Кузнецов Николай Спиридонович

Котькудӥзлэн кылчинэз аслаз

Кузнецов Н. С.

Улонэз мытон ваньмызлы огкадь уг сётӥськы. Огез майбырак улэ-вылэ анай-атаез вӧзын. Коньдонлы уг ёрмы. Вылӥын матысь тодмоосыз вань. Нош ӝутскыны уг пишмыты, ассэ уг шедьты. Мукетыз выжоно луэ тачак шуг-секытъёс пыр.

Алнаш ёросысь Актэмыр гуртысь Николай Кузнецов быдэсмиз ӵужатаез вӧзын. Йылпумъяз Можга педучилищеез но СССР-ысь Кышкытлыклэсь утиськонъя комитетлэсь Москваысь вылӥ школазэ (али академия). Удмурт кун университетын англи кылъя дышетӥсьлэсь дипломзэ басьтӥз. Подполковникозь будӥз. Вольыт вераське удмурт, ӟуч, немец но англи сямен. Кутэмын Россиысь Писательёслэн но Журналистъёслэн огазеяськонъёсазы. Бырйылӥзы «Удмурт кенеш» огазеяськонлы вице-президентэ. Али пенсиын. Тэк уг пукы. Репрессия улэ сюрем интеллигентъёс сярысь книгаос поттӥз. Люка Александр Невский туж дано орденэн пусъем адямиос сярысь материалъёс. Огзэ гинэ юаны ӧй дӥсьты: туж тодмо Николай Кузнецов разведчиклэн нимтулыз ӧз кос меда сое немец кылэз дышетыны но улонзэ КГБ-ен герӟаны?

- Улон тросгес жуге ке, адямилэн ӟечезлы осконэз сӥяны шӧта. Николай Спиридонович, тӥ коммунист вал. Пушкады вань-а Инмарлы вазиськон мылкыд?

- Инмар вань шуыса тодӥсько, сое гажасько. Мон со сярысь урод уг малпаськы. Мед юрттоз шуыса веранэз но валасько, сюлмам пыртӥсько кадь. Котьма ке но мон сямен, котькудӥзлэн мед луоз аслаз туж матысь кылчинэз. Мынам вань. Эн паймелэ: со –ӵужатае, Иван Дмитриевич Кузнецов. Мон сое Инмар интыын адӟисько. Малы ке шуоно ӵужатае анай-атайме воштӥз, монэ сюрес вылэ ӝутӥз, Китай кунгож доры службае келяз. Москваын дышетскыкум но ӧз кушты. Со котьку син азям. Дима пие дас куать арес дыръяз, туспуктэмысь учкыса, ӵужатайме суредаз. Улэп но улэп! Дорам бертэмелы быдэ со суредэн вераськисько, нуналлэсь кызьы ортчемзэ мадисько. Юрттэ кадь озьы.

- Пичи дыръяды ӝужам льӧль малпанды быдэсмиз-а?

- Атае войнаын куинь пол сӧсыртэмын, кунул бодыосын ветлэмын. Сыӵе адямилэсь вордски. Малы? Та улонын маке но лэсьтыны. Нырысь ик дышетӥсь луыны малпай. Ӵужатае но мылкыдме бурдъяз: «Можга педучилищее пырыны быгатӥд ке, со туж умой – дышетӥсьёсыз гажало». Мукетсэ но тодэ вал: ас вакытаз отын дышетскиз Михаил Тимашев, эшез но ӵыжы-выжыез. Оло, мар ке но шедьтод, пе, со сярысь. КГБ-лэн вылӥ школаяз пырыса но, та утчанлэсь ӧй куштӥськы. Озьы пумен вуи репрессиос улэ сюрем писательёсты вужерысь поттонэ.

- Озьыен, «Шимес пеймытысь» книгады Тимашев бордысен вордскиз?

- Ӵапак со бордысен! Ма, мукет ласянь но мыным шуд усиз шуод-а, мар-а. Туж троссэ вунэм нимъёсты калыклы нырысьсэ 1956-тӥ арын берыктӥзы. Кыкетӥзэ сыӵе ужрад ӝутӥзы 1989-тӥын. Удмуртиын сое быдэстон понна кылдытӥзы пресс-группа. Отчы пыртӥзы ньыльзэ вылӥ кивалтӥсез но монэ (мон майор вал). Отчы кулэ луизы ӧжытак ке но журналистикаен вырыны быгатӥсьёс. Гожъялляй «Удмурт дунне» но «Удмуртская правда» газетъёсы. Удмурт телевидениын туж трос передачаос нуим Семён Карповен ӵош. Соку университетысь одӥг ӟуч профессор шуиз: «Тӥляд публикациосты уно. Огазеяса, оло, кыӵе ке сборник поттоды?» Мон малпай: ӧй быгаты ке? Но – пӧрмытӥ. Со книга пыр нырысьсэ верамын, кыӵе вал удмурт интеллигенция, кызьы со курадӟиз.

- Книгады азьланяз ӵемтон кадь ӧз луы-а?

- Ӧз кадь. Отын мон зэмлыкез шараяны тырши. Бен, тазьы шуисез но вал: «Дӥсьтыса вамыштӥд, нош дыр воштӥськиз ке, астэ тонэ уз зӥбе меда?» Но, малпасько, калыкмы мукет ини, репрессиос уз луэ. Собере, мон ноку пож ву ӧй кисьта. Кызьы вань, озьы гожтӥ, ас малпанъёсме усьтылӥ на, но югдурез йырин-чукин ӧй берыкъя! Озьы удмурт, ӟуч, англи кылъёсын куинь книгае потӥз. Соосъя одӥг но быдтыса куштӥсь критика ӧй вал. Талэсь ортчыт – кунгож сьӧрысь укмыс-а, дас-а дунъет басьтӥ. Озьыен, мон быгатӥ со ужез быдэстыны. Ог дасо муртлэн та выллем книга поттыны луонлыкез вал, огзылэн но дӥсьтонзы ӧз тырмы. Туннэ понна Волга но Урал вискын, одӥг областьын но, одӥг республикаын но, та выллем материал ӧз дасялэ на. Та ласянь чуваш писатель Мишши Юхма «Не умолкающий колокол Удмуртии» нимын рецензия гожтӥз.

Ӵемтонъёс сярысь малпаса улысал ке, ваньмыз шоры киме шонтысал. Бен, монэ кытӥ-кытӥ пыкыло ик: тыныд гинэ луонлык сётӥзы но - лэсьтӥд. Но макем трос но секыт ужез вал отын! Сюлэсь уно «делоосты» учкылӥ но пыр-поч эскерылӥ. Ваньзэ – уж бере, ӝытъёсы, шутэтскон нуналъёсы. Малпалляй: кошкы вал коммерцие! Укмыстон укмыс процентэз ми дорын ужамъёс озьы ик каризы. Но соку малпай: калык мынэсьтым мукетсэ возьма, куке но солы кулэ луозы берыктэм нимъёс.

- Семьядылы висъяны дыр шедьтылӥды на-а?

- Ӧйгес. Тямысысен тямысозь уж дурам ышылӥ. Милемлы шуо вал: семьяды сярысь эн ик малпалэ, тӥ – чекистъёс. Пиосылэсь будэмзэс но умой-умой адӟыса ӧй вуы кадь. Пенсие потэме бере но соосын вырыны ӧй ваньмы, архивъёсын пумтэм-йылтэм тырши. Кузпалы, Алевтина Никифоровна, тышкаськылӥз но. Огеныз гинэ буйгатӥ на сое: «Мон асьме калыклы памятник лэсьтӥсько. Кулэме бере но учкозы ужам ужме».

- Та улонын мар тӥледыз нуэ?

- Котькудӥзлэн аслаз валтӥсез. Мон понна нырысь ик - кышное. Трос лыдӟиське, туж быгатэ театр ласянь вераськыны. Саклыкме висъяны уг ке но вуиськы, ог-огмес мур валаськомы. Мукетыз тодмет – нылпиосы. Куиньметӥез – вунэм интеллигенциез пеймытысь поттон. Та секыт ныпъетэз, Инмарен сётэм киросэз, мон ачим пельпум вылам ӝутӥ! Кызьы сотэк? Визьмо удмуртъёс асьсэ виренызы юнматӥзы, шуыны луоз, удмурт кунмес!

Огез али но чидантэм вӧсь чепыльтэ. Кузебай Герд быремен валче асьме пушкын маке но тӥяськиз кадь. Удмуртъёслэн 1991-тӥ арын люкаськем ӧтчамазы верай вал: «Самой бадӟымзэ асьмеос ум лэсьтӥське, эшъёс. Умой-умой валаны кулэ: ма понна быризы Герд но мукетъёс? Быгатомы-а соослэсь нюръяськон пыр потэм малпанъёссэс быдэсмытыны? Туала арын саесъёсмес ӧм пужаллялэ ке, асьмелэсь толыкез ӧвӧл! Мае соос ӧз лэсьтэ, али лэсьтоно». Та киросэ йырам но, сюлэмам но.

Бен, мукетыз но вань на. Али «Удмуртская история в лицах» ужпумен вырисько. Возьматэме потэ: удмуртъёс Быдӟым война дыръя туж кужмоесь, сэзесь, кышканэз валасьтэмесь вылӥллям. Кылсярысь, Александр Невский орденэн пусъем дас удмурт адямиез шедьтӥ. Шарканысь шор ёзо школалэн азьвыл директорез Лопатин кык сыӵе орден басьтэм. Кин тае тодэ? Нокин! Я кызьы тае уд вера? Шаркан ёрослэн йырызлы Александр Прохоровлы дэмлай Лопатинлэсь нимзэ сётыны огезлы ульчалы. Соглаш кариськиз кадь. Та гинэ но мыным бадӟым шумпотон ни.

- Тӥледлы сётӥзы ни-а Кузебай Герд нимо премия?

- Мынэсьтым тае юаз венгер тодосчи Петер Домокош но. Шуи: ӧз на сётэ, отчыозь сузьтӥськыны но уг турттӥськы. Ачим куром шат? Солэн дуныз но бадӟым ӧвӧл. Но адями 1989-тӥ арысен Гердлэсь нимзэ ӝутэ ни ке, куинь книга поттэ… Уг тодӥськы, «Удмурт кенеш» огазеяськонлэн президентэзлэн Валентин Тубыловлэн лауреатлы тупась куронъёсыз музонэсь, дыр. Монэ сотэк дунъяло. Гонорар сярысь но ноку ӧй малпаськы. Кызь куать сюрссэ книгаме удмурт калыклы кузьмай. Тау каремзы – самой бадӟым шумпотон. Мынам книгаосыя студентъёс гожъяло курсовой ужъёс.

- Кытысен кенжиз гожъяськон мылкыдды? Можга педучилищее «висьыса» вуиды ни-а?

- Сыӵе мылкыды куатетӥ классысен пуромиз. Тямысэтӥяз вуэме бере Байтэрек школае ветлӥз Герман Ходырев. Бугыртӥз монэ: гожъяськемед, пе, пӧрме, азьланяз но озьы ик тыршы. Со мынам нырысетӥ дышетӥсе вал.

- Адями вурысэн уг вордӥськы. Ымнырады кин сыӵе пытьы кельтӥз?

- Кунгож дурын ваче пумит урдскылонъёс вал. Отын ик шуккиськи. Озьы ке но, шеко ке но, монэ дышетскыны басьтӥзы. Вань комиссиос пыр потӥ. Берлогес монэ юнматӥзы группалы командире. Нырысь туж секыт вал: уг кылзӥсько. Ваньмаз сямен - генераллэн, полковникъёслэн, партилэн обкомезлэн но райкомъёсызлэн секретарьёссылэн нылпиоссы. Но бӧрысь тупатскизы, монэ гажаны кутскизы.

- Азьланяз маке выльзэ пӧраны малпаськоды-а?

- Вылӥос юрттысалзы ке, Удмуртилэн ожын басьтэм данэзъя история поттысал. Туннэ понна орденъёсын пусъем уно сю адямиез шедьтӥ ни. Соосты али ӧд шарая ке, отӥяз нокин уз басьтӥськы ни.

Источник:

Кузнецов Н. С. Котькудӥзлэн кылчинэз аслаз / Н. С. Кузнецов ; записала Елена Сараматова // Удмурт дунне. - 2005. - 11 нояб. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"