъяське уксё вылэ. Кулэ палаткаос, оборудование, нош школалэн луонлкез ӧвӧл. Но гуртмылэн, шаермылэн историеныз тодматскон мылкыдмы уг кысы .